੬. ਅਸੁਭਕਮ੍ਮਟ੍ਠਾਨਨਿਦ੍ਦੇਸਵਣ੍ਣਨਾ

ਉਦ੍ਧੁਮਾਤਕਾਦਿਪਦਤ੍ਥਵਣ੍ਣਨਾ

੧੦੨. ‘‘ਅਵਿਞ੍ਞਾਣਕਾਸੁਭੇਸੂ’’ਤਿ ਇਦਂ ਉਦ੍ਧੁਮਾਤਕਾਦੀਨਂ ਸਭਾਵਦਸ੍ਸਨਵਸੇਨ ਵੁਤ੍ਤਂ. ਤਸ੍ਮਾ ਭੂਤਕਥਨਮਤ੍ਤਂ ਦਟ੍ਠਬ੍ਬਂ, ਨ ਸਵਿਞ੍ਞਾਣਕਅਸੁਭਸ੍ਸ ਅਕਮ੍ਮਟ੍ਠਾਨਭਾਵਤੋ. ਤਥਾ ਹਿ ਵਕ੍ਖਤਿ ‘‘ਨ ਕੇਵਲਂ ਮਤਸਰੀਰ’’ਨ੍ਤਿਆਦਿ (ਵਿਸੁਦ੍ਧਿ. ੧.੧੨੨). ਉਦ੍ਧਂ ਜੀਵਿਤਪਰਿਯਾਦਾਨਾਤਿ ਜੀਵਿਤਕ੍ਖਯਤੋ ਉਪਰਿ ਮਰਣਤੋ ਪਰਂ. ਸਮੁਗ੍ਗਤੇਨਾਤਿ ਉਟ੍ਠਿਤੇਨ. ਉਦ੍ਧੁਮਾਤਤ੍ਤਾਤਿ ਉਦ੍ਧਂ ਉਦ੍ਧਂ ਧੁਮਾਤਤ੍ਤਾ ਸੂਨਤ੍ਤਾ. ਉਦ੍ਧੁਮਾਤਮੇਵ ਉਦ੍ਧੁਮਾਤਕਨ੍ਤਿ ਕ-ਕਾਰੇਨ ਪਦਵਡ੍ਢਨਮਾਹ ਅਨਤ੍ਥਨ੍ਤਰਤੋ ਯਥਾ ‘‘ਪੀਤਕਂ ਲੋਹਿਤਕ’’ਨ੍ਤਿ. ਪਟਿਕ੍ਕੂਲਤ੍ਤਾਤਿ ਜਿਗੁਚ੍ਛਨੀਯਤ੍ਤਾ. ਕੁਚ੍ਛਿਤਂ ਉਦ੍ਧੁਮਾਤਂ ਉਦ੍ਧੁਮਾਤਕਨ੍ਤਿ ਕੁਚ੍ਛਨਤ੍ਥੇ ਵਾ ਅਯਂ ਕ-ਕਾਰੋਤਿ ਦਸ੍ਸੇਤੁਂ ਵੁਤ੍ਤਂ ਯਥਾ ‘‘ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤੀ’’ਤਿ (ਮਹਾਵ. ੨੮੫; ਪਰਿ. ੩੨੫; ਦੀ. ਨਿ. ੨.੧੪੯; ਅ. ਨਿ. ੫.੨੧੩). ਤਥਾਰੂਪਸ੍ਸਾਤਿ ‘‘ਭਸ੍ਤਾ ਵਿਯ ਵਾਯੁਨਾ’’ਤਿਆਦਿਨਾ ਯਥਾਰੂਪਂ ਵੁਤ੍ਤਂ, ਤਥਾਰੂਪਸ੍ਸ.

ਸੇਤਰਤ੍ਤੇਹਿ ਪਰਿਭਿਨ੍ਨਂ ਵਿਮਿਸ੍ਸਿਤਂ ਨੀਲਂ ਵਿਨੀਲਂ, ਪੁਰਿਮਵਣ੍ਣਵਿਪਰਿਣਾਮਭੂਤਂ ਵਾ ਨੀਲਂ ਵਿਨੀਲਂ.

ਪਰਿਭਿਨ੍ਨਟ੍ਠਾਨੇਸੁ ਕਾਕਕਙ੍ਕਾਦੀਹਿ. ਵਿਸ੍ਸਨ੍ਦਮਾਨਪੁਬ੍ਬਨ੍ਤਿ ਵਿਸ੍ਸਵਨ੍ਤਪੁਬ੍ਬਂ, ਤਹਂ ਤਹਂ ਪਗ੍ਘਰਨ੍ਤਪੁਬ੍ਬਨ੍ਤਿ ਅਤ੍ਥੋ.

ਅਪਧਾਰਿਤਨ੍ਤਿ ਵਿਵਟਂ ਉਗ੍ਘਾਟਿਤਂ. ਖਿਤ੍ਤਨ੍ਤਿ ਛਡ੍ਡਿਤਂ, ਸੋਣਸਿਙ੍ਗਾਲਾਦੀਹਿ ਵਿਸੁਂ ਕਤ੍ਵਾ ਖਾਦਨੇਨ ਸਰੀਰਸਙ੍ਘਾਤਤੋ ਲੁਞ੍ਚਿਤ੍ਵਾ ਤਹਂ ਤਹਂ ਛਡ੍ਡਿਤਂ. ਵਿਵਿਧਂ ਖਿਤ੍ਤਨ੍ਤਿ ਵਿਕ੍ਖਿਤ੍ਤਂ.

ਪੁਰਿਮਨਯੇਨਾਤਿ ‘‘ਵਿਵਿਧਂ ਖਿਤ੍ਤ’’ਨ੍ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨ. ਸਤ੍ਥੇਨ ਹਨਿਤ੍ਵਾਤਿ ਵੇਰੀਹਿ ਖਗ੍ਗਕਰਵਾਲਾਦਿਨਾ ਸਤ੍ਥੇਨ ਪਹਰਿਤ੍ਵਾ. ਵੁਤ੍ਤਨਯੇਨਾਤਿ ‘‘ਅਞ੍ਞੇਨ ਹਤ੍ਥ’’ਨ੍ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨ.

ਅਬ੍ਭਨ੍ਤਰਤੋ ਨਿਕ੍ਖਮਨ੍ਤੇਹਿ ਕਿਮੀਹਿ ਪਗ੍ਘਰਨ੍ਤਕਿਮਿਕੁਲਂ ਪੁਲ਼ਵਕਨ੍ਤਿ ਆਹ ‘‘ਕਿਮਿਪਰਿਪੁਣ੍ਣਸ੍ਸਾ’’ਤਿ.

ਉਦ੍ਧੁਮਾਤਕਾਦੀਨਿ ਆਮਕਸੁਸਾਨਾਦੀਸੁ ਛਡ੍ਡਿਤਾਸੁਭਾਨਿ. ਨਿਸ੍ਸਾਯਾਤਿ ਪਟਿਚ੍ਚ ਤਾਨਿਪਿ ਆਰਬ੍ਭ. ਨਿਮਿਤ੍ਤਾਨਨ੍ਤਿ ਉਗ੍ਗਹਪਟਿਭਾਗਨਿਮਿਤ੍ਤਾਨਂ. ਏਤਾਨੇਵ ਉਦ੍ਧੁਮਾਤਕਾਦੀਨੇਵ ਨਾਮਾਨਿ.

ਉਦ੍ਧੁਮਾਤਕਕਮ੍ਮਟ੍ਠਾਨਵਣ੍ਣਨਾ

੧੦੩. ਭਾਵੇਤੁਕਾਮੇਨਾਤਿ ਉਪ੍ਪਾਦੇਤੁਕਾਮੇਨ. ਤੇਨਾਤਿ ਆਚਰਿਯੇਨ. ਅਸ੍ਸਾਤਿ ਯੋਗਿਨੋ. ਅਸੁਭਨਿਮਿਤ੍ਤਤ੍ਥਾਯਾਤਿ ਅਸੁਭਨਿਮਿਤ੍ਤਸ੍ਸ ਉਗ੍ਗਣ੍ਹਨਤ੍ਥਾਯ, ਅਸੁਭੇ ਵਾ ਉਗ੍ਗਹਨਿਮਿਤ੍ਤਸ੍ਸ ਅਤ੍ਥਾਯ. ਗਮਨਵਿਧਾਨਨ੍ਤਿ ਗਮਨਵਿਧਿ. ਯੇਨ ਵਿਧਿਨਾ ਗਨ੍ਤਬ੍ਬਂ, ਸੋ ਵਿਧਿ. ਉਗ੍ਗਹਨਿਮਿਤ੍ਤਸ੍ਸ ਉਪ੍ਪਨ੍ਨਕਾਲਤੋ ਪਟ੍ਠਾਯ ਪਥਵੀਕਸਿਣੇ ਵੁਤ੍ਤਂ ਪਟਿਪਜ੍ਜਨਵਿਧਿਂ ਸਨ੍ਧਾਯਾਹ ‘‘ਅਪ੍ਪਨਾਵਿਧਾਨਪਰਿਯੋਸਾਨ’’ਨ੍ਤਿ.

੧੦੪. ਤਾਵਦੇਵਾਤਿ ਸੁਤਕ੍ਖਣੇਯੇਵ. ਅਤਿਤ੍ਥੇਨ ਪੁਣ੍ਣਨਦੀਆਦਿਂ ਪਕ੍ਖਨ੍ਦਨ੍ਤੇਨ ਵਿਯ ਅਨੁਪਵਿਸਨ੍ਤੇਨ ਵਿਯ. ਕੇਦਾਰਕੋਟਿਯਾਤਿ ਕੇਦਾਰਮਰਿਯਾਦਾਯ. ਵਿਸਭਾਗਰੂਪਨ੍ਤਿ ਖੇਤ੍ਤਰਕ੍ਖਿਕਾਦਿਵਿਸਭਾਗਵਤ੍ਥੁਰੂਪਂ. ਸਰੀਰਨ੍ਤਿ ਉਦ੍ਧੁਮਾਤਕਕਲ਼ੇਵਰਂ. ਅਧੁਨਾਮਤਨ੍ਤਿ ਅਚਿਰਮਤਂ ਉਦ੍ਧੁਮਾਤਕਭਾਵਂ ਅਪ੍ਪਤ੍ਤਂ. ਤਕ੍ਕਯਤੀਤਿ ਸਮ੍ਭਾਵੇਤਿ ਭਾਰਿਯਂ ਕਤ੍ਵਾ ਨ ਮਞ੍ਞਤਿ.

੧੦੫. ਰੂਪਸਦ੍ਦਾਦੀਤਿ ਏਤ੍ਥ ਅਮਨੁਸ੍ਸਾਨਂ ਰੂਪੇਹਿ, ਸੀਹਬ੍ਯਗ੍ਘਾਦੀਨਂ ਸਦ੍ਦਾਦੀਹਿ, ਅਮਨੁਸ੍ਸਾਨਮ੍ਪਿ ਵਾ ਰੂਪਸਦ੍ਦਾਦੀਹਿ. ਤਥਾ ਸੀਹਬ੍ਯਗ੍ਘਾਦੀਨਨ੍ਤਿ ਯਥਾਰਹਂ ਯੋਜੇਤਬ੍ਬਂ. ਅਨਿਟ੍ਠਾਰਮ੍ਮਣਾਭਿਭੂਤਸ੍ਸਾਤਿ ਭੇਰਵਾਦਿਭਾਵੇਨ ਅਨਿਟ੍ਠੇਹਿ ਆਰਮ੍ਮਣੇਹਿ ਅਭਿਭੂਤਸ੍ਸ ਅਜ੍ਝੋਤ੍ਥਟਸ੍ਸ. ਨ ਪਟਿਸਣ੍ਠਾਤੀਤਿ ਵਿਦਾਹਵਸੇਨ ਆਸਯੇ ਨ ਤਿਟ੍ਠਤਿ, ਉਚ੍ਛਡ੍ਡੇਤਬ੍ਬਂ ਹੋਤੀਤਿ ਅਤ੍ਥੋ. ਅਞ੍ਞੋਤਿ ਅਮਨੁਸ੍ਸਾਦੀਨਂ ਵਸੇਨ ਵਾ ਅਞ੍ਞਥਾ ਵਾ ਵੁਤ੍ਤਪ੍ਪਕਾਰਤੋ ਅਞ੍ਞੋ ਆਬਾਧੋ ਹੋਤਿ. ਸੋਤਿ ਸਙ੍ਘਤ੍ਥੇਰੋ, ਅਭਿਞ੍ਞਾਤਭਿਕ੍ਖੁ ਵਾ. ਯਸ੍ਸਾਨੇਨ ਆਰੋਚਿਤਂ, ਸੋ. ਕਤਕਮ੍ਮਾਤਿ ਕਤਥੇਯ੍ਯਕਮ੍ਮਾ. ਅਕਤਕਮ੍ਮਾਤਿ ਥੇਯ੍ਯਕਮ੍ਮਂ ਕਾਤੁਕਾਮਾ. ਕਤਕਮ੍ਮਾ ਪਨ ਇਧਾਧਿਪ੍ਪੇਤਾ. ਤਸ੍ਮਾ ਤੇਤਿ ਕਤਕਮ੍ਮਾ ਚੋਰਾ. ਸਹ ਓਡ੍ਢੇਨਾਤਿ ਸਹੋਡ੍ਢਂ, ਥੇਨੇਤ੍ਵਾ ਗਹਿਯਮਾਨਭਣ੍ਡੇਨ ਸਦ੍ਧਿਨ੍ਤਿ ਅਤ੍ਥੋ. ਯਜਮਾਨੋਤਿ ਯਞ੍ਞਂ ਯਜਨ੍ਤੋ ਯਞ੍ਞਸਾਮਿਕੋ. ‘‘ਅਦ੍ਧਾ ਇਮਾਯ ਪਟਿਪਤ੍ਤਿਯਾ ਜਰਾਮਰਣਤੋ ਮੁਚ੍ਚਿਸ੍ਸਾਮੀ’’ਤਿ ਪੀਤਿਸੋਮਨਸ੍ਸਂ ਉਪ੍ਪਾਦੇਤ੍ਵਾ.

ਏਵਂ ਗਮਨਵਿਧਾਨਂ ਏਕਦੇਸੇਨ ਵਤ੍ਵਾ ਇਦਾਨਿ ਅਟ੍ਠਕਥਾਸੁ ਆਗਤਨਯੇਨ ਤਂ ਦਸ੍ਸੇਤੁਂ ‘‘ਅਟ੍ਠਕਥਾਸੁ ਵੁਤ੍ਤੇਨ ਵਿਧਿਨਾ’’ਤਿਆਦਿਮਾਹ. ਤਤ੍ਥ ਉਗ੍ਗਣ੍ਹਨ੍ਤੋਤਿ ਉਗ੍ਗਣ੍ਹਨਹੇਤੁ. ਏਕੋਤਿ ਅਯਂ ਏਕ-ਸਦ੍ਦੋ ਅਸਹਾਯਤ੍ਥੋ, ਨ ਅਞ੍ਞਾਦਿਅਤ੍ਥੋਤਿ ‘‘ਅਦੁਤਿਯੋ’’ਤਿ ਵੁਤ੍ਤਂ. ਯਥਾ ਵਣ੍ਣਾਦਿਤੋ ਵਵਤ੍ਥਾਨਂ ਏਕਂਸਤੋ ਸਮੁਦਿਤਮੇਵ ਇਚ੍ਛਿਤਬ੍ਬਂ ਸਬ੍ਬਤ੍ਥਕਭਾਵਤੋ, ਨ ਤਥਾ ਸਨ੍ਧਿਆਦਿਤੋਤਿ ਦਸ੍ਸਨਤ੍ਥਂ ‘‘ਵਣ੍ਣਤੋਪੀ’’ਤਿਆਦਿਨਾ ਛਸੁ ਠਾਨੇਸੁ ਸਮ੍ਪਿਣ੍ਡਨਤ੍ਥੋ ਪਿ-ਸਦ੍ਦੋ ਗਹਿਤੋ. ਪੁਨ ਏਕੋ ਅਦੁਤਿਯੋਤਿਆਦਿ ਗਹਿਤਨਿਮਿਤ੍ਤਸ੍ਸ ਯੋਗਿਨੋ ਨਿਵਤ੍ਤਿਤ੍ਵਾ ਵਸਨਟ੍ਠਾਨਗਮਨਂ ਸਨ੍ਧਾਯ ਵੁਤ੍ਤਂ. ਤਬ੍ਭਾਗਿਯਞ੍ਞੇਵਾਤਿ ਤਪ੍ਪਕ੍ਖਿਯਂਯੇਵ ਅਸੁਭਨਿਮਿਤ੍ਤਮਨਸਿਕਾਰਸਹਿਤਮੇਵ. ਆਸਨਂ ਪਞ੍ਞਪੇਤੀਤਿ ਨਿਸਜ੍ਜਂ ਕਪ੍ਪੇਤਿ. ਯਂ ਪਨ ‘‘ਅਸੁਭਨਿਮਿਤ੍ਤਦਿਸਾਭਿਮੁਖੇ ਭੂਮਿਪ੍ਪਦੇਸੇ’’ਤਿ (ਵਿਸੁਦ੍ਧਿ. ੧.੧੧੩) ਵਕ੍ਖਤਿ, ਤਮ੍ਪਿ ਇਮਮੇਵਤ੍ਥਂ ਸਨ੍ਧਾਯ ਵੁਤ੍ਤਂ. ਨ ਹਿ ਕੇਵਲੇਨ ਦਿਸਾਭਿਮੁਖਭਾਵੇਨ ਕਿਞ੍ਚਿ ਇਜ੍ਝਤਿ.

ਸਮਨ੍ਤਾ ਨਿਮਿਤ੍ਤੁਪਲਕ੍ਖਣਾਤਿ ਉਦ੍ਧੁਮਾਤਕਸ੍ਸ ਸਮਨ੍ਤਾ ਪਾਸਾਣਾਦਿਨਿਮਿਤ੍ਤਸਲ੍ਲਕ੍ਖਣਾ. ਅਸਮ੍ਮੋਹਤ੍ਥਾਤਿ ਉਗ੍ਗਹਨਿਮਿਤ੍ਤੇ ਉਪਟ੍ਠਿਤੇ ਉਪ੍ਪਜ੍ਜਨਕਸਮ੍ਮੋਹਵਿਗਮਤ੍ਥਾ. ਏਕਾਦਸਵਿਧੇਨਾਤਿ ਵਣ੍ਣਾਦਿਵਸੇਨ ਏਕਾਦਸਵਿਧੇਨ. ਉਪਨਿਬਨ੍ਧਨਤ੍ਥੋਤਿ ਅਸੁਭਾਰਮ੍ਮਣੇ ਚਿਤ੍ਤਂ ਉਪਨੇਤ੍ਵਾ ਨਿਬਨ੍ਧਨਤ੍ਥੋ. ਵੀਥਿਸਮ੍ਪਟਿਪਾਦਨਤ੍ਥਾਤਿ ਕਮ੍ਮਟ੍ਠਾਨਵੀਥਿਯਾ ਸਮ੍ਮਦੇਵ ਪਟਿਪਾਦਨਤ੍ਥਾ. ਪੁਞ੍ਞਕਿਰਿਯਵਤ੍ਥੁ ਅਧਿਗਤਂ ਹੋਤੀਤਿ ਸਮ੍ਬਨ੍ਧੋ.

੧੦੬. ਤਸ੍ਮਾਤਿ ਯਸ੍ਮਾ ਅਸੁਭਨਿਮਿਤ੍ਤਸ੍ਸ ਉਗ੍ਗਣ੍ਹਨਂ ਅਰਿਯਮਗ੍ਗਪਦਟ੍ਠਾਨਸ੍ਸ ਪਠਮਜ੍ਝਾਨਸ੍ਸ ਅਧਿਗਮੁਪਾਯੋ, ਯਸ੍ਮਾ ਵਾ ‘‘ਅਸੁਭਨਿਮਿਤ੍ਤਂ ਉਗ੍ਗਣ੍ਹਨ੍ਤੋ ਏਕੋ ਅਦੁਤਿਯੋ ਗਚ੍ਛਤੀ’’ਤਿ ਵੁਤ੍ਤਂ, ਤਸ੍ਮਾ. ਚਿਤ੍ਤਸਞ੍ਞਤ੍ਤਤ੍ਥਾਯਾਤਿ ਸਰੀਰਸਭਾਵਸਲ੍ਲਕ੍ਖਣੇਨ, ਸਂਵੇਗਜਨਨੇਨ ਚ ਅਤ੍ਤਨੋ ਚਿਤ੍ਤਸ੍ਸ ਸਞ੍ਞਤ੍ਤਿਅਤ੍ਥਂ ਸਞ੍ਞਾਪਨਤ੍ਥਂ. ‘‘ਚਿਤ੍ਤਸਞ੍ਞਤਤ੍ਥਾਯਾ’’ਤਿ ਵਾ ਪਾਠੋ, ਕਿਲੇਸਵਸੇਨ ਅਸਂਯਤਸ੍ਸ ਚਿਤ੍ਤਸ੍ਸ ਸਂਯਮਨਤ੍ਥਂ ਦਮਨਤ੍ਥਂ, ਨ ਕਮ੍ਮਟ੍ਠਾਨਤ੍ਥਨ੍ਤਿ ਅਤ੍ਥੋ. ਕਮ੍ਮਟ੍ਠਾਨਸੀਸੇਨਾਤਿ ਕਮ੍ਮਟ੍ਠਾਨੇਨ ਸੀਸਭੂਤੇਨ, ਤਂ ਉਤ੍ਤਮਙ੍ਗਂ ਪਧਾਨਂ ਕਾਰਣਂ ਕਤ੍ਵਾ. ਮੂਲਕਮ੍ਮਟ੍ਠਾਨਨ੍ਤਿ ਪਕਤਿਯਾ ਅਤ੍ਤਨਾ ਕਾਲੇਨ ਕਾਲਂ ਪਰਿਹਰਿਯਮਾਨਂ ਬੁਦ੍ਧਾਨੁਸ੍ਸਤਿਆਦਿਸਬ੍ਬਤ੍ਥਕਕਮ੍ਮਟ੍ਠਾਨਂ. ‘‘ਕਮ੍ਮਟ੍ਠਾਨਸੀਸੇਨ ਗਚ੍ਛਾਮੀ’’ਤਿ ਤਂ ਅਵਿਸ੍ਸਜ੍ਜੇਤ੍ਵਾ. ਤੇਨਾਹ ‘‘ਤਂ ਮਨਸਿਕਰੋਨ੍ਤੇਨੇਵਾ’’ਤਿ. ਸੂਪਟ੍ਠਿਤਭਾਵਸਮ੍ਪਾਦਨੇਨਾਤਿ ਮੂਲਕਮ੍ਮਟ੍ਠਾਨੇ ਸੁਟ੍ਠੁ ਉਪਟ੍ਠਿਤਭਾਵਸ੍ਸ ਸਮ੍ਪਾਦਨੇਨ. ਏਵਂ ਹਿ ਸਤਿ ਅਸਮ੍ਮੁਟ੍ਠਾ ਨਾਮ ਹੋਤਿ. ਬਹਿਦ੍ਧਾ ਪੁਥੁਤ੍ਤਾਰਮ੍ਮਣੇ ਅਪ੍ਪਵਤ੍ਤਿਤ੍ਵਾ ਕਮ੍ਮਟ੍ਠਾਨੇਯੇਵ ਪਵਤ੍ਤਮਾਨਂ ਮਾਨਸਂ ਅਬਹਿਗਤਂ ਨਾਮ. ਤਥਾਭੂਤੇਨ ਚਾਨੇਨ ਰੂਪਿਨ੍ਦ੍ਰਿਯਾਨਿ ਅਪ੍ਪਵਤ੍ਤਕਿਚ੍ਚਾਨਿ ਕਤਾਨਿ ਹੋਨ੍ਤੀਤਿ ਆਹ ‘‘ਮਨਚ੍ਛਟ੍ਠਾਨਂ…ਪੇ… ਗਨ੍ਤਬ੍ਬ’’ਨ੍ਤਿ.

ਦ੍ਵਾਰਂ ਸਲ੍ਲਕ੍ਖੇਤਬ੍ਬਨ੍ਤਿ ਵਿਹਾਰੇ ਪੁਰਤ੍ਥਿਮਾਦੀਸੁ ਦਿਸਾਸੁ ਅਸੁਕਦਿਸਾਯ ਇਦਂ ਦ੍ਵਾਰਂ, ਤਤੋ ਏਵ ਤਾਯ ਦਿਸਾਯ ਸਲ੍ਲਕ੍ਖਿਤੇਨ ਅਸੁਕਦ੍ਵਾਰੇਨ ਨਿਕ੍ਖਨ੍ਤੋਮ੍ਹੀਤਿ ਦ੍ਵਾਰਂ ਉਪਧਾਰੇਤਬ੍ਬਂ. ਤਤੋਤਿ ਦ੍ਵਾਰਸਲ੍ਲਕ੍ਖਣਤੋ ਪਚ੍ਛਾ. ਯੇਨ ਮਗ੍ਗੇਨ ਗਚ੍ਛਤਿ ਸਯਂ. ਨਿਮਿਤ੍ਤਟ੍ਠਾਨਨ੍ਤਿ ਅਸੁਭਨਿਮਿਤ੍ਤਸ੍ਸ ਗਣ੍ਹਨਟ੍ਠਾਨਂ. ਆਹਾਰਂ ਛਡ੍ਡਾਪੇਯ੍ਯਾਤਿ ਵਮਨਂ ਕਾਰਾਪੇਯ੍ਯ. ਕਣ੍ਟਕਟ੍ਠਾਨਨ੍ਤਿ ਕਣ੍ਟਕਵਨ੍ਤਂ ਠਾਨਂ.

੧੦੭. ਦਿਸਾ ਵਵਤ੍ਥਪੇਤਬ੍ਬਾਤਿ ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਵਰਿਤੁਂ ‘‘ਏਕਸ੍ਮਿਂ ਹੀ’’ਤਿਆਦਿ ਵੁਤ੍ਤਂ. ਖਾਯਤੀਤਿ ਉਪਟ੍ਠਾਤਿ. ਕਮ੍ਮਨਿਯਨ੍ਤਿ ਭਾਵਨਾਯ ਕਮ੍ਮਕ੍ਖਮਂ. ਉਬ੍ਬਾਲ਼੍ਹਸ੍ਸਾਤਿ ਬਾਧਿਤਸ੍ਸ. ਵਿਧਾਵਤੀਤਿ ਨਾਨਾਰਮ੍ਮਣੇ ਵਿਸਰਤਿ. ਉਕ੍ਕਮ੍ਮਾਤਿ ਉਜੁਕਂ ਅਨੁਵਾਤਤੋ ਅਪਕ੍ਕਮ੍ਮ. ਮਤਕਲ਼ੇਵਰਂ ਪੁਥੁਜ੍ਜਨਸ੍ਸ ਯੇਭੁਯ੍ਯੇਨ ਭਯਤੋ ਉਪਟ੍ਠਾਤੀਤਿ ਆਹ ‘‘ਅਚ੍ਚਾਸਨ੍ਨੇ ਭਯਮੁਪ੍ਪਜ੍ਜਤੀ’’ਤਿ. ਅਨੁਪਾਦਨ੍ਤਿ ਪਾਦਸਮੀਪਂ. ਯਤ੍ਥ ਠਿਤਸ੍ਸ ਸੁਖੇਨ ਓਲੋਕੇਤੁਂ ਸਕ੍ਕਾ, ਤਂ ਓਲੋਕੇਨ੍ਤਸ੍ਸ ਫਾਸੁਕਟ੍ਠਾਨਂ.

੧੦੮. ਸਮਨ੍ਤਾਤਿ ਸਮਨ੍ਤਤੋ. ਪੁਨ ਸਮਨ੍ਤਾਤਿ ਸਾਮਨ੍ਤਾ ਸਮੀਪੇ. ਕਚ੍ਛਕੋਤਿ ਕਾਲ਼ਕਚ੍ਛਕੋ, ‘‘ਪਿਲਕ੍ਖੋ’’ਤਿਪਿ ਵਦਨ੍ਤਿ. ਕਪੀਤਨੋਤਿ ਪਿਪ੍ਪਲਿਰੁਕ੍ਖੋ. ਸਿਨ੍ਦੀਤਿ ਖੁਦ੍ਦਕਖਜ੍ਜੁਰੀ. ਕਰਮਨ੍ਦਾਦਯੋ ਪਾਕਟਾ ਏਵ. ਸਾਮਾਤਿ ਸਾਮਲਤਾ. ਕਾਲ਼ਵਲ੍ਲੀਤਿ ਕਾਲ਼ਵਣ੍ਣਾ ਅਪਤ੍ਤਿਕਾ ਏਕਾ ਲਤਾਜਾਤਿ. ਪੂਤਿਲਤਾਤਿ ਜੀਵਨਵਲ੍ਲਿ, ਯਾ ‘‘ਗਲੋਚੀ’’ਤਿ ਵੁਚ੍ਚਤਿ.

੧੦੯. ਤਂ ਨਿਮਿਤ੍ਤਕਰਣਾਦਿ ਇਧੇਵ ਯਥਾਵੁਤ੍ਤੇ ਪਾਸਾਣਾਦਿਨਿਮਿਤ੍ਤਕਰਣੇ ਏਵ ਅਨ੍ਤੋਗਧਂ ਪਰਿਯਾਪਨ੍ਨਂ. ਸਨਿਮਿਤ੍ਤਂ ਕਰੋਤੀਤਿ ਸਹ ਨਿਮਿਤ੍ਤਂ ਕਰੋਤਿ, ਅਸੁਭਂ ਪਾਸਾਣਾਦਿਨਿਮਿਤ੍ਤੇਨ ਸਹ ਕਰੋਤਿ ਵਵਤ੍ਥਪੇਤਿ. ਅਥ ਵਾ ਅਸੁਭਨਿਮਿਤ੍ਤਂ, ਪਾਸਾਣਾਦਿਨਿਮਿਤ੍ਤਞ੍ਚ ਸਹ ਏਕਜ੍ਝਂ ਕਰੋਨ੍ਤੋ ਵਵਤ੍ਥਪੇਨ੍ਤੋ ‘‘ਸਨਿਮਿਤ੍ਤਂ ਕਰੋਤੀ’’ਤਿ ਵੁਤ੍ਤੋ. ਸਮਾਨਕਾਲਤਾਦੀਪਕੇਨ ਹਿ ਸਹ-ਸਦ੍ਦੇਨ ਅਯਂ ਸਮਾਸੋ ਯਥਾ ‘‘ਸਚਕ੍ਕਂ ਦੇਹੀ’’ਤਿ. ਤਯਿਦਂ ਨਿਮਿਤ੍ਤਕਰਣਂ ਅਪਰਾਪਰਂ ਸਲ੍ਲਕ੍ਖਣੇਨ ਹੋਤਿ, ਨ ਏਕਵਾਰਮੇਵਾਤਿ ਆਹ ‘‘ਪੁਨਪ੍ਪੁਨਂ ਵਵਤ੍ਥਪੇਨ੍ਤੋ ਹਿ ਸਨਿਮਿਤ੍ਤਂ ਕਰੋਤੀ’’ਤਿ. ਦ੍ਵੇਤਿ ਪਾਸਾਣਾਸੁਭਨਿਮਿਤ੍ਤਾਨਿ. ਸਮਾਸੇਤ੍ਵਾ ਸਙ੍ਗਹੇਤ੍ਵਾ ਏਕਜ੍ਝਂ ਕਤ੍ਵਾ. ਸਾਰਮ੍ਮਣਨ੍ਤਿ ਅਸੁਭਾਰਮ੍ਮਣੇਨ ਸਦ੍ਧਿਂ ਪਾਸਾਣਾਦਿਂ ਸਮਾਨਾਰਮ੍ਮਣਂ ਕਰੋਤਿ, ਸਹ ਵਾ ਆਰਮ੍ਮਣਂ ਕਰੋਤਿ, ਏਕਾਰਮ੍ਮਣਂ ਵਿਯ ਉਭਯਂ ਆਰਮ੍ਮਣਂ ਕਰੋਤਿ, ਏਕਜ੍ਝਂ ਵਿਯ ਚ ਅਪਰਾਪਰਂ ਸਲ੍ਲਕ੍ਖੇਨ੍ਤੋ ਪਾਸਾਣਾਦਿਂ, ਅਸੁਭਨਿਮਿਤ੍ਤਞ੍ਚਾਤਿ ਦ੍ਵਯਂ ਆਰਮ੍ਮਣਂ ਕਰੋਤੀਤਿ ਅਤ੍ਥੋ.

ਅਤ੍ਤਨਿਯੋਤਿ ਸਕੋ. ਵਣਿਤਨ੍ਤਿ ਸੂਨਂ. ਸਭਾਵੇਨ ਸਰਸੇਨਾਤਿ ਉਦ੍ਧੁਮਾਤਕਭਾਵਸਙ੍ਖਾਤੇਨ ਅਤ੍ਤਨੋ ਲਕ੍ਖਣੇਨ, ਪਰੇਸਂ ਜਿਗੁਚ੍ਛੁਪ੍ਪਾਦਨਸਙ੍ਖਾਤੇਨ ਅਤ੍ਤਨੋ ਕਿਚ੍ਚੇਨ ਚ, ਸਭਾਵੋ ਏਵ ਵਾ ਤਥਾ ਨਿਪ੍ਫਜ੍ਜਨਤੋ ‘‘ਰਸੋ’’ਤਿ ਵੁਤ੍ਤੋ.

੧੧੦. ਛਬ੍ਬਿਧੇਨ ਨਿਮਿਤ੍ਤਂ ਗਹੇਤਬ੍ਬਨ੍ਤਿ ਵਣ੍ਣਾਦਿਨਾ ਛਪ੍ਪਕਾਰੇਨ ਤਾਵ ਉਦ੍ਧੁਮਾਤਕਅਸੁਭਨਿਮਿਤ੍ਤਂ ਗਹੇਤਬ੍ਬਂ. ਕੇਚਿ ‘‘ਕਲ਼ੇਵਰਸ੍ਸ ਦੀਘਰਸ੍ਸਾਦਿਪ੍ਪਮਾਣੇਨ ਸਦ੍ਧਿਂ ਸਤ੍ਤਵਿਧੇਨਾ’’ਤਿ ਵਦਨ੍ਤਿ, ਤਂ ਅਟ੍ਠਕਥਾਯਂ ਨਤ੍ਥਿ. ਲਿਙ੍ਗਤੋਤਿ ਏਤ੍ਥ ਲਿਙ੍ਗਂ ਨਾਮ ਵਯੋ ਲਿਙ੍ਗਂ, ਨ ਥਨਮਸ੍ਸੁਆਦਿ ਇਤ੍ਥਿਪੁਰਿਸਲਿਙ੍ਗਨ੍ਤਿ ਦਸ੍ਸੇਨ੍ਤੇਨ ‘‘ਇਤ੍ਥਿਲਿਙ੍ਗਂ ਵਾ’’ਤਿਆਦਿ ਵੁਤ੍ਤਂ. ਠਿਤਸ੍ਸ ਸਤ੍ਤਸ੍ਸ ਇਦਂ ਸਰੀਰਨ੍ਤਿ ਸਮ੍ਬਨ੍ਧੋ. ਉਦ੍ਧੁਮਾਤਕਸਣ੍ਠਾਨਵਸੇਨੇਵ, ਨ ਪਾਕਤਿਕਸਣ੍ਠਾਨਵਸੇਨ. ਏਤੇਨ ਯਦਿ ਤਤ੍ਥ ਕੋਚਿ ਅਨੁਦ੍ਧੁਮਾਤਕਭਾਵਪ੍ਪਤ੍ਤੋ ਪਦੇਸੋ ਸਿਯਾ, ਸੋ ਨ ਗਹੇਤਬ੍ਬੋਤਿ ਦਸ੍ਸੇਤਿ. ਓਲ਼ਾਰਿਕਾਵਯਵਵਸੇਨ ਇਦਂ ਸਣ੍ਠਾਨਵਵਤ੍ਥਾਨਂ, ਨ ਸੁਖੁਮਾਵਯਵਵਸੇਨਾਤਿ ਸੀਸਸਣ੍ਠਾਨਾਦਿਕਂ ਨਵਵਿਧਮੇਵ ਸਣ੍ਠਾਨਂ ਗਹਿਤਂ.

ਇਮਿਸ੍ਸਾ ਦਿਸਾਯਾਤਿ ਇਮਿਸ੍ਸਾ ਪੁਰਤ੍ਥਿਮਾਯ, ਦਕ੍ਖਿਣਪਚ੍ਛਿਮਉਤ੍ਤਰਾਯ ਦਿਸਾਯ, ਅਨੁਦਿਸਾਯ ਵਾ ਠਿਤੋਤਿ ਯੋਜਨਾ. ਇਮਸ੍ਮਿਂ ਨਾਮ ਓਕਾਸੇ ਹਤ੍ਥਾਤਿ ਇਮਸ੍ਮਿਂ ਨਾਮ ਭੂਮਿਪ੍ਪਦੇਸੇ ਇਮਸ੍ਸ ਕਲ਼ੇਵਰਸ੍ਸ ਹਤ੍ਥਾ ਠਿਤਾਤਿ ਵਵਤ੍ਥਪੇਤਬ੍ਬਨ੍ਤਿ ਯੋਜਨਾ.

ਅਧੋ ਪਾਦਤਲੇਨਾਤਿਆਦਿ ਨਾਭਿਯਾ ਹੇਟ੍ਠਾ ਅਧੋ, ਤਤੋ ਉਦ੍ਧਂ ਉਪਰੀਤਿ ਇਮਸ੍ਸ ਵਵਤ੍ਥਾਨਸ੍ਸ ਵਸੇਨ ਵੁਤ੍ਤਂ. ਹਤ੍ਥਪਰਿਚ੍ਛੇਦੋ ਹੇਟ੍ਠਾ ਅਙ੍ਗੁਲਿਅਗ੍ਗੇਨ ਉਪਰਿ ਅਂਸਕੂਟਸਨ੍ਧਿਨਾ ਤਿਰਿਯਂ ਤਚਪਰਿਯਨ੍ਤੇਨ ਗਹੇਤਬ੍ਬੋ. ਏਸ ਨਯੋ ਪਾਦਪਰਿਚ੍ਛੇਦਾਦੀਸੁਪਿ. ਯਤ੍ਤਕਂ ਵਾ ਪਨ ਠਾਨਂ ਗਣ੍ਹਤੀਤਿ ਸਚੇ ਸਬ੍ਬਂ ਸਰੀਰਂ ਪਰਿਚ੍ਛਿਨ੍ਦਿਤ੍ਵਾ ਗਹੇਤੁਂ ਨ ਸਕ੍ਕੋਤਿ, ਪਦੇਸੋ ਤਸ੍ਸ ਉਦ੍ਧੁਮਾਤੋ, ਸੋ ਯਤ੍ਤਕਂ ਸਰੀਰਪ੍ਪਦੇਸਂ ਉਦ੍ਧੁਮਾਤਕਵਸੇਨ ਞਾਣੇਨ ਪਰਿਗ੍ਗਣ੍ਹਾਤਿ, ਤਤ੍ਤਕਮੇਵ ਯਥਾਪਰਿਗ੍ਗਹਿਤਮੇਵ. ਇਦਂ ਈਦਿਸਨ੍ਤਿ ਇਦਂ ਹਤ੍ਥਾਦਿਕਂ ਈਦਿਸਂ ਏਵਮਾਕਾਰਂ. ਉਦ੍ਧੁਮਾਤਕਨ੍ਤਿ ਯਥਾਸਭਾਵਤੋ ਪਰਿਚ੍ਛਿਨ੍ਦਿਤਬ੍ਬਂ. ਵਿਸਭਾਗੇ ਸਰੀਰੇ ਆਰਮ੍ਮਣਨ੍ਤਿ ਕਮ੍ਮਟ੍ਠਾਨਂ ਪਟਿਕ੍ਕੂਲਾਕਾਰੋ ਨ ਉਪਟ੍ਠਾਤਿ ਨ ਖਾਯਤਿ, ਸੁਭਤੋ ਉਪਟ੍ਠਹੇਯ੍ਯ. ਤੇਨਾਹ ‘‘ਵਿਪ੍ਫਨ੍ਦਨਸ੍ਸੇਵ ਪਚ੍ਚਯੋ ਹੋਤੀ’’ਤਿ, ਕਿਲੇਸਪਰਿਪ੍ਫਨ੍ਦਨਸ੍ਸੇਵ ਨਿਮਿਤ੍ਤਂ ਹੋਤੀਤਿ ਅਤ੍ਥੋ. ਉਗ੍ਘਾਟਿਤਾਪੀਤਿ ਉਦ੍ਧੁਮਾਤਭਾਵਪ੍ਪਤ੍ਤਾਪਿ, ਸਬ੍ਬਸੋ ਕੁਥਿਤਸਰੀਰਾਪੀਤਿ ਵਾ ਅਤ੍ਥੋ. ਸ੍ਵਾਯਮਤ੍ਥੋ ਪਠਮਪਾਰਾਜਿਕੇ (ਪਾਰਾ. ੬੭ ਆਦਯੋ) ਵਿਨੀਤਵਤ੍ਥੂਹਿ ਦੀਪੇਤਬ੍ਬੋ.

੧੧੧. ਆਸੇਵਿਤਕਮ੍ਮਟ੍ਠਾਨੋਤਿ ਅਸੁਭਕਮ੍ਮਟ੍ਠਾਨੇ ਕਤਪਰਿਚਯੋ. ਸੋਸਾਨਿਕਙ੍ਗਾਦੀਨਂ ਵਸੇਨ ਪਰਿਹਤਧੁਤਙ੍ਗੋ. ਚਤੁਧਾਤੁਵਵਤ੍ਥਾਨਵਸੇਨ ਪਰਿਮਦ੍ਦਿਤਮਹਾਭੂਤੋ. ਸਲਕ੍ਖਣਤੋ ਞਾਣੇਨ ਪਰਿਗ੍ਗਹਿਤਸਙ੍ਖਾਰੋ. ਪਚ੍ਚਯਪਰਿਗ੍ਗਹਵਸੇਨ ਵਵਤ੍ਥਾਪਿਤਨਾਮਰੂਪੋ. ਸਲਕ੍ਖਣਾਰਮ੍ਮਣਿਕਵਿਪਸ੍ਸਨਾਯ ਉਕ੍ਕਂਸਨੇਨ ਸੁਞ੍ਞਤਾਨੁਪਸ੍ਸਨਾਬਲੇਨ ਉਗ੍ਘਾਟਿਤਸਤ੍ਤਸਞ੍ਞੋ. ਵਿਪਸ੍ਸਨਾਯ ਪਟਿਪਦਾਞਾਣਦਸ੍ਸਨਵਿਸੁਦ੍ਧਿਸਮ੍ਪਾਪਨੇਨ ਕਤਸਮਣਧਮ੍ਮੋ. ਤਤੋ ਏਵ ਸਬ੍ਬਸੋ ਕੁਸਲਵਾਸਨਾਯ, ਕੁਸਲਭਾਵਨਾਯ ਚ ਪੂਰਣੇਨ ਵਾਸਿਤਵਾਸਨੋ ਭਾਵਿਤਭਾਵਨੋ. ਵਿਵਟ੍ਟੂਪਨਿਸ੍ਸਯਕੁਸਲਬੀਜੇਨ ਸਬੀਜੋ. ਞਾਣਸ੍ਸ ਪਰਿਪਕ੍ਕਭਾਵੇਨ ਞਾਣੁਤ੍ਤਰੋ. ਯਥਾਵੁਤ੍ਤਾਯ ਪਟਿਪਤ੍ਤਿਯਾ ਕਿਲੇਸਾਨਂ ਤਨੁਕਰਣੇਨ ਅਪ੍ਪਕਿਲੇਸੋ. ਓਲੋਕਿਤੋਲੋਕਿਤਟ੍ਠਾਨੇਯੇਵਾਤਿ ਉਦ੍ਧੁਮਾਤਕਾਦਿਅਸੁਭਸ੍ਸ ਯਤ੍ਥ ਯਤ੍ਥ ਓਲੋਕਿਤੋਲੋਕਿਤਟ੍ਠਾਨੇ ਏਵ, ਤਾਦਿਸਸ੍ਸ ਕਾਲਵਿਸੇਸੋ, ਅਸੁਭਸ੍ਸ ਪਦੇਸਵਿਸੇਸੋ ਵਾ ਅਪੇਕ੍ਖਿਤਬ੍ਬੋ ਨਤ੍ਥੀਤਿ ਅਤ੍ਥੋ. ਨੋ ਚੇ ਏਵਂ ਉਪਟ੍ਠਾਤੀਤਿ ਏਵਂ ਯਥਾਵੁਤ੍ਤਪੁਰਿਸਵਿਸੇਸਸ੍ਸ ਵਿਯ ਪਟਿਭਾਗਨਿਮਿਤ੍ਤਂ ਨੋ ਚੇ ਉਪਟ੍ਠਾਤਿ. ਏਵਂ ਛਬ੍ਬਿਧੇਨਾਤਿ ਏਵਂ ਵੁਤ੍ਤਾਕਾਰੇਨ ਵਣ੍ਣਾਦਿਵਸੇਨ ਛਬ੍ਬਿਧੇਨ. ਪੁਨਪੀਤਿ ਪਿ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ. ਤੇਨ ਨਿਮਿਤ੍ਤਗ੍ਗਹਣਵਿਧਿਂ ਸਮ੍ਪਿਣ੍ਡੇਤਿ, ਨ ਪਞ੍ਚਵਿਧਤਂ. ਛਬ੍ਬਿਧੇਨ ਹਿ ਪੁਬ੍ਬੇ ਨਿਮਿਤ੍ਤਗ੍ਗਹਣਂ ਵਿਹਿਤਂ.

੧੧੨. ਅਸੀਤਿਸਤਸਨ੍ਧਿਤੋਤਿ ਸਬ੍ਬੇਪਿ ਸਨ੍ਧਯੋ ਤਦਾਪਿ ਅਤ੍ਥੇਵਾਤਿ ਦਸ੍ਸਨਤ੍ਥਂ ਵਤ੍ਵਾ ਉਦ੍ਧੁਮਾਤਭਾਵੇਨ ਯੇਭੁਯ੍ਯੇਨ ਨ ਪਞ੍ਞਾਯਨ੍ਤਿ. ਯੇ ਪਨ ਪਞ੍ਞਾਯਨ੍ਤਿ, ਤੇ ਵਵਤ੍ਥਪੇਤਬ੍ਬਾਤਿ ਦਸ੍ਸੇਤੁਂ ‘‘ਉਦ੍ਧੁਮਾਤਕੇ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਤਯੋ ਦਕ੍ਖਿਣਹਤ੍ਥਸਨ੍ਧੀਤਿ ਅਂਸਕਪ੍ਪਰਮਣਿਬਨ੍ਧਾਨਂ ਵਸੇਨ ਤਯੋ ਦਕ੍ਖਿਣਹਤ੍ਥਸਨ੍ਧਯੋ. ਤਥਾ ਵਾਮਹਤ੍ਥਸਨ੍ਧਯੋ. ਕਟਿਜਣ੍ਣੁਗੋਪ੍ਫਕਾਨਂ ਵਸੇਨ ਤਯੋ ਦਕ੍ਖਿਣਪਾਦਸਨ੍ਧਯੋ. ਤਥਾ ਵਾਮਪਾਦਸਨ੍ਧਯੋ. ਏਕੋ ਕਟਿਸਨ੍ਧੀਤਿ ਕਟਿਯਾ ਸਦ੍ਧਿਂ ਪਿਟ੍ਠਿਕਣ੍ਟਕਸਨ੍ਧਿਂ ਸਨ੍ਧਾਯ ਵਦਤਿ. ਹਤ੍ਥਨ੍ਤਰਨ੍ਤਿ ਦਕ੍ਖਿਣਹਤ੍ਥਦਕ੍ਖਿਣਪਸ੍ਸਾਨਂ, ਵਾਮਹਤ੍ਥਵਾਮਪਸ੍ਸਾਨਞ੍ਚ ਅਨ੍ਤਰਂ ਵਿਵਰਂ. ਪਾਦਨ੍ਤਰਨ੍ਤਿ ਉਭਿਨ੍ਨਂ ਪਾਦਾਨਂ ਵੇਮਜ੍ਝਂ. ਉਦਰਨ੍ਤਰਨ੍ਤਿ ਨਾਭਿਟ੍ਠਾਨਸਞ੍ਞਿਤਂ ਕੁਚ੍ਛਿਵੇਮਜ੍ਝਂ, ਉਦਰਸ੍ਸ ਵਾ ਅਬ੍ਭਨ੍ਤਰਂ. ਕਣ੍ਣਨ੍ਤਰਨ੍ਤਿ ਕਣ੍ਣਛਿਦ੍ਦਂ. ਇਤਿ-ਸਦ੍ਦੋ ਆਦਿਅਤ੍ਥੋ, ਤੇਨ ਨਾਸਚ੍ਛਿਦ੍ਦਾਦੀਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ. ਅਕ੍ਖੀਨਂ, ਮੁਖਸ੍ਸ ਚ ਵਸੇਨਾਪਿ ਵਿਵਰਂ ਲਬ੍ਭਤੇਵਾਤਿ ਦਸ੍ਸੇਤੁਂ ‘‘ਅਕ੍ਖੀਨਮ੍ਪੀ’’ਤਿਆਦਿ ਵੁਤ੍ਤਂ. ਸਮਨ੍ਤਤੋਤਿ ਏਵਂ ਸਨ੍ਧਿਆਦਿਤੋ ਉਦ੍ਧੁਮਾਤਕਂ ਵਵਤ੍ਥਪੇਨ੍ਤਸ੍ਸ ਚੇ ਨਿਮਿਤ੍ਤਂ ਉਪਤਿਟ੍ਠਤਿ, ਇਚ੍ਚੇਤਂ ਕੁਸਲਂ. ਨੋ ਚੇ, ਸਮਨ੍ਤਤੋ ਵਵਤ੍ਥਪੇਤਬ੍ਬਨ੍ਤਿ ਵਵਤ੍ਥਾਪਨਵਿਧਿਂ ਦਸ੍ਸੇਤੁਂ ‘‘ਸਕਲਸਰੀਰੇ’’ਤਿਆਦਿ ਵੁਤ੍ਤਂ. ਤਤ੍ਥ ਞਾਣਂ ਚਾਰੇਤ੍ਵਾਤਿ ਸਬ੍ਬਤ੍ਥਕਮੇਵ ਸਰੀਰਂ ਆਵਜ੍ਜੇਤ੍ਵਾ ਤਤ੍ਥ ਪਟਿਕ੍ਕੂਲਾਕਾਰਸਹਿਤਂ ਉਦ੍ਧੁਮਾਤਕਭਾਵਂ ਆਰਬ੍ਭ ਨਿਰਨ੍ਤਰਂ ਭਾਵਨਾਞਾਣਂ ਪਵਤ੍ਤੇਤ੍ਵਾ. ਯਂ ਠਾਨਨ੍ਤਿ ਏਵਂ ਪਨ ਞਾਣਂ ਚਾਰੇਨ੍ਤਸ੍ਸ ਤਸ੍ਮਿਂ ਸਰੀਰੇ ਯੋ ਪਦੇਸੋ ਵਿਭੂਤੋ ਹੁਤ੍ਵਾ ਉਦ੍ਧੁਮਾਤਕਾਕਾਰੇਨ ਵਿਭੂਤਭਾਵੇਨ ਉਪਟ੍ਠਾਤਿ. ਉਦਰਪਰਿਯੋਸਾਨਂ ਉਪਰਿਮਸਰੀਰਂ.

ਵਿਨਿਚ੍ਛਯਕਥਾਵਣ੍ਣਨਾ

੧੧੩. ਵਿਨਿਚ੍ਛਯਕਥਾਤਿ ਵਿਨਿਚ੍ਛਯਸਹਿਤਾ ਅਤ੍ਥਵਣ੍ਣਨਾ. ਯਥਾਵੁਤ੍ਤਨਿਮਿਤ੍ਤਗ੍ਗਾਹਵਸੇਨਾਤਿ ਵਣ੍ਣਾਦਿਤੋ, ਸਨ੍ਧਿਆਦਿਤੋ ਚ ਵੁਤ੍ਤਪ੍ਪਕਾਰਉਦ੍ਧੁਮਾਤਕਨਿਮਿਤ੍ਤਗ੍ਗਹਣਵਸੇਨ. ਸੁਟ੍ਠੁ ਨਿਮਿਤ੍ਤਂ ਗਣ੍ਹਿਤਬ੍ਬਨ੍ਤਿ ਯਥਾ ਉਗ੍ਗਹਨਿਮਿਤ੍ਤਂ ਉਪਟ੍ਠਹਤਿ, ਏਵਂ ਸਮ੍ਮਦੇਵ ਅਸੁਭਨਿਮਿਤ੍ਤਂ ਗਹੇਤਬ੍ਬਂ. ਇਦਾਨਿ ਤਮੇਵ ਨਿਮਿਤ੍ਤਸ੍ਸ ਸੁਟ੍ਠੁ ਗਹਣਾਕਾਰਂ ਉਪਦਿਸਨ੍ਤੋ ‘‘ਸਤਿਂ ਸੂਪਟ੍ਠਿਤਂ ਕਤ੍ਵਾ’’ਤਿਆਦਿਮਾਹ. ਤਤ੍ਥ ਏਵਂ ਪੁਨਪ੍ਪੁਨਂ ਕਰੋਨ੍ਤੇਨਾਤਿ ਯਥਾ ‘‘ਇਮਾਯ ਪਟਿਪਦਾਯ ਜਰਾਮਰਣਤੋ ਮੁਚ੍ਚਿਸ੍ਸਾਮੀ’’ਤਿ ਸਞ੍ਜਾਤਾਦਰੇਨ ਸਤਿਸਮ੍ਪਜਞ੍ਞਞ੍ਚ ਸੁਟ੍ਠੁ ਉਪਟ੍ਠਪੇਤ੍ਵਾ ਉਦ੍ਧੁਮਾਤਕਅਸੁਭਂ ਪਠਮਂ ਆਵਜ੍ਜਿਤਂ, ਏਵਂ ਪੁਨਪ੍ਪੁਨਂ ਤਤ੍ਥ ਆਵਜ੍ਜਨਂ ਕਰੋਨ੍ਤੇਨ. ਸਾਧੁਕਂ ਉਪਧਾਰੇਤਬ੍ਬਞ੍ਚੇਵ ਵਵਤ੍ਥਪੇਤਬ੍ਬਞ੍ਚਾਤਿ ਸਕ੍ਕਚ੍ਚਂ ਸਤਿਯਾ ਸਲ੍ਲਕ੍ਖੇਤਬ੍ਬਞ੍ਚੇਵ ਪਞ੍ਞਾਯ ਨਿਚ੍ਛੇਤਬ੍ਬਞ੍ਚ. ਸਤਿ ਹਿ ‘‘ਧਾਰਣਾ’’ਤਿ ਨਿਦ੍ਦਿਟ੍ਠਾ, ਧਾਰਣਞ੍ਚੇਤ੍ਥ ਸਲ੍ਲਕ੍ਖਣਂ. ਪਞ੍ਞਾ ‘‘ਪਵਿਚਯੋ’’ਤਿ (ਧ. ਸ. ੧੬) ਨਿਦ੍ਦਿਟ੍ਠਾ, ਪਵਿਚਯੋ ਚੇਤ੍ਥ ਨਿਚ੍ਛਯੋਤਿ. ਅਥ ਵਾ ਉਪਧਾਰੇਤਬ੍ਬਨ੍ਤਿ ਸਤਿਪੁਬ੍ਬਙ੍ਗਮਾਯ ਪਞ੍ਞਾਯ ਉਪਲਕ੍ਖੇਤਬ੍ਬਂ. ਨ ਹਿ ਕਦਾਚਿ ਸਤਿਰਹਿਤਾ ਪਞ੍ਞਾ ਅਤ੍ਥਿ. ਵਵਤ੍ਥਪੇਤਬ੍ਬਨ੍ਤਿ ਪਞ੍ਞਾਪੁਬ੍ਬਙ੍ਗਮਾਯ ਸਤਿਯਾ ਨਿਚ੍ਛਿਨਿਤਬ੍ਬਂ. ਪਞ੍ਞਾਸਹਿਤਾ ਏਵ ਹਿ ਸਤਿ ਇਧਾਧਿਪ੍ਪੇਤਾ, ਨ ਤਬ੍ਬਿਰਹਿਤਾ. ਅਦ੍ਧਕ੍ਖਿਅਪਙ੍ਗਾਦਿਵਸੇਨਾਪਿ ਓਲੋਕਨਂ ਅਤ੍ਥੀਤਿ ‘‘ਉਮ੍ਮੀਲੇਤ੍ਵਾ ਓਲੋਕੇਤ੍ਵਾ’’ਤਿ ਵੁਤ੍ਤਂ. ਤੇਨ ਪਰਿਬ੍ਯਤ੍ਤਮੇਵ ਓਲੋਕਨਂ ਦਸ੍ਸੇਤਿ. ਏਵਂ ਪੁਨਪ੍ਪੁਨਂ ਕਰੋਨ੍ਤਸ੍ਸਾਤਿ ਵੁਤ੍ਤਪ੍ਪਕਾਰੇਨ ਚਕ੍ਖੁਂ ਉਮ੍ਮੀਲੇਤ੍ਵਾ ਓਲੋਕਨਂ, ਨਿਮ੍ਮੀਲੇਤ੍ਵਾ ਆਵਜ੍ਜਨਞ੍ਚ ਅਪਰਾਪਰਂ ਅਨੇਕਵਾਰਂ ਕਰੋਨ੍ਤਸ੍ਸ. ਉਗ੍ਗਹਨਿਮਿਤ੍ਤਨ੍ਤਿ ਉਦ੍ਧੁਮਾਤਕੇ ਉਗ੍ਗਣ੍ਹਨਨਿਮਿਤ੍ਤਂ. ਸੁਗ੍ਗਹਿਤਨ੍ਤਿ ਸੁਟ੍ਠੁ ਗਹਿਤਂ. ਯਥਾ ਨ ਵਿਨਸ੍ਸਤਿ ਨ ਪਮੁਟ੍ਠਂ ਹੋਤਿ, ਏਵਂ ਗਹਿਤਂ. ਏਕਸਦਿਸਨ੍ਤਿ ਸਮਾਨਸਦਿਸਂ. ਸਮਾਨਤ੍ਥੋ ਹਿ ਅਯਂ ਏਕ-ਸਦ੍ਦੋ, ਯਥਾ ‘‘ਅਰਿਯਵਿਨਯੇਤਿ ਵਾ, ਸਪ੍ਪੁਰਿਸਵਿਨਯੇਤਿ ਵਾ, ਏਸੇਸੇ ਏਕੇ ਏਕਟ੍ਠੇ ਸਮੇ ਸਮਭਾਗੇ ਤਜ੍ਜਾਤੇ ਤਞ੍ਞੇ ਵਾ’’ਤਿ.

ਆਗਮਨਕਾਲੇਤਿ ਵਿਹਾਰਤੋ ਸੁਸਾਨਂ ਉਦ੍ਦਿਸ੍ਸ ਆਗਮਨਕਾਲੇ. ਵੁਤ੍ਤਨਯੇਨੇਵਾਤਿ ਅਤਿਦੇਸਵਸੇਨ ਦੀਪਿਤਮ੍ਪਿ ਅਤ੍ਥਂ ‘‘ਏਕਕੇਨਾ’’ਤਿਆਦਿਨਾ ਸਰੂਪਤੋ ਦਸ੍ਸੇਤਿ. ਤਤ੍ਥ ਤਦੇਵ ਕਮ੍ਮਟ੍ਠਾਨਨ੍ਤਿ ਉਦ੍ਧੁਮਾਤਕਕਮ੍ਮਟ੍ਠਾਨਂ. ਮੂਲਕਮ੍ਮਟ੍ਠਾਨਨ੍ਤਿ ਏਕੇ, ਤਦਯੁਤ੍ਤਂ. ਉਪਟ੍ਠਿਤਨਿਮਿਤ੍ਤਂ ਹਿ ਕਮ੍ਮਟ੍ਠਾਨਂ ਵਿਸ੍ਸਜ੍ਜੇਤ੍ਵਾ ਕਮ੍ਮਟ੍ਠਾਨਨ੍ਤਰਮਨਸਿਕਾਰੋ ਰਞ੍ਞੋ ਰਜ੍ਜਂ ਛਡ੍ਡੇਤ੍ਵਾ ਵਿਦੇਸਗਮਨਂ ਵਿਯਾਤਿ. ਆਗਤੇਨਾਤਿ ਅਤ੍ਤਨੋ ਵਸਨਟ੍ਠਾਨਂ ਆਗਤੇਨ.

੧੧੪. ਅਵੇਲਾਯਨ੍ਤਿ ਸਞ੍ਝਾਵੇਲਾਦਿਅਯੁਤ੍ਤਵੇਲਾਯਂ. ਬੀਭਚ੍ਛਨ੍ਤਿ ਵਿਰੂਪਂ. ਭੇਰਵਾਰਮ੍ਮਣਨ੍ਤਿ ਵੇਤਾਲ਼ਸਦਿਸਂ ਭਯਾਨਕਂ ਵਿਸਯਂ. ਵਿਕ੍ਖਿਤ੍ਤਚਿਤ੍ਤੋਤਿ ਭੀਰੁਕਪੁਰਿਸੋ ਵਿਯ ਪਿਸਾਚਾਦਿਂ ਦਿਸ੍ਵਾ ਚਿਤ੍ਤਵਿਕ੍ਖੇਪਂ ਪਤ੍ਤੋ. ਉਮ੍ਮਤ੍ਤਕੋ ਵਿਯਾਤਿ ਯਕ੍ਖੁਮ੍ਮਤ੍ਤਕੋ ਵਿਯ ਏਕਚ੍ਚੋ ਹੋਤਿ. ਝਾਨਵਿਬ੍ਭਨ੍ਤਕੋਤਿ ਝਾਨਤੋ ਵਿਚ੍ਚੁਤਕੋ ਸੀਲਵਿਬ੍ਭਨ੍ਤਕਮਨ੍ਤਵਿਬ੍ਭਨ੍ਤਕਾ ਵਿਯ. ਸਨ੍ਥਮ੍ਭੇਤ੍ਵਾਤਿ ਉਪ੍ਪਨ੍ਨਪਰਿਤ੍ਤਾਸਵੂਪਸਮਨੇਨ ਵਿਗਤਕਮ੍ਪਤਾਯ ਨਿਚ੍ਚਲੋ ਹੁਤ੍ਵਾ. ਸਤਿਂ ਸੂਪਟ੍ਠਿਤਨ੍ਤਿਆਦਿ ਸਨ੍ਥਮ੍ਭਨਸ੍ਸ ਉਪਾਯਦਸ੍ਸਨਂ. ਮਤਸਰੀਰਂ ਉਟ੍ਠਹਿਤ੍ਵਾ ਅਨੁਬਨ੍ਧਨਕਂ ਨਾਮ ਨਤ੍ਥਿ ਅਸਤਿ ਤਾਦਿਸੇ ਮਨ੍ਤਪ੍ਪਯੋਗੇ. ਸੋਪਿ ਉਦ੍ਧੁਮਾਤਕਾਦਿਭਾਵਮਪ੍ਪਤ੍ਤੇ ਅਵਿਨਟ੍ਠਰੂਪੇ ਏਵ ਇਜ੍ਝਤਿ, ਤਥਾ ਦੇਵਤਾਧਿਗ੍ਗਹੋ, ਨ ਏਵਰੂਪੇਤਿ ਅਧਿਪ੍ਪਾਯੋ. ਸਞ੍ਞਜੋਤਿ ਭਾਵਨਾਪਰਿਕਪ੍ਪਸਞ੍ਞਾਯ ਜਾਤੋ. ਤਤੋ ਏਵ ਸਞ੍ਞਾਸਮ੍ਭਵੋ ਸਞ੍ਞਾਮਤ੍ਤਸਮੁਟ੍ਠਾਨੋ. ਤਾਸਂ ਵਿਨੋਦੇਤ੍ਵਾਤਿ ਨਿਮਿਤ੍ਤੁਪਟ੍ਠਾਨਨਿਮਿਤ੍ਤਂ ਉਪ੍ਪਨ੍ਨਚਿਤ੍ਤਸਨ੍ਤਾਸਂ ਵੁਤ੍ਤਪ੍ਪਕਾਰੇਨ ਵਿਨੋਦੇਤ੍ਵਾ ਵੂਪਸਮੇਤ੍ਵਾ. ‘‘ਇਦਾਨਿ ਤਵ ਪਰਿਸ੍ਸਮੋ ਸਪ੍ਫਲੋ ਜਾਤੋ’’ਤਿ ਹਾਸਂ ਪੀਤਿਂ ਪਮੋਦਨਂ ਉਪ੍ਪਾਦੇਤ੍ਵਾ. ਚਿਤ੍ਤਂ ਸਞ੍ਚਰਾਪੇਤਬ੍ਬਨ੍ਤਿ ਭਾਵਨਾਚਿਤ੍ਤਂ ਪਵਤ੍ਤੇਤਬ੍ਬਂ ਮਨਸਿਕਾਤਬ੍ਬਂ.

ਨਿਮਿਤ੍ਤਗ੍ਗਾਹਨ੍ਤਿ ਨਿਮਿਤ੍ਤਸ੍ਸ ਉਗ੍ਗਣ੍ਹਨਂ, ਉਗ੍ਗਹਨਿਮਿਤ੍ਤਂ. ਸਮ੍ਪਾਦੇਨ੍ਤੋਤਿ ਸਾਧੇਨ੍ਤੋ ਨਿਪ੍ਫਾਦੇਨ੍ਤੋ. ਕਮ੍ਮਟ੍ਠਾਨਂ ਉਪਨਿਬਨ੍ਧਤੀਤਿ ਭਾਵਨਂ ਯਥਾਵੁਤ੍ਤੇ ਨਿਮਿਤ੍ਤੇ ਉਪਨੇਨ੍ਤੋ ਨਿਬਨ੍ਧਤਿ. ਯੋਗਕਮ੍ਮਂ ਹਿ ਯੋਗਿਨੋ ਸੁਖਵਿਸੇਸਾਨਂ ਕਾਰਣਭਾਵਤੋ ‘‘ਕਮ੍ਮਟ੍ਠਾਨ’’ਨ੍ਤਿ ਅਧਿਪ੍ਪੇਤਂ, ਯੋਗਕਮ੍ਮਸ੍ਸ ਵਾ ਪਵਤ੍ਤਿਟ੍ਠਾਨਤਾਯ ਯਥਾਉਪਟ੍ਠਿਤਨਿਮਿਤ੍ਤਂ ਕਮ੍ਮਟ੍ਠਾਨਂ, ਤਂ ਭਾਵਨਾਚਿਤ੍ਤੇ ਉਪਨਿਬਨ੍ਧਤਿ. ਤਂ ਪਨਸ੍ਸ ਉਪਨਿਬਨ੍ਧਨਂ ਸਨ੍ਧਾਯ ਚਿਤ੍ਤਂ ਸਞ੍ਚਰਾਪੇਤਬ੍ਬਂ. ਏਵਂ ‘‘ਵਿਸੇਸਮਧਿਗਚ੍ਛਤੀ’’ਤਿ ਵੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਤਸ੍ਸ ਹੀ’’ਤਿਆਦਿਮਾਹ. ਤਤ੍ਥ ਤਸ੍ਸਾਤਿ ਯੋਗਿਨੋ, ਤਸ੍ਸ ਵਾ ਉਦ੍ਧੁਮਾਤਕਾਸੁਭਸ੍ਸ. ਮਾਨਸਂ ਚਾਰੇਨ੍ਤਸ੍ਸਾਤਿ ਭਾਵਨਾਚਿਤ੍ਤਂ ਅਪਰਾਪਰਂ ਪਵਤ੍ਤੇਨ੍ਤਸ੍ਸ, ਉਗ੍ਗਹਨਿਮਿਤ੍ਤਂ ਪੁਨਪ੍ਪੁਨਂ ਮਨਸਿ ਕਰੋਨ੍ਤਸ੍ਸਾਤਿ ਅਤ੍ਥੋ.

੧੧੫. ‘‘ਵੀਥਿਸਮ੍ਪਟਿਪਾਦਨਤ੍ਥਾ’’ਤਿ ਪਦਸ੍ਸ ‘‘ਕਮ੍ਮਟ੍ਠਾਨਵੀਥਿਯਾ ਸਮ੍ਪਟਿਪਾਦਨਤ੍ਥਾ’’ਤਿ ਅਤ੍ਥਂ ਵਤ੍ਵਾ ਤਂ ਪਨ ਕਮ੍ਮਟ੍ਠਾਨਵੀਥਿਂ, ਤਸ੍ਸਾ ਚ ਸਮ੍ਪਟਿਪਾਦਨਵਿਧਿਂ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਸਚੇ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਕਤਿਮੀਤਿ ਪਕ੍ਖਸ੍ਸ ਕਤਮੀ, ਕਿਂ ਦੁਤਿਯਾ, ਤਤਿਯਾਦੀਸੁ ਵਾ ਅਞ੍ਞਤਰਾਤਿ ਅਤ੍ਥੋ. ਤੁਣ੍ਹੀਭੂਤੇਨ ਗਨ੍ਤੁਂ ਨ ਵਟ੍ਟਤਿ ਪੁਚ੍ਛਨ੍ਤਾਨਂ ਚਿਤ੍ਤਸ੍ਸ ਅਞ੍ਞਥਤ੍ਤਪਰਿਹਰਣਤ੍ਥਂ. ਅਪ੍ਪਸਨ੍ਨਾਨਞ੍ਹਿ ਪਸਾਦਾਯ, ਪਸਨ੍ਨਾਨਞ੍ਚ ਭਿਯ੍ਯੋਭਾਵਾਯ ਸਾਸਨਸਮ੍ਪਟਿਪਤ੍ਤਿ. ਨਸ੍ਸਤੀਤਿ ਨ ਦਿਸ੍ਸਤਿ, ਨ ਉਪਟ੍ਠਾਤੀਤਿ ਅਤ੍ਥੋ. ‘‘ਆਗਨ੍ਤੁਕਪਟਿਸਨ੍ਥਾਰੋ ਕਾਤਬ੍ਬੋ’’ਤਿ ਇਮਿਨਾ ਆਗਨ੍ਤੁਕਵਤ੍ਤਂ ਏਕਦੇਸੇਨ ਦਸ੍ਸਿਤਨ੍ਤਿ ‘‘ਅਵਸੇਸਾਨਿਪੀ’’ਤਿ ਵਤ੍ਵਾ ਆਗਨ੍ਤੁਕਵਤ੍ਤਂ ਪਰਿਪੁਣ੍ਣਂ ਗਹੇਤੁਂ ਪੁਨ ਆਗਨ੍ਤੁਕਗ੍ਗਹਣਂ ਕਤਂ. ਗਮਿਕਵਤ੍ਤਾਦੀਨੀਤਿ ਆਦਿ-ਸਦ੍ਦੇਨ ਆਵਾਸਿਕਅਨੁਮੋਦਨਪਿਣ੍ਡਚਾਰਿਕਅਨੁਮੋਦਨਪਿਣ੍ਡਚਾਰਿਕਆਰਞ੍ਞਿਕਸੇਨਾਸਨਵਚ੍ਚਕੁਟਿਵਤ੍ਤਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੫੬) ਹਿ ਆਗਤਾਨਿ ਮਹਾਵਤ੍ਤਾਨਿ ਇਧ ‘‘ਖਨ੍ਧਕਵਤ੍ਤਾਨੀ’’ਤਿ ਵੁਤ੍ਤਾਨਿ. ਤਜ੍ਜਨੀਯਕਮ੍ਮਕਤਾਦਿਕਾਲੇ ਪਨ ਪਾਰਿਵਾਸਿਕਾਦਿਕਾਲੇ ਚ ਚਰਿਤਬ੍ਬਾਨਿ ਇਮਸ੍ਸ ਭਿਕ੍ਖੁਨੋ ਅਸਮ੍ਭਵਤੋ ਇਧ ਨਾਧਿਪ੍ਪੇਤਾਨਿ. ਨਿਮਿਤ੍ਤਂ ਵਾ ਅਨ੍ਤਰਧਾਯਤੀਤਿ ਸੁਸਾਨੇ ਠਿਤਂ ਅਸੁਭਨਿਮਿਤ੍ਤਂ ਉਦ੍ਧੁਮਾਤਕਭਾਵਾਪਗਮੇਨ ਅਨ੍ਤਰਧਾਯਤਿ. ਤੇਨਾਹ ‘‘ਉਦ੍ਧੁਮਾਤਕ’’ਨ੍ਤਿਆਦਿ. ਤਸ੍ਮਾਤਿ ਤੇਨ ਕਾਰਣੇਨ, ਇਮਸ੍ਸ ਕਮ੍ਮਟ੍ਠਾਨਸ੍ਸ ਦੁਲ੍ਲਭਤ੍ਤਾਤਿ ਅਤ੍ਥੋ. ਨਿਸੀਦਿਤ੍ਵਾ ਪਚ੍ਚਵੇਕ੍ਖਿਤਬ੍ਬੋਤਿ ਸਮ੍ਬਨ੍ਧੋ.

ਨਿਮਿਤ੍ਤਂ ਗਹੇਤੁਂ ਗਮਨੇ ਵਿਯ ਨਿਮਿਤ੍ਤਂ ਗਹੇਤ੍ਵਾ ਨਿਵਤ੍ਤਨੇਪਿ ਯਥਾਸਲ੍ਲਕ੍ਖਿਤਦਿਸਾਦਿਪਚ੍ਚਵੇਕ੍ਖਣਂ ਯਾਵ ਨਿਮਿਤ੍ਤਵਿਨਾਸਾ ਪਵਤ੍ਤਿਤਕਿਰਿਯਾਯ ਅਵਿਚ੍ਛੇਦੇਨ ਉਪਧਾਰਣਤ੍ਥਂ. ਸਤਿ ਹਿ ਤਸ੍ਸ ਨਿਰਨ੍ਤਰੂਪਧਾਰਣੇ ਵਿਹਾਰਂ ਪਵਿਸਿਤ੍ਵਾ ਨਿਸਿਨ੍ਨਕਾਲੇ ਕਮ੍ਮਟ੍ਠਾਨਸ੍ਸ ਉਪਟ੍ਠਿਤਾਕਾਰੋ ਸਮਥਨਿਮਿਤ੍ਤਸ੍ਸ ਗਹਣੇ ਚਿਤ੍ਤਸ੍ਸ ਸਮਾਹਿਤਾਕਾਰੋ ਵਿਯ ਪਾਕਟੋ ਹੁਤ੍ਵਾ ਉਪਤਿਟ੍ਠੇਯ੍ਯਾਤਿ. ਤੇਨਾਹ ‘‘ਤਸ੍ਸੇਵਂ…ਪੇ… ਵੀਥਿਂ ਪਟਿਪਜ੍ਜਤੀ’’ਤਿ. ਪੁਰਿਮਾਕਾਰੇਨ ਨਿਮਿਤ੍ਤਸ੍ਸ ਪਾਕਟਭਾਵੇਨ ਉਪਟ੍ਠਿਤਤ੍ਤਾ ਪੁਰਿਮਾਕਾਰੇਨੇਵ ਕਮ੍ਮਟ੍ਠਾਨਮਨਸਿਕਾਰੋ ਭਾਵਨਾਵੀਥਿਂ ਪਟਿਪਜ੍ਜਤਿ.

੧੧੬. ਉਦ੍ਧੁਮਾਤਕਂ ਨਾਮ ਅਤਿਵਿਯ ਅਸੁਚਿਦੁਗ੍ਗਨ੍ਧਜੇਗੁਚ੍ਛਪਟਿਕ੍ਕੂਲਂ ਬੀਭਚ੍ਛਂ ਭਯਾਨਕਞ੍ਚ, ਏਵਰੂਪੇ ਆਰਮ੍ਮਣੇ ਭਾਵਨਮਨੁਯੁਞ੍ਜਨ੍ਤਸ੍ਸ ਏਵਂ ਆਬਦ੍ਧਪਰਿਕਮ੍ਮਸ੍ਸ ਥਿਰੀਭੂਤਸ੍ਸੇਵ ਯੋਗਿਨੋ ਅਧਿਪ੍ਪਾਯੋ ਸਮਿਜ੍ਝਤੀਤਿ ਦਸ੍ਸੇਤੁਂ ‘‘ਆਨਿਸਂਸਦਸ੍ਸਾਵੀ’’ਤਿਆਦਿ ਵੁਤ੍ਤਂ. ਏਵਨ੍ਤਿ ਏਵਮੇਵ ਵੁਤ੍ਤਪ੍ਪਕਾਰੇਨੇਵ ਆਨਿਸਂਸਦਸ੍ਸਾਵਿਨਾ. ਤਂ ਰਕ੍ਖੇਯ੍ਯਾਤਿ ‘‘ਅਦ੍ਧਾ ਇਮਿਨਾ ਸੁਖਂ ਜੀਵਿਸ੍ਸਾਮੀ’’ਤਿ ਅਤ੍ਤਨੋ ਜੀਵਿਤਂ ਵਿਯ ਤਂ ਮਣਿਰਤਨਂ ਰਕ੍ਖੇਯ੍ਯ. ਚਤੁਧਾਤੁਕਮ੍ਮਟ੍ਠਾਨਿਕੋਤਿਆਦਿ ਨੇਸਂ ਕਮ੍ਮਟ੍ਠਾਨਾਨਂ ਸੁਲਭਤਾਦਸ੍ਸਨਂ. ਤਤ੍ਥ ਚਤੁਧਾਤੁਕਮ੍ਮਟ੍ਠਾਨਿਕੋਤਿ ਚਤੁਧਾਤੁਕਮ੍ਮਟ੍ਠਾਨਂ ਵਾ ਤਤ੍ਥ ਵਾ ਨਿਯੁਤ੍ਤੋ, ਚਤੁਧਾਤੁਕਮ੍ਮਟ੍ਠਾਨਂ ਵਾ ਪਰਿਹਰਨ੍ਤੋ. ਇਤਰਾਨੀਤਿ ਵੁਤ੍ਤਾਵਸਿਟ੍ਠਾਨਿ ਅਨੁਸ੍ਸਤਿਬ੍ਰਹ੍ਮਵਿਹਾਰਾਦੀਨਿ. ਤਂ ਨਿਮਿਤ੍ਤਨ੍ਤਿ ਤਂ ਯਥਾਲਦ੍ਧਂ ਉਗ੍ਗਹਨਿਮਿਤ੍ਤਂ. ‘‘ਰਕ੍ਖਿਤਬ੍ਬ’’ਨ੍ਤਿ ਵਤ੍ਵਾ ਰਕ੍ਖਣਵਿਧਿਂ ਪੁਨ ਦਸ੍ਸੇਤੁਂ ‘‘ਰਤ੍ਤਿਟ੍ਠਾਨੇ’’ਤਿਆਦਿ ਵੁਤ੍ਤਂ.

੧੧੭. ਨਾਨਾ ਕਰੀਯਤਿ ਏਤੇਨਾਤਿ ਨਾਨਾਕਰਣਂ, ਭੇਦੋ. ਬੀਭਚ੍ਛਂ ਭੇਰਵਦਸ੍ਸਨਂ ਹੁਤ੍ਵਾ ਉਪਟ੍ਠਾਤਿ ਮਨਸਿਕਾਰਸ੍ਸ ਅਨੁਲ਼ਾਰਤਾਯ, ਅਨੁਪਸਨ੍ਤਤਾਯ ਚ ਆਰਮ੍ਮਣਸ੍ਸ. ਤਬ੍ਬਿਪਰਿਯਾਯਤੋ ‘‘ਪਟਿਭਾਗਨਿਮਿਤ੍ਤਂ ਥੂਲਙ੍ਗਪਚ੍ਚਙ੍ਗਪੁਰਿਸੋ ਵਿਯ ਉਪਟ੍ਠਾਤੀ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਬਹਿਦ੍ਧਾਤਿ ਗੋਚਰਜ੍ਝਤ੍ਤਤੋ ਬਹਿਦ੍ਧਾ. ਕਾਮਾਨਂ ਅਮਨਸਿਕਾਰਾਤਿ ਅਸੁਭਭਾਵਨਾਨੁਭਾਵੇਨ ਕਾਮਸਞ੍ਞਾਯ ਦੂਰਸਮੁਸ੍ਸਾਰਿਤਤ੍ਤਾ ਕਾਮਗੁਣੇ ਆਰਬ੍ਭ ਮਨਸਿਕਾਰਸ੍ਸੇਵ ਅਭਾਵਾ. ਅਮਨਸਿਕਾਰਾਤਿ ਵਾ ਮਨਸਿਕਾਰਪਟਿਪਕ੍ਖਹੇਤੁ. ਯਾਯ ਹਿ ਕਾਮਸਞ੍ਞਾਯ ਵਸੇਨ ਸਤ੍ਤਾ ਕਾਮੇ ਮਨਸਿ ਕਰੋਨ੍ਤਿ, ਤਸ੍ਸਾ ਪਟਿਪਕ੍ਖਭੂਤਾ ਅਸੁਭਸਞ੍ਞਾ ਕਾਮਾਨਂ ਅਮਨਸਿਕਾਰੋ, ਤਨ੍ਨਿਮਿਤ੍ਤਨ੍ਤਿ ਅਤ੍ਥੋ. ਤੇਨਾਹ ‘‘ਵਿਕ੍ਖਮ੍ਭਨਵਸੇਨ ਕਾਮਚ੍ਛਨ੍ਦੋ ਪਹੀਯਤੀ’’ਤਿ. ਪਟਿਭਾਗਨਿਮਿਤ੍ਤਾਰਮ੍ਮਣਾਯ ਹਿ ਅਸੁਭਸਞ੍ਞਾਯ ਸਦ੍ਧਿਂ ਬਲਪ੍ਪਤ੍ਤੋ ਸਮਾਧਿ ਉਪ੍ਪਜ੍ਜਮਾਨੋਵ ਕਾਮਚ੍ਛਨ੍ਦਂ ਵਿਕ੍ਖਮ੍ਭੇਤਿ, ਅਨੁਰੋਧਮੂਲਕੋ ਆਘਾਤੋ ਮੂਲਕਾਰਣੇ ਵਿਕ੍ਖਮ੍ਭਿਤੇ ਵਿਕ੍ਖਮ੍ਭਿਤੋਯੇਵ ਹੋਤੀਤਿ ਆਹ ‘‘ਅਨੁਨਯ…ਪੇ… ਪਹੀਯਤੀ’’ਤਿ. ਨ ਹਿ ਕਦਾਚਿ ਪਹੀਨਾਨੁਨਯਸ੍ਸ ਬ੍ਯਾਪਾਦੋ ਸਮ੍ਭਵਤਿ. ਯਥਾਵੁਤ੍ਤਅਸੁਭਸਞ੍ਞਾਸਹਗਤਾ ਹਿ ਪੀਤਿ ਸਾਤਿਸਯਾ ਪਵਤ੍ਤਮਾਨਾਵ ਬ੍ਯਾਪਾਦਂ ਵਿਕ੍ਖਮ੍ਭੇਨ੍ਤੀ ਪਵਤ੍ਤਤਿ. ਤਥਾ ਆਰਦ੍ਧਵੀਰਿਯਤਾਯਾਤਿ ਯਥਾ ਉਪਚਾਰਜ੍ਝਾਨਂ ਉਪ੍ਪਜ੍ਜਤਿ, ਤਥਾ ਕਮ੍ਮਟ੍ਠਾਨਮਨਸਿਕਾਰਵਸੇਨ ਪਗ੍ਗਹਿਤਵੀਰਿਯਤਾਯ. ਵੀਰਿਯਞ੍ਹਿ ਪਗ੍ਗਣ੍ਹਨ੍ਤਸ੍ਸ ਸਮ੍ਮਾਸਙ੍ਕਪ੍ਪੋ ਮਿਚ੍ਛਾਸਙ੍ਕਪ੍ਪਂ ਵਿਯ ਸਵਿਪ੍ਫਾਰਤਾਯ ਥਿਨਮਿਦ੍ਧਂ ਵਿਕ੍ਖਮ੍ਭੇਨ੍ਤਮੇਵ ਉਪ੍ਪਜ੍ਜਤਿ.

ਵਿਪ੍ਪਟਿਸਾਰੋ ਪਚ੍ਛਾਨੁਤਾਪੋ, ਤਪ੍ਪਟਿਪਕ੍ਖਤੋ ਅਵਿਪ੍ਪਟਿਸਾਰੋ ਦਰਥਪਰਿਲ਼ਾਹਾਭਾਵੇਨ ਚਿਤ੍ਤਸ੍ਸ ਨਿਬ੍ਬੁਤਤਾ. ਤਸ੍ਸ ਅਵਿਪ੍ਪਟਿਸਾਰਸ੍ਸ ਪਚ੍ਚਯਭੂਤਂ ਸੀਲਂ, ਤਂਸਹਗਤਾ ਤਦੁਪਨਿਸ੍ਸਯਾ ਚ ਪੀਤਿਪਸ੍ਸਦ੍ਧਿਸੁਖਾਦਯੋ ਸਭਾਵਤੋ, ਹੇਤੁਤੋ ਚ ਸਨ੍ਤਸਭਾਵਾ, ਤੇਸਂ ਅਨੁਯੁਞ੍ਜਨੇਨ ਅਵੂਪਸਨ੍ਤਸਭਾਵਂ ਉਦ੍ਧਚ੍ਚਕੁਕ੍ਕੁਚ੍ਚਂ ਪਹੀਯਤੀਤਿ ਆਹ ‘‘ਅਵਿਪ੍ਪਟਿਸਾਰਕਰਸਨ੍ਤਧਮ੍ਮਾਨੁਯੋਗਵਸੇਨ ਉਦ੍ਧਚ੍ਚਕੁਕ੍ਕੁਚ੍ਚਂ ਪਹੀਯਤੀ’’ਤਿ. ਭਾਵਨਾਯ ਹਿ ਪੁਬ੍ਬੇਨਾਪਰਂ ਵਿਸੇਸਂ ਆਵਹਨ੍ਤਿਯਾ ਯਂ ਸਾਤਿਸਯਂ ਸੁਖਂ ਲਬ੍ਭਤਿ, ਤਂ ਅਨੁਪਸਨ੍ਤਸਭਾਵਂ ਉਦ੍ਧਚ੍ਚਕੁਕ੍ਕੁਚ੍ਚਂ ਵਿਕ੍ਖਮ੍ਭੇਨ੍ਤਮੇਵ ਉਪ੍ਪਜ੍ਜਤਿ. ਅਧਿਗਤਵਿਸੇਸਸ੍ਸਾਤਿ ਯਥਾਧਿਗਤਸ੍ਸ ਭਾਵਨਾਵਿਸੇਸਸ੍ਸ. ਪਚ੍ਚਕ੍ਖਤਾਯਾਤਿ ਪਟਿਪਜ੍ਜਨ੍ਤਸ੍ਸ ਯੋਗਿਨੋ ਪਚ੍ਚਕ੍ਖਭਾਵਤੋ ‘‘ਸਮ੍ਮਾਸਮ੍ਬੁਦ੍ਧੋ ਵਤ ਸੋ ਭਗਵਾ, ਯੋ ਏਵਰੂਪਿਂ ਸਮ੍ਮਾਪਟਿਪਤ੍ਤਿਂ ਦੇਸੇਤੀ’’ਤਿ ਪਟਿਪਤ੍ਤਿਦੇਸਕੇ ਸਤ੍ਥਰਿ. ਪਟਿਪਤ੍ਤਿਯਨ੍ਤਿ ਪਟਿਪਜ੍ਜਮਾਨਜ੍ਝਾਨਪਟਿਪਤ੍ਤਿਯਂ. ਪਟਿਪਤ੍ਤਿਫਲੇਤਿ ਤਾਯ ਸਾਧੇਤਬ੍ਬੇ ਲੋਕਿਯਲੋਕੁਤ੍ਤਰਫਲੇ. ਵਿਚਿਕਿਚ੍ਛਾ ਪਹੀਯਤਿ ਧਮ੍ਮਨ੍ਵਯਵਿਚਾਰਾਹਿਤਬਲੇਨ ਵਿਚਾਰਬਲੇਨ. ਇਤਿ ਪਞ੍ਚ ਨੀਵਰਣਾਨਿ ਪਹੀਯਨ੍ਤੀਤਿ ਏਵਂ ਪਟਿਭਾਗਨਿਮਿਤ੍ਤਪਟਿਲਾਭਸਮਕਾਲਮੇਵ ਹੇਟ੍ਠਾ ਪਵਤ੍ਤਭਾਵਨਾਨੁਭਾਵਨਿਪ੍ਫਨ੍ਨੇਹਿ ਸਮਾਧਿਆਦੀਹਿ ਕਾਮਚ੍ਛਨ੍ਦਾਦੀਨਿ ਪਞ੍ਚ ਨੀਵਰਣਾਨਿ ਵਿਕ੍ਖਮ੍ਭਨਵਸੇਨ ਪਹੀਯਨ੍ਤਿ. ਨ ਹਿ ਪਟਿਪਕ੍ਖੇਨ ਵਿਨਾ ਪਹਾਤਬ੍ਬਸ੍ਸ ਪਹਾਨਂ ਸਮ੍ਭਵਤਿ, ਪਟਿਪਕ੍ਖਾ ਚ ਸਮਾਧਿਆਦਯੋ ਕਾਮਚ੍ਛਨ੍ਦਾਦੀਨਂ. ਯਥਾਹ ਪੇਟਕੇ ‘‘ਸਮਾਧਿ ਕਾਮਚ੍ਛਨ੍ਦਸ੍ਸ ਪਟਿਪਕ੍ਖੋ’’ਤਿਆਦਿ.

ਤੇਨੇਵ ਚ ‘‘ਇਮੇਹਿ ਤੇਸਂ ਨੀਵਰਣਾਨਂ ਪਹਾਨ’’ਨ੍ਤਿ ਪਹਾਨਪਰਿਦੀਪਨਮੁਖੇਨ ਝਾਨਙ੍ਗਾਨਿ ਸਰੂਪਤੋ ਦਸ੍ਸੇਤੁਂ ‘‘ਤਸ੍ਮਿਞ੍ਞੇਵ ਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਤਸ੍ਮਿਞ੍ਞੇਵ ਚਾਤਿ ਯਂ ਤਂ ਯਥਾਉਪਟ੍ਠਿਤਂ ਉਗ੍ਗਹਨਿਮਿਤ੍ਤਂ ਭਿਨ੍ਦਿਤ੍ਵਾ ਵਿਯ ਉਪਟ੍ਠਿਤਂ, ਤਸ੍ਸ ਪਟਿਚ੍ਛਨ੍ਨਭੂਤਂ ਪਟਿਭਾਗਨਿਮਿਤ੍ਤਂ, ਤਸ੍ਮਿਞ੍ਞੇਵ ਨਿਮਿਤ੍ਤੇ. ਚੇਤਸੋਤਿ ਅਤ੍ਤਨਾ ਸਮ੍ਪਯੁਤ੍ਤਚਿਤ੍ਤਸ੍ਸ. ਅਭਿਨਿਰੋਪਨਲਕ੍ਖਣੋਤਿ ਆਰੋਪਨਲਕ੍ਖਣੋ, ਅਪ੍ਪਨਾਸਭਾਵੋਤਿ ਅਤ੍ਥੋ. ਨਿਮਿਤ੍ਤਾਨੁਮਜ੍ਜਨਂ ਪਟਿਭਾਗਨਿਮਿਤ੍ਤੇ ਅਨੁਵਿਚਰਣਂ. ਆਰਮ੍ਮਣੇ ਹਿ ਭਮਰਸ੍ਸ ਪਦੁਮਸ੍ਸੂਪਰਿ ਅਨੁਪਰਿਬ੍ਭਮਨਂ ਵਿਯ ਵਿਚਾਰਸ੍ਸ ਅਨੁਵਿਚਾਰਣਾਕਾਰੇਨ ਪਵਤ੍ਤਿ ਅਨੁਮਜ੍ਜਨਕਿਚ੍ਚਂ. ਵਿਸੇਸੋ ਏਵ ਅਧਿਗਨ੍ਤਬ੍ਬਤੋ ਵਿਸੇਸਾਧਿਗਮੋ, ਪਟਿਲਦ੍ਧੋ ਚ ਸੋ ਵਿਸੇਸਾਧਿਗਮੋ ਚਾਤਿ ਪਟਿ…ਪੇ… ਗਮੋ, ਤਪ੍ਪਚ੍ਚਯਾ ਤਂਹੇਤੁਕਾ ਪਟਿਲਦ੍ਧਵਿਸੇਸਾਧਿਗਮਪਚ੍ਚਯਾ ਪੀਤਿ. ਪੀਤਿਮਨਸ੍ਸ ਪੀਤਿਸਹਿਤਚਿਤ੍ਤਸ੍ਸ. ਪਸ੍ਸਦ੍ਧਿਸਮ੍ਭਵਤੋਤਿ ਕਾਯਚਿਤ੍ਤਪਸ੍ਸਦ੍ਧੀਨਂ ਸਂਸਿਜ੍ਝਨਤੋ. ‘‘ਪੀਤਿਮਨਸ੍ਸ ਕਾਯੋ ਪਸ੍ਸਮ੍ਭਤੀ’’ਤਿ ਹਿ ਵੁਤ੍ਤਂ. ਪਸ੍ਸਦ੍ਧਿਨਿਮਿਤ੍ਤਂ ਪਸ੍ਸਦ੍ਧਿਹੇਤੁਕਂ ਸੁਖਂ ‘‘ਪਸ੍ਸਦ੍ਧਕਾਯੋ ਸੁਖਂ ਵੇਦਿਯਤੀ’’ਤਿ ਵਚਨਤੋ. ਸੁਖਨਿਮਿਤ੍ਤਾ ਸੁਖਪਚ੍ਚਯਾ ਏਕਗ੍ਗਤਾ. ‘‘ਸੁਖਿਨੋ ਚਿਤ੍ਤਂ ਸਮਾਧਿਯਤੀ’’ਤਿ (ਦੀ. ਨਿ. ੧.੪੬੬; ਅ. ਨਿ. ੩.੯੬; ੧੧.੧੨) ਹਿ ਵੁਤ੍ਤਂ. ਇਤਿ ਝਾਨਙ੍ਗਾਨਿ ਪਾਤੁਭਵਨ੍ਤੀਤਿ ਏਵਂ ਏਤਾਨਿ ਵਿਤਕ੍ਕਾਦੀਨਿ ਝਾਨਙ੍ਗਾਨਿ ਤਸ੍ਮਿਂਯੇਵ ਨਿਮਿਤ੍ਤੇ ਉਪ੍ਪਜ੍ਜਨ੍ਤਿ. ਪਠਮਜ੍ਝਾਨਪਟਿਬਿਮ੍ਬਭੂਤਨ੍ਤਿ ਪਠਮਜ੍ਝਾਨਸ੍ਸ ਪਟਿਚ੍ਛਨ੍ਨਭੂਤਂ. ਤਙ੍ਖਣਞ੍ਞੇਵ ਪਟਿਭਾਗਨਿਮਿਤ੍ਤਪਟਿਲਾਭਸਮਕਾਲਮੇਵ ਉਪਚਾਰਜ੍ਝਾਨਮ੍ਪਿ ਨਿਬ੍ਬਤ੍ਤਤਿ, ਨ ਨੀਵਰਣਪ੍ਪਹਾਨਮੇਵਾਤਿ ਅਧਿਪ੍ਪਾਯੋ.

ਵਿਨੀਲਕਾਦਿਕਮ੍ਮਟ੍ਠਾਨਵਣ੍ਣਨਾ

੧੧੮. ਵਿਨੀਲਕਾਦੀਸੁਪਿ ਕਮ੍ਮਟ੍ਠਾਨੇਸੁ. ਲਕ੍ਖਣਂ ਵੁਤ੍ਤਨ੍ਤਿ ਯਂ ਤਂ ਨਿਮਿਤ੍ਤਗ੍ਗਹਣਲਕ੍ਖਣਂ ਵੁਤ੍ਤਂ. ਵੁਤ੍ਤਨਯੇਨੇਵਾਤਿ ਉਦ੍ਧੁਮਾਤਕੇ ਵੁਤ੍ਤਨਯੇਨੇਵ. ਸਹ ਵਿਨਿਚ੍ਛਯੇਨ, ਅਧਿਪ੍ਪਾਯੇਨ ਚਾਤਿ ਸਵਿਨਿਚ੍ਛਯਾਧਿਪ੍ਪਾਯਂ. ਤਂ ਸਬ੍ਬਂ ਲਕ੍ਖਣਂ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ.

ਕਬਰਕਬਰਵਣ੍ਣਨ੍ਤਿ ਯੇਭੁਯ੍ਯੇਨ ਸਬਲਵਣ੍ਣਂ. ਉਸ੍ਸਦਵਸੇਨਾਤਿ ਰਤ੍ਤਸੇਤਨੀਲਵਣ੍ਣੇਸੁ ਉਸ੍ਸਦਸ੍ਸ ਵਣ੍ਣਸ੍ਸ ਵਸੇਨ.

ਸਨ੍ਨਿਸਿਨ੍ਨਨ੍ਤਿ ਨਿਚ੍ਚਲਭਾਵੇਨੇਵ ਸਬ੍ਬਸੋ ਥਿਰਤਂ.

ਚੋਰਾਟਵਿਯਨ੍ਤਿ ਚੋਰੇਹਿ ਪਰਿਯੁਟ੍ਠਿਤਅਰਞ੍ਞੇ. ਯਤ੍ਥਾਤਿ ਯਸ੍ਮਿਂ ਆਘਾਤਨੇ. ਛਿਨ੍ਨਪੁਰਿਸਟ੍ਠਾਨੇਤਿ ਛਿਨ੍ਨਪੁਰਿਸਵਨ੍ਤੇ ਠਾਨੇ. ਨਾਨਾਦਿਸਾਯਂ ਪਤਿਤਮ੍ਪੀਤਿ ਛਿਨ੍ਨਂ ਹੁਤ੍ਵਾ ਸਰੀਰਸ੍ਸ ਖਣ੍ਡਦ੍ਵਯਂ ਵਿਸੁਂ ਦਿਸਾਸੁ ਪਤਿਤਮ੍ਪਿ. ਏਕਾਵਜ੍ਜਨੇਨਾਤਿ ਏਕਸਮਨ੍ਨਾਹਾਰੇਨ. ਆਪਾਥਮਾਗਚ੍ਛਤੀਤਿ ਏਕਜ੍ਝਂ ਆਪਾਥਂ ਆਗਚ੍ਛਤਿ. ਵਿਸ੍ਸਾਸਂ ਆਪਜ੍ਜਤੀਤਿ ਅਜੇਗੁਚ੍ਛਿਤਂ ਉਪਗਚ੍ਛੇਯ੍ਯ ਸੇਯ੍ਯਥਾਪਿ ਛਵਡਾਹਕੋ. ਸਹਤ੍ਥਾ ਅਪਰਾਮਸਨੇ ਜਿਗੁਚ੍ਛਾ ਸਣ੍ਠਾਤਿਯੇਵਾਤਿ ਆਹ ‘‘ਕਤ੍ਤਰਯਟ੍ਠਿਯਾ ਵਾ ਦਣ੍ਡਕੇਨ ਵਾ…ਪੇ… ਉਪਨਾਮੇਤਬ੍ਬ’’ਨ੍ਤਿ. ਵਿਚ੍ਛਿਦ੍ਦਕਭਾਵਪਞ੍ਞਾਯਨਤ੍ਥਂ ਏਕਙ੍ਗੁਲਨ੍ਤਰਕਰਣਂ. ਉਪਨਾਮੇਤਬ੍ਬਨ੍ਤਿ ਉਪਨੇਤਬ੍ਬਂ.

ਖਾਯਿਤਸਦਿਸਮੇਵਾਤਿ ਖਾਯਿਤਾਸੁਭਸਦਿਸਮੇਵ. ਅਙ੍ਗੁਲਙ੍ਗੁਲਨ੍ਤਰਨ੍ਤਿ ਵਿਵਿਧਂ ਖਿਤ੍ਤਂ ਸਰੀਰਾਵਯਵਂ ਅਙ੍ਗੁਲਨ੍ਤਰਂ ਅਙ੍ਗੁਲਨ੍ਤਰਂ. ਕਤ੍ਵਾ ਵਾਤਿ ਕਤ੍ਤਰਯਟ੍ਠਿਯਾ ਵਾ ਦਣ੍ਡਕੇਨ ਵਾ ਸਯਂ ਕਤ੍ਵਾ ਵਾ.

ਲਦ੍ਧਪ੍ਪਹਾਰਾਨਨ੍ਤਿ ਲਦ੍ਧਾਵੁਧਪ੍ਪਹਾਰਾਨਂ ਮੁਖਤੋਤਿ ਸਮ੍ਬਨ੍ਧੋ. ਮੁਖਤੋਤਿ ਪਹਾਰਾਦਿਮੁਖਤੋ. ਪਗ੍ਘਰਮਾਨਕਾਲੇਤਿ ਲੋਹਿਤਂ ਪਗ੍ਘਰਮਾਨਕਾਲੇ. ਲੋਹਿਤਕਂ ਲਬ੍ਭਤੀਤਿ ਯੋਜਨਾ.

ਤਨ੍ਤਿ ਪੁਲ਼ਵਕਂ. ਤੇਸੂਤਿ ਸੋਣਾਦਿਸਰੀਰੇਸੁ. ਅਟ੍ਠਿਕਨ੍ਤਿ ਅਟ੍ਠਿਕਅਸੁਭਂ ਨਾਨਪ੍ਪਕਾਰਤੋ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਪੁਰਿਮਨਯੇਨੇਵਾਤਿ ਪੁਬ੍ਬੇ ਉਦ੍ਧੁਮਾਤਕੇ ਵੁਤ੍ਤਨਯੇਨੇਵ.

੧੧੯. ਤਨ੍ਤਿ ਅਟ੍ਠਿਕਂ. ਨ ਉਪਟ੍ਠਾਤੀਤਿ ਸਭਾਵਤੋ ਨ ਉਪਟ੍ਠਾਤਿ, ਪਟਿਕ੍ਕੂਲਵਸੇਨ ਨ ਉਪਟ੍ਠਾਤੀਤਿ ਅਤ੍ਥੋ. ਤੇਨਾਹ ‘‘ਓਦਾਤਕਸਿਣਸਮ੍ਭੇਦੋ ਹੋਤੀ’’ਤਿ. ਅਟ੍ਠਿਕੇ ਪਠਮਵਯਾਦਿਸਂਲਕ੍ਖਣਂ ਨ ਸਕ੍ਕਾਤਿ ‘‘ਲਿਙ੍ਗਨ੍ਤਿ ਇਧ ਹਤ੍ਥਾਦੀਨਂ ਨਾਮ’’ਨ੍ਤਿ ਵੁਤ੍ਤਂ. ਅਟ੍ਠਿਕਸਙ੍ਖਲਿਕਾ ਪਨ ‘‘ਅਯਂ ਦਹਰਸ੍ਸ, ਅਯਂ ਯੋਬ੍ਬਨੇ ਠਿਤਸ੍ਸ, ਅਯਂ ਅਵਯਵੇਹਿ ਵੁਦ੍ਧਿਪਤ੍ਤਿਸ੍ਸਾ’’ਤਿ ਏਵਂ ਵਯਵਸੇਨ ਵਵਤ੍ਥਪੇਤੁਂ ਸਕ੍ਕੁਣੇਯ੍ਯਾਵ, ਅਬ੍ਯਾਪਿਤਾਯ ਪਨ ਨ ਗਹਿਤਨ੍ਤਿ ਵੇਦਿਤਬ੍ਬਂ. ਯਦਿਪਿ ਅਟ੍ਠਿਕਸਙ੍ਖਲਿਕਾਯਂ ਸਨ੍ਧਿਤੋ ਵਵਤ੍ਥਾਪਨਂ ਲਬ੍ਭਤਿ, ਅਟ੍ਠਿਕੇ ਪਨ ਨ ਲਬ੍ਭਤੀਤਿ ਤਸ੍ਸ ਅਨਿਯਤਭਾਵਦੀਪਨਤ੍ਥਂ ਕਮਵਿਲਙ੍ਘਨਂ ਕਤ੍ਵਾ ‘‘ਤਸ੍ਸ ਤਸ੍ਸ ਅਟ੍ਠਿਨੋ ਨਿਨ੍ਨਟ੍ਠਾਨਥਲਟ੍ਠਾਨਵਸੇਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਨਿਨ੍ਨਟ੍ਠਾਨਂ ਨਾਮ ਅਟ੍ਠਿਨੋ ਵਿਨਤਪ੍ਪਦੇਸੋ. ਥਲਟ੍ਠਾਨਂ ਉਨ੍ਨਤਪ੍ਪਦੇਸੋ. ਘਟਿਤਘਟਿਤਟ੍ਠਾਨਵਸੇਨਾਤਿ ਅਨੁਪਗਤਨ੍ਹਾਰੁਬਨ੍ਧਾਨਂ, ਇਤਰੇਸਞ੍ਚ ਅਞ੍ਞਮਞ੍ਞਂ ਸਂਕਿਲਿਟ੍ਠਸਂਕਿਲਿਟ੍ਠਟ੍ਠਾਨਵਸੇਨ. ਅਨ੍ਤਰਵਸੇਨਾਤਿ ਅਞ੍ਞਮਞ੍ਞਸ੍ਸ ਅਨ੍ਤਰਵਸੇਨ, ਸੁਸਿਰਵਸੇਨ ਚ. ਸਬ੍ਬਤ੍ਥੇਵਾਤਿ ਸਕਲਾਯ ਅਟ੍ਠਿਸਙ੍ਖਲਿਕਾਯ, ਸਬ੍ਬਸ੍ਮਿਂ ਵਾ ਅਟ੍ਠਿਕੇ.

੧੨੦. ਏਤ੍ਥਾਤਿ ਏਤਸ੍ਮਿਂ ਅਟ੍ਠਿਕਾਸੁਭੇ. ਯੁਜ੍ਜਮਾਨਵਸੇਨ ਸਲ੍ਲਕ੍ਖੇਤਬ੍ਬਨ੍ਤਿ ਯਂ ਨਿਮਿਤ੍ਤਗ੍ਗਹਣਂ ਯਤ੍ਥ ਯੁਜ੍ਜਤਿ, ਤਂ ਤਤ੍ਥ ਉਗ੍ਗਣ੍ਹਨਤ੍ਥਂ ਨਿਮਿਤ੍ਤਗ੍ਗਹਣਵਸੇਨ ਉਪਲਕ੍ਖੇਤਬ੍ਬਂ. ਸਕਲਾਯਾਤਿ ਅਨਵਸੇਸਭਾਗਾਯ ਪਰਿਪੁਣ੍ਣਾਵਯਵਾਯ. ਸਮ੍ਪਜ੍ਜਤਿ ਨਿਮਿਤ੍ਤੁਪਟ੍ਠਾਨਵਸੇਨ. ਤੇਸੂਤਿ ਅਟ੍ਠਿਕਸਙ੍ਖਲਿਕਟ੍ਠਿਕੇਸੁ. ਵੁਤ੍ਤਂ ਅਟ੍ਠਕਥਾਯਂ. ਤਨ੍ਤਿ ‘‘ਏਕਸਦਿਸਮੇਵਾ’’ਤਿ ਵਚਨਂ. ਏਕਸ੍ਮਿਂ ਅਟ੍ਠਿਕੇ ਯੁਤ੍ਤਨ੍ਤਿ ਇਦਂ ਯਥਾ ਵਿਨੀਲਕਾਦੀਸੁ ਉਭਿਨ੍ਨਂ ਨਿਮਿਤ੍ਤਾਨਂ ਯਥਾਰਹਂ ਵਣ੍ਣਵਿਸੇਸਤੋ, ਪਰਿਪੁਣ੍ਣਾਪਰਿਪੁਣ੍ਣਤੋ, ਸਵਿਵਰਾਵਿਵਰਤੋ, ਚਲਾਚਲਤੋ ਚ ਵਿਸੇਸੋ ਲਬ੍ਭਤਿ, ਨ ਏਵਮੇਤਸ੍ਸਾਤਿ ਕਤ੍ਵਾ ਵੁਤ੍ਤਂ, ਨ ਪਨ ਸਬ੍ਬੇਨ ਸਬ੍ਬਂ ਵਿਸੇਸਾਭਾਵਤੋ. ਤੇਨੇਵਾਹ ‘‘ਏਕਟ੍ਠਿਕੇਪਿ ਚਾ’’ਤਿਆਦਿ. ਤਤ੍ਥ ਬੀਭਚ੍ਛੇਨਾਤਿ ਸੁਵਿਭੂਤਅਟ੍ਠਿਰੂਪਤ੍ਤਾ ਅਟ੍ਠਿਭਾਵੇਨੇਵ ਵਿਰੂਪੇਨ. ਭਯਾਨਕੇਨਾਤਿ ਤੇਨੇਵ ਪਾਕਤਿਕਸਤ੍ਤਾਨਂ ਭਯਾਵਹੇਨ. ਪੀਤਿਸੋਮਨਸ੍ਸਜਨਕੇਨਾਤਿ ਸਣ੍ਹਮਟ੍ਠਭਾਵੇਨ ਉਪਟ੍ਠਾਨਤੋ, ਭਾਵਨਾਯ ਚ ਸਵਿਸੇਸਤ੍ਤਾ ਪੀਤਿਯਾ, ਸੋਮਨਸ੍ਸਸ੍ਸ ਚ ਉਪ੍ਪਾਦਕੇਨ. ਤੇਨੇਵਾਹ ‘‘ਉਪਚਾਰਾਵਹਤ੍ਤਾ’’ਤਿ.

ਇਮਸ੍ਮਿਂ ਓਕਾਸੇਤਿ ਉਗ੍ਗਹਪਟਿਭਾਗਨਿਮਿਤ੍ਤਾਨਂ ਵੁਤ੍ਤਟ੍ਠਾਨੇ. ਦ੍ਵਾਰਂ ਦਤ੍ਵਾ ਵਾਤਿ ‘‘ਪਟਿਕ੍ਕੂਲਭਾਵੇਯੇਵ ਦਿਟ੍ਠੇ ਨਿਮਿਤ੍ਤਂ ਨਾਮ ਹੋਤੀ’’ਤਿ ਏਤ੍ਤਕੇ ਏਵ ਅਟ੍ਠਤ੍ਵਾ ਅਨਨ੍ਤਰਮੇਵ ‘‘ਦੁਵਿਧਂ ਇਧ ਨਿਮਿਤ੍ਤ’’ਨ੍ਤਿਆਦਿਨਾ ਉਗ੍ਗਹਪਟਿਭਾਗਨਿਮਿਤ੍ਤਾਨਿ ਵਿਭਜਿਤ੍ਵਾ ਵਚਨੇਨ ਯਥਾਵੁਤ੍ਤਸ੍ਸ ਨਿਮਿਤ੍ਤਵਿਭਾਗਸ੍ਸ ਦ੍ਵਾਰਂ ਦਤ੍ਵਾਵ ਵੁਤ੍ਤਂ. ਨਿਬ੍ਬਿਕਪ੍ਪਨ੍ਤਿ ‘‘ਸੁਭ’’ਨ੍ਤਿ ਵਿਕਪ੍ਪੇਨ ਨਿਬ੍ਬਿਕਪ੍ਪਂ, ਅਸੁਭਨ੍ਤ੍ਵੇਵਾਤਿ ਅਤ੍ਥੋ. ਵਿਚਾਰੇਤ੍ਵਾਤਿ ‘‘ਏਕਸ੍ਮਿਂ ਅਟ੍ਠਿਕੇ ਯੁਤ੍ਤ’’ਨ੍ਤਿਆਦਿਨਾ ਵਿਚਾਰੇਤ੍ਵਾ.

ਮਹਾਤਿਸ੍ਸਤ੍ਥੇਰਸ੍ਸਾਤਿ ਚੇਤਿਯਪਬ੍ਬਤਵਾਸੀਮਹਾਤਿਸ੍ਸਤ੍ਥੇਰਸ੍ਸ. ਨਿਦਸ੍ਸਨਾਨੀਤਿ ਦਨ੍ਤਟ੍ਠਿਕਮਤ੍ਤਦਸ੍ਸਨੇਨ ਸਕਲਸ੍ਸਾਪਿ ਤਸ੍ਸਾ ਇਤ੍ਥਿਯਾ ਸਰੀਰਸ੍ਸ ਅਟ੍ਠਿਸਙ੍ਘਾਤਭਾਵੇਨ ਉਪਟ੍ਠਾਨਾਦੀਨਿ ਏਤ੍ਥ ਅਟ੍ਠਿਕਕਮ੍ਮਟ੍ਠਾਨੇ ਉਗ੍ਗਹਪਟਿਭਾਗਨਿਮਿਤ੍ਤਾਨਂ ਵਿਸੇਸਵਿਭਾਵਨਾਨਿ ਉਦਾਹਰਣਾਨਿ.

ਸੁਭਗੁਣੋਤਿ ਸਵਾਸਨਾਨਂ ਕਿਲੇਸਾਨਂ ਪਹੀਨਤ੍ਤਾ ਸੁਪਰਿਸੁਦ੍ਧਗੁਣੋ. ਦਸਸਤਲੋਚਨੇਨਾਤਿ ਸਹਸ੍ਸਕ੍ਖੇਨ ਦੇਵਾਨਮਿਨ੍ਦੇਨ. ਸੋ ਹਿ ਏਕਾਸਨੇਨੇਵ ਸਹਸ੍ਸਅਤ੍ਥਾਨਂ ਵਿਚਾਰਣਸਮਤ੍ਥੇਨ ਪਞ੍ਞਾਚਕ੍ਖੁਨਾ ਸਮਨ੍ਨਾਗਤਤ੍ਤਾ ‘‘ਸਹਸ੍ਸਕ੍ਖੋ’’ਤਿ ਵੁਚ੍ਚਤਿ. ਥੁਤਕਿਤ੍ਤੀਤਿ ‘‘ਯੋ ਧੀਰੋ ਸਬ੍ਬਧਿ ਦਨ੍ਤੋ’’ਤਿਆਦਿਨਾ (ਮਹਾਵ. ੫੮) ਅਭਿਤ੍ਥੁਤਕਿਤ੍ਤਿਸਦ੍ਦੋ.

ਪਕਿਣ੍ਣਕਕਥਾਵਣ੍ਣਨਾ

੧੨੧. ਉਜੁਪਟਿਪਕ੍ਖੇਨ ਪਹੀਨਭਾਵਂ ਸਨ੍ਧਾਯਾਹ ‘‘ਸੁਵਿਕ੍ਖਮ੍ਭਿਤਰਾਗਤ੍ਤਾ’’ਤਿ. ਅਸੁਭਪ੍ਪਭੇਦੋਤਿ ਉਦ੍ਧੁਮਾਤਕਾਦਿਅਸੁਭਵਿਭਾਗੋ. ਸਰੀਰਸਭਾਵਪ੍ਪਤ੍ਤਿਵਸੇਨਾਤਿ ਸਰੀਰਸ੍ਸ ਅਤ੍ਤਨੋ ਸਭਾਵੂਪਗਮਨਵਸੇਨ. ਸਰੀਰਞ੍ਹਿ ਵਿਨਸ੍ਸਮਾਨਂ ਅਞ੍ਞਰੂਪੇਨ ਠਿਤਸ੍ਸ ਰਕ੍ਖਸਸ੍ਸ ਵਿਯ ਸਭਾਵਪ੍ਪਤ੍ਤਿਵਸੇਨੇਵ ਵਿਨਸ੍ਸਤਿ. ਰਾਗਚਰਿਤਭੇਦਵਸੇਨਾਤਿ ਰਾਗਚਰਿਤਵਿਭਾਗਵਸੇਨ. ਯਦਿ ਸਰੀਰਸਭਾਵਪ੍ਪਤ੍ਤਿਵਸੇਨ ਅਯਮਸੁਭਪ੍ਪਭੇਦੋ ਵੁਤ੍ਤੋ, ਮਹਾਸਤਿਪਟ੍ਠਾਨਾਦੀਸੁ (ਦੀ. ਨਿ. ੨.੩੭੨ ਆਦਯੋ; ਮ. ਨਿ. ੧.੧੦੫ ਆਦਯੋ) ਕਥਂ ਨਵਪ੍ਪਭੇਦੋਤਿ? ਸੋ ਸਰਸਤੋ ਏਵ ਸਭਾਵਪ੍ਪਤ੍ਤਿਵਸੇਨ ਵੁਤ੍ਤੋ, ਅਯਂ ਪਨ ਪਰੂਪਕ੍ਕਮੇਨਾਪਿ. ਤਤ੍ਥ ਚ ਇਧਾਗਤੇਸੁ ਦਸਸੁ ਅਸੁਭੇਸੁ ਏਕਚ੍ਚਾਨੇਵ ਗਹਿਤਾਨਿ, ਅਟ੍ਠਿਕਞ੍ਚ ਪਞ੍ਚਵਿਧਾ ਵਿਭਤ੍ਤਂ. ਤਾਨਿ ਚ ਵਿਪਸ੍ਸਨਾਵਸੇਨ, ਇਮਾਨਿ ਸਮਥਵਸੇਨਾਤਿ ਪਾਕਟੋਯਂ ਭੇਦੋਤਿ.

ਇਮੇਸਂ ਪਨ ਦਸ੍ਸਨਮ੍ਪਿ ਅਸੁਭਭਾਵਸਾਮਞ੍ਞੇਨ ਸਤਿਪਿ ਅਵਿਸੇਸਤੋ ਰਾਗਚਰਿਤਾਨਂ ਸਪ੍ਪਾਯਭਾਵੇ ਯਂ ਵੁਤ੍ਤਂ ‘‘ਰਾਗਚਰਿਤਭੇਦਵਸੇਨ ਚਾ’’ਤਿ, ਤਂ ਵਿਭਜਿਤ੍ਵਾ ਦਸ੍ਸੇਤੁਂ ‘‘ਵਿਸੇਸਤੋ’’ਤਿਆਦਿ ਵੁਤ੍ਤਂ. ਸੂਨਭਾਵੇਨ ਸੁਸਣ੍ਠਿਤਮ੍ਪਿ ਸਰੀਰਂ ਦੁਸ੍ਸਣ੍ਠਿਤਮੇਵ ਹੋਤੀਤਿ ਉਦ੍ਧੁਮਾਤਕਸਰੀਰੇ ਸਣ੍ਠਾਨਵਿਪਤ੍ਤਿਂ ਦੀਪੇਤੀਤਿ ਆਹ ‘‘ਸਰੀਰਸਣ੍ਠਾਨਵਿਪਤ੍ਤਿਪ੍ਪਕਾਸਨਤੋ’’ਤਿ. ਸਣ੍ਠਾਨਸਮ੍ਪਤ੍ਤਿਯਂ ਰਤ੍ਤੋ ਸਣ੍ਠਾਨਰਾਗੀ, ਤਸ੍ਸ ਸਪ੍ਪਾਯਂ ਸਣ੍ਠਾਨਰਾਗਸ੍ਸ ਵਿਕ੍ਖਮ੍ਭਨੁਪਾਯਭਾਵਤੋ. ਕਾਯੋ ਏਵ ਕਾਯਵਣੋ, ਤਤ੍ਥ ਪਟਿਬਦ੍ਧਸ੍ਸ ਨਿਸ੍ਸਿਤਸ੍ਸ. ਸੁਸਿਰਭਾਵਪ੍ਪਕਾਸਨਤੋਤਿ ਸੁਸਿਰਸ੍ਸ ਵਿਵਰਸ੍ਸ ਅਤ੍ਥਿਭਾਵਪ੍ਪਕਾਸਨਤੋ. ਸਰੀਰੇ ਘਨਭਾਵਰਾਗਿਨੋਤਿ ਸਰੀਰੇ ਅਙ੍ਗਪਚ੍ਚਙ੍ਗਾਨਂ ਥਿਰਭਾਵਂ ਪਟਿਚ੍ਚ ਉਪ੍ਪਜ੍ਜਨਕਰਾਗਵਤੋ. ਵਿਕ੍ਖੇਪਪ੍ਪਕਾਸਨਤੋਤਿ ਸੋਣਸਿਙ੍ਗਾਲਾਦੀਹਿ ਇਤੋ ਚਿਤੋ ਚ ਵਿਕ੍ਖੇਪਸ੍ਸ ਪਕਾਸਨਤੋ ਅਙ੍ਗਪਚ੍ਚਙ੍ਗਲੀਲਾਰਾਗਿਨੋ ਸਪ੍ਪਾਯਂ. ਈਦਿਸਾਨਂ ਕਿਰ ਅਨਵਟ੍ਠਿਤਰੂਪਾਨਂ ਅਵਯਵਾਨਂ ਕੋ ਲੀਲ਼ਾਵਿਲਾਸੋਤਿ ਵਿਰਾਗਸਮ੍ਭਵਤੋ. ਸਙ੍ਘਾਤਭੇਦਵਿਕਾਰਪ੍ਪਕਾਸਨਤੋਤਿ ਸਙ੍ਘਾਤਸ੍ਸ ਅਙ੍ਗਪਚ੍ਚਙ੍ਗਾਨਂ ਸਂਹਤਭਾਵਸ੍ਸ ਸੁਸਮ੍ਬਨ੍ਧਤਾਯ ਭੇਦੋ ਏਵ ਵਿਕਾਰੋ ਸਙ੍ਘਾਤਭੇਦਵਿਕਾਰੋ, ਤਸ੍ਸ ਪਕਾਸਨਤੋ. ਲੋਹਿਤਂ ਮਕ੍ਖਿਤਂ ਹੁਤ੍ਵਾ ਪਟਿਕ੍ਕੂਲਭਾਵੋ ਲੋਹਿਤਮਕ੍ਖਿਤਪਟਿਕ੍ਕੂਲਭਾਵੋ, ਤਸ੍ਸ ਪਕਾਸਨਤੋ. ਮਮਤ੍ਤਰਾਗਿਨੋਤਿ ‘‘ਮਮ ਅਯ’’ਨ੍ਤਿ ਉਪ੍ਪਜ੍ਜਨਕਰਾਗਵਤੋ. ਦਨ੍ਤਸਮ੍ਪਤ੍ਤਿਰਾਗਿਨੋਤਿ ਦਨ੍ਤਸਮ੍ਪਤ੍ਤਿਯਂ ਰਜ੍ਜਨਸੀਲਸ੍ਸ.

ਕਸ੍ਮਾ ਪਨੇਤ੍ਥ ਉਦ੍ਧੁਮਾਤਕਾਦਿਕੇ ਪਠਮਜ੍ਝਾਨਮੇਵ ਉਪ੍ਪਜ੍ਜਤਿ, ਨ ਦੁਤਿਯਾਦੀਨੀਤਿ ਅਨੁਯੋਗਂ ਮਨਸਿ ਕਤ੍ਵਾ ਆਹ ‘‘ਯਸ੍ਮਾ ਪਨਾ’’ਤਿਆਦਿ. ਅਪਰਿਸਣ੍ਠਿਤਜਲਾਯਾਤਿ ਸੋਤਵਸੇਨ ਪਵਤ੍ਤਿਯਾ ਸਮਨ੍ਤਤੋ ਅਟ੍ਠਿਤਜਲਾਯ ਅਸਨ੍ਨਿਸਿਨ੍ਨਸਲਿਲਾਯ. ਅਰਿਤ੍ਤਬਲੇਨਾਤਿ ਪਾਜਨਦਣ੍ਡਬਲੇਨ. ਦੁਬ੍ਬਲਤ੍ਤਾ ਆਰਮ੍ਮਣਸ੍ਸਾਤਿ ਪਟਿਕ੍ਕੂਲਭਾਵੇਨ ਅਤ੍ਤਨਿ ਚਿਤ੍ਤਂ ਠਪੇਤੁਂ ਅਸਮਤ੍ਥਭਾਵੋ ਆਰਮ੍ਮਣਸ੍ਸ ਦੁਬ੍ਬਲਤਾ. ਪਟਿਕ੍ਕੂਲੇ ਹਿ ਆਰਮ੍ਮਣੇ ਸਰਸਤੋ ਚਿਤ੍ਤਂ ਪਵਤ੍ਤਿਤੁਂ ਨ ਸਕ੍ਕੋਤਿ, ਅਭਿਨਿਰੋਪਨਲਕ੍ਖਣੇਨ ਪਨ ਵਿਤਕ੍ਕੇਨ ਅਭਿਨਿਰੋਪਿਯਮਾਨਮੇਵ ਚਿਤ੍ਤਂ ਏਕਗ੍ਗਤਂ ਲਭਤਿ. ਨ ਵਿਨਾ ਵਿਤਕ੍ਕੇਨਾਤਿ ਵਿਤਕ੍ਕਰਹਿਤਾਨਿ ਦੁਤਿਯਾਦਿਜ੍ਝਾਨਾਨਿ ਤਤ੍ਥ ਪਤਿਟ੍ਠਂ ਨ ਲਭਨ੍ਤਿ. ਤੇਨਾਹ ‘‘ਵਿਤਕ੍ਕਬਲੇਨੇਵਾ’’ਤਿਆਦਿ.

ਯਦਿ ਪਟਿਕ੍ਕੂਲਭਾਵਤੋ ਉਦ੍ਧੁਮਾਤਾਦਿਆਰਮ੍ਮਣੇ ਦੁਤਿਯਾਦਿਜ੍ਝਾਨਾਨਿ ਨ ਪਵਤ੍ਤਨ੍ਤਿ, ਏਵਂ ਸਨ੍ਤੇ ਪਠਮਜ੍ਝਾਨੇਨਾਪਿ ਤਤ੍ਥ ਨ ਉਪ੍ਪਜ੍ਜਿਤਬ੍ਬਂ. ਨ ਹਿ ਤਤ੍ਥ ਪੀਤਿਸੋਮਨਸ੍ਸਾਨਂ ਸਮ੍ਭਵੋ ਯੁਤ੍ਤੋਤਿ ਚੋਦਨਂ ਸਨ੍ਧਾਯਾਹ ‘‘ਪਟਿਕ੍ਕੂਲੇਪਿ ਚ ਏਤਸ੍ਮਿ’’ਨ੍ਤਿਆਦਿ. ਤਤ੍ਥ ਆਨਿਸਂਸਦਸ੍ਸਾਵਿਤਾਨੀਵਰਣਸਨ੍ਤਾਪਰੋਗਵੂਪਸਮਾਨਂ ਯਥਾਕ੍ਕਮਂ ਪੁਪ੍ਫਚ੍ਛਡ੍ਡਕ, ਵਮਨਵਿਰੇਚਨਉਪਮਾ ਯੋਜੇਤਬ੍ਬਾ.

੧੨੨. ਯਥਾਵੁਤ੍ਤਕਾਰਣੇਨ ਦਸਧਾ ਵਵਤ੍ਥਿਤਮ੍ਪਿ ਸਭਾਵਤੋ ਏਕਵਿਧਮੇਵਾਤਿ ਦਸ੍ਸੇਤੁਂ ‘‘ਦਸਵਿਧਮ੍ਪਿ ਚੇਤ’’ਨ੍ਤਿਆਦਿਂ ਵਤ੍ਵਾ ਸ੍ਵਾਯਂ ਸਭਾਵੋ ਯਥਾ ਅਵਿਞ੍ਞਾਣਕੇਸੁ, ਏਵਂ ਸਵਿਞ੍ਞਾਣਕੇਸੁਪਿ ਲਬ੍ਭਤੇਵ. ਤਸ੍ਮਾ ਤਤ੍ਥਾਪਿ ਯੋਨਿਸੋਮਨਸਿਕਾਰਵਤੋ ਭਾਵਨਾ ਇਜ੍ਝਤੇਵਾਤਿ ਦਸ੍ਸੇਨ੍ਤੋ ‘‘ਤਦੇਤਂ ਇਮਿਨਾ ਲਕ੍ਖਣੇਨਾ’’ਤਿਆਦਿਮਾਹ. ਏਤ੍ਥਾਤਿ ਏਤਸ੍ਮਿਂ ਜੀਵਮਾਨਕਸਰੀਰੇ. ਅਲਙ੍ਕਾਰੇਨਾਤਿ ਪਟਿਜਗ੍ਗਨਪੁਬ੍ਬਕੇਨ ਅਲਙ੍ਕਰਣੇਨ. ਨ ਪਞ੍ਞਾਯਤਿ ਪਚੁਰਜਨਸ੍ਸਾਤਿ ਅਧਿਪ੍ਪਾਯੋ. ਅਤਿਰੇਕਤਿਸਤਅਟ੍ਠਿਕਸਮੁਸ੍ਸਯਂ ਦਨ੍ਤਟ੍ਠਿਕੇਹਿ ਸਦ੍ਧਿਂ, ਤੇਹਿ ਪਨ ਵਿਨਾ ‘‘ਤਿਮਤ੍ਤਾਨਿ ਅਟ੍ਠਿਸਤਾਨੀ’’ਤਿ (ਵਿਸੁਦ੍ਧਿ. ੧.੧੯੦) ਕਾਯਗਤਾਸਤਿਯਂ ਵਕ੍ਖਤਿ. ਛਿਦ੍ਦਾਵਛਿਦ੍ਦਨ੍ਤਿ ਖੁਦ੍ਦਾਨੁਖੁਦ੍ਦਛਿਦ੍ਦਵਨ੍ਤਂ. ਮੇਦਕਥਾਲਿਕਾ ਮੇਦਭਰਿਤਭਾਜਨਂ. ਨਿਚ੍ਚੁਗ੍ਘਰਿਤਪਗ੍ਘਰਿਤਨ੍ਤਿ ਨਿਚ੍ਚਕਾਲਂ ਉਪਰਿ, ਹੇਟ੍ਠਾ ਚ ਵਿਸ੍ਸਵਨ੍ਤਂ. ਵੇਮਤ੍ਤਨ੍ਤਿ ਨਾਨਤ੍ਤਂ. ਨਾਨਾਵਤ੍ਥੇਹੀਤਿ ਨਾਨਾਵਣ੍ਣੇਹਿ ਵਤ੍ਥੇਹਿ. ਹਿਰਿਯਾ ਲਜ੍ਜਾਯ ਕੋਪਨਤੋ ਵਿਨਾਸਨਤੋ ਹਿਰਿਕੋਪਿਨਂ, ਉਚ੍ਚਾਰਪਸ੍ਸਾਵਮਗ੍ਗਂ. ਯਾਥਾਵਸਰਸਨ੍ਤਿ ਯਥਾਭੂਤਂ ਸਭਾਵਂ. ਯਾਥਾਵਤੋ ਰਸੀਯਤਿ ਞਾਯਤੀਤਿ ਹਿ ਰਸੋ, ਸਭਾਵੋ. ਰਤਿਨ੍ਤਿ ਅਭਿਰਤਿਂ ਅਭਿਰੁਚਿਂ. ਅਤ੍ਤਸਿਨੇਹਸਙ੍ਖਾਤੇਨ ਰਾਗੇਨ ਰਤ੍ਤਾ ਅਤ੍ਤਸਿਨੇਹਰਾਗਰਤ੍ਤਾ. ਵਿਹਞ੍ਞਮਾਨੇਨਾਤਿ ਇਚ੍ਛਿਤਾਲਾਭੇਨ ਵਿਘਾਤਂ ਆਪਜ੍ਜਨ੍ਤੇਨ.

ਕਿਂਸੁਕਨ੍ਤਿ ਪਾਲਿਭਦ੍ਦਕਂ, ਪਲਾਸੋਤਿ ਕੇਚਿ, ਸਿਮ੍ਬਲੀਤਿ ਅਪਰੇ. ਅਤਿਲੋਲੁਪੋਤਿ ਅਤਿਵਿਯ ਲੋਲਸਭਾਵੋ. ਅਦੁਨ੍ਤਿ ਏਤਂ. ਨਨ੍ਤਿ ਕੇਸਾਦਿਸਰੀਰਕੋਟ੍ਠਾਸਂ. ਮੁਚ੍ਛਿਤਾਤਿ ਮੋਹਿਤਾ, ਮੁਚ੍ਛਾਪਾਪਿਕਾਯ ਵਾ ਤਣ੍ਹਾਯ ਵਸੇਨ ਮੁਚ੍ਛਂ ਪਤ੍ਤਾ. ਸਭਾਵਨ੍ਤਿ ਪਟਿਕ੍ਕੂਲਭਾਵਂ.

ਉਕ੍ਕਰੂਪਮੋਤਿ ਉਚ੍ਚਾਰਪਸ੍ਸਾਵਟ੍ਠਾਨਸਮੋ, ਵਚ੍ਚਕੂਪਸਮੋ ਵਾ. ਚਕ੍ਖੁਭੂਤੇਹੀਤਿ ਚਕ੍ਖੁਂ ਪਤ੍ਤੇਹਿ ਪਟਿਲਦ੍ਧਪਞ੍ਞਾਚਕ੍ਖੁਕੇਹਿ, ਲੋਕਸ੍ਸ ਵਾ ਚਕ੍ਖੁਭੂਤੇਹਿ. ਅਲ੍ਲਚਮ੍ਮਪਟਿਚ੍ਛਨ੍ਨੋਤਿ ਅਲ੍ਲਚਮ੍ਮਪਰਿਯੋਨਦ੍ਧੋ.

ਦਬ੍ਬਜਾਤਿਕੇਨਾਤਿ ਉਤ੍ਤਰਿਮਨੁਸ੍ਸਧਮ੍ਮੇ ਪਟਿਲਦ੍ਧੁਂ ਭਬ੍ਬਰੂਪੇਨ. ਯਤ੍ਥ ਯਤ੍ਥ ਸਰੀਰੇ, ਸਰੀਰਸ੍ਸ ਵਾ ਯਤ੍ਥ ਯਤ੍ਥ ਕੋਟ੍ਠਾਸੇ. ਨਿਮਿਤ੍ਤਂ ਗਹੇਤ੍ਵਾਤਿ ਅਸੁਭਾਕਾਰਸ੍ਸ ਸੁਟ੍ਠੁ ਸਲ੍ਲਕ੍ਖਣਵਸੇਨ ਯਥਾ ਉਗ੍ਗਹਨਿਮਿਤ੍ਤਂ ਉਪ੍ਪਜ੍ਜਤਿ, ਏਵਂ ਉਗ੍ਗਣ੍ਹਨਵਸੇਨ ਨਿਮਿਤ੍ਤਂ ਗਹੇਤ੍ਵਾ, ਉਗ੍ਗਹਨਿਮਿਤ੍ਤਂ ਉਪ੍ਪਾਦੇਤ੍ਵਾਤਿ ਅਤ੍ਥੋ. ਕਮ੍ਮਟ੍ਠਾਨਂ ਅਪ੍ਪਨਂ ਪਾਪੇਤਬ੍ਬਨ੍ਤਿ ਯਥਾਲਦ੍ਧੇ ਉਗ੍ਗਹਨਿਮਿਤ੍ਤੇ ਕਮ੍ਮਂ ਕਰੋਨ੍ਤੇਨ ਪਟਿਭਾਗਨਿਮਿਤ੍ਤਂ ਉਪ੍ਪਾਦੇਤ੍ਵਾ ਉਪਚਾਰਜ੍ਝਾਨੇ ਠਿਤੇਨ ਤਮੇਵ ਭਾਵਨਂ ਉਸ੍ਸੁਕ੍ਕਾਪੇਨ੍ਤੇਨ ਅਸੁਭਕਮ੍ਮਟ੍ਠਾਨਂ ਅਪ੍ਪਨਂ ਪਾਪੇਤਬ੍ਬਂ. ਅਧਿਗਤਪ੍ਪਨੋ ਹਿ ਪਠਮਜ੍ਝਾਨੇ ਠਿਤੋ ਤਮੇਵ ਝਾਨਂ ਪਾਦਕਂ ਕਤ੍ਵਾ ਵਿਪਸ੍ਸਨਂ ਆਰਭਿਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤੋ ਨਚਿਰਸ੍ਸੇਵ ਸਬ੍ਬਾਸਵੇ ਖੇਪੇਤੀਤਿ.

ਅਸੁਭਕਮ੍ਮਟ੍ਠਾਨਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਇਤਿ ਛਟ੍ਠਪਰਿਚ੍ਛੇਦਵਣ੍ਣਨਾ.