੬. ਸੇਨਾਸਨਕ੍ਖਨ੍ਧਕ
ਪੁਚ੍ਛਾ – ਪਞ੍ਚ ਆਵੁਸੋ ਲੇਣਾਨਿ ਭਗਵਤਾ ਕਤ੍ਥ ਅਨੁਞ੍ਞਾਤਾਨਿ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਾਨਿ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚੁਂ ‘‘ਰਾਜਗਹਕੋ ਭਨ੍ਤੇ ਸੇਟ੍ਠੀ ਵਿਹਾਰੇ ਕਾਰਾਪੇਤੁਕਾਮੋ, ਕਥਂ ਨੁ ਖੋ ਭਨ੍ਤੇ ਪਟਿਪਜ੍ਜਿਤਬ੍ਬ’’ਨ੍ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.
ਪੁਚ੍ਛਾ – ਕਥਂ ਆਵੁਸੋ ਵਿਹਾਰਾ ਪਠਮਂ ਉਪ੍ਪਨ੍ਨਾ, ਕਥਞ੍ਚ ਤੇ ਪਤਿਟ੍ਠਾਪਿ ਤਾ.
ਵਿਸ੍ਸਜ੍ਜਨਾ – ਏਕਾਹੇਨੇਵ ਭਨ੍ਤੇ ਰਾਜਗਹਕੇਨ ਸੇਟ੍ਠਿਨਾ ਛਟ੍ਠਿਵਿਹਾਰਾ ਪਤਿਟ੍ਠਾਪਿਤਾ, ਤੇ ਇਧ ਭਨ੍ਤੇ ਸਟ੍ਠਿਵਿਹਾਰਾ ਬੁਦ੍ਧਪ੍ਪਮੁਖਸ੍ਸ ਆਗਤਾਨਾਗਤਸ੍ਸ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ ਪਤਿਟ੍ਠਾਪਿਤਾ.
ਪੁਚ੍ਛਾ – ਵਿਹਾਰੇ ਆਵੁਸੋ ਪਟਿਭਾਨਕਮ੍ਮਂ ਪਟਿਕ੍ਖਿਪਿਤ੍ਵਾ ਮਾਲਾਕਮ੍ਮਾਦੀਨਿ ਭਗਵਤਾ ਕਤ੍ਥ ਅਨੁਞ੍ਞਾਤਾਨਿ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਾਨਿ. ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਵਿਹਾਰੇ ਪਟਿਭਾਨਚਿਤ੍ਤਂ ਕਾਰਾਪੇਸੁਂ ਇਤ੍ਥਿਰੂਪਕਂ ਪੁਰਿਸਰੂਪਕਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.
ਪੁਚ੍ਛਾ – ਯਥਾਵੁਡ੍ਢਂ ਆਵੁਸੋ ਅਭਿਵਾਦਨਾਦੀਨਿ ਚ ਅਗ੍ਗਾਸਨਾਦੀਨਿ ਚ ਅਨੁਜਾਨਿਤ੍ਵਾ ਸਙ੍ਘਿਕਂ ਯਥਾਵੁਡ੍ਢਂ ਪਟਿਬਾਹਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਅਨ੍ਤਰਾ ਚ ਭਨ੍ਤੇ ਵੇਸਾਲਿਂ ਅਨ੍ਤਰਾ ਚ ਸਾਵਤ੍ਥਿਂ ਛਬ੍ਬਗ੍ਗਿਯਾਨਂ ਭਿਕ੍ਖੂਨਂ ਅਨ੍ਤੇਵਾਸਿਕੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾਨਂ ਭਨ੍ਤੇ ਭਿਕ੍ਖੂਨਂ ਅਨ੍ਤੇਵਾਸਿਕਾ ਭਿਕ੍ਖੂ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਪੁਰਤੋ ਪੁਰਤੋ ਗਨ੍ਤ੍ਵਾ ਵਿਹਾਰੇ ਪਟਿਗ੍ਗਹੇਸੁਂ, ਸੇਯ੍ਯਾਯੋ ਪਟਿਗ੍ਗਹੇਸੁਂ ‘‘ਇਦਂ ਅਮ੍ਹਾਕਂ ਉਪਜ੍ਝਾਯਾਨਂ ਭਵਿਸ੍ਸਤਿ, ਇਦਂ ਅਮ੍ਹਾਕਂ ਆਚਰਿਯਾਨਂ ਭਵਿਸ੍ਸਤਿ, ਇਦਂ ਅਮ੍ਹਾਕਂ ਭਵਿਸ੍ਸਤੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਏਕੇਨ ਆਵੁਸੋ ਦ੍ਵੇ ਪਟਿਬਾਹਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਆਰਬ੍ਭ ਪਞ੍ਞਤ੍ਤਂ, ਆਯਸ੍ਮਾ ਭਨ੍ਤੇ ਉਪਨਨ੍ਦੋ ਸਕ੍ਯਪੁਤ੍ਤੋ ਏਕੋ ਦ੍ਵੇ ਪਟਿਬਾਹਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਨਵਕੇਨ ਆਵੁਸੋ ਉਦ੍ਦਿਸਨ੍ਤੇਨ ਸਮਕੇ ਵਾ ਆਸਨੇ ਨਿਸੀਦਿਤੁਂ ਉਚ੍ਚਤਰੇ ਵਾ ਧਮ੍ਮਗਾਰਵੇਨ, ਥੇਰੇਨ ਪਨ ਭਿਕ੍ਖੁਨਾ ਉਦ੍ਦਿਸਾਪੇਨ੍ਤੇਨ ਸਮਕੇ ਵਾ ਆਸਨੇ ਨਿਸੀਦਿਤੁਂ ਨੀਚਤਰੇ ਵਾ ਧਮ੍ਮਗਾਰਵੇਨ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਆਯਸ੍ਮਤੋ ਉਪਾਲਿਸ੍ਸ ਸਨ੍ਤਿਕੇ ਵਿਨਯਂ ਪਰਿਯਾਪੁਣਿਂਸੁ, ਆਯਸ੍ਮਾ ਭਨ੍ਤੇ ਉਪਾਲਿ ਠਿਤਕੋਵ ਉਦ੍ਦਿਸਤਿ ਥੇਰਾਨਂ ਭਿਕ੍ਖੂਨਂ ਗਾਰਵੇਨ, ਤਤ੍ਥ ਭਨ੍ਤੇ ਥੇਰਾ ਚੇਵ ਭਿਕ੍ਖੂ ਕਿਲਮਿਂਸੁ ਆਯਸ੍ਮਾ ਚ ਉਪਾਲਿ ਕਿਲਮਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਪੁਚ੍ਛਾ – ਤਿਵਸ੍ਸਨ੍ਤਰੇਨ ਆਵੁਸੋ ਸਹ ਨਿਸੀਦਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾਨਂ ਭਨ੍ਤੇ ਭਿਕ੍ਖੂਨਂ ਏਤਦਹੋਸਿ ‘‘ਕਿਤ੍ਤਾਵਤਾਨੁ ਖੋ ਸਮਾਨਾਸਨਿਕੋ ਹੋਤੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਪੁਚ੍ਛਾ – ਮਞ੍ਚੇ ਚ ਆਵੁਸੋ ਪੀਠੇ ਚ ਦ੍ਵਿਨ੍ਨਂਯੇਵ ਨਿਸੀਦਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਸਮਾਨਾਸਨਿਕੇ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਸਮਾਨਾਸਨਿਕਾ ਮਞ੍ਚੇ ਨਿਸੀਦਿਤ੍ਵਾ ਮਞ੍ਚਂ ਭਿਨ੍ਦਿਂਸੁ, ਪੀਠੇ ਨਿਸੀਦਿਤ੍ਵਾ ਪੀਠਂ ਭਿਨ੍ਦਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਪੁਚ੍ਛਾ – ਦੀਘਾਸਨੇ ਪਨਾਵੁਸੋ ਅਸਮਾਨਾਸਨਿਕੇਹਿਪਿ ਨਿਸੀਦਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਦੀਘਾਸਨੇ ਅਸਮਾਨਾਸਨਿਕੇਹਿ ਸਹ ਨਿਸੀਦਿਤੁਂ ਕੁਕ੍ਕੁਚ੍ਚਾਯਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਪੁਚ੍ਛਾ – ਪਞ੍ਚ ਆਵੁਸੋ ਅਵਿਸ੍ਸਜ੍ਜਿਯਾਨਿ ਭਗਵਤਾ ਕਤ੍ਥ ਪਞ੍ਞਤ੍ਤਾਨਿ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਾਨਿ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਾਨਿ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਸਙ੍ਘਿਕਂ ਸੇਨਾਸਨਂ ਵਿਸ੍ਸਜ੍ਜੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਪਞ੍ਚ ਆਵੁਸੋ ਅਵੇਭਙ੍ਗਿਯਾਨਿ ਭਗਵਤਾ ਕਤ੍ਥ ਪਞ੍ਞਤ੍ਤਾਨਿ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਾਨਿ.
ਵਿਸ੍ਸਜ੍ਜਨਾ – ਕੀਟਾਗਿਰਿਸ੍ਮਿਂ ਭਨ੍ਤੇ ਅਸ੍ਸਜਿਪੁਨਬ੍ਬਸੁਕੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਾਨਿ, ਅਸ੍ਸਜਿਪੁਨਬ੍ਬਸੁਕਾ ਭਨ੍ਤੇ ਭਿਕ੍ਖੂ ਸਙ੍ਘਿਕਂ ਸੇਨਾਸਨਂ ਵਿਭਜਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਾਨਿ.
ਪੁਚ੍ਛਾ – ਅਞ੍ਞਤ੍ਰ ਪਰਿਭੋਗਂ ਆਵੁਸੋ ਅਞ੍ਞਤ੍ਰ ਪਰਿਭੁਞ੍ਜਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਆਲ਼ਵਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਅਞ੍ਞਤਰਸ੍ਸ ਉਪਾਸਕਸ੍ਸ ਵਿਹਾਰਪਰਿਭੋਗਂ ਸੇਨਾਸਨਂ ਅਞ੍ਞਤ੍ਰ ਪਰਿਭੁਞ੍ਜਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਅਧੋਤੇਹਿ ਚ ਆਵੁਸੋ ਅਲ੍ਲੇਹਿ ਚ ਪਾਦੇਹਿ ਸੇਨਾਸਨਂ ਅਕ੍ਕਮਨ੍ਤਸ੍ਸ ਚ ਸਉਪਾਹਨੇਨ ਸੇਨਾਸਨਂ ਅਕ੍ਕਮਨ੍ਤਸ੍ਸ ਚ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਆਲ਼ਵਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਅਧੋਤੇਹਿ ਪਾਦੇਹਿ ਸੇਨਾਸਨਂ ਅਕ੍ਕਮਿਂਸੁ, ਅਲ੍ਲੇਹਿ ਚ ਪਾਦੇਹਿ ਸੇਨਾਸਨਂ ਅਕ੍ਕਮਿਂਸੁ, ਸਉਪਾਹਨਾਪਿ ਸੇਨਾਸਨਂ ਅਕ੍ਕਮਿਂਸੁ, ਸੇਨਾਸਨਂ ਦੁਸ੍ਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਪਰਿਕਮ੍ਮਕਤਾਯ ਆਵੁਸੋ ਭੂਮਿਯਾ ਨਿਟ੍ਠੁਭਨ੍ਤਸ੍ਸ ਚ ਪਰਿਕਮ੍ਮਕਤਂ ਭਿਤ੍ਤਿਂ ਅਪਸ੍ਸਯਨ੍ਤਸ੍ਸ ਚ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਆਲ਼ਵਿਯਂ ਭਨ੍ਤੇ ਸਮ੍ਬਹੁਲੇਵ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਪਰਿਕਮ੍ਮਕਤਾਯ ਭੂਮਿਯਾ ਨਿਟ੍ਠੁਭਿਂਸੁ, ਪਰਿਕਮ੍ਮਕਤਂ ਭਿਤ੍ਤਿਂ ਅਪਸ੍ਸਯਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਸੇਨਾਸਨਕ੍ਖਨ੍ਧਕਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.
ਵਿਸ੍ਸਜ੍ਜਨਾ – ਸੇਨਾਸਨਕ੍ਖਨ੍ਧਕਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਤਿਸ੍ਸੋ ਆਪਤ੍ਤਿਯੋ.