੧੩. ਨੇਸਜ੍ਜਿਕਙ੍ਗਕਥਾ

੩੬. ਨੇਸਜ੍ਜਿਕਙ੍ਗਮ੍ਪਿ ‘‘ਸੇਯ੍ਯਂ ਪਟਿਕ੍ਖਿਪਾਮਿ, ਨੇਸਜ੍ਜਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.

ਤੇਨ ਪਨ ਨੇਸਜ੍ਜਿਕੇਨ ਰਤ੍ਤਿਯਾ ਤੀਸੁ ਯਾਮੇਸੁ ਏਕਂ ਯਾਮਂ ਉਟ੍ਠਾਯ ਚਙ੍ਕਮਿਤਬ੍ਬਂ. ਇਰਿਯਾਪਥੇਸੁ ਹਿ ਨਿਪਜ੍ਜਿਤੁਮੇਵ ਨ ਵਟ੍ਟਤਿ. ਇਦਮਸ੍ਸ ਵਿਧਾਨਂ.

ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠਸ੍ਸ ਨੇਵ ਅਪਸ੍ਸੇਨਂ, ਨ ਦੁਸ੍ਸਪਲ੍ਲਤ੍ਥਿਕਾ, ਨ ਆਯੋਗਪਟ੍ਟੋ ਵਟ੍ਟਤਿ. ਮਜ੍ਝਿਮਸ੍ਸ ਇਮੇਸੁ ਤੀਸੁ ਯਂਕਿਞ੍ਚਿ ਵਟ੍ਟਤਿ. ਮੁਦੁਕਸ੍ਸ ਅਪਸ੍ਸੇਨਮ੍ਪਿ ਦੁਸ੍ਸਪਲ੍ਲਤ੍ਥਿਕਾਪਿ ਆਯੋਗਪਟ੍ਟੋਪਿ ਬਿਬ੍ਬੋਹਨਮ੍ਪਿ ਪਞ੍ਚਙ੍ਗੋਪਿ ਸਤ੍ਤਙ੍ਗੋਪਿ ਵਟ੍ਟਤਿ. ਪਞ੍ਚਙ੍ਗੋ ਪਨ ਪਿਟ੍ਠਿਅਪਸ੍ਸਯੇਨ ਸਦ੍ਧਿਂ ਕਤੋ. ਸਤ੍ਤਙ੍ਗੋ ਨਾਮ ਪਿਟ੍ਠਿਅਪਸ੍ਸਯੇਨ ਚ ਉਭਤੋਪਸ੍ਸੇਸੁ ਅਪਸ੍ਸਯੇਹਿ ਚ ਸਦ੍ਧਿਂ ਕਤੋ. ਤਂ ਕਿਰ ਮਿਲ਼ਾਭਯਤ੍ਥੇਰਸ੍ਸ ਅਕਂਸੁ. ਥੇਰੋ ਅਨਾਗਾਮੀ ਹੁਤ੍ਵਾ ਪਰਿਨਿਬ੍ਬਾਯਿ.

ਇਮੇਸਂ ਪਨ ਤਿਣ੍ਣਮ੍ਪਿ ਸੇਯ੍ਯਂ ਕਪ੍ਪਿਤਮਤ੍ਤੇ ਧੁਤਙ੍ਗਂ ਭਿਜ੍ਜਤਿ. ਅਯਮੇਤ੍ਥ ਭੇਦੋ.

ਅਯਂ ਪਨਾਨਿਸਂਸੋ, ‘‘ਸੇਯ੍ਯਸੁਖਂ ਪਸ੍ਸਸੁਖਂ ਮਿਦ੍ਧਸੁਖਂ ਅਨੁਯੁਤ੍ਤੋ ਵਿਹਰਤੀ’’ਤਿ (ਦੀ. ਨਿ. ੩.੩੨੦; ਮ. ਨਿ. ੧.੧੮੬) ਵੁਤ੍ਤਸ੍ਸ ਚੇਤਸੋ ਵਿਨਿਬਨ੍ਧਸ੍ਸ ਉਪਚ੍ਛੇਦਨਂ, ਸਬ੍ਬਕਮ੍ਮਟ੍ਠਾਨਾਨੁਯੋਗਸਪ੍ਪਾਯਤਾ, ਪਾਸਾਦਿਕਇਰਿਯਾਪਥਤਾ, ਵੀਰਿਯਾਰਮ੍ਭਾਨੁਕੂਲਤਾ, ਸਮ੍ਮਾਪਟਿਪਤ੍ਤਿਯਾ ਅਨੁਬ੍ਰੂਹਨਨ੍ਤਿ.

ਆਭੁਜਿਤ੍ਵਾਨ ਪਲ੍ਲਙ੍ਕਂ, ਪਣਿਧਾਯ ਉਜੁਂ ਤਨੁਂ;

ਨਿਸੀਦਨ੍ਤੋ ਵਿਕਮ੍ਪੇਤਿ, ਮਾਰਸ੍ਸ ਹਦਯਂ ਯਤਿ.

ਸੇਯ੍ਯਸੁਖਂ ਮਿਦ੍ਧਸੁਖਂ, ਹਿਤ੍ਵਾ ਆਰਦ੍ਧਵੀਰਿਯੋ;

ਨਿਸਜ੍ਜਾਭਿਰਤੋ ਭਿਕ੍ਖੁ, ਸੋਭਯਨ੍ਤੋ ਤਪੋਵਨਂ.

ਨਿਰਾਮਿਸਂ ਪੀਤਿਸੁਖਂ, ਯਸ੍ਮਾ ਸਮਧਿਗਚ੍ਛਤਿ;

ਤਸ੍ਮਾ ਸਮਨੁਯੁਞ੍ਜੇਯ੍ਯ, ਧੀਰੋ ਨੇਸਜ੍ਜਿਕਂ ਵਤਨ੍ਤਿ.

ਅਯਂ ਨੇਸਜ੍ਜਿਕਙ੍ਗੇ ਸਮਾਦਾਨ ਵਿਧਾਨਪ੍ਪਭੇਦ ਭੇਦਾਨਿਸਂਸਵਣ੍ਣਨਾ.

ਧੁਤਙ੍ਗਪਕਿਣ੍ਣਕਕਥਾ

੩੭. ਇਦਾਨਿ –

ਕੁਸਲਤ੍ਤਿਕਤੋ ਚੇਵ, ਧੁਤਾਦੀਨਂ ਵਿਭਾਗਤੋ;

ਸਮਾਸਬ੍ਯਾਸਤੋ ਚਾਪਿ, ਵਿਞ੍ਞਾਤਬ੍ਬੋ ਵਿਨਿਚ੍ਛਯੋਤਿ. –

ਇਮਿਸ੍ਸਾ ਗਾਥਾਯ ਵਸੇਨ ਵਣ੍ਣਨਾ ਹੋਤਿ.

ਤਤ੍ਥ ਕੁਸਲਤ੍ਤਿਕਤੋਤਿ ਸਬ੍ਬਾਨੇਵ ਹਿ ਧੁਤਙ੍ਗਾਨਿ ਸੇਕ੍ਖਪੁਥੁਜ੍ਜਨਖੀਣਾਸਵਾਨਂ ਵਸੇਨ ਸਿਯਾ ਕੁਸਲਾਨਿ, ਸਿਯਾ ਅਬ੍ਯਾਕਤਾਨਿ, ਨਤ੍ਥਿ ਧੁਤਙ੍ਗਂ ਅਕੁਸਲਨ੍ਤਿ.

ਯੋ ਪਨ ਵਦੇਯ੍ਯ ‘‘ਪਾਪਿਚ੍ਛੋ ਇਚ੍ਛਾਪਕਤੋ ਆਰਞ੍ਞਿਕੋ ਹੋਤੀਤਿ ਆਦਿਵਚਨਤੋ (ਅ. ਨਿ. ੫.੧੮੧; ਪਰਿ. ੩੨੫) ਅਕੁਸਲਮ੍ਪਿ ਧੁਤਙ੍ਗ’’ਨ੍ਤਿ. ਸੋ ਵਤ੍ਤਬ੍ਬੋ – ਨ ਮਯਂ ‘‘ਅਕੁਸਲਚਿਤ੍ਤੇਨ ਅਰਞ੍ਞੇ ਨ ਵਸਤੀ’’ਤਿ ਵਦਾਮ. ਯਸ੍ਸ ਹਿ ਅਰਞ੍ਞੇ ਨਿਵਾਸੋ, ਸੋ ਆਰਞ੍ਞਿਕੋ. ਸੋ ਚ ਪਾਪਿਚ੍ਛੋ ਵਾ ਭਵੇਯ੍ਯ ਅਪ੍ਪਿਚ੍ਛੋ ਵਾ. ਇਮਾਨਿ ਪਨ ਤੇਨ ਤੇਨ ਸਮਾਦਾਨੇਨ ਧੁਤਕਿਲੇਸਤ੍ਤਾ ਧੁਤਸ੍ਸ ਭਿਕ੍ਖੁਨੋ ਅਙ੍ਗਾਨਿ, ਕਿਲੇਸਧੁਨਨਤੋ ਵਾ ਧੁਤਨ੍ਤਿ ਲਦ੍ਧਵੋਹਾਰਂ ਞਾਣਂ ਅਙ੍ਗਮੇਤੇਸਨ੍ਤਿ ਧੁਤਙ੍ਗਾਨਿ. ਅਥ ਵਾ ਧੁਤਾਨਿ ਚ ਤਾਨਿ ਪਟਿਪਕ੍ਖਨਿਦ੍ਧੁਨਨਤੋ ਅਙ੍ਗਾਨਿ ਚ ਪਟਿਪਤ੍ਤਿਯਾਤਿਪਿ ਧੁਤਙ੍ਗਾਨੀਤਿ ਵੁਤ੍ਤਂ. ਨ ਚ ਅਕੁਸਲੇਨ ਕੋਚਿ ਧੁਤੋ ਨਾਮ ਹੋਤਿ, ਯਸ੍ਸੇਤਾਨਿ ਅਙ੍ਗਾਨਿ ਭਵੇਯ੍ਯੁਂ, ਨ ਚ ਅਕੁਸਲਂ ਕਿਞ੍ਚਿ ਧੁਨਾਤਿ, ਯੇਸਂ ਤਂ ਅਙ੍ਗਨ੍ਤਿਕਤ੍ਵਾ ਧੁਤਙ੍ਗਾਨੀਤਿ ਵੁਚ੍ਚੇਯ੍ਯੁਂ. ਨਾਪਿ ਅਕੁਸਲਂ ਚੀਵਰਲੋਲੁਪ੍ਪਾਦੀਨਿ ਚੇਵ ਨਿਦ੍ਧੁਨਾਤਿ ਪਟਿਪਤ੍ਤਿਯਾ ਚ ਅਙ੍ਗਂ ਹੋਤਿ. ਤਸ੍ਮਾ ਸੁਵੁਤ੍ਤਮਿਦਂ ‘‘ਨਤ੍ਥਿ ਅਕੁਸਲਂ ਧੁਤਙ੍ਗ’’ਨ੍ਤਿ.

‘‘ਯੇਸਮ੍ਪਿ ਕੁਸਲਤ੍ਤਿਕਵਿਨਿਮੁਤ੍ਤਂ ਧੁਤਙ੍ਗਂ, ਤੇਸਂ ਅਤ੍ਥਤੋ ਧੁਤਙ੍ਗਮੇਵ ਨਤ੍ਥਿ. ਅਸਨ੍ਤਂ ਕਸ੍ਸ ਧੁਨਨਤੋ ਧੁਤਙ੍ਗਂ ਨਾਮ ਭਵਿਸ੍ਸਤਿ. ਧੁਤਗੁਣੇ ਸਮਾਦਾਯ ਵਤ੍ਤਤੀਤਿ ਵਚਨਵਿਰੋਧੋਪਿ ਚ ਨੇਸਂ ਆਪਜ੍ਜਤਿ, ਤਸ੍ਮਾ ਤਂ ਨ ਗਹੇਤਬ੍ਬ’’ਨ੍ਤਿ ਅਯਂ ਤਾਵ ਕੁਸਲਤ੍ਤਿਕਤੋ ਵਣ੍ਣਨਾ.

ਧੁਤਾਦੀਨਂ ਵਿਭਾਗਤੋਤਿ ਧੁਤੋ ਵੇਦਿਤਬ੍ਬੋ. ਧੁਤਵਾਦੋ ਵੇਦਿਤਬ੍ਬੋ. ਧੁਤਧਮ੍ਮਾ ਵੇਦਿਤਬ੍ਬਾ. ਧੁਤਙ੍ਗਾਨਿ ਵੇਦਿਤਬ੍ਬਾਨਿ. ਕਸ੍ਸ ਧੁਤਙ੍ਗਸੇਵਨਾ ਸਪ੍ਪਾਯਾਤਿ ਵੇਦਿਤਬ੍ਬਂ.

ਤਤ੍ਥ ਧੁਤੋਤਿ ਧੁਤਕਿਲੇਸੋ ਵਾ ਪੁਗ੍ਗਲੋ ਕਿਲੇਸਧੁਨਨੋ ਵਾ ਧਮ੍ਮੋ.

ਧੁਤਵਾਦੋਤਿ ਏਤ੍ਥ ਪਨ ਅਤ੍ਥਿ ਧੁਤੋ ਨ ਧੁਤਵਾਦੋ, ਅਤ੍ਥਿ ਨ ਧੁਤੋ ਧੁਤਵਾਦੋ, ਅਤ੍ਥਿ ਨੇਵ ਧੁਤੋ ਨ ਧੁਤਵਾਦੋ, ਅਤ੍ਥਿ ਧੁਤੋ ਚੇਵ ਧੁਤਵਾਦੋ ਚ.

ਤਤ੍ਥ ਯੋ ਧੁਤਙ੍ਗੇਨ ਅਤ੍ਤਨੋ ਕਿਲੇਸੇ ਧੁਨਿ, ਪਰਂ ਪਨ ਧੁਤਙ੍ਗੇਨ ਨ ਓਵਦਤਿ, ਨਾਨੁਸਾਸਤਿ ਬਾਕੁਲਤ੍ਥੇਰੋ ਵਿਯ, ਅਯਂ ਧੁਤੋ ਨ ਧੁਤਵਾਦੋ. ਯਥਾਹ, ‘‘ਤਯਿਦਂ ਆਯਸ੍ਮਾ ਬਾਕੁਲੋ ਧੁਤੋ ਨ ਧੁਤਵਾਦੋ’’ਤਿ. ਯੋ ਪਨ ਨ ਧੁਤਙ੍ਗੇਨ ਅਤ੍ਤਨੋ ਕਿਲੇਸੇ ਧੁਨਿ, ਕੇਵਲਂ ਅਞ੍ਞੇ ਧੁਤਙ੍ਗੇਨ ਓਵਦਤਿ ਅਨੁਸਾਸਤਿ ਉਪਨਨ੍ਦਤ੍ਥੇਰੋ ਵਿਯ, ਅਯਂ ਨ ਧੁਤੋ ਧੁਤਵਾਦੋ. ਯਥਾਹ, ‘‘ਤਯਿਦਂ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਨ ਧੁਤੋ ਧੁਤਵਾਦੋ’’ਤਿ. ਯੋ ਉਭਯਵਿਪਨ੍ਨੋ ਲਾਲ਼ੁਦਾਯੀ ਵਿਯ, ਅਯਂ ਨੇਵ ਧੁਤੋ ਨ ਧੁਤਵਾਦੋ. ਯਥਾਹ, ‘‘ਤਯਿਦਂ ਆਯਸ੍ਮਾ ਲਾਲ਼ੁਦਾਯੀ ਨੇਵ ਧੁਤੋ ਨ ਧੁਤਵਾਦੋ’’ਤਿ. ਯੋ ਪਨ ਉਭਯਸਮ੍ਪਨ੍ਨੋ ਧਮ੍ਮਸੇਨਾਪਤਿ ਵਿਯ, ਅਯਂ ਧੁਤੋ ਚੇਵ ਧੁਤਵਾਦੋ ਚ. ਯਥਾਹ, ‘‘ਤਯਿਦਂ ਆਯਸ੍ਮਾ ਸਾਰਿਪੁਤ੍ਤੋ ਧੁਤੋ ਚੇਵ ਧੁਤਵਾਦੋ ਚਾਤਿ.

ਧੁਤਧਮ੍ਮਾ ਵੇਦਿਤਬ੍ਬਾਤਿ ਅਪ੍ਪਿਚ੍ਛਤਾ, ਸਨ੍ਤੁਟ੍ਠਿਤਾ, ਸਲ੍ਲੇਖਤਾ, ਪਵਿਵੇਕਤਾ, ਇਦਮਤ੍ਥਿਤਾਤਿ ਇਮੇ ਧੁਤਙ੍ਗਚੇਤਨਾਯ ਪਰਿਵਾਰਕਾ ਪਞ੍ਚ ਧਮ੍ਮਾ ‘‘ਅਪ੍ਪਿਚ੍ਛਤਂਯੇਵ ਨਿਸ੍ਸਾਯਾ’’ਤਿਆਦਿਵਚਨਤੋ (ਅ. ਨਿ. ੫.੧੮੧; ਪਰਿ. ੩੨੫) ਧੁਤਧਮ੍ਮਾ ਨਾਮ, ਤਤ੍ਥ ਅਪ੍ਪਿਚ੍ਛਤਾ ਚ ਸਨ੍ਤੁਟ੍ਠਿਤਾ ਚ ਅਲੋਭੋ. ਸਲ੍ਲੇਖਤਾ ਚ ਪਵਿਵੇਕਤਾ ਚ ਦ੍ਵੀਸੁ ਧਮ੍ਮੇਸੁ ਅਨੁਪਤਨ੍ਤਿ ਅਲੋਭੇ ਚ ਅਮੋਹੇ ਚ. ਇਦਮਤ੍ਥਿਤਾ ਞਾਣਮੇਵ. ਤਤ੍ਥ ਚ ਅਲੋਭੇਨ ਪਟਿਕ੍ਖੇਪਵਤ੍ਥੂਸੁ ਲੋਭਂ, ਅਮੋਹੇਨ ਤੇਸ੍ਵੇਵ ਆਦੀਨਵਪਟਿਚ੍ਛਾਦਕਂ ਮੋਹਂ ਧੁਨਾਤਿ. ਅਲੋਭੇਨ ਚ ਅਨੁਞ੍ਞਾਤਾਨਂ ਪਟਿਸੇਵਨਮੁਖੇਨ ਪਵਤ੍ਤਂ ਕਾਮਸੁਖਾਨੁਯੋਗਂ, ਅਮੋਹੇਨ ਧੁਤਙ੍ਗੇਸੁ ਅਤਿਸਲ੍ਲੇਖਮੁਖੇਨ ਪਵਤ੍ਤਂ ਅਤ੍ਤਕਿਲਮਥਾਨੁਯੋਗਂ ਧੁਨਾਤਿ. ਤਸ੍ਮਾ ਇਮੇ ਧਮ੍ਮਾ ਧੁਤਧਮ੍ਮਾਤਿ ਵੇਦਿਤਬ੍ਬਾ.

ਧੁਤਙ੍ਗਾਨਿ ਵੇਦਿਤਬ੍ਬਾਨੀਤਿ ਤੇਰਸ ਧੁਤਙ੍ਗਾਨਿ ਵੇਦਿਤਬ੍ਬਾਨਿ ਪਂਸੁਕੂਲਿਕਙ੍ਗਂ…ਪੇ… ਨੇਸਜ੍ਜਿਕਙ੍ਗਨ੍ਤਿ. ਤਾਨਿ ਅਤ੍ਥਤੋ ਲਕ੍ਖਣਾਦੀਹਿ ਚ ਵੁਤ੍ਤਾਨੇਵ.

ਕਸ੍ਸ ਧੁਤਙ੍ਗਸੇਵਨਾ ਸਪ੍ਪਾਯਾਤਿ ਰਾਗਚਰਿਤਸ੍ਸ ਚੇਵ ਮੋਹਚਰਿਤਸ੍ਸ ਚ. ਕਸ੍ਮਾ? ਧੁਤਙ੍ਗਸੇਵਨਾ ਹਿ ਦੁਕ੍ਖਾਪਟਿਪਦਾ ਚੇਵ ਸਲ੍ਲੇਖਵਿਹਾਰੋ ਚ. ਦੁਕ੍ਖਾਪਟਿਪਦਞ੍ਚ ਨਿਸ੍ਸਾਯ ਰਾਗੋ ਵੂਪਸਮ੍ਮਤਿ. ਸਲ੍ਲੇਖਂ ਨਿਸ੍ਸਾਯ ਅਪ੍ਪਮਤ੍ਤਸ੍ਸ ਮੋਹੋ ਪਹੀਯਤਿ. ਆਰਞ੍ਞਿਕਙ੍ਗਰੁਕ੍ਖਮੂਲਿਕਙ੍ਗਪਟਿਸੇਵਨਾ ਵਾ ਏਤ੍ਥ ਦੋਸਚਰਿਤਸ੍ਸਾਪਿ ਸਪ੍ਪਾਯਾ. ਤਤ੍ਥ ਹਿਸ੍ਸ ਅਸਙ੍ਘਟ੍ਟਿਯਮਾਨਸ੍ਸ ਵਿਹਰਤੋ ਦੋਸੋਪਿ ਵੂਪਸਮ੍ਮਤੀਤਿ ਅਯਂ ਧੁਤਾਦੀਨਂ ਵਿਭਾਗਤੋ ਵਣ੍ਣਨਾ.

ਸਮਾਸਬ੍ਯਾਸਤੋਤਿ ਇਮਾਨਿ ਪਨ ਧੁਤਙ੍ਗਾਨਿ ਸਮਾਸਤੋ ਤੀਣਿ ਸੀਸਙ੍ਗਾਨਿ, ਪਞ੍ਚ ਅਸਮ੍ਭਿਨ੍ਨਙ੍ਗਾਨੀਤਿ ਅਟ੍ਠੇਵ ਹੋਨ੍ਤਿ. ਤਤ੍ਥ ਸਪਦਾਨਚਾਰਿਕਙ੍ਗਂ, ਏਕਾਸਨਿਕਙ੍ਗਂ, ਅਬ੍ਭੋਕਾਸਿਕਙ੍ਗਨ੍ਤਿ ਇਮਾਨਿ ਤੀਣਿ ਸੀਸਙ੍ਗਾਨਿ. ਸਪਦਾਨਚਾਰਿਕਙ੍ਗਞ੍ਹਿ ਰਕ੍ਖਨ੍ਤੋ ਪਿਣ੍ਡਪਾਤਿਕਙ੍ਗਮ੍ਪਿ ਰਕ੍ਖਿਸ੍ਸਤਿ. ਏਕਾਸਨਿਕਙ੍ਗਞ੍ਚ ਰਕ੍ਖਤੋ ਪਤ੍ਤਪਿਣ੍ਡਿਕਙ੍ਗਖਲੁਪਚ੍ਛਾਭਤ੍ਤਿਕਙ੍ਗਾਨਿਪਿ ਸੁਰਕ੍ਖਨੀਯਾਨਿ ਭਵਿਸ੍ਸਨ੍ਤਿ. ਅਬ੍ਭੋਕਾਸਿਕਙ੍ਗਂ ਰਕ੍ਖਨ੍ਤਸ੍ਸ ਕਿਂ ਅਤ੍ਥਿ ਰੁਕ੍ਖਮੂਲਿਕਙ੍ਗਯਥਾਸਨ੍ਥਤਿਕਙ੍ਗੇਸੁ ਰਕ੍ਖਿਤਬ੍ਬਂ ਨਾਮ. ਇਤਿ ਇਮਾਨਿ ਤੀਣਿ ਸੀਸਙ੍ਗਾਨਿ, ਆਰਞ੍ਞਿਕਙ੍ਗਂ, ਪਂਸੁਕੂਲਿਕਙ੍ਗਂ, ਤੇਚੀਵਰਿਕਙ੍ਗਂ, ਨੇਸਜ੍ਜਿਕਙ੍ਗਂ, ਸੋਸਾਨਿਕਙ੍ਗਨ੍ਤਿ ਇਮਾਨਿ ਪਞ੍ਚ ਅਸਮ੍ਭਿਨ੍ਨਙ੍ਗਾਨਿ ਚਾਤਿ ਅਟ੍ਠੇਵ ਹੋਨ੍ਤਿ.

ਪੁਨ ਦ੍ਵੇ ਚੀਵਰਪਟਿਸਂਯੁਤ੍ਤਾਨਿ, ਪਞ੍ਚ ਪਿਣ੍ਡਪਾਤਪਟਿਸਂਯੁਤ੍ਤਾਨਿ, ਪਞ੍ਚ ਸੇਨਾਸਨਪਟਿਸਂਯੁਤ੍ਤਾਨਿ, ਏਕਂ ਵੀਰਿਯਪਟਿਸਂਯੁਤ੍ਤਨ੍ਤਿ ਏਵਂ ਚਤ੍ਤਾਰੋਵ ਹੋਨ੍ਤਿ. ਤਤ੍ਥ ਨੇਸਜ੍ਜਿਕਙ੍ਗਂ ਵੀਰਿਯਪਟਿਸਂਯੁਤ੍ਤਂ. ਇਤਰਾਨਿ ਪਾਕਟਾਨੇਵ.

ਪੁਨ ਸਬ੍ਬਾਨੇਵ ਨਿਸ੍ਸਯਵਸੇਨ ਦ੍ਵੇ ਹੋਨ੍ਤਿ ਪਚ੍ਚਯਨਿਸ੍ਸਿਤਾਨਿ ਦ੍ਵਾਦਸ, ਵੀਰਿਯਨਿਸ੍ਸਿਤਂ ਏਕਨ੍ਤਿ. ਸੇਵਿਤਬ੍ਬਾਸੇਵਿਤਬ੍ਬਵਸੇਨਪਿ ਦ੍ਵੇਯੇਵ ਹੋਨ੍ਤਿ. ਯਸ੍ਸ ਹਿ ਧੁਤਙ੍ਗਂ ਸੇਵਨ੍ਤਸ੍ਸ ਕਮ੍ਮਟ੍ਠਾਨਂ ਵਡ੍ਢਤਿ, ਤੇਨ ਸੇਵਿਤਬ੍ਬਾਨਿ. ਯਸ੍ਸ ਸੇਵਤੋ ਹਾਯਤਿ, ਤੇਨ ਨ ਸੇਵਿਤਬ੍ਬਾਨਿ. ਯਸ੍ਸ ਪਨ ਸੇਵਤੋਪਿ ਅਸੇਵਤੋਪਿ ਵਡ੍ਢਤੇਵ, ਨ ਹਾਯਤਿ, ਤੇਨਾਪਿ ਪਚ੍ਛਿਮਂ ਜਨਤਂ ਅਨੁਕਮ੍ਪਨ੍ਤੇਨ ਸੇਵਿਤਬ੍ਬਾਨਿ. ਯਸ੍ਸਾਪਿ ਸੇਵਤੋਪਿ ਅਸੇਵਤੋਪਿ ਨ ਵਡ੍ਢਤਿ, ਤੇਨਾਪਿ ਸੇਵਿਤਬ੍ਬਾਨਿਯੇਵ ਆਯਤਿਂ ਵਾਸਨਤ੍ਥਾਯਾਤਿ.

ਏਵਂ ਸੇਵਿਤਬ੍ਬਾਸੇਵਿਤਬ੍ਬਵਸੇਨ ਦੁਵਿਧਾਨਿਪਿ ਸਬ੍ਬਾਨੇਵ ਚੇਤਨਾਵਸੇਨ ਏਕਵਿਧਾਨਿ ਹੋਨ੍ਤਿ. ਏਕਮੇਵ ਹਿ ਧੁਤਙ੍ਗਂ ਸਮਾਦਾਨਚੇਤਨਾਤਿ. ਅਟ੍ਠਕਥਾਯਮ੍ਪਿ ਵੁਤ੍ਤਂ ‘‘ਯਾ ਚੇਤਨਾ, ਤਂ ਧੁਤਙ੍ਗਨ੍ਤਿ ਵਦਨ੍ਤੀ’’ਤਿ.

ਬ੍ਯਾਸਤੋ ਪਨ ਭਿਕ੍ਖੂਨਂ ਤੇਰਸ, ਭਿਕ੍ਖੁਨੀਨਂ ਅਟ੍ਠ, ਸਾਮਣੇਰਾਨਂ ਦ੍ਵਾਦਸ, ਸਿਕ੍ਖਮਾਨਸਾਮਣੇਰੀਨਂ ਸਤ੍ਤ, ਉਪਾਸਕਉਪਾਸਿਕਾਨਂ ਦ੍ਵੇਤਿ ਦ੍ਵਾਚਤ੍ਤਾਲੀਸ ਹੋਨ੍ਤਿ. ਸਚੇ ਪਨ ਅਬ੍ਭੋਕਾਸੇ ਆਰਞ੍ਞਿਕਙ੍ਗਸਮ੍ਪਨ੍ਨਂ ਸੁਸਾਨਂ ਹੋਤਿ, ਏਕੋਪਿ ਭਿਕ੍ਖੁ ਏਕਪ੍ਪਹਾਰੇਨ ਸਬ੍ਬਧੁਤਙ੍ਗਾਨਿ ਪਰਿਭੁਞ੍ਜਿਤੁਂ ਸਕ੍ਕੋਤਿ. ਭਿਕ੍ਖੁਨੀਨਂ ਪਨ ਆਰਞ੍ਞਿਕਙ੍ਗਂ ਖਲੁਪਚ੍ਛਾਭਤ੍ਤਿਕਙ੍ਗਞ੍ਚ ਦ੍ਵੇਪਿ ਸਿਕ੍ਖਾਪਦੇਨੇਵ ਪਟਿਕ੍ਖਿਤ੍ਤਾਨਿ, ਅਬ੍ਭੋਕਾਸਿਕਙ੍ਗਂ, ਰੁਕ੍ਖਮੂਲਿਕਙ੍ਗਂ, ਸੋਸਾਨਿਕਙ੍ਗਨ੍ਤਿ ਇਮਾਨਿ ਤੀਣਿ ਦੁਪ੍ਪਰਿਹਾਰਾਨਿ. ਭਿਕ੍ਖੁਨਿਯਾ ਹਿ ਦੁਤਿਯਿਕਂ ਵਿਨਾ ਵਸਿਤੁਂ ਨ ਵਟ੍ਟਤਿ. ਏਵਰੂਪੇ ਚ ਠਾਨੇ ਸਮਾਨਚ੍ਛਨ੍ਦਾ ਦੁਤਿਯਿਕਾ ਦੁਲ੍ਲਭਾ. ਸਚੇਪਿ ਲਭੇਯ੍ਯ ਸਂਸਟ੍ਠਵਿਹਾਰਤੋ ਨ ਮੁਚ੍ਚੇਯ੍ਯ. ਏਵਂ ਸਤਿ ਯਸ੍ਸਤ੍ਥਾਯ ਧੁਤਙ੍ਗਂ ਸੇਵੇਯ੍ਯ, ਸ੍ਵੇਵਸ੍ਸਾ ਅਤ੍ਥੋ ਨ ਸਮ੍ਪਜ੍ਜੇਯ੍ਯ. ਏਵਂ ਪਰਿਭੁਞ੍ਜਿਤੁਂ ਅਸਕ੍ਕੁਣੇਯ੍ਯਤਾਯ ਪਞ੍ਚ ਹਾਪੇਤ੍ਵਾ ਭਿਕ੍ਖੁਨੀਨਂ ਅਟ੍ਠੇਵ ਹੋਨ੍ਤੀਤਿ ਵੇਦਿਤਬ੍ਬਾਨਿ. ਯਥਾਵੁਤ੍ਤੇਸੁ ਪਨ ਠਪੇਤ੍ਵਾ ਤੇਚੀਵਰਿਕਙ੍ਗਂ ਸੇਸਾਨਿ ਦ੍ਵਾਦਸ ਸਾਮਣੇਰਾਨਂ, ਸਤ੍ਤ ਸਿਕ੍ਖਮਾਨਸਾਮਣੇਰੀਨਂ ਵੇਦਿਤਬ੍ਬਾਨਿ. ਉਪਾਸਕਉਪਾਸਿਕਾਨਂ ਪਨ ਏਕਾਸਨਿਕਙ੍ਗਂ, ਪਤ੍ਤਪਿਣ੍ਡਿਕਙ੍ਗਨ੍ਤਿ ਇਮਾਨਿ ਦ੍ਵੇ ਪਤਿਰੂਪਾਨਿ ਚੇਵ ਸਕ੍ਕਾ ਚ ਪਰਿਭੁਞ੍ਜਿਤੁਨ੍ਤਿ ਦ੍ਵੇ ਧੁਤਙ੍ਗਾਨੀਤਿ ਏਵਂ ਬ੍ਯਾਸਤੋ ਦ੍ਵੇਚਤ੍ਤਾਲੀਸ ਹੋਨ੍ਤੀਤਿ ਅਯਂ ਸਮਾਸਬ੍ਯਾਸਤੋ ਵਣ੍ਣਨਾ.

ਏਤ੍ਤਾਵਤਾ ਚ ‘‘ਸੀਲੇ ਪਤਿਟ੍ਠਾਯ ਨਰੋ ਸਪਞ੍ਞੋ’’ਤਿ ਇਮਿਸ੍ਸਾ ਗਾਥਾਯ ਸੀਲਸਮਾਧਿਪਞ੍ਞਾਮੁਖੇਨ ਦੇਸਿਤੇ ਵਿਸੁਦ੍ਧਿਮਗ੍ਗੇ ਯੇਹਿ ਅਪ੍ਪਿਚ੍ਛਤਾਸਨ੍ਤੁਟ੍ਠਿਤਾਦੀਹਿ ਗੁਣੇਹਿ ਵੁਤ੍ਤਪ੍ਪਕਾਰਸ੍ਸ ਸੀਲਸ੍ਸ ਵੋਦਾਨਂ ਹੋਤਿ, ਤੇਸਂ ਸਮ੍ਪਾਦਨਤ੍ਥਂ ਸਮਾਦਾਤਬ੍ਬਧੁਤਙ੍ਗਕਥਾ ਭਾਸਿਤਾ ਹੋਤਿ.

ਇਤਿ ਸਾਧੁਜਨਪਾਮੋਜ੍ਜਤ੍ਥਾਯ ਕਤੇ ਵਿਸੁਦ੍ਧਿਮਗ੍ਗੇ

ਧੁਤਙ੍ਗਨਿਦ੍ਦੇਸੋ ਨਾਮ ਦੁਤਿਯੋ ਪਰਿਚ੍ਛੇਦੋ.