੨. ਧੁਤਙ੍ਗਨਿਦ੍ਦੇਸੋ
੨੨. ਇਦਾਨਿ ਯੇਹਿ ਅਪ੍ਪਿਚ੍ਛਤਾਸਨ੍ਤੁਟ੍ਠਿਤਾਦੀਹਿ ਗੁਣੇਹਿ ਵੁਤ੍ਤਪ੍ਪਕਾਰਸ੍ਸ ਸੀਲਸ੍ਸ ਵੋਦਾਨਂ ਹੋਤਿ, ਤੇ ਗੁਣੇ ਸਮ੍ਪਾਦੇਤੁਂ ਯਸ੍ਮਾ ਸਮਾਦਿਨ੍ਨਸੀਲੇਨ ਯੋਗਿਨਾ ਧੁਤਙ੍ਗਸਮਾਦਾਨਂ ਕਾਤਬ੍ਬਂ. ਏਵਞ੍ਹਿਸ੍ਸ ਅਪ੍ਪਿਚ੍ਛਤਾਸਨ੍ਤੁਟ੍ਠਿਤਾਸਲ੍ਲੇਖਪਵਿਵੇਕਾਪਚਯਵੀਰਿਯਾਰਮ੍ਭਸੁਭਰਤਾਦਿਗੁਣਸਲਿਲਵਿਕ੍ਖਾਲਿਤਮਲਂ ਸੀਲਞ੍ਚੇਵ ਸੁਪਰਿਸੁਦ੍ਧਂ ਭਵਿਸ੍ਸਤਿ, ਵਤਾਨਿ ਚ ਸਮ੍ਪਜ੍ਜਿਸ੍ਸਨ੍ਤਿ. ਇਤਿ ਅਨਵਜ੍ਜਸੀਲਬ੍ਬਤਗੁਣਪਰਿਸੁਦ੍ਧਸਬ੍ਬਸਮਾਚਾਰੋ ਪੋਰਾਣੇ ਅਰਿਯਵਂਸਤ੍ਤਯੇ ਪਤਿਟ੍ਠਾਯ ਚਤੁਤ੍ਥਸ੍ਸ ਭਾਵਨਾਰਾਮਤਾਸਙ੍ਖਾਤਸ੍ਸ ਅਰਿਯਵਂਸਸ੍ਸ ਅਧਿਗਮਾਰਹੋ ਭਵਿਸ੍ਸਤਿ. ਤਸ੍ਮਾ ਧੁਤਙ੍ਗਕਥਂ ਆਰਭਿਸ੍ਸਾਮ.
ਭਗਵਤਾ ਹਿ ਪਰਿਚ੍ਚਤ੍ਤਲੋਕਾਮਿਸਾਨਂ ਕਾਯੇ ਚ ਜੀਵਿਤੇ ਚ ਅਨਪੇਕ੍ਖਾਨਂ ਅਨੁਲੋਮਪਟਿਪਦਂਯੇਵ ਆਰਾਧੇਤੁਕਾਮਾਨਂ ਕੁਲਪੁਤ੍ਤਾਨਂ ਤੇਰਸਧੁਤਙ੍ਗਾਨਿ ਅਨੁਞ੍ਞਾਤਾਨਿ. ਸੇਯ੍ਯਥਿਦਂ – ਪਂਸੁਕੂਲਿਕਙ੍ਗਂ, ਤੇਚੀਵਰਿਕਙ੍ਗਂ, ਪਿਣ੍ਡਪਾਤਿਕਙ੍ਗਂ, ਸਪਦਾਨਚਾਰਿਕਙ੍ਗਂ, ਏਕਾਸਨਿਕਙ੍ਗਂ, ਪਤ੍ਤਪਿਣ੍ਡਿਕਙ੍ਗਂ, ਖਲੁਪਚ੍ਛਾਭਤ੍ਤਿਕਙ੍ਗਂ, ਆਰਞ੍ਞਿਕਙ੍ਗਂ, ਰੁਕ੍ਖਮੂਲਿਕਙ੍ਗਂ, ਅਬ੍ਭੋਕਾਸਿਕਙ੍ਗਂ, ਸੋਸਾਨਿਕਙ੍ਗਂ, ਯਥਾਸਨ੍ਥਤਿਕਙ੍ਗਂ, ਨੇਸਜ੍ਜਿਕਙ੍ਗਨ੍ਤਿ. ਤਤ੍ਥ –
ਅਤ੍ਥਤੋ ਲਕ੍ਖਣਾਦੀਹਿ, ਸਮਾਦਾਨਵਿਧਾਨਤੋ;
ਪਭੇਦਤੋ ਭੇਦਤੋ ਚ, ਤਸ੍ਸ ਤਸ੍ਸਾਨਿਸਂਸਤੋ.
ਕੁਸਲਤ੍ਤਿਕਤੋ ਚੇਵ, ਧੁਤਾਦੀਨਂ ਵਿਭਾਗਤੋ;
ਸਮਾਸਬ੍ਯਾਸਤੋ ਚਾਪਿ, ਵਿਞ੍ਞਾਤਬ੍ਬੋ ਵਿਨਿਚ੍ਛਯੋ.
੨੩. ਤਤ੍ਥ ਅਤ੍ਥਤੋਤਿ ਤਾਵ ਰਥਿਕਸੁਸਾਨਸਙ੍ਕਾਰਕੂਟਾਦੀਨਂ ਯਤ੍ਥ ਕਤ੍ਥਚਿ ਪਂਸੂਨਂ ਉਪਰਿ ਠਿਤਤ੍ਤਾ ਅਬ੍ਭੁਗ੍ਗਤਟ੍ਠੇਨ ਤੇਸੁ ਤੇਸੁ ਪਂਸੁਕੂਲਮਿਵਾਤਿ ਪਂਸੁਕੂਲਂ, ਅਥ ਵਾ ਪਂਸੁ ਵਿਯ ਕੁਚ੍ਛਿਤਭਾਵਂ ਉਲਤੀਤਿ ਪਂਸੁਕੂਲਂ, ਕੁਚ੍ਛਿਤਭਾਵਂ ਗਚ੍ਛਤੀਤਿ ਵੁਤ੍ਤਂ ਹੋਤਿ. ਏਵਂ ਲਦ੍ਧਨਿਬ੍ਬਚਨਸ੍ਸ ਪਂਸੁਕੂਲਸ੍ਸ ਧਾਰਣਂ ਪਂਸੁਕੂਲਂ, ਤਂ ਸੀਲਮਸ੍ਸਾਤਿ ਪਂਸੁਕੂਲਿਕੋ. ਪਂਸੁਕੂਲਿਕਸ੍ਸ ਅਙ੍ਗਂ ਪਂਸੁਕੂਲਿਕਙ੍ਗਂ. ਅਙ੍ਗਨ੍ਤਿ ਕਾਰਣਂ ਵੁਚ੍ਚਤਿ. ਤਸ੍ਮਾ ਯੇਨ ਸਮਾਦਾਨੇਨ ਸੋ ਪਂਸੁਕੂਲਿਕੋ ਹੋਤਿ, ਤਸ੍ਸੇਤਂ ਅਧਿਵਚਨਨ੍ਤਿ ਵੇਦਿਤਬ੍ਬਂ.
ਏਤੇਨੇਵ ਨਯੇਨ ਸਙ੍ਘਾਟਿਉਤ੍ਤਰਾਸਙ੍ਗਅਨ੍ਤਰਵਾਸਕਸਙ੍ਖਾਤਂ ਤਿਚੀਵਰਂ ਸੀਲਮਸ੍ਸਾਤਿ ਤੇਚੀਵਰਿਕੋ. ਤੇਚੀਵਰਿਕਸ੍ਸ ਅਙ੍ਗਂ ਤੇਚੀਵਰਿਕਙ੍ਗਂ.
ਭਿਕ੍ਖਾਸਙ੍ਖਾਤਾਨਂ ਪਨ ਆਮਿਸਪਿਣ੍ਡਾਨਂ ਪਾਤੋਤਿ ਪਿਣ੍ਡਪਾਤੋ, ਪਰੇਹਿ ਦਿਨ੍ਨਾਨਂ ਪਿਣ੍ਡਾਨਂ ਪਤ੍ਤੇ ਨਿਪਤਨਨ੍ਤਿ ਵੁਤ੍ਤਂ ਹੋਤਿ. ਤਂ ਪਿਣ੍ਡਪਾਤਂ ਉਞ੍ਛਤਿ ਤਂ ਤਂ ਕੁਲਂ ਉਪਸਙ੍ਕਮਨ੍ਤੋ ਗਵੇਸਤੀਤਿ ਪਿਣ੍ਡਪਾਤਿਕੋ. ਪਿਣ੍ਡਾਯ ਵਾ ਪਤਿਤੁਂ ਵਤਮੇਤਸ੍ਸਾਤਿ ਪਿਣ੍ਡਪਾਤੀ, ਪਤਿਤੁਨ੍ਤਿ ਚਰਿਤੁਂ, ਪਿਣ੍ਡਪਾਤੀ ਏਵ ਪਿਣ੍ਡਪਾਤਿਕੋ. ਪਿਣ੍ਡਪਾਤਿਕਸ੍ਸ ਅਙ੍ਗਂ ਪਿਣ੍ਡਪਾਤਿਕਙ੍ਗਂ.
ਦਾਨਂ ਵੁਚ੍ਚਤਿ ਅਵਖਣ੍ਡਨਂ, ਅਪੇਤਂ ਦਾਨਤੋਤਿ ਅਪਦਾਨਂ, ਅਨਵਖਣ੍ਡਨਨ੍ਤਿ ਅਤ੍ਥੋ. ਸਹ ਅਪਦਾਨੇਨ ਸਪਦਾਨਂ, ਅਵਖਣ੍ਡਨਰਹਿਤਂ ਅਨੁਘਰਨ੍ਤਿ ਵੁਤ੍ਤਂ ਹੋਤਿ. ਸਪਦਾਨਂ ਚਰਿਤੁਂ ਇਦਮਸ੍ਸ ਸੀਲਨ੍ਤਿ ਸਪਦਾਨਚਾਰੀ, ਸਪਦਾਨਚਾਰੀ ਏਵ ਸਪਦਾਨਚਾਰਿਕੋ. ਤਸ੍ਸ ਅਙ੍ਗਂ ਸਪਦਾਨਚਾਰਿਕਙ੍ਗਂ.
ਏਕਾਸਨੇ ਭੋਜਨਂ ਏਕਾਸਨਂ, ਤਂ ਸੀਲਮਸ੍ਸਾਤਿ ਏਕਾਸਨਿਕੋ. ਤਸ੍ਸ ਅਙ੍ਗਂ ਏਕਾਸਨਿਕਙ੍ਗਂ.
ਦੁਤਿਯਭਾਜਨਸ੍ਸ ਪਟਿਕ੍ਖਿਤ੍ਤਤ੍ਤਾ ਕੇਵਲਂ ਏਕਸ੍ਮਿਂਯੇਵ ਪਤ੍ਤੇ ਪਿਣ੍ਡੋ ਪਤ੍ਤਪਿਣ੍ਡੋ. ਇਦਾਨਿ ਪਤ੍ਤਪਿਣ੍ਡਗਹਣੇ ਪਤ੍ਤਪਿਣ੍ਡਸਞ੍ਞਂ ਕਤ੍ਵਾ ਪਤ੍ਤਪਿਣ੍ਡੋ ਸੀਲਮਸ੍ਸਾਤਿ ਪਤ੍ਤਪਿਣ੍ਡਿਕੋ. ਤਸ੍ਸ ਅਙ੍ਗਂ ਪਤ੍ਤਪਿਣ੍ਡਿਕਙ੍ਗਂ.
ਖਲੂਤਿ ਪਟਿਸੇਧਨਤ੍ਥੇ ਨਿਪਾਤੋ. ਪਵਾਰਿਤੇਨ ਸਤਾ ਪਚ੍ਛਾ ਲਦ੍ਧਂ ਭਤ੍ਤਂ ਪਚ੍ਛਾਭਤ੍ਤਂ ਨਾਮ, ਤਸ੍ਸ ਪਚ੍ਛਾਭਤ੍ਤਸ੍ਸ ਭੋਜਨਂ ਪਚ੍ਛਾਭਤ੍ਤਭੋਜਨਂ, ਤਸ੍ਮਿਂ ਪਚ੍ਛਾਭਤ੍ਤਭੋਜਨੇ ਪਚ੍ਛਾਭਤ੍ਤਸਞ੍ਞਂ ਕਤ੍ਵਾ ਪਚ੍ਛਾਭਤ੍ਤਂ ਸੀਲਮਸ੍ਸਾਤਿ ਪਚ੍ਛਾਭਤ੍ਤਿਕੋ. ਨ ਪਚ੍ਛਾਭਤ੍ਤਿਕੋ ਖਲੁਪਚ੍ਛਾਭਤ੍ਤਿਕੋ. ਸਮਾਦਾਨਵਸੇਨ ਪਟਿਕ੍ਖਿਤ੍ਤਾਤਿਰਿਤ੍ਤਭੋਜਨਸ੍ਸੇਤਂ ਨਾਮਂ. ਅਟ੍ਠਕਥਾਯਂ ਪਨ ਵੁਤ੍ਤਂ ਖਲੂਤਿ ਏਕੋ ਸਕੁਣੋ. ਸੋ ਮੁਖੇਨ ਫਲਂ ਗਹੇਤ੍ਵਾ ਤਸ੍ਮਿਂ ਪਤਿਤੇ ਪੁਨ ਅਞ੍ਞਂ ਨ ਖਾਦਤਿ. ਤਾਦਿਸੋ ਅਯਨ੍ਤਿ ਖਲੁਪਚ੍ਛਾਭਤ੍ਤਿਕੋ. ਤਸ੍ਸ ਅਙ੍ਗਂ ਖਲੁਪਚ੍ਛਾਭਤ੍ਤਿਕਙ੍ਗਂ.
ਅਰਞ੍ਞੇ ਨਿਵਾਸੋ ਸੀਲਮਸ੍ਸਾਤਿ ਆਰਞ੍ਞਿਕੋ. ਤਸ੍ਸ ਅਙ੍ਗਂ ਆਰਞ੍ਞਿਕਙ੍ਗਂ.
ਰੁਕ੍ਖਮੂਲੇ ਨਿਵਾਸੋ ਰੁਕ੍ਖਮੂਲਂ, ਤਂ ਸੀਲਮਸ੍ਸਾਤਿ ਰੁਕ੍ਖਮੂਲਿਕੋ. ਰੁਕ੍ਖਮੂਲਿਕਸ੍ਸ ਅਙ੍ਗਂ ਰੁਕ੍ਖਮੂਲਿਕਙ੍ਗਂ. ਅਬ੍ਭੋਕਾਸਿਕਸੋਸਾਨਿਕਙ੍ਗੇਸੁਪਿ ਏਸੇਵ ਨਯੋ.
ਯਦੇਵ ਸਨ੍ਥਤਂ ਯਥਾਸਨ੍ਥਤਂ, ਇਦਂ ਤੁਯ੍ਹਂ ਪਾਪੁਣਾਤੀਤਿ ਏਵਂ ਪਠਮਂ ਉਦ੍ਦਿਟ੍ਠਸੇਨਾਸਨਸ੍ਸੇਤਂ ਅਧਿਵਚਨਂ. ਤਸ੍ਮਿਂ ਯਥਾਸਨ੍ਥਤੇ ਵਿਹਰਿਤੁਂ ਸੀਲਮਸ੍ਸਾਤਿ ਯਥਾਸਨ੍ਥਤਿਕੋ. ਤਸ੍ਸ ਅਙ੍ਗਂ ਯਥਾਸਨ੍ਥਤਿਕਙ੍ਗਂ.
ਸਯਨਂ ਪਟਿਕ੍ਖਿਪਿਤ੍ਵਾ ਨਿਸਜ੍ਜਾਯ ਵਿਹਰਿਤੁਂ ਸੀਲਮਸ੍ਸਾਤਿ ਨੇਸਜ੍ਜਿਕੋ. ਤਸ੍ਸ ਅਙ੍ਗਂ ਨੇਸਜ੍ਜਿਕਙ੍ਗਂ.
ਸਬ੍ਬਾਨੇਵ ਪਨੇਤਾਨਿ ਤੇਨ ਤੇਨ ਸਮਾਦਾਨੇਨ ਧੁਤਕਿਲੇਸਤ੍ਤਾ ਧੁਤਸ੍ਸ ਭਿਕ੍ਖੁਨੋ ਅਙ੍ਗਾਨਿ, ਕਿਲੇਸਧੁਨਨਤੋ ਵਾ ਧੁਤਨ੍ਤਿ ਲਦ੍ਧਵੋਹਾਰਂ ਞਾਣਂ ਅਙ੍ਗਂ ਏਤੇਸਨ੍ਤਿ ਧੁਤਙ੍ਗਾਨਿ. ਅਥ ਵਾ ਧੁਤਾਨਿ ਚ ਤਾਨਿ ਪਟਿਪਕ੍ਖਨਿਦ੍ਧੁਨਨਤੋ ਅਙ੍ਗਾਨਿ ਚ ਪਟਿਪਤ੍ਤਿਯਾਤਿਪਿ ਧੁਤਙ੍ਗਾਨਿ. ਏਵਂ ਤਾਵੇਤ੍ਥ ਅਤ੍ਥਤੋ ਵਿਞ੍ਞਾਤਬ੍ਬੋ ਵਿਨਿਚ੍ਛਯੋ.
ਸਬ੍ਬਾਨੇਵ ਪਨੇਤਾਨਿ ਸਮਾਦਾਨਚੇਤਨਾਲਕ੍ਖਣਾਨਿ. ਵੁਤ੍ਤਮ੍ਪਿ ਚੇਤਂ ‘‘ਯੋ ਸਮਾਦਿਯਤਿ, ਸੋ ਪੁਗ੍ਗਲੋ. ਯੇਨ ਸਮਾਦਿਯਤਿ, ਚਿਤ੍ਤਚੇਤਸਿਕਾ ਏਤੇ ਧਮ੍ਮਾ. ਯਾ ਸਮਾਦਾਨਚੇਤਨਾ, ਤਂ ਧੁਤਙ੍ਗਂ. ਯਂ ਪਟਿਕ੍ਖਿਪਤਿ, ਤਂ ਵਤ੍ਥੂ’’ਤਿ. ਸਬ੍ਬਾਨੇਵ ਚ ਲੋਲੁਪ੍ਪਵਿਦ੍ਧਂਸਨਰਸਾਨਿ, ਨਿਲ੍ਲੋਲੁਪ੍ਪਭਾਵਪਚ੍ਚੁਪਟ੍ਠਾਨਾਨਿ ਅਪ੍ਪਿਚ੍ਛਤਾਦਿਅਰਿਯਧਮ੍ਮਪਦਟ੍ਠਾਨਾਨਿ. ਏਵਮੇਤ੍ਥ ਲਕ੍ਖਣਾਦੀਹਿ ਵੇਦਿਤਬ੍ਬੋ ਵਿਨਿਚ੍ਛਯੋ.
ਸਮਾਦਾਨਵਿਧਾਨਤੋਤਿਆਦੀਸੁ ਪਨ ਪਞ੍ਚਸੁ ਸਬ੍ਬਾਨੇਵ ਧੁਤਙ੍ਗਾਨਿ ਧਰਮਾਨੇ ਭਗਵਤਿ ਭਗਵਤੋਵ ਸਨ੍ਤਿਕੇ ਸਮਾਦਾਤਬ੍ਬਾਨਿ. ਪਰਿਨਿਬ੍ਬੁਤੇ ਮਹਾਸਾਵਕਸ੍ਸ ਸਨ੍ਤਿਕੇ. ਤਸ੍ਮਿਂ ਅਸਤਿ ਖੀਣਾਸਵਸ੍ਸ, ਅਨਾਗਾਮਿਸ੍ਸ, ਸਕਦਾਗਾਮਿਸ੍ਸ, ਸੋਤਾਪਨ੍ਨਸ੍ਸ, ਤਿਪਿਟਕਸ੍ਸ, ਦ੍ਵਿਪਿਟਕਸ੍ਸ, ਏਕਪਿਟਕਸ੍ਸ, ਏਕਸਙ੍ਗੀਤਿਕਸ੍ਸ, ਅਟ੍ਠਕਥਾਚਰਿਯਸ੍ਸ. ਤਸ੍ਮਿਂ ਅਸਤਿ ਧੁਤਙ੍ਗਧਰਸ੍ਸ, ਤਸ੍ਮਿਮ੍ਪਿ ਅਸਤਿ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਸਮ੍ਮਾਸਮ੍ਬੁਦ੍ਧਸ੍ਸ ਸਨ੍ਤਿਕੇ ਵਦਨ੍ਤੇਨ ਵਿਯ ਸਮਾਦਾਤਬ੍ਬਾਨਿ, ਅਪਿਚ ਸਯਮ੍ਪਿ ਸਮਾਦਾਤੁਂ ਵਟ੍ਟਤਿ ਏਵ. ਏਤ੍ਥ ਚ ਚੇਤਿਯਪਬ੍ਬਤੇ ਦ੍ਵੇ ਭਾਤਿਕਤ੍ਥੇਰਾਨਂ ਜੇਟ੍ਠਕਭਾਤੁ ਧੁਤਙ੍ਗਪ੍ਪਿਚ੍ਛਤਾਯ ਵਤ੍ਥੁ ਕਥੇਤਬ੍ਬਂ. ਅਯਂ ਤਾਵ ਸਾਧਾਰਣਕਥਾ.
੧. ਪਂਸੁਕੂਲਿਕਙ੍ਗਕਥਾ
੨੪. ਇਦਾਨਿ ਏਕੇਕਸ੍ਸ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸੇ ਵਣ੍ਣਯਿਸ੍ਸਾਮ. ਪਂਸੁਕੂਲਿਕਙ੍ਗਂ ਤਾਵ ‘‘ਗਹਪਤਿਦਾਨਚੀਵਰਂ ਪਟਿਕ੍ਖਿਪਾਮਿ, ਪਂਸੁਕੂਲਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸੁ ਦ੍ਵੀਸੁ ਵਚਨੇਸੁ ਅਞ੍ਞਤਰੇਨ ਸਮਾਦਿਨ੍ਨਂ ਹੋਤਿ. ਇਦਂ ਤਾਵੇਤ੍ਥ ਸਮਾਦਾਨਂ.
ਏਵਂ ਸਮਾਦਿਨ੍ਨਧੁਤਙ੍ਗੇਨ ਪਨ ਤੇਨ ਸੋਸਾਨਿਕਂ, ਪਾਪਣਿਕਂ, ਰਥਿਯਚੋਲ਼ਂ, ਸਙ੍ਕਾਰਚੋਲ਼ਂ, ਸੋਤ੍ਥਿਯਂ, ਨ੍ਹਾਨਚੋਲ਼ਂ, ਤਿਤ੍ਥਚੋਲ਼ਂ, ਗਤਪਚ੍ਚਾਗਤਂ, ਅਗ੍ਗਿਡਡ੍ਢਂ, ਗੋਖਾਯਿਤਂ, ਉਪਚਿਕਾਖਾਯਿਤਂ, ਉਨ੍ਦੂਰਖਾਯਿਤਂ, ਅਨ੍ਤਚ੍ਛਿਨ੍ਨਂ, ਦਸਾਚ੍ਛਿਨ੍ਨਂ, ਧਜਾਹਟਂ, ਥੂਪਚੀਵਰਂ, ਸਮਣਚੀਵਰਂ, ਆਭਿਸੇਕਿਕਂ, ਇਦ੍ਧਿਮਯਂ, ਪਨ੍ਥਿਕਂ, ਵਾਤਾਹਟਂ, ਦੇਵਦਤ੍ਤਿਯਂ, ਸਾਮੁਦ੍ਦਿਯਨ੍ਤਿਏਤੇਸੁ ਅਞ੍ਞਤਰਂ ਚੀਵਰਂ ਗਹੇਤ੍ਵਾ ਫਾਲੇਤ੍ਵਾ ਦੁਬ੍ਬਲਟ੍ਠਾਨਂ ਪਹਾਯ ਥਿਰਟ੍ਠਾਨਾਨਿ ਧੋਵਿਤ੍ਵਾ ਚੀਵਰਂ ਕਤ੍ਵਾ ਪੋਰਾਣਂ ਗਹਪਤਿਚੀਵਰਂ ਅਪਨੇਤ੍ਵਾ ਪਰਿਭੁਞ੍ਜਿਤਬ੍ਬਂ.
ਤਤ੍ਥ ਸੋਸਾਨਿਕਨ੍ਤਿ ਸੁਸਾਨੇ ਪਤਿਤਕਂ. ਪਾਪਣਿਕਨ੍ਤਿ ਆਪਣਦ੍ਵਾਰੇ ਪਤਿਤਕਂ. ਰਥਿਯਚੋਲ਼ਨ੍ਤਿ ਪੁਞ੍ਞਤ੍ਥਿਕੇਹਿ ਵਾਤਪਾਨਨ੍ਤਰੇਨ ਰਥਿਕਾਯ ਛਡ੍ਡਿਤਚੋਲ਼ਕਂ. ਸਙ੍ਕਾਰਚੋਲ਼ਨ੍ਤਿ ਸਙ੍ਕਾਰਟ੍ਠਾਨੇ ਛਡ੍ਡਿਤਚੋਲ਼ਕਂ. ਸੋਤ੍ਥਿਯਨ੍ਤਿ ਗਬ੍ਭਮਲਂ ਪੁਞ੍ਛਿਤ੍ਵਾ ਛਡ੍ਡਿਤਵਤ੍ਥਂ. ਤਿਸ੍ਸਾਮਚ੍ਚਮਾਤਾ ਕਿਰ ਸਤਗ੍ਘਨਕੇਨ ਵਤ੍ਥੇਨ ਗਬ੍ਭਮਲਂ ਪੁਞ੍ਛਾਪੇਤ੍ਵਾ ਪਂਸੁਕੂਲਿਕਾ ਗਣ੍ਹਿਸ੍ਸਨ੍ਤੀਤਿ ਤਾਲਵੇਲ਼ਿਮਗ੍ਗੇ ਛਡ੍ਡਾਪੇਸਿ. ਭਿਕ੍ਖੂ ਜਿਣ੍ਣਕਟ੍ਠਾਨਤ੍ਥਮੇਵ ਗਣ੍ਹਨ੍ਤਿ. ਨ੍ਹਾਨਚੋਲ਼ਨ੍ਤਿ ਯਂ ਭੂਤਵੇਜ੍ਜੇਹਿ ਸਸੀਸਂ ਨ੍ਹਾਪਿਤਾ ਕਾਲ਼ਕਣ੍ਣਿਚੋਲ਼ਨ੍ਤਿ ਛਡ੍ਡੇਤ੍ਵਾ ਗਚ੍ਛਨ੍ਤਿ.
ਤਿਤ੍ਥਚੋਲ਼ਨ੍ਤਿ ਨ੍ਹਾਨਤਿਤ੍ਥੇ ਛਡ੍ਡਿਤਪਿਲੋਤਿਕਾ. ਗਤਪਚ੍ਚਾਗਤਨ੍ਤਿ ਯਂ ਮਨੁਸ੍ਸਾ ਸੁਸਾਨਂ ਗਨ੍ਤ੍ਵਾ ਪਚ੍ਚਾਗਤਾ ਨ੍ਹਤ੍ਵਾ ਛਡ੍ਡੇਨ੍ਤਿ. ਅਗ੍ਗਿਡਡ੍ਢਨ੍ਤਿ ਅਗ੍ਗਿਨਾ ਡਡ੍ਢਪ੍ਪਦੇਸਂ. ਤਞ੍ਹਿ ਮਨੁਸ੍ਸਾ ਛਡ੍ਡੇਨ੍ਤਿ. ਗੋਖਾਯਿਤਾਦੀਨਿ ਪਾਕਟਾਨੇਵ. ਤਾਦਿਸਾਨਿਪਿ ਹਿ ਮਨੁਸ੍ਸਾ ਛਡ੍ਡੇਨ੍ਤਿ. ਧਜਾਹਟਨ੍ਤਿ ਨਾਵਂ ਆਰੋਹਨ੍ਤਾ ਧਜਂ ਬਨ੍ਧਿਤ੍ਵਾ ਆਰੂਹਨ੍ਤਿ. ਤਂ ਤੇਸਂ ਦਸ੍ਸਨਾਤਿਕ੍ਕਮੇ ਗਹੇਤੁਂ ਵਟ੍ਟਤਿ. ਯਮ੍ਪਿ ਯੁਦ੍ਧਭੂਮਿਯਂ ਧਜਂ ਬਨ੍ਧਿਤ੍ਵਾ ਠਪਿਤਂ, ਤਂ ਦ੍ਵਿਨ੍ਨਮ੍ਪਿ ਸੇਨਾਨਂ ਗਤਕਾਲੇ ਗਹੇਤੁਂ ਵਟ੍ਟਤਿ.
ਥੂਪਚੀਵਰਨ੍ਤਿ ਵਮ੍ਮਿਕਂ ਪਰਿਕ੍ਖਿਪਿਤ੍ਵਾ ਬਲਿਕਮ੍ਮਂ ਕਤਂ. ਸਮਣਚੀਵਰਨ੍ਤਿ ਭਿਕ੍ਖੁਸਨ੍ਤਕਂ. ਆਭਿਸੇਕਿਕਨ੍ਤਿ ਰਞ੍ਞੋ ਅਭਿਸੇਕਟ੍ਠਾਨੇ ਛਡ੍ਡਿਤਚੀਵਰਂ. ਇਦ੍ਧਿਮਯਨ੍ਤਿ ਏਹਿਭਿਕ੍ਖੁਚੀਵਰਂ. ਪਨ੍ਥਿਕਨ੍ਤਿ ਅਨ੍ਤਰਾਮਗ੍ਗੇ ਪਤਿਤਕਂ. ਯਂ ਪਨ ਸਾਮਿਕਾਨਂ ਸਤਿਸਮ੍ਮੋਸੇਨ ਪਤਿਤਂ, ਤਂ ਥੋਕਂ ਰਕ੍ਖਿਤ੍ਵਾ ਗਹੇਤਬ੍ਬਂ. ਵਾਤਾਹਟਨ੍ਤਿ ਵਾਤੇਨ ਪਹਰਿਤ੍ਵਾ ਦੂਰੇ ਪਾਤਿਤਂ, ਤਂ ਪਨ ਸਾਮਿਕੇ ਅਪਸ੍ਸਨ੍ਤੇਨ ਗਹੇਤੁਂ ਵਟ੍ਟਤਿ. ਦੇਵਦਤ੍ਤਿਯਨ੍ਤਿ ਅਨੁਰੁਦ੍ਧਤ੍ਥੇਰਸ੍ਸ ਵਿਯ ਦੇਵਤਾਹਿ ਦਿਨ੍ਨਕਂ. ਸਾਮੁਦ੍ਦਿਯਨ੍ਤਿ ਸਮੁਦ੍ਦਵੀਚੀਹਿ ਥਲੇ ਉਸ੍ਸਾਰਿਤਂ.
ਯਂ ਪਨ ਸਙ੍ਘਸ੍ਸ ਦੇਮਾਤਿ ਦਿਨ੍ਨਂ, ਚੋਲ਼ਕਭਿਕ੍ਖਾਯ ਵਾ ਚਰਮਾਨੇਹਿ ਲਦ੍ਧਂ, ਨ ਤਂ ਪਂਸੁਕੂਲਂ. ਭਿਕ੍ਖੁਦਤ੍ਤਿਯੇਪਿ ਯਂ ਵਸ੍ਸਗ੍ਗੇਨ ਗਾਹੇਤ੍ਵਾ ਵਾ ਦੀਯਤਿ, ਸੇਨਾਸਨਚੀਵਰਂ ਵਾ ਹੋਤਿ, ਨ ਤਂ ਪਂਸੁਕੂਲਂ. ਨੋ ਗਾਹਾਪੇਤ੍ਵਾ ਦਿਨ੍ਨਮੇਵ ਪਂਸੁਕੂਲਂ. ਤਤ੍ਰਪਿ ਯਂ ਦਾਯਕੇਹਿ ਭਿਕ੍ਖੁਸ੍ਸ ਪਾਦਮੂਲੇ ਨਿਕ੍ਖਿਤ੍ਤਂ, ਤੇਨ ਪਨ ਭਿਕ੍ਖੁਨਾ ਪਂਸੁਕੂਲਿਕਸ੍ਸ ਹਤ੍ਥੇ ਠਪੇਤ੍ਵਾ ਦਿਨ੍ਨਂ, ਤਂ ਏਕਤੋਸੁਦ੍ਧਿਕਂ ਨਾਮ. ਯਂ ਭਿਕ੍ਖੁਨੋ ਹਤ੍ਥੇ ਠਪੇਤ੍ਵਾ ਦਿਨ੍ਨਂ, ਤੇਨ ਪਨ ਪਾਦਮੂਲੇ ਠਪਿਤਂ, ਤਮ੍ਪਿ ਏਕਤੋਸੁਦ੍ਧਿਕਂ. ਯਂ ਭਿਕ੍ਖੁਨੋਪਿ ਪਾਦਮੂਲੇ ਠਪਿਤਂ, ਤੇਨਾਪਿ ਤਥੇਵ ਦਿਨ੍ਨਂ, ਤਂ ਉਭਤੋਸੁਦ੍ਧਿਕਂ. ਯਂ ਹਤ੍ਥੇ ਠਪੇਤ੍ਵਾ ਲਦ੍ਧਂ, ਹਤ੍ਥੇਯੇਵ ਠਪਿਤਂ, ਤਂ ਅਨੁਕ੍ਕਟ੍ਠਚੀਵਰਂ ਨਾਮ. ਇਤਿ ਇਮਂ ਪਂਸੁਕੂਲਭੇਦਂ ਞਤ੍ਵਾ ਪਂਸੁਕੂਲਿਕੇਨ ਚੀਵਰਂ ਪਰਿਭੁਞ੍ਜਿਤਬ੍ਬਨ੍ਤਿ ਇਦਮੇਤ੍ਥ ਵਿਧਾਨਂ.
ਅਯਂ ਪਨ ਪਭੇਦੋ, ਤਯੋ ਪਂਸੁਕੂਲਿਕਾ ਉਕ੍ਕਟ੍ਠੋ ਮਜ੍ਝਿਮੋ ਮੁਦੂਤਿ. ਤਤ੍ਥ ਸੋਸਾਨਿਕਂਯੇਵ ਗਣ੍ਹਨ੍ਤੋ ਉਕ੍ਕਟ੍ਠੋ ਹੋਤਿ. ਪਬ੍ਬਜਿਤਾ ਗਣ੍ਹਿਸ੍ਸਨ੍ਤੀਤਿ ਠਪਿਤਕਂ ਗਣ੍ਹਨ੍ਤੋ ਮਜ੍ਝਿਮੋ. ਪਾਦਮੂਲੇ ਠਪੇਤ੍ਵਾ ਦਿਨ੍ਨਕਂ ਗਣ੍ਹਨ੍ਤੋ ਮੁਦੂਤਿ.
ਤੇਸੁ ਯਸ੍ਸ ਕਸ੍ਸਚਿ ਅਤ੍ਤਨੋ ਰੁਚਿਯਾ ਗਿਹਿਦਿਨ੍ਨਕਂ ਸਾਦਿਤਕ੍ਖਣੇ ਧੁਤਙ੍ਗਂ ਭਿਜ੍ਜਤਿ. ਅਯਮੇਤ੍ਥ ਭੇਦੋ.
ਅਯਂ ਪਨਾਨਿਸਂਸੋ, ‘‘ਪਂਸੁਕੂਲਚੀਵਰਂ ਨਿਸ੍ਸਾਯ ਪਬ੍ਬਜ੍ਜਾ’’ਤਿ (ਮਹਾਵ. ੧੨੮) ਵਚਨਤੋ ਨਿਸ੍ਸਯਾਨੁਰੂਪਪਟਿਪਤ੍ਤਿਸਬ੍ਭਾਵੋ, ਪਠਮੇ ਅਰਿਯਵਂਸੇ ਪਤਿਟ੍ਠਾਨਂ, ਆਰਕ੍ਖਦੁਕ੍ਖਾਭਾਵੋ, ਅਪਰਾਯਤ੍ਤਵੁਤ੍ਤਿਤਾ, ਚੋਰਭਯੇਨ ਅਭਯਤਾ, ਪਰਿਭੋਗਤਣ੍ਹਾਯ ਅਭਾਵੋ, ਸਮਣਸਾਰੁਪ੍ਪਪਰਿਕ੍ਖਾਰਤਾ, ‘‘ਅਪ੍ਪਾਨਿ ਚੇਵ ਸੁਲਭਾਨਿ ਚ ਤਾਨਿ ਚ ਅਨਵਜ੍ਜਾਨੀ’’ਤਿ (ਅ. ਨਿ. ੪.੨੭; ਇਤਿਵੁ. ੧੦੧) ਭਗਵਤਾ ਸਂਵਣ੍ਣਿਤਪਚ੍ਚਯਤਾ, ਪਾਸਾਦਿਕਤਾ, ਅਪ੍ਪਿਚ੍ਛਤਾਦੀਨਂ ਫਲਨਿਪ੍ਫਤ੍ਤਿ, ਸਮ੍ਮਾਪਟਿਪਤ੍ਤਿਯਾ ਅਨੁਬ੍ਰੂਹਨਂ, ਪਚ੍ਛਿਮਾਯ ਜਨਤਾਯ ਦਿਟ੍ਠਾਨੁਗਤਿਆਪਾਦਨਨ੍ਤਿ.
ਮਾਰਸੇਨਵਿਘਾਤਾਯ, ਪਂਸੁਕੂਲਧਰੋ ਯਤਿ;
ਸਨ੍ਨਦ੍ਧਕਵਚੋ ਯੁਦ੍ਧੇ, ਖਤ੍ਤਿਯੋ ਵਿਯ ਸੋਭਤਿ.
ਪਹਾਯ ਕਾਸਿਕਾਦੀਨਿ, ਵਰਵਤ੍ਥਾਨਿ ਧਾਰਿਤਂ;
ਯਂ ਲੋਕਗਰੁਨਾ ਕੋ ਤਂ, ਪਂਸੁਕੂਲਂ ਨ ਧਾਰਯੇ.
ਤਸ੍ਮਾ ਹਿ ਅਤ੍ਤਨੋ ਭਿਕ੍ਖੁ, ਪਟਿਞ੍ਞਂ ਸਮਨੁਸ੍ਸਰਂ;
ਯੋਗਾਚਾਰਾਨੁਕੂਲਮ੍ਹਿ, ਪਂਸੁਕੂਲੇ ਰਤੋ ਸਿਯਾਤਿ.
ਅਯਂ ਤਾਵ ਪਂਸੁਕੂਲਿਕਙ੍ਗੇ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸਵਣ੍ਣਨਾ.
੨. ਤੇਚੀਵਰਿਕਙ੍ਗਕਥਾ
੨੫. ਤਦਨਨ੍ਤਰਂ ਪਨ ਤੇਚੀਵਰਿਕਙ੍ਗਂ ‘‘ਚਤੁਤ੍ਥਕਚੀਵਰਂ ਪਟਿਕ੍ਖਿਪਾਮਿ, ਤੇਚੀਵਰਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.
ਤੇਨ ਪਨ ਤੇਚੀਵਰਿਕੇਨ ਚੀਵਰਦੁਸ੍ਸਂ ਲਭਿਤ੍ਵਾ ਯਾਵ ਅਫਾਸੁਕਭਾਵੇਨ ਕਾਤੁਂ ਵਾ ਨ ਸਕ੍ਕੋਤਿ, ਵਿਚਾਰਕਂ ਵਾ ਨ ਲਭਤਿ, ਸੂਚਿਆਦੀਸੁ ਵਾਸ੍ਸ ਕਿਞ੍ਚਿ ਨ ਸਮ੍ਪਜ੍ਜਤਿ, ਤਾਵ ਨਿਕ੍ਖਿਪਿਤਬ੍ਬਂ. ਨਿਕ੍ਖਿਤ੍ਤਪਚ੍ਚਯਾ ਦੋਸੋ ਨਤ੍ਥਿ. ਰਜਿਤਕਾਲਤੋ ਪਨ ਪਟ੍ਠਾਯ ਨਿਕ੍ਖਿਪਿਤੁਂ ਨ ਵਟ੍ਟਤਿ, ਧੁਤਙ੍ਗਚੋਰੋ ਨਾਮ ਹੋਤਿ. ਇਦਮਸ੍ਸ ਵਿਧਾਨਂ.
ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠੇਨ ਰਜਨਕਾਲੇ ਪਠਮਂ ਅਨ੍ਤਰਵਾਸਕਂ ਵਾ ਉਤ੍ਤਰਾਸਙ੍ਗਂ ਵਾ ਰਜਿਤ੍ਵਾ ਤਂ ਨਿਵਾਸੇਤ੍ਵਾ ਇਤਰਂ ਰਜਿਤਬ੍ਬਂ. ਤਂ ਪਾਰੁਪਿਤ੍ਵਾ ਸਙ੍ਘਾਟਿ ਰਜਿਤਬ੍ਬਾ. ਸਙ੍ਘਾਟਿਂ ਪਨ ਨਿਵਾਸੇਤੁਂ ਨ ਵਟ੍ਟਤਿ. ਇਦਮਸ੍ਸ ਗਾਮਨ੍ਤਸੇਨਾਸਨੇ ਵਤ੍ਤਂ. ਆਰਞ੍ਞਕੇ ਪਨ ਦ੍ਵੇ ਏਕਤੋ ਧੋਵਿਤ੍ਵਾ ਰਜਿਤੁਂ ਵਟ੍ਟਤਿ. ਯਥਾ ਪਨ ਕਞ੍ਚਿ ਦਿਸ੍ਵਾ ਸਕ੍ਕੋਤਿ ਕਾਸਾਵਂ ਆਕਡ੍ਢਿਤ੍ਵਾ ਉਪਰਿਕਾਤੁਂ, ਏਵਂ ਆਸਨ੍ਨੇ ਠਾਨੇ ਨਿਸੀਦਿਤਬ੍ਬਂ. ਮਜ੍ਝਿਮਸ੍ਸ ਰਜਨਸਾਲਾਯਂ ਰਜਨਕਾਸਾਵਂ ਨਾਮ ਹੋਤਿ, ਤਂ ਨਿਵਾਸੇਤ੍ਵਾ ਵਾ ਪਾਰੁਪਿਤ੍ਵਾ ਵਾ ਰਜਨਕਮ੍ਮਂ ਕਾਤੁਂ ਵਟ੍ਟਤਿ. ਮੁਦੁਕਸ੍ਸ ਸਭਾਗਭਿਕ੍ਖੂਨਂ ਚੀਵਰਾਨਿ ਨਿਵਾਸੇਤ੍ਵਾ ਵਾ ਪਾਰੁਪਿਤ੍ਵਾ ਵਾ ਰਜਨਕਮ੍ਮਂ ਕਾਤੁਂ ਵਟ੍ਟਤਿ. ਤਤ੍ਰਟ੍ਠਕਪਚ੍ਚਤ੍ਥਰਣਮ੍ਪਿ ਤਸ੍ਸ ਵਟ੍ਟਤਿ. ਪਰਿਹਰਿਤੁਂ ਪਨ ਨ ਵਟ੍ਟਤਿ. ਸਭਾਗਭਿਕ੍ਖੂਨਂ ਚੀਵਰਮ੍ਪਿ ਅਨ੍ਤਰਨ੍ਤਰਾ ਪਰਿਭੁਞ੍ਜਿਤੁਂ ਵਟ੍ਟਤਿ. ਧੁਤਙ੍ਗਤੇਚੀਵਰਿਕਸ੍ਸ ਪਨ ਚਤੁਤ੍ਥਂ ਵਤ੍ਤਮਾਨਂ ਅਂਸਕਾਸਾਵਮੇਵ ਵਟ੍ਟਤਿ. ਤਞ੍ਚ ਖੋ ਵਿਤ੍ਥਾਰਤੋ ਵਿਦਤ੍ਥਿ, ਦੀਘਤੋ ਤਿਹਤ੍ਥਮੇਵ ਵਟ੍ਟਤਿ.
ਇਮੇਸਂ ਪਨ ਤਿਣ੍ਣਮ੍ਪਿ ਚਤੁਤ੍ਥਕਚੀਵਰਂ ਸਾਦਿਤਕ੍ਖਣੇਯੇਵ ਧੁਤਙ੍ਗਂ ਭਿਜ੍ਜਤਿ. ਅਯਮੇਤ੍ਥ ਭੇਦੋ.
ਅਯਂ ਪਨਾਨਿਸਂਸੋ, ਤੇਚੀਵਰਿਕੋ ਭਿਕ੍ਖੁ ਸਨ੍ਤੁਟ੍ਠੋ ਹੋਤਿ ਕਾਯਪਰਿਹਾਰਿਕੇਨ ਚੀਵਰੇਨ. ਤੇਨਸ੍ਸ ਪਕ੍ਖਿਨੋ ਵਿਯ ਸਮਾਦਾਯੇਵ ਗਮਨਂ, ਅਪ੍ਪਸਮਾਰਮ੍ਭਤਾ, ਵਤ੍ਥਸਨ੍ਨਿਧਿਪਰਿਵਜ੍ਜਨਂ, ਸਲ੍ਲਹੁਕਵੁਤ੍ਤਿਤਾ, ਅਤਿਰੇਕਚੀਵਰਲੋਲੁਪ੍ਪਪ੍ਪਹਾਨਂ, ਕਪ੍ਪਿਯੇ ਮਤ੍ਤਕਾਰਿਤਾਯ ਸਲ੍ਲੇਖਵੁਤ੍ਤਿਤਾ, ਅਪ੍ਪਿਚ੍ਛਤਾਦੀਨਂ ਫਲਨਿਪ੍ਫਤ੍ਤੀਤਿ ਏਵਮਾਦਯੋ ਗੁਣਾ ਸਮ੍ਪਜ੍ਜਨ੍ਤੀਤਿ.
ਅਤਿਰੇਕਵਤ੍ਥਤਣ੍ਹਂ, ਪਹਾਯ ਸਨ੍ਨਿਧਿਵਿਵਜ੍ਜਿਤੋ ਧੀਰੋ;
ਸਨ੍ਤੋਸਸੁਖਰਸਞ੍ਞੂ, ਤਿਚੀਵਰਧਰੋ ਭਵਤਿ ਯੋਗੀ.
ਤਸ੍ਮਾ ਸਪਤ੍ਤਚਰਣੋ, ਪਕ੍ਖੀਵ ਸਚੀਵਰੋਵ ਯੋਗਿਵਰੋ;
ਸੁਖਮਨੁਵਿਚਰਿਤੁਕਾਮੋ, ਚੀਵਰਨਿਯਮੇ ਰਤਿਂ ਕਯਿਰਾਤਿ.
ਅਯਂ ਤੇਚੀਵਰਿਕਙ੍ਗੇ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸਵਣ੍ਣਨਾ.
੩. ਪਿਣ੍ਡਪਾਤਿਕਙ੍ਗਕਥਾ
੨੬. ਪਿਣ੍ਡਪਾਤਿਕਙ੍ਗਮ੍ਪਿ ‘‘ਅਤਿਰੇਕਲਾਭਂ ਪਟਿਕ੍ਖਿਪਾਮਿ, ਪਿਣ੍ਡਪਾਤਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.
ਤੇਨ ਪਨ ਪਿਣ੍ਡਪਾਤਿਕੇਨ ‘‘ਸਙ੍ਘਭਤ੍ਤਂ, ਉਦ੍ਦੇਸਭਤ੍ਤਂ, ਨਿਮਨ੍ਤਨਭਤ੍ਤਂ, ਸਲਾਕਭਤ੍ਤਂ, ਪਕ੍ਖਿਕਂ, ਉਪੋਸਥਿਕਂ, ਪਾਟਿਪਦਿਕਂ, ਆਗਨ੍ਤੁਕਭਤ੍ਤਂ, ਗਮਿਕਭਤ੍ਤਂ, ਗਿਲਾਨਭਤ੍ਤਂ, ਗਿਲਾਨੁਪਟ੍ਠਾਕਭਤ੍ਤਂ, ਵਿਹਾਰਭਤ੍ਤਂ, ਧੁਰਭਤ੍ਤਂ, ਵਾਰਕਭਤ੍ਤ’’ਨ੍ਤਿ ਏਤਾਨਿ ਚੁਦ੍ਦਸ ਭਤ੍ਤਾਨਿ ਨ ਸਾਦਿਤਬ੍ਬਾਨਿ. ਸਚੇ ਪਨ ‘‘ਸਙ੍ਘਭਤ੍ਤਂ ਗਣ੍ਹਥਾ’’ਤਿਆਦਿਨਾ ਨਯੇਨ ਅਵਤ੍ਵਾ ‘‘ਅਮ੍ਹਾਕਂ ਗੇਹੇ ਸਙ੍ਘੋ ਭਿਕ੍ਖਂ ਗਣ੍ਹਾਤੁ, ਤੁਮ੍ਹੇਪਿ ਭਿਕ੍ਖਂ ਗਣ੍ਹਥਾ’’ਤਿ ਵਤ੍ਵਾ ਦਿਨ੍ਨਾਨਿ ਹੋਨ੍ਤਿ, ਤਾਨਿ ਸਾਦਿਤੁਂ ਵਟ੍ਟਨ੍ਤਿ. ਸਙ੍ਘਤੋ ਨਿਰਾਮਿਸਸਲਾਕਾਪਿ ਵਿਹਾਰੇ ਪਕ੍ਕਭਤ੍ਤਮ੍ਪਿ ਵਟ੍ਟਤਿਯੇਵਾਤਿ ਇਦਮਸ੍ਸ ਵਿਧਾਨਂ.
ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠੋ ਪੁਰਤੋਪਿ ਪਚ੍ਛਤੋਪਿ ਆਹਟਭਿਕ੍ਖਂ ਗਣ੍ਹਤਿ, ਪਤ੍ਤਦ੍ਵਾਰੇ ਠਤ੍ਵਾ ਪਤ੍ਤਂ ਗਣ੍ਹਨ੍ਤਾਨਮ੍ਪਿ ਦੇਤਿ, ਪਟਿਕ੍ਕਮਨਂ ਆਹਰਿਤ੍ਵਾ ਦਿਨ੍ਨਭਿਕ੍ਖਮ੍ਪਿ ਗਣ੍ਹਤਿ, ਤਂ ਦਿਵਸਂ ਪਨ ਨਿਸੀਦਿਤ੍ਵਾ ਭਿਕ੍ਖਂ ਨ ਗਣ੍ਹਤਿ. ਮਜ੍ਝਿਮੋ ਤਂ ਦਿਵਸਂ ਨਿਸੀਦਿਤ੍ਵਾਪਿ ਗਣ੍ਹਤਿ, ਸ੍ਵਾਤਨਾਯ ਪਨ ਨਾਧਿਵਾਸੇਤਿ. ਮੁਦੁਕੋਸ੍ਵਾਤਨਾਯਪਿ ਪੁਨਦਿਵਸਾਯਪਿ ਭਿਕ੍ਖਂ ਅਧਿਵਾਸੇਤਿ. ਤੇ ਉਭੋਪਿ ਸੇਰਿਵਿਹਾਰਸੁਖਂ ਨ ਲਭਨ੍ਤਿ, ਉਕ੍ਕਟ੍ਠੋਵ ਲਭਤਿ. ਏਕਸ੍ਮਿਂ ਕਿਰ ਗਾਮੇ ਅਰਿਯਵਂਸੋ ਹੋਤਿ, ਉਕ੍ਕਟ੍ਠੋ ਇਤਰੇ ਆਹ – ‘‘ਆਯਾਮਾਵੁਸੋ, ਧਮ੍ਮਸਵਨਾਯਾ’’ਤਿ. ਤੇਸੁ ਏਕੋ ਏਕੇਨਮ੍ਹਿ, ਭਨ੍ਤੇ, ਮਨੁਸ੍ਸੇਨ ਨਿਸੀਦਾਪਿਤੋਤਿ ਆਹ. ਅਪਰੋ ਮਯਾ, ਭਨ੍ਤੇ, ਸ੍ਵਾਤਨਾਯ ਏਕਸ੍ਸ ਭਿਕ੍ਖਾ ਅਧਿਵਾਸਿਤਾਤਿ. ਏਵਂ ਤੇ ਉਭੋ ਪਰਿਹੀਨਾ. ਇਤਰੋ ਪਾਤੋਵ ਪਿਣ੍ਡਾਯ ਚਰਿਤ੍ਵਾ ਗਨ੍ਤ੍ਵਾ ਧਮ੍ਮਰਸਂ ਪਟਿਸਂਵੇਦੇਸਿ.
ਇਮੇਸਂ ਪਨ ਤਿਣ੍ਣਮ੍ਪਿ ਸਙ੍ਘਭਤ੍ਤਾਦਿਅਤਿਰੇਕਲਾਭਂ ਸਾਦਿਤਕ੍ਖਣੇਵ ਧੁਤਙ੍ਗਂ ਭਿਜ੍ਜਤਿ. ਅਯਮੇਤ੍ਥ ਭੇਦੋ.
ਅਯਂ ਪਨਾਨਿਸਂਸੋ, ‘‘ਪਿਣ੍ਡਿਯਾਲੋਪਭੋਜਨਂ ਨਿਸ੍ਸਾਯ ਪਬ੍ਬਜ੍ਜਾ’’ਤਿ (ਅ. ਨਿ. ੪.੨੭; ਇਤਿਵੁ. ੧੦੧) ਵਚਨਤੋ ਨਿਸ੍ਸਯਾਨੁਰੂਪਪਟਿਪਤ੍ਤਿਸਬ੍ਭਾਵੋ, ਦੁਤਿਯੇ ਅਰਿਯਵਂਸੇ ਪਤਿਟ੍ਠਾਨਂ, ਅਪਰਾਯਤ੍ਤਵੁਤ੍ਤਿਤਾ, ‘‘ਅਪ੍ਪਾਨਿ ਚੇਵ ਸੁਲਭਾਨਿ ਚ ਤਾਨਿ ਚ ਅਨਵਜ੍ਜਾਨੀ’’ਤਿ ਭਗਵਤਾ ਸਂਵਣ੍ਣਿਤਪਚ੍ਚਯਤਾ, ਕੋਸਜ੍ਜਨਿਮ੍ਮਦ੍ਦਨਤਾ, ਪਰਿਸੁਦ੍ਧਾਜੀਵਤਾ, ਸੇਖਿਯਪਟਿਪਤ੍ਤਿਪੂਰਣਂ, ਅਪਰਪੋਸਿਤਾ, ਪਰਾਨੁਗ੍ਗਹਕਿਰਿਯਾ, ਮਾਨਪ੍ਪਹਾਨਂ, ਰਸਤਣ੍ਹਾਨਿਵਾਰਣਂ, ਗਣਭੋਜਨਪਰਮ੍ਪਰਭੋਜਨਚਾਰਿਤ੍ਤਸਿਕ੍ਖਾਪਦੇਹਿ ਅਨਾਪਤ੍ਤਿਤਾ, ਅਪ੍ਪਿਚ੍ਛਤਾਦੀਨਂ ਅਨੁਲੋਮਵੁਤ੍ਤਿਤਾ, ਸਮ੍ਮਾਪਟਿਪਤ੍ਤਿਬ੍ਰੂਹਨਂ, ਪਚ੍ਛਿਮਜਨਤਾਨੁਕਮ੍ਪਨਨ੍ਤਿ.
ਪਿਣ੍ਡਿਯਾਲੋਪਸਨ੍ਤੁਟ੍ਠੋ, ਅਪਰਾਯਤ੍ਤਜੀਵਿਕੋ;
ਪਹੀਨਾਹਾਰਲੋਲੁਪ੍ਪੋ, ਹੋਤਿ ਚਾਤੁਦ੍ਦਿਸੋ ਯਤਿ.
ਵਿਨੋਦਯਤਿ ਕੋਸਜ੍ਜਂ, ਆਜੀਵਸ੍ਸ ਵਿਸੁਜ੍ਝਤਿ;
ਤਸ੍ਮਾ ਹਿ ਨਾਤਿਮਞ੍ਞੇਯ੍ਯ, ਭਿਕ੍ਖਾਚਰਿਯਾਯ ਸੁਮੇਧਸੋ.
ਏਵਰੂਪਸ੍ਸ ਹਿ –
‘‘ਪਿਣ੍ਡਪਾਤਿਕਸ੍ਸ ਭਿਕ੍ਖੁਨੋ,
ਅਤ੍ਤਭਰਸ੍ਸ ਅਨਞ੍ਞਪੋਸਿਨੋ;
ਦੇਵਾਪਿ ਪਿਹਯਨ੍ਤਿ ਤਾਦਿਨੋ,
ਨੋ ਚੇ ਲਾਭਸਿਲੋਕਨਿਸ੍ਸਿਤੋ’’ਤਿ.
ਅਯਂ ਪਿਣ੍ਡਪਾਤਿਕਙ੍ਗੇ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸਵਣ੍ਣਨਾ.
੪. ਸਪਦਾਨਚਾਰਿਕਙ੍ਗਕਥਾ
੨੭. ਸਪਦਾਨਚਾਰਿਕਙ੍ਗਮ੍ਪਿ ‘‘ਲੋਲੁਪ੍ਪਚਾਰਂ ਪਟਿਕ੍ਖਿਪਾਮਿ, ਸਪਦਾਨਚਾਰਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.
ਤੇਨ ਪਨ ਸਪਦਾਨਚਾਰਿਕੇਨ ਗਾਮਦ੍ਵਾਰੇ ਠਤ੍ਵਾ ਪਰਿਸ੍ਸਯਾਭਾਵੋ ਸਲ੍ਲਕ੍ਖੇਤਬ੍ਬੋ. ਯਸ੍ਸਾ ਰਚ੍ਛਾਯ ਵਾ ਗਾਮੇ ਵਾ ਪਰਿਸ੍ਸਯੋ ਹੋਤਿ, ਤਂ ਪਹਾਯ ਅਞ੍ਞਤ੍ਥ ਚਰਿਤੁਂ ਵਟ੍ਟਤਿ. ਯਸ੍ਮਿਂ ਘਰਦ੍ਵਾਰੇ ਵਾ ਰਚ੍ਛਾਯ ਵਾ ਗਾਮੇ ਵਾ ਕਿਞ੍ਚਿ ਨ ਲਭਤਿ, ਅਗਾਮਸਞ੍ਞਂ ਕਤ੍ਵਾ ਗਨ੍ਤਬ੍ਬਂ. ਯਤ੍ਥ ਕਿਞ੍ਚਿ ਲਭਤਿ, ਤਂ ਪਹਾਯ ਗਨ੍ਤੁਂ ਨ ਵਟ੍ਟਤਿ. ਇਮਿਨਾ ਚ ਭਿਕ੍ਖੁਨਾ ਕਾਲਤਰਂ ਪਵਿਸਿਤਬ੍ਬਂ, ਏਵਞ੍ਹਿ ਅਫਾਸੁਕਟ੍ਠਾਨਂ ਪਹਾਯ ਅਞ੍ਞਤ੍ਥ ਗਨ੍ਤੁਂ ਸਕ੍ਖਿਸ੍ਸਤਿ. ਸਚੇ ਪਨਸ੍ਸ ਵਿਹਾਰੇ ਦਾਨਂ ਦੇਨ੍ਤਾ ਅਨ੍ਤਰਾਮਗ੍ਗੇ ਵਾ ਆਗਚ੍ਛਨ੍ਤਾ ਮਨੁਸ੍ਸਾ ਪਤ੍ਤਂ ਗਹੇਤ੍ਵਾ ਪਿਣ੍ਡਪਾਤਂ ਦੇਨ੍ਤਿ ਵਟ੍ਟਤਿ. ਇਮਿਨਾ ਚ ਮਗ੍ਗਂ ਗਚ੍ਛਨ੍ਤੇਨਾਪਿ ਭਿਕ੍ਖਾਚਾਰਵੇਲਾਯਂ ਸਮ੍ਪਤ੍ਤਗਾਮਂ ਅਨਤਿਕ੍ਕਮਿਤ੍ਵਾ ਚਰਿਤਬ੍ਬਮੇਵ. ਤਤ੍ਥ ਅਲਭਿਤ੍ਵਾ ਵਾ ਥੋਕਂ ਲਭਿਤ੍ਵਾ ਵਾ ਗਾਮਪਟਿਪਾਟਿਯਾ ਚਰਿਤਬ੍ਬਨ੍ਤਿ ਇਦਮਸ੍ਸ ਵਿਧਾਨਂ.
ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠੋ ਪੁਰਤੋ ਆਹਟਭਿਕ੍ਖਮ੍ਪਿ ਪਚ੍ਛਤੋ ਆਹਟਭਿਕ੍ਖਮ੍ਪਿ ਪਟਿਕ੍ਕਮਨਂ ਆਹਰਿਤ੍ਵਾ ਦਿਯ੍ਯਮਾਨਮ੍ਪਿ ਨ ਗਣ੍ਹਤਿ, ਪਤ੍ਤਦ੍ਵਾਰੇ ਪਨ ਪਤ੍ਤਂ ਵਿਸ੍ਸਜ੍ਜੇਤਿ. ਇਮਸ੍ਮਿਞ੍ਹਿ ਧੁਤਙ੍ਗੇ ਮਹਾਕਸ੍ਸਪਤ੍ਥੇਰੇਨ ਸਦਿਸੋ ਨਾਮ ਨਤ੍ਥਿ. ਤਸ੍ਸਪਿ ਪਤ੍ਤਵਿਸ੍ਸਟ੍ਠਟ੍ਠਾਨਮੇਵ ਪਞ੍ਞਾਯਤਿ. ਮਜ੍ਝਿਮੋ ਪੁਰਤੋ ਵਾ ਪਚ੍ਛਤੋ ਵਾ ਆਹਟਮ੍ਪਿ ਪਟਿਕ੍ਕਮਨਂ ਆਹਟਮ੍ਪਿ ਗਣ੍ਹਤਿ, ਪਤ੍ਤਦ੍ਵਾਰੇਪਿ ਪਤ੍ਤਂ ਵਿਸ੍ਸਜ੍ਜੇਤਿ, ਨ ਪਨ ਭਿਕ੍ਖਂ ਆਗਮਯਮਾਨੋ ਨਿਸੀਦਤਿ. ਏਵਂ ਸੋ ਉਕ੍ਕਟ੍ਠਪਿਣ੍ਡਪਾਤਿਕਸ੍ਸ ਅਨੁਲੋਮੇਤਿ. ਮੁਦੁਕੋ ਤਂ ਦਿਵਸਂ ਨਿਸੀਦਿਤ੍ਵਾ ਆਗਮੇਤਿ.
ਇਮੇਸਂ ਪਨ ਤਿਣ੍ਣਮ੍ਪਿ ਲੋਲੁਪ੍ਪਚਾਰੇ ਉਪ੍ਪਨ੍ਨਮਤ੍ਤੇ ਧੁਤਙ੍ਗਂ ਭਿਜ੍ਜਤਿ. ਅਯਮੇਤ੍ਥ ਭੇਦੋ.
ਅਯਂ ਪਨਾਨਿਸਂਸੋ, ਕੁਲੇਸੁ ਨਿਚ੍ਚਨਵਕਤਾ, ਚਨ੍ਦੂਪਮਤਾ, ਕੁਲਮਚ੍ਛੇਰਪ੍ਪਹਾਨਂ, ਸਮਾਨੁਕਮ੍ਪਿਤਾ, ਕੁਲੂਪਕਾਦੀਨਵਾਭਾਵੋ, ਅਵ੍ਹਾਨਾਨਭਿਨਨ੍ਦਨਾ, ਅਭਿਹਾਰੇਨ ਅਨਤ੍ਥਿਕਤਾ, ਅਪ੍ਪਿਚ੍ਛਤਾਦੀਨਂ ਅਨੁਲੋਮਵੁਤ੍ਤਿਤਾਤਿ.
ਚਨ੍ਦੂਪਮੋ ਨਿਚ੍ਚਨਵੋ ਕੁਲੇਸੁ,
ਅਮਚ੍ਛਰੀ ਸਬ੍ਬਸਮਾਨੁਕਮ੍ਪੋ;
ਕੁਲੂਪਕਾਦੀਨਵਵਿਪ੍ਪਮੁਤ੍ਤੋ,
ਹੋਤੀਧ ਭਿਕ੍ਖੁ ਸਪਦਾਨਚਾਰੀ.
ਲੋਲੁਪ੍ਪਚਾਰਞ੍ਚ ਪਹਾਯ ਤਸ੍ਮਾ,
ਓਕ੍ਖਿਤ੍ਤਚਕ੍ਖੁ ਯੁਗਮਤ੍ਤਦਸ੍ਸੀ;
ਆਕਙ੍ਖਮਾਨੋ ਭੁਵਿ ਸੇਰਿਚਾਰਂ,
ਚਰੇਯ੍ਯ ਧੀਰੋ ਸਪਦਾਨਚਾਰਨ੍ਤਿ.
ਅਯਂ ਸਪਦਾਨਚਾਰਿਕਙ੍ਗੇ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸਵਣ੍ਣਨਾ.
੫. ਏਕਾਸਨਿਕਙ੍ਗਕਥਾ
੨੮. ਏਕਾਸਨਿਕਙ੍ਗਮ੍ਪਿ ‘‘ਨਾਨਾਸਨਭੋਜਨਂ ਪਟਿਕ੍ਖਿਪਾਮਿ, ਏਕਾਸਨਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.
ਤੇਨ ਪਨ ਏਕਾਸਨਿਕੇਨ ਆਸਨਸਾਲਾਯਂ ਨਿਸੀਦਨ੍ਤੇਨ ਥੇਰਾਸਨੇ ਅਨਿਸੀਦਿਤ੍ਵਾ ‘‘ਇਦਂ ਮਯ੍ਹਂ ਪਾਪੁਣਿਸ੍ਸਤੀ’’ਤਿ ਪਤਿਰੂਪਂ ਆਸਨਂ ਸਲ੍ਲਕ੍ਖੇਤ੍ਵਾ ਨਿਸੀਦਿਤਬ੍ਬਂ. ਸਚਸ੍ਸ ਵਿਪ੍ਪਕਤੇ ਭੋਜਨੇ ਆਚਰਿਯੋ ਵਾ ਉਪਜ੍ਝਾਯੋ ਵਾ ਆਗਚ੍ਛਤਿ, ਉਟ੍ਠਾਯ ਵਤ੍ਤਂ ਕਾਤੁਂ ਵਟ੍ਟਤਿ. ਤਿਪਿਟਕਚੂਲ਼ਾਭਯਤ੍ਥੇਰੋ ਪਨਾਹ ‘‘ਆਸਨਂ ਵਾ ਰਕ੍ਖੇਯ੍ਯ ਭੋਜਨਂ ਵਾ, ਅਯਞ੍ਚ ਵਿਪ੍ਪਕਤਭੋਜਨੋ, ਤਸ੍ਮਾ ਵਤ੍ਤਂ ਕਰੋਤੁ, ਭੋਜਨਂ ਪਨ ਮਾ ਭੁਞ੍ਜਤੂ’’ਤਿ. ਇਦਮਸ੍ਸ ਵਿਧਾਨਂ.
ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠੋ ਅਪ੍ਪਂ ਵਾ ਹੋਤੁ ਬਹੁ ਵਾ, ਯਮ੍ਹਿ ਭੋਜਨੇ ਹਤ੍ਥਂ ਓਤਾਰੇਤਿ, ਤਤੋ ਅਞ੍ਞਂ ਗਣ੍ਹਿਤੁਂ ਨ ਲਭਤਿ. ਸਚੇਪਿ ਮਨੁਸ੍ਸਾ ‘‘ਥੇਰੇਨ ਨ ਕਿਞ੍ਚਿ ਭੁਤ੍ਤ’’ਨ੍ਤਿ ਸਪ੍ਪਿਆਦੀਨਿ ਆਹਰਨ੍ਤਿ, ਭੇਸਜ੍ਜਤ੍ਥਮੇਵ ਵਟ੍ਟਨ੍ਤਿ, ਨ ਆਹਾਰਤ੍ਥਂ. ਮਜ੍ਝਿਮੋ ਯਾਵ ਪਤ੍ਤੇ ਭਤ੍ਤਂ ਨ ਖੀਯਤਿ, ਤਾਵ ਅਞ੍ਞਂ ਗਣ੍ਹਿਤੁਂ ਲਭਤਿ. ਅਯਞ੍ਹਿ ਭੋਜਨਪਰਿਯਨ੍ਤਿਕੋ ਨਾਮ ਹੋਤਿ. ਮੁਦੁਕੋ ਯਾਵ ਆਸਨਾ ਨ ਵੁਟ੍ਠਾਤਿ ਤਾਵ ਭੁਞ੍ਜਿਤੁਂ ਲਭਤਿ. ਸੋ ਹਿ ਉਦਕਪਰਿਯਨ੍ਤਿਕੋ ਵਾ ਹੋਤਿ ਯਾਵ ਪਤ੍ਤਧੋਵਨਂ ਨ ਗਣ੍ਹਾਤਿ ਤਾਵ ਭੁਞ੍ਜਨਤੋ, ਆਸਨਪਰਿਯਨ੍ਤਿਕੋ ਵਾ ਯਾਵ ਨ ਵੁਟ੍ਠਾਤਿ ਤਾਵ ਭੁਞ੍ਜਨਤੋ.
ਇਮੇਸਂ ਪਨ ਤਿਣ੍ਣਮ੍ਪਿ ਨਾਨਾਸਨਭੋਜਨਂ ਭੁਤ੍ਤਕ੍ਖਣੇ ਧੁਤਙ੍ਗਂ ਭਿਜ੍ਜਤਿ. ਅਯਮੇਤ੍ਥ ਭੇਦੋ.
ਅਯਂ ਪਨਾਨਿਸਂਸੋ, ਅਪ੍ਪਾਬਾਧਤਾ, ਅਪ੍ਪਾਤਙ੍ਕਤਾ, ਲਹੁਟ੍ਠਾਨਂ, ਬਲਂ, ਫਾਸੁਵਿਹਾਰੋ, ਅਨਤਿਰਿਤ੍ਤਪਚ੍ਚਯਾ ਅਨਾਪਤ੍ਤਿ, ਰਸਤਣ੍ਹਾਵਿਨੋਦਨਂ ਅਪ੍ਪਿਚ੍ਛਤਾਦੀਨਂ ਅਨੁਲੋਮਵੁਤ੍ਤਿਤਾਤਿ.
ਏਕਾਸਨਭੋਜਨੇ ਰਤਂ,
ਨ ਯਤਿਂ ਭੋਜਨਪਚ੍ਚਯਾ ਰੁਜਾ;
ਵਿਸਹਨ੍ਤਿ ਰਸੇ ਅਲੋਲੁਪੋ,
ਪਰਿਹਾਪੇਤਿ ਨ ਕਮ੍ਮਮਤ੍ਤਨੋ.
ਇਤਿ ਫਾਸੁਵਿਹਾਰਕਾਰਣੇ,
ਸੁਚਿਸਲ੍ਲੇਖਰਤੂਪਸੇਵਿਤੇ;
ਜਨਯੇਥ ਵਿਸੁਦ੍ਧਮਾਨਸੋ,
ਰਤਿਮੇਕਾਸਨਭੋਜਨੇ ਯਤੀਤਿ.
ਅਯਂ ਏਕਾਸਨਿਕਙ੍ਗੇ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸਵਣ੍ਣਨਾ.
੬. ਪਤ੍ਤਪਿਣ੍ਡਿਕਙ੍ਗਕਥਾ
੨੯. ਪਤ੍ਤਪਿਣ੍ਡਿਕਙ੍ਗਮ੍ਪਿ ‘‘ਦੁਤਿਯਕਭਾਜਨਂ ਪਟਿਕ੍ਖਿਪਾਮਿ, ਪਤ੍ਤਪਿਣ੍ਡਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.
ਤੇਨ ਪਨ ਪਤ੍ਤਪਿਣ੍ਡਿਕੇਨ ਯਾਗੁਪਾਨਕਾਲੇ ਭਾਜਨੇ ਠਪੇਤ੍ਵਾ ਬ੍ਯਞ੍ਜਨੇ ਲਦ੍ਧੇ ਬ੍ਯਞ੍ਜਨਂ ਵਾ ਪਠਮਂ ਖਾਦਿਤਬ੍ਬਂ, ਯਾਗੁ ਵਾ ਪਾਤਬ੍ਬਾ. ਸਚੇ ਪਨ ਯਾਗੁਯਂ ਪਕ੍ਖਿਪਤਿ, ਪੂਤਿਮਚ੍ਛਕਾਦਿਮ੍ਹਿ ਬ੍ਯਞ੍ਜਨੇ ਪਕ੍ਖਿਤ੍ਤੇ ਯਾਗੁ ਪਟਿਕੂਲਾ ਹੋਤਿ, ਅਪ੍ਪਟਿਕੂਲਮੇਵ ਚ ਕਤ੍ਵਾ ਭੁਞ੍ਜਿਤੁਂ ਵਟ੍ਟਤਿ. ਤਸ੍ਮਾ ਤਥਾਰੂਪਂ ਬ੍ਯਞ੍ਜਨਂ ਸਨ੍ਧਾਯ ਇਦਂ ਵੁਤ੍ਤਂ. ਯਂ ਪਨ ਮਧੁਸਕ੍ਕਰਾਦਿਕਂ ਅਪ੍ਪਟਿਕੂਲਂ ਹੋਤਿ, ਤਂ ਪਕ੍ਖਿਪਿਤਬ੍ਬਂ. ਗਣ੍ਹਨ੍ਤੇਨ ਚ ਪਮਾਣਯੁਤ੍ਤਮੇਵ ਗਣ੍ਹਿਤਬ੍ਬਂ. ਆਮਕਸਾਕਂ ਹਤ੍ਥੇਨ ਗਹੇਤ੍ਵਾ ਖਾਦਿਤੁਂ ਵਟ੍ਟਤਿ. ਤਥਾ ਪਨ ਅਕਤ੍ਵਾ ਪਤ੍ਤੇਯੇਵ ਪਕ੍ਖਿਪਿਤਬ੍ਬਂ. ਦੁਤਿਯਕਭਾਜਨਸ੍ਸ ਪਨ ਪਟਿਕ੍ਖਿਤ੍ਤਤ੍ਤਾ ਅਞ੍ਞਂ ਰੁਕ੍ਖਪਣ੍ਣਮ੍ਪਿ ਨ ਵਟ੍ਟਤੀਤਿ ਇਦਮਸ੍ਸ ਵਿਧਾਨਂ.
ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠਸ੍ਸ ਅਞ੍ਞਤ੍ਰ ਉਚ੍ਛੁਖਾਦਨਕਾਲਾ ਕਚਵਰਮ੍ਪਿ ਛਡ੍ਡੇਤੁਂ ਨ ਵਟ੍ਟਤਿ. ਓਦਨਪਿਣ੍ਡਮਚ੍ਛਮਂਸਪੂਵੇਪਿ ਭਿਨ੍ਦਿਤ੍ਵਾ ਖਾਦਿਤੁਂ ਨ ਵਟ੍ਟਤਿ. ਮਜ੍ਝਿਮਸ੍ਸ ਏਕੇਨ ਹਤ੍ਥੇਨ ਭਿਨ੍ਦਿਤ੍ਵਾ ਖਾਦਿਤੁਂ ਵਟ੍ਟਤਿ, ਹਤ੍ਥਯੋਗੀ ਨਾਮੇਸ. ਮੁਦੁਕੋ ਪਨ ਪਤ੍ਤਯੋਗੀ ਨਾਮ ਹੋਤਿ, ਤਸ੍ਸ ਯਂ ਸਕ੍ਕਾ ਹੋਤਿ ਪਤ੍ਤੇ ਪਕ੍ਖਿਪਿਤੁਂ, ਤਂ ਸਬ੍ਬਂ ਹਤ੍ਥੇਨ ਵਾ ਦਨ੍ਤੇਹਿ ਵਾ ਭਿਨ੍ਦਿਤ੍ਵਾ ਖਾਦਿਤੁਂ ਵਟ੍ਟਤਿ.
ਇਮੇਸਂ ਪਨ ਤਿਣ੍ਣਮ੍ਪਿ ਦੁਤਿਯਕਭਾਜਨਂ ਸਾਦਿਤਕ੍ਖਣੇ ਧੁਤਙ੍ਗਂ ਭਿਜ੍ਜਤਿ. ਅਯਮੇਤ੍ਥ ਭੇਦੋ.
ਅਯਂ ਪਨਾਨਿਸਂਸੋ, ਨਾਨਾਰਸਤਣ੍ਹਾਵਿਨੋਦਨਂ. ਅਤ੍ਰਿਚ੍ਛਤਾਯ ਪਹਾਨਂ, ਆਹਾਰੇ ਪਯੋਜਨਮਤ੍ਤਦਸ੍ਸਿਤਾ, ਥਾਲਕਾਦਿਪਰਿਹਰਣਖੇਦਾਭਾਵੋ, ਅਵਿਕ੍ਖਿਤ੍ਤਭੋਜਿਤਾ, ਅਪ੍ਪਿਚ੍ਛਤਾਦੀਨਂ ਅਨੁਲੋਮਵੁਤ੍ਤਿਤਾਤਿ.
ਨਾਨਾਭਾਜਨਵਿਕ੍ਖੇਪਂ, ਹਿਤ੍ਵਾ ਓਕ੍ਖਿਤ੍ਤਲੋਚਨੋ;
ਖਣਨ੍ਤੋ ਵਿਯ ਮੂਲਾਨਿ, ਰਸਤਣ੍ਹਾਯ ਸੁਬ੍ਬਤੋ.
ਸਰੂਪਂ ਵਿਯ ਸਨ੍ਤੁਟ੍ਠਿਂ, ਧਾਰਯਨ੍ਤੋ ਸੁਮਾਨਸੋ;
ਪਰਿਭੁਞ੍ਜੇਯ੍ਯ ਆਹਾਰਂ, ਕੋ ਅਞ੍ਞੋ ਪਤ੍ਤਪਿਣ੍ਡਿਕੋਤਿ.
ਅਯਂ ਪਤ੍ਤਪਿਣ੍ਡਿਕਙ੍ਗੇ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸਵਣ੍ਣਨਾ.
੭. ਖਲੁਪਚ੍ਛਾਭਤ੍ਤਿਕਙ੍ਗਕਥਾ
੩੦. ਖਲੁਪਚ੍ਛਾਭਤ੍ਤਿਕਙ੍ਗਮ੍ਪਿ ‘‘ਅਤਿਰਿਤ੍ਤਭੋਜਨਂ ਪਟਿਕ੍ਖਿਪਾਮਿ, ਖਲੁਪਚ੍ਛਾਭਤ੍ਤਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.
ਤੇਨ ਪਨ ਖਲੁਪਚ੍ਛਾਭਤ੍ਤਿਕੇਨ ਪਵਾਰੇਤ੍ਵਾ ਪੁਨ ਭੋਜਨਂ ਕਪ੍ਪਿਯਂ ਕਾਰੇਤ੍ਵਾ ਨ ਭੁਞ੍ਜਿਤਬ੍ਬਂ. ਇਦਮਸ੍ਸ ਵਿਧਾਨਂ.
ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠੋ ਯਸ੍ਮਾ ਪਠਮਪਿਣ੍ਡੇ ਪਵਾਰਣਾ ਨਾਮ ਨਤ੍ਥਿ, ਤਸ੍ਮਿਂ ਪਨ ਅਜ੍ਝੋਹਰਿਯਮਾਨੇ ਅਞ੍ਞਂ ਪਟਿਕ੍ਖਿਪਤੋ ਹੋਤਿ, ਤਸ੍ਮਾ ਏਵਂ ਪਵਾਰਿਤੋ ਪਠਮਪਿਣ੍ਡਂ ਅਜ੍ਝੋਹਰਿਤ੍ਵਾ ਦੁਤਿਯਪਿਣ੍ਡਂ ਨ ਭੁਞ੍ਜਤਿ. ਮਜ੍ਝਿਮੋ ਯਸ੍ਮਿਂ ਭੋਜਨੇ ਪਵਾਰਿਤੋ, ਤਦੇਵ ਭੁਞ੍ਜਤਿ. ਮੁਦੁਕੋ ਪਨ ਯਾਵ ਆਸਨਾ ਨ ਵੁਟ੍ਠਾਤਿ ਤਾਵ ਭੁਞ੍ਜਤਿ.
ਇਮੇਸਂ ਪਨ ਤਿਣ੍ਣਮ੍ਪਿ ਪਵਾਰਿਤਾਨਂ ਕਪ੍ਪਿਯਂ ਕਾਰਾਪੇਤ੍ਵਾ ਭੁਤ੍ਤਕ੍ਖਣੇ ਧੁਤਙ੍ਗਂ ਭਿਜ੍ਜਤਿ. ਅਯਮੇਤ੍ਥ ਭੇਦੋ.
ਅਯਂ ਪਨਾਨਿਸਂਸੋ, ਅਨਤਿਰਿਤ੍ਤਭੋਜਨਾਪਤ੍ਤਿਯਾ ਦੂਰਭਾਵੋ, ਓਦਰਿਕਤ੍ਤਾਭਾਵੋ, ਨਿਰਾਮਿਸਸਨ੍ਨਿਧਿਤਾ, ਪੁਨ ਪਰਿਯੇਸਨਾਯ ਅਭਾਵੋ, ਅਪ੍ਪਿਚ੍ਛਤਾਦੀਨਂ ਅਨੁਲੋਮਵੁਤ੍ਤਿਤਾਤਿ.
ਪਰਿਯੇਸਨਾਯ ਖੇਦਂ, ਨ ਯਾਤਿ ਨ ਕਰੋਤਿ ਸਨ੍ਨਿਧਿਂ ਧੀਰੋ;
ਓਦਰਿਕਤ੍ਤਂ ਪਜਹਤਿ, ਖਲੁਪਚ੍ਛਾਭਤ੍ਤਿਕੋ ਯੋਗੀ.
ਤਸ੍ਮਾ ਸੁਗਤਪਸਤ੍ਥਂ, ਸਨ੍ਤੋਸਗੁਣਾਦਿਵੁਡ੍ਢਿਸਞ੍ਜਨਨਂ;
ਦੋਸੇ ਵਿਧੁਨਿਤੁਕਾਮੋ, ਭਜੇਯ੍ਯ ਯੋਗੀ ਧੁਤਙ੍ਗਮਿਦਨ੍ਤਿ.
ਅਯਂ ਖਲੁਪਚ੍ਛਾਭਤ੍ਤਿਕਙ੍ਗੇ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸਵਣ੍ਣਨਾ.
੮. ਆਰਞ੍ਞਿਕਙ੍ਗਕਥਾ
੩੧. ਆਰਞ੍ਞਿਕਙ੍ਗਮ੍ਪਿ ‘‘ਗਾਮਨ੍ਤਸੇਨਾਸਨਂ ਪਟਿਕ੍ਖਿਪਾਮਿ, ਆਰਞ੍ਞਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.
ਤੇਨ ਪਨ ਆਰਞ੍ਞਿਕੇਨ ਗਾਮਨ੍ਤਸੇਨਾਸਨਂ ਪਹਾਯ ਅਰਞ੍ਞੇ ਅਰੁਣਂ ਉਟ੍ਠਾਪੇਤਬ੍ਬਂ. ਤਤ੍ਥ ਸਦ੍ਧਿਂ ਉਪਚਾਰੇਨ ਗਾਮੋਯੇਵ ਗਾਮਨ੍ਤਸੇਨਾਸਨਂ.
ਗਾਮੋ ਨਾਮ ਯੋ ਕੋਚਿ ਏਕਕੁਟਿਕੋ ਵਾ ਅਨੇਕਕੁਟਿਕੋ ਵਾ ਪਰਿਕ੍ਖਿਤ੍ਤੋ ਵਾ ਅਪਰਿਕ੍ਖਿਤ੍ਤੋ ਵਾ ਸਮਨੁਸ੍ਸੋ ਵਾ ਅਮਨੁਸ੍ਸੋ ਵਾ ਅਨ੍ਤਮਸੋ ਅਤਿਰੇਕਚਾਤੁਮਾਸਨਿਵਿਟ੍ਠੋ ਯੋ ਕੋਚਿ ਸਤ੍ਥੋਪਿ.
ਗਾਮੂਪਚਾਰੋ ਨਾਮ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਸਚੇ ਅਨੁਰਾਧਪੁਰਸ੍ਸੇਵ ਦ੍ਵੇ ਇਨ੍ਦਖੀਲਾ ਹੋਨ੍ਤਿ, ਅਬ੍ਭਨ੍ਤਰਿਮੇ ਇਨ੍ਦਖੀਲੇ ਠਿਤਸ੍ਸ ਥਾਮਮਜ੍ਝਿਮਸ੍ਸ ਪੁਰਿਸਸ੍ਸ ਲੇਡ੍ਡੁਪਾਤੋ. ਤਸ੍ਸ ਲਕ੍ਖਣਂ ਯਥਾ ਤਰੁਣਮਨੁਸ੍ਸਾ ਅਤ੍ਤਨੋ ਬਲਂ ਦਸ੍ਸੇਨ੍ਤਾ ਬਾਹਂ ਪਸਾਰੇਤ੍ਵਾ ਲੇਡ੍ਡੁਂ ਖਿਪਨ੍ਤਿ, ਏਵਂ ਖਿਤ੍ਤਸ੍ਸ ਲੇਡ੍ਡੁਸ੍ਸ ਪਤਨਟ੍ਠਾਨਬ੍ਭਨ੍ਤਰਨ੍ਤਿ ਵਿਨਯਧਰਾ. ਸੁਤ੍ਤਨ੍ਤਿਕਾ ਪਨ ਕਾਕਨਿਵਾਰਣਨਿਯਮੇਨ ਖਿਤ੍ਤਸ੍ਸਾਤਿ ਵਦਨ੍ਤਿ. ਅਪਰਿਕ੍ਖਿਤ੍ਤਗਾਮੇ ਯਂ ਸਬ੍ਬਪਚ੍ਚਨ੍ਤਿਮਸ੍ਸ ਘਰਸ੍ਸ ਦ੍ਵਾਰੇ ਠਿਤੋ ਮਾਤੁਗਾਮੋ ਭਾਜਨੇਨ ਉਦਕਂ ਛਡ੍ਡੇਤਿ, ਤਸ੍ਸ ਪਤਨਟ੍ਠਾਨਂ ਘਰੂਪਚਾਰੋ. ਤਤੋ ਵੁਤ੍ਤਨਯੇਨ ਏਕੋ ਲੇਡ੍ਡੁਪਾਤੋ ਗਾਮੋ, ਦੁਤਿਯੋ ਗਾਮੂਪਚਾਰੋ.
ਅਰਞ੍ਞਂ ਪਨ ਵਿਨਯਪਰਿਯਾਯੇ ਤਾਵ ‘‘ਠਪੇਤ੍ਵਾ ਗਾਮਞ੍ਚ ਗਾਮੂਪਚਾਰਞ੍ਚ ਸਬ੍ਬਮੇਤਂ ਅਰਞ੍ਞ’’ਨ੍ਤਿ (ਪਾਰਾ. ੯੨) ਵੁਤ੍ਤਂ. ਅਭਿਧਮ੍ਮਪਰਿਯਾਯੇ ‘‘ਨਿਕ੍ਖਮਿਤ੍ਵਾ ਬਹਿ ਇਨ੍ਦਖੀਲਾ, ਸਬ੍ਬਮੇਤਂ ਅਰਞ੍ਞ’’ਨ੍ਤਿ (ਵਿਭ. ੫੨੯) ਵੁਤ੍ਤਂ. ਇਮਸ੍ਮਿਂ ਪਨ ਸੁਤ੍ਤਨ੍ਤਿਕਪਰਿਯਾਯੇ ‘‘ਆਰਞ੍ਞਕਂ ਨਾਮ ਸੇਨਾਸਨਂ ਪਞ੍ਚਧਨੁਸਤਿਕਂ ਪਚ੍ਛਿਮ’’ਨ੍ਤਿ ਇਦਂ ਲਕ੍ਖਣਂ. ਤਂ ਆਰੋਪਿਤੇਨ ਆਚਰਿਯਧਨੁਨਾ ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਇਨ੍ਦਖੀਲਤੋ ਅਪਰਿਕ੍ਖਿਤ੍ਤਸ੍ਸ ਪਠਮਲੇਡ੍ਡੁਪਾਤਤੋ ਪਟ੍ਠਾਯ ਯਾਵ ਵਿਹਾਰਪਰਿਕ੍ਖੇਪਾ ਮਿਨਿਤ੍ਵਾ ਵਵਤ੍ਥਪੇਤਬ੍ਬਂ.
ਸਚੇ ਪਨ ਵਿਹਾਰੋ ਅਪਰਿਕ੍ਖਿਤ੍ਤੋ ਹੋਤਿ, ਯਂ ਸਬ੍ਬਪਠਮਂ ਸੇਨਾਸਨਂ ਵਾ ਭਤ੍ਤਸਾਲਾ ਵਾ ਧੁਵਸਨ੍ਨਿਪਾਤਟ੍ਠਾਨਂ ਵਾ ਬੋਧਿ ਵਾ ਚੇਤਿਯਂ ਵਾ ਦੂਰੇ ਚੇਪਿ ਸੇਨਾਸਨਤੋ ਹੋਤਿ, ਤਂ ਪਰਿਚ੍ਛੇਦਂ ਕਤ੍ਵਾ ਮਿਨਿਤਬ੍ਬਨ੍ਤਿ ਵਿਨਯਟ੍ਠਕਥਾਸੁ ਵੁਤ੍ਤਂ. ਮਜ੍ਝਿਮਟ੍ਠਕਥਾਯਂ ਪਨ ਵਿਹਾਰਸ੍ਸਪਿ ਗਾਮਸ੍ਸੇਵ ਉਪਚਾਰਂ ਨੀਹਰਿਤ੍ਵਾ ਉਭਿਨ੍ਨਂ ਲੇਡ੍ਡੁਪਾਤਾਨਂ ਅਨ੍ਤਰਾ ਮਿਨਿਤਬ੍ਬਨ੍ਤਿ ਵੁਤ੍ਤਂ. ਇਦਮੇਤ੍ਥ ਪਮਾਣਂ.
ਸਚੇਪਿ ਆਸਨ੍ਨੇ ਗਾਮੋ ਹੋਤਿ, ਵਿਹਾਰੇ ਠਿਤੇਹਿ ਮਾਨੁਸਕਾਨਂ ਸਦ੍ਦੋ ਸੁਯ੍ਯਤਿ, ਪਬ੍ਬਤਨਦੀਆਦੀਹਿ ਪਨ ਅਨ੍ਤਰਿਤਤ੍ਤਾ ਨ ਸਕ੍ਕਾ ਉਜੁਂ ਗਨ੍ਤੁਂ. ਯੋ ਤਸ੍ਸ ਪਕਤਿਮਗ੍ਗੋ ਹੋਤਿ, ਸਚੇਪਿ ਨਾਵਾਯ ਸਞ੍ਚਰਿਤਬ੍ਬੋ, ਤੇਨ ਮਗ੍ਗੇਨ ਪਞ੍ਚਧਨੁਸਤਿਕਂ ਗਹੇਤਬ੍ਬਂ. ਯੋ ਪਨ ਆਸਨ੍ਨਗਾਮਸ੍ਸ ਅਙ੍ਗਸਮ੍ਪਾਦਨਤ੍ਥਂ ਤਤੋ ਤਤੋ ਮਗ੍ਗਂ ਪਿਦਹਤਿ, ਅਯਂ ਧੁਤਙ੍ਗਚੋਰੋ ਹੋਤਿ.
ਸਚੇ ਪਨ ਆਰਞ੍ਞਿਕਸ੍ਸ ਭਿਕ੍ਖੁਨੋ ਉਪਜ੍ਝਾਯੋ ਵਾ ਆਚਰਿਯੋ ਵਾ ਗਿਲਾਨੋ ਹੋਤਿ, ਤੇਨ ਅਰਞ੍ਞੇ ਸਪ੍ਪਾਯਂ ਅਲਭਨ੍ਤੇਨ ਗਾਮਨ੍ਤਸੇਨਾਸਨਂ ਨੇਤ੍ਵਾ ਉਪਟ੍ਠਾਤਬ੍ਬੋ. ਕਾਲਸ੍ਸੇਵ ਪਨ ਨਿਕ੍ਖਮਿਤ੍ਵਾ ਅਙ੍ਗਯੁਤ੍ਤਟ੍ਠਾਨੇ ਅਰੁਣਂ ਉਟ੍ਠਾਪੇਤਬ੍ਬਂ. ਸਚੇ ਅਰੁਣੁਟ੍ਠਾਨਵੇਲਾਯਂ ਤੇਸਂ ਆਬਾਧੋ ਵਡ੍ਢਤਿ, ਤੇਸਂਯੇਵ ਕਿਚ੍ਚਂ ਕਾਤਬ੍ਬਂ. ਨ ਧੁਤਙ੍ਗਸੁਦ੍ਧਿਕੇਨ ਭਵਿਤਬ੍ਬਨ੍ਤਿ ਇਦਮਸ੍ਸ ਵਿਧਾਨਂ.
ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠੇਨ ਸਬ੍ਬਕਾਲਂ ਅਰਞ੍ਞੇ ਅਰੁਣਂ ਉਟ੍ਠਾਪੇਤਬ੍ਬਂ. ਮਜ੍ਝਿਮੋ ਚਤ੍ਤਾਰੋ ਵਸ੍ਸਿਕੇ ਮਾਸੇ ਗਾਮਨ੍ਤੇ ਵਸਿਤੁਂ ਲਭਤਿ. ਮੁਦੁਕੋ ਹੇਮਨ੍ਤਿਕੇਪਿ.
ਇਮੇਸਂ ਪਨ ਤਿਣ੍ਣਮ੍ਪਿ ਯਥਾ ਪਰਿਚ੍ਛਿਨ੍ਨੇ ਕਾਲੇ ਅਰਞ੍ਞਤੋ ਆਗਨ੍ਤ੍ਵਾ ਗਾਮਨ੍ਤਸੇਨਾਸਨੇ ਧਮ੍ਮਸ੍ਸਵਨਂ ਸੁਣਨ੍ਤਾਨਂ ਅਰੁਣੇ ਉਟ੍ਠਿਤੇਪਿ ਧੁਤਙ੍ਗਂ ਨ ਭਿਜ੍ਜਤਿ. ਸੁਤ੍ਵਾ ਗਚ੍ਛਨ੍ਤਾਨਂ ਅਨ੍ਤਰਾਮਗ੍ਗੇ ਉਟ੍ਠਿਤੇਪਿ ਨ ਭਿਜ੍ਜਤਿ. ਸਚੇ ਪਨ ਉਟ੍ਠਿਤੇਪਿ ਧਮ੍ਮਕਥਿਕੇ ਮੁਹੁਤ੍ਤਂ ਨਿਪਜ੍ਜਿਤ੍ਵਾ ਗਮਿਸ੍ਸਾਮਾਤਿ ਨਿਦ੍ਦਾਯਨ੍ਤਾਨਂ ਅਰੁਣਂ ਉਟ੍ਠਹਤਿ, ਅਤ੍ਤਨੋ ਵਾ ਰੁਚਿਯਾ ਗਾਮਨ੍ਤਸੇਨਾਸਨੇ ਅਰੁਣਂ ਉਟ੍ਠਪੇਨ੍ਤਿ, ਧੁਤਙ੍ਗਂ ਭਿਜ੍ਜਤੀਤਿ ਅਯਮੇਤ੍ਥ ਭੇਦੋ.
ਅਯਂ ਪਨਾਨਿਸਂਸੋ, ਆਰਞ੍ਞਿਕੋ ਭਿਕ੍ਖੁ ਅਰਞ੍ਞਸਞ੍ਞਂ ਮਨਸਿਕਰੋਨ੍ਤੋ ਭਬ੍ਬੋ ਅਲਦ੍ਧਂ ਵਾ ਸਮਾਧਿਂ ਪਟਿਲਦ੍ਧੁਂ ਲਦ੍ਧਂ ਵਾ ਰਕ੍ਖਿਤੁਂ, ਸਤ੍ਥਾਪਿਸ੍ਸ ਅਤ੍ਤਮਨੋ ਹੋਤਿ. ਯਥਾਹ – ‘‘ਤੇਨਾਹਂ, ਨਾਗਿਤ, ਤਸ੍ਸ ਭਿਕ੍ਖੁਨੋ ਅਤ੍ਤਮਨੋ ਹੋਮਿ ਅਰਞ੍ਞਵਿਹਾਰੇਨਾ’’ਤਿ (ਅ. ਨਿ. ੬.੪੨; ੮.੮੬). ਪਨ੍ਤਸੇਨਾਸਨਵਾਸਿਨੋ ਚਸ੍ਸ ਅਸਪ੍ਪਾਯਰੂਪਾਦਯੋ ਚਿਤ੍ਤਂ ਨ ਵਿਕ੍ਖਿਪਨ੍ਤਿ, ਵਿਗਤਸਨ੍ਤਾਸੋ ਹੋਤਿ, ਜੀਵਿਤਨਿਕਨ੍ਤਿਂ ਜਹਤਿ, ਪਵਿਵੇਕਸੁਖਰਸਂ ਅਸ੍ਸਾਦੇਤਿ, ਪਂਸੁਕੂਲਿਕਾਦਿਭਾਵੋਪਿ ਚਸ੍ਸ ਪਤਿਰੂਪੋ ਹੋਤੀਤਿ.
ਪਵਿਵਿਤ੍ਤੋ ਅਸਂਸਟ੍ਠੋ, ਪਨ੍ਤਸੇਨਾਸਨੇ ਰਤੋ;
ਆਰਾਧਯਨ੍ਤੋ ਨਾਥਸ੍ਸ, ਵਨਵਾਸੇਨ ਮਾਨਸਂ.
ਏਕੋ ਅਰਞ੍ਞੇ ਨਿਵਸਂ, ਯਂ ਸੁਖਂ ਲਭਤੇ ਯਤਿ;
ਰਸਂ ਤਸ੍ਸ ਨ ਵਿਨ੍ਦਨ੍ਤਿ, ਅਪਿ ਦੇਵਾ ਸਇਨ੍ਦਕਾ.
ਪਂਸੁਕੂਲਞ੍ਚ ਏਸੋਵ, ਕਵਚਂ ਵਿਯ ਧਾਰਯਂ;
ਅਰਞ੍ਞਸਙ੍ਗਾਮਗਤੋ, ਅਵਸੇਸਧੁਤਾਯੁਧੋ.
ਸਮਤ੍ਥੋ ਨਚਿਰਸ੍ਸੇਵ, ਜੇਤੁਂ ਮਾਰਂ ਸਵਾਹਿਨਿਂ;
ਤਸ੍ਮਾ ਅਰਞ੍ਞਵਾਸਮ੍ਹਿ, ਰਤਿਂ ਕਯਿਰਾਥ ਪਣ੍ਡਿਤੋਤਿ.
ਅਯਂ ਆਰਞ੍ਞਿਕਙ੍ਗੇ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸਵਣ੍ਣਨਾ.
੯. ਰੁਕ੍ਖਮੂਲਿਕਙ੍ਗਕਥਾ
੩੨. ਰੁਕ੍ਖਮੂਲਿਕਙ੍ਗਮ੍ਪਿ ‘‘ਛਨ੍ਨਂ ਪਟਿਕ੍ਖਿਪਾਮਿ, ਰੁਕ੍ਖਮੂਲਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.
ਤੇਨ ਪਨ ਰੁਕ੍ਖਮੂਲਿਕੇਨ ਸੀਮਨ੍ਤਰਿਕਰੁਕ੍ਖਂ, ਚੇਤਿਯਰੁਕ੍ਖਂ, ਨਿਯ੍ਯਾਸਰੁਕ੍ਖਂ, ਫਲਰੁਕ੍ਖਂ, ਵਗ੍ਗੁਲਿਰੁਕ੍ਖਂ, ਸੁਸਿਰਰੁਕ੍ਖਂ, ਵਿਹਾਰਮਜ੍ਝੇ ਠਿਤਰੁਕ੍ਖਨ੍ਤਿ ਇਮੇ ਰੁਕ੍ਖੇ ਵਿਵਜ੍ਜੇਤ੍ਵਾ ਵਿਹਾਰਪਚ੍ਚਨ੍ਤੇ ਠਿਤਰੁਕ੍ਖੋ ਗਹੇਤਬ੍ਬੋਤਿ ਇਦਮਸ੍ਸ ਵਿਧਾਨਂ.
ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠੋ ਯਥਾਰੁਚਿਤਂ ਰੁਕ੍ਖਂ ਗਹੇਤ੍ਵਾ ਪਟਿਜਗ੍ਗਾਪੇਤੁਂ ਨ ਲਭਤਿ. ਪਾਦੇਨ ਪਣ੍ਣਸਟਂ ਅਪਨੇਤ੍ਵਾ ਵਸਿਤਬ੍ਬਂ. ਮਜ੍ਝਿਮੋ ਤਂ ਠਾਨਂ ਸਮ੍ਪਤ੍ਤੇਹਿਯੇਵ ਪਟਿਜਗ੍ਗਾਪੇਤੁਂ ਲਭਤਿ. ਮੁਦੁਕੇਨ ਆਰਾਮਿਕਸਮਣੁਦ੍ਦੇਸੇ ਪਕ੍ਕੋਸਿਤ੍ਵਾ ਸੋਧਾਪੇਤ੍ਵਾ ਸਮਂ ਕਾਰਾਪੇਤ੍ਵਾ ਵਾਲੁਕਂ ਓਕਿਰਾਪੇਤ੍ਵਾ ਪਾਕਾਰਪਰਿਕ੍ਖੇਪਂ ਕਾਰਾਪੇਤ੍ਵਾ ਦ੍ਵਾਰਂ ਯੋਜਾਪੇਤ੍ਵਾ ਵਸਿਤਬ੍ਬਂ. ਮਹਦਿਵਸੇ ਪਨ ਰੁਕ੍ਖਮੂਲਿਕੇਨ ਤਤ੍ਥ ਅਨਿਸੀਦਿਤ੍ਵਾ ਅਞ੍ਞਤ੍ਥ ਪਟਿਚ੍ਛਨ੍ਨੇ ਠਾਨੇ ਨਿਸੀਦਿਤਬ੍ਬਂ.
ਇਮੇਸਂ ਪਨ ਤਿਣ੍ਣਮ੍ਪਿ ਛਨ੍ਨੇ ਵਾਸਂ ਕਪ੍ਪਿਤਕ੍ਖਣੇ ਧੁਤਙ੍ਗਂ ਭਿਜ੍ਜਤਿ. ਜਾਨਿਤ੍ਵਾ ਛਨ੍ਨੇ ਅਰੁਣਂ ਉਟ੍ਠਾਪਿਤਮਤ੍ਤੇਤਿ ਅਙ੍ਗੁਤ੍ਤਰਭਾਣਕਾ. ਅਯਮੇਤ੍ਥ ਭੇਦੋ.
ਅਯਂ ਪਨਾਨਿਸਂਸੋ, ਰੁਕ੍ਖਮੂਲਸੇਨਾਸਨਂ ਨਿਸ੍ਸਾਯ ਪਬ੍ਬਜ੍ਜਾਤਿ (ਮਹਾਵ. ੧੨੮) ਵਚਨਤੋ ਨਿਸ੍ਸਯਾਨੁਰੂਪਪਟਿਪਤ੍ਤਿਸਬ੍ਭਾਵੋ, ਅਪ੍ਪਾਨਿ ਚੇਵ ਸੁਲਭਾਨਿ ਚ ਤਾਨਿ ਚ ਅਨਵਜ੍ਜਾਨੀਤਿ (ਅ. ਨਿ. ੪.੨੭; ਇਤਿਵੁ. ੧੦੧) ਭਗਵਤਾ ਸਂਵਣ੍ਣਿਤਪਚ੍ਚਯਤਾ, ਅਭਿਣ੍ਹਂ ਤਰੁਪਣ੍ਣਵਿਕਾਰਦਸ੍ਸਨੇਨ ਅਨਿਚ੍ਚਸਞ੍ਞਾਸਮੁਟ੍ਠਾਪਨਤਾ, ਸੇਨਾਸਨਮਚ੍ਛੇਰਕਮ੍ਮਾਰਾਮਤਾਨਂ ਅਭਾਵੋ, ਦੇਵਤਾਹਿ ਸਹਵਾਸਿਤਾ, ਅਪ੍ਪਿਚ੍ਛਤਾਦੀਨਂ ਅਨੁਲੋਮਵੁਤ੍ਤਿਤਾਤਿ.
ਵਣ੍ਣਿਤੋ ਬੁਦ੍ਧਸੇਟ੍ਠੇਨ, ਨਿਸ੍ਸਯੋਤਿ ਚ ਭਾਸਿਤੋ;
ਨਿਵਾਸੋ ਪਵਿਵਿਤ੍ਤਸ੍ਸ, ਰੁਕ੍ਖਮੂਲਸਮੋ ਕੁਤੋ.
ਆਵਾਸਮਚ੍ਛੇਰਹਰੇ, ਦੇਵਤਾ ਪਰਿਪਾਲਿਤੇ;
ਪਵਿਵਿਤ੍ਤੇ ਵਸਨ੍ਤੋ ਹਿ, ਰੁਕ੍ਖਮੂਲਮ੍ਹਿ ਸੁਬ੍ਬਤੋ.
ਅਭਿਰਤ੍ਤਾਨਿ ਨੀਲਾਨਿ, ਪਣ੍ਡੂਨਿ ਪਤਿਤਾਨਿ ਚ;
ਪਸ੍ਸਨ੍ਤੋ ਤਰੁਪਣ੍ਣਾਨਿ, ਨਿਚ੍ਚਸਞ੍ਞਂ ਪਨੂਦਤਿ.