੫. ਸੇਸਕਸਿਣਨਿਦ੍ਦੇਸਵਣ੍ਣਨਾ

ਆਪੋਕਸਿਣਕਥਾਵਣ੍ਣਨਾ

੯੧. ਯਥਾਵਿਤ੍ਥਾਰਿਤਸ੍ਸ ਅਤ੍ਥਸ੍ਸ ਅਤਿਦੇਸੋਪਿ ਵਿਤ੍ਥਾਰਟ੍ਠਾਨੇਯੇਵ ਤਿਟ੍ਠਤੀਤਿ ਆਹ ‘‘ਵਿਤ੍ਥਾਰਕਥਾ ਹੋਤੀ’’ਤਿ. ਆਪੋਕਸਿਣਨ੍ਤਿ ਆਪੋਕਸਿਣਜ੍ਝਾਨਂ, ਆਪੋਕਸਿਣਕਮ੍ਮਟ੍ਠਾਨਂ ਵਾ. ਸਬ੍ਬਂ ਵਿਤ੍ਥਾਰੇਤਬ੍ਬਨ੍ਤਿ ਪਥਵੀਕਸਿਣਕਮ੍ਮਟ੍ਠਾਨੇ ਵੁਤ੍ਤਨਯੇਨ ਵਿਤ੍ਥਾਰੇਤਬ੍ਬਂ. ਏਤ੍ਤਕਮ੍ਪੀਤਿ ‘‘ਕਤੇ ਵਾ ਅਕਤੇ ਵਾਤਿ ਸਬ੍ਬਂ ਵਿਤ੍ਥਾਰੇਤਬ੍ਬ’’ਨ੍ਤਿ ਏਤ੍ਤਕਮ੍ਪਿ ਅਵਤ੍ਵਾ. ਸਾਮੁਦ੍ਦਿਕੇਨ ਲੋਣੁਦਕੇਨ ਭਰਿਤੋ ਜਲਾਸਯੋ ਲੋਣੀ. ਨੀਲਾਦਿਵਣ੍ਣਸਙ੍ਕਰਪਰਿਹਰਣਤ੍ਥਂ ‘‘ਸੁਦ੍ਧਵਤ੍ਥੇਨ ਗਹਿਤ’’ਨ੍ਤਿ ਵੁਤ੍ਤਂ. ਅਞ੍ਞਨ੍ਤਿ ਭੂਮਿਂ ਸਮ੍ਪਤ੍ਤਂ. ਤਥਾਰੂਪਨ੍ਤਿ ਯਾਦਿਸਂ ਆਕਾਸਜਂ ਉਦਕਂ, ਤਾਦਿਸਂ. ਤੇਨਾਹ ‘‘ਵਿਪ੍ਪਸਨ੍ਨਂ ਅਨਾਵਿਲ’’ਨ੍ਤਿ, ਯਂ ਪਨ ਉਦਕਨ੍ਤਿ ਸਮ੍ਬਨ੍ਧੋ. ‘‘ਨ ਵਣ੍ਣੋ ਪਚ੍ਚਵੇਕ੍ਖਿਤਬ੍ਬੋ’’ਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਪਥਵੀਕਸਿਣਕਥਾਯਂ ਵੁਤ੍ਤਮੇਵ. ਲਕ੍ਖਣਂ ਪਨ ਇਧ ਪਗ੍ਘਰਣਲਕ੍ਖਣਂ ਵੇਦਿਤਬ੍ਬਂ.

ਵੁਤ੍ਤਨਯੇਨੇਵਾਤਿ ਪਥਵੀਕਸਿਣਭਾਵਨਾਯਂ ਵੁਤ੍ਤਨਯੇਨੇਵ. ਤਰਙ੍ਗੁਟ੍ਠਾਨਾਦਿ, ਫੇਣਮਿਸ੍ਸਤਾਦਿ ਚ ਇਧ ਕਸਿਣਦੋਸੋ. ਸੋਤਿ ਯੋਗਾਵਚਰੋ. ਤਸ੍ਸਾਤਿ ਪਟਿਭਾਗਨਿਮਿਤ੍ਤਸ੍ਸ.

ਤੇਜੋਕਸਿਣਕਥਾਵਣ੍ਣਨਾ

੯੨. ਸਿਨਿਦ੍ਧਾਨਿ ਸਿਨੇਹਵਨ੍ਤਾਨਿ. ਸਾਰਦਾਰੂਨਿ ਨ ਫੇਗ੍ਗੁਦਾਰੂਨਿ. ਜਾਲਾਯ ਚਿਰਟ੍ਠਿਤਤ੍ਥਂ ਸਿਨਿਦ੍ਧਸਾਰਦਾਰੁਗ੍ਗਹਣਂ. ਘਟਿਕਂ ਘਟਿਕਂ ਕਤ੍ਵਾਤਿ ਖਨ੍ਧਸੋ ਕਰਿਤ੍ਵਾ. ਆਲਿਮ੍ਪੇਤ੍ਵਾਤਿ ਜਾਲੇਤ੍ਵਾ. ਘਨਜਾਲਾਯਾਤਿ ਅਵਿਰਲ਼ਵਸੇਨ ਪਵਤ੍ਤਅਗ੍ਗਿਜਾਲਾਯਂ.

ਪਤਨਸਦਿਸਨ੍ਤਿ ਪਤਮਾਨਸਦਿਸਂ. ਅਕਤੇ ਗਣ੍ਹਨ੍ਤਸ੍ਸਾਤਿ ਵੁਤ੍ਤਨਯੇਨ ਯਥਾ ਕਸਿਣਮਣ੍ਡਲਂ ਪਞ੍ਞਾਯਤਿ, ਏਵਂ ਅਨਭਿਸਙ੍ਖਤੇ ਕੇਵਲੇ ਤੇਜਸ੍ਮਿਂ ਨਿਮਿਤ੍ਤਂ ਗਣ੍ਹਨ੍ਤਸ੍ਸ.

ਵਾਯੋਕਸਿਣਕਥਾਵਣ੍ਣਨਾ

੯੩. ਵੁਤ੍ਤਞ੍ਹੇਤਨ੍ਤਿ ਏਤ੍ਥ ਹਿ-ਸਦ੍ਦੋ ਹੇਤੁਅਤ੍ਥੋ, ਯਸ੍ਮਾਤਿ ਅਤ੍ਥੋ. ਤਸ੍ਸ ‘‘ਤਸ੍ਮਾ’’ਤਿ ਇਮਿਨਾ ਸਮ੍ਬਨ੍ਧੋ. ਉਚ੍ਛਗ੍ਗਨ੍ਤਿ ਉਚ੍ਛੁਖੇਤ੍ਤੇ ਯਥਾਠਿਤਾਨਂ ਅਗ੍ਗਂ. ਏਰਿਤਨ੍ਤਿ ਵਾਤੇਨ ਚਲਿਤਂ. ਸਮੇਰਿਤਨ੍ਤਿ ਸਬ੍ਬਸੋ ਚਲਿਤਂ. ਤਸ੍ਮਾਤਿ ਯਸ੍ਮਾ ‘‘ਵਾਯੋਕਸਿਣਂ…ਪੇ… ਉਪਲਕ੍ਖੇਤੀ’’ਤਿ ਏਵਂ ਵੁਤ੍ਤਂ ਅਟ੍ਠਕਥਾਯਂ, ਤਸ੍ਮਾ. ਸਮਸੀਸਟ੍ਠਿਤਨ੍ਤਿ ਉਪਰਿ ਪਤ੍ਤਾਨਂ ਵਸੇਨ ਸਮਸੀਸਂ ਹੁਤ੍ਵਾ ਠਿਤਂ. ਵੇਲ਼ੁਂ ਵਾ ਰੁਕ੍ਖਂ ਵਾਤਿ ਏਤ੍ਥਾਪਿ ‘‘ਸਮਸੀਸਂ ਠਿਤਂ ਘਨਪਤ੍ਤਵੇਲ਼ੁਂ ਵਾ ਘਨਪਤ੍ਤਰੁਕ੍ਖਂ ਵਾ’’ਤਿ ਆਨੇਤ੍ਵਾ ਯੋਜੇਤਬ੍ਬਂ. ਏਕਙ੍ਗੁਲਾਦਿਪ੍ਪਮਾਣੇਸੁ ਕੇਸੇਸੁ ਰਸ੍ਸਭਾਵਤੋ, ਦੀਘਤਰੇਸੁ ਓਲਮ੍ਬਨਤੋ, ਵਿਰਲ਼ੇਸੁ ਅਨੁਪ੍ਪਵੇਸਤੋ ਵਾਤਪ੍ਪਹਾਰੋ ਨ ਪਞ੍ਞਾਯਤੀਤਿ ਚਤੁਰਙ੍ਗੁਲਪ੍ਪਮਾਣਗ੍ਗਹਣਂ, ਘਨਗ੍ਗਹਣਞ੍ਚ ਕਤਂ. ਏਤਸ੍ਮਿਂ ਠਾਨੇ ਪਹਰਤੀਤਿ ਸਤਿਂ ਠਪੇਤ੍ਵਾਤਿ ਉਚ੍ਛਗ੍ਗਾਦੀਨਂ ਪਚਲਨਾਕਾਰਗ੍ਗਹਣਮੁਖੇਨ ਤੇਸਂ ਪਹਾਰਕੇ ਵਾਤਸਙ੍ਘਾਤੇ ਸਤਿਂ ਉਪਟ੍ਠਪੇਤ੍ਵਾ. ਤਤ੍ਥ ਸਤਿਂ ਠਪੇਤ੍ਵਾਤਿ ਤਸ੍ਮਿਂ ਕਾਯਪਦੇਸਸ੍ਸ ਸਙ੍ਘਟ੍ਟਨਵਸੇਨ ਪਵਤ੍ਤੇ ਵਾਯੁਪਿਣ੍ਡੇ ਸਙ੍ਘਟ੍ਟਨਾਕਾਰਗ੍ਗਹਣਮੁਖੇਨ ਸਤਿਂ ਉਪਟ੍ਠਪੇਤ੍ਵਾ. ‘‘ਉਸੁਮਵਟ੍ਟਿਸਦਿਸ’’ਨ੍ਤਿ ਏਤੇਨ ਪੁਰਿਮਕਸਿਣਸ੍ਸ ਵਿਯ ਇਮਸ੍ਸਾਪਿ ਨਿਮਿਤ੍ਤਸ੍ਸ ਸਂਵਿਗ੍ਗਹਤਂ ਦਸ੍ਸੇਤਿ. ‘‘ਨਿਚ੍ਚਲ’’ਨ੍ਤਿ ਇਮਿਨਾ ਨਿਚ੍ਚਲਭਾਵੋਯੇਵ ਉਗ੍ਗਹਨਿਮਿਤ੍ਤਤੋ ਇਮਸ੍ਸ ਵਿਸੇਸੋਤਿ ਪਟਿਭਾਗਨਿਮਿਤ੍ਤਸ੍ਸਾਪਿ ਉਸੁਮਵਟ੍ਟਿਸਦਿਸਤਾਵ ਵਿਭਾਵਿਤਾ ਹੋਤਿ.

ਨੀਲਕਸਿਣਕਥਾਵਣ੍ਣਨਾ

੯੪. ਅਞ੍ਜਨਰਾਜਿਵਟ੍ਟਾਦਿ ਵਣ੍ਣਧਾਤੁਯਾ ਵਾ. ਤਥਾਰੂਪਂ ਮਾਲਾਗਚ੍ਛਨ੍ਤਿ ਅਵਿਰਲ਼ਵਿਕਸਿਤਨੀਲਵਣ੍ਣਪੁਪ੍ਫਸਞ੍ਛਨ੍ਨਂ ਪੁਪ੍ਫਗਚ੍ਛਂ. ਇਤਰੇਨਾਤਿ ਅਕਤਾਧਿਕਾਰੇਨ. ਗਿਰਿਕਣ੍ਣਿਕਗ੍ਗਹਨੇਨ ਨੀਲਂ ਗਿਰਿਕਣ੍ਣਿਕਮਾਹ. ਕਰਣ੍ਡਪਟਲਂ ਸਮੁਗ੍ਗਪਿਧਾਨਂ. ਪਤ੍ਤੇਹਿਯੇਵਾਤਿ ਨੀਲੁਪ੍ਪਲਾਦੀਨਂ ਕੇਸਰਵਣ੍ਟਾਨਿ ਅਪਨੇਤ੍ਵਾ ਕੇਵਲੇਹਿ ਪਤ੍ਤੇਹਿਯੇਵ. ਪੂਰੇਤਬ੍ਬਨ੍ਤਿ ਨੀਲਵਣ੍ਣਂ ਵਤ੍ਥਂ ਗਹੇਤ੍ਵਾ ਭਣ੍ਡਿਕਂ ਵਿਯ ਬਨ੍ਧਿਤ੍ਵਾ ਯਥਾ ਨੀਲਮਣ੍ਡਲਂ ਹੁਤ੍ਵਾ ਪਞ੍ਞਾਯਤਿ, ਤਥਾ ਚਙ੍ਕੋਟਕਂ ਵਾ ਕਰਣ੍ਡਪਟਲਂ ਵਾ ਪੂਰੇਤਬ੍ਬਂ. ਮੁਖਵਟ੍ਟਿਯਂ ਵਾ ਅਸ੍ਸਾਤਿ ਅਸ੍ਸ ਚਙ੍ਕੋਟਕਸ੍ਸ, ਕਰਣ੍ਡਪਟਲਸ੍ਸ ਵਾ ਮੁਖਵਟ੍ਟਿਯਂ ਬਨ੍ਧਿਤਬ੍ਬਂ. ਮਣਿਤਾਲਵਣ੍ਟਂ ਇਨ੍ਦਨੀਲਮਣਿਮਯਂ ਤਾਲਵਣ੍ਟਂ.

ਪੀਤਕਸਿਣਕਥਾਵਣ੍ਣਨਾ

੯੫. ਪੀਤਕਸਿਣੇ ਮਾਲਾਗਚ੍ਛਨ੍ਤਿ ਇਕ੍ਕਟਾਦਿਮਾਲਾਗਚ੍ਛਂ. ਹਰਿਤਾਲਂ, ਮਨੋਸਿਲਾ ਵਾ ਧਾਤੁ. ਪਤ੍ਤਙ੍ਗਪੁਪ੍ਫੇਹੀਤਿ ਪਤ੍ਤਙ੍ਗਨਾਮਿਕਾ ਪੀਤਵਣ੍ਣਪੁਪ੍ਫਾ ਏਕਾ ਗਚ੍ਛਜਾਤਿ, ਤਸ੍ਸ ਪੁਪ੍ਫੇਹਿ. ਆਸਨਪੂਜਨ੍ਤਿ ਚੇਤਿਯਙ੍ਗਣੇ ਕਤਂ ਆਸਨਪੂਜਂ. ਕਣਿਕਾਰਪੁਪ੍ਫਾਦਿਨਾਤਿ ਆਦਿ-ਸਦ੍ਦੇਨ ਆਕੁਲਿਕਿਙ੍ਕਿਰਾਤਪੁਪ੍ਫਾਦੀਨਂ ਸਙ੍ਗਹੋ ਦਟ੍ਠਬ੍ਬੋ.

ਲੋਹਿਤਕਸਿਣਕਥਾਵਣ੍ਣਨਾ

੯੬. ਲੋਹਿਤਮਣਿ ਲੋਹਿਤਙ੍ਗਮਣਿਆਦਿ. ਲੋਹਿਤਧਾਤੁ ਗੇਰੁਕਜਾਤਿਹਿਙ੍ਗੁਲਿਕਾਦਿ.

ਓਦਾਤਕਸਿਣਕਥਾਵਣ੍ਣਨਾ

੯੭. ਓਦਾਤਕਸਿਣੇ ਮਾਲਾਗਚ੍ਛਨ੍ਤਿ ਨਨ੍ਦਿਯਾਵਤ੍ਤਾਦਿਮਾਲਾਗਚ੍ਛਂ. ਧਾਤੁ ਕਕ੍ਕਟਿਮੁਤ੍ਤਸੇਤਿਕਾਦਿ.

ਆਲੋਕਕਸਿਣਕਥਾਵਣ੍ਣਨਾ

੯੮. ਤਥਾ ਅਸਕ੍ਕੋਨ੍ਤੇਨਾਤਿ ਯਥਾ ਸੂਰਿਯਾਲੋਕਾਦਿਵਸੇਨ ਓਭਾਸਨਿਮਿਤ੍ਤੁਪ੍ਪਾਦਨਂ ਵੁਤ੍ਤਂ, ਤਸ੍ਸ ਓਭਾਸਮਣ੍ਡਲਸ੍ਸ ਨ ਚਿਰਟ੍ਠਿਤਿਤਾਯ ਤਥਾ ਨਿਮਿਤ੍ਤੁਪ੍ਪਾਦਨਂ ਕਾਤੁਂ ਅਸਕ੍ਕੋਨ੍ਤੇਨ. ਘਟਮੁਖੇਨ ਨਿਗ੍ਗਚ੍ਛਨਕਓਭਾਸਸ੍ਸ ਮਹਨ੍ਤਭਾਵਤੋ ‘‘ਘਟਮੁਖਂ ਪਿਦਹਿਤ੍ਵਾ’’ਤਿ ਵੁਤ੍ਤਂ. ਭਿਤ੍ਤਿਮੁਖਨ੍ਤਿ ਭਿਤ੍ਤਿਅਭਿਮੁਖਂ. ਉਟ੍ਠਿਤਮਣ੍ਡਲਸਦਿਸਨ੍ਤਿ ਭਿਤ੍ਤਿਆਦੀਸੁ ਉਟ੍ਠਿਤਪਾਕਤਿਕਆਲੋਕਮਣ੍ਡਲਸਦਿਸਂ. ਘਨਵਿਪ੍ਪਸਨ੍ਨਂ ਆਲੋਕਪੁਞ੍ਜਸਦਿਸਨ੍ਤਿ ਭਗਵਤੋ ਬ੍ਯਾਮਪ੍ਪਭਾ ਵਿਯ ਬਹਲੋ, ਵਿਪ੍ਪਸਨ੍ਨੋ ਚ ਹੁਤ੍ਵਾ ਪੁਞ੍ਜਭੂਤੋ ਆਲੋਕੋ ਅਤ੍ਥਿ ਚੇ, ਤਂਸਦਿਸੋਤਿ ਅਤ੍ਥੋ.

ਪਰਿਚ੍ਛਿਨ੍ਨਾਕਾਸਕਸਿਣਕਥਾਵਣ੍ਣਨਾ

੯੯. ਛਿਦ੍ਦਸਦਿਸਮੇਵ ਹੋਤੀਤਿ ਯੇਹਿ ਭਿਤ੍ਤਿਪਰਿਯਨ੍ਤਾਦੀਹਿ ਪਰਿਚ੍ਛਿਨ੍ਨਂ, ਤਂ ਛਿਦ੍ਦਂ, ਤਂਸਦਿਸਂ, ਤੇਨਵਾਕਾਰੇਨ ਉਗ੍ਗਹਨਿਮਿਤ੍ਤਂ ਉਪਟ੍ਠਾਤੀਤਿ ਅਤ੍ਥੋ. ‘‘ਵਡ੍ਢਿਯਮਾਨਮ੍ਪਿ ਨ ਵਡ੍ਢਤੀ’’ਤਿ ਉਗ੍ਗਹਨਿਮਿਤ੍ਤਸ੍ਸ ਅਵਡ੍ਢਨੀਯਤਂ ਦਸ੍ਸੇਤੁਂ ਵੁਤ੍ਤਂ. ਸਬ੍ਬਮ੍ਪਿ ਹਿ ਉਗ੍ਗਹਨਿਮਿਤ੍ਤਂ ਵਡ੍ਢਿਯਮਾਨਂ ਨ ਵਡ੍ਢਤਿਯੇਵ. ਸਤਿਪਿ ਚ ਵਡ੍ਢੇਤੁਕਾਮਤਾਯਂ ਵਡ੍ਢਨਾ ਨ ਸਮ੍ਭਵਤਿ ਭਾਵਨਾਯ ਪਰਿਦੁਬ੍ਬਲਤ੍ਤਾ. ਭਾਵਨਾਵਸੇਨ ਹਿ ਨਿਮਿਤ੍ਤਵਡ੍ਢਨਾ. ਪਟਿਭਾਗਨਿਮਿਤ੍ਤਂ ਪਨ ਤਸ੍ਮਿਂ ਉਪ੍ਪਨ੍ਨੇ ਭਾਵਨਾ ਥਿਰਾਤਿ ਕਤ੍ਵਾ ‘‘ਵਡ੍ਢਿਯਮਾਨਂ ਵਡ੍ਢਤੀ’’ਤਿ ਵੁਤ੍ਤਂ.

ਕਿਞ੍ਚਾਪਿ ਪਾਲ਼ਿਯਂ ‘‘ਪਥਵੀਕਸਿਣਾਦੀਨਿ ਰੂਪਝਾਨਾਰਮ੍ਮਣਾਨਿ ਅਟ੍ਠੇਵ ਕਸਿਣਾਨਿ ਸਰੂਪਤੋ ਆਗਤਾਨਿ, ਓਦਾਤਕਸਿਣੇ ਪਨ ਆਲੋਕਕਸਿਣਂ, ਆਕਾਸਕਸਿਣੇ ਚ ਪਰਿਚ੍ਛਿਨ੍ਨਾਕਾਸਕਸਿਣਂ ਅਨ੍ਤੋਗਧਂ ਕਤ੍ਵਾ ਦੇਸਨਾ ਕਤਾ’’ਤਿ ਅਧਿਪ੍ਪਾਯੇਨਾਹ ‘‘ਇਤਿ ਕਸਿਣਾਨਿ ਦਸਬਲੋ, ਦਸ ਯਾਨਿ ਅਵੋਚਾ’’ਤਿ. ਪਕਿਣ੍ਣਕਕਥਾਪਿ ਵਿਞ੍ਞੇਯ੍ਯਾਤਿ ਪੁਬ੍ਬੇ ਵਿਯ ਅਸਾਧਾਰਣਂ ਤਸ੍ਮਿਂ ਤਸ੍ਮਿਂ ਕਸਿਣੇ ਪਟਿਨਿਯਤਮੇਵ ਅਤ੍ਥਂ ਅਗ੍ਗਹੇਤ੍ਵਾ ਅਸਾਧਾਰਣਤੋ, ਸਾਧਾਰਣਤੋ ਚ ਤਤ੍ਥ ਤਤ੍ਥ ਪਕਿਣ੍ਣਕਂ ਵਿਸਟਂ ਅਤ੍ਥਂ ਗਹੇਤ੍ਵਾ ਪਵਤ੍ਤਾ ਪਕਿਣ੍ਣਕਕਥਾਪਿ ਵਿਜਾਨਿਤਬ੍ਬਾ.

ਪਕਿਣ੍ਣਕਕਥਾਵਣ੍ਣਨਾ

੧੦੦. ਆਦਿਭਾਵੋਤਿ ਏਤ੍ਥ ਆਦਿ-ਸਦ੍ਦੇਨ ਯਸ੍ਸ ਕਸ੍ਸਚਿ ਪਥਵੀਪਕ੍ਖਿਯਸ੍ਸ ਵਤ੍ਥੁਨੋ ਨਿਮ੍ਮਾਨਾਦਿਂ ਸਙ੍ਗਣ੍ਹਾਤਿ. ਠਾਨਨਿਸਜ੍ਜਾਦਿਕਪ੍ਪਨਂ ਵਾਤਿ ਏਤ੍ਥਾਪਿ ‘‘ਆਕਾਸੇ ਵਾ ਉਦਕੇ ਵਾ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਪਰਿਤ੍ਤਅਪ੍ਪਮਾਣਨਯੇਨਾਤਿ ਨੀਲਾਦਿਵਣ੍ਣਂ ਅਨਾਮਸਿਤ੍ਵਾ ਪਰਿਤ੍ਤਅਪ੍ਪਮਾਣਨਯੇਨੇਵ. ਏਵਮਾਦੀਨੀਤਿ ਆਦਿ-ਸਦ੍ਦੇਨ ਸਰੀਰਤੋ ਉਦਕਧਾਰਾਨਿਮ੍ਮਾਨਾਦਿਂ ਸਙ੍ਗਣ੍ਹਾਤਿ.

ਯਦੇਵ ਸੋ ਇਚ੍ਛਤਿ ਤਸ੍ਸ ਡਹਨਸਮਤ੍ਥਤਾਤਿ ਬਹੂਸੁ ਕਪ੍ਪਾਸਪਿਚੁਸਾਰਦਾਰੁਆਦੀਸੁ ਏਕਜ੍ਝਂ ਰਾਸਿਭੂਤੇਸੁ ਠਿਤੇਸੁ ਯਂ ਯਦੇਵ ਇਚ੍ਛਤਿ, ਤਸ੍ਸ ਤਸ੍ਸੇਵ ਡਹਨਸਮਤ੍ਥਤਾ. ਇਧ ਆਦਿ-ਸਦ੍ਦੇਨ ਅਨ੍ਧਕਾਰਵਿਧਮਨਾਦਿਂ ਸਙ੍ਗਣ੍ਹਾਤਿ.

ਵਾਯੁਗਤਿਯਾ ਗਮਨਂ ਵਾਯੁਗਤਿਗਮਨਂ, ਅਤਿਸੀਘਗਮਨਂ. ਇਧ ਆਦਿ-ਸਦ੍ਦੇਨ ਯਦਿਚ੍ਛਿਤਦੇਸਨ੍ਤਰਂ ਪਾਪੁਣਨਾਦਿਂ ਸਙ੍ਗਣ੍ਹਾਤਿ.

ਸੁਵਣ੍ਣਨ੍ਤਿ ਅਧਿਮੁਚ੍ਚਨਾ ਸੁਵਣ੍ਣਭਾਵਾਧਿਟ੍ਠਾਨਂ ਸੇਯ੍ਯਥਾਪਿ ਆਯਸ੍ਮਾ ਪਿਲਿਨ੍ਦਵਚ੍ਛੋ (ਪਾਰਾ. ੬੧੯-੬੨੦) ਤਿਣਣ੍ਡੁਪਗਪਾਸਾਦਾਦੀਨਂ. ਵੁਤ੍ਤਨਯੇਨਾਤਿ ਸੁਵਣ੍ਣਦੁਬ੍ਬਣ੍ਣਨਯੇਨ.

ਵਣ੍ਣਕਸਿਣੇਸੁ ਤਤ੍ਥ ਤਤ੍ਥ ਆਦਿ-ਸਦ੍ਦੇਨ ਨੀਲੋਭਾਸਨਿਮ੍ਮਾਨਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਪਥਵੀਪਬ੍ਬਤਾਦੀਤਿ ਆਦਿ-ਸਦ੍ਦੇਨ ਸਮੁਦ੍ਦਾਦੀਨਂ ਸਙ੍ਗਹੋ ਦਟ੍ਠਬ੍ਬੋ.

ਸਬ੍ਬਾਨੇਵ ਦਸਪਿ ਕਸਿਣਾਨਿ. ਇਮਂ ਪਭੇਦਂ ਲਭਨ੍ਤੀਤਿ ਇਮਂ ਵਡ੍ਢਨਾਦਿਵਿਸੇਸਂ ਪਾਪੁਣਨ੍ਤਿ. ਏਕੋਤਿ ਏਕਚ੍ਚੋ. ਸਞ੍ਜਾਨਾਤੀਤਿ ਭਾਵਨਾਪਞ੍ਞਾਯ ਸਞ੍ਜਾਨਾਤਿ. ਆਦਿ-ਸਦ੍ਦੇਨ ‘‘ਆਪੋਕਸਿਣ’’ਨ੍ਤਿਆਦਿਪਾਲ਼ਿਂ ਸਙ੍ਗਣ੍ਹਾਤਿ.

ਉਪਰਿਗਗਨਤਲਾਭਿਮੁਖਂ ‘‘ਪਥਵੀਕਸਿਣਮੇਕੋ ਸਞ੍ਜਾਨਾਤੀ’’ਤਿ ਪਾਲ਼ਿਪਦਾਨਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਤਞ੍ਚ ਖੋ ਵਡ੍ਢਨਵਸੇਨ. ਤੇਨਾਹ ‘‘ਏਕਚ੍ਚੋ ਹਿ ਉਦ੍ਧਮੇਵ ਕਸਿਣਂ ਵਡ੍ਢੇਤੀ’’ਤਿ. ਹੇਟ੍ਠਾਭੂਮਿਤਲਾਭਿਮੁਖਨ੍ਤਿਆਦੀਸੁਪਿ ਏਸੇਵ ਨਯੋ. ਪੁਬ੍ਬੇ ਵਡ੍ਢਨਕਾਲੇ ਪਯੋਜਨਂ ਅਨਪੇਕ੍ਖਿਤ੍ਵਾ ਵਡ੍ਢੇਨ੍ਤਾਨਂ ਵਸੇਨ ਵੁਤ੍ਤਤ੍ਤਾ ਇਦਾਨਿ ‘‘ਤੇਨ ਤੇਨ ਵਾ ਕਾਰਣੇਨ ਏਵਂ ਪਸਾਰੇਤੀ’’ਤਿ ਆਹ, ਕਸਿਣਂ ਵਡ੍ਢੇਤੀਤਿ ਅਤ੍ਥੋ. ਯਥਾ ਕਿਨ੍ਤਿ ਆਹ ‘‘ਆਲੋਕਮਿਵ ਦਿਬ੍ਬਚਕ੍ਖੁਨਾ ਰੂਪਦਸ੍ਸਨਕਾਮੋ’’ਤਿ. ਉਦ੍ਧਞ੍ਚੇ ਰੂਪਂ ਦਟ੍ਠੁਕਾਮੋ ਉਦ੍ਧਂ ਆਲੋਕਂ ਪਸਾਰੇਤਿ, ਅਧੋ ਚੇ ਰੂਪਂ ਦਟ੍ਠੁਕਾਮੋ ਅਧੋ ਆਲੋਕਂ ਪਸਾਰੇਤਿ, ਸਮਨ੍ਤਤੋ ਚੇ ਰੂਪਂ ਦਟ੍ਠੁਕਾਮੋ ਸਮਨ੍ਤਤੋ ਆਲੋਕਂ ਪਸਾਰੇਤਿ, ਏਵਮਯਂ ਕਸਿਣਨ੍ਤਿ ਅਤ੍ਥੋ.

ਏਕਸ੍ਸਾਤਿ ਪਥਵੀਕਸਿਣਾਦੀਸੁ ਏਕੇਕਸ੍ਸ. ਅਞ੍ਞਭਾਵਾਨੁਪਗਮਨਤ੍ਥਨ੍ਤਿ ਅਞ੍ਞਕਸਿਣਭਾਵਾਨੁਪਗਮਨਦੀਪਨਤ੍ਥਂ, ਨ ਅਞ੍ਞਂ ਪਥਵੀਆਦਿ. ਨ ਹਿ ਉਦਕੇਨ ਠਿਤਟ੍ਠਾਨੇ ਸਸਮ੍ਭਾਰਪਥਵੀ ਅਤ੍ਥਿ. ਅਞ੍ਞੋ ਕਸਿਣਸਮ੍ਭੇਦੋਤਿ ਆਪੋਕਸਿਣਾਦਿਨਾ ਸਙ੍ਕਰੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਆਪੋਕਸਿਣਾਦੀਸੁ ਸੇਸਕਸਿਣੇਸੁ. ਏਕਦੇਸੇ ਅਟ੍ਠਤ੍ਵਾ ਅਨਵਸੇਸੇਨ ਫਰਣਪ੍ਪਮਾਣਸ੍ਸ ਅਗ੍ਗਹਣਤੋ ਫਰਣਂ ਅਪ੍ਪਮਾਣਂ. ਤੇਨੇਵ ਹਿ ਨੇਸਂ ਕਸਿਣਸਮਞ੍ਞਾ. ਤਥਾ ਚਾਹ ‘‘ਤਞ੍ਹੀ’’ਤਿਆਦਿ. ਤਤ੍ਥ ਚੇਤਸਾ ਫਰਨ੍ਤੋਤਿ ਭਾਵਨਾਚਿਤ੍ਤੇਨ ਆਲਮ੍ਬਨਂ ਕਰੋਨ੍ਤੋ. ਭਾਵਨਾਚਿਤ੍ਤਞ੍ਹਿ ਕਸਿਣਂ ਪਰਿਤ੍ਤਂ ਵਾ ਵਿਪੁਲਂ ਵਾ ਏਕਕ੍ਖਣੇ ਸਕਲਮੇਵ ਮਨਸਿ ਕਰੋਤਿ, ਨ ਏਕਦੇਸਨ੍ਤਿ.

੧੦੧. ਆਨਨ੍ਤਰਿਯਕਮ੍ਮਸਮਙ੍ਗਿਨੋਤਿ ਪਞ੍ਚਸੁ ਆਨਨ੍ਤਰਿਯਕਮ੍ਮੇਸੁ ਯੇਨ ਕੇਨਚਿ ਸਮਨ੍ਨਾਗਤਾ. ਨਿਯਤਮਿਚ੍ਛਾਦਿਟ੍ਠਿਕਾਤਿ ਅਹੇਤੁਕਦਿਟ੍ਠਿ ਅਕਿਰਿਯਦਿਟ੍ਠਿ ਨਤ੍ਥਿਕਦਿਟ੍ਠੀਤਿ ਤੀਸੁ ਮਿਚ੍ਛਾਦਿਟ੍ਠੀਸੁ ਯਾਯ ਕਾਯਚਿ ਨਿਯਤਾਯ ਮਿਚ੍ਛਾਦਿਟ੍ਠਿਯਾ ਸਮਨ੍ਨਾਗਤਾ. ਉਭਤੋਬ੍ਯਞ੍ਜਨਕਪਣ੍ਡਕਾਤਿ ਉਭਤੋਬ੍ਯਞ੍ਜਨਕਾ, ਪਣ੍ਡਕਾ ਚ. ਕਾਮਞ੍ਚੇਤੇ ਅਹੇਤੁਕਪਟਿਸਨ੍ਧਿਕਤ੍ਤਾ ਵਿਪਾਕਾਵਰਣੇਨ ਸਮਨ੍ਨਾਗਤਾ ਹੋਨ੍ਤਿ, ਤਥਾਪਿ ਤਿਬ੍ਬਕਿਲੇਸਤ੍ਤਾ ਕਿਲੇਸਾਵਰਣੇਨ ਸਮਨ੍ਨਾਗਤਾ ਵੁਤ੍ਤਾ. ਅਹੇਤੁਕਦ੍ਵਿਹੇਤੁਕਪਟਿਸਨ੍ਧਿਕਾਤਿ ਅਹੇਤੁਕਪਟਿਸਨ੍ਧਿਕਾ, ਦ੍ਵਿਹੇਤੁਕਪਟਿਸਨ੍ਧਿਕਾ ਚ. ਦੁਹੇਤੁਕਪਟਿਸਨ੍ਧਿਕਾਨਮ੍ਪਿ ਹਿ ਅਰਿਯਮਗ੍ਗਪਟਿਵੇਧੋ, ਝਾਨਪਟਿਲਾਭੋ ਚ ਨਤ੍ਥਿ, ਤਸ੍ਮਾ ਤੇਪਿ ਵਿਪਾਕਾਵਰਣੇਨ ਸਮਨ੍ਨਾਗਤਾ ਏਵ.

ਅਪਚ੍ਚਨੀਕਪਟਿਪਦਾਯਨ੍ਤਿ ਮਗ੍ਗਸ੍ਸ ਅਨੁਲੋਮਪਟਿਪਦਾਯਂ ਸਚ੍ਚਾਨੁਲੋਮਿਕਾਯਂ ਵਿਪਸ੍ਸਨਾਯਂ. ਅਚ੍ਛਨ੍ਦਿਕਾਤਿ ‘‘ਕਤ੍ਤੁਕਮ੍ਯਤਾਛਨ੍ਦਰਹਿਤਾ’’ਤਿ ਸਮ੍ਮੋਹਵਿਨੋਦਨਿਯਂ ਵੁਤ੍ਤਂ, ਤਮ੍ਪਿ ਨਿਬ੍ਬਾਨਾਧਿਗਮਤ੍ਥਮੇਵ ਕਤ੍ਤੁਕਮ੍ਯਤਾਛਨ੍ਦਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਉਤ੍ਤਰਕੁਰੁਕਾਪਿ ਮਨੁਸ੍ਸਾ ਮਾਰਾਦਯੋ ਵਿਯ ਅਚ੍ਛਨ੍ਦਿਕਟ੍ਠਾਨਂ ਪਵਿਟ੍ਠਾ ਨਿਬ੍ਬੁਤਿਛਨ੍ਦਰਹਿਤਤ੍ਤਾ. ਦੁਪ੍ਪਞ੍ਞਾਤਿ ਭਵਙ੍ਗਪਞ੍ਞਾਯ ਪਰਿਹੀਨਾ. ‘‘ਭਵਙ੍ਗਪਞ੍ਞਾਯ ਪਰਿਪੁਣ੍ਣਾਯਪਿ ਯਸ੍ਸ ਭਵਙ੍ਗਂ ਲੋਕੁਤ੍ਤਰਸ੍ਸ ਪਾਦਕਂ ਨ ਹੋਤਿ, ਸੋਪਿ ਦੁਪ੍ਪਞ੍ਞੋਯੇਵਾ’’ਤਿ ਸਮ੍ਮੋਹਵਿਨੋਦਨਿਯਂ ਵੁਤ੍ਤਂ. ਯਸ੍ਮਿਂ ਹਿ ਭਵਙ੍ਗੇ ਵਤ੍ਤਮਾਨੇ ਤਂਸਨ੍ਤਤਿਯਂ ਲੋਕੁਤ੍ਤਰਂ ਨਿਬ੍ਬਤ੍ਤਤਿ, ਤਂ ਤਸ੍ਸ ਪਾਦਕਂ ਨਾਮ ਹੋਤਿ.

ਕੁਸਲੇਸੁ ਧਮ੍ਮੇਸੂਤਿ ਅਨਵਜ੍ਜਧਮ੍ਮੇਸੁ, ਸੁਖਵਿਪਾਕਧਮ੍ਮੇਸੁ ਵਾ. ਓਕ੍ਕਮਿਤੁਨ੍ਤਿ ਅਧਿਗਨ੍ਤੁਂ. ਕਸਿਣੇਯੇਵਾਤਿ ਕਸਿਣਕਮ੍ਮਟ੍ਠਾਨੇਯੇਵ. ਏਤੇਸਨ੍ਤਿ ਕਮ੍ਮਾਵਰਣਸਮਨ੍ਨਾਗਤਾਦੀਨਂ. ਤਸ੍ਮਾਤਿ ਯਸ੍ਮਾ ਏਤੇ ਵਿਪਾਕਨ੍ਤਰਾਯਾਦਯੋ ਏਵਂ ਅਤ੍ਥਜਾਨਿਕਰਾ, ਅਨਤ੍ਥਹੇਤੁਭੂਤਾ ਚ, ਤਸ੍ਮਾ. ਤਿਣ੍ਣਮੇਵ ਚੇਤ੍ਥ ਅਨ੍ਤਰਾਯਾਨਂ ਗਹਣਂ ਇਤਰਸ੍ਸ ਸਪ੍ਪਟਿਕਾਰਤ੍ਤਾ, ਕਮ੍ਮਨ੍ਤਰਾਯਪਕ੍ਖਿਕਤ੍ਤਾ ਵਾਤਿ ਦਟ੍ਠਬ੍ਬਂ. ਸਪ੍ਪੁਰਿਸੂਪਨਿਸ੍ਸਯਾਦੀਹੀਤਿ ਆਦਿ-ਸਦ੍ਦੇਨ ਤਜ੍ਜਂ ਯੋਨਿਸੋਮਨਸਿਕਾਰਾਦਿਂ ਸਙ੍ਗਣ੍ਹਾਤਿ. ਸਦ੍ਧਨ੍ਤਿ ਕਮ੍ਮਫਲਸਦ੍ਧਂ, ਰਤਨਤ੍ਤਯਸਦ੍ਧਞ੍ਚ. ਛਨ੍ਦਨ੍ਤਿ ਭਾਵਨਾਨੁਯੋਗੇ ਤਿਬ੍ਬਕਤ੍ਤੁਕਮ੍ਯਤਾਸਙ੍ਖਾਤਂ ਕੁਸਲਚ੍ਛਨ੍ਦਂ. ਪਞ੍ਞਨ੍ਤਿ ਪਾਰਿਹਾਰਿਯਪਞ੍ਞਂ. ਵਡ੍ਢੇਤ੍ਵਾਤਿ ਯਥਾ ਭਾਵਨਾ ਇਜ੍ਝਤਿ, ਤਥਾ ਪਰਿਬ੍ਰੂਹੇਤ੍ਵਾ. ਯਂ ਪਨੇਤ੍ਥ ਅਤ੍ਥਤੋ ਨ ਵਿਭਤ੍ਤਂ, ਤਂ ਸੁਵਿਞ੍ਞੇਯ੍ਯਤ੍ਤਾ, ਹੇਟ੍ਠਾ ਵੁਤ੍ਤਨਯਤ੍ਤਾ ਚ ਨ ਵਿਭਤ੍ਤਂ.

ਸੇਸਕਸਿਣਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਇਤਿ ਪਞ੍ਚਮਪਰਿਚ੍ਛੇਦਵਣ੍ਣਨਾ.