੧੧. ਸੋਸਾਨਿਕਙ੍ਗਕਥਾ

੩੪. ਸੋਸਾਨਿਕਙ੍ਗਮ੍ਪਿ ‘‘ਨ ਸੁਸਾਨਂ ਪਟਿਕ੍ਖਿਪਾਮਿ, ਸੋਸਾਨਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.

ਤੇਨ ਪਨ ਸੋਸਾਨਿਕੇਨ ਯਂ ਮਨੁਸ੍ਸਾ ਗਾਮਂ ਨਿਵੇਸਨ੍ਤਾ ‘‘ਇਦਂ ਸੁਸਾਨ’’ਨ੍ਤਿ ਵਵਤ੍ਥਪੇਨ੍ਤਿ, ਨ ਤਤ੍ਥ ਵਸਿਤਬ੍ਬਂ. ਨ ਹਿ ਮਤਸਰੀਰੇ ਅਜ੍ਝਾਪਿਤੇ ਤਂ ਸੁਸਾਨਂ ਨਾਮ ਹੋਤਿ, ਝਾਪਿਤਕਾਲਤੋ ਪਨ ਪਟ੍ਠਾਯ ਸਚੇਪਿ ਦ੍ਵਾਦਸਵਸ੍ਸਾਨਿ ਛਡ੍ਡਿਤਂ, ਤਂ ਸੁਸਾਨਮੇਵ.

ਤਸ੍ਮਿਂ ਪਨ ਵਸਨ੍ਤੇਨ ਚਙ੍ਕਮਮਣ੍ਡਪਾਦੀਨਿ ਕਾਰੇਤ੍ਵਾ ਮਞ੍ਚਪੀਠਂ ਪਞ੍ਞਪੇਤ੍ਵਾ ਪਾਨੀਯਪਰਿਭੋਜਨੀਯਂ ਉਪਟ੍ਠਾਪੇਤ੍ਵਾ ਧਮ੍ਮਂ ਵਾਚੇਨ੍ਤੇਨ ਨ ਵਸਿਤਬ੍ਬਂ. ਗਰੁਕਂ ਹਿ ਇਦਂ ਧੁਤਙ੍ਗਂ, ਤਸ੍ਮਾ ਉਪ੍ਪਨ੍ਨਪਰਿਸ੍ਸਯਵਿਘਾਤਤ੍ਥਾਯ ਸਙ੍ਘਤ੍ਥੇਰਂ ਵਾ ਰਾਜਯੁਤ੍ਤਕਂ ਵਾ ਜਾਨਾਪੇਤ੍ਵਾ ਅਪ੍ਪਮਤ੍ਤੇਨ ਵਸਿਤਬ੍ਬਂ. ਚਙ੍ਕਮਨ੍ਤੇਨ ਅਦ੍ਧਕ੍ਖਿਕੇਨ ਆਲ਼ਾਹਨਂ ਓਲੋਕੇਨ੍ਤੇਨ ਚਙ੍ਕਮਿਤਬ੍ਬਂ.

ਸੁਸਾਨਂ ਗਚ੍ਛਨ੍ਤੇਨਾਪਿ ਮਹਾਪਥਾ ਉਕ੍ਕਮ੍ਮ ਉਪ੍ਪਥਮਗ੍ਗੇਨ ਗਨ੍ਤਬ੍ਬਂ. ਦਿਵਾਯੇਵ ਆਰਮ੍ਮਣਂ ਵਵਤ੍ਥਪੇਤਬ੍ਬਂ. ਏਵਞ੍ਹਿਸ੍ਸ ਤਂ ਰਤ੍ਤਿਂ ਭਯਾਨਕਂ ਨ ਭਵਿਸ੍ਸਤਿ, ਅਮਨੁਸ੍ਸਾ ਰਤ੍ਤਿਂ ਵਿਰਵਿਤ੍ਵਾ ਵਿਰਵਿਤ੍ਵਾ ਆਹਿਣ੍ਡਨ੍ਤਾਪਿ ਨ ਕੇਨਚਿ ਪਹਰਿਤਬ੍ਬਾ. ਏਕਦਿਵਸਮ੍ਪਿ ਸੁਸਾਨਂ ਅਗਨ੍ਤੁਂ ਨ ਵਟ੍ਟਤਿ. ਮਜ੍ਝਿਮਯਾਮਂ ਸੁਸਾਨੇ ਖੇਪੇਤ੍ਵਾ ਪਚ੍ਛਿਮਯਾਮੇ ਪਟਿਕ੍ਕਮਿਤੁਂ ਵਟ੍ਟਤੀਤਿ ਅਙ੍ਗੁਤ੍ਤਰਭਾਣਕਾ. ਅਮਨੁਸ੍ਸਾਨਂ ਪਿਯਂ ਤਿਲਪਿਟ੍ਠਮਾਸਭਤ੍ਤਮਚ੍ਛਮਂਸਖੀਰਤੇਲਗੁਲ਼ਾਦਿਖਜ੍ਜਭੋਜ੍ਜਂ ਨ ਸੇਵਿਤਬ੍ਬਂ. ਕੁਲਗੇਹਂ ਨ ਪਵਿਸਿਤਬ੍ਬਨ੍ਤਿ ਇਦਮਸ੍ਸ ਵਿਧਾਨਂ.

ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠੇਨ ਯਤ੍ਥ ਧੁਵਡਾਹਧੁਵਕੁਣਪਧੁਵਰੋਦਨਾਨਿ ਅਤ੍ਥਿ, ਤਤ੍ਥੇਵ ਵਸਿਤਬ੍ਬਂ. ਮਜ੍ਝਿਮਸ੍ਸ ਤੀਸੁ ਏਕਸ੍ਮਿਮ੍ਪਿ ਸਤਿ ਵਟ੍ਟਤਿ. ਮੁਦੁਕਸ੍ਸ ਵੁਤ੍ਤਨਯੇਨ ਸੁਸਾਨਲਕ੍ਖਣਂ ਪਤ੍ਤਮਤ੍ਤੇ ਵਟ੍ਟਤਿ.

ਇਮੇਸਂ ਪਨ ਤਿਣ੍ਣਮ੍ਪਿ ਨ ਸੁਸਾਨਮ੍ਹਿ ਵਾਸਂ ਕਪ੍ਪਨੇਨ ਧੁਤਙ੍ਗਂ ਭਿਜ੍ਜਤਿ. ਸੁਸਾਨਂ ਅਗਤਦਿਵਸੇਤਿ ਅਙ੍ਗੁਤ੍ਤਰਭਾਣਕਾ. ਅਯਮੇਤ੍ਥ ਭੇਦੋ.

ਅਯਂ ਪਨਾਨਿਸਂਸੋ ਮਰਣਸ੍ਸਤਿਪਟਿਲਾਭੋ, ਅਪ੍ਪਮਾਦਵਿਹਾਰਿਤਾ, ਅਸੁਭਨਿਮਿਤ੍ਤਾਧਿਗਮੋ, ਕਾਮਰਾਗਵਿਨੋਦਨਂ, ਅਭਿਣ੍ਹਂ ਕਾਯਸਭਾਵਦਸ੍ਸਨਂ, ਸਂਵੇਗਬਹੁਲਤਾ ਆਰੋਗ੍ਯਮਦਾਦਿਪ੍ਪਹਾਨਂ, ਭਯਭੇਰਵਸਹਨਤਾ, ਅਮਨੁਸ੍ਸਾਨਂ ਗਰੁਭਾਵਨੀਯਤਾ, ਅਪ੍ਪਿਚ੍ਛਤਾਦੀਨਂ ਅਨੁਲੋਮਵੁਤ੍ਤਿਤਾਤਿ.

ਸੋਸਾਨਿਕਞ੍ਹਿ ਮਰਣਾਨੁਸਤਿਪ੍ਪਭਾਵਾ,

ਨਿਦ੍ਦਾਗਤਮ੍ਪਿ ਨ ਫੁਸਨ੍ਤਿ ਪਮਾਦਦੋਸਾ;

ਸਮ੍ਪਸ੍ਸਤੋ ਚ ਕੁਣਪਾਨਿ ਬਹੂਨਿ ਤਸ੍ਸ,

ਕਾਮਾਨੁਭਾਵਵਸਗਮ੍ਪਿ ਨ ਹੋਤਿ ਚਿਤ੍ਤਂ.

ਸਂਵੇਗਮੇਤਿ ਵਿਪੁਲਂ ਨ ਮਦਂ ਉਪੇਤਿ,

ਸਮ੍ਮਾ ਅਥੋ ਘਟਤਿ ਨਿਬ੍ਬੁਤਿਮੇਸਮਾਨੋ;

ਸੋਸਾਨਿਕਙ੍ਗਮਿਤਿਨੇਕਗੁਣਾਵਹਤ੍ਤਾ,

ਨਿਬ੍ਬਾਨਨਿਨ੍ਨਹਦਯੇਨ ਨਿਸੇਵਿਤਬ੍ਬਨ੍ਤਿ.

ਅਯਂ ਸੋਸਾਨਿਕਙ੍ਗੇ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸਵਣ੍ਣਨਾ.