੧੦. ਅਬ੍ਭੋਕਾਸਿਕਙ੍ਗਕਥਾ

੩੩. ਅਬ੍ਭੋਕਾਸਿਕਙ੍ਗਮ੍ਪਿ ‘‘ਛਨ੍ਨਞ੍ਚ ਰੁਕ੍ਖਮੂਲਞ੍ਚ ਪਟਿਕ੍ਖਿਪਾਮਿ, ਅਬ੍ਭੋਕਾਸਿਕਙ੍ਗਂ ਸਮਾਦਿਯਾਮੀ’’ਤਿ ਇਮੇਸਂ ਅਞ੍ਞਤਰਵਚਨੇਨ ਸਮਾਦਿਨ੍ਨਂ ਹੋਤਿ.

ਤਸ੍ਸ ਪਨ ਅਬ੍ਭੋਕਾਸਿਕਸ੍ਸ ਧਮ੍ਮਸ੍ਸਵਨਾਯ ਵਾ ਉਪੋਸਥਤ੍ਥਾਯ ਵਾ ਉਪੋਸਥਾਗਾਰਂ ਪਵਿਸਿਤੁਂ ਵਟ੍ਟਤਿ. ਸਚੇ ਪਵਿਟ੍ਠਸ੍ਸ ਦੇਵੋ ਵਸ੍ਸਤਿ, ਦੇਵੇ ਵਸ੍ਸਮਾਨੇ ਅਨਿਕ੍ਖਮਿਤ੍ਵਾ ਵਸ੍ਸੂਪਰਮੇ ਨਿਕ੍ਖਮਿਤਬ੍ਬਂ. ਭੋਜਨਸਾਲਂ ਵਾ ਅਗ੍ਗਿਸਾਲਂ ਵਾ ਪਵਿਸਿਤ੍ਵਾ ਵਤ੍ਤਂ ਕਾਤੁਂ, ਭੋਜਨਸਾਲਾਯ ਥੇਰੇ ਭਿਕ੍ਖੂ ਭਤ੍ਤੇਨ ਆਪੁਚ੍ਛਿਤੁਂ, ਉਦ੍ਦਿਸਨ੍ਤੇਨ ਵਾ ਉਦ੍ਦਿਸਾਪੇਨ੍ਤੇਨ ਵਾ ਛਨ੍ਨਂ ਪਵਿਸਿਤੁਂ, ਬਹਿ ਦੁਨ੍ਨਿਕ੍ਖਿਤ੍ਤਾਨਿ ਮਞ੍ਚਪੀਠਾਦੀਨਿ ਅਨ੍ਤੋ ਪਵੇਸੇਤੁਞ੍ਚ ਵਟ੍ਟਤਿ. ਸਚੇ ਮਗ੍ਗਂ ਗਚ੍ਛਨ੍ਤੇਨ ਵੁਡ੍ਢਤਰਾਨਂ ਪਰਿਕ੍ਖਾਰੋ ਗਹਿਤੋ ਹੋਤਿ, ਦੇਵੇ ਵਸ੍ਸਨ੍ਤੇ ਮਗ੍ਗਮਜ੍ਝੇ ਠਿਤਂ ਸਾਲਂ ਪਵਿਸਿਤੁਂ ਵਟ੍ਟਤਿ. ਸਚੇ ਨ ਕਿਞ੍ਚਿ ਗਹਿਤਂ ਹੋਤਿ, ਸਾਲਾਯ ਠਸ੍ਸਾਮੀਤਿ ਵੇਗੇਨ ਗਨ੍ਤੁਂ ਨ ਵਟ੍ਟਤਿ. ਪਕਤਿਗਤਿਯਾ ਗਨ੍ਤ੍ਵਾ ਪਵਿਟ੍ਠੇਨ ਪਨ ਯਾਵ ਵਸ੍ਸੂਪਰਮਾ ਠਤ੍ਵਾ ਗਨ੍ਤਬ੍ਬਨ੍ਤਿ ਇਦਮਸ੍ਸ ਵਿਧਾਨਂ. ਰੁਕ੍ਖਮੂਲਿਕਸ੍ਸਾਪਿ ਏਸੇਵ ਨਯੋ.

ਪਭੇਦਤੋ ਪਨ ਅਯਮ੍ਪਿ ਤਿਵਿਧੋ ਹੋਤਿ. ਤਤ੍ਥ ਉਕ੍ਕਟ੍ਠਸ੍ਸ ਰੁਕ੍ਖਂ ਵਾ ਪਬ੍ਬਤਂ ਵਾ ਗੇਹਂ ਵਾ ਉਪਨਿਸ੍ਸਾਯ ਵਸਿਤੁਂ ਨ ਵਟ੍ਟਤਿ. ਅਬ੍ਭੋਕਾਸੇਯੇਵ ਚੀਵਰਕੁਟਿਂ ਕਤ੍ਵਾ ਵਸਿਤਬ੍ਬਂ. ਮਜ੍ਝਿਮਸ੍ਸ ਰੁਕ੍ਖਪਬ੍ਬਤਗੇਹਾਨਿ ਉਪਨਿਸ੍ਸਾਯ ਅਨ੍ਤੋ ਅਪ੍ਪਵਿਸਿਤ੍ਵਾ ਵਸਿਤੁਂ ਵਟ੍ਟਤਿ. ਮੁਦੁਕਸ੍ਸ ਅਚ੍ਛਨ੍ਨਮਰਿਯਾਦਂ ਪਬ੍ਭਾਰਮ੍ਪਿ ਸਾਖਾਮਣ੍ਡਪੋਪਿ ਪੀਠਪਟੋਪਿ ਖੇਤ੍ਤਰਕ੍ਖਕਾਦੀਹਿ ਛਡ੍ਡਿਤਾ ਤਤ੍ਰਟ੍ਠਕਕੁਟਿਕਾਪਿ ਵਟ੍ਟਤੀਤਿ.

ਇਮੇਸਂ ਪਨ ਤਿਣ੍ਣਮ੍ਪਿ ਵਾਸਤ੍ਥਾਯ ਛਨ੍ਨਂ ਵਾ ਰੁਕ੍ਖਮੂਲਂ ਵਾ ਪਵਿਟ੍ਠਕ੍ਖਣੇ ਧੁਤਙ੍ਗਂ ਭਿਜ੍ਜਤਿ. ਜਾਨਿਤ੍ਵਾ ਤਤ੍ਥ ਅਰੁਣਂ ਉਟ੍ਠਾਪਿਤਮਤ੍ਤੇਤਿ ਅਙ੍ਗੁਤ੍ਤਰਭਾਣਕਾ. ਅਯਮੇਤ੍ਥ ਭੇਦੋ.

ਅਯਂ ਪਨਾਨਿਸਂਸੋ, ਆਵਾਸਪਲਿਬੋਧੁਪਚ੍ਛੇਦੋ, ਥਿਨਮਿਦ੍ਧਪਨੂਦਨਂ, ‘‘ਮਿਗਾ ਵਿਯ ਅਸਙ੍ਗਚਾਰਿਨੋ, ਅਨਿਕੇਤਾ ਵਿਹਰਨ੍ਤਿ ਭਿਕ੍ਖਵੋ’’ਤਿ (ਸਂ. ਨਿ. ੧.੨੨੪) ਪਸਂਸਾਯ ਅਨੁਰੂਪਤਾ, ਨਿਸ੍ਸਙ੍ਗਤਾ, ਚਾਤੁਦ੍ਦਿਸਤਾ, ਅਪ੍ਪਿਚ੍ਛਤਾਦੀਨਂ ਅਨੁਲੋਮਵੁਤ੍ਤਿਤਾਤਿ.

ਅਨਗਾਰਿਯਭਾਵਸ੍ਸ, ਅਨੁਰੂਪੇ ਅਦੁਲ੍ਲਭੇ;

ਤਾਰਾਮਣਿਵਿਤਾਨਮ੍ਹਿ, ਚਨ੍ਦਦੀਪਪ੍ਪਭਾਸਿਤੇ.

ਅਬ੍ਭੋਕਾਸੇ ਵਸਂ ਭਿਕ੍ਖੁ, ਮਿਗਭੂਤੇਨ ਚੇਤਸਾ;

ਥਿਨਮਿਦ੍ਧਂ ਵਿਨੋਦੇਤ੍ਵਾ, ਭਾਵਨਾਰਾਮਤਂ ਸਿਤੋ.

ਪਵਿਵੇਕਰਸਸ੍ਸਾਦਂ, ਨਚਿਰਸ੍ਸੇਵ ਵਿਨ੍ਦਤਿ;

ਯਸ੍ਮਾ ਤਸ੍ਮਾ ਹਿ ਸਪ੍ਪਞ੍ਞੋ, ਅਬ੍ਭੋਕਾਸਰਤੋ ਸਿਯਾਤਿ.

ਅਯਂ ਅਬ੍ਭੋਕਾਸਿਕਙ੍ਗੇ ਸਮਾਦਾਨਵਿਧਾਨਪ੍ਪਭੇਦਭੇਦਾਨਿਸਂਸਵਣ੍ਣਨਾ.