੩. ਕਮ੍ਮਟ੍ਠਾਨਗ੍ਗਹਣਨਿਦ੍ਦੇਸੋ
੩੮. ਇਦਾਨਿ ਯਸ੍ਮਾ ਏਵਂ ਧੁਤਙ੍ਗਪਰਿਹਰਣਸਮ੍ਪਾਦਿਤੇਹਿ ਅਪ੍ਪਿਚ੍ਛਤਾਦੀਹਿ ਗੁਣੇਹਿ ਪਰਿਯੋਦਾਤੇ ਇਮਸ੍ਮਿਂ ਸੀਲੇ ਪਤਿਟ੍ਠਿਤੇਨ ‘‘ਸੀਲੇ ਪਤਿਟ੍ਠਾਯ ਨਰੋ ਸਪਞ੍ਞੋ, ਚਿਤ੍ਤਂ ਪਞ੍ਞਞ੍ਚ ਭਾਵਯ’’ਨ੍ਤਿ ਵਚਨਤੋ ਚਿਤ੍ਤਸੀਸੇਨ ਨਿਦ੍ਦਿਟ੍ਠੋ ਸਮਾਧਿ ਭਾਵੇਤਬ੍ਬੋ. ਸੋ ਚ ਅਤਿਸਙ੍ਖੇਪਦੇਸਿਤਤ੍ਤਾ ਵਿਞ੍ਞਾਤੁਮ੍ਪਿ ਤਾਵ ਨ ਸੁਕਰੋ, ਪਗੇਵ ਭਾਵੇਤੁਂ, ਤਸ੍ਮਾ ਤਸ੍ਸ ਵਿਤ੍ਥਾਰਞ੍ਚ ਭਾਵਨਾਨਯਞ੍ਚ ਦਸ੍ਸੇਤੁਂ ਇਦਂ ਪਞ੍ਹਾਕਮ੍ਮਂ ਹੋਤਿ.
ਕੋ ਸਮਾਧਿ? ਕੇਨਟ੍ਠੇਨ ਸਮਾਧਿ? ਕਾਨਸ੍ਸ ਲਕ੍ਖਣਰਸਪਚ੍ਚੁਪਟ੍ਠਾਨਪਦਟ੍ਠਾਨਾਨਿ? ਕਤਿਵਿਧੋ ਸਮਾਧਿ? ਕੋ ਚਸ੍ਸ ਸਂਕਿਲੇਸੋ? ਕਿਂ ਵੋਦਾਨਂ? ਕਥਂ ਭਾਵੇਤਬ੍ਬੋ? ਸਮਾਧਿਭਾਵਨਾਯ ਕੋ ਆਨਿਸਂਸੋਤਿ?
ਤਤ੍ਰਿਦਂ ਵਿਸ੍ਸਜ੍ਜਨਂ. ਕੋ ਸਮਾਧੀਤਿ ਸਮਾਧਿ ਬਹੁਵਿਧੋ ਨਾਨਪ੍ਪਕਾਰਕੋ. ਤਂ ਸਬ੍ਬਂ ਵਿਭਾਵਯਿਤੁਂ ਆਰਬ੍ਭਮਾਨਂ ਵਿਸ੍ਸਜ੍ਜਨਂ ਅਧਿਪ੍ਪੇਤਞ੍ਚੇਵ ਅਤ੍ਥਂ ਨ ਸਾਧੇਯ੍ਯ, ਉਤ੍ਤਰਿ ਚ ਵਿਕ੍ਖੇਪਾਯ ਸਂਵਤ੍ਤੇਯ੍ਯ, ਤਸ੍ਮਾ ਇਧਾਧਿਪ੍ਪੇਤਮੇਵ ਸਨ੍ਧਾਯ ਵਦਾਮ, ਕੁਸਲਚਿਤ੍ਤੇਕਗ੍ਗਤਾ ਸਮਾਧਿ.
ਕੇਨਟ੍ਠੇਨ ਸਮਾਧੀਤਿ ਸਮਾਧਾਨਟ੍ਠੇਨ ਸਮਾਧਿ. ਕਿਮਿਦਂ ਸਮਾਧਾਨਂ ਨਾਮ? ਏਕਾਰਮ੍ਮਣੇ ਚਿਤ੍ਤਚੇਤਸਿਕਾਨਂ ਸਮਂ ਸਮ੍ਮਾ ਚ ਆਧਾਨਂ, ਠਪਨਨ੍ਤਿ ਵੁਤ੍ਤਂ ਹੋਤਿ. ਤਸ੍ਮਾ ਯਸ੍ਸ ਧਮ੍ਮਸ੍ਸਾਨੁਭਾਵੇਨ ਏਕਾਰਮ੍ਮਣੇ ਚਿਤ੍ਤਚੇਤਸਿਕਾ ਸਮਂ ਸਮ੍ਮਾ ਚ ਅਵਿਕ੍ਖਿਪਮਾਨਾ ਅਵਿਪ੍ਪਕਿਣ੍ਣਾ ਚ ਹੁਤ੍ਵਾ ਤਿਟ੍ਠਨ੍ਤਿ, ਇਦਂ ਸਮਾਧਾਨਨ੍ਤਿ ਵੇਦਿਤਬ੍ਬਂ.
ਕਾਨਸ੍ਸ ਲਕ੍ਖਣਰਸਪਚ੍ਚੁਪਟ੍ਠਾਨਪਦਟ੍ਠਾਨਾਨੀਤਿ ਏਤ੍ਥ ਪਨ ਅਵਿਕ੍ਖੇਪਲਕ੍ਖਣੋ ਸਮਾਧਿ, ਵਿਕ੍ਖੇਪਵਿਦ੍ਧਂਸਨਰਸੋ, ਅਵਿਕਮ੍ਪਨਪਚ੍ਚੁਪਟ੍ਠਾਨੋ. ‘‘ਸੁਖਿਨੋ ਚਿਤ੍ਤਂ ਸਮਾਧਿਯਤੀ’’ਤਿ ਵਚਨਤੋ ਪਨ ਸੁਖਮਸ੍ਸ ਪਦਟ੍ਠਾਨਂ.
੩੯. ਕਤਿਵਿਧੋ ਸਮਾਧੀਤਿ ਅਵਿਕ੍ਖੇਪਲਕ੍ਖਣੇਨ ਤਾਵ ਏਕਵਿਧੋ. ਉਪਚਾਰਅਪ੍ਪਨਾਵਸੇਨ ਦੁਵਿਧੋ, ਤਥਾ ਲੋਕਿਯਲੋਕੁਤ੍ਤਰਵਸੇਨ ਸਪ੍ਪੀਤਿਕਨਿਪ੍ਪੀਤਿਕਵਸੇਨ ਸੁਖਸਹਗਤਉਪੇਕ੍ਖਾਸਹਗਤਵਸੇਨ ਚ. ਤਿਵਿਧੋ ਹੀਨਮਜ੍ਝਿਮਪਣੀਤਵਸੇਨ, ਤਥਾ ਸਵਿਤਕ੍ਕਸਵਿਚਾਰਾਦਿਵਸੇਨ ਪੀਤਿਸਹਗਤਾਦਿਵਸੇਨ ਪਰਿਤ੍ਤਮਹਗ੍ਗਤਪ੍ਪਮਾਣਵਸੇਨ ਚ. ਚਤੁਬ੍ਬਿਧੋ ਦੁਕ੍ਖਾਪਟਿਪਦਾਦਨ੍ਧਾਭਿਞ੍ਞਾਦਿਵਸੇਨ, ਤਥਾ ਪਰਿਤ੍ਤਪਰਿਤ੍ਤਾਰਮ੍ਮਣਾਦਿਵਸੇਨ ਚਤੁਝਾਨਙ੍ਗਵਸੇਨ ਹਾਨਭਾਗਿਯਾਦਿਵਸੇਨ ਕਾਮਾਵਚਰਾਦਿਵਸੇਨ ਅਧਿਪਤਿਵਸੇਨ ਚ. ਪਞ੍ਚਵਿਧੋ ਪਞ੍ਚਕਨਯੇ ਪਞ੍ਚਝਾਨਙ੍ਗਵਸੇਨਾਤਿ.
ਸਮਾਧਿਏਕਕਦੁਕਵਣ੍ਣਨਾ
ਤਤ੍ਥ ਏਕਵਿਧਕੋਟ੍ਠਾਸੋ ਉਤ੍ਤਾਨਤ੍ਥੋਯੇਵ. ਦੁਵਿਧਕੋਟ੍ਠਾਸੇ ਛਨ੍ਨਂ ਅਨੁਸ੍ਸਤਿਟ੍ਠਾਨਾਨਂ ਮਰਣਸ੍ਸਤਿਯਾ ਉਪਸਮਾਨੁਸ੍ਸਤਿਯਾ ਆਹਾਰੇ ਪਟਿਕੂਲਸਞ੍ਞਾਯ ਚਤੁਧਾਤੁਵਵਤ੍ਥਾਨਸ੍ਸਾਤਿ ਇਮੇਸਂ ਵਸੇਨ ਲਦ੍ਧਚਿਤ੍ਤੇਕਗ੍ਗਤਾ, ਯਾ ਚ ਅਪ੍ਪਨਾਸਮਾਧੀਨਂ ਪੁਬ੍ਬਭਾਗੇ ਏਕਗ੍ਗਤਾ, ਅਯਂ ਉਪਚਾਰਸਮਾਧਿ. ‘‘ਪਠਮਸ੍ਸ ਝਾਨਸ੍ਸ ਪਰਿਕਮ੍ਮਂ ਪਠਮਸ੍ਸ ਝਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ’’ਤਿ ਆਦਿਵਚਨਤੋ ਪਨ ਯਾ ਪਰਿਕਮ੍ਮਾਨਨ੍ਤਰਾ ਏਕਗ੍ਗਤਾ, ਅਯਂ ਅਪ੍ਪਨਾਸਮਾਧੀਤਿ ਏਵਂ ਉਪਚਾਰਪ੍ਪਨਾਵਸੇਨ ਦੁਵਿਧੋ.
ਦੁਤਿਯਦੁਕੇ ਤੀਸੁ ਭੂਮੀਸੁ ਕੁਸਲਚਿਤ੍ਤੇਕਗ੍ਗਤਾ ਲੋਕਿਯੋ ਸਮਾਧਿ. ਅਰਿਯਮਗ੍ਗਸਮ੍ਪਯੁਤ੍ਤਾ ਏਕਗ੍ਗਤਾ ਲੋਕੁਤ੍ਤਰੋ ਸਮਾਧੀਤਿ ਏਵਂ ਲੋਕਿਯਲੋਕੁਤ੍ਤਰਵਸੇਨ ਦੁਵਿਧੋ.
ਤਤਿਯਦੁਕੇ ਚਤੁਕ੍ਕਨਯੇ ਦ੍ਵੀਸੁ ਪਞ੍ਚਕਨਯੇ ਤੀਸੁ ਝਾਨੇਸੁ ਏਕਗ੍ਗਤਾ ਸਪ੍ਪੀਤਿਕੋ ਸਮਾਧਿ. ਅਵਸੇਸੇਸੁ ਦ੍ਵੀਸੁ ਝਾਨੇਸੁ ਏਕਗ੍ਗਤਾ ਨਿਪ੍ਪੀਤਿਕੋ ਸਮਾਧਿ. ਉਪਚਾਰਸਮਾਧਿ ਪਨ ਸਿਯਾ ਸਪ੍ਪੀਤਿਕੋ, ਸਿਯਾ ਨਿਪ੍ਪੀਤਿਕੋਤਿ ਏਵਂ ਸਪ੍ਪੀਤਿਕਨਿਪ੍ਪੀਤਿਕਵਸੇਨ ਦੁਵਿਧੋ.
ਚਤੁਤ੍ਥਦੁਕੇ ਚਤੁਕ੍ਕਨਯੇ ਤੀਸੁ ਪਞ੍ਚਕਨਯੇ ਚਤੂਸੁ ਝਾਨੇਸੁ ਏਕਗ੍ਗਤਾ ਸੁਖਸਹਗਤੋ ਸਮਾਧਿ. ਅਵਸੇਸਸ੍ਮਿਂ ਉਪੇਕ੍ਖਾਸਹਗਤੋ ਸਮਾਧਿ. ਉਪਚਾਰਸਮਾਧਿ ਪਨ ਸਿਯਾ ਸੁਖਸਹਗਤੋ, ਸਿਯਾ ਉਪੇਕ੍ਖਾਸਹਗਤੋਤਿ ਏਵਂ ਸੁਖਸਹਗਤਉਪੇਕ੍ਖਾਸਹਗਤਵਸੇਨ ਦੁਵਿਧੋ.
ਸਮਾਧਿਤਿਕਵਣ੍ਣਨਾ
ਤਿਕੇਸੁ ਪਠਮਤ੍ਤਿਕੇ ਪਟਿਲਦ੍ਧਮਤ੍ਤੋ ਹੀਨੋ, ਨਾਤਿਸੁਭਾਵਿਤੋ ਮਜ੍ਝਿਮੋ, ਸੁਭਾਵਿਤੋ ਵਸਿਪ੍ਪਤ੍ਤੋ ਪਣੀਤੋਤਿ ਏਵਂ ਹੀਨਮਜ੍ਝਿਮਪਣੀਤਵਸੇਨ ਤਿਵਿਧੋ.
ਦੁਤਿਯਤ੍ਤਿਕੇ ਪਠਮਜ੍ਝਾਨਸਮਾਧਿ ਸਦ੍ਧਿਂ ਉਪਚਾਰਸਮਾਧਿਨਾ ਸਵਿਤਕ੍ਕਸਵਿਚਾਰੋ. ਪਞ੍ਚਕਨਯੇ ਦੁਤਿਯਜ੍ਝਾਨਸਮਾਧਿ ਅਵਿਤਕ੍ਕਵਿਚਾਰਮਤ੍ਤੋ. ਯੋ ਹਿ ਵਿਤਕ੍ਕਮਤ੍ਤੇਯੇਵ ਆਦੀਨਵਂ ਦਿਸ੍ਵਾ ਵਿਚਾਰੇ ਅਦਿਸ੍ਵਾ ਕੇਵਲਂ ਵਿਤਕ੍ਕਪ੍ਪਹਾਨਮਤ੍ਤਂ ਆਕਙ੍ਖਮਾਨੋ ਪਠਮਜ੍ਝਾਨਂ ਅਤਿਕ੍ਕਮਤਿ, ਸੋ ਅਵਿਤਕ੍ਕਵਿਚਾਰਮਤ੍ਤਂ ਸਮਾਧਿਂ ਪਟਿਲਭਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਚਤੁਕ੍ਕਨਯੇ ਪਨ ਦੁਤਿਯਾਦੀਸੁ ਪਞ੍ਚਕਨਯੇ ਤਤਿਯਾਦੀਸੁ ਤੀਸੁ ਝਾਨੇਸੁ ਏਕਗ੍ਗਤਾ ਅਵਿਤਕ੍ਕਾਵਿਚਾਰੋ ਸਮਾਧੀਤਿ ਏਵਂ ਸਵਿਤਕ੍ਕਸਵਿਚਾਰਾਦਿਵਸੇਨ ਤਿਵਿਧੋ.
ਤਤਿਯਤ੍ਤਿਕੇ ਚਤੁਕ੍ਕਨਯੇ ਆਦਿਤੋ ਦ੍ਵੀਸੁ ਪਞ੍ਚਕਨਯੇ ਚ ਤੀਸੁ ਝਾਨੇਸੁ ਏਕਗ੍ਗਤਾ ਪੀਤਿਸਹਗਤੋ ਸਮਾਧਿ. ਤੇਸ੍ਵੇਵ ਤਤਿਯੇ ਚ ਚਤੁਤ੍ਥੇ ਚ ਝਾਨੇ ਏਕਗ੍ਗਤਾ ਸੁਖਸਹਗਤੋ ਸਮਾਧਿ. ਅਵਸਾਨੇ ਉਪੇਕ੍ਖਾਸਹਗਤੋ. ਉਪਚਾਰਸਮਾਧਿ ਪਨ ਪੀਤਿਸੁਖਸਹਗਤੋ ਵਾ ਹੋਤਿ ਉਪੇਕ੍ਖਾਸਹਗਤੋ ਵਾਤਿ ਏਵਂ ਪੀਤਿਸਹਗਤਾਦਿਵਸੇਨ ਤਿਵਿਧੋ.
ਚਤੁਤ੍ਥਤ੍ਤਿਕੇ ਉਪਚਾਰਭੂਮਿਯਂ ਏਕਗ੍ਗਤਾ ਪਰਿਤ੍ਤੋ ਸਮਾਧਿ. ਰੂਪਾਵਚਰਾਰੂਪਾਵਚਰਕੁਸਲੇ ਏਕਗ੍ਗਤਾ ਮਹਗ੍ਗਤੋ ਸਮਾਧਿ. ਅਰਿਯਮਗ੍ਗਸਮ੍ਪਯੁਤ੍ਤਾ ਏਕਗ੍ਗਤਾ ਅਪ੍ਪਮਾਣੋ ਸਮਾਧੀਤਿ ਏਵਂ ਪਰਿਤ੍ਤਮਹਗ੍ਗਤਪ੍ਪਮਾਣਵਸੇਨ ਤਿਵਿਧੋ.
ਸਮਾਧਿਚਤੁਕ੍ਕਵਣ੍ਣਨਾ
ਚਤੁਕ੍ਕੇਸੁ ਪਠਮਚਤੁਕ੍ਕੇ ਅਤ੍ਥਿ ਸਮਾਧਿ ਦੁਕ੍ਖਾਪਟਿਪਦੋ ਦਨ੍ਧਾਭਿਞ੍ਞੋ, ਅਤ੍ਥਿ ਦੁਕ੍ਖਾਪਟਿਪਦੋ ਖਿਪ੍ਪਾਭਿਞ੍ਞੋ, ਅਤ੍ਥਿ ਸੁਖਾਪਟਿਪਦੋ ਦਨ੍ਧਾਭਿਞ੍ਞੋ, ਅਤ੍ਥਿ ਸੁਖਾਪਟਿਪਦੋ ਖਿਪ੍ਪਾਭਿਞ੍ਞੋਤਿ.
ਤਤ੍ਥ ਪਠਮਸਮਨ੍ਨਾਹਾਰਤੋ ਪਟ੍ਠਾਯ ਯਾਵ ਤਸ੍ਸ ਤਸ੍ਸ ਝਾਨਸ੍ਸ ਉਪਚਾਰਂ ਉਪ੍ਪਜ੍ਜਤਿ, ਤਾਵ ਪਵਤ੍ਤਾ ਸਮਾਧਿਭਾਵਨਾ ਪਟਿਪਦਾਤਿ ਵੁਚ੍ਚਤਿ. ਉਪਚਾਰਤੋ ਪਨ ਪਟ੍ਠਾਯ ਯਾਵ ਅਪ੍ਪਨਾ, ਤਾਵ ਪਵਤ੍ਤਾ ਪਞ੍ਞਾ ਅਭਿਞ੍ਞਾਤਿ ਵੁਚ੍ਚਤਿ. ਸਾ ਪਨੇਸਾ ਪਟਿਪਦਾ ਏਕਚ੍ਚਸ੍ਸ ਦੁਕ੍ਖਾ ਹੋਤਿ, ਨੀਵਰਣਾਦਿਪਚ੍ਚਨੀਕਧਮ੍ਮਸਮੁਦਾਚਾਰਗਹਣਤਾਯ ਕਿਚ੍ਛਾ ਅਸੁਖਾਸੇਵਨਾਤਿ ਅਤ੍ਥੋ. ਏਕਚ੍ਚਸ੍ਸ ਤਦਭਾਵੇਨ ਸੁਖਾ. ਅਭਿਞ੍ਞਾਪਿ ਏਕਚ੍ਚਸ੍ਸ ਦਨ੍ਧਾ ਹੋਤਿ ਮਨ੍ਦਾ ਅਸੀਘਪ੍ਪਵਤ੍ਤਿ. ਏਕਚ੍ਚਸ੍ਸ ਖਿਪ੍ਪਾ ਅਮਨ੍ਦਾ ਸੀਘਪ੍ਪਵਤ੍ਤਿ.
ਤਤ੍ਥ ਯਾਨਿ ਪਰਤੋ ਸਪ੍ਪਾਯਾਸਪ੍ਪਾਯਾਨਿ ਚ ਪਲਿਬੋਧੁਪਚ੍ਛੇਦਾਦੀਨਿ ਪੁਬ੍ਬਕਿਚ੍ਚਾਨਿ ਚ ਅਪ੍ਪਨਾਕੋਸਲ੍ਲਾਨਿ ਚ ਵਣ੍ਣਯਿਸ੍ਸਾਮ, ਤੇਸੁ ਯੋ ਅਸਪ੍ਪਾਯਸੇਵੀ ਹੋਤਿ, ਤਸ੍ਸ ਦੁਕ੍ਖਾ ਪਟਿਪਦਾ ਦਨ੍ਧਾ ਚ ਅਭਿਞ੍ਞਾ ਹੋਤਿ. ਸਪ੍ਪਾਯਸੇਵਿਨੋ ਸੁਖਾ ਪਟਿਪਦਾ ਖਿਪ੍ਪਾ ਚ ਅਭਿਞ੍ਞਾ. ਯੋ ਪਨ ਪੁਬ੍ਬਭਾਗੇ ਅਸਪ੍ਪਾਯਂ ਸੇਵਿਤ੍ਵਾ ਅਪਰਭਾਗੇ ਸਪ੍ਪਾਯਸੇਵੀ ਹੋਤਿ, ਪੁਬ੍ਬਭਾਗੇ ਵਾ ਸਪ੍ਪਾਯਂ ਸੇਵਿਤ੍ਵਾ ਅਪਰਭਾਗੇ ਅਸਪ੍ਪਾਯਸੇਵੀ, ਤਸ੍ਸ ਵੋਮਿਸ੍ਸਕਤਾ ਵੇਦਿਤਬ੍ਬਾ. ਤਥਾ ਪਲਿਬੋਧੁਪਚ੍ਛੇਦਾਦਿਕਂ ਪੁਬ੍ਬਕਿਚ੍ਚਂ ਅਸਮ੍ਪਾਦੇਤ੍ਵਾ ਭਾਵਨਮਨੁਯੁਤ੍ਤਸ੍ਸ ਦੁਕ੍ਖਾ ਪਟਿਪਦਾ ਹੋਤਿ. ਵਿਪਰਿਯਾਯੇਨ ਸੁਖਾ. ਅਪ੍ਪਨਾਕੋਸਲ੍ਲਾਨਿ ਪਨ ਅਸਮ੍ਪਾਦੇਨ੍ਤਸ੍ਸ ਦਨ੍ਧਾ ਅਭਿਞ੍ਞਾ ਹੋਤਿ. ਸਮ੍ਪਾਦੇਨ੍ਤਸ੍ਸ ਖਿਪ੍ਪਾ.
ਅਪਿਚ ਤਣ੍ਹਾਅਵਿਜ੍ਜਾਵਸੇਨ ਸਮਥਵਿਪਸ੍ਸਨਾਧਿਕਾਰਵਸੇਨ ਚਾਪਿ ਏਤਾਸਂ ਪਭੇਦੋ ਵੇਦਿਤਬ੍ਬੋ. ਤਣ੍ਹਾਭਿਭੂਤਸ੍ਸ ਹਿ ਦੁਕ੍ਖਾ ਪਟਿਪਦਾ ਹੋਤਿ. ਅਨਭਿਭੂਤਸ੍ਸ ਸੁਖਾ. ਅਵਿਜ੍ਜਾਭਿਭੂਤਸ੍ਸ ਚ ਦਨ੍ਧਾ ਅਭਿਞ੍ਞਾ ਹੋਤਿ. ਅਨਭਿਭੂਤਸ੍ਸ ਖਿਪ੍ਪਾ. ਯੋ ਚ ਸਮਥੇ ਅਕਤਾਧਿਕਾਰੋ, ਤਸ੍ਸ ਦੁਕ੍ਖਾ ਪਟਿਪਦਾ ਹੋਤਿ. ਕਤਾਧਿਕਾਰਸ੍ਸ ਸੁਖਾ. ਯੋ ਪਨ ਵਿਪਸ੍ਸਨਾਯ ਅਕਤਾਧਿਕਾਰੋ ਹੋਤਿ, ਤਸ੍ਸ ਦਨ੍ਧਾ ਅਭਿਞ੍ਞਾ ਹੋਤਿ, ਕਤਾਧਿਕਾਰਸ੍ਸ ਖਿਪ੍ਪਾ. ਕਿਲੇਸਿਨ੍ਦ੍ਰਿਯਵਸੇਨ ਚਾਪਿ ਏਤਾਸਂ ਪਭੇਦੋ ਵੇਦਿਤਬ੍ਬੋ. ਤਿਬ੍ਬਕਿਲੇਸਸ੍ਸ ਹਿ ਮੁਦਿਨ੍ਦ੍ਰਿਯਸ੍ਸ ਦੁਕ੍ਖਾ ਪਟਿਪਦਾ ਹੋਤਿ ਦਨ੍ਧਾ ਚ ਅਭਿਞ੍ਞਾ, ਤਿਕ੍ਖਿਨ੍ਦ੍ਰਿਯਸ੍ਸ ਪਨ ਖਿਪ੍ਪਾ ਅਭਿਞ੍ਞਾ. ਮਨ੍ਦਕਿਲੇਸਸ੍ਸ ਚ ਮੁਦਿਨ੍ਦ੍ਰਿਯਸ੍ਸ ਸੁਖਾ ਪਟਿਪਦਾ ਹੋਤਿ ਦਨ੍ਧਾ ਚ ਅਭਿਞ੍ਞਾ. ਤਿਕ੍ਖਿਨ੍ਦ੍ਰਿਯਸ੍ਸ ਪਨ ਖਿਪ੍ਪਾ ਅਭਿਞ੍ਞਾਤਿ.
ਇਤਿ ਇਮਾਸੁ ਪਟਿਪਦਾਅਭਿਞ੍ਞਾਸੁ ਯੋ ਪੁਗ੍ਗਲੋ ਦੁਕ੍ਖਾਯ ਪਟਿਪਦਾਯ ਦਨ੍ਧਾਯ ਚ ਅਭਿਞ੍ਞਾਯ ਸਮਾਧਿਂ ਪਾਪੁਣਾਤਿ, ਤਸ੍ਸ ਸੋ ਸਮਾਧਿ ਦੁਕ੍ਖਾਪਟਿਪਦੋ ਦਨ੍ਧਾਭਿਞ੍ਞੋਤਿ ਵੁਚ੍ਚਤਿ. ਏਸ ਨਯੋ ਸੇਸਤ੍ਤਯੇਪੀਤਿ ਏਵਂ ਦੁਕ੍ਖਾਪਟਿਪਦਾਦਨ੍ਧਾਭਿਞ੍ਞਾਦਿਵਸੇਨ ਚਤੁਬ੍ਬਿਧੋ.
ਦੁਤਿਯਚਤੁਕ੍ਕੇ ਅਤ੍ਥਿ ਸਮਾਧਿ ਪਰਿਤ੍ਤੋ ਪਰਿਤ੍ਤਾਰਮ੍ਮਣੋ, ਅਤ੍ਥਿ ਪਰਿਤ੍ਤੋ ਅਪ੍ਪਮਾਣਾਰਮ੍ਮਣੋ, ਅਤ੍ਥਿ ਅਪ੍ਪਮਾਣੋ ਪਰਿਤ੍ਤਾਰਮ੍ਮਣੋ, ਅਤ੍ਥਿ ਅਪ੍ਪਮਾਣੋ ਅਪ੍ਪਮਾਣਾਰਮ੍ਮਣੋਤਿ. ਤਤ੍ਥ ਯੋ ਸਮਾਧਿ ਅਪ੍ਪਗੁਣੋ ਉਪਰਿਝਾਨਸ੍ਸ ਪਚ੍ਚਯੋ ਭਵਿਤੁਂ ਨ ਸਕ੍ਕੋਤਿ, ਅਯਂ ਪਰਿਤ੍ਤੋ. ਯੋ ਪਨ ਅਵਡ੍ਢਿਤੇ ਆਰਮ੍ਮਣੇ ਪਵਤ੍ਤੋ, ਅਯਂ ਪਰਿਤ੍ਤਾਰਮ੍ਮਣੋ. ਯੋ ਪਗੁਣੋ ਸੁਭਾਵਿਤੋ, ਉਪਰਿਝਾਨਸ੍ਸ ਪਚ੍ਚਯੋ ਭਵਿਤੁਂ ਸਕ੍ਕੋਤਿ, ਅਯਂ ਅਪ੍ਪਮਾਣੋ. ਯੋ ਚ ਵਡ੍ਢਿਤੇ ਆਰਮ੍ਮਣੇ ਪਵਤ੍ਤੋ, ਅਯਂ ਅਪ੍ਪਮਾਣਾਰਮ੍ਮਣੋ. ਵੁਤ੍ਤਲਕ੍ਖਣਵੋਮਿਸ੍ਸਤਾਯ ਪਨ ਵੋਮਿਸ੍ਸਕਨਯੋ ਵੇਦਿਤਬ੍ਬੋ. ਏਵਂ ਪਰਿਤ੍ਤਪਰਿਤ੍ਤਾਰਮ੍ਮਣਾਦਿਵਸੇਨ ਚਤੁਬ੍ਬਿਧੋ.
ਤਤਿਯਚਤੁਕ੍ਕੇ ਵਿਕ੍ਖਮ੍ਭਿਤਨੀਵਰਣਾਨਂ ਵਿਤਕ੍ਕਵਿਚਾਰਪੀਤਿਸੁਖਸਮਾਧੀਨਂ ਵਸੇਨ ਪਞ੍ਚਙ੍ਗਿਕਂ ਪਠਮਂ ਝਾਨਂ, ਤਤੋ ਵੂਪਸਨ੍ਤਵਿਤਕ੍ਕਵਿਚਾਰਂ ਤਿਵਙ੍ਗਿਕਂ ਦੁਤਿਯਂ, ਤਤੋ ਵਿਰਤ੍ਤਪੀਤਿਕਂ ਦੁਵਙ੍ਗਿਕਂ ਤਤਿਯਂ, ਤਤੋ ਪਹੀਨਸੁਖਂ ਉਪੇਕ੍ਖਾਵੇਦਨਾਸਹਿਤਸ੍ਸ ਸਮਾਧਿਨੋ ਵਸੇਨ ਦੁਵਙ੍ਗਿਕਂ ਚਤੁਤ੍ਥਂ. ਇਤਿ ਇਮੇਸਂ ਚਤੁਨ੍ਨਂ ਝਾਨਾਨਂ ਅਙ੍ਗਭੂਤਾ ਚਤ੍ਤਾਰੋ ਸਮਾਧੀ ਹੋਨ੍ਤਿ. ਏਵਂ ਚਤੁਝਾਨਙ੍ਗਵਸੇਨ ਚਤੁਬ੍ਬਿਧੋ.
ਚਤੁਤ੍ਥਚਤੁਕ੍ਕੇ ਅਤ੍ਥਿ ਸਮਾਧਿ ਹਾਨਭਾਗਿਯੋ, ਅਤ੍ਥਿ ਠਿਤਿਭਾਗਿਯੋ, ਅਤ੍ਥਿ ਵਿਸੇਸਭਾਗਿਯੋ, ਅਤ੍ਥਿ ਨਿਬ੍ਬੇਧਭਾਗਿਯੋ. ਤਤ੍ਥ ਪਚ੍ਚਨੀਕਸਮੁਦਾਚਾਰਵਸੇਨ ਹਾਨਭਾਗਿਯਤਾ, ਤਦਨੁਧਮ੍ਮਤਾਯ ਸਤਿਯਾ ਸਣ੍ਠਾਨਵਸੇਨ ਠਿਤਿਭਾਗਿਯਤਾ, ਉਪਰਿਵਿਸੇਸਾਧਿਗਮਵਸੇਨ ਵਿਸੇਸਭਾਗਿਯਤਾ, ਨਿਬ੍ਬਿਦਾਸਹਗਤਸਞ੍ਞਾਮਨਸਿਕਾਰਸਮੁਦਾਚਾਰਵਸੇਨ ਨਿਬ੍ਬੇਧਭਾਗਿਯਤਾ ਚ ਵੇਦਿਤਬ੍ਬਾ. ਯਥਾਹ, ‘‘ਪਠਮਸ੍ਸ ਝਾਨਸ੍ਸ ਲਾਭਿਂ ਕਾਮਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਹਾਨਭਾਗਿਨੀ ਪਞ੍ਞਾ. ਤਦਨੁਧਮ੍ਮਤਾ ਸਤਿ ਸਨ੍ਤਿਟ੍ਠਤਿ ਠਿਤਿਭਾਗਿਨੀ ਪਞ੍ਞਾ. ਅਵਿਤਕ੍ਕਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਸੇਸਭਾਗਿਨੀ ਪਞ੍ਞਾ. ਨਿਬ੍ਬਿਦਾਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਰਾਗੂਪਸਞ੍ਹਿਤਾ ਨਿਬ੍ਬੇਧਭਾਗਿਨੀ ਪਞ੍ਞਾ’’ਤਿ (ਵਿਭ. ੭੯੯). ਤਾਯ ਪਨ ਪਞ੍ਞਾਯ ਸਮ੍ਪਯੁਤ੍ਤਾ ਸਮਾਧੀਪਿ ਚਤ੍ਤਾਰੋ ਹੋਨ੍ਤੀਤਿ. ਏਵਂ ਹਾਨਭਾਗਿਯਾਦਿਵਸੇਨ ਚਤੁਬ੍ਬਿਧੋ.
ਪਞ੍ਚਮਚਤੁਕ੍ਕੇ ਕਾਮਾਵਚਰੋ ਸਮਾਧਿ, ਰੂਪਾਵਚਰੋ ਸਮਾਧਿ, ਅਰੂਪਾਵਚਰੋ ਸਮਾਧਿ, ਅਪਰਿਯਾਪਨ੍ਨੋ ਸਮਾਧੀਤਿ ਏਵਂ ਚਤ੍ਤਾਰੋ ਸਮਾਧੀ. ਤਤ੍ਥ ਸਬ੍ਬਾਪਿ ਉਪਚਾਰੇਕਗ੍ਗਤਾ ਕਾਮਾਵਚਰੋ ਸਮਾਧਿ. ਤਥਾ ਰੂਪਾਵਚਰਾਦਿਕੁਸਲਚਿਤ੍ਤੇਕਗ੍ਗਤਾ ਇਤਰੇ ਤਯੋਤਿ ਏਵਂ ਕਾਮਾਵਚਰਾਦਿਵਸੇਨ ਚਤੁਬ੍ਬਿਧੋ.
ਛਟ੍ਠਚਤੁਕ੍ਕੇ ‘‘ਛਨ੍ਦਂ ਚੇ ਭਿਕ੍ਖੁ ਅਧਿਪਤਿਂ ਕਰਿਤ੍ਵਾ ਲਭਤਿ ਸਮਾਧਿਂ, ਲਭਤਿ ਚਿਤ੍ਤਸ੍ਸੇਕਗ੍ਗਤਂ, ਅਯਂ ਵੁਚ੍ਚਤਿ ਛਨ੍ਦਸਮਾਧਿ…ਪੇ… ਵੀਰਿਯਂ ਚੇ ਭਿਕ੍ਖੁ…ਪੇ… ਚਿਤ੍ਤਂ ਚੇ ਭਿਕ੍ਖੁ…ਪੇ… ਵੀਮਂਸਂ ਚੇ ਭਿਕ੍ਖੁ ਅਧਿਪਤਿਂ ਕਰਿਤ੍ਵਾ ਲਭਤਿ ਸਮਾਧਿਂ, ਲਭਤਿ ਚਿਤ੍ਤਸ੍ਸੇਕਗ੍ਗਤਂ, ਅਯਂ ਵੁਚ੍ਚਤਿ ਵੀਮਂਸਾਸਮਾਧੀ’’ਤਿ (ਵਿਭ. ੪੩੨; ਸਂ. ਨਿ. ੩.੮੨੫) ਏਵਂ ਅਧਿਪਤਿਵਸੇਨ ਚਤੁਬ੍ਬਿਧੋ.
ਪਞ੍ਚਕੇ ਯਂ ਚਤੁਕ੍ਕਭੇਦੇ ਵੁਤ੍ਤਂ ਦੁਤਿਯਂ ਝਾਨਂ, ਤਂ ਵਿਤਕ੍ਕਮਤ੍ਤਾਤਿਕ੍ਕਮੇਨ ਦੁਤਿਯਂ, ਵਿਤਕ੍ਕਵਿਚਾਰਾਤਿਕ੍ਕਮੇਨ ਤਤਿਯਨ੍ਤਿ ਏਵਂ ਦ੍ਵਿਧਾ ਭਿਨ੍ਦਿਤ੍ਵਾ ਪਞ੍ਚ ਝਾਨਾਨਿ ਵੇਦਿਤਬ੍ਬਾਨਿ. ਤੇਸਂ ਅਙ੍ਗਭੂਤਾ ਚ ਪਞ੍ਚ ਸਮਾਧੀਤਿ ਏਵਂ ਪਞ੍ਚਝਾਨਙ੍ਗਵਸੇਨ ਪਞ੍ਚਵਿਧਤਾ ਵੇਦਿਤਬ੍ਬਾ.
੪੦. ਕੋ ਚਸ੍ਸ ਸਂਕਿਲੇਸੋ ਕਿਂ ਵੋਦਾਨਨ੍ਤਿ ਏਤ੍ਥ ਪਨ ਵਿਸ੍ਸਜ੍ਜਨਂ ਵਿਭਙ੍ਗੇ ਵੁਤ੍ਤਮੇਵ. ਵੁਤ੍ਤਞ੍ਹਿ ਤਤ੍ਥ ‘‘ਸਂਕਿਲੇਸਨ੍ਤਿ ਹਾਨਭਾਗਿਯੋ ਧਮ੍ਮੋ. ਵੋਦਾਨਨ੍ਤਿ ਵਿਸੇਸਭਾਗਿਯੋ ਧਮ੍ਮੋ’’ਤਿ (ਵਿਭ. ੮੨੮). ਤਤ੍ਥ ‘‘ਪਠਮਸ੍ਸ ਝਾਨਸ੍ਸ ਲਾਭਿਂ ਕਾਮਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਹਾਨਭਾਗਿਨੀ ਪਞ੍ਞਾ’’ਤਿ (ਵਿਭ. ੭੯੯) ਇਮਿਨਾ ਨਯੇਨ ਹਾਨਭਾਗਿਯਧਮ੍ਮੋ ਵੇਦਿਤਬ੍ਬੋ. ‘‘ਅਵਿਤਕ੍ਕਸਹਗਤਾ ਸਞ੍ਞਾਮਨਸਿਕਾਰਾ ਸਮੁਦਾਚਰਨ੍ਤਿ ਵਿਸੇਸਭਾਗਿਨੀ ਪਞ੍ਞਾ’’ਤਿ (ਵਿਭ. ੭੯੯) ਇਮਿਨਾ ਨਯੇਨ ਵਿਸੇਸਭਾਗਿਯਧਮ੍ਮੋ ਵੇਦਿਤਬ੍ਬੋ.
ਦਸਪਲਿਬੋਧਵਣ੍ਣਨਾ
੪੧. ਕਥਂ ਭਾਵੇਤਬ੍ਬੋਤਿ ਏਤ੍ਥ ਪਨ ਯੋ ਤਾਵ ਅਯਂ ਲੋਕਿਯਲੋਕੁਤ੍ਤਰਵਸੇਨ ਦੁਵਿਧੋਤਿਆਦੀਸੁ ਅਰਿਯਮਗ੍ਗਸਮ੍ਪਯੁਤ੍ਤੋ ਸਮਾਧਿ ਵੁਤ੍ਤੋ, ਤਸ੍ਸ ਭਾਵਨਾਨਯੋ ਪਞ੍ਞਾਭਾਵਨਾਨਯੇਨੇਵ ਸਙ੍ਗਹਿਤੋ. ਪਞ੍ਞਾਯ ਹਿ ਭਾਵਿਤਾਯ ਸੋ ਭਾਵਿਤੋ ਹੋਤਿ. ਤਸ੍ਮਾ ਤਂ ਸਨ੍ਧਾਯ ਏਵਂ ਭਾਵੇਤਬ੍ਬੋਤਿ ਨ ਕਿਞ੍ਚਿ ਵਿਸੁਂ ਵਦਾਮ.
ਯੋ ਪਨਾਯਂ ਲੋਕਿਯੋ, ਸੋ ਵੁਤ੍ਤਨਯੇਨ ਸੀਲਾਨਿ ਵਿਸੋਧੇਤ੍ਵਾ ਸੁਪਰਿਸੁਦ੍ਧੇ ਸੀਲੇ ਪਤਿਟ੍ਠਿਤੇਨ ਯ੍ਵਾਸ੍ਸ ਦਸਸੁ ਪਲਿਬੋਧੇਸੁ ਪਲਿਬੋਧੋ ਅਤ੍ਥਿ, ਤਂ ਉਪਚ੍ਛਿਨ੍ਦਿਤ੍ਵਾ ਕਮ੍ਮਟ੍ਠਾਨਦਾਯਕਂ ਕਲ੍ਯਾਣਮਿਤ੍ਤਂ ਉਪਸਙ੍ਕਮਿਤ੍ਵਾ ਅਤ੍ਤਨੋ ਚਰਿਯਾਨੁਕੂਲਂ ਚਤ੍ਤਾਲੀਸਾਯ ਕਮ੍ਮਟ੍ਠਾਨੇਸੁ ਅਞ੍ਞਤਰਂ ਕਮ੍ਮਟ੍ਠਾਨਂ ਗਹੇਤ੍ਵਾ ਸਮਾਧਿਭਾਵਨਾਯ ਅਨਨੁਰੂਪਂ ਵਿਹਾਰਂ ਪਹਾਯ ਅਨੁਰੂਪੇ ਵਿਹਾਰੇ ਵਿਹਰਨ੍ਤੇਨ ਖੁਦ੍ਦਕਪਲਿਬੋਧੁਪਚ੍ਛੇਦਂ ਕਤ੍ਵਾ ਸਬ੍ਬਂ ਭਾਵਨਾਵਿਧਾਨਂ ਅਪਰਿਹਾਪੇਨ੍ਤੇਨ ਭਾਵੇਤਬ੍ਬੋਤਿ ਅਯਮੇਤ੍ਥ ਸਙ੍ਖੇਪੋ.
ਅਯਂ ਪਨ ਵਿਤ੍ਥਾਰੋ, ਯਂ ਤਾਵ ਵੁਤ੍ਤਂ ‘‘ਯ੍ਵਾਸ੍ਸ ਦਸਸੁ ਪਲਿਬੋਧੇਸੁ ਪਲਿਬੋਧੋ ਅਤ੍ਥਿ, ਤਂ ਉਪਚ੍ਛਿਨ੍ਦਿਤ੍ਵਾ’’ਤਿ, ਏਤ੍ਥ –
ਆਵਾਸੋ ਚ ਕੁਲਂ ਲਾਭੋ, ਗਣੋ ਕਮ੍ਮਞ੍ਚ ਪਞ੍ਚਮਂ;
ਅਦ੍ਧਾਨਂ ਞਾਤਿ ਆਬਾਧੋ, ਗਨ੍ਥੋ ਇਦ੍ਧੀਤਿ ਤੇ ਦਸਾਤਿ. –
ਇਮੇ ਦਸ ਪਲਿਬੋਧਾ ਨਾਮ. ਤਤ੍ਥ ਆਵਾਸੋਯੇਵ ਆਵਾਸਪਲਿਬੋਧੋ. ਏਸ ਨਯੋ ਕੁਲਾਦੀਸੁ.
ਤਤ੍ਥ ਆਵਾਸੋਤਿ ਏਕੋਪਿ ਓਵਰਕੋ ਵੁਚ੍ਚਤਿ ਏਕਮ੍ਪਿ ਪਰਿਵੇਣਂ ਸਕਲੋਪਿ ਸਙ੍ਘਾਰਾਮੋ. ਸ੍ਵਾਯਂ ਨ ਸਬ੍ਬਸ੍ਸੇਵ ਪਲਿਬੋਧੋ ਹੋਤਿ. ਯੋ ਪਨੇਤ੍ਥ ਨਵਕਮ੍ਮਾਦੀਸੁ ਉਸ੍ਸੁਕ੍ਕਂ ਵਾ ਆਪਜ੍ਜਤਿ, ਬਹੁਭਣ੍ਡਸਨ੍ਨਿਚਯੋ ਵਾ ਹੋਤਿ, ਯੇਨ ਕੇਨਚਿ ਵਾ ਕਾਰਣੇਨ ਅਪੇਕ੍ਖਵਾ ਪਟਿਬਦ੍ਧਚਿਤ੍ਤੋ, ਤਸ੍ਸੇਵ ਪਲਿਬੋਧੋ ਹੋਤਿ, ਨ ਇਤਰਸ੍ਸ.
ਤਤ੍ਰਿਦਂ ਵਤ੍ਥੁ – ਦ੍ਵੇ ਕਿਰ ਕੁਲਪੁਤ੍ਤਾ ਅਨੁਰਾਧਪੁਰਾ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਥੂਪਾਰਾਮੇ ਪਬ੍ਬਜਿਂਸੁ. ਤੇਸੁ ਏਕੋ ਦ੍ਵੇ ਮਾਤਿਕਾ ਪਗੁਣਾ ਕਤ੍ਵਾ ਪਞ੍ਚਵਸ੍ਸਿਕੋ ਹੁਤ੍ਵਾ ਪਵਾਰੇਤ੍ਵਾ ਪਾਚਿਨਖਣ੍ਡਰਾਜਿਂ ਨਾਮ ਗਤੋ. ਏਕੋ ਤਤ੍ਥੇਵ ਵਸਤਿ. ਪਾਚਿਨਖਣ੍ਡਰਾਜਿਗਤੋ ਤਤ੍ਥ ਚਿਰਂ ਵਸਿਤ੍ਵਾ ਥੇਰੋ ਹੁਤ੍ਵਾ ਚਿਨ੍ਤੇਸਿ ‘‘ਪਟਿਸਲ੍ਲਾਨਸਾਰੁਪ੍ਪਮਿਦਂ ਠਾਨਂ, ਹਨ੍ਦ ਨਂ ਸਹਾਯਕਸ੍ਸਾਪਿ ਆਰੋਚੇਮੀ’’ਤਿ. ਤਤੋ ਨਿਕ੍ਖਮਿਤ੍ਵਾ ਅਨੁਪੁਬ੍ਬੇਨ ਥੂਪਾਰਾਮਂ ਪਾਵਿਸਿ. ਪਵਿਸਨ੍ਤਂਯੇਵ ਚ ਨਂ ਦਿਸ੍ਵਾ ਸਮਾਨਵਸ੍ਸਿਕਤ੍ਥੇਰੋ ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤ੍ਵਾ ਵਤ੍ਤਂ ਅਕਾਸਿ. ਆਗਨ੍ਤੁਕਤ੍ਥੇਰੋ ਸੇਨਾਸਨਂ ਪਵਿਸਿਤ੍ਵਾ ਚਿਨ੍ਤੇਸਿ ‘‘ਇਦਾਨਿ ਮੇ ਸਹਾਯੋ ਸਪ੍ਪਿਂ ਵਾ ਫਾਣਿਤਂ ਵਾ ਪਾਨਕਂ ਵਾ ਪੇਸੇਸ੍ਸਤਿ. ਅਯਞ੍ਹਿ ਇਮਸ੍ਮਿਂ ਨਗਰੇ ਚਿਰਨਿਵਾਸੀ’’ਤਿ. ਸੋ ਰਤ੍ਤਿਂ ਅਲਦ੍ਧਾ ਪਾਤੋ ਚਿਨ੍ਤੇਸਿ ‘‘ਇਦਾਨਿ ਉਪਟ੍ਠਾਕੇਹਿ ਗਹਿਤਂ ਯਾਗੁਖਜ੍ਜਕਂ ਪੇਸੇਸ੍ਸਤੀ’’ਤਿ. ਤਮ੍ਪਿ ਅਦਿਸ੍ਵਾ ‘‘ਪਹਿਣਨ੍ਤਾ ਨਤ੍ਥਿ, ਪਵਿਟ੍ਠਸ੍ਸ ਮਞ੍ਞੇ ਦਸ੍ਸਤੀ’’ਤਿ ਪਾਤੋਵ ਤੇਨ ਸਦ੍ਧਿਂ ਗਾਮਂ ਪਾਵਿਸਿ. ਤੇ ਦ੍ਵੇ ਏਕਂ ਵੀਥਿਂ ਚਰਿਤ੍ਵਾ ਉਲ਼ੁਙ੍ਕਮਤ੍ਤਂ ਯਾਗੁਂ ਲਭਿਤ੍ਵਾ ਆਸਨਸਾਲਾਯਂ ਨਿਸੀਦਿਤ੍ਵਾ ਪਿਵਿਂਸੁ. ਤਤੋ ਆਗਨ੍ਤੁਕੋ ਚਿਨ੍ਤੇਸਿ ‘‘ਨਿਬਦ੍ਧਯਾਗੁ ਮਞ੍ਞੇ ਨਤ੍ਥਿ, ਭਤ੍ਤਕਾਲੇ ਇਦਾਨਿ ਮਨੁਸ੍ਸਾ ਪਣੀਤਂ ਭਤ੍ਤਂ ਦਸ੍ਸਨ੍ਤੀ’’ਤਿ, ਤਤੋ ਭਤ੍ਤਕਾਲੇਪਿ ਪਿਣ੍ਡਾਯ ਚਰਿਤ੍ਵਾ ਲਦ੍ਧਮੇਵ ਭੁਞ੍ਜਿਤ੍ਵਾ ਇਤਰੋ ਆਹ – ‘‘ਕਿਂ, ਭਨ੍ਤੇ, ਸਬ੍ਬਕਾਲਂ ਏਵਂ ਯਾਪੇਥਾ’’ਤਿ? ਆਮਾਵੁਸੋਤਿ. ਭਨ੍ਤੇ, ਪਾਚਿਨਖਣ੍ਡਰਾਜਿ ਫਾਸੁਕਾ, ਤਤ੍ਥ ਗਚ੍ਛਾਮਾਤਿ. ਥੇਰੋ ਨਗਰਤੋ ਦਕ੍ਖਿਣਦ੍ਵਾਰੇਨ ਨਿਕ੍ਖਮਨ੍ਤੋ ਕੁਮ੍ਭਕਾਰਗਾਮਮਗ੍ਗਂ ਪਟਿਪਜ੍ਜਿ. ਇਤਰੋ ਆਹ – ‘‘ਕਿਂ ਪਨ, ਭਨ੍ਤੇ, ਇਮਂ ਮਗ੍ਗਂ ਪਟਿਪਨ੍ਨਤ੍ਥਾ’’ਤਿ? ਨਨੁ ਤ੍ਵਮਾਵੁਸੋ, ਪਾਚਿਨਖਣ੍ਡਰਾਜਿਯਾ ਵਣ੍ਣਂ ਅਭਾਸੀਤਿ? ਕਿਂ ਪਨ, ਭਨ੍ਤੇ, ਤੁਮ੍ਹਾਕਂ ਏਤ੍ਤਕਂ ਕਾਲਂ ਵਸਿਤਟ੍ਠਾਨੇ ਨ ਕੋਚਿ ਅਤਿਰੇਕਪਰਿਕ੍ਖਾਰੋ ਅਤ੍ਥੀਤਿ? ਆਮਾਵੁਸੋ ਮਞ੍ਚਪੀਠਂ ਸਙ੍ਘਿਕਂ, ਤਂ ਪਟਿਸਾਮਿਤਮੇਵ, ਅਞ੍ਞਂ ਕਿਞ੍ਚਿ ਨਤ੍ਥੀਤਿ. ਮਯ੍ਹਂ ਪਨ, ਭਨ੍ਤੇ, ਕਤ੍ਤਰਦਣ੍ਡੋ ਤੇਲਨਾਲ਼ਿ ਉਪਾਹਨਤ੍ਥਵਿਕਾ ਚ ਤਤ੍ਥੇਵਾਤਿ. ਤਯਾਵੁਸੋ, ਏਕਦਿਵਸਂ ਵਸਿਤ੍ਵਾ ਏਤ੍ਤਕਂ ਠਪਿਤਨ੍ਤਿ? ਆਮ, ਭਨ੍ਤੇ. ਸੋ ਪਸਨ੍ਨਚਿਤ੍ਤੋ ਥੇਰਂ ਵਨ੍ਦਿਤ੍ਵਾ ‘‘ਤੁਮ੍ਹਾਦਿਸਾਨਂ, ਭਨ੍ਤੇ, ਸਬ੍ਬਤ੍ਥ ਅਰਞ੍ਞਵਾਸੋਯੇਵ. ਥੂਪਾਰਾਮੋ ਚਤੁਨ੍ਨਂ ਬੁਦ੍ਧਾਨਂ ਧਾਤੁਨਿਧਾਨਟ੍ਠਾਨਂ, ਲੋਹਪਾਸਾਦੇ ਸਪ੍ਪਾਯਂ ਧਮ੍ਮਸ੍ਸਵਨਂ ਮਹਾਚੇਤਿਯਦਸ੍ਸਨਂ ਥੇਰਦਸ੍ਸਨਞ੍ਚ ਲਬ੍ਭਤਿ, ਬੁਦ੍ਧਕਾਲੋ ਵਿਯ ਪਵਤ੍ਤਤਿ. ਇਧੇਵ ਤੁਮ੍ਹੇ ਵਸਥਾ’’ਤਿ ਦੁਤਿਯਦਿਵਸੇ ਪਤ੍ਤਚੀਵਰਂ ਗਹੇਤ੍ਵਾ ਸਯਮੇਵ ਅਗਮਾਸੀਤਿ. ਈਦਿਸਸ੍ਸ ਆਵਾਸੋ ਨ ਪਲਿਬੋਧੋ ਹੋਤਿ.
ਕੁਲਨ੍ਤਿ ਞਾਤਿਕੁਲਂ ਵਾ ਉਪਟ੍ਠਾਕਕੁਲਂ ਵਾ. ਏਕਚ੍ਚਸ੍ਸ ਹਿ ਉਪਟ੍ਠਾਕਕੁਲਮ੍ਪਿ ‘‘ਸੁਖਿਤੇਸੁ ਸੁਖਿਤੋ’’ਤਿਆਦਿਨਾ (ਵਿਭ. ੮੮੮; ਸਂ. ਨਿ. ੪.੨੪੧) ਨਯੇਨ ਸਂਸਟ੍ਠਸ੍ਸ ਵਿਹਰਤੋ ਪਲਿਬੋਧੋ ਹੋਤਿ, ਸੋ ਕੁਲਮਾਨੁਸਕੇਹਿ ਵਿਨਾ ਧਮ੍ਮਸ੍ਸਵਨਾਯ ਸਾਮਨ੍ਤਵਿਹਾਰਮ੍ਪਿ ਨ ਗਚ੍ਛਤਿ. ਏਕਚ੍ਚਸ੍ਸ ਮਾਤਾਪਿਤਰੋਪਿ ਪਲਿਬੋਧਾ ਨ ਹੋਨ੍ਤਿ, ਕੋਰਣ੍ਡਕਵਿਹਾਰਵਾਸਿਤ੍ਥੇਰਸ੍ਸ ਭਾਗਿਨੇਯ੍ਯਦਹਰਭਿਕ੍ਖੁਨੋ ਵਿਯ.
ਸੋ ਕਿਰ ਉਦ੍ਦੇਸਤ੍ਥਂ ਰੋਹਣਂ ਅਗਮਾਸਿ. ਥੇਰਭਗਿਨੀਪਿ ਉਪਾਸਿਕਾ ਸਦਾ ਥੇਰਂ ਤਸ੍ਸ ਪਵਤ੍ਤਿਂ ਪੁਚ੍ਛਤਿ. ਥੇਰੋ ਏਕਦਿਵਸਂ ਦਹਰਂ ਆਨੇਸ੍ਸਾਮੀਤਿ ਰੋਹਣਾਭਿਮੁਖੋ ਪਾਯਾਸਿ. ਦਹਰੋਪਿ ‘‘ਚਿਰਂ ਮੇ ਇਧ ਵੁਤ੍ਥਂ, ਉਪਜ੍ਝਾਯਂ ਦਾਨਿ ਪਸ੍ਸਿਤ੍ਵਾ ਉਪਾਸਿਕਾਯ ਚ ਪਵਤ੍ਤਿਂ ਞਤ੍ਵਾ ਆਗਮਿਸ੍ਸਾਮੀ’’ਤਿ ਰੋਹਣਤੋ ਨਿਕ੍ਖਮਿ. ਤੇ ਉਭੋਪਿ ਗਙ੍ਗਾਤੀਰੇ ਸਮਾਗਚ੍ਛਿਂਸੁ. ਸੋ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਥੇਰਸ੍ਸ ਵਤ੍ਤਂ ਕਤ੍ਵਾ ‘‘ਕੁਹਿਂ ਯਾਸੀ’’ਤਿ ਪੁਚ੍ਛਿਤੋ ਤਮਤ੍ਥਂ ਆਰੋਚੇਸਿ. ਥੇਰੋ ਸੁਟ੍ਠੁ ਤੇ ਕਤਂ, ਉਪਾਸਿਕਾਪਿ ਸਦਾ ਪੁਚ੍ਛਤਿ, ਅਹਮ੍ਪਿ ਏਤਦਤ੍ਥਮੇਵ ਆਗਤੋ, ਗਚ੍ਛ ਤ੍ਵਂ, ਅਹਂ ਪਨ ਇਧੇਵ ਇਮਂ ਵਸ੍ਸਂ ਵਸਿਸ੍ਸਾਮੀਤਿ ਤਂ ਉਯ੍ਯੋਜੇਸਿ. ਸੋ ਵਸ੍ਸੂਪਨਾਯਿਕਦਿਵਸੇਯੇਵ ਤਂ ਵਿਹਾਰਂ ਪਤ੍ਤੋ. ਸੇਨਾਸਨਮ੍ਪਿਸ੍ਸ ਪਿਤਰਾ ਕਾਰਿਤਮੇਵ ਪਤ੍ਤਂ.
ਅਥਸ੍ਸ ਪਿਤਾ ਦੁਤਿਯਦਿਵਸੇ ਆਗਨ੍ਤ੍ਵਾ ‘‘ਕਸ੍ਸ, ਭਨ੍ਤੇ, ਅਮ੍ਹਾਕਂ ਸੇਨਾਸਨਂ ਪਤ੍ਤ’’ਨ੍ਤਿ ਪੁਚ੍ਛਨ੍ਤੋ ‘‘ਆਗਨ੍ਤੁਕਸ੍ਸ ਦਹਰਸ੍ਸਾ’’ਤਿ ਸੁਤ੍ਵਾ ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਆਹ – ‘‘ਭਨ੍ਤੇ, ਅਮ੍ਹਾਕਂ ਸੇਨਾਸਨੇ ਵਸ੍ਸਂ ਉਪਗਤਸ੍ਸ ਵਤ੍ਤਂ ਅਤ੍ਥੀ’’ਤਿ. ਕਿਂ ਉਪਾਸਕਾਤਿ? ਤੇਮਾਸਂ ਅਮ੍ਹਾਕਂਯੇਵ ਘਰੇ ਭਿਕ੍ਖਂ ਗਹੇਤ੍ਵਾ ਪਵਾਰੇਤ੍ਵਾ ਗਮਨਕਾਲੇ ਆਪੁਚ੍ਛਿਤਬ੍ਬਨ੍ਤਿ. ਸੋ ਤੁਣ੍ਹਿਭਾਵੇਨ ਅਧਿਵਾਸੇਸਿ. ਉਪਾਸਕੋਪਿ ਘਰਂ ਗਨ੍ਤ੍ਵਾ ‘‘ਅਮ੍ਹਾਕਂ ਆਵਾਸੇ ਏਕੋ ਆਗਨ੍ਤੁਕੋ ਅਯ੍ਯੋ ਉਪਗਤੋ ਸਕ੍ਕਚ੍ਚਂ ਉਪਟ੍ਠਾਤਬ੍ਬੋ’’ਤਿ ਆਹ. ਉਪਾਸਿਕਾ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤ੍ਵਾ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦੇਸਿ. ਦਹਰੋਪਿ ਭਤ੍ਤਕਾਲੇ ਞਾਤਿਘਰਂ ਅਗਮਾਸਿ. ਨ ਨਂ ਕੋਚਿ ਸਞ੍ਜਾਨਿ.
ਸੋ ਤੇਮਾਸਮ੍ਪਿ ਤਤ੍ਥ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਵਸ੍ਸਂਵੁਤ੍ਥੋ ‘‘ਅਹਂ ਗਚ੍ਛਾਮੀ’’ਤਿ ਆਪੁਚ੍ਛਿ. ਅਥਸ੍ਸ ਞਾਤਕਾ ‘‘ਸ੍ਵੇ, ਭਨ੍ਤੇ, ਗਚ੍ਛਥਾ’’ਤਿ ਦੁਤਿਯਦਿਵਸੇ ਘਰੇਯੇਵ ਭੋਜੇਤ੍ਵਾ ਤੇਲਨਾਲ਼ਿਂ ਪੂਰੇਤ੍ਵਾ ਏਕਂ ਗੁਲ਼ਪਿਣ੍ਡਂ ਨਵਹਤ੍ਥਞ੍ਚ ਸਾਟਕਂ ਦਤ੍ਵਾ ‘‘ਗਚ੍ਛਥ, ਭਨ੍ਤੇ’’ਤਿ ਆਹਂਸੁ. ਸੋ ਅਨੁਮੋਦਨਂ ਕਤ੍ਵਾ ਰੋਹਣਾਭਿਮੁਖੋ ਪਾਯਾਸਿ.
ਉਪਜ੍ਝਾਯੋਪਿਸ੍ਸ ਪਵਾਰੇਤ੍ਵਾ ਪਟਿਪਥਂ ਆਗਚ੍ਛਨ੍ਤੋ ਪੁਬ੍ਬੇ ਦਿਟ੍ਠਟ੍ਠਾਨੇਯੇਵ ਤਂ ਅਦ੍ਦਸ. ਸੋ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਥੇਰਸ੍ਸ ਵਤ੍ਤਂ ਅਕਾਸਿ. ਅਥ ਨਂ ਥੇਰੋ ਪੁਚ੍ਛਿ ‘‘ਕਿਂ, ਭਦ੍ਦਮੁਖ, ਦਿਟ੍ਠਾ ਤੇ ਉਪਾਸਿਕਾ’’ਤਿ? ਸੋ ‘‘ਆਮ, ਭਨ੍ਤੇ’’ਤਿ ਸਬ੍ਬਂ ਪਵਤ੍ਤਿਂ ਆਰੋਚੇਤ੍ਵਾ ਤੇਨ ਤੇਲੇਨ ਥੇਰਸ੍ਸ ਪਾਦੇ ਮਕ੍ਖੇਤ੍ਵਾ ਗੁਲ਼ੇਨ ਪਾਨਕਂ ਕਤ੍ਵਾ ਤਮ੍ਪਿ ਸਾਟਕਂ ਥੇਰਸ੍ਸੇਵ ਦਤ੍ਵਾ ਥੇਰਂ ਵਨ੍ਦਿਤ੍ਵਾ ‘‘ਮਯ੍ਹਂ, ਭਨ੍ਤੇ, ਰੋਹਣਂਯੇਵ ਸਪ੍ਪਾਯ’’ਨ੍ਤਿ ਅਗਮਾਸਿ. ਥੇਰੋਪਿ ਵਿਹਾਰਂ ਆਗਨ੍ਤ੍ਵਾ ਦੁਤਿਯਦਿਵਸੇ ਕੋਰਣ੍ਡਕਗਾਮਂ ਪਾਵਿਸਿ.
ਉਪਾਸਿਕਾਪਿ ‘‘ਮਯ੍ਹਂ ਭਾਤਾ ਮਮ ਪੁਤ੍ਤਂ ਗਹੇਤ੍ਵਾ ਇਦਾਨਿ ਆਗਚ੍ਛਤੀ’’ਤਿ ਸਦਾ ਮਗ੍ਗਂ ਓਲੋਕਯਮਾਨਾਵ ਤਿਟ੍ਠਤਿ. ਸਾ ਤਂ ਏਕਕਮੇਵ ਆਗਚ੍ਛਨ੍ਤਂ ਦਿਸ੍ਵਾ ‘‘ਮਤੋ ਮੇ ਮਞ੍ਞੇ ਪੁਤ੍ਤੋ, ਅਯਂ ਥੇਰੋ ਏਕਕੋਵ ਆਗਚ੍ਛਤੀ’’ਤਿ ਥੇਰਸ੍ਸ ਪਾਦਮੂਲੇ ਨਿਪਤਿਤ੍ਵਾ ਪਰਿਦੇਵਮਾਨਾ ਰੋਦਿ. ਥੇਰੋ ‘‘ਨੂਨ ਦਹਰੋ ਅਪ੍ਪਿਚ੍ਛਤਾਯ ਅਤ੍ਤਾਨਂ ਅਜਾਨਾਪੇਤ੍ਵਾਵ ਗਤੋ’’ਤਿ ਤਂ ਸਮਸ੍ਸਾਸੇਤ੍ਵਾ ਸਬ੍ਬਂ ਪਵਤ੍ਤਿਂ ਆਰੋਚੇਤ੍ਵਾ ਪਤ੍ਤਤ੍ਥਵਿਕਤੋ ਤਂ ਸਾਟਕਂ ਨੀਹਰਿਤ੍ਵਾ ਦਸ੍ਸੇਤਿ.
ਉਪਾਸਿਕਾ ਪਸੀਦਿਤ੍ਵਾ ਪੁਤ੍ਤੇਨ ਗਤਦਿਸਾਭਿਮੁਖਾ ਉਰੇਨ ਨਿਪਜ੍ਜਿਤ੍ਵਾ ਨਮਸ੍ਸਮਾਨਾ ਆਹ – ‘‘ਮਯ੍ਹਂ ਪੁਤ੍ਤਸਦਿਸਂ ਵਤ ਮਞ੍ਞੇ ਭਿਕ੍ਖੁਂ ਕਾਯਸਕ੍ਖਿਂ ਕਤ੍ਵਾ ਭਗਵਾ ਰਥਵਿਨੀਤਪਟਿਪਦਂ (ਮ. ਨਿ. ੧.੨੫੨ ਆਦਯੋ), ਨਾਲਕਪਟਿਪਦਂ (ਸੁ. ਨਿ. ੬੮੪ ਆਦਯੋ), ਤੁਵਟ੍ਟਕਪਟਿਪਦਂ (ਸੁ. ਨਿ. ੯੨੧ ਆਦਯੋ), ਚਤੁਪਚ੍ਚਯਸਨ੍ਤੋਸਭਾਵਨਾਰਾਮਤਾਦੀਪਕਂ ਮਹਾਅਰਿਯਵਂਸਪਟਿਪਦਞ੍ਚ (ਅ. ਨਿ. ੪.੨੮; ਦੀ. ਨਿ. ੩.੩੦੯) ਦੇਸੇਸਿ. ਵਿਜਾਤਮਾਤੁਯਾ ਨਾਮ ਗੇਹੇ ਤੇਮਾਸਂ ਭੁਞ੍ਜਮਾਨੋਪਿ ‘ਅਹਂ ਪੁਤ੍ਤੋ ਤ੍ਵਂ ਮਾਤਾ’ਤਿ ਨ ਵਕ੍ਖਤਿ, ਅਹੋ ਅਚ੍ਛਰਿਯਮਨੁਸ੍ਸੋ’’ਤਿ. ਏਵਰੂਪਸ੍ਸ ਮਾਤਾਪਿਤਰੋਪਿ ਪਲਿਬੋਧਾ ਨ ਹੋਨ੍ਤਿ, ਪਗੇਵ ਅਞ੍ਞਂ ਉਪਟ੍ਠਾਕਕੁਲ’’ਨ੍ਤਿ.
ਲਾਭੋਤਿ ਚਤ੍ਤਾਰੋ ਪਚ੍ਚਯਾ. ਤੇ ਕਥਂ ਪਲਿਬੋਧਾ ਹੋਨ੍ਤਿ? ਪੁਞ੍ਞਵਨ੍ਤਸ੍ਸ ਹਿ ਭਿਕ੍ਖੁਨੋ ਗਤਗਤਟ੍ਠਾਨੇ ਮਨੁਸ੍ਸਾ ਮਹਾਪਰਿਵਾਰੇ ਪਚ੍ਚਯੇ ਦੇਨ੍ਤਿ. ਸੋ ਤੇਸਂ ਅਨੁਮੋਦੇਨ੍ਤੋ ਧਮ੍ਮਂ ਦੇਸੇਨ੍ਤੋ ਸਮਣਧਮ੍ਮਂ ਕਾਤੁਂ ਨ ਓਕਾਸਂ ਲਭਤਿ. ਅਰੁਣੁਗ੍ਗਮਨਤੋ ਯਾਵ ਪਠਮਯਾਮੋ, ਤਾਵ ਮਨੁਸ੍ਸਸਂਸਗ੍ਗੋ ਨ ਉਪਚ੍ਛਿਜ੍ਜਤਿ. ਪੁਨ ਬਲਵਪਚ੍ਚੂਸੇਯੇਵ ਬਾਹੁਲ੍ਲਿਕਪਿਣ੍ਡਪਾਤਿਕਾ ਆਗਨ੍ਤ੍ਵਾ ‘‘ਭਨ੍ਤੇ, ਅਸੁਕੋ ਉਪਾਸਕੋ ਉਪਾਸਿਕਾ ਅਮਚ੍ਚੋ ਅਮਚ੍ਚਧੀਤਾ ਤੁਮ੍ਹਾਕਂ ਦਸ੍ਸਨਕਾਮਾ’’ਤਿ ਵਦਨ੍ਤਿ, ਸੋ ਗਣ੍ਹਾਵੁਸੋ, ਪਤ੍ਤਚੀਵਰਨ੍ਤਿ ਗਮਨਸਜ੍ਜੋਵ ਹੋਤੀਤਿ ਨਿਚ੍ਚਬ੍ਯਾਵਟੋ, ਤਸ੍ਸੇਵ ਤੇ ਪਚ੍ਚਯਾ ਪਲਿਬੋਧਾ ਹੋਨ੍ਤਿ. ਤੇਨ ਗਣਂ ਪਹਾਯ ਯਤ੍ਥ ਨਂ ਨ ਜਾਨਨ੍ਤਿ, ਤਤ੍ਥ ਏਕਕੇਨ ਚਰਿਤਬ੍ਬਂ. ਏਵਂ ਸੋ ਪਲਿਬੋਧੋ ਉਪਚ੍ਛਿਜ੍ਜਤੀਤਿ.
ਗਣੋਤਿ ਸੁਤ੍ਤਨ੍ਤਿਕਗਣੋ ਵਾ ਆਭਿਧਮ੍ਮਿਕਗਣੋ ਵਾ, ਯੋ ਤਸ੍ਸ ਉਦ੍ਦੇਸਂ ਵਾ ਪਰਿਪੁਚ੍ਛਂ ਵਾ ਦੇਨ੍ਤੋ ਸਮਣਧਮ੍ਮਸ੍ਸ ਓਕਾਸਂ ਨ ਲਭਤਿ, ਤਸ੍ਸੇਵ ਗਣੋ ਪਲਿਬੋਧੋ ਹੋਤਿ, ਤੇਨ ਸੋ ਏਵਂ ਉਪਚ੍ਛਿਨ੍ਦਿਤਬ੍ਬੋ. ਸਚੇ ਤੇਸਂ ਭਿਕ੍ਖੂਨਂ ਬਹੁ ਗਹਿਤਂ ਹੋਤਿ, ਅਪ੍ਪਂ ਅਵਸਿਟ੍ਠਂ, ਤਂ ਨਿਟ੍ਠਪੇਤ੍ਵਾ ਅਰਞ੍ਞਂ ਪਵਿਸਿਤਬ੍ਬਂ. ਸਚੇ ਅਪ੍ਪਂ ਗਹਿਤਂ, ਬਹੁ ਅਵਸਿਟ੍ਠਂ, ਯੋਜਨਤੋ ਪਰਂ ਅਗਨ੍ਤ੍ਵਾ ਅਨ੍ਤੋਯੋਜਨਪਰਿਚ੍ਛੇਦੇ ਅਞ੍ਞਂ ਗਣਵਾਚਕਂ ਉਪਸਙ੍ਕਮਿਤ੍ਵਾ ‘‘ਇਮੇ ਆਯਸ੍ਮਾ ਉਦ੍ਦੇਸਾਦੀਹਿ ਸਙ੍ਗਣ੍ਹਤੂ’’ਤਿ ਵਤ੍ਤਬ੍ਬਂ. ਏਵਂ ਅਲਭਮਾਨੇਨ ‘‘ਮਯ੍ਹਮਾਵੁਸੋ, ਏਕਂ ਕਿਚ੍ਚਂ ਅਤ੍ਥਿ, ਤੁਮ੍ਹੇ ਯਥਾਫਾਸੁਕਟ੍ਠਾਨਾਨਿ ਗਚ੍ਛਥਾ’’ਤਿ ਗਣਂ ਪਹਾਯ ਅਤ੍ਤਨੋ ਕਮ੍ਮਂ ਕਤ੍ਤਬ੍ਬਨ੍ਤਿ.
ਕਮ੍ਮਨ੍ਤਿ ਨਵਕਮ੍ਮਂ. ਤਂ ਕਰੋਨ੍ਤੇਨ ਵਡ੍ਢਕੀਆਦੀਹਿ ਲਦ੍ਧਾਲਦ੍ਧਂ ਜਾਨਿਤਬ੍ਬਂ, ਕਤਾਕਤੇ ਉਸ੍ਸੁਕ੍ਕਂ ਆਪਜ੍ਜਿਤਬ੍ਬਨ੍ਤਿ ਸਬ੍ਬਦਾ ਪਲਿਬੋਧੋ ਹੋਤਿ. ਸੋਪਿ ਏਵਂ ਉਪਚ੍ਛਿਨ੍ਦਿਤਬ੍ਬੋ, ਸਚੇ ਅਪ੍ਪਂ ਅਵਸਿਟ੍ਠਂ ਹੋਤਿ ਨਿਟ੍ਠਪੇਤਬ੍ਬਂ. ਸਚੇ ਬਹੁ, ਸਙ੍ਘਿਕਞ੍ਚੇ ਨਵਕਮ੍ਮਂ, ਸਙ੍ਘਸ੍ਸ ਵਾ ਸਙ੍ਘਭਾਰਹਾਰਕਭਿਕ੍ਖੂਨਂ ਵਾ ਨਿਯ੍ਯਾਦੇਤਬ੍ਬਂ. ਅਤ੍ਤਨੋ ਸਨ੍ਤਕਞ੍ਚੇ, ਅਤ੍ਤਨੋ ਭਾਰਹਾਰਕਾਨਂ ਨਿਯ੍ਯਾਦੇਤਬ੍ਬਂ. ਤਾਦਿਸੇ ਅਲਭਨ੍ਤੇਨ ਸਙ੍ਘਸ੍ਸ ਪਰਿਚ੍ਚਜਿਤ੍ਵਾ ਗਨ੍ਤਬ੍ਬਨ੍ਤਿ.
ਅਦ੍ਧਾਨਨ੍ਤਿ ਮਗ੍ਗਗਮਨਂ. ਯਸ੍ਸ ਹਿ ਕਤ੍ਥਚਿ ਪਬ੍ਬਜ੍ਜਾਪੇਕ੍ਖੋ ਵਾ ਹੋਤਿ, ਪਚ੍ਚਯਜਾਤਂ ਵਾ ਕਿਞ੍ਚਿ ਲਦ੍ਧਬ੍ਬਂ ਹੋਤਿ. ਸਚੇ ਤਂ ਅਲਭਨ੍ਤੋ ਨ ਸਕ੍ਕੋਤਿ ਅਧਿਵਾਸੇਤੁਂ, ਅਰਞ੍ਞਂ ਪਵਿਸਿਤ੍ਵਾ ਸਮਣਧਮ੍ਮਂ ਕਰੋਨ੍ਤਸ੍ਸਪਿ ਗਮਿਕਚਿਤ੍ਤਂ ਨਾਮ ਦੁਪ੍ਪਟਿਵਿਨੋਦਨੀਯਂ ਹੋਤਿ, ਤਸ੍ਮਾ ਗਨ੍ਤ੍ਵਾ ਤਂ ਕਿਚ੍ਚਂ ਤੀਰੇਤ੍ਵਾਵ ਸਮਣਧਮ੍ਮੇ ਉਸ੍ਸੁਕ੍ਕਂ ਕਾਤਬ੍ਬਨ੍ਤਿ.
ਞਾਤੀਤਿ ਵਿਹਾਰੇ ਆਚਰਿਯੁਪਜ੍ਝਾਯਸਦ੍ਧਿਵਿਹਾਰਿਕਅਨ੍ਤੇਵਾਸਿਕਸਮਾਨੁਪਜ੍ਝਾਯਕਸਮਾਨਾਚਰਿਯਕਾ, ਘਰੇ ਮਾਤਾ ਪਿਤਾ ਭਾਤਾਤਿ ਏਵਮਾਦਿਕਾ. ਤੇ ਗਿਲਾਨਾ ਇਮਸ੍ਸ ਪਲਿਬੋਧਾ ਹੋਨ੍ਤਿ, ਤਸ੍ਮਾ ਸੋ ਪਲਿਬੋਧੋ ਉਪਟ੍ਠਹਿਤ੍ਵਾ ਤੇਸਂ ਪਾਕਤਿਕਕਰਣੇਨ ਉਪਚ੍ਛਿਨ੍ਦਿਤਬ੍ਬੋ.
ਤਤ੍ਥ ਉਪਜ੍ਝਾਯੋ ਤਾਵ ਗਿਲਾਨੋ ਸਚੇ ਲਹੁਂ ਨ ਵੁਟ੍ਠਾਤਿ, ਯਾਵਜੀਵਮ੍ਪਿ ਪਟਿਜਗ੍ਗਿਤਬ੍ਬੋ. ਤਥਾ ਪਬ੍ਬਜ੍ਜਾਚਰਿਯੋ ਉਪਸਮ੍ਪਦਾਚਰਿਯੋ ਸਦ੍ਧਿਵਿਹਾਰਿਕੋ ਉਪਸਮ੍ਪਾਦਿਤਪਬ੍ਬਾਜਿਤਅਨ੍ਤੇਵਾਸਿਕਸਮਾਨੁਪਜ੍ਝਾਯਕਾ ਚ. ਨਿਸ੍ਸਯਾਚਰਿਯਉਦ੍ਦੇਸਾਚਰਿਯਨਿਸ੍ਸਯਨ੍ਤੇਵਾਸਿਕਉਦ੍ਦੇਸਨ੍ਤੇਵਾਸਿਕਸਮਾਨਾਚਰਿਯਕਾ ਪਨ ਯਾਵ ਨਿਸ੍ਸਯਉਦ੍ਦੇਸਾ ਅਨੁਪਚ੍ਛਿਨ੍ਨਾ, ਤਾਵ ਪਟਿਜਗ੍ਗਿਤਬ੍ਬਾ. ਪਹੋਨ੍ਤੇਨ ਤਤੋ ਉਦ੍ਧਮ੍ਪਿ ਪਟਿਜਗ੍ਗਿਤਬ੍ਬਾ ਏਵ. ਮਾਤਾਪਿਤੂਸੁ ਉਪਜ੍ਝਾਯੇ ਵਿਯ ਪਟਿਪਜ੍ਜਿਤਬ੍ਬਂ. ਸਚੇਪਿ ਹਿ ਤੇ ਰਜ੍ਜੇ ਠਿਤਾ ਹੋਨ੍ਤਿ, ਪੁਤ੍ਤਤੋ ਚ ਉਪਟ੍ਠਾਨਂ ਪਚ੍ਚਾਸੀਸਨ੍ਤਿ, ਕਾਤਬ੍ਬਮੇਵ. ਅਥ ਤੇਸਂ ਭੇਸਜ੍ਜਂ ਨਤ੍ਥਿ, ਅਤ੍ਤਨੋ ਸਨ੍ਤਕਂ ਦਾਤਬ੍ਬਂ. ਅਸਤਿ ਭਿਕ੍ਖਾਚਰਿਯਾਯ ਪਰਿਯੇਸਿਤ੍ਵਾਪਿ ਦਾਤਬ੍ਬਮੇਵ. ਭਾਤੁਭਗਿਨੀਨਂ ਪਨ ਤੇਸਂ ਸਨ੍ਤਕਮੇਵ ਯੋਜੇਤ੍ਵਾ ਦਾਤਬ੍ਬਂ. ਸਚੇ ਨਤ੍ਥਿ ਅਤ੍ਤਨੋ ਸਨ੍ਤਕਂ ਤਾਵਕਾਲਿਕਂ ਦਤ੍ਵਾ ਪਚ੍ਛਾ ਲਭਨ੍ਤੇਨ ਗਣ੍ਹਿਤਬ੍ਬਂ. ਅਲਭਨ੍ਤੇਨ ਨ ਚੋਦੇਤਬ੍ਬਾ. ਅਞ੍ਞਾਤਕਸ੍ਸ ਭਗਿਨਿਸਾਮਿਕਸ੍ਸ ਭੇਸਜ੍ਜਂ ਨੇਵ ਕਾਤੁਂ ਨ ਦਾਤੁਂ ਵਟ੍ਟਤਿ. ‘‘ਤੁਯ੍ਹਂ ਸਾਮਿਕਸ੍ਸ ਦੇਹੀ’’ਤਿ ਵਤ੍ਵਾ ਪਨ ਭਗਿਨਿਯਾ ਦਾਤਬ੍ਬਂ. ਭਾਤੁਜਾਯਾਯਪਿ ਏਸੇਵ ਨਯੋ. ਤੇਸਂ ਪਨ ਪੁਤ੍ਤਾ ਇਮਸ੍ਸ ਞਾਤਕਾ ਏਵਾਤਿ ਤੇਸਂ ਕਾਤੁਂ ਵਟ੍ਟਤੀਤਿ.
ਆਬਾਧੋਤਿ ਯੋਕੋਚਿ ਰੋਗੋ. ਸੋ ਬਾਧਯਮਾਨੋ ਪਲਿਬੋਧੋ ਹੋਤਿ, ਤਸ੍ਮਾ ਭੇਸਜ੍ਜਕਰਣੇਨ ਉਪਚ੍ਛਿਨ੍ਦਿਤਬ੍ਬੋ. ਸਚੇ ਪਨ ਕਤਿਪਾਹਂ ਭੇਸਜ੍ਜਂ ਕਰੋਨ੍ਤਸ੍ਸਪਿ ਨ ਵੂਪਸਮ੍ਮਤਿ, ਨਾਹਂ ਤੁਯ੍ਹਂ ਦਾਸੋ, ਨ ਭਟਕੋ, ਤਂਯੇਵ ਹਿ ਪੋਸੇਨ੍ਤੋ ਅਨਮਤਗ੍ਗੇ ਸਂਸਾਰਵਟ੍ਟੇ ਦੁਕ੍ਖਂ ਪਤ੍ਤੋਤਿ ਅਤ੍ਤਭਾਵਂ ਗਰਹਿਤ੍ਵਾ ਸਮਣਧਮ੍ਮੋ ਕਾਤਬ੍ਬੋਤਿ.
ਗਨ੍ਥੋਤਿ ਪਰਿਯਤ੍ਤਿਹਰਣਂ. ਤਂ ਸਜ੍ਝਾਯਾਦੀਹਿ ਨਿਚ੍ਚਬ੍ਯਾਵਟਸ੍ਸ ਪਲਿਬੋਧੋ ਹੋਤਿ, ਨ ਇਤਰਸ੍ਸ. ਤਤ੍ਰਿਮਾਨਿ ਵਤ੍ਥੂਨਿ –
ਮਜ੍ਝਿਮਭਾਣਕਦੇਵਤ੍ਥੇਰੋ ਕਿਰ ਮਲਯਵਾਸਿਦੇਵਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਕਮ੍ਮਟ੍ਠਾਨਂ ਯਾਚਿ. ਥੇਰੋ ਕੀਦਿਸੋਸਿ, ਆਵੁਸੋ, ਪਰਿਯਤ੍ਤਿਯਨ੍ਤਿ ਪੁਚ੍ਛਿ. ਮਜ੍ਝਿਮੋ ਮੇ, ਭਨ੍ਤੇ, ਪਗੁਣੋਤਿ. ਆਵੁਸੋ, ਮਜ੍ਝਿਮੋ ਨਾਮੇਸੋ ਦੁਪ੍ਪਰਿਹਾਰੋ, ਮੂਲਪਣ੍ਣਾਸਂ ਸਜ੍ਝਾਯਨ੍ਤਸ੍ਸ ਮਜ੍ਝਿਮਪਣ੍ਣਾਸਕੋ ਆਗਚ੍ਛਤਿ, ਤਂ ਸਜ੍ਝਾਯਨ੍ਤਸ੍ਸ ਉਪਰਿਪਣ੍ਣਾਸਕੋ. ਕੁਤੋ ਤੁਯ੍ਹਂ ਕਮ੍ਮਟ੍ਠਾਨਨ੍ਤਿ? ਭਨ੍ਤੇ, ਤੁਮ੍ਹਾਕਂ ਸਨ੍ਤਿਕੇ ਕਮ੍ਮਟ੍ਠਾਨਂ ਲਭਿਤ੍ਵਾ ਪੁਨ ਨ ਓਲੋਕੇਸ੍ਸਾਮੀਤਿ ਕਮ੍ਮਟ੍ਠਾਨਂ ਗਹੇਤ੍ਵਾ ਏਕੂਨਵੀਸਤਿਵਸ੍ਸਾਨਿ ਸਜ੍ਝਾਯਂ ਅਕਤ੍ਵਾ ਵੀਸਤਿਮੇ ਵਸ੍ਸੇ ਅਰਹਤ੍ਤਂ ਪਤ੍ਵਾ ਸਜ੍ਝਾਯਤ੍ਥਾਯ ਆਗਤਾਨਂ ਭਿਕ੍ਖੂਨਂ ‘‘ਵੀਸਤਿ ਮੇ, ਆਵੁਸੋ, ਵਸ੍ਸਾਨਿ ਪਰਿਯਤ੍ਤਿਂ ਅਨੋਲੋਕੇਨ੍ਤਸ੍ਸ, ਅਪਿਚ ਖੋ ਕਤਪਰਿਚਯੋ ਅਹਮੇਤ੍ਥ ਆਰਭਥਾ’’ਤਿ ਵਤ੍ਵਾ ਆਦਿਤੋ ਪਟ੍ਠਾਯ ਯਾਵ ਪਰਿਯੋਸਾਨਾ ਏਕਬ੍ਯਞ੍ਜਨੇਪਿਸ੍ਸ ਕਙ੍ਖਾ ਨਾਹੋਸਿ.
ਕਰੁਲ਼ਿਯਗਿਰਿਵਾਸੀਨਾਗਤ੍ਥੇਰੋਪਿ ਅਟ੍ਠਾਰਸਵਸ੍ਸਾਨਿ ਪਰਿਯਤ੍ਤਿਂ ਛਡ੍ਡੇਤ੍ਵਾ ਭਿਕ੍ਖੂਨਂ ਧਾਤੁਕਥਂ ਉਦ੍ਦਿਸਿ. ਤੇਸਂ ਗਾਮਵਾਸਿਕਤ੍ਥੇਰੇਹਿ ਸਦ੍ਧਿਂ ਸਂਸਨ੍ਦੇਨ੍ਤਾਨਂ ਏਕਪਞ੍ਹੋਪਿ ਉਪ੍ਪਟਿਪਾਟਿਯਾ ਆਗਤੋ ਨਾਹੋਸਿ.
ਮਹਾਵਿਹਾਰੇਪਿ ਤਿਪਿਟਕਚੂਲ਼ਾਭਯਤ੍ਥੇਰੋ ਨਾਮ ਅਟ੍ਠਕਥਂ ਅਨੁਗ੍ਗਹੇਤ੍ਵਾਵ ਪਞ੍ਚਨਿਕਾਯਮਣ੍ਡਲੇ ਤੀਣਿ ਪਿਟਕਾਨਿ ਪਰਿਵਤ੍ਤੇਸ੍ਸਾਮੀਤਿ ਸੁਵਣ੍ਣਭੇਰਿਂ ਪਹਰਾਪੇਸਿ. ਭਿਕ੍ਖੁਸਙ੍ਘੋ ਕਤਮਾਚਰਿਯਾਨਂ ਉਗ੍ਗਹੋ, ਅਤ੍ਤਨੋ ਆਚਰਿਯੁਗ੍ਗਹਞ੍ਞੇਵ ਵਦਤੁ, ਇਤਰਥਾ ਵਤ੍ਤੁਂ ਨ ਦੇਮਾਤਿ ਆਹ. ਉਪਜ੍ਝਾਯੋਪਿ ਨਂ ਅਤ੍ਤਨੋ ਉਪਟ੍ਠਾਨਮਾਗਤਂ ਪੁਚ੍ਛਿ ‘‘ਤ੍ਵਮਾਵੁਸੋ, ਭੇਰਿਂ ਪਹਰਾਪੇਸੀ’’ਤਿ? ਆਮ, ਭਨ੍ਤੇ. ਕਿਂ ਕਾਰਣਾਤਿ? ਪਰਿਯਤ੍ਤਿਂ, ਭਨ੍ਤੇ, ਪਰਿਵਤ੍ਤੇਸ੍ਸਾਮੀਤਿ. ਆਵੁਸੋ ਅਭਯ, ਆਚਰਿਯਾ ਇਦਂ ਪਦਂ ਕਥਂ ਵਦਨ੍ਤੀਤਿ? ਏਵਂ ਵਦਨ੍ਤਿ, ਭਨ੍ਤੇਤਿ. ਥੇਰੋ ਹੁਨ੍ਤਿ ਪਟਿਬਾਹਿ. ਪੁਨ ਸੋ ਅਞ੍ਞੇਨ ਅਞ੍ਞੇਨ ਪਰਿਯਾਯੇਨ ਏਵਂ ਵਦਨ੍ਤਿ ਭਨ੍ਤੇਤਿ ਤਿਕ੍ਖਤ੍ਤੁਂ ਆਹ. ਥੇਰੋ ਸਬ੍ਬਂ ਹੁਨ੍ਤਿ ਪਟਿਬਾਹਿਤ੍ਵਾ ‘‘ਆਵੁਸੋ, ਤਯਾ ਪਠਮਂ ਕਥਿਤੋ ਏਵ ਆਚਰਿਯਮਗ੍ਗੋ, ਆਚਰਿਯਮੁਖਤੋ ਪਨ ਅਨੁਗ੍ਗਹਿਤਤ੍ਤਾ ‘ਏਵਂ ਆਚਰਿਯਾ ਵਦਨ੍ਤੀ’ਤਿ ਸਣ੍ਠਾਤੁਂ ਨਾਸਕ੍ਖਿ. ਗਚ੍ਛ ਅਤ੍ਤਨੋ ਆਚਰਿਯਾਨਂ ਸਨ੍ਤਿਕੇ ਸੁਣਾਹੀ’’ਤਿ. ਕੁਹਿਂ, ਭਨ੍ਤੇ, ਗਚ੍ਛਾਮੀਤਿ? ਗਙ੍ਗਾਯ ਪਰਤੋ ਰੋਹਣਜਨਪਦੇ ਤੁਲਾਧਾਰਪਬ੍ਬਤਵਿਹਾਰੇ ਸਬ੍ਬਪਰਿਯਤ੍ਤਿਕੋ ਮਹਾਧਮ੍ਮਰਕ੍ਖਿਤਤ੍ਥੇਰੋ ਨਾਮ ਵਸਤਿ, ਤਸ੍ਸ ਸਨ੍ਤਿਕਂ ਗਚ੍ਛਾਤਿ. ਸਾਧੁ, ਭਨ੍ਤੇਤਿ ਥੇਰਂ ਵਨ੍ਦਿਤ੍ਵਾ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਨਿਸੀਦਿ. ਥੇਰੋ ਕਸ੍ਮਾ ਆਗਤੋਸੀਤਿ ਪੁਚ੍ਛਿ. ਧਮ੍ਮਂ ਸੋਤੁਂ, ਭਨ੍ਤੇਤਿ. ਆਵੁਸੋ ਅਭਯ, ਦੀਘਮਜ੍ਝਿਮੇਸੁ ਮਂ ਕਾਲੇਨ ਕਾਲਂ ਪੁਚ੍ਛਨ੍ਤਿ. ਅਵਸੇਸਂ ਪਨ ਮੇ ਤਿਂਸਮਤ੍ਤਾਨਿ ਵਸ੍ਸਾਨਿ ਨ ਓਲੋਕਿਤਪੁਬ੍ਬਂ. ਅਪਿਚ ਤ੍ਵਂ ਰਤ੍ਤਿਂ ਮਮ ਸਨ੍ਤਿਕੇ ਪਰਿਵਤ੍ਤੇਹਿ. ਅਹਂ ਤੇ ਦਿਵਾ ਕਥਯਿਸ੍ਸਾਮੀਤਿ. ਸੋ ਸਾਧੁ, ਭਨ੍ਤੇਤਿ ਤਥਾ ਅਕਾਸਿ. ਪਰਿਵੇਣਦ੍ਵਾਰੇ ਮਹਾਮਣ੍ਡਪਂ ਕਾਰੇਤ੍ਵਾ ਗਾਮਵਾਸਿਨੋ ਦਿਵਸੇ ਦਿਵਸੇ ਧਮ੍ਮਸ੍ਸਵਨਤ੍ਥਾਯ ਆਗਚ੍ਛਨ੍ਤਿ. ਥੇਰੋ ਰਤ੍ਤਿਂ ਪਰਿਵਤ੍ਤਿ. ਤਂ ਦਿਵਾ ਕਥਯਨ੍ਤੋ ਅਨੁਪੁਬ੍ਬੇਨ ਦੇਸਨਂ ਨਿਟ੍ਠਪੇਤ੍ਵਾ ਅਭਯਤ੍ਥੇਰਸ੍ਸ ਸਨ੍ਤਿਕੇ ਤਟ੍ਟਿਕਾਯ ਨਿਸੀਦਿਤ੍ਵਾ ‘‘ਆਵੁਸੋ, ਮਯ੍ਹਂ ਕਮ੍ਮਟ੍ਠਾਨਂ ਕਥੇਹੀ’’ਤਿ ਆਹ. ਭਨ੍ਤੇ, ਕਿਂ ਭਣਥ, ਨਨੁ ਮਯਾ ਤੁਮ੍ਹਾਕਮੇਵ ਸਨ੍ਤਿਕੇ ਸੁਤਂ? ਕਿਮਹਂ ਤੁਮ੍ਹੇਹਿ ਅਞ੍ਞਾਤਂ ਕਥੇਸ੍ਸਾਮੀਤਿ? ਤਤੋ ਨਂ ਥੇਰੋ ਅਞ੍ਞੋ ਏਸ, ਆਵੁਸੋ, ਗਤਕਸ੍ਸ ਮਗ੍ਗੋ ਨਾਮਾਤਿ ਆਹ. ਅਭਯਥੇਰੋ ਕਿਰ ਤਦਾ ਸੋਤਾਪਨ੍ਨੋ ਹੋਤਿ. ਅਥਸ੍ਸ ਸੋ ਕਮ੍ਮਟ੍ਠਾਨਂ ਦਤ੍ਵਾ ਆਗਨ੍ਤ੍ਵਾ ਲੋਹਪਾਸਾਦੇ ਧਮ੍ਮਂ ਪਰਿਵਤ੍ਤੇਨ੍ਤੋ ਥੇਰੋ ਪਰਿਨਿਬ੍ਬੁਤੋਤਿ ਅਸ੍ਸੋਸਿ. ਸੁਤ੍ਵਾ ‘‘ਆਹਰਥਾਵੁਸੋ, ਚੀਵਰ’’ਨ੍ਤਿ ਚੀਵਰਂ ਪਾਰੁਪਿਤ੍ਵਾ ‘‘ਅਨੁਚ੍ਛਵਿਕੋ, ਆਵੁਸੋ, ਅਮ੍ਹਾਕਂ ਆਚਰਿਯਸ੍ਸ ਅਰਹਤ੍ਤਮਗ੍ਗੋ. ਆਚਰਿਯੋ ਨੋ, ਆਵੁਸੋ, ਉਜੁ ਆਜਾਨੀਯੋ. ਸੋ ਅਤ੍ਤਨੋ ਧਮ੍ਮਨ੍ਤੇਵਾਸਿਕਸ੍ਸ ਸਨ੍ਤਿਕੇ ਤਟ੍ਟਿਕਾਯ ਨਿਸੀਦਿਤ੍ਵਾ ‘ਮਯ੍ਹਂ ਕਮ੍ਮਟ੍ਠਾਨਂ ਕਥੇਹੀ’ਤਿ ਆਹ. ਅਨੁਚ੍ਛਵਿਕੋ, ਆਵੁਸੋ, ਥੇਰਸ੍ਸ ਅਰਹਤ੍ਤਮਗ੍ਗੋ’’ਤਿ. ਏਵਰੂਪਾਨਂ ਗਨ੍ਥੋ ਪਲਿਬੋਧੋ ਨ ਹੋਤੀਤਿ.
ਇਦ੍ਧੀਤਿ ਪੋਥੁਜ੍ਜਨਿਕਾ ਇਦ੍ਧਿ. ਸਾ ਹਿ ਉਤ੍ਤਾਨਸੇਯ੍ਯਕਦਾਰਕੋ ਵਿਯ ਤਰੁਣਸਸ੍ਸਂ ਵਿਯ ਚ ਦੁਪ੍ਪਰਿਹਾਰਾ ਹੋਤਿ. ਅਪ੍ਪਮਤ੍ਤਕੇਨੇਵ ਭਿਜ੍ਜਤਿ. ਸਾ ਪਨ ਵਿਪਸ੍ਸਨਾਯ ਪਲਿਬੋਧੋ ਹੋਤਿ, ਨ ਸਮਾਧਿਸ੍ਸ, ਸਮਾਧਿਂ ਪਤ੍ਵਾ ਪਤ੍ਤਬ੍ਬਤੋ. ਤਸ੍ਮਾ ਵਿਪਸ੍ਸਨਤ੍ਥਿਕੇਨ ਇਦ੍ਧਿਪਲਿਬੋਧੋ ਉਪਚ੍ਛਿਨ੍ਦਿਤਬ੍ਬੋ, ਇਤਰੇਨ ਅਵਸੇਸਾਤਿ ਅਯਂ ਤਾਵ ਪਲਿਬੋਧਕਥਾਯ ਵਿਤ੍ਥਾਰੋ.
ਕਮ੍ਮਟ੍ਠਾਨਦਾਯਕਵਣ੍ਣਨਾ
੪੨. ਕਮ੍ਮਟ੍ਠਾਨਦਾਯਕਂ ਕਲ੍ਯਾਣਮਿਤ੍ਤਂ ਉਪਸਙ੍ਕਮਿਤ੍ਵਾਤਿ ਏਤ੍ਥ ਪਨ ਦੁਵਿਧਂ ਕਮ੍ਮਟ੍ਠਾਨਂ ਸਬ੍ਬਤ੍ਥਕਕਮ੍ਮਟ੍ਠਾਨਂ ਪਾਰਿਹਾਰਿਯਕਮ੍ਮਟ੍ਠਾਨਞ੍ਚ. ਤਤ੍ਥ ਸਬ੍ਬਤ੍ਥਕਕਮ੍ਮਟ੍ਠਾਨਂ ਨਾਮ ਭਿਕ੍ਖੁਸਙ੍ਘਾਦੀਸੁ ਮੇਤ੍ਤਾ ਮਰਣਸ੍ਸਤਿ ਚ. ਅਸੁਭਸਞ੍ਞਾਤਿਪਿ ਏਕੇ.
ਕਮ੍ਮਟ੍ਠਾਨਿਕੇਨ ਹਿ ਭਿਕ੍ਖੁਨਾ ਪਠਮਂ ਤਾਵ ਪਰਿਚ੍ਛਿਨ੍ਦਿਤ੍ਵਾ ਸੀਮਟ੍ਠਕਭਿਕ੍ਖੁਸਙ੍ਘੇ ਸੁਖਿਤਾ ਹੋਨ੍ਤੁ ਅਬ੍ਯਾਪਜ੍ਜਾਤਿ ਮੇਤ੍ਤਾ ਭਾਵੇਤਬ੍ਬਾ. ਤਤੋ ਸੀਮਟ੍ਠਕਦੇਵਤਾਸੁ. ਤਤੋ ਗੋਚਰਗਾਮਮ੍ਹਿ ਇਸ੍ਸਰਜਨੇ. ਤਤੋ ਤਤ੍ਥ ਮਨੁਸ੍ਸੇ ਉਪਾਦਾਯ ਸਬ੍ਬਸਤ੍ਤੇਸੁ. ਸੋ ਹਿ ਭਿਕ੍ਖੁਸਙ੍ਘੇ ਮੇਤ੍ਤਾਯ ਸਹਵਾਸੀਨਂ ਮੁਦੁਚਿਤ੍ਤਤਂ ਜਨੇਤਿ. ਅਥਸ੍ਸ ਤੇ ਸੁਖਸਂਵਾਸਾ ਹੋਨ੍ਤਿ. ਸੀਮਟ੍ਠਕਦੇਵਤਾਸੁ ਮੇਤ੍ਤਾਯ ਮੁਦੁਕਤਚਿਤ੍ਤਾਹਿ ਦੇਵਤਾਹਿ ਧਮ੍ਮਿਕਾਯ ਰਕ੍ਖਾਯ ਸੁਸਂਵਿਹਿਤਰਕ੍ਖੋ ਹੋਤਿ. ਗੋਚਰਗਾਮਮ੍ਹਿ ਇਸ੍ਸਰਜਨੇ ਮੇਤ੍ਤਾਯ ਮੁਦੁਕਤਚਿਤ੍ਤਸਨ੍ਤਾਨੇਹਿ ਇਸ੍ਸਰੇਹਿ ਧਮ੍ਮਿਕਾਯ ਰਕ੍ਖਾਯ ਸੁਰਕ੍ਖਿਤਪਰਿਕ੍ਖਾਰੋ ਹੋਤਿ. ਤਤ੍ਥ ਮਨੁਸ੍ਸੇਸੁ ਮੇਤ੍ਤਾਯ ਪਸਾਦਿਤਚਿਤ੍ਤੇਹਿ ਤੇਹਿ ਅਪਰਿਭੂਤੋ ਹੁਤ੍ਵਾ ਵਿਚਰਤਿ. ਸਬ੍ਬਸਤ੍ਤੇਸੁ ਮੇਤ੍ਤਾਯ ਸਬ੍ਬਤ੍ਥ ਅਪ੍ਪਟਿਹਤਚਾਰੋ ਹੋਤਿ. ਮਰਣਸ੍ਸਤਿਯਾ ਪਨ ਅਵਸ੍ਸਂ ਮਯਾ ਮਰਿਤਬ੍ਬਨ੍ਤਿ ਚਿਨ੍ਤੇਨ੍ਤੋ ਅਨੇਸਨਂ ਪਹਾਯ ਉਪਰੂਪਰਿ ਵਡ੍ਢਮਾਨਸਂਵੇਗੋ ਅਨੋਲੀਨਵੁਤ੍ਤਿਕੋ ਹੋਤਿ. ਅਸੁਭਸਞ੍ਞਾਪਰਿਚਿਤਚਿਤ੍ਤਸ੍ਸ ਪਨਸ੍ਸ ਦਿਬ੍ਬਾਨਿਪਿ ਆਰਮ੍ਮਣਾਨਿ ਲੋਭਵਸੇਨ ਚਿਤ੍ਤਂ ਨ ਪਰਿਯਾਦਿਯਨ੍ਤਿ.
ਏਵਂ ਬਹੂਪਕਾਰਤ੍ਤਾ ਸਬ੍ਬਤ੍ਥ ਅਤ੍ਥਯਿਤਬ੍ਬਂ ਇਚ੍ਛਿਤਬ੍ਬਨ੍ਤਿ ਚ ਅਧਿਪ੍ਪੇਤਸ੍ਸ ਯੋਗਾਨੁਯੋਗਕਮ੍ਮਸ੍ਸ ਠਾਨਞ੍ਚਾਤਿ ਸਬ੍ਬਤ੍ਥਕਕਮ੍ਮਟ੍ਠਾਨਨ੍ਤਿ ਵੁਚ੍ਚਤਿ.
ਚਤ੍ਤਾਲੀਸਾਯ ਪਨ ਕਮ੍ਮਟ੍ਠਾਨੇਸੁ ਯਂ ਯਸ੍ਸ ਚਰਿਯਾਨੁਕੂਲਂ, ਤਂ ਤਸ੍ਸ ਨਿਚ੍ਚਂ ਪਰਿਹਰਿਤਬ੍ਬਤ੍ਤਾ ਉਪਰਿਮਸ੍ਸ ਚ ਉਪਰਿਮਸ੍ਸ ਭਾਵਨਾਕਮ੍ਮਸ੍ਸ ਪਦਟ੍ਠਾਨਤ੍ਤਾ ਪਾਰਿਹਾਰਿਯਕਮ੍ਮਟ੍ਠਾਨਨ੍ਤਿ ਵੁਚ੍ਚਤਿ. ਇਤਿ ਇਮਂ ਦੁਵਿਧਮ੍ਪਿ ਕਮ੍ਮਟ੍ਠਾਨਂ ਯੋ ਦੇਤਿ, ਅਯਂ ਕਮ੍ਮਟ੍ਠਾਨਦਾਯਕੋ ਨਾਮ. ਤਂ ਕਮ੍ਮਟ੍ਠਾਨਦਾਯਕਂ.
ਕਲ੍ਯਾਣਮਿਤ੍ਤਨ੍ਤਿ –
ਪਿਯੋ ਗਰੁ ਭਾਵਨੀਯੋ, ਵਤ੍ਤਾ ਚ ਵਚਨਕ੍ਖਮੋ;
ਗਮ੍ਭੀਰਞ੍ਚ ਕਥਂ ਕਤ੍ਤਾ, ਨੋ ਚਟ੍ਠਾਨੇ ਨਿਯੋਜਕੋਤਿ. (ਅ. ਨਿ. ੭.੩੭);
ਏਵਮਾਦਿਗੁਣਸਮਨ੍ਨਾਗਤਂ ਏਕਨ੍ਤੇਨ ਹਿਤੇਸਿਂ ਵੁਦ੍ਧਿਪਕ੍ਖੇ ਠਿਤਂ ਕਲ੍ਯਾਣਮਿਤ੍ਤਂ.
‘‘ਮਮਂ ਹਿ, ਆਨਨ੍ਦ, ਕਲ੍ਯਾਣਮਿਤ੍ਤਂ ਆਗਮ੍ਮ ਜਾਤਿਧਮ੍ਮਾ ਸਤ੍ਤਾ ਜਾਤਿਯਾ ਪਰਿਮੁਚ੍ਚਨ੍ਤੀ’’ਤਿ (ਸਂ. ਨਿ. ੧.੧੨੯; ੫.੨) ਆਦਿਵਚਨਤੋ ਪਨ ਸਮ੍ਮਾਸਮ੍ਬੁਦ੍ਧੋਯੇਵ ਸਬ੍ਬਾਕਾਰਸਮ੍ਪਨ੍ਨੋ ਕਲ੍ਯਾਣਮਿਤ੍ਤੋ. ਤਸ੍ਮਾ ਤਸ੍ਮਿਂ ਸਤਿ ਤਸ੍ਸੇਵ ਭਗਵਤੋ ਸਨ੍ਤਿਕੇ ਗਹਿਤਕਮ੍ਮਟ੍ਠਾਨਂ ਸੁਗਹਿਤਂ ਹੋਤਿ. ਪਰਿਨਿਬ੍ਬੁਤੇ ਪਨ ਤਸ੍ਮਿਂ ਅਸੀਤਿਯਾ ਮਹਾਸਾਵਕੇਸੁ ਯੋ ਧਰਤਿ, ਤਸ੍ਸ ਸਨ੍ਤਿਕੇ ਗਹੇਤੁਂ ਵਟ੍ਟਤਿ. ਤਸ੍ਮਿਂ ਅਸਤਿ ਯਂ ਕਮ੍ਮਟ੍ਠਾਨਂ ਗਹੇਤੁਕਾਮੋ ਹੋਤਿ, ਤਸ੍ਸੇਵ ਵਸੇਨ ਚਤੁਕ੍ਕਪਞ੍ਚਕਜ੍ਝਾਨਾਨਿ ਨਿਬ੍ਬਤ੍ਤੇਤ੍ਵਾ ਝਾਨਪਦਟ੍ਠਾਨਂ ਵਿਪਸ੍ਸਨਂ ਵਡ੍ਢੇਤ੍ਵਾ ਆਸਵਕ੍ਖਯਪ੍ਪਤ੍ਤਸ੍ਸ ਖੀਣਾਸਵਸ੍ਸ ਸਨ੍ਤਿਕੇ ਗਹੇਤਬ੍ਬਂ.
ਕਿਂ ਪਨ ਖੀਣਾਸਵੋ ਅਹਂ ਖੀਣਾਸਵੋਤਿ ਅਤ੍ਤਾਨਂ ਪਕਾਸੇਤੀਤਿ? ਕਿਂ ਵਤ੍ਤਬ੍ਬਂ, ਕਾਰਕਭਾਵਂ ਹਿ ਜਾਨਿਤ੍ਵਾ ਪਕਾਸੇਤਿ. ਨਨੁ ਅਸ੍ਸਗੁਤ੍ਤਤ੍ਥੇਰੋ ਆਰਦ੍ਧਕਮ੍ਮਟ੍ਠਾਨਸ੍ਸ ਭਿਕ੍ਖੁਨੋ ‘‘ਕਮ੍ਮਟ੍ਠਾਨਕਾਰਕੋ ਅਯ’’ਨ੍ਤਿ ਜਾਨਿਤ੍ਵਾ ਆਕਾਸੇ ਚਮ੍ਮਖਣ੍ਡਂ ਪਞ੍ਞਾਪੇਤ੍ਵਾ ਤਤ੍ਥ ਪਲ੍ਲਙ੍ਕੇਨ ਨਿਸਿਨ੍ਨੋ ਕਮ੍ਮਟ੍ਠਾਨਂ ਕਥੇਸੀਤਿ.
ਤਸ੍ਮਾ ਸਚੇ ਖੀਣਾਸਵਂ ਲਭਤਿ, ਇਚ੍ਚੇਤਂ ਕੁਸਲਂ, ਨੋ ਚੇ ਲਭਤਿ, ਅਨਾਗਾਮਿਸਕਦਾਗਾਮਿਸੋਤਾਪਨ੍ਨਝਾਨਲਾਭੀਪੁਥੁਜ੍ਜਨਤਿਪਿਟਕਧਰਦ੍ਵਿਪਿਟਕਧਰਏਕਪਿਟਕਧਰੇਸੁ ਪੁਰਿਮਸ੍ਸ ਪੁਰਿਮਸ੍ਸ ਸਨ੍ਤਿਕੇ. ਏਕਪਿਟਕਧਰੇਪਿ ਅਸਤਿ ਯਸ੍ਸ ਏਕਸਙ੍ਗੀਤਿਪਿ ਅਟ੍ਠਕਥਾਯ ਸਦ੍ਧਿਂ ਪਗੁਣਾ, ਅਯਞ੍ਚ ਲਜ੍ਜੀ ਹੋਤਿ, ਤਸ੍ਸ ਸਨ੍ਤਿਕੇ ਗਹੇਤਬ੍ਬਂ. ਏਵਰੂਪੋ ਹਿ ਤਨ੍ਤਿਧਰੋ ਵਂਸਾਨੁਰਕ੍ਖਕੋ ਪਵੇਣੀਪਾਲਕੋ ਆਚਰਿਯੋ ਆਚਰਿਯਮਤਿਕੋਵ ਹੋਤਿ, ਨ ਅਤ੍ਤਨੋਮਤਿਕੋ ਹੋਤਿ. ਤੇਨੇਵ ਪੋਰਾਣਕਤ੍ਥੇਰਾ ‘‘ਲਜ੍ਜੀ ਰਕ੍ਖਿਸ੍ਸਤਿ ਲਜ੍ਜੀ ਰਕ੍ਖਿਸ੍ਸਤੀ’’ਤਿ ਤਿਕ੍ਖਤ੍ਤੁਂ ਆਹਂਸੁ.
ਪੁਬ੍ਬੇ ਵੁਤ੍ਤਖੀਣਾਸਵਾਦਯੋ ਚੇਤ੍ਥ ਅਤ੍ਤਨਾ ਅਧਿਗਤਮਗ੍ਗਮੇਵ ਆਚਿਕ੍ਖਨ੍ਤਿ. ਬਹੁਸ੍ਸੁਤੋ ਪਨ ਤਂ ਤਂ ਆਚਰਿਯਂ ਉਪਸਙ੍ਕਮਿਤ੍ਵਾ ਉਗ੍ਗਹਪਰਿਪੁਚ੍ਛਾਨਂ ਵਿਸੋਧਿਤਤ੍ਤਾ ਇਤੋ ਚਿਤੋ ਚ ਸੁਤ੍ਤਞ੍ਚ ਕਾਰਣਞ੍ਚ ਸਲ੍ਲਕ੍ਖੇਤ੍ਵਾ ਸਪ੍ਪਾਯਾਸਪ੍ਪਾਯਂ ਯੋਜੇਤ੍ਵਾ ਗਹਨਟ੍ਠਾਨੇ ਗਚ੍ਛਨ੍ਤੋ ਮਹਾਹਤ੍ਥੀ ਵਿਯ ਮਹਾਮਗ੍ਗਂ ਦਸ੍ਸੇਨ੍ਤੋ ਕਮ੍ਮਟ੍ਠਾਨਂ ਕਥੇਸ੍ਸਤਿ. ਤਸ੍ਮਾ ਏਵਰੂਪਂ ਕਮ੍ਮਟ੍ਠਾਨਦਾਯਕਂ ਕਲ੍ਯਾਣਮਿਤ੍ਤਂ ਉਪਸਙ੍ਕਮਿਤ੍ਵਾ ਤਸ੍ਸ ਵਤ੍ਤਪਟਿਪਤ੍ਤਿਂ ਕਤ੍ਵਾ ਕਮ੍ਮਟ੍ਠਾਨਂ ਗਹੇਤਬ੍ਬਂ.
ਸਚੇ ਪਨੇਤਂ ਏਕਵਿਹਾਰੇਯੇਵ ਲਭਤਿ, ਇਚ੍ਚੇਤਂ ਕੁਸਲਂ, ਨੋ ਚੇ ਲਭਤਿ, ਯਤ੍ਥ ਸੋ ਵਸਤਿ, ਤਤ੍ਥ ਗਨ੍ਤਬ੍ਬਂ. ਗਚ੍ਛਨ੍ਤੇਨ ਚ ਨ ਧੋਤਮਕ੍ਖਿਤੇਹਿ ਪਾਦੇਹਿ ਉਪਾਹਨਾ ਆਰੂਹਿਤ੍ਵਾ ਛਤ੍ਤਂ ਗਹੇਤ੍ਵਾ ਤੇਲਨਾਲ਼ਿਮਧੁਫਾਣਿਤਾਦੀਨਿ ਗਾਹਾਪੇਤ੍ਵਾ ਅਨ੍ਤੇਵਾਸਿਕਪਰਿਵੁਤੇਨ ਗਨ੍ਤਬ੍ਬਂ. ਗਮਿਕਵਤ੍ਤਂ ਪਨ ਪੂਰੇਤ੍ਵਾ ਅਤ੍ਤਨੋ ਪਤ੍ਤਚੀਵਰਂ ਸਯਮੇਵ ਗਹੇਤ੍ਵਾ ਅਨ੍ਤਰਾਮਗ੍ਗੇ ਯਂ ਯਂ ਵਿਹਾਰਂ ਪਵਿਸਤਿ ਸਬ੍ਬਤ੍ਥ ਵਤ੍ਤਪਟਿਪਤ੍ਤਿਂ ਕੁਰੁਮਾਨੇਨ ਸਲ੍ਲਹੁਕਪਰਿਕ੍ਖਾਰੇਨ ਪਰਮਸਲ੍ਲੇਖਵੁਤ੍ਤਿਨਾ ਹੁਤ੍ਵਾ ਗਨ੍ਤਬ੍ਬਂ.
ਤਂ ਵਿਹਾਰਂ ਪਵਿਸਨ੍ਤੇਨ ਅਨ੍ਤਰਾਮਗ੍ਗੇਯੇਵ ਦਨ੍ਤਕਟ੍ਠਂ ਕਪ੍ਪਿਯਂ ਕਾਰਾਪੇਤ੍ਵਾ ਗਹੇਤ੍ਵਾ ਪਵਿਸਿਤਬ੍ਬਂ, ਨ ਚ ‘‘ਮੁਹੁਤ੍ਤਂ ਵਿਸ੍ਸਮੇਤ੍ਵਾ ਪਾਦਧੋਵਨਮਕ੍ਖਨਾਦੀਨਿ ਕਤ੍ਵਾ ਆਚਰਿਯਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ ਅਞ੍ਞਂ ਪਰਿਵੇਣਂ ਪਵਿਸਿਤਬ੍ਬਂ. ਕਸ੍ਮਾ? ਸਚੇ ਹਿਸ੍ਸ ਤਤ੍ਰ ਆਚਰਿਯਸ੍ਸ ਵਿਸਭਾਗਾ ਭਿਕ੍ਖੂ ਭਵੇਯ੍ਯੁਂ, ਤੇ ਆਗਮਨਕਾਰਣਂ ਪੁਚ੍ਛਿਤ੍ਵਾ ਆਚਰਿਯਸ੍ਸ ਅਵਣ੍ਣਂ ਪਕਾਸੇਤ੍ਵਾ ‘‘ਨਟ੍ਠੋਸਿ, ਸਚੇ ਤਸ੍ਸ ਸਨ੍ਤਿਕਂ ਆਗਤੋ’’ਤਿ ਵਿਪ੍ਪਟਿਸਾਰਂ ਉਪ੍ਪਾਦੇਯ੍ਯੁਂ, ਯੇਨ ਤਤੋਵ ਪਟਿਨਿਵਤ੍ਤੇਯ੍ਯ, ਤਸ੍ਮਾ ਆਚਰਿਯਸ੍ਸ ਵਸਨਟ੍ਠਾਨਂ ਪੁਚ੍ਛਿਤ੍ਵਾ ਉਜੁਕਂ ਤਤ੍ਥੇਵ ਗਨ੍ਤਬ੍ਬਂ.
ਸਚੇ ਆਚਰਿਯੋ ਦਹਰਤਰੋ ਹੋਤਿ, ਪਤ੍ਤਚੀਵਰਪਟਿਗ੍ਗਹਣਾਦੀਨਿ ਨ ਸਾਦਿਤਬ੍ਬਾਨਿ. ਸਚੇ ਵੁਡ੍ਢਤਰੋ ਹੋਤਿ, ਗਨ੍ਤ੍ਵਾ ਆਚਰਿਯਂ ਵਨ੍ਦਿਤ੍ਵਾ ਠਾਤਬ੍ਬਂ. ‘‘ਨਿਕ੍ਖਿਪਾਵੁਸੋ, ਪਤ੍ਤਚੀਵਰ’’ਨ੍ਤਿ ਵੁਤ੍ਤੇਨ ਨਿਕ੍ਖਿਪਿਤਬ੍ਬਂ. ‘‘ਪਾਨੀਯਂ ਪਿਵਾ’’ਤਿ ਵੁਤ੍ਤੇਨ ਸਚੇ ਇਚ੍ਛਤਿ ਪਾਤਬ੍ਬਂ. ‘‘ਪਾਦੇ ਧੋਵਾਹੀ’’ਤਿ ਵੁਤ੍ਤੇਨ ਨ ਤਾਵ ਪਾਦਾ ਧੋਵਿਤਬ੍ਬਾ. ਸਚੇ ਹਿ ਆਚਰਿਯੇਨ ਆਭਤਂ ਉਦਕਂ ਭਵੇਯ੍ਯ, ਨ ਸਾਰੁਪ੍ਪਂ ਸਿਯਾ. ‘‘ਧੋਵਾਹਾਵੁਸੋ, ਨ ਮਯਾ ਆਭਤਂ, ਅਞ੍ਞੇਹਿ ਆਭਤ’’ਨ੍ਤਿ ਵੁਤ੍ਤੇਨ ਪਨ ਯਤ੍ਥ ਆਚਰਿਯੋ ਨ ਪਸ੍ਸਤਿ, ਏਵਰੂਪੇ ਪਟਿਚ੍ਛਨ੍ਨੇ ਵਾ ਓਕਾਸੇ, ਅਬ੍ਭੋਕਾਸੇ ਵਿਹਾਰਸ੍ਸਾਪਿ ਵਾ ਏਕਮਨ੍ਤੇ ਨਿਸੀਦਿਤ੍ਵਾ ਪਾਦਾ ਧੋਵਿਤਬ੍ਬਾ.
ਸਚੇ ਆਚਰਿਯੋ ਤੇਲਨਾਲ਼ਿਂ ਆਹਰਤਿ ਉਟ੍ਠਹਿਤ੍ਵਾ ਉਭੋਹਿ ਹਤ੍ਥੇਹਿ ਸਕ੍ਕਚ੍ਚਂ ਗਹੇਤਬ੍ਬਾ. ਸਚੇ ਹਿ ਨ ਗਣ੍ਹੇਯ੍ਯ, ‘‘ਅਯਂ ਭਿਕ੍ਖੁ ਇਤੋ ਏਵ ਪਟ੍ਠਾਯ ਸਮ੍ਭੋਗਂ ਕੋਪੇਤੀ’’ਤਿ ਆਚਰਿਯਸ੍ਸ ਅਞ੍ਞਥਤ੍ਤਂ ਭਵੇਯ੍ਯ. ਗਹੇਤ੍ਵਾ ਪਨ ਨ ਆਦਿਤੋਵ ਪਾਦਾ ਮਕ੍ਖੇਤਬ੍ਬਾ. ਸਚੇ ਹਿ ਤਂ ਆਚਰਿਯਸ੍ਸ ਗਤ੍ਤਬ੍ਭਞ੍ਜਨਤੇਲਂ ਭਵੇਯ੍ਯ, ਨ ਸਾਰੁਪ੍ਪਂ ਸਿਯਾ. ਤਸ੍ਮਾ ਸੀਸਂ ਮਕ੍ਖੇਤ੍ਵਾ ਖਨ੍ਧਾਦੀਨਿ ਮਕ੍ਖੇਤਬ੍ਬਾਨਿ. ‘‘ਸਬ੍ਬਪਾਰਿਹਾਰਿਯਤੇਲਮਿਦਂ, ਆਵੁਸੋ, ਪਾਦੇਪਿ ਮਕ੍ਖੇਹੀ’’ਤਿ ਵੁਤ੍ਤੇਨ ਪਨ ਥੋਕਂ ਸੀਸੇ ਕਤ੍ਵਾ ਪਾਦੇ ਮਕ੍ਖੇਤ੍ਵਾ ‘‘ਇਮਂ ਤੇਲਨਾਲ਼ਿਂ ਠਪੇਮਿ, ਭਨ੍ਤੇ’’ਤਿ ਵਤ੍ਵਾ ਆਚਰਿਯੇ ਗਣ੍ਹਨ੍ਤੇ ਦਾਤਬ੍ਬਾ.
ਆਗਤਦਿਵਸਤੋ ਪਟ੍ਠਾਯ ਕਮ੍ਮਟ੍ਠਾਨਂ ਮੇ, ਭਨ੍ਤੇ, ਕਥੇਥ ਇਚ੍ਚੇਵਂ ਨ ਵਤ੍ਤਬ੍ਬਂ. ਦੁਤਿਯਦਿਵਸਤੋ ਪਨ ਪਟ੍ਠਾਯ ਸਚੇ ਆਚਰਿਯਸ੍ਸ ਪਕਤਿਉਪਟ੍ਠਾਕੋ ਅਤ੍ਥਿ, ਤਂ ਯਾਚਿਤ੍ਵਾ ਵਤ੍ਤਂ ਕਾਤਬ੍ਬਂ. ਸਚੇ ਯਾਚਿਤੋਪਿ ਨ ਦੇਤਿ, ਓਕਾਸੇ ਲਦ੍ਧੇਯੇਵ ਕਾਤਬ੍ਬਂ. ਕਰੋਨ੍ਤੇਨ ਖੁਦ੍ਦਕਮਜ੍ਝਿਮਮਹਨ੍ਤਾਨਿ ਤੀਣਿ ਦਨ੍ਤਕਟ੍ਠਾਨਿ ਉਪਨਾਮੇਤਬ੍ਬਾਨਿ. ਸੀਤਂ ਉਣ੍ਹਨ੍ਤਿ ਦੁਵਿਧਂ ਮੁਖਧੋਵਨਉਦਕਞ੍ਚ ਨ੍ਹਾਨੋਦਕਞ੍ਚ ਪਟਿਯਾਦੇਤਬ੍ਬਂ. ਤਤੋ ਯਂ ਆਚਰਿਯੋ ਤੀਣਿ ਦਿਵਸਾਨਿ ਪਰਿਭੁਞ੍ਜਤਿ, ਤਾਦਿਸਮੇਵ ਨਿਚ੍ਚਂ ਉਪਨਾਮੇਤਬ੍ਬਂ. ਨਿਯਮਂ ਅਕਤ੍ਵਾ ਯਂ ਵਾ ਤਂ ਵਾ ਪਰਿਭੁਞ੍ਜਨ੍ਤਸ੍ਸ ਯਥਾਲਦ੍ਧਂ ਉਪਨਾਮੇਤਬ੍ਬਂ. ਕਿਂ ਬਹੁਨਾ ਵੁਤ੍ਤੇਨ? ਯਂ ਤਂ ਭਗਵਤਾ ‘‘ਅਨ੍ਤੇਵਾਸਿਕੇਨ, ਭਿਕ੍ਖਵੇ, ਆਚਰਿਯਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾ ਵਤ੍ਤਨਾ, ਕਾਲਸ੍ਸੇਵ ਉਟ੍ਠਾਯ ਉਪਾਹਨਾ ਓਮੁਞ੍ਚਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ’’ਤਿ (ਮਹਾਵ. ੭੮) ਆਦਿਕਂ ਖਨ੍ਧਕੇ ਸਮ੍ਮਾਵਤ੍ਤਂ ਪਞ੍ਞਤ੍ਤਂ, ਤਂ ਸਬ੍ਬਮ੍ਪਿ ਕਾਤਬ੍ਬਂ.
ਏਵਂ ਵਤ੍ਤਸਮ੍ਪਤ੍ਤਿਯਾ ਗਰੁਂ ਆਰਾਧਯਮਾਨੇਨ ਸਾਯਂ ਵਨ੍ਦਿਤ੍ਵਾ ਯਾਹੀਤਿ ਵਿਸ੍ਸਜ੍ਜਿਤੇਨ ਗਨ੍ਤਬ੍ਬਂ, ਯਦਾ ਸੋ ਕਿਸ੍ਸਾਗਤੋਸੀਤਿ ਪੁਚ੍ਛਤਿ, ਤਦਾ ਆਗਮਨਕਾਰਣਂ ਕਥੇਤਬ੍ਬਂ. ਸਚੇ ਸੋ ਨੇਵ ਪੁਚ੍ਛਤਿ, ਵਤ੍ਤਂ ਪਨ ਸਾਦਿਯਤਿ, ਦਸਾਹੇ ਵਾ ਪਕ੍ਖੇ ਵਾ ਵੀਤਿਵਤ੍ਤੇ ਏਕਦਿਵਸਂ ਵਿਸ੍ਸਜ੍ਜਿਤੇਨਾਪਿ ਅਗਨ੍ਤ੍ਵਾ ਓਕਾਸਂ ਕਾਰੇਤ੍ਵਾ ਆਗਮਨਕਾਰਣਂ ਆਰੋਚੇਤਬ੍ਬਂ. ਅਕਾਲੇ ਵਾ ਗਨ੍ਤ੍ਵਾ ਕਿਮਤ੍ਥਮਾਗਤੋਸੀਤਿ ਪੁਟ੍ਠੇਨ ਆਰੋਚੇਤਬ੍ਬਂ. ਸਚੇ ਸੋ ਪਾਤੋਵ ਆਗਚ੍ਛਾਤਿ ਵਦਤਿ, ਪਾਤੋਵ ਗਨ੍ਤਬ੍ਬਂ.
ਸਚੇ ਪਨਸ੍ਸ ਤਾਯ ਵੇਲਾਯ ਪਿਤ੍ਤਾਬਾਧੇਨ ਵਾ ਕੁਚ੍ਛਿ ਪਰਿਡਯ੍ਹਤਿ, ਅਗ੍ਗਿਮਨ੍ਦਤਾਯ ਵਾ ਭਤ੍ਤਂ ਨ ਜੀਰਤਿ, ਅਞ੍ਞੋ ਵਾ ਕੋਚਿ ਰੋਗੋ ਬਾਧਤਿ, ਤਂ ਯਥਾਭੂਤਂ ਆਵਿਕਤ੍ਵਾ ਅਤ੍ਤਨੋ ਸਪ੍ਪਾਯਵੇਲਂ ਆਰੋਚੇਤ੍ਵਾ ਤਾਯ ਵੇਲਾਯ ਉਪਸਙ੍ਕਮਿਤਬ੍ਬਂ. ਅਸਪ੍ਪਾਯਵੇਲਾਯ ਹਿ ਵੁਚ੍ਚਮਾਨਮ੍ਪਿ ਕਮ੍ਮਟ੍ਠਾਨਂ ਨ ਸਕ੍ਕਾ ਹੋਤਿ ਮਨਸਿਕਾਤੁਨ੍ਤਿ. ਅਯਂ ਕਮ੍ਮਟ੍ਠਾਨਦਾਯਕਂ ਕਲ੍ਯਾਣਮਿਤ੍ਤਂ ਉਪਸਙ੍ਕਮਿਤ੍ਵਾਤਿ ਏਤ੍ਥ ਵਿਤ੍ਥਾਰੋ.
ਚਰਿਯਾਵਣ੍ਣਨਾ
੪੩. ਇਦਾਨਿ ਅਤ੍ਤਨੋ ਚਰਿਯਾਨੁਕੂਲਨ੍ਤਿ ਏਤ੍ਥ ਚਰਿਯਾਤਿ ਛ ਚਰਿਯਾ ਰਾਗਚਰਿਯਾ, ਦੋਸਚਰਿਯਾ, ਮੋਹਚਰਿਯਾ, ਸਦ੍ਧਾਚਰਿਯਾ, ਬੁਦ੍ਧਿਚਰਿਯਾ, ਵਿਤਕ੍ਕਚਰਿਯਾਤਿ. ਕੇਚਿ ਪਨ ਰਾਗਾਦੀਨਂ ਸਂਸਗ੍ਗਸਨ੍ਨਿਪਾਤਵਸੇਨ ਅਪਰਾਪਿ ਚਤਸ੍ਸੋ, ਤਥਾ ਸਦ੍ਧਾਦੀਨਨ੍ਤਿ ਇਮਾਹਿ ਅਟ੍ਠਹਿ ਸਦ੍ਧਿਂ ਚੁਦ੍ਦਸ ਇਚ੍ਛਨ੍ਤਿ. ਏਵਂ ਪਨ ਭੇਦੇ ਵੁਚ੍ਚਮਾਨੇ ਰਾਗਾਦੀਨਂ ਸਦ੍ਧਾਦੀਹਿਪਿ ਸਂਸਗ੍ਗਂ ਕਤ੍ਵਾ ਅਨੇਕਾ ਚਰਿਯਾ ਹੋਨ੍ਤਿ, ਤਸ੍ਮਾ ਸਙ੍ਖੇਪੇਨ ਛਲ਼ੇਵ ਚਰਿਯਾ ਵੇਦਿਤਬ੍ਬਾ. ਚਰਿਯਾ, ਪਕਤਿ, ਉਸ੍ਸਨ੍ਨਤਾਤਿ ਅਤ੍ਥਤੋ ਏਕਂ. ਤਾਸਂ ਵਸੇਨ ਛਲ਼ੇਵ ਪੁਗ੍ਗਲਾ ਹੋਨ੍ਤਿ ਰਾਗਚਰਿਤੋ, ਦੋਸਚਰਿਤੋ, ਮੋਹਚਰਿਤੋ, ਸਦ੍ਧਾਚਰਿਤੋ, ਬੁਦ੍ਧਿਚਰਿਤੋ, ਵਿਤਕ੍ਕਚਰਿਤੋਤਿ.
ਤਤ੍ਥ ਯਸ੍ਮਾ ਰਾਗਚਰਿਤਸ੍ਸ ਕੁਸਲਪ੍ਪਵਤ੍ਤਿਸਮਯੇ ਸਦ੍ਧਾ ਬਲਵਤੀ ਹੋਤਿ, ਰਾਗਸ੍ਸ ਆਸਨ੍ਨਗੁਣਤ੍ਤਾ. ਯਥਾ ਹਿ ਅਕੁਸਲਪਕ੍ਖੇ ਰਾਗੋ ਸਿਨਿਦ੍ਧੋ ਨਾਤਿਲੂਖੋ, ਏਵਂ ਕੁਸਲਪਕ੍ਖੇ ਸਦ੍ਧਾ. ਯਥਾ ਰਾਗੋ ਵਤ੍ਥੁਕਾਮੇ ਪਰਿਯੇਸਤਿ, ਏਵਂ ਸਦ੍ਧਾ ਸੀਲਾਦਿਗੁਣੇ. ਯਥਾ ਰਾਗੋ ਅਹਿਤਂ ਨ ਪਰਿਚ੍ਚਜਤਿ, ਏਵਂ ਸਦ੍ਧਾ ਹਿਤਂ ਨ ਪਰਿਚ੍ਚਜਤਿ, ਤਸ੍ਮਾ ਰਾਗਚਰਿਤਸ੍ਸ ਸਦ੍ਧਾਚਰਿਤੋ ਸਭਾਗੋ.
ਯਸ੍ਮਾ ਪਨ ਦੋਸਚਰਿਤਸ੍ਸ ਕੁਸਲਪ੍ਪਵਤ੍ਤਿਸਮਯੇ ਪਞ੍ਞਾ ਬਲਵਤੀ ਹੋਤਿ, ਦੋਸਸ੍ਸ ਆਸਨ੍ਨਗੁਣਤ੍ਤਾ. ਯਥਾ ਹਿ ਅਕੁਸਲਪਕ੍ਖੇ ਦੋਸੋ ਨਿਸ੍ਸਿਨੇਹੋ ਨ ਆਰਮ੍ਮਣਂ ਅਲ੍ਲੀਯਤਿ, ਏਵਂ ਕੁਸਲਪਕ੍ਖੇ ਪਞ੍ਞਾ. ਯਥਾ ਚ ਦੋਸੋ ਅਭੂਤਮ੍ਪਿ ਦੋਸਮੇਵ ਪਰਿਯੇਸਤਿ, ਏਵਂ ਪਞ੍ਞਾ ਭੂਤਂ ਦੋਸਮੇਵ. ਯਥਾ ਦੋਸੋ ਸਤ੍ਤਪਰਿਵਜ੍ਜਨਾਕਾਰੇਨ ਪਵਤ੍ਤਤਿ, ਏਵਂ ਪਞ੍ਞਾ ਸਙ੍ਖਾਰਪਰਿਵਜ੍ਜਨਾਕਾਰੇਨ, ਤਸ੍ਮਾ ਦੋਸਚਰਿਤਸ੍ਸ ਬੁਦ੍ਧਿਚਰਿਤੋ ਸਭਾਗੋ.
ਯਸ੍ਮਾ ਪਨ ਮੋਹਚਰਿਤਸ੍ਸ ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾਯ ਵਾਯਮਮਾਨਸ੍ਸ ਯੇਭੁਯ੍ਯੇਨ ਅਨ੍ਤਰਾਯਕਰਾ ਵਿਤਕ੍ਕਾ ਉਪ੍ਪਜ੍ਜਨ੍ਤਿ, ਮੋਹਸ੍ਸ ਆਸਨ੍ਨਲਕ੍ਖਣਤ੍ਤਾ. ਯਥਾ ਹਿ ਮੋਹੋ ਪਰਿਬ੍ਯਾਕੁਲਤਾਯ ਅਨਵਟ੍ਠਿਤੋ, ਏਵਂ ਵਿਤਕ੍ਕੋ ਨਾਨਪ੍ਪਕਾਰਵਿਤਕ੍ਕਨਤਾਯ. ਯਥਾ ਚ ਮੋਹੋ ਅਪਰਿਯੋਗਾਹਣਤਾਯ ਚਞ੍ਚਲੋ. ਤਥਾ ਵਿਤਕ੍ਕੋ ਲਹੁਪਰਿਕਪ੍ਪਨਤਾਯ, ਤਸ੍ਮਾ ਮੋਹਚਰਿਤਸ੍ਸ ਵਿਤਕ੍ਕਚਰਿਤੋ ਸਭਾਗੋਤਿ.
ਅਪਰੇ ਤਣ੍ਹਾਮਾਨਦਿਟ੍ਠਿਵਸੇਨ ਅਪਰਾਪਿ ਤਿਸ੍ਸੋ ਚਰਿਯਾ ਵਦਨ੍ਤਿ. ਤਤ੍ਥ ਤਣ੍ਹਾ ਰਾਗੋਯੇਵ, ਮਾਨੋ ਚ ਤਂਸਮ੍ਪਯੁਤ੍ਤੋਤਿ ਤਦੁਭਯਂ ਰਾਗਚਰਿਯਂ ਨਾਤਿਵਤ੍ਤਤਿ. ਮੋਹਨਿਦਾਨਤ੍ਤਾ ਚ ਦਿਟ੍ਠਿਯਾ ਦਿਟ੍ਠਿਚਰਿਯਾ ਮੋਹਚਰਿਯਮੇਵ ਅਨੁਪਤਤਿ.
੪੪. ਤਾ ਪਨੇਤਾ ਚਰਿਯਾ ਕਿਨ੍ਨਿਦਾਨਾ? ਕਥਞ੍ਚ ਜਾਨਿਤਬ੍ਬਂ ‘‘ਅਯਂ ਪੁਗ੍ਗਲੋ ਰਾਗਚਰਿਤੋ, ਅਯਂ ਪੁਗ੍ਗਲੋ ਦੋਸਾਦੀਸੁ ਅਞ੍ਞਤਰਚਰਿਤੋ’’ਤਿ? ਕਿਂ ਚਰਿਤਸ੍ਸ ਪੁਗ੍ਗਲਸ੍ਸ ਕਿਂ ਸਪ੍ਪਾਯਨ੍ਤਿ?
ਤਤ੍ਰ ਪੁਰਿਮਾ ਤਾਵ ਤਿਸ੍ਸੋ ਚਰਿਯਾ ਪੁਬ੍ਬਾਚਿਣ੍ਣਨਿਦਾਨਾ, ਧਾਤੁਦੋਸਨਿਦਾਨਾ ਚਾਤਿ ਏਕਚ੍ਚੇ ਵਦਨ੍ਤਿ. ਪੁਬ੍ਬੇ ਕਿਰ ਇਟ੍ਠਪ੍ਪਯੋਗਸੁਭਕਮ੍ਮਬਹੁਲੋ ਰਾਗਚਰਿਤੋ ਹੋਤਿ, ਸਗ੍ਗਾ ਵਾ ਚਵਿਤ੍ਵਾ ਇਧੂਪਪਨ੍ਨੋ. ਪੁਬ੍ਬੇ ਛੇਦਨਵਧਬਨ੍ਧਨਵੇਰਕਮ੍ਮਬਹੁਲੋ ਦੋਸਚਰਿਤੋ ਹੋਤਿ, ਨਿਰਯਨਾਗਯੋਨੀਹਿ ਵਾ ਚਵਿਤ੍ਵਾ ਇਧੂਪਪਨ੍ਨੋ. ਪੁਬ੍ਬੇ ਮਜ੍ਜਪਾਨਬਹੁਲੋ ਸੁਤਪਰਿਪੁਚ੍ਛਾਵਿਹੀਨੋ ਚ ਮੋਹਚਰਿਤੋ ਹੋਤਿ, ਤਿਰਚ੍ਛਾਨਯੋਨਿਯਾ ਵਾ ਚਵਿਤ੍ਵਾ ਇਧੂਪਪਨ੍ਨੋਤਿ ਏਵਂ ਪੁਬ੍ਬਾਚਿਣ੍ਣਨਿਦਾਨਾਤਿ ਵਦਨ੍ਤਿ. ਦ੍ਵਿਨ੍ਨਂ ਪਨ ਧਾਤੂਨਂ ਉਸ੍ਸਨ੍ਨਤ੍ਤਾ ਪੁਗ੍ਗਲੋ ਮੋਹਚਰਿਤੋ ਹੋਤਿ ਪਥਵੀਧਾਤੁਯਾ ਚ ਆਪੋਧਾਤੁਯਾ ਚ. ਇਤਰਾਸਂ ਦ੍ਵਿਨ੍ਨਂ ਉਸ੍ਸਨ੍ਨਤ੍ਤਾ ਦੋਸਚਰਿਤੋ. ਸਬ੍ਬਾਸਂ ਸਮਤ੍ਤਾ ਪਨ ਰਾਗਚਰਿਤੋਤਿ. ਦੋਸੇਸੁ ਚ ਸੇਮ੍ਹਾਧਿਕੋ ਰਾਗਚਰਿਤੋ ਹੋਤਿ. ਵਾਤਾਧਿਕੋ ਮੋਹਚਰਿਤੋ. ਸੇਮ੍ਹਾਧਿਕੋ ਵਾ ਮੋਹਚਰਿਤੋ. ਵਾਤਾਧਿਕੋ ਰਾਗਚਰਿਤੋਤਿ ਏਵਂ ਧਾਤੁਦੋਸਨਿਦਾਨਾਤਿ ਵਦਨ੍ਤਿ.
ਤਤ੍ਥ ਯਸ੍ਮਾ ਪੁਬ੍ਬੇ ਇਟ੍ਠਪ੍ਪਯੋਗਸੁਭਕਮ੍ਮਬਹੁਲਾਪਿ ਸਗ੍ਗਾ ਚਵਿਤ੍ਵਾ ਇਧੂਪਪਨ੍ਨਾਪਿ ਚ ਨ ਸਬ੍ਬੇ ਰਾਗਚਰਿਤਾਯੇਵ ਹੋਨ੍ਤਿ, ਨ ਇਤਰੇ ਵਾ ਦੋਸਮੋਹਚਰਿਤਾ. ਏਵਂ ਧਾਤੂਨਞ੍ਚ ਯਥਾਵੁਤ੍ਤੇਨੇਵ ਨਯੇਨ ਉਸ੍ਸਦਨਿਯਮੋ ਨਾਮ ਨਤ੍ਥਿ. ਦੋਸਨਿਯਮੇ ਚ ਰਾਗਮੋਹਦ੍ਵਯਮੇਵ ਵੁਤ੍ਤਂ, ਤਮ੍ਪਿ ਚ ਪੁਬ੍ਬਾਪਰਵਿਰੁਦ੍ਧਮੇਵ. ਸਦ੍ਧਾਚਰਿਯਾਦੀਸੁ ਚ ਏਕਿਸ੍ਸਾਪਿ ਨਿਦਾਨਂ ਨ ਵੁਤ੍ਤਮੇਵ. ਤਸ੍ਮਾ ਸਬ੍ਬਮੇਤਂ ਅਪਰਿਚ੍ਛਿਨ੍ਨਵਚਨਂ.
ਅਯਂ ਪਨੇਤ੍ਥ ਅਟ੍ਠਕਥਾਚਰਿਯਾਨਂ ਮਤਾਨੁਸਾਰੇਨ ਵਿਨਿਚ੍ਛਯੋ, ਵੁਤ੍ਤਞ੍ਹੇਤਂ ਉਸ੍ਸਦਕਿਤ੍ਤਨੇ (ਧ. ਸ. ਅਟ੍ਠ. ੪੯੮) ‘‘ਇਮੇ ਸਤ੍ਤਾ ਪੁਬ੍ਬਹੇਤੁਨਿਯਾਮੇਨ ਲੋਭੁਸ੍ਸਦਾ ਦੋਸੁਸ੍ਸਦਾ ਮੋਹੁਸ੍ਸਦਾ ਅਲੋਭੁਸ੍ਸਦਾ ਅਦੋਸੁਸ੍ਸਦਾ ਅਮੋਹੁਸ੍ਸਦਾ ਚ ਹੋਨ੍ਤਿ.
ਯਸ੍ਸ ਹਿ ਕਮ੍ਮਾਯੂਹਨਕ੍ਖਣੇ ਲੋਭੋ ਬਲਵਾ ਹੋਤਿ ਅਲੋਭੋ ਮਨ੍ਦੋ, ਅਦੋਸਾਮੋਹਾ ਬਲਵਨ੍ਤੋ ਦੋਸਮੋਹਾ ਮਨ੍ਦਾ, ਤਸ੍ਸ ਮਨ੍ਦੋ ਅਲੋਭੋ ਲੋਭਂ ਪਰਿਯਾਦਾਤੁਂ ਨ ਸਕ੍ਕੋਤਿ. ਅਦੋਸਾਮੋਹਾ ਪਨ ਬਲਵਨ੍ਤੋ ਦੋਸਮੋਹੇ ਪਰਿਯਾਦਾਤੁਂ ਸਕ੍ਕੋਤਿ. ਤਸ੍ਮਾ ਸੋ ਤੇਨ ਕਮ੍ਮੇਨ ਦਿਨ੍ਨਪਟਿਸਨ੍ਧਿਵਸੇਨ ਨਿਬ੍ਬਤ੍ਤੋ ਲੁਦ੍ਧੋ ਹੋਤਿ ਸੁਖਸੀਲੋ ਅਕ੍ਕੋਧਨੋ ਪਞ੍ਞਵਾ ਵਜਿਰੂਪਮਞਾਣੋ.
ਯਸ੍ਸ ਪਨ ਕਮ੍ਮਾਯੂਹਨਕ੍ਖਣੇ ਲੋਭਦੋਸਾ ਬਲਵਨ੍ਤੋ ਹੋਨ੍ਤਿ ਅਲੋਭਾਦੋਸਾ ਮਨ੍ਦਾ, ਅਮੋਹੋ ਬਲਵਾ ਮੋਹੋ ਮਨ੍ਦੋ, ਸੋ ਪੁਰਿਮਨਯੇਨੇਵ ਲੁਦ੍ਧੋ ਚੇਵ ਹੋਤਿ ਦੁਟ੍ਠੋ ਚ. ਪਞ੍ਞਵਾ ਪਨ ਹੋਤਿ ਵਜਿਰੂਪਮਞਾਣੋ ਦਤ੍ਤਾਭਯਤ੍ਥੇਰੋ ਵਿਯ.
ਯਸ੍ਸ ਕਮ੍ਮਾਯੂਹਨਕ੍ਖਣੇ ਲੋਭਾਦੋਸਮੋਹਾ ਬਲਵਨ੍ਤੋ ਹੋਨ੍ਤਿ ਇਤਰੇ ਮਨ੍ਦਾ, ਸੋ ਪੁਰਿਮਨਯੇਨੇਵ ਲੁਦ੍ਧੋ ਚੇਵ ਹੋਤਿ ਦਨ੍ਧੋ ਚ, ਸੀਲਕੋ ਪਨ ਹੋਤਿ ਅਕ੍ਕੋਧਨੋ (ਬਾਕੁਲਤ੍ਥੇਰੋ ਵਿਯ).
ਤਥਾ ਯਸ੍ਸ ਕਮ੍ਮਾਯੂਹਨਕ੍ਖਣੇ ਤਯੋਪਿ ਲੋਭਦੋਸਮੋਹਾ ਬਲਵਨ੍ਤੋ ਹੋਨ੍ਤਿ ਅਲੋਭਾਦਯੋ ਮਨ੍ਦਾ, ਸੋ ਪੁਰਿਮਨਯੇਨੇਵ ਲੁਦ੍ਧੋ ਚੇਵ ਹੋਤਿ ਦੁਟ੍ਠੋ ਚ ਮੂਲ਼੍ਹੋ ਚ.
ਯਸ੍ਸ ਪਨ ਕਮ੍ਮਾਯੂਹਨਕ੍ਖਣੇ ਅਲੋਭਦੋਸਮੋਹਾ ਬਲਵਨ੍ਤੋ ਹੋਨ੍ਤਿ ਇਤਰੇ ਮਨ੍ਦਾ, ਸੋ ਪੁਰਿਮਨਯੇਨੇਵ ਅਲੁਦ੍ਧੋ ਅਪ੍ਪਕਿਲੇਸੋ ਹੋਤਿ ਦਿਬ੍ਬਾਰਮ੍ਮਣਮ੍ਪਿ ਦਿਸ੍ਵਾ ਨਿਚ੍ਚਲੋ, ਦੁਟ੍ਠੋ ਪਨ ਹੋਤਿ ਦਨ੍ਧਪਞ੍ਞੋ ਚ.
ਯਸ੍ਸ ਪਨ ਕਮ੍ਮਾਯੂਹਨਕ੍ਖਣੇ ਅਲੋਭਾਦੋਸਮੋਹਾ ਬਲਵਨ੍ਤੋ ਹੋਨ੍ਤਿ ਇਤਰੇ ਮਨ੍ਦਾ, ਸੋ ਪੁਰਿਮਨਯੇਨੇਵ ਅਲੁਦ੍ਧੋ ਚੇਵ ਹੋਤਿ ਅਦੁਟ੍ਠੋ ਸੀਲਕੋ ਚ, ਦਨ੍ਧੋ ਪਨ ਹੋਤਿ.
ਤਥਾ ਯਸ੍ਸ ਕਮ੍ਮਾਯੂਹਨਕ੍ਖਣੇ ਅਲੋਭਦੋਸਾਮੋਹਾ ਬਲਵਨ੍ਤੋ ਹੋਨ੍ਤਿ ਇਤਰੇ ਮਨ੍ਦਾ, ਸੋ ਪੁਰਿਮਨਯੇਨੇਵ ਅਲੁਦ੍ਧੋ ਚੇਵ ਹੋਤਿ ਪਞ੍ਞਵਾ ਚ, ਦੁਟ੍ਠੋ ਚ ਪਨ ਹੋਤਿ ਕੋਧਨੋ.
ਯਸ੍ਸ ਪਨ ਕਮ੍ਮਾਯੂਹਨਕ੍ਖਣੇ ਤਯੋਪਿ ਅਲੋਭਾਦੋਸਾਮੋਹਾ ਬਲਵਨ੍ਤੋ ਹੋਨ੍ਤਿ ਲੋਭਾਦਯੋ ਮਨ੍ਦਾ, ਸੋ ਪੁਰਿਮਨਯੇਨੇਵ ਮਹਾਸਙ੍ਘਰਕ੍ਖਿਤਤ੍ਥੇਰੋ ਵਿਯ ਅਲੁਦ੍ਧੋ ਅਦੁਟ੍ਠੋ ਪਞ੍ਞਵਾ ਚ ਹੋਤੀ’’ਤਿ.
ਏਤ੍ਥ ਚ ਯੋ ਲੁਦ੍ਧੋਤਿ ਵੁਤ੍ਤੋ, ਅਯਂ ਰਾਗਚਰਿਤੋ. ਦੁਟ੍ਠਦਨ੍ਧਾ ਦੋਸਮੋਹਚਰਿਤਾ. ਪਞ੍ਞਵਾ ਬੁਦ੍ਧਿਚਰਿਤੋ. ਅਲੁਦ੍ਧਅਦੁਟ੍ਠਾ ਪਸਨ੍ਨਪਕਤਿਤਾਯ ਸਦ੍ਧਾਚਰਿਤਾ. ਯਥਾ ਵਾ ਅਮੋਹਪਰਿਵਾਰੇਨ ਕਮ੍ਮੁਨਾ ਨਿਬ੍ਬਤ੍ਤੋ ਬੁਦ੍ਧਿਚਰਿਤੋ, ਏਵਂ ਬਲਵਸਦ੍ਧਾਪਰਿਵਾਰੇਨ ਕਮ੍ਮੁਨਾ ਨਿਬ੍ਬਤ੍ਤੋ ਸਦ੍ਧਾਚਰਿਤੋ. ਕਾਮਵਿਤਕ੍ਕਾਦਿਪਰਿਵਾਰੇਨ ਕਮ੍ਮੁਨਾ ਨਿਬ੍ਬਤ੍ਤੋ ਵਿਤਕ੍ਕਚਰਿਤੋ. ਲੋਭਾਦਿਨਾ ਵੋਮਿਸ੍ਸਪਰਿਵਾਰੇਨ ਕਮ੍ਮੁਨਾ ਨਿਬ੍ਬਤ੍ਤੋ ਵੋਮਿਸ੍ਸਚਰਿਤੋਤਿ. ਏਵਂ ਲੋਭਾਦੀਸੁ ਅਞ੍ਞਤਰਞ੍ਞਤਰਪਰਿਵਾਰਂ ਪਟਿਸਨ੍ਧਿਜਨਕਂ ਕਮ੍ਮਂ ਚਰਿਯਾਨਂ ਨਿਦਾਨਨ੍ਤਿ ਵੇਦਿਤਬ੍ਬਂ.
੪੫. ਯਂ ਪਨ ਵੁਤ੍ਤਂ ਕਥਞ੍ਚ ਜਾਨਿਤਬ੍ਬਂ ਅਯਂ ਪੁਗ੍ਗਲੋ ਰਾਗਚਰਿਤੋਤਿਆਦਿ. ਤਤ੍ਰਾਯਂ ਨਯੋ.
ਇਰਿਯਾਪਥਤੋ ਕਿਚ੍ਚਾ, ਭੋਜਨਾ ਦਸ੍ਸਨਾਦਿਤੋ;
ਧਮ੍ਮਪ੍ਪਵਤ੍ਤਿਤੋ ਚੇਵ, ਚਰਿਯਾਯੋ ਵਿਭਾਵਯੇਤਿ.
ਤਤ੍ਥ ਇਰਿਯਾਪਥਤੋਤਿ ਰਾਗਚਰਿਤੋ ਹਿ ਪਕਤਿਗਮਨੇਨ ਗਚ੍ਛਨ੍ਤੋ ਚਾਤੁਰਿਯੇਨ ਗਚ੍ਛਤਿ, ਸਣਿਕਂ ਪਾਦਂ ਨਿਕ੍ਖਿਪਤਿ, ਸਮਂ ਨਿਕ੍ਖਿਪਤਿ, ਸਮਂ ਉਦ੍ਧਰਤਿ, ਉਕ੍ਕੁਟਿਕਞ੍ਚਸ੍ਸ ਪਦਂ ਹੋਤਿ. ਦੋਸਚਰਿਤੋ ਪਾਦਗ੍ਗੇਹਿ ਖਣਨ੍ਤੋ ਵਿਯ ਗਚ੍ਛਤਿ, ਸਹਸਾ ਪਾਦਂ ਨਿਕ੍ਖਿਪਤਿ, ਸਹਸਾ ਉਦ੍ਧਰਤਿ, ਅਨੁਕਡ੍ਢਿਤਞ੍ਚਸ੍ਸ ਪਦਂ ਹੋਤਿ. ਮੋਹਚਰਿਤੋ ਪਰਿਬ੍ਯਾਕੁਲਾਯ ਗਤਿਯਾ ਗਚ੍ਛਤਿ, ਛਮ੍ਭਿਤੋ ਵਿਯ ਪਦਂ ਨਿਕ੍ਖਿਪਤਿ, ਛਮ੍ਭਿਤੋ ਵਿਯ ਉਦ੍ਧਰਤਿ, ਸਹਸਾਨੁਪੀਲ਼ਿਤਞ੍ਚਸ੍ਸ ਪਦਂ ਹੋਤਿ. ਵੁਤ੍ਤਮ੍ਪਿ ਚੇਤਂ ਮਾਗਣ੍ਡਿਯਸੁਤ੍ਤੁਪ੍ਪਤ੍ਤਿਯਂ –
‘‘ਰਤ੍ਤਸ੍ਸ ਹਿ ਉਕ੍ਕੁਟਿਕਂ ਪਦਂ ਭਵੇ,
ਦੁਟ੍ਠਸ੍ਸ ਹੋਤਿ ਅਨੁਕਡ੍ਢਿਤਂ ਪਦਂ;
ਮੂਲ਼੍ਹਸ੍ਸ ਹੋਤਿ ਸਹਸਾਨੁਪੀਲ਼ਿਤਂ,
ਵਿਵਟ੍ਟਚ੍ਛਦਸ੍ਸ ਇਦਮੀਦਿਸਂ ਪਦ’’ਨ੍ਤਿ.
ਠਾਨਮ੍ਪਿ ਰਾਗਚਰਿਤਸ੍ਸ ਪਾਸਾਦਿਕਂ ਹੋਤਿ ਮਧੁਰਾਕਾਰਂ, ਦੋਸਚਰਿਤਸ੍ਸ ਥਦ੍ਧਾਕਾਰਂ, ਮੋਹਚਰਿਤਸ੍ਸ ਆਕੁਲਾਕਾਰਂ. ਨਿਸਜ੍ਜਾਯਪਿ ਏਸੇਵ ਨਯੋ. ਰਾਗਚਰਿਤੋ ਚ ਅਤਰਮਾਨੋ ਸਮਂ ਸੇਯ੍ਯਂ ਪਞ੍ਞਪੇਤ੍ਵਾ ਸਣਿਕਂ ਨਿਪਜ੍ਜਿਤ੍ਵਾ ਅਙ੍ਗਪਚ੍ਚਙ੍ਗਾਨਿ ਸਮੋਧਾਯ ਪਾਸਾਦਿਕੇਨ ਆਕਾਰੇਨ ਸਯਤਿ, ਵੁਟ੍ਠਾਪਿਯਮਾਨੋ ਚ ਸੀਘਂ ਅਵੁਟ੍ਠਾਯ ਸਙ੍ਕਿਤੋ ਵਿਯ ਸਣਿਕਂ ਪਟਿਵਚਨਂ ਦੇਤਿ. ਦੋਸਚਰਿਤੋ ਤਰਮਾਨੋ ਯਥਾ ਵਾ ਤਥਾ ਵਾ ਸੇਯ੍ਯਂ ਪਞ੍ਞਪੇਤ੍ਵਾ ਪਕ੍ਖਿਤ੍ਤਕਾਯੋ ਭਾਕੁਟਿਂ ਕਤ੍ਵਾ ਸਯਤਿ, ਵੁਟ੍ਠਾਪਿਯਮਾਨੋ ਚ ਸੀਘਂ ਵੁਟ੍ਠਾਯ ਕੁਪਿਤੋ ਵਿਯ ਪਟਿਵਚਨਂ ਦੇਤਿ. ਮੋਹਚਰਿਤੋ ਦੁਸ੍ਸਣ੍ਠਾਨਂ ਸੇਯ੍ਯਂ ਪਞ੍ਞਪੇਤ੍ਵਾ ਵਿਕ੍ਖਿਤ੍ਤਕਾਯੋ ਬਹੁਲਂ ਅਧੋਮੁਖੋ ਸਯਤਿ, ਵੁਟ੍ਠਾਪਿਯਮਾਨੋ ਚ ਹੁਙ੍ਕਾਰਂ ਕਰੋਨ੍ਤੋ ਦਨ੍ਧਂ ਵੁਟ੍ਠਾਤਿ. ਸਦ੍ਧਾਚਰਿਤਾਦਯੋ ਪਨ ਯਸ੍ਮਾ ਰਾਗਚਰਿਤਾਦੀਨਂ ਸਭਾਗਾ, ਤਸ੍ਮਾ ਤੇਸਮ੍ਪਿ ਤਾਦਿਸੋਵ ਇਰਿਯਾਪਥੋ ਹੋਤੀਤਿ. ਏਵਂ ਤਾਵ ਇਰਿਯਾਪਥਤੋ ਚਰਿਯਾਯੋ ਵਿਭਾਵਯੇ.
ਕਿਚ੍ਚਾਤਿ ਸਮ੍ਮਜ੍ਜਨਾਦੀਸੁ ਚ ਕਿਚ੍ਚੇਸੁ ਰਾਗਚਰਿਤੋ ਸਾਧੁਕਂ ਸਮ੍ਮਜ੍ਜਨਿਂ ਗਹੇਤ੍ਵਾ ਅਤਰਮਾਨੋ ਵਾਲਿਕਂ ਅਵਿਪ੍ਪਕਿਰਨ੍ਤੋ ਸਿਨ੍ਦੁਵਾਰਕੁਸੁਮਸਨ੍ਥਰਮਿਵ ਸਨ੍ਥਰਨ੍ਤੋ ਸੁਦ੍ਧਂ ਸਮਂ ਸਮ੍ਮਜ੍ਜਤਿ. ਦੋਸਚਰਿਤੋ ਗਾਲ਼੍ਹਂ ਸਮ੍ਮਜ੍ਜਨਿਂ ਗਹੇਤ੍ਵਾ ਤਰਮਾਨਰੂਪੋ ਉਭਤੋ ਵਾਲਿਕਂ ਉਸ੍ਸਾਰੇਨ੍ਤੋ ਖਰੇਨ ਸਦ੍ਦੇਨ ਅਸੁਦ੍ਧਂ ਵਿਸਮਂ ਸਮ੍ਮਜ੍ਜਤਿ. ਮੋਹਚਰਿਤੋ ਸਿਥਿਲਂ ਸਮ੍ਮਜ੍ਜਨਿਂ ਗਹੇਤ੍ਵਾ ਸਮ੍ਪਰਿਵਤ੍ਤਕਂ ਆਲ਼ੋਲਯਮਾਨੋ ਅਸੁਦ੍ਧਂ ਵਿਸਮਂ ਸਮ੍ਮਜ੍ਜਤਿ.
ਯਥਾ ਸਮ੍ਮਜ੍ਜਨੇ, ਏਵਂ ਚੀਵਰਧੋਵਨਰਜਨਾਦੀਸੁਪਿ ਸਬ੍ਬਕਿਚ੍ਚੇਸੁ ਨਿਪੁਣਮਧੁਰਸਮਸਕ੍ਕਚ੍ਚਕਾਰੀ ਰਾਗਚਰਿਤੋ. ਗਾਲ਼੍ਹਥਦ੍ਧਵਿਸਮਕਾਰੀ ਦੋਸਚਰਿਤੋ. ਅਨਿਪੁਣਬ੍ਯਾਕੁਲਵਿਸਮਾਪਰਿਚ੍ਛਿਨ੍ਨਕਾਰੀ ਮੋਹਚਰਿਤੋ. ਚੀਵਰਧਾਰਣਮ੍ਪਿ ਚ ਰਾਗਚਰਿਤਸ੍ਸ ਨਾਤਿਗਾਲ਼੍ਹਂ ਨਾਤਿਸਿਥਿਲਂ ਹੋਤਿ ਪਾਸਾਦਿਕਂ ਪਰਿਮਣ੍ਡਲਂ. ਦੋਸਚਰਿਤਸ੍ਸ ਅਤਿਗਾਲ਼੍ਹਂ ਅਪਰਿਮਣ੍ਡਲਂ. ਮੋਹਚਰਿਤਸ੍ਸ ਸਿਥਿਲਂ ਪਰਿਬ੍ਯਾਕੁਲਂ. ਸਦ੍ਧਾਚਰਿਤਾਦਯੋ ਤੇਸਂਯੇਵਾਨੁਸਾਰੇਨ ਵੇਦਿਤਬ੍ਬਾ, ਤਂ ਸਭਾਗਤ੍ਤਾਤਿ. ਏਵਂ ਕਿਚ੍ਚਤੋ ਚਰਿਯਾਯੋ ਵਿਭਾਵਯੇ.
ਭੋਜਨਾਤਿ ਰਾਗਚਰਿਤੋ ਸਿਨਿਦ੍ਧਮਧੁਰਭੋਜਨਪ੍ਪਿਯੋ ਹੋਤਿ, ਭੁਞ੍ਜਮਾਨੋ ਚ ਨਾਤਿਮਹਨ੍ਤਂ ਪਰਿਮਣ੍ਡਲਂ ਆਲੋਪਂ ਕਤ੍ਵਾ ਰਸਪਟਿਸਂਵੇਦੀ ਅਤਰਮਾਨੋ ਭੁਞ੍ਜਤਿ, ਕਿਞ੍ਚਿਦੇਵ ਚ ਸਾਦੁਂ ਲਭਿਤ੍ਵਾ ਸੋਮਨਸ੍ਸਂ ਆਪਜ੍ਜਤਿ. ਦੋਸਚਰਿਤੋ ਲੂਖਅਮ੍ਬਿਲਭੋਜਨਪ੍ਪਿਯੋ ਹੋਤਿ, ਭੁਞ੍ਜਮਾਨੋ ਚ ਮੁਖਪੂਰਕਂ ਆਲੋਪਂ ਕਤ੍ਵਾ ਅਰਸਪਟਿਸਂਵੇਦੀ ਤਰਮਾਨੋ ਭੁਞ੍ਜਤਿ, ਕਿਞ੍ਚਿਦੇਵ ਚ ਅਸਾਦੁਂ ਲਭਿਤ੍ਵਾ ਦੋਮਨਸ੍ਸਂ ਆਪਜ੍ਜਤਿ. ਮੋਹਚਰਿਤੋ ਅਨਿਯਤਰੁਚਿਕੋ ਹੋਤਿ, ਭੁਞ੍ਜਮਾਨੋ ਚ ਅਪਰਿਮਣ੍ਡਲਂ ਪਰਿਤ੍ਤਂ ਆਲੋਪਂ ਕਤ੍ਵਾ ਭਾਜਨੇ ਛਡ੍ਡੇਨ੍ਤੋ ਮੁਖਂ ਮਕ੍ਖੇਨ੍ਤੋ ਵਿਕ੍ਖਿਤ੍ਤਚਿਤ੍ਤੋ ਤਂ ਤਂ ਵਿਤਕ੍ਕੇਨ੍ਤੋ ਭੁਞ੍ਜਤਿ. ਸਦ੍ਧਾਚਰਿਤਾਦਯੋਪਿ ਤੇਸਂਯੇਵਾਨੁਸਾਰੇਨ ਵੇਦਿਤਬ੍ਬਾ, ਤਂਸਭਾਗਤ੍ਤਾਤਿ. ਏਵਂ ਭੋਜਨਤੋ ਚਰਿਯਾਯੋ ਵਿਭਾਵਯੇ.
ਦਸ੍ਸਨਾਦਿਤੋਤਿ ਰਾਗਚਰਿਤੋ ਈਸਕਮ੍ਪਿ ਮਨੋਰਮਂ ਰੂਪਂ ਦਿਸ੍ਵਾ ਵਿਮ੍ਹਯਜਾਤੋ ਵਿਯ ਚਿਰਂ ਓਲੋਕੇਤਿ, ਪਰਿਤ੍ਤੇਪਿ ਗੁਣੇ ਸਜ੍ਜਤਿ, ਭੂਤਮ੍ਪਿ ਦੋਸਂ ਨ ਗਣ੍ਹਾਤਿ, ਪਕ੍ਕਮਨ੍ਤੋਪਿ ਅਮੁਞ੍ਚਿਤੁਕਾਮੋਵ ਹੁਤ੍ਵਾ ਸਾਪੇਕ੍ਖੋ ਪਕ੍ਕਮਤਿ. ਦੋਸਚਰਿਤੋ ਈਸਕਮ੍ਪਿ ਅਮਨੋਰਮਂ ਰੂਪਂ ਦਿਸ੍ਵਾ ਕਿਲਨ੍ਤਰੂਪੋ ਵਿਯ ਨ ਚਿਰਂ ਓਲੋਕੇਤਿ, ਪਰਿਤ੍ਤੇਪਿ ਦੋਸੇ ਪਟਿਹਞ੍ਞਤਿ, ਭੂਤਮ੍ਪਿ ਗੁਣਂ ਨ ਗਣ੍ਹਾਤਿ, ਪਕ੍ਕਮਨ੍ਤੋਪਿ ਮੁਞ੍ਚਿਤੁਕਾਮੋਵ ਹੁਤ੍ਵਾ ਅਨਪੇਕ੍ਖੋ ਪਕ੍ਕਮਤਿ. ਮੋਹਚਰਿਤੋ ਯਂਕਿਞ੍ਚਿ ਰੂਪਂ ਦਿਸ੍ਵਾ ਪਰਪਚ੍ਚਯਿਕੋ ਹੋਤਿ, ਪਰਂ ਨਿਨ੍ਦਨ੍ਤਂ ਸੁਤ੍ਵਾ ਨਿਨ੍ਦਤਿ, ਪਸਂਸਨ੍ਤਂ ਸੁਤ੍ਵਾ ਪਸਂਸਤਿ, ਸਯਂ ਪਨ ਅਞ੍ਞਾਣੁਪੇਕ੍ਖਾਯ ਉਪੇਕ੍ਖਕੋਵ ਹੋਤਿ. ਏਸ ਨਯੋ ਸਦ੍ਦਸਵਨਾਦੀਸੁਪਿ. ਸਦ੍ਧਾਚਰਿਤਾਦਯੋ ਪਨ ਤੇਸਂਯੇਵਾਨੁਸਾਰੇਨ ਵੇਦਿਤਬ੍ਬਾ, ਤਂਸਭਾਗਤ੍ਤਾਤਿ. ਏਵਂ ਦਸ੍ਸਨਾਦਿਤੋ ਚਰਿਯਾਯੋ ਵਿਭਾਵਯੇ.
ਧਮ੍ਮਪ੍ਪਵਤ੍ਤਿਤੋ ਚੇਵਾਤਿ ਰਾਗਚਰਿਤਸ੍ਸ ਚ ਮਾਯਾ, ਸਾਠੇਯ੍ਯਂ, ਮਾਨੋ, ਪਾਪਿਚ੍ਛਤਾ, ਮਹਿਚ੍ਛਤਾ, ਅਸਨ੍ਤੁਟ੍ਠਿਤਾ, ਸਿਙ੍ਗਂ, ਚਾਪਲ੍ਯਨ੍ਤਿ ਏਵਮਾਦਯੋ ਧਮ੍ਮਾ ਬਹੁਲਂ ਪਵਤ੍ਤਨ੍ਤਿ. ਦੋਸਚਰਿਤਸ੍ਸ ਕੋਧੋ, ਉਪਨਾਹੋ, ਮਕ੍ਖੋ, ਪਲ਼ਾਸੋ, ਇਸ੍ਸਾ, ਮਚ੍ਛਰਿਯਨ੍ਤਿ ਏਵਮਾਦਯੋ. ਮੋਹਚਰਿਤਸ੍ਸ ਥਿਨਂ, ਮਿਦ੍ਧਂ, ਉਦ੍ਧਚ੍ਚਂ, ਕੁਕ੍ਕੁਚ੍ਚਂ, ਵਿਚਿਕਿਚ੍ਛਾ, ਆਧਾਨਗ੍ਗਾਹਿਤਾ, ਦੁਪ੍ਪਟਿਨਿਸ੍ਸਗ੍ਗਿਤਾਤਿ ਏਵਮਾਦਯੋ. ਸਦ੍ਧਾਚਰਿਤਸ੍ਸ ਮੁਤ੍ਤਚਾਗਤਾ, ਅਰਿਯਾਨਂ ਦਸ੍ਸਨਕਾਮਤਾ, ਸਦ੍ਧਮ੍ਮਂ ਸੋਤੁਕਾਮਤਾ, ਪਾਮੋਜ੍ਜਬਹੁਲਤਾ, ਅਸਠਤਾ, ਅਮਾਯਾਵਿਤਾ, ਪਸਾਦਨੀਯੇਸੁ ਠਾਨੇਸੁ ਪਸਾਦੋਤਿ ਏਵਮਾਦਯੋ. ਬੁਦ੍ਧਿਚਰਿਤਸ੍ਸ ਸੋਵਚਸ੍ਸਤਾ, ਕਲ੍ਯਾਣਮਿਤ੍ਤਤਾ, ਭੋਜਨੇਮਤ੍ਤਞ੍ਞੁਤਾ, ਸਤਿਸਮ੍ਪਜਞ੍ਞਂ, ਜਾਗਰਿਯਾਨੁਯੋਗੋ, ਸਂਵੇਜਨੀਯੇਸੁ ਠਾਨੇਸੁ ਸਂਵੇਗੋ, ਸਂਵਿਗ੍ਗਸ੍ਸ ਚ ਯੋਨਿਸੋ ਪਧਾਨਨ੍ਤਿ ਏਵਮਾਦਯੋ. ਵਿਤਕ੍ਕਚਰਿਤਸ੍ਸ ਭਸ੍ਸਬਹੁਲਤਾ, ਗਣਾਰਾਮਤਾ, ਕੁਸਲਾਨੁਯੋਗੇ ਅਰਤਿ, ਅਨਵਟ੍ਠਿਤਕਿਚ੍ਚਤਾ, ਰਤ੍ਤਿਂ ਧੂਮਾਯਨਾ, ਦਿਵਾ ਪਜ੍ਜਲਨਾ, ਹੁਰਾਹੁਰਂ ਧਾਵਨਾਤਿ ਏਵਮਾਦਯੋ ਧਮ੍ਮਾ ਬਹੁਲਂ ਪਵਤ੍ਤਨ੍ਤੀਤਿ. ਏਵਂ ਧਮ੍ਮਪ੍ਪਵਤ੍ਤਿਤੋ ਚਰਿਯਾਯੋ ਵਿਭਾਵਯੇ.
ਯਸ੍ਮਾ ਪਨ ਇਦਂ ਚਰਿਯਾਵਿਭਾਵਨਵਿਧਾਨਂ ਸਬ੍ਬਾਕਾਰੇਨ ਨੇਵ ਪਾਲ਼ਿਯਂ ਨ ਅਟ੍ਠਕਥਾਯਂ ਆਗਤਂ, ਕੇਵਲਂ ਆਚਰਿਯਮਤਾਨੁਸਾਰੇਨ ਵੁਤ੍ਤਂ, ਤਸ੍ਮਾ ਨ ਸਾਰਤੋ ਪਚ੍ਚੇਤਬ੍ਬਂ. ਰਾਗਚਰਿਤਸ੍ਸ ਹਿ ਵੁਤ੍ਤਾਨਿ ਇਰਿਯਾਪਥਾਦੀਨਿ ਦੋਸਚਰਿਤਾਦਯੋਪਿ ਅਪ੍ਪਮਾਦਵਿਹਾਰਿਨੋ ਕਾਤੁਂ ਸਕ੍ਕੋਨ੍ਤਿ. ਸਂਸਟ੍ਠਚਰਿਤਸ੍ਸ ਚ ਪੁਗ੍ਗਲਸ੍ਸ ਏਕਸ੍ਸੇਵ ਭਿਨ੍ਨਲਕ੍ਖਣਾ ਇਰਿਯਾਪਥਾਦਯੋ ਨ ਉਪਪਜ੍ਜਨ੍ਤਿ. ਯਂ ਪਨੇਤਂ ਅਟ੍ਠਕਥਾਸੁ ਚਰਿਯਾਵਿਭਾਵਨਵਿਧਾਨਂ ਵੁਤ੍ਤਂ, ਤਦੇਵ ਸਾਰਤੋ ਪਚ੍ਚੇਤਬ੍ਬਂ. ਵੁਤ੍ਤਞ੍ਹੇਤਂ ‘‘ਚੇਤੋਪਰਿਯਞਾਣਸ੍ਸ ਲਾਭੀ ਆਚਰਿਯੋ ਚਰਿਯਂ ਞਤ੍ਵਾ ਕਮ੍ਮਟ੍ਠਾਨਂ ਕਥੇਸ੍ਸਤਿ, ਇਤਰੇਨ ਅਨ੍ਤੇਵਾਸਿਕੋ ਪੁਚ੍ਛਿਤਬ੍ਬੋ’’ਤਿ. ਤਸ੍ਮਾ ਚੇਤੋਪਰਿਯਞਾਣੇਨ ਵਾ ਤਂ ਵਾ ਪੁਗ੍ਗਲਂ ਪੁਚ੍ਛਿਤ੍ਵਾ ਜਾਨਿਤਬ੍ਬਂ. ਅਯਂ ਪੁਗ੍ਗਲੋ ਰਾਗਚਰਿਤੋ, ਅਯਂ ਦੋਸਾਦੀਸੁ ਅਞ੍ਞਤਰਚਰਿਤੋਤਿ.
੪੬. ਕਿਂ ਚਰਿਤਸ੍ਸ ਪੁਗ੍ਗਲਸ੍ਸ ਕਿਂ ਸਪ੍ਪਾਯਨ੍ਤਿ ਏਤ੍ਥ ਪਨ ਸੇਨਾਸਨਂ ਤਾਵ ਰਾਗਚਰਿਤਸ੍ਸ ਅਧੋਤਵੇਦਿਕਂ ਭੂਮਟ੍ਠਕਂ ਅਕਤਪਬ੍ਭਾਰਕਂ ਤਿਣਕੁਟਿਕਂ ਪਣ੍ਣਸਾਲਾਦੀਨਂ ਅਞ੍ਞਤਰਂ ਰਜੋਕਿਣ੍ਣਂ ਜਤੁਕਾਭਰਿਤਂ ਓਲੁਗ੍ਗਵਿਲੁਗ੍ਗਂ ਅਤਿਉਚ੍ਚਂ ਵਾ ਅਤਿਨੀਚਂ ਵਾ ਉਜ੍ਜਙ੍ਗਲਂ ਸਾਸਙ੍ਕਂ ਅਸੁਚਿਵਿਸਮਮਗ੍ਗਂ, ਯਤ੍ਥ ਮਞ੍ਚਪੀਠਮ੍ਪਿ ਮਙ੍ਕੁਣਭਰਿਤਂ ਦੁਰੂਪਂ ਦੁਬ੍ਬਣ੍ਣਂ, ਯਂ ਓਲੋਕੇਨ੍ਤਸ੍ਸੇਵ ਜਿਗੁਚ੍ਛਾ ਉਪ੍ਪਜ੍ਜਤਿ, ਤਾਦਿਸਂ ਸਪ੍ਪਾਯਂ. ਨਿਵਾਸਨਪਾਰੁਪਨਂ ਅਨ੍ਤਚ੍ਛਿਨ੍ਨਂ ਓਲਮ੍ਬਵਿਲਮ੍ਬਸੁਤ੍ਤਕਾਕਿਣ੍ਣਂ ਜਾਲਪੂਵਸਦਿਸਂ ਸਾਣਿ ਵਿਯ ਖਰਸਮ੍ਫਸ੍ਸਂ ਕਿਲਿਟ੍ਠਂ ਭਾਰਿਕਂ ਕਿਚ੍ਛਪਰਿਹਰਣਂ ਸਪ੍ਪਾਯਂ. ਪਤ੍ਤੋਪਿ ਦੁਬ੍ਬਣ੍ਣੋ ਮਤ੍ਤਿਕਾਪਤ੍ਤੋ ਵਾ ਆਣਿਗਣ੍ਠਿਕਾਹਤੋ ਅਯੋਪਤ੍ਤੋ ਵਾ ਗਰੁਕੋ ਦੁਸ੍ਸਣ੍ਠਾਨੋ ਸੀਸਕਪਾਲਮਿਵ ਜੇਗੁਚ੍ਛੋ ਵਟ੍ਟਤਿ. ਭਿਕ੍ਖਾਚਾਰਮਗ੍ਗੋਪਿ ਅਮਨਾਪੋ ਅਨਾਸਨ੍ਨਗਾਮੋ ਵਿਸਮੋ ਵਟ੍ਟਤਿ. ਭਿਕ੍ਖਾਚਾਰਗਾਮੋਪਿ ਯਤ੍ਥ ਮਨੁਸ੍ਸਾ ਅਪਸ੍ਸਨ੍ਤਾ ਵਿਯ ਚਰਨ੍ਤਿ, ਯਤ੍ਥ ਏਕਕੁਲੇਪਿ ਭਿਕ੍ਖਂ ਅਲਭਿਤ੍ਵਾ ਨਿਕ੍ਖਮਨ੍ਤਂ ‘‘ਏਹਿ, ਭਨ੍ਤੇ’’ਤਿ ਆਸਨਸਾਲਂ ਪਵੇਸੇਤ੍ਵਾ ਯਾਗੁਭਤ੍ਤਂ ਦਤ੍ਵਾ ਗਚ੍ਛਨ੍ਤਾ ਗਾਵੀ ਵਿਯ ਵਜੇ ਪਵੇਸੇਤ੍ਵਾ ਅਨਪਲੋਕੇਨ੍ਤਾ ਗਚ੍ਛਨ੍ਤਿ, ਤਾਦਿਸੋ ਵਟ੍ਟਤਿ. ਪਰਿਵਿਸਕਮਨੁਸ੍ਸਾਪਿ ਦਾਸਾ ਵਾ ਕਮ੍ਮਕਰਾ ਵਾ ਦੁਬ੍ਬਣ੍ਣਾ ਦੁਦ੍ਦਸਿਕਾ ਕਿਲਿਟ੍ਠਵਸਨਾ ਦੁਗ੍ਗਨ੍ਧਾ ਜੇਗੁਚ੍ਛਾ, ਯੇ ਅਚਿਤ੍ਤੀਕਾਰੇਨ ਯਾਗੁਭਤ੍ਤਂ ਛਡ੍ਡੇਨ੍ਤਾ ਵਿਯ ਪਰਿਵਿਸਨ੍ਤਿ, ਤਾਦਿਸਾ ਸਪ੍ਪਾਯਾ. ਯਾਗੁਭਤ੍ਤਖਜ੍ਜਕਮ੍ਪਿ ਲੂਖਂ ਦੁਬ੍ਬਣ੍ਣਂ ਸਾਮਾਕਕੁਦ੍ਰੂਸਕਕਣਾਜਕਾਦਿਮਯਂ ਪੂਤਿਤਕ੍ਕਂ ਬਿਲਙ੍ਗਂ ਜਿਣ੍ਣਸਾਕਸੂਪੇਯ੍ਯਂ ਯਂਕਿਞ੍ਚਿਦੇਵ ਕੇਵਲਂ ਉਦਰਪੂਰਮਤ੍ਤਂ ਵਟ੍ਟਤਿ. ਇਰਿਯਾਪਥੋਪਿਸ੍ਸ ਠਾਨਂ ਵਾ ਚਙ੍ਕਮੋ ਵਾ ਵਟ੍ਟਤਿ. ਆਰਮ੍ਮਣਂ ਨੀਲਾਦੀਸੁ ਵਣ੍ਣਕਸਿਣੇਸੁ ਯਂਕਿਞ੍ਚਿ ਅਪਰਿਸੁਦ੍ਧਵਣ੍ਣਨ੍ਤਿ ਇਦਂ ਰਾਗਚਰਿਤਸ੍ਸ ਸਪ੍ਪਾਯਂ.
ਦੋਸਚਰਿਤਸ੍ਸ ਸੇਨਾਸਨਂ ਨਾਤਿਉਚ੍ਚਂ ਨਾਤਿਨੀਚਂ ਛਾਯੂਦਕਸਮ੍ਪਨ੍ਨਂ ਸੁਵਿਭਤ੍ਤਭਿਤ੍ਤਿਥਮ੍ਭਸੋਪਾਨਂ ਸੁਪਰਿਨਿਟ੍ਠਿਤਮਾਲਾਕਮ੍ਮਲਤਾਕਮ੍ਮਨਾਨਾਵਿਧਚਿਤ੍ਤਕਮ੍ਮਸਮੁਜ੍ਜਲਸਮਸਿਨਿਦ੍ਧਮੁਦੁਭੂਮਿਤਲਂ ਬ੍ਰਹ੍ਮਵਿਮਾਨਮਿਵ ਕੁਸੁਮਦਾਮਵਿਚਿਤ੍ਰਵਣ੍ਣਚੇਲਵਿਤਾਨਸਮਲਙ੍ਕਤਂ ਸੁਪਞ੍ਞਤ੍ਤਸੁਚਿਮਨੋਰਮਤ੍ਥਰਣਮਞ੍ਚਪੀਠਂ ਤਤ੍ਥ ਤਤ੍ਥ ਵਾਸਤ੍ਥਾਯ ਨਿਕ੍ਖਿਤ੍ਤਕੁਸੁਮਵਾਸਗਨ੍ਧਸੁਗਨ੍ਧਂ ਯਂ ਦਸ੍ਸਨਮਤ੍ਤੇਨੇਵ ਪੀਤਿਪਾਮੋਜ੍ਜਂ ਜਨਯਤਿ, ਏਵਰੂਪਂ ਸਪ੍ਪਾਯਂ. ਤਸ੍ਸ ਪਨ ਸੇਨਾਸਨਸ੍ਸ ਮਗ੍ਗੋਪਿ ਸਬ੍ਬਪਰਿਸ੍ਸਯਵਿਮੁਤ੍ਤੋ ਸੁਚਿਸਮਤਲੋ ਅਲਙ੍ਕਤਪਟਿਯਤ੍ਤੋਵ ਵਟ੍ਟਤਿ. ਸੇਨਾਸਨਪਰਿਕ੍ਖਾਰੋਪੇਤ੍ਥ ਕੀਟਮਙ੍ਕੁਣਦੀਘਜਾਤਿਮੂਸਿਕਾਨਂ ਨਿਸ੍ਸਯਪਰਿਚ੍ਛਿਨ੍ਦਨਤ੍ਥਂ ਨਾਤਿਬਹੁਕੋ, ਏਕਮਞ੍ਚਪੀਠਮਤ੍ਤਮੇਵ ਵਟ੍ਟਤਿ. ਨਿਵਾਸਨਪਾਰੁਪਨਮ੍ਪਿਸ੍ਸ ਚੀਨਪਟ੍ਟਸੋਮਾਰਪਟ੍ਟਕੋਸੇਯ੍ਯਕਪ੍ਪਾਸਿਕਸੁਖੁਮਖੋਮਾਦੀਨਂ ਯਂ ਯਂ ਪਣੀਤਂ, ਤੇਨ ਤੇਨ ਏਕਪਟ੍ਟਂ ਵਾ ਦੁਪਟ੍ਟਂ ਵਾ ਸਲ੍ਲਹੁਕਂ ਸਮਣਸਾਰੁਪ੍ਪੇਨ ਸੁਰਤ੍ਤਂ ਸੁਦ੍ਧਵਣ੍ਣਂ ਵਟ੍ਟਤਿ. ਪਤ੍ਤੋ ਉਦਕਪੁਪ੍ਫੁਲ਼ਮਿਵ ਸੁਸਣ੍ਠਾਨੋ ਮਣਿ ਵਿਯ ਸੁਮਟ੍ਠੋ ਨਿਮ੍ਮਲੋ ਸਮਣਸਾਰੁਪ੍ਪੇਨ ਸੁਪਰਿਸੁਦ੍ਧਵਣ੍ਣੋ ਅਯੋਮਯੋ ਵਟ੍ਟਤਿ. ਭਿਕ੍ਖਾਚਾਰਮਗ੍ਗੋ ਪਰਿਸ੍ਸਯਵਿਮੁਤ੍ਤੋ ਸਮੋ ਮਨਾਪੋ ਨਾਤਿਦੂਰਨਾਚ੍ਚਾਸਨ੍ਨਗਾਮੋ ਵਟ੍ਟਤਿ. ਭਿਕ੍ਖਾਚਾਰਗਾਮੋਪਿ ਯਤ੍ਥ ਮਨੁਸ੍ਸਾ ‘‘ਇਦਾਨਿ ਅਯ੍ਯੋ ਆਗਮਿਸ੍ਸਤੀ’’ਤਿ ਸਿਤ੍ਤਸਮ੍ਮਟ੍ਠੇ ਪਦੇਸੇ ਆਸਨਂ ਪਞ੍ਞਾਪੇਤ੍ਵਾ ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਂ ਆਦਾਯ ਘਰਂ ਪਵੇਸੇਤ੍ਵਾ ਪਞ੍ਞਤ੍ਤਾਸਨੇ ਨਿਸੀਦਾਪੇਤ੍ਵਾ ਸਕ੍ਕਚ੍ਚਂ ਸਹਤ੍ਥਾ ਪਰਿਵਿਸਨ੍ਤਿ, ਤਾਦਿਸੋ ਵਟ੍ਟਤਿ. ਪਰਿਵੇਸਕਾ ਪਨਸ੍ਸ ਯੇ ਹੋਨ੍ਤਿ ਅਭਿਰੂਪਾ ਪਾਸਾਦਿਕਾ ਸੁਨ੍ਹਾਤਾ ਸੁਵਿਲਿਤ੍ਤਾ ਧੂਪਵਾਸਕੁਸੁਮਗਨ੍ਧਸੁਰਭਿਨੋ ਨਾਨਾਵਿਰਾਗਸੁਚਿਮਨੁਞ੍ਞਵਤ੍ਥਾਭਰਣਪਟਿਮਣ੍ਡਿਤਾ ਸਕ੍ਕਚ੍ਚਕਾਰਿਨੋ, ਤਾਦਿਸਾ ਸਪ੍ਪਾਯਾ. ਯਾਗੁਭਤ੍ਤਖਜ੍ਜਕਮ੍ਪਿ ਵਣ੍ਣਗਨ੍ਧਰਸਸਮ੍ਪਨ੍ਨਂ ਓਜਵਨ੍ਤਂ ਮਨੋਰਮਂ ਸਬ੍ਬਾਕਾਰਪਣੀਤਂ ਯਾਵਦਤ੍ਥਂ ਵਟ੍ਟਤਿ. ਇਰਿਯਾਪਥੋਪਿਸ੍ਸ ਸੇਯ੍ਯਾ ਵਾ ਨਿਸਜ੍ਜਾ ਵਾ ਵਟ੍ਟਤਿ, ਆਰਮ੍ਮਣਂ ਨੀਲਾਦੀਸੁ ਵਣ੍ਣਕਸਿਣੇਸੁ ਯਂਕਿਞ੍ਚਿ ਸੁਪਰਿਸੁਦ੍ਧਵਣ੍ਣਨ੍ਤਿ ਇਦਂ ਦੋਸਚਰਿਤਸ੍ਸ ਸਪ੍ਪਾਯਂ.
ਮੋਹਚਰਿਤਸ੍ਸ ਸੇਨਾਸਨਂ ਦਿਸਾਮੁਖਂ ਅਸਮ੍ਬਾਧਂ ਵਟ੍ਟਤਿ, ਯਤ੍ਥ ਨਿਸਿਨ੍ਨਸ੍ਸ ਵਿਵਟਾ ਦਿਸਾ ਖਾਯਨ੍ਤਿ, ਇਰਿਯਾਪਥੇਸੁ ਚਙ੍ਕਮੋ ਵਟ੍ਟਤਿ. ਆਰਮ੍ਮਣਂ ਪਨਸ੍ਸ ਪਰਿਤ੍ਤਂ ਸੁਪ੍ਪਮਤ੍ਤਂ ਸਰਾਵਮਤ੍ਤਂ ਵਾ (ਖੁਦ੍ਦਕਂ) ਨ ਵਟ੍ਟਤਿ. ਸਮ੍ਬਾਧਸ੍ਮਿਞ੍ਹਿ ਓਕਾਸੇ ਚਿਤ੍ਤਂ ਭਿਯ੍ਯੋ ਸਮ੍ਮੋਹਮਾਪਜ੍ਜਤਿ, ਤਸ੍ਮਾ ਵਿਪੁਲਂ ਮਹਾਕਸਿਣਂ ਵਟ੍ਟਤਿ. ਸੇਸਂ ਦੋਸਚਰਿਤਸ੍ਸ ਵੁਤ੍ਤਸਦਿਸਮੇਵਾਤਿ ਇਦਂ ਮੋਹਚਰਿਤਸ੍ਸ ਸਪ੍ਪਾਯਂ.
ਸਦ੍ਧਾਚਰਿਤਸ੍ਸ ਸਬ੍ਬਮ੍ਪਿ ਦੋਸਚਰਿਤਮ੍ਹਿ ਵੁਤ੍ਤਵਿਧਾਨਂ ਸਪ੍ਪਾਯਂ. ਆਰਮ੍ਮਣੇਸੁ ਚਸ੍ਸ ਅਨੁਸ੍ਸਤਿਟ੍ਠਾਨਮ੍ਪਿ ਵਟ੍ਟਤਿ.
ਬੁਦ੍ਧਿਚਰਿਤਸ੍ਸ ਸੇਨਾਸਨਾਦੀਸੁ ਇਦਂ ਨਾਮ ਅਸਪ੍ਪਾਯਨ੍ਤਿ ਨਤ੍ਥਿ.
ਵਿਤਕ੍ਕਚਰਿਤਸ੍ਸ ਸੇਨਾਸਨਂ ਵਿਵਟਂ ਦਿਸਾਮੁਖਂ ਯਤ੍ਥ ਨਿਸਿਨ੍ਨਸ੍ਸ ਆਰਾਮਵਨਪੋਕ੍ਖਰਣੀਰਾਮਣੇਯ੍ਯਕਾਨਿ ਗਾਮਨਿਗਮਜਨਪਦਪਟਿਪਾਟਿਯੋ ਨੀਲੋਭਾਸਾ ਚ ਪਬ੍ਬਤਾ ਪਞ੍ਞਾਯਨ੍ਤਿ, ਤਂ ਨ ਵਟ੍ਟਤਿ, ਤਞ੍ਹਿ ਵਿਤਕ੍ਕਵਿਧਾਵਨਸ੍ਸੇਵ ਪਚ੍ਚਯੋ ਹੋਤਿ, ਤਸ੍ਮਾ ਗਮ੍ਭੀਰੇ ਦਰੀਮੁਖੇ ਵਨਪ੍ਪਟਿਚ੍ਛਨ੍ਨੇ ਹਤ੍ਥਿਕੁਚ੍ਛਿਪਬ੍ਭਾਰਮਹਿਨ੍ਦਗੁਹਾਸਦਿਸੇ ਸੇਨਾਸਨੇ ਵਸਿਤਬ੍ਬਂ. ਆਰਮ੍ਮਣਮ੍ਪਿਸ੍ਸ ਵਿਪੁਲਂ ਨ ਵਟ੍ਟਤਿ. ਤਾਦਿਸਞ੍ਹਿ ਵਿਤਕ੍ਕਵਸੇਨ ਸਨ੍ਧਾਵਨਸ੍ਸ ਪਚ੍ਚਯੋ ਹੋਤਿ. ਪਰਿਤ੍ਤਂ ਪਨ ਵਟ੍ਟਤਿ.
ਸੇਸਂ ਰਾਗਚਰਿਤਸ੍ਸ ਵੁਤ੍ਤਸਦਿਸਮੇਵਾਤਿ ਇਦਂ ਵਿਤਕ੍ਕਚਰਿਤਸ੍ਸ ਸਪ੍ਪਾਯਂ. ਅਯਂ ਅਤ੍ਤਨੋ ਚਰਿਯਾਨੁਕੂਲਨ੍ਤਿ ਏਤ੍ਥ ਆਗਤਚਰਿਯਾਨਂ ਪਭੇਦਨਿਦਾਨਵਿਭਾਵਨਸਪ੍ਪਾਯਪਰਿਚ੍ਛੇਦਤੋ ਵਿਤ੍ਥਾਰੋ. ਨ ਚ ਤਾਵ ਚਰਿਯਾਨੁਕੂਲਂ ਕਮ੍ਮਟ੍ਠਾਨਂ ਸਬ੍ਬਾਕਾਰੇਨ ਆਵਿਕਤਂ. ਤਞ੍ਹਿ ਅਨਨ੍ਤਰਸ੍ਸ ਮਾਤਿਕਾਪਦਸ੍ਸ ਵਿਤ੍ਥਾਰੇ ਸਯਮੇਵ ਆਵਿਭਵਿਸ੍ਸਤਿ.
ਚਤ੍ਤਾਲੀਸਕਮ੍ਮਟ੍ਠਾਨਵਣ੍ਣਨਾ
੪੭. ਤਸ੍ਮਾ ਯਂ ਵੁਤ੍ਤਂ ਚਤ੍ਤਾਲੀਸਾਯ ਕਮ੍ਮਟ੍ਠਾਨੇਸੁ ਅਞ੍ਞਤਰਂ ਕਮ੍ਮਟ੍ਠਾਨਂ ਗਹੇਤ੍ਵਾਤਿ ਏਤ੍ਥ ਸਙ੍ਖਾਤਨਿਦ੍ਦੇਸਤੋ, ਉਪਚਾਰਪ੍ਪਨਾਵਹਤੋ, ਝਾਨਪ੍ਪਭੇਦਤੋ, ਸਮਤਿਕ੍ਕਮਤੋ, ਵਡ੍ਢਨਾਵਡ੍ਢਨਤੋ, ਆਰਮ੍ਮਣਤੋ, ਭੂਮਿਤੋ, ਗਹਣਤੋ, ਪਚ੍ਚਯਤੋ, ਚਰਿਯਾਨੁਕੂਲਤੋਤਿ ਇਮੇਹਿ ਤਾਵ ਦਸਹਾਕਾਰੇਹਿ ਕਮ੍ਮਟ੍ਠਾਨਵਿਨਿਚ੍ਛਯੋ ਵੇਦਿਤਬ੍ਬੋ.
ਤਤ੍ਥ ਸਙ੍ਖਾਤਨਿਦ੍ਦੇਸਤੋਤਿ ਚਤ੍ਤਾਲੀਸਾਯ ਕਮ੍ਮਟ੍ਠਾਨੇਸੂਤਿ ਹਿ ਵੁਤ੍ਤਂ, ਤਤ੍ਰਿਮਾਨਿ ਚਤ੍ਤਾਲੀਸ ਕਮ੍ਮਟ੍ਠਾਨਾਨਿ ਦਸ ਕਸਿਣਾ, ਦਸ ਅਸੁਭਾ, ਦਸ ਅਨੁਸ੍ਸਤਿਯੋ, ਚਤ੍ਤਾਰੋ ਬ੍ਰਹ੍ਮਵਿਹਾਰਾ, ਚਤ੍ਤਾਰੋ ਆਰੁਪ੍ਪਾ, ਏਕਾ ਸਞ੍ਞਾ, ਏਕਂ ਵਵਤ੍ਥਾਨਨ੍ਤਿ.
ਤਤ੍ਥ ਪਥਵੀਕਸਿਣਂ, ਆਪੋਕਸਿਣਂ, ਤੇਜੋਕਸਿਣਂ, ਵਾਯੋਕਸਿਣਂ, ਨੀਲਕਸਿਣਂ, ਪੀਤਕਸਿਣਂ, ਲੋਹਿਤਕਸਿਣਂ, ਓਦਾਤਕਸਿਣਂ, ਆਲੋਕਕਸਿਣਂ, ਪਰਿਚ੍ਛਿਨ੍ਨਾਕਾਸਕਸਿਣਨ੍ਤਿ ਇਮੇ ਦਸ ਕਸਿਣਾ.
ਉਦ੍ਧੁਮਾਤਕਂ, ਵਿਨੀਲਕਂ, ਵਿਪੁਬ੍ਬਕਂ, ਵਿਚ੍ਛਿਦ੍ਦਕਂ, ਵਿਕ੍ਖਾਯਿਤਕਂ, ਵਿਕ੍ਖਿਤ੍ਤਕਂ, ਹਤਵਿਕ੍ਖਿਤ੍ਤਕਂ, ਲੋਹਿਤਕਂ, ਪੁਲ਼ੁਵਕਂ, ਅਟ੍ਠਿਕਨ੍ਤਿ ਇਮੇ ਦਸ ਅਸੁਭਾ.
ਬੁਦ੍ਧਾਨੁਸ੍ਸਤਿ, ਧਮ੍ਮਾਨੁਸ੍ਸਤਿ, ਸਙ੍ਘਾਨੁਸ੍ਸਤਿ, ਸੀਲਾਨੁਸ੍ਸਤਿ, ਚਾਗਾਨੁਸ੍ਸਤਿ, ਦੇਵਤਾਨੁਸ੍ਸਤਿ, ਮਰਣਾਨੁਸ੍ਸਤਿ, ਕਾਯਗਤਾਸਤਿ, ਆਨਾਪਾਨਸ੍ਸਤਿ, ਉਪਸਮਾਨੁਸ੍ਸਤੀਤਿ ਇਮਾ ਦਸ ਅਨੁਸ੍ਸਤਿਯੋ.
ਮੇਤ੍ਤਾ, ਕਰੁਣਾ, ਮੁਦਿਤਾ, ਉਪੇਕ੍ਖਾਤਿ ਇਮੇ ਚਤ੍ਤਾਰੋ ਬ੍ਰਹ੍ਮਵਿਹਾਰਾ.
ਆਕਾਸਾਨਞ੍ਚਾਯਤਨਂ, ਵਿਞ੍ਞਾਣਞ੍ਚਾਯਤਨਂ, ਆਕਿਞ੍ਚਞ੍ਞਾਯਤਨਂ, ਨੇਵਸਞ੍ਞਾਨਾਸਞ੍ਞਾਯਤਨਨ੍ਤਿ ਇਮੇ ਚਤ੍ਤਾਰੋ ਆਰੁਪ੍ਪਾ. ਆਹਾਰੇ ਪਟਿਕੂਲਸਞ੍ਞਾ ਏਕਾ ਸਞ੍ਞਾ. ਚਤੁਧਾਤੁਵਵਤ੍ਥਾਨਂ ਏਕਂ ਵਵਤ੍ਥਾਨਨ੍ਤਿ ਏਵਂ ਸਙ੍ਖਾਤਨਿਦ੍ਦੇਸਤੋ ਵਿਨਿਚ੍ਛਯੋ ਵੇਦਿਤਬ੍ਬੋ.
ਉਪਚਾਰਪ੍ਪਨਾਵਹਤੋਤਿ ਠਪੇਤ੍ਵਾ ਕਾਯਗਤਾਸਤਿਞ੍ਚ ਆਨਾਪਾਨਸ੍ਸਤਿਞ੍ਚ ਅਵਸੇਸਾ ਅਟ੍ਠ ਅਨੁਸ੍ਸਤਿਯੋ, ਆਹਾਰੇ ਪਟਿਕੂਲਸਞ੍ਞਾ, ਚਤੁਧਾਤੁਵਵਤ੍ਥਾਨਨ੍ਤਿ ਇਮਾਨੇਵ ਹੇਤ੍ਥ ਦਸਕਮ੍ਮਟ੍ਠਾਨਾਨਿ ਉਪਚਾਰਵਹਾਨਿ. ਸੇਸਾਨਿ ਅਪ੍ਪਨਾਵਹਾਨਿ. ਏਵਂ ਉਪਚਾਰਪ੍ਪਨਾਵਹਤੋ.
ਝਾਨਪ੍ਪਭੇਦਤੋਤਿ ਅਪ੍ਪਨਾਵਹੇਸੁ ਚੇਤ੍ਥ ਆਨਾਪਾਨਸ੍ਸਤਿਯਾ ਸਦ੍ਧਿਂ ਦਸ ਕਸਿਣਾ ਚਤੁਕ੍ਕਜ੍ਝਾਨਿਕਾ ਹੋਨ੍ਤਿ. ਕਾਯਗਤਾਸਤਿਯਾ ਸਦ੍ਧਿਂ ਦਸ ਅਸੁਭਾ ਪਠਮਜ੍ਝਾਨਿਕਾ. ਪੁਰਿਮਾ ਤਯੋ ਬ੍ਰਹ੍ਮਵਿਹਾਰਾ ਤਿਕਜ੍ਝਾਨਿਕਾ. ਚਤੁਤ੍ਥਬ੍ਰਹ੍ਮਵਿਹਾਰੋ ਚਤ੍ਤਾਰੋ ਚ ਆਰੁਪ੍ਪਾ ਚਤੁਤ੍ਥਜ੍ਝਾਨਿਕਾਤਿ ਏਵਂ ਝਾਨਪ੍ਪਭੇਦਤੋ.
ਸਮਤਿਕ੍ਕਮਤੋਤਿ ਦ੍ਵੇ ਸਮਤਿਕ੍ਕਮਾ ਅਙ੍ਗਸਮਤਿਕ੍ਕਮੋ ਚ ਆਰਮ੍ਮਣਸਮਤਿਕ੍ਕਮੋ ਚ. ਤਤ੍ਥ ਸਬ੍ਬੇਸੁਪਿ ਤਿਕਚਤੁਕ੍ਕਜ੍ਝਾਨਿਕੇਸੁ ਕਮ੍ਮਟ੍ਠਾਨੇਸੁ ਅਙ੍ਗਸਮਤਿਕ੍ਕਮੋ ਹੋਤਿ ਵਿਤਕ੍ਕਵਿਚਾਰਾਦੀਨਿ ਝਾਨਙ੍ਗਾਨਿ ਸਮਤਿਕ੍ਕਮਿਤ੍ਵਾ ਤੇਸ੍ਵੇਵਾਰਮ੍ਮਣੇਸੁ ਦੁਤਿਯਜ੍ਝਾਨਾਦੀਨਂ ਪਤ੍ਤਬ੍ਬਤੋ. ਤਥਾ ਚਤੁਤ੍ਥਬ੍ਰਹ੍ਮਵਿਹਾਰੇ. ਸੋਪਿ ਹਿ ਮੇਤ੍ਤਾਦੀਨਂਯੇਵ ਆਰਮ੍ਮਣੇ ਸੋਮਨਸ੍ਸਂ ਸਮਤਿਕ੍ਕਮਿਤ੍ਵਾ ਪਤ੍ਤਬ੍ਬੋਤਿ. ਚਤੂਸੁ ਪਨ ਆਰੁਪ੍ਪੇਸੁ ਆਰਮ੍ਮਣਸਮਤਿਕ੍ਕਮੋ ਹੋਤਿ. ਪੁਰਿਮੇਸੁ ਹਿ ਨਵਸੁ ਕਸਿਣੇਸੁ ਅਞ੍ਞਤਰਂ ਸਮਤਿਕ੍ਕਮਿਤ੍ਵਾ ਆਕਾਸਾਨਞ੍ਚਾਯਤਨਂ ਪਤ੍ਤਬ੍ਬਂ. ਆਕਾਸਾਦੀਨਿ ਚ ਸਮਤਿਕ੍ਕਮਿਤ੍ਵਾ ਵਿਞ੍ਞਾਣਞ੍ਚਾਯਤਨਾਦੀਨਿ. ਸੇਸੇਸੁ ਸਮਤਿਕ੍ਕਮੋ ਨਤ੍ਥੀਤਿ ਏਵਂ ਸਮਤਿਕ੍ਕਮਤੋ.
ਵਡ੍ਢਨਾਵਡ੍ਢਨਤੋਤਿ ਇਮੇਸੁ ਚਤ੍ਤਾਲੀਸਾਯ ਕਮ੍ਮਟ੍ਠਾਨੇਸੁ ਦਸ ਕਸਿਣਾਨੇਵ ਵਡ੍ਢੇਤਬ੍ਬਾਨਿ. ਯਤ੍ਤਕਞ੍ਹਿ ਓਕਾਸਂ ਕਸਿਣੇਨ ਫਰਤਿ, ਤਦਬ੍ਭਨ੍ਤਰੇ ਦਿਬ੍ਬਾਯ ਸੋਤਧਾਤੁਯਾ ਸਦ੍ਦਂ ਸੋਤੁਂ ਦਿਬ੍ਬੇਨ ਚਕ੍ਖੁਨਾ ਰੂਪਾਨਿ ਪਸ੍ਸਿਤੁਂ ਪਰਸਤ੍ਤਾਨਞ੍ਚ ਚੇਤਸਾ ਚਿਤ੍ਤਮਞ੍ਞਾਤੁਂ ਸਮਤ੍ਥੋ ਹੋਤਿ. ਕਾਯਗਤਾਸਤਿ ਪਨ ਅਸੁਭਾਨਿ ਚ ਨ ਵਡ੍ਢੇਤਬ੍ਬਾਨਿ. ਕਸ੍ਮਾ? ਓਕਾਸੇਨ ਪਰਿਚ੍ਛਿਨ੍ਨਤ੍ਤਾ ਆਨਿਸਂਸਾਭਾਵਾ ਚ. ਸਾ ਚ ਨੇਸਂ ਓਕਾਸੇਨ ਪਰਿਚ੍ਛਿਨ੍ਨਤਾ ਭਾਵਨਾਨਯੇ ਆਵਿਭਵਿਸ੍ਸਤਿ. ਤੇਸੁ ਪਨ ਵਡ੍ਢਿਤੇਸੁ ਕੁਣਪਰਾਸਿਯੇਵ ਵਡ੍ਢਤਿ, ਨ ਕੋਚਿ ਆਨਿਸਂਸੋ ਅਤ੍ਥਿ. ਵੁਤ੍ਤਮ੍ਪਿ ਚੇਤਂ ਸੋਪਾਕਪਞ੍ਹਾਬ੍ਯਾਕਰਣੇ, ‘‘ਵਿਭੂਤਾ ਭਗਵਾ ਰੂਪਸਞ੍ਞਾ ਅਵਿਭੂਤਾ ਅਟ੍ਠਿਕਸਞ੍ਞਾ’’ਤਿ. ਤਤ੍ਰ ਹਿ ਨਿਮਿਤ੍ਤਵਡ੍ਢਨਵਸੇਨ ਰੂਪਸਞ੍ਞਾ ਵਿਭੂਤਾਤਿ ਵੁਤ੍ਤਾ. ਅਟ੍ਠਿਕਸਞ੍ਞਾ ਅਵਡ੍ਢਨਵਸੇਨ ਅਵਿਭੂਤਾਤਿ ਵੁਤ੍ਤਾ.
ਯਂ ਪਨੇਤਂ ‘‘ਕੇਵਲਂ ਅਟ੍ਠਿਸਞ੍ਞਾਯ, ਅਫਰੀ ਪਥਵਿਂ ਇਮ’’ਨ੍ਤਿ (ਥੇਰਗਾ. ੧੮) ਵੁਤ੍ਤਂ, ਤਂ ਲਾਭਿਸ੍ਸ ਸਤੋ ਉਪਟ੍ਠਾਨਾਕਾਰਵਸੇਨ ਵੁਤ੍ਤਂ. ਯਥੇਵ ਹਿ ਧਮ੍ਮਾਸੋਕਕਾਲੇ ਕਰਵੀਕਸਕੁਣੋ ਸਮਨ੍ਤਾ ਆਦਾਸਭਿਤ੍ਤੀਸੁ ਅਤ੍ਤਨੋ ਛਾਯਂ ਦਿਸ੍ਵਾ ਸਬ੍ਬਦਿਸਾਸੁ ਕਰਵੀਕਸਞ੍ਞੀ ਹੁਤ੍ਵਾ ਮਧੁਰਂ ਗਿਰਂ ਨਿਚ੍ਛਾਰੇਸਿ, ਏਵਂ ਥੇਰੋਪਿ ਅਟ੍ਠਿਕਸਞ੍ਞਾਯ ਲਾਭਿਤ੍ਤਾ ਸਬ੍ਬਦਿਸਾਸੁ ਉਪਟ੍ਠਿਤਂ ਨਿਮਿਤ੍ਤਂ ਪਸ੍ਸਨ੍ਤੋ ਕੇਵਲਾਪਿ ਪਥਵੀ ਅਟ੍ਠਿਕਭਰਿਤਾਤਿ ਚਿਨ੍ਤੇਸੀਤਿ.
ਯਦਿ ਏਵਂ ਯਾ ਅਸੁਭਜ੍ਝਾਨਾਨਂ ਅਪ੍ਪਮਾਣਾਰਮ੍ਮਣਤਾ ਵੁਤ੍ਤਾ, ਸਾ ਵਿਰੁਜ੍ਝਤੀਤਿ. ਸਾ ਚ ਨ ਵਿਰੁਜ੍ਝਤਿ. ਏਕਚ੍ਚੋ ਹਿ ਉਦ੍ਧੁਮਾਤਕੇ ਵਾ ਅਟ੍ਠਿਕੇ ਵਾ ਮਹਨ੍ਤੇ ਨਿਮਿਤ੍ਤਂ ਗਣ੍ਹਾਤਿ. ਏਕਚ੍ਚੋ ਅਪ੍ਪਕੇ. ਇਮਿਨਾ ਪਰਿਯਾਯੇਨ ਏਕਚ੍ਚਸ੍ਸ ਪਰਿਤ੍ਤਾਰਮ੍ਮਣਂ ਝਾਨਂ ਹੋਤਿ. ਏਕਚ੍ਚਸ੍ਸ ਅਪ੍ਪਮਾਣਾਰਮ੍ਮਣਨ੍ਤਿ. ਯੋ ਵਾ ਏਤਂ ਵਡ੍ਢਨੇ ਆਦੀਨਵਂ ਅਪਸ੍ਸਨ੍ਤੋ ਵਡ੍ਢੇਤਿ. ਤਂ ਸਨ੍ਧਾਯ ‘‘ਅਪ੍ਪਮਾਣਾਰਮ੍ਮਣ’’ਨ੍ਤਿ ਵੁਤ੍ਤਂ. ਆਨਿਸਂਸਾਭਾਵਾ ਪਨ ਨ ਵਡ੍ਢੇਤਬ੍ਬਾਨੀਤਿ.
ਯਥਾ ਚ ਏਤਾਨਿ, ਏਵਂ ਸੇਸਾਨਿਪਿ ਨ ਵਡ੍ਢੇਤਬ੍ਬਾਨਿ. ਕਸ੍ਮਾ? ਤੇਸੁ ਹਿ ਆਨਾਪਾਨਨਿਮਿਤ੍ਤਂ ਤਾਵ ਵਡ੍ਢਯਤੋ ਵਾਤਰਾਸਿਯੇਵ ਵਡ੍ਢਤਿ, ਓਕਾਸੇਨ ਚ ਪਰਿਚ੍ਛਿਨ੍ਨਂ. ਇਤਿ ਸਾਦੀਨਵਤ੍ਤਾ ਓਕਾਸੇਨ ਚ ਪਰਿਚ੍ਛਿਨ੍ਨਤ੍ਤਾ ਨ ਵਡ੍ਢੇਤਬ੍ਬਂ. ਬ੍ਰਹ੍ਮਵਿਹਾਰਾ ਸਤ੍ਤਾਰਮ੍ਮਣਾ, ਤੇਸਂ ਨਿਮਿਤ੍ਤਂ ਵਡ੍ਢਯਤੋ ਸਤ੍ਤਰਾਸਿਯੇਵ ਵਡ੍ਢੇਯ੍ਯ, ਨ ਚ ਤੇਨ ਅਤ੍ਥੋ ਅਤ੍ਥਿ, ਤਸ੍ਮਾ ਤਮ੍ਪਿ ਨ ਵਡ੍ਢੇਤਬ੍ਬਂ. ਯਂ ਪਨ ਵੁਤ੍ਤਂ ‘‘ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ’’ਤਿ (ਦੀ. ਨਿ. ੧.੫੫੬) ਆਦਿ, ਤਂ ਪਰਿਗ੍ਗਹਵਸੇਨੇਵ ਵੁਤ੍ਤਂ. ਏਕਾਵਾਸਦ੍ਵਿਆਵਾਸਾਦਿਨਾ ਹਿ ਅਨੁਕ੍ਕਮੇਨ ਏਕਿਸ੍ਸਾ ਦਿਸਾਯ ਸਤ੍ਤੇ ਪਰਿਗ੍ਗਹੇਤ੍ਵਾ ਭਾਵੇਨ੍ਤੋ ਏਕਂ ਦਿਸਂ ਫਰਿਤ੍ਵਾਤਿ ਵੁਤ੍ਤੋ. ਨ ਨਿਮਿਤ੍ਤਂ ਵਡ੍ਢੇਨ੍ਤੋ. ਪਟਿਭਾਗਨਿਮਿਤ੍ਤਮੇਵ ਚੇਤ੍ਥ ਨਤ੍ਥਿ. ਯਦਯਂ ਵਡ੍ਢੇਯ੍ਯ, ਪਰਿਤ੍ਤਅਪ੍ਪਮਾਣਾਰਮ੍ਮਣਤਾਪੇਤ੍ਥ ਪਰਿਗ੍ਗਹਵਸੇਨੇਵ ਵੇਦਿਤਬ੍ਬਾ. ਆਰੁਪ੍ਪਾਰਮ੍ਮਣੇਸੁਪਿ ਆਕਾਸਂ ਕਸਿਣੁਗ੍ਘਾਟਿਮਤ੍ਤਾ. ਤਞ੍ਹਿ ਕਸਿਣਾਪਗਮਵਸੇਨੇਵ ਮਨਸਿ ਕਾਤਬ੍ਬਂ. ਤਤੋ ਪਰਂ ਵਡ੍ਢਯਤੋਪਿ ਨ ਕਿਞ੍ਚਿ ਹੋਤਿ. ਵਿਞ੍ਞਾਣਂ ਸਭਾਵਧਮ੍ਮਤ੍ਤਾ. ਨ ਹਿ ਸਕ੍ਕਾ ਸਭਾਵਧਮ੍ਮਂ ਵਡ੍ਢੇਤੁਂ. ਵਿਞ੍ਞਾਣਾਪਗਮੋ ਵਿਞ੍ਞਾਣਸ੍ਸ ਅਭਾਵਮਤ੍ਤਤ੍ਤਾ. ਨੇਵਸਞ੍ਞਾਨਾਸਞ੍ਞਾਯਤਨਾਰਮ੍ਮਣਂ ਸਭਾਵਧਮ੍ਮਤ੍ਤਾਯੇਵ ਨ ਵਡ੍ਢੇਤਬ੍ਬਂ. ਸੇਸਾਨਿ ਅਨਿਮਿਤ੍ਤਤ੍ਤਾ. ਪਟਿਭਾਗਨਿਮਿਤ੍ਤਞ੍ਹਿ ਵਡ੍ਢੇਤਬ੍ਬਂ ਨਾਮ ਭਵੇਯ੍ਯ. ਬੁਦ੍ਧਾਨੁਸ੍ਸਤਿਆਦੀਨਞ੍ਚ ਨੇਵ ਪਟਿਭਾਗਨਿਮਿਤ੍ਤਂ ਆਰਮ੍ਮਣਂ ਹੋਤਿ, ਤਸ੍ਮਾ ਤਂ ਨ ਵਡ੍ਢੇਤਬ੍ਬਨ੍ਤਿ ਏਵਂ ਵਡ੍ਢਨਾਵਡ੍ਢਨਤੋ.
ਆਰਮ੍ਮਣਤੋਤਿ ਇਮੇਸੁ ਚ ਚਤ੍ਤਾਲੀਸਾਯ ਕਮ੍ਮਟ੍ਠਾਨੇਸੁ ਦਸਕਸਿਣਾ, ਦਸਅਸੁਭਾ, ਆਨਾਪਾਨਸ੍ਸਤਿ, ਕਾਯਗਤਾਸਤੀਤਿ ਇਮਾਨਿ ਦ੍ਵਾਵੀਸਤਿਪਟਿਭਾਗਨਿਮਿਤ੍ਤਾਰਮ੍ਮਣਾਨਿ. ਸੇਸਾਨਿ ਨ ਪਟਿਭਾਗਨਿਮਿਤ੍ਤਾਰਮ੍ਮਣਾਨਿ. ਤਥਾ ਦਸਸੁ ਅਨੁਸ੍ਸਤੀਸੁ ਠਪੇਤ੍ਵਾ ਆਨਾਪਾਨਸ੍ਸਤਿਞ੍ਚ ਕਾਯਗਤਾਸਤਿਞ੍ਚ ਅਵਸੇਸਾ ਅਟ੍ਠ ਅਨੁਸ੍ਸਤਿਯੋ, ਆਹਾਰੇ ਪਟਿਕੂਲਸਞ੍ਞਾ, ਚਤੁਧਾਤੁਵਵਤ੍ਥਾਨਂ, ਵਿਞ੍ਞਾਣਞ੍ਚਾਯਤਨਂ, ਨੇਵਸਞ੍ਞਾਨਾਸਞ੍ਞਾਯਤਨਨ੍ਤਿ ਇਮਾਨਿ ਦ੍ਵਾਦਸ ਸਭਾਵਧਮ੍ਮਾਰਮ੍ਮਣਾਨਿ. ਦਸ ਕਸਿਣਾ, ਦਸ ਅਸੁਭਾ, ਆਨਾਪਾਨਸ੍ਸਤਿ, ਕਾਯਗਤਾਸਤੀਤਿ ਇਮਾਨਿ ਦ੍ਵਾਵੀਸਤਿ ਨਿਮਿਤ੍ਤਾਰਮ੍ਮਣਾਨਿ. ਸੇਸਾਨਿ ਛ ਨ ਵਤ੍ਤਬ੍ਬਾਰਮ੍ਮਣਾਨਿ. ਤਥਾ ਵਿਪੁਬ੍ਬਕਂ, ਲੋਹਿਤਕਂ, ਪੁਲ਼ੁਵਕਂ, ਆਨਾਪਾਨਸ੍ਸਤਿ, ਆਪੋਕਸਿਣਂ, ਤੇਜੋਕਸਿਣਂ, ਵਾਯੋਕਸਿਣਂ, ਯਞ੍ਚ ਆਲੋਕਕਸਿਣੇ ਸੂਰਿਯਾਦੀਨਂ ਓਭਾਸਮਣ੍ਡਲਾਰਮ੍ਮਣਨ੍ਤਿ ਇਮਾਨਿ ਅਟ੍ਠ ਚਲਿਤਾਰਮ੍ਮਣਾਨਿ, ਤਾਨਿ ਚ ਖੋ ਪੁਬ੍ਬਭਾਗੇ, ਪਟਿਭਾਗਂ ਪਨ ਸਨ੍ਨਿਸਿਨ੍ਨਮੇਵ ਹੋਤਿ. ਸੇਸਾਨਿ ਨ ਚਲਿਤਾਰਮ੍ਮਣਾਨੀਤਿ ਏਵਂ ਆਰਮ੍ਮਣਤੋ.
ਭੂਮਿਤੋਤਿ ਏਤ੍ਥ ਚ ਦਸ ਅਸੁਭਾ, ਕਾਯਗਤਾਸਤਿ, ਆਹਾਰੇ ਪਟਿਕੂਲਸਞ੍ਞਾਤਿ ਇਮਾਨਿ ਦ੍ਵਾਦਸ ਦੇਵੇਸੁ ਨਪ੍ਪਵਤ੍ਤਨ੍ਤਿ. ਤਾਨਿ ਦ੍ਵਾਦਸ, ਆਨਾਪਾਨਸ੍ਸਤਿ ਚਾਤਿ ਇਮਾਨਿ ਤੇਰਸ ਬ੍ਰਹ੍ਮਲੋਕੇ ਨਪ੍ਪਵਤ੍ਤਨ੍ਤਿ. ਅਰੂਪਭਵੇ ਪਨ ਠਪੇਤ੍ਵਾ ਚਤ੍ਤਾਰੋ ਆਰੁਪ੍ਪੇ ਅਞ੍ਞਂ ਨਪ੍ਪਵਤ੍ਤਤਿ. ਮਨੁਸ੍ਸੇਸੁ ਸਬ੍ਬਾਨਿਪਿ ਪਵਤ੍ਤਨ੍ਤੀਤਿ ਏਵਂ ਭੂਮਿਤੋ.
ਗਹਣਤੋਤਿ ਦਿਟ੍ਠਫੁਟ੍ਠਸੁਤਗ੍ਗਹਣਤੋਪੇਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋ. ਤਤ੍ਰ ਠਪੇਤ੍ਵਾ ਵਾਯੋਕਸਿਣਂ ਸੇਸਾ ਨਵ ਕਸਿਣਾ, ਦਸ ਅਸੁਭਾਤਿ ਇਮਾਨਿ ਏਕੂਨਵੀਸਤਿ ਦਿਟ੍ਠੇਨ ਗਹੇਤਬ੍ਬਾਨਿ. ਪੁਬ੍ਬਭਾਗੇ ਚਕ੍ਖੁਨਾ ਓਲੋਕੇਤ੍ਵਾ ਨਿਮਿਤ੍ਤਂ ਨੇਸਂ ਗਹੇਤਬ੍ਬਨ੍ਤਿ ਅਤ੍ਥੋ. ਕਾਯਗਤਾਸਤਿਯਂ ਤਚਪਞ੍ਚਕਂ ਦਿਟ੍ਠੇਨ, ਸੇਸਂ ਸੁਤੇਨਾਤਿ ਏਵਂ ਤਸ੍ਸਾ ਆਰਮ੍ਮਣਂ ਦਿਟ੍ਠਸੁਤੇਨ ਗਹੇਤਬ੍ਬਂ. ਆਨਾਪਾਨਸ੍ਸਤਿ ਫੁਟ੍ਠੇਨ, ਵਾਯੋਕਸਿਣਂ ਦਿਟ੍ਠਫੁਟ੍ਠੇਨ, ਸੇਸਾਨਿ ਅਟ੍ਠਾਰਸ ਸੁਤੇਨ ਗਹੇਤਬ੍ਬਾਨਿ. ਉਪੇਕ੍ਖਾਬ੍ਰਹ੍ਮਵਿਹਾਰੋ, ਚਤ੍ਤਾਰੋ ਆਰੁਪ੍ਪਾਤਿ ਇਮਾਨਿ ਚੇਤ੍ਥ ਨ ਆਦਿਕਮ੍ਮਿਕੇਨ ਗਹੇਤਬ੍ਬਾਨਿ. ਸੇਸਾਨਿ ਪਞ੍ਚਤਿਂਸ ਗਹੇਤਬ੍ਬਾਨੀਤਿ ਏਵਂ ਗਹਣਤੋ.
ਪਚ੍ਚਯਤੋਤਿ ਇਮੇਸੁ ਪਨ ਕਮ੍ਮਟ੍ਠਾਨੇਸੁ ਠਪੇਤ੍ਵਾ ਆਕਾਸਕਸਿਣਂ ਸੇਸਾ ਨਵ ਕਸਿਣਾ ਆਰੁਪ੍ਪਾਨਂ ਪਚ੍ਚਯਾ ਹੋਨ੍ਤਿ, ਦਸ ਕਸਿਣਾ ਅਭਿਞ੍ਞਾਨਂ, ਤਯੋ ਬ੍ਰਹ੍ਮਵਿਹਾਰਾ ਚਤੁਤ੍ਥਬ੍ਰਹ੍ਮਵਿਹਾਰਸ੍ਸ, ਹੇਟ੍ਠਿਮਂ ਹੇਟ੍ਠਿਮਂ ਆਰੁਪ੍ਪਂ ਉਪਰਿਮਸ੍ਸ ਉਪਰਿਮਸ੍ਸ, ਨੇਵਸਞ੍ਞਾਨਾਸਞ੍ਞਾਯਤਨਂ ਨਿਰੋਧਸਮਾਪਤ੍ਤਿਯਾ, ਸਬ੍ਬਾਨਿਪਿ ਸੁਖਵਿਹਾਰਵਿਪਸ੍ਸਨਾਭਵਸਮ੍ਪਤ੍ਤੀਨਨ੍ਤਿ ਏਵਂ ਪਚ੍ਚਯਤੋ.
ਚਰਿਯਾਨੁਕੂਲਤੋਤਿ ਚਰਿਯਾਨਂ ਅਨੁਕੂਲਤੋਪੇਤ੍ਥ ਵਿਨਿਚ੍ਛਯੋ ਵੇਦਿਤਬ੍ਬੋ. ਸੇਯ੍ਯਥਿਦਂ – ਰਾਗਚਰਿਤਸ੍ਸ ਤਾਵ ਏਤ੍ਥ ਦਸ ਅਸੁਭਾ, ਕਾਯਗਤਾਸਤੀਤਿ ਏਕਾਦਸ ਕਮ੍ਮਟ੍ਠਾਨਾਨਿ ਅਨੁਕੂਲਾਨਿ. ਦੋਸਚਰਿਤਸ੍ਸ ਚਤ੍ਤਾਰੋ ਬ੍ਰਹ੍ਮਵਿਹਾਰਾ, ਚਤ੍ਤਾਰਿ ਵਣ੍ਣਕਸਿਣਾਨੀਤਿ ਅਟ੍ਠ. ਮੋਹਚਰਿਤਸ੍ਸ, ਵਿਤਕ੍ਕਚਰਿਤਸ੍ਸ ਚ ਏਕਂ ਆਨਾਪਾਨਸ੍ਸਤਿ ਕਮ੍ਮਟ੍ਠਾਨਮੇਵ. ਸਦ੍ਧਾਚਰਿਤਸ੍ਸ ਪੁਰਿਮਾ ਛ ਅਨੁਸ੍ਸਤਿਯੋ. ਬੁਦ੍ਧਿਚਰਿਤਸ੍ਸ ਮਰਣਸ੍ਸਤਿ, ਉਪਸਮਾਨੁਸ੍ਸਤਿ, ਚਤੁਧਾਤੁਵਵਤ੍ਥਾਨਂ, ਆਹਾਰੇ ਪਟਿਕੂਲਸਞ੍ਞਾਤਿ ਚਤ੍ਤਾਰਿ. ਸੇਸਕਸਿਣਾਨਿ, ਚਤ੍ਤਾਰੋ ਚ ਆਰੁਪ੍ਪਾ ਸਬ੍ਬਚਰਿਤਾਨਂ ਅਨੁਕੂਲਾਨਿ. ਕਸਿਣੇਸੁ ਚ ਯਂਕਿਞ੍ਚਿ ਪਰਿਤ੍ਤਂ ਵਿਤਕ੍ਕਚਰਿਤਸ੍ਸ, ਅਪ੍ਪਮਾਣਂ ਮੋਹਚਰਿਤਸ੍ਸਾਤਿ.
ਏਵਮੇਤ੍ਥ ਚਰਿਯਾਨੁਕੂਲਤੋ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਸਬ੍ਬਞ੍ਚੇਤਂ ਉਜੁਵਿਪਚ੍ਚਨੀਕਵਸੇਨ ਚ ਅਤਿਸਪ੍ਪਾਯਵਸੇਨ ਚ ਵੁਤ੍ਤਂ. ਰਾਗਾਦੀਨਂ ਪਨ ਅਵਿਕ੍ਖਮ੍ਭਿਕਾ ਸਦ੍ਧਾਦੀਨਂ ਵਾ ਅਨੁਪਕਾਰਾ ਕੁਸਲਭਾਵਨਾ ਨਾਮ ਨਤ੍ਥਿ. ਵੁਤ੍ਤਮ੍ਪਿ ਚੇਤਂ ਮੇਘਿਯਸੁਤ੍ਤੇ –
‘‘ਚਤ੍ਤਾਰੋ ਧਮ੍ਮਾ ਉਤ੍ਤਰਿ ਭਾਵੇਤਬ੍ਬਾ. ਅਸੁਭਾ ਭਾਵੇਤਬ੍ਬਾ ਰਾਗਸ੍ਸ ਪਹਾਨਾਯ. ਮੇਤ੍ਤਾ ਭਾਵੇਤਬ੍ਬਾ ਬ੍ਯਾਪਾਦਸ੍ਸ ਪਹਾਨਾਯ. ਆਨਾਪਾਨਸ੍ਸਤਿ ਭਾਵੇਤਬ੍ਬਾ ਵਿਤਕ੍ਕੁਪਚ੍ਛੇਦਾਯ. ਅਨਿਚ੍ਚਸਞ੍ਞਾ ਭਾਵੇਤਬ੍ਬਾ ਅਸ੍ਮਿਮਾਨਸਮੁਗ੍ਘਾਤਾਯਾ’’ਤਿ.
ਰਾਹੁਲਸੁਤ੍ਤੇਪਿ ‘‘ਮੇਤ੍ਤਂ, ਰਾਹੁਲ, ਭਾਵਨਂ ਭਾਵੇਹੀ’’ਤਿਆਦਿਨਾ (ਮ. ਨਿ. ੨.੧੨੦) ਨਯੇਨ ਏਕਸ੍ਸੇਵ ਸਤ੍ਤ ਕਮ੍ਮਟ੍ਠਾਨਾਨਿ ਵੁਤ੍ਤਾਨਿ. ਤਸ੍ਮਾ ਵਚਨਮਤ੍ਤੇ ਅਭਿਨਿਵੇਸਂ ਅਕਤ੍ਵਾ ਸਬ੍ਬਤ੍ਥ ਅਧਿਪ੍ਪਾਯੋ ਪਰਿਯੇਸਿਤਬ੍ਬੋਤਿ ਅਯਂ ਕਮ੍ਮਟ੍ਠਾਨਂ ਗਹੇਤ੍ਵਾਤਿ ਏਤ੍ਥ ਕਮ੍ਮਟ੍ਠਾਨਕਥਾ ਵਿਨਿਚ੍ਛਯੋ.
੪੮. ਗਹੇਤ੍ਵਾਤਿ ਇਮਸ੍ਸ ਪਨ ਪਦਸ੍ਸ ਅਯਮਤ੍ਥਦੀਪਨਾ. ‘‘ਤੇਨ ਯੋਗਿਨਾ ਕਮ੍ਮਟ੍ਠਾਨਦਾਯਕਂ ਕਲ੍ਯਾਣਮਿਤ੍ਤਂ ਉਪਸਙ੍ਕਮਿਤ੍ਵਾ’’ਤਿ ਏਤ੍ਥ ਵੁਤ੍ਤਨਯੇਨੇਵ ਵੁਤ੍ਤਪ੍ਪਕਾਰਂ ਕਲ੍ਯਾਣਮਿਤ੍ਤਂ ਉਪਸਙ੍ਕਮਿਤ੍ਵਾ ਬੁਦ੍ਧਸ੍ਸ ਵਾ ਭਗਵਤੋ ਆਚਰਿਯਸ੍ਸ ਵਾ ਅਤ੍ਤਾਨਂ ਨਿਯ੍ਯਾਤੇਤ੍ਵਾ ਸਮ੍ਪਨ੍ਨਜ੍ਝਾਸਯੇਨ ਸਮ੍ਪਨ੍ਨਾਧਿਮੁਤ੍ਤਿਨਾ ਚ ਹੁਤ੍ਵਾ ਕਮ੍ਮਟ੍ਠਾਨਂ ਯਾਚਿਤਬ੍ਬਂ.
ਤਤ੍ਰ ‘‘ਇਮਾਹਂ ਭਗਵਾ ਅਤ੍ਤਭਾਵਂ ਤੁਮ੍ਹਾਕਂ ਪਰਿਚ੍ਚਜਾਮੀ’’ਤਿ ਏਵਂ ਬੁਦ੍ਧਸ੍ਸ ਭਗਵਤੋ ਅਤ੍ਤਾ ਨਿਯ੍ਯਾਤੇਤਬ੍ਬੋ. ਏਵਞ੍ਹਿ ਅਨਿਯ੍ਯਾਤੇਤ੍ਵਾ ਪਨ੍ਤੇਸੁ ਸੇਨਾਸਨੇਸੁ ਵਿਹਰਨ੍ਤੋ ਭੇਰਵਾਰਮ੍ਮਣੇ ਆਪਾਥਮਾਗਤੇ ਸਨ੍ਥਮ੍ਭਿਤੁਂ ਅਸਕ੍ਕੋਨ੍ਤੋ ਗਾਮਨ੍ਤਂ ਓਸਰਿਤ੍ਵਾ ਗਿਹੀਹਿ ਸਂਸਟ੍ਠੋ ਹੁਤ੍ਵਾ ਅਨੇਸਨਂ ਆਪਜ੍ਜਿਤ੍ਵਾ ਅਨਯਬ੍ਯਸਨਂ ਪਾਪੁਣੇਯ੍ਯ. ਨਿਯ੍ਯਾਤਿਤਤ੍ਤਭਾਵਸ੍ਸ ਪਨਸ੍ਸ ਭੇਰਵਾਰਮ੍ਮਣੇ ਆਪਾਥਮਾਗਤੇਪਿ ਭਯਂ ਨ ਉਪ੍ਪਜ੍ਜਤਿ. ‘‘ਨਨੁ ਤਯਾ, ਪਣ੍ਡਿਤ, ਪੁਰਿਮਮੇਵ ਅਤ੍ਤਾ ਬੁਦ੍ਧਾਨਂ ਨਿਯ੍ਯਾਤਿਤੋ’’ਤਿ ਪਚ੍ਚਵੇਕ੍ਖਤੋ ਪਨਸ੍ਸ ਸੋਮਨਸ੍ਸਮੇਵ ਉਪ੍ਪਜ੍ਜਤਿ. ਯਥਾ ਹਿ ਪੁਰਿਸਸ੍ਸ ਉਤ੍ਤਮਂ ਕਾਸਿਕਵਤ੍ਥਂ ਭਵੇਯ੍ਯ, ਤਸ੍ਸ ਤਸ੍ਮਿਂ ਮੂਸਿਕਾਯ ਵਾ ਕੀਟੇਹਿ ਵਾ ਖਾਦਿਤੇ ਉਪ੍ਪਜ੍ਜੇਯ੍ਯ ਦੋਮਨਸ੍ਸਂ. ਸਚੇ ਪਨ ਤਂ ਅਚੀਵਰਕਸ੍ਸ ਭਿਕ੍ਖੁਨੋ ਦਦੇਯ੍ਯ, ਅਥਸ੍ਸ ਤਂ ਤੇਨ ਭਿਕ੍ਖੁਨਾ ਖਣ੍ਡਾਖਣ੍ਡਂ ਕਰਿਯਮਾਨਂ ਦਿਸ੍ਵਾਪਿ ਸੋਮਨਸ੍ਸਮੇਵ ਉਪ੍ਪਜ੍ਜੇਯ੍ਯ. ਏਵਂਸਮ੍ਪਦਮਿਦਂ ਵੇਦਿਤਬ੍ਬਂ.
ਆਚਰਿਯਸ੍ਸ ਨਿਯ੍ਯਾਤੇਨ੍ਤੇਨਾਪਿ ‘‘ਇਮਾਹਂ, ਭਨ੍ਤੇ, ਅਤ੍ਤਭਾਵਂ ਤੁਮ੍ਹਾਕਂ ਪਰਿਚ੍ਚਜਾਮੀ’’ਤਿ ਵਤ੍ਤਬ੍ਬਂ. ਏਵਂ ਅਨਿਯ੍ਯਾਤਿਤਤ੍ਤਭਾਵੋ ਹਿ ਅਤਜ੍ਜਨੀਯੋ ਵਾ ਹੋਤਿ, ਦੁਬ੍ਬਚੋ ਵਾ ਅਨੋਵਾਦਕਰੋ, ਯੇਨਕਾਮਂਗਮੋ ਵਾ ਆਚਰਿਯਂ ਅਨਾਪੁਚ੍ਛਾਵ ਯਤ੍ਥਿਚ੍ਛਤਿ, ਤਤ੍ਥ ਗਨ੍ਤਾ, ਤਮੇਨਂ ਆਚਰਿਯੋ ਆਮਿਸੇਨ ਵਾ ਧਮ੍ਮੇਨ ਵਾ ਨ ਸਙ੍ਗਣ੍ਹਾਤਿ, ਗੂਲ਼੍ਹਂ ਗਨ੍ਥਂ ਨ ਸਿਕ੍ਖਾਪੇਤਿ. ਸੋ ਇਮਂ ਦੁਵਿਧਂ ਸਙ੍ਗਹਂ ਅਲਭਨ੍ਤੋ ਸਾਸਨੇ ਪਤਿਟ੍ਠਂ ਨ ਲਭਤਿ, ਨਚਿਰਸ੍ਸੇਵ ਦੁਸ੍ਸੀਲ੍ਯਂ ਵਾ ਗਿਹਿਭਾਵਂ ਵਾ ਪਾਪੁਣਾਤਿ. ਨਿਯ੍ਯਾਤਿਤਤ੍ਤਭਾਵੋ ਪਨ ਨੇਵ ਅਤਜ੍ਜਨੀਯੋ ਹੋਤਿ, ਨ ਯੇਨਕਾਮਂਗਮੋ, ਸੁਵਚੋ ਆਚਰਿਯਾਯਤ੍ਤਵੁਤ੍ਤਿਯੇਵ ਹੋਤਿ. ਸੋ ਆਚਰਿਯਤੋ ਦੁਵਿਧਂ ਸਙ੍ਗਹਂ ਲਭਨ੍ਤੋ ਸਾਸਨੇ ਵੁਡ੍ਢਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਪਾਪੁਣਾਤਿ ਚੂਲ਼ਪਿਣ੍ਡਪਾਤਿਕਤਿਸ੍ਸਤ੍ਥੇਰਸ੍ਸ ਅਨ੍ਤੇਵਾਸਿਕਾ ਵਿਯ.
ਥੇਰਸ੍ਸ ਕਿਰ ਸਨ੍ਤਿਕਂ ਤਯੋ ਭਿਕ੍ਖੂ ਆਗਮਂਸੁ. ਤੇਸੁ ਏਕੋ ‘‘ਅਹਂ, ਭਨ੍ਤੇ, ਤੁਮ੍ਹਾਕਮਤ੍ਥਾਯਾ’’ਤਿ ਵੁਤ੍ਤੇ ਸਤਪੋਰਿਸੇ ਪਪਾਤੇ ਪਤਿਤੁਂ ਉਸ੍ਸਹੇਯ੍ਯਨ੍ਤਿ ਆਹ. ਦੁਤਿਯੋ ‘‘ਅਹਂ, ਭਨ੍ਤੇ, ਤੁਮ੍ਹਾਕਮਤ੍ਥਾਯਾ’’ਤਿ ਵੁਤ੍ਤੇ ਇਮਂ ਅਤ੍ਤਭਾਵਂ ਪਣ੍ਹਿਤੋ ਪਟ੍ਠਾਯ ਪਾਸਾਣਪਿਟ੍ਠੇ ਘਂਸੇਨ੍ਤੋ ਨਿਰਵਸੇਸਂ ਖੇਪੇਤੁਂ ਉਸ੍ਸਹੇਯ੍ਯਨ੍ਤਿ ਆਹ. ਤਤਿਯੋ ‘‘ਅਹਂ, ਭਨ੍ਤੇ, ਤੁਮ੍ਹਾਕਮਤ੍ਥਾਯਾ’’ਤਿ ਵੁਤ੍ਤੇ ਅਸ੍ਸਾਸਪਸ੍ਸਾਸੇ ਉਪਰੁਨ੍ਧਿਤ੍ਵਾ ਕਾਲਕਿਰਿਯਂ ਕਾਤੁਂ ਉਸ੍ਸਹੇਯ੍ਯਨ੍ਤਿ ਆਹ. ਥੇਰੋ ਭਬ੍ਬਾਵਤਿਮੇ ਭਿਕ੍ਖੂਤਿ ਕਮ੍ਮਟ੍ਠਾਨਂ ਕਥੇਸਿ. ਤੇ ਤਸ੍ਸ ਓਵਾਦੇ ਠਤ੍ਵਾ ਤਯੋਪਿ ਅਰਹਤ੍ਤਂ ਪਾਪੁਣਿਂਸੂਤਿ ਅਯਮਾਨਿਸਂਸੋ ਅਤ੍ਤਨਿਯ੍ਯਾਤਨੇ. ਤੇਨ ਵੁਤ੍ਤਂ ‘‘ਬੁਦ੍ਧਸ੍ਸ ਵਾ ਭਗਵਤੋ ਆਚਰਿਯਸ੍ਸ ਵਾ ਅਤ੍ਤਾਨਂ ਨਿਯ੍ਯਾਤੇਤ੍ਵਾ’’ਤਿ.
੪੯. ਸਮ੍ਪਨ੍ਨਜ੍ਝਾਸਯੇਨ ਸਮ੍ਪਨ੍ਨਾਧਿਮੁਤ੍ਤਿਨਾ ਚ ਹੁਤ੍ਵਾਤਿ ਏਤ੍ਥ ਪਨ ਤੇਨ ਯੋਗਿਨਾ ਅਲੋਭਾਦੀਨਂ ਵਸੇਨ ਛਹਾਕਾਰੇਹਿ ਸਮ੍ਪਨ੍ਨਜ੍ਝਾਸਯੇਨ ਭਵਿਤਬ੍ਬਂ. ਏਵਂ ਸਮ੍ਪਨ੍ਨਜ੍ਝਾਸਯੋ ਹਿ ਤਿਸ੍ਸਨ੍ਨਂ ਬੋਧੀਨਂ ਅਞ੍ਞਤਰਂ ਪਾਪੁਣਾਤਿ. ਯਥਾਹ, ‘‘ਛ ਅਜ੍ਝਾਸਯਾ ਬੋਧਿਸਤ੍ਤਾਨਂ ਬੋਧਿਪਰਿਪਾਕਾਯ ਸਂਵਤ੍ਤਨ੍ਤਿ, ਅਲੋਭਜ੍ਝਾਸਯਾ ਚ ਬੋਧਿਸਤ੍ਤਾ ਲੋਭੇ ਦੋਸਦਸ੍ਸਾਵਿਨੋ, ਅਦੋਸਜ੍ਝਾਸਯਾ ਚ ਬੋਧਿਸਤ੍ਤਾ ਦੋਸੇ ਦੋਸਦਸ੍ਸਾਵਿਨੋ, ਅਮੋਹਜ੍ਝਾਸਯਾ ਚ ਬੋਧਿਸਤ੍ਤਾ ਮੋਹੇ ਦੋਸਦਸ੍ਸਾਵਿਨੋ, ਨੇਕ੍ਖਮ੍ਮਜ੍ਝਾਸਯਾ ਚ ਬੋਧਿਸਤ੍ਤਾ ਘਰਾਵਾਸੇ ਦੋਸਦਸ੍ਸਾਵਿਨੋ, ਪਵਿਵੇਕਜ੍ਝਾਸਯਾ ਚ ਬੋਧਿਸਤ੍ਤਾ ਸਙ੍ਗਣਿਕਾਯ ਦੋਸਦਸ੍ਸਾਵਿਨੋ, ਨਿਸ੍ਸਰਣਜ੍ਝਾਸਯਾ ਚ ਬੋਧਿਸਤ੍ਤਾ ਸਬ੍ਬਭਵਗਤੀਸੁ ਦੋਸਦਸ੍ਸਾਵਿਨੋ’’ਤਿ. ਯੇ ਹਿ ਕੇਚਿ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਸੋਤਾਪਨ੍ਨਸਕਦਾਗਾਮਿਅਨਾਗਾਮਿਖੀਣਾਸਵਪਚ੍ਚੇਕਬੁਦ੍ਧਸਮ੍ਮਾਸਮ੍ਬੁਦ੍ਧਾ, ਸਬ੍ਬੇ ਤੇ ਇਮੇਹੇਵ ਛਹਾਕਾਰੇਹਿ ਅਤ੍ਤਨਾ ਅਤ੍ਤਨਾ ਪਤ੍ਤਬ੍ਬਂ ਵਿਸੇਸਂ ਪਤ੍ਤਾ. ਤਸ੍ਮਾ ਇਮੇਹਿ ਛਹਾਕਾਰੇਹਿ ਸਮ੍ਪਨ੍ਨਜ੍ਝਾਸਯੇਨ ਭਵਿਤਬ੍ਬਂ. ਤਦਧਿਮੁਤ੍ਤਤਾਯ ਪਨ ਅਧਿਮੁਤ੍ਤਿਸਮ੍ਪਨ੍ਨੇਨ ਭਵਿਤਬ੍ਬਂ. ਸਮਾਧਾਧਿਮੁਤ੍ਤੇਨ ਸਮਾਧਿਗਰੁਕੇਨ ਸਮਾਧਿਪਬ੍ਭਾਰੇਨ, ਨਿਬ੍ਬਾਨਾਧਿਮੁਤ੍ਤੇਨ ਨਿਬ੍ਬਾਨਗਰੁਕੇਨ ਨਿਬ੍ਬਾਨਪਬ੍ਭਾਰੇਨ ਚ ਭਵਿਤਬ੍ਬਨ੍ਤਿ ਅਤ੍ਥੋ.
੫੦. ਏਵਂ ਸਮ੍ਪਨ੍ਨਜ੍ਝਾਸਯਾਧਿਮੁਤ੍ਤਿਨੋ ਪਨਸ੍ਸ ਕਮ੍ਮਟ੍ਠਾਨਂ ਯਾਚਤੋ ਚੇਤੋਪਰਿਯਞਾਣਲਾਭਿਨਾ ਆਚਰਿਯੇਨ ਚਿਤ੍ਤਾਚਾਰਂ ਓਲੋਕੇਤ੍ਵਾ ਚਰਿਯਾ ਜਾਨਿਤਬ੍ਬਾ. ਇਤਰੇਨ ਕਿਂ ਚਰਿਤੋਸਿ? ਕੇ ਵਾ ਤੇ ਧਮ੍ਮਾ ਬਹੁਲਂ ਸਮੁਦਾਚਰਨ੍ਤਿ? ਕਿਂ ਵਾ ਤੇ ਮਨਸਿਕਰੋਤੋ ਫਾਸੁ ਹੋਤਿ? ਕਤਰਸ੍ਮਿਂ ਵਾ ਤੇ ਕਮ੍ਮਟ੍ਠਾਨੇ ਚਿਤ੍ਤਂ ਨਮਤੀਤਿ ਏਵਮਾਦੀਹਿ ਨਯੇਹਿ ਪੁਚ੍ਛਿਤ੍ਵਾ ਜਾਨਿਤਬ੍ਬਾ. ਏਵਂ ਞਤ੍ਵਾ ਚਰਿਯਾਨੁਕੂਲਂ ਕਮ੍ਮਟ੍ਠਾਨਂ ਕਥੇਤਬ੍ਬਂ.
ਕਥੇਨ੍ਤੇਨ ਚ ਤਿਵਿਧੇਨ ਕਥੇਤਬ੍ਬਂ. ਪਕਤਿਯਾ ਉਗ੍ਗਹਿਤਕਮ੍ਮਟ੍ਠਾਨਸ੍ਸ ਏਕਂ ਦ੍ਵੇ ਨਿਸਜ੍ਜਾਨਿ ਸਜ੍ਝਾਯਂ ਕਾਰੇਤ੍ਵਾ ਦਾਤਬ੍ਬਂ. ਸਨ੍ਤਿਕੇ ਵਸਨ੍ਤਸ੍ਸ ਆਗਤਾਗਤਕ੍ਖਣੇ ਕਥੇਤਬ੍ਬਂ. ਉਗ੍ਗਹੇਤ੍ਵਾ ਅਞ੍ਞਤ੍ਰ ਗਨ੍ਤੁਕਾਮਸ੍ਸ ਨਾਤਿਸਂਖਿਤ੍ਤਂ ਨਾਤਿਵਿਤ੍ਥਾਰਿਕਂ ਕਤ੍ਵਾ ਕਥੇਤਬ੍ਬਂ.
ਤਤ੍ਥ ਪਥਵੀਕਸਿਣਂ ਤਾਵ ਕਥੇਨ੍ਤੇਨ ਚਤ੍ਤਾਰੋ ਕਸਿਣਦੋਸਾ, ਕਸਿਣਕਰਣਂ, ਕਤਸ੍ਸ ਭਾਵਨਾਨਯੋ, ਦੁਵਿਧਂ ਨਿਮਿਤ੍ਤਂ, ਦੁਵਿਧੋ ਸਮਾਧਿ, ਸਤ੍ਤਵਿਧਂ ਸਪ੍ਪਾਯਾਸਪ੍ਪਾਯਂ, ਦਸਵਿਧਂ ਅਪ੍ਪਨਾਕੋਸਲ੍ਲਂ, ਵੀਰਿਯਸਮਤਾ, ਅਪ੍ਪਨਾਵਿਧਾਨਨ੍ਤਿ ਇਮੇ ਨਵ ਆਕਾਰਾ ਕਥੇਤਬ੍ਬਾ. ਸੇਸਕਮ੍ਮਟ੍ਠਾਨੇਸੁਪਿ ਤਸ੍ਸ ਤਸ੍ਸ ਅਨੁਰੂਪਂ ਕਥੇਤਬ੍ਬਂ. ਤਂ ਸਬ੍ਬਂ ਤੇਸਂ ਭਾਵਨਾਵਿਧਾਨੇ ਆਵਿਭਵਿਸ੍ਸਤਿ.