੭. ਸਙ੍ਘਤੇਦਕਕ੍ਖਨ੍ਧਕ

ਪੁਚ੍ਛਾ – ਕਥਂ ਆਵੁਸੋ ਛਨ੍ਨਂ ਸਕ੍ਯਕੁਮਾਰਾਨਂ ਸਹ ਉਪਾਲਿਕਪ੍ਪਕੇਨ ਪਬ੍ਬਜ੍ਜਾ ਅਹੋਸਿ, ਕਥਞ੍ਚ ਨੇਸਂ ਵਿਸੇਸੋ ਉਦਪਾਦਿ.

ਵਿਸ੍ਸਜ੍ਜਨਾ – ਭਗਵਾ ਭਨ੍ਤੇ ਉਪਾਲਿਂ ਕਪ੍ਪਕਂ ਪਠਮਂ ਪਬ੍ਬਾਜੇਸਿ, ਪਚ੍ਛਾ ਤੇ ਸਕ੍ਯਕੁਮਾਰੇ, ਅਥ ਭਨ੍ਤੇ ਆਯਸ੍ਮਾ ਭਦ੍ਦਿਯੋ ਤੇਨੇਵ ਅਨ੍ਤਰਵਸ੍ਸੇਨ ਤਿਸ੍ਸੋ ਵਿਜ੍ਜਾ ਸਚ੍ਛਾਕਾਸਿ, ਆਯਸ੍ਮਾ ਅਨੁਰੁਦ੍ਧੋ ਦਿਬ੍ਬਚਕ੍ਖੁਂ ਉਪ੍ਪਾਦੇਸਿ, ਆਯਸ੍ਮਾ ਆਨਨ੍ਦੋ ਸੋਤਾਪਤ੍ਤਿਫਲਂ ਸਚ੍ਛਾਕਾਸਿ, ਦੇਵਦਤ੍ਤੋ ਪੋਥੁਜ੍ਜਨਿਕਂ ਇਦ੍ਧਿਂ ਅਭਿਨਿਪ੍ਫਾਦੇਸਿ. ਏਵਂ ਖੋ ਭਨ੍ਤੇ ਛਨ੍ਨਂ ਸਕ੍ਯਕੁਮਾਰਾਨਂ ਉਪਾਲਿਕਪ੍ਪਕੇਨ ਸਹ ਪਬ੍ਬਜ੍ਜਾ ਅਹੋਸਿ, ਏਵਞ੍ਚ ਪਨ ਭਨ੍ਤੇ ਤੇਸਂ ਵਿਸੇਸਾਧਿਗਮੋ ਅਹੋਸਿ.

ਪਕਾਸਨੀਯ

ਪੁਚ੍ਛਾ – ਪਕਾਸਨੀਯਕਮ੍ਮਂ ਆਵੁਸੋ ਕਾਤੁਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਦੇਵਦਤ੍ਤਂ ਆਰਬ੍ਭ ਪਞ੍ਞਤ੍ਤਂ, ਦੇਵਦਤ੍ਤੋ ਭਨ੍ਤੇ ‘‘ਸਰਾਜਿਕਾਯ ਮਂ ਭਗਵਾ ਪਰਿਸਾਯ ਖੇਲ਼ਾਸਕਵਾਦੇਨ ਅਪਸਾਦੇਤਿ, ਸਾਰਿਪੁਤ੍ਤਮੋਗ੍ਗਲ੍ਲਾਨੇਵ ਉਕ੍ਕਂਸਤੀ’’ਤਿ ਕੁਪਿਤੋ ਅਨਤ੍ਤਮਨੋ ਭਗਵਤਿ ਆਘਾਤਂ ਬਨ੍ਧਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪਕਾਸਨੀਯ

ਪੁਚ੍ਛਾ – ਦੇਵਦਤ੍ਤਸ੍ਸ ਆਵੁਸੋ ਪਕਾਸਨੀਯਕਮ੍ਮਂ ਕਾਰਾਪੇਤ੍ਵਾ ਕਥਂ ਭਗਵਾ ਪਕਾਸੇਤੁਂ ਆਣਾਪੇਸਿ.

ਵਿਸ੍ਸਜ੍ਜਨਾ – ਭਗਵਾ ਭਨ੍ਤੇ ਦੇਵਦਤ੍ਤਸ੍ਸ ਪਕਾਸਨੀਯਕਮ੍ਮਂ ਕਾਤੁਂ ਪਞ੍ਞਪੇਤ੍ਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਆਮਨ੍ਤੇਸਿ ‘‘ਤੇਨ ਹਿ ਤ੍ਵਂ ਸਾਰਿਪੁਤ੍ਤ ਦੇਵਦਤ੍ਤਂ ਰਾਜਗਹੇ ਪਕਾਸੇਹੀ’’ਤਿ, ਏਵਂ ਖੋ ਭਨ੍ਤੇ ਦੇਵਦਤ੍ਤਸ੍ਸ ਪਕਾਸਨੀਯਕਮ੍ਮਂ ਕਤ੍ਵਾ ਦੇਵਦਤ੍ਤਂ ਰਾਜਗਹੇ ਪਕਾਸੇਤੁਂ ਭਗਵਾ ਆਣਾਪੇਸਿ.

ਦੇਵਦਤ੍ਤ

ਪੁਚ੍ਛਾ – ਕਥਂ ਆਵੁਸੋ ਦੇਵਦਤ੍ਤੇਨ ਦੁਟ੍ਠਚਿਤ੍ਤੇਨ ਵਧਕਚਿਤ੍ਤੇਨ ਤਥਾ ਗਤਸ੍ਸ ਰੁਹਿਰਂ ਉਪ੍ਪਾਦੇਤ੍ਵਾ ਪਠਮਂ ਆਨਨ੍ਤਰਿਯਂ ਕਮ੍ਮਂ ਉਪਚਿਤਂ.

ਵਿਸ੍ਸਜ੍ਜਨਾ – ਭਗਵਾ ਭਨ੍ਤੇ ਗਿਜ੍ਝਕੂਟਸ੍ਸ ਪਬ੍ਬਤਸ੍ਸ ਛਾਯਾਯਂ ਚਙ੍ਕਮਿ, ਅਥ ਭਨ੍ਤੇ ਦੇਵਦਤ੍ਤੋ ਗਿਜ੍ਝਕੂਟਂ ਪਬ੍ਬਤਂ ਆਰੁਹਿਤ੍ਵਾ ਮਹਤਿਂ ਸਿਲਂ ਪਵਿਜ੍ਝਿ ‘‘ਇਮਾਯ ਸਮਣਂ ਗੋਤਮਂ ਜੀਵਿਤਾ ਵੋਰੋਪੇਸ੍ਸਾਮੀ’’ਤਿ, ਅਥ ਖੋ ਭਨ੍ਤੇ ਦ੍ਵੇ ਪਬ੍ਬਤਕੂਟਾਨਿ ਸਮਾਗਨ੍ਤ੍ਵਾ ਤਂ ਸਿਲਂ ਸਮ੍ਪਟਿਚ੍ਛਿਂਸੁ, ਤਤੋ ਪਪਤਿਕਾ ਉਪ੍ਪਤਿਤ੍ਵਾ ਭਗਵਤੋ ਪਾਦੇ ਰੁਹਿਰਂ ਉਪ੍ਪਾਦੇਸਿ. ਏਵਂ ਖੋ ਭਨ੍ਤੇ ਦੇਵਦਤ੍ਤੇਨ ਦੁਟ੍ਠੇਨ ਵਧਕਚਿਤ੍ਤੇਨ ਤਥਾਗਤਸ੍ਸ ਰੁਹਿਰਂ ਉਪ੍ਪਾਦੇਤ੍ਵਾ ਪਠਮਂ ਆਨਨ੍ਤਰਿਯਕਮ੍ਮਂ ਉਪਚਿਤਂ.

ਪੁਚ੍ਛਾ – ਕੁਲੇਸੁ ਆਵੁਸੋ ਤਿਕਭੋਜਨਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਦੇਵਦਤ੍ਤਂ ਆਰਬ੍ਭ ਪਞ੍ਞਤ੍ਤਂ, ਦੇਵਦਤ੍ਤੋ ਭਨ੍ਤੇ ਪਰਿਹੀਨਲਾਭਸਕ੍ਕਾਰੋ ਸਪਰਿਸੋ ਕੁਲੇਸੁ ਵਿਞ੍ਞਾਪੇਤ੍ਵਾ ਵਿਞ੍ਞਾਪੇਤ੍ਵਾ ਭੁਞ੍ਜਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਅਲਂ ਦੇਵਦਤ੍ਤ, ਮਾ ਤੇ ਰੁਚ੍ਚਿ ਸਙ੍ਘਭੇਦੋ, ਗਰੁਕੋ ਖੋ ਦੇਵਦਤ੍ਤ ਸਙ੍ਘਭੇਦੋਤਿਆਦਿਕੋ ਆਵੁਸੋ ਓਵਾਦੋ ਭਗਵਤਾ ਕਤ੍ਥ ਦਿਨ੍ਨੋ, ਕਿਸ੍ਮਿਂ ਵਤ੍ਥੁਸ੍ਮਿਂ ਦਿਨ੍ਨੋ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਦੇਵਦਤ੍ਤਂ ਆਰਬ੍ਭ ਦਿਨ੍ਨੋ, ਦੇਵਦਤ੍ਤੋ ਭਨ੍ਤੇ ਸਙ੍ਘਭੇਦਾਯ ਪਰਕ੍ਕਮਿ ਚਕ੍ਕਭੇਦਾਯ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਦਿਨ੍ਨੋ.

ਅਲਂ ਦੇਵਦਤ੍ਤ, ਮਾ ਤੇ ਰੁਚ੍ਚਿ ਸਙ੍ਘਭੇਦੋ, ਗਰੁਕੋ ਖੋ ਦੇਵਦਤ੍ਤ ਸਙ੍ਘਭੇਦੋ –

ਪੁਚ੍ਛਾ – ‘‘ਸੁਕਰਂ ਸਾਧੁਨਾ ਸਾਧੁਂ, ਸਾਧੁਂ ਪਾਪੇਨ ਦੁਕ੍ਕਰਂ. ਪਾਪਂ ਪਾਪੇਨ ਸੁਕਰਂ, ਪਾਪਮਰਿਯੇਹਿ ਦੁਕ੍ਕਰ’’ਨ੍ਤਿ- ਆਵੁਸੋ ਇਦਂ ਉਦਾਨਂ ਭਗਵਤਾ ਕਤ੍ਥ ਉਦਾਨਿਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਉਦਾਨਿਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਦੇਵਦਤ੍ਤਂਯੇਵ ਆਰਬ੍ਭ ਉਦਾਨਿਤਂ, ਆਯਸ੍ਮਾ ਭਨ੍ਤੇ ਆਨਨ੍ਦੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹਂ ਪਿਣ੍ਡਾਯ ਪਾਵਿਸਿ, ਅਥ ਖੋ ਭਨ੍ਤੇ ਦੇਵਦਤ੍ਤੋ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ ‘‘ਅਜ੍ਜਤਗ੍ਗੇ ਦਾਨਾਹਂ ਆਵੁਸੋ ਆਨਨ੍ਦ ਅਞ੍ਞਤ੍ਰੇਵ ਭਗਵਤਾ ਅਞ੍ਞਤ੍ਰੇਵ ਭਿਕ੍ਖੁਸਙ੍ਘਾ ਉਪੋਸਥਂ ਕਰਿਸ੍ਸਾਮਿ ਸਙ੍ਘਕਮ੍ਮਂ ਕਰਿਸ੍ਸਾਮੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਉਦਾਨਿਤਂ.

ਸੁਕਰਂ ਸਾਧੁਨਾ ਸਾਧੁਂ, ਸਾਧੁਂ ਪਾਪੇਨ ਦੁਕ੍ਕਰਂ;

ਪਾਪਂ ਪਾਪੇਨ ਸੁਕਰਂ, ਪਾਪਮਰਿਯੇਹਿ ਦੁਕ੍ਕਰਂ.

ਪੁਚ੍ਛਾ – ਭੇਦਾਨੁਵਤ੍ਤਕਾਨਂ ਆਵੁਸੋ ਭਿਕ੍ਖੂਨਂ ਥੁਲ੍ਲਚ੍ਚਯਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਆਯਸ੍ਮਾ ਭਨ੍ਤੇ ਸਾਰਿਪੁਤ੍ਤੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਦਵੋਚ ‘‘ਸਾਧੁ ਭਨ੍ਤੇ ਭੇਦਾਨੁਵਤ੍ਤਕਾ ਭਿਕ੍ਖੂ ਪੁਨ ਉਪਸਮ੍ਪਜ੍ਜੇਯ੍ਯੁ’’ਨ੍ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

‘‘ਸਾਧੁ ਭਨ੍ਤੇ ਭੇਦਾਨੁਵਤ੍ਤਕਾ ਭਿਕ੍ਖੂ ਪੁਨ ਉਪਸਮ੍ਪਜ੍ਜੇਯ੍ਯੁ’’ਨ੍ਤਿ –

ਪੁਚ੍ਛਾ – ਕਿਤ੍ਤਾਵਤਾ ਨੁ ਖੋ ਆਵੁਸੋ ਸਙ੍ਘਰਾਜਿ ਹੋਤਿ ਨੋ ਚ ਸਙ੍ਘਭੇਦੋ, ਕਿਤ੍ਤਾਵਤਾ ਚ ਪਨ ਸਙ੍ਘਰਾਜਿ ਚੇਵ ਹੋਤਿ ਸਙ੍ਘਭੇਦੋ ਚ.

ਵਿਸ੍ਸਜ੍ਜਨਾ – ਏਕਤੋ ਭਨ੍ਤੇ ਏਕੋ ਹੋਤਿ, ਏਕਤੋ ਦ੍ਵੇ ਚਤੁਤ੍ਥੋ ਅਨੁਸ੍ਸਾਵੇਤਿ, ਸਲਾਕਂ ਗਾਹੇਤਿ ‘‘ਅਯਂ ਧਮ੍ਮੋ ਅਯਂ ਵਿਨਯੋ ਇਦਂ ਸਤ੍ਥੁਸਾਸਨਂ ਇਮਂ ਗਣ੍ਹਥ ਇਮਂ ਰੋਚੇਥਾਤਿ’’, ਏਤੇਨੇਵ ਭਨ੍ਤੇ ਨਯੇਨ ਚਤੁਨ੍ਨਂ ਵਾ ਪਞ੍ਚਨ੍ਨਂ ਵਾ ਛਨ੍ਨਂ ਵਾ ਸਤ੍ਤਨ੍ਨਂ ਵਾ ਅਟ੍ਠਨ੍ਨਂ ਵਾ ਸਙ੍ਘਰਾਜਿ ਹੋਤਿ, ਨੋ ਚ ਸਙ੍ਘਭੇਦੋ, ਏਕਤੋ ਭਨ੍ਤੇ ਚਤ੍ਤਾਰੋ ਹੋਨ੍ਤਿ, ਏਕਤੋ ਚਤ੍ਤਾਰੋ, ਨਵਮੋ ਅਨੁਸ੍ਸਾਵੇਤਿ, ਸਲਾਕਂ ਗਾਹੇਤਿ ‘‘ਅਯਂ ਧਮ੍ਮੋ ਅਯਂ ਵਿਨਯੋ ਇਦਂ ਸਤ੍ਥੁਸਾਸਨਂ ਇਮਂ ਗਣ੍ਹਥ ਇਮਂ ਰੋਚੇਥਾ’’ਤਿ, ਏਵਂ ਖੋ ਭਨ੍ਤੇ ਸਙ੍ਘਰਾਜਿ ਚੇਵ ਹੋਤਿ ਸਙ੍ਘਭੇਦੋ ਚ. ਏਵਂ ਖੋ ਭਨ੍ਤੇ ਸਙ੍ਘਰਾਜਿ ਹੋਤਿ, ਨੋ ਚ ਸਙ੍ਘਭੇਦੋ, ਏਵਞ੍ਚ ਪਨ ਭਨ੍ਤੇ ਸਙ੍ਘਰਾਜਿ ਚੇਵ ਹੋਤਿ ਸਙ੍ਘਭੇਦੋ ਚ.

ਪੁਚ੍ਛਾ – ਕਿਤ੍ਤਾਵਤਾ ਨੁ ਖੋ ਆਵੁਸੋ ਸਙ੍ਘੋ ਭਿਨ੍ਨੋ ਹੋਤਿ.

ਵਿਸ੍ਸਜ੍ਜਨਾ – ਇਧ ਭਨ੍ਤੇ ਭਿਕ੍ਖੂ ਅਧਮ੍ਮਾਦਿਂ ਧਮ੍ਮਾਦੀਨੀਤਿ ਦੀਪੇਨ੍ਤਿ, ਤੇ ਇਮੇਹਿ ਅਟ੍ਠਾਰਸਹਿ ਵਤ੍ਥੂਹਿ ਅਪਕਸ੍ਸਨ੍ਤਿ, ਅਵਪਕਸ੍ਸਨ੍ਤਿ, ਆਵੇਨਿਂ ਉਪੋਸਥਂ ਕਰੋਨ੍ਤਿ, ਆਵੇਨਿਂ ਪਵਾਰਣਂ ਕਰੋਨ੍ਤਿ, ਆਵੇਨਿਂ ਸਙ੍ਘਕਮ੍ਮਂ ਕਰੋਨ੍ਤਿ, ਏਵਂ ਖੋ ਭਨ੍ਤੇ ਸਙ੍ਘੋ ਭਿਨ੍ਨੋ ਹੋਤਿ.

ਪੁਚ੍ਛਾ – ਕਿਤ੍ਤਾਵਤਾ ਨੁ ਖੋ ਆਵੁਸੋ ਸਙ੍ਘੋ ਸਮਗ੍ਗੋ ਹੋਤਿ.

ਵਿਸ੍ਸਜ੍ਜਨਾ – ਇਧ ਭਨ੍ਤੇ ਭਿਕ੍ਖੂ ਅਧਮ੍ਮਂ ਅਧਮ੍ਮੋਤਿ ਦੀਪੇਨ੍ਤਿ, ਧਮ੍ਮਂ ਧਮ੍ਮੋਤਿ ਦੀਪੇਨ੍ਤਿ, ਅਵਿਨਯਂ ਅਵਿਨਯੋਤਿ ਦੀਪੇਨ੍ਤਿ…ਪੇ… ਦੁਟ੍ਠੁਲ੍ਲਂ ਆਪਤ੍ਤਿਂ ਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਨ੍ਤਿ, ਅਦੁਟ੍ਠੁਲ੍ਲਂ ਆਪਤ੍ਤਿਂ ਅਦੁਟ੍ਠੁਲ੍ਲਾ ਆਪਤ੍ਤੀਤਿ ਦੀਪੇਨ੍ਤਿ, ਤੇ ਇਮੇਹਿ ਅਟ੍ਠਾਰਸਹਿ ਵਤ੍ਥੂਹਿ ਨ ਅਪਕਸ੍ਸਨ੍ਤਿ, ਨ ਅਵਪਕਸ੍ਸਨ੍ਤਿ, ਨ ਆਵੇਨਿਂ ਉਪੋਸਥਂ ਕਰੋਨ੍ਤਿ, ਨ ਆਵੇਨਿਂ ਪਵਾਰਣਂ ਕਰੋਨ੍ਤਿ, ਨ ਆਵੇਨਿਂ ਸਙ੍ਘਕਮ੍ਮਂ ਕਰੋਨ੍ਤਿ, ਏਤ੍ਤਾਵਤਾ ਖੋ ਭਨ੍ਤੇ ਸਙ੍ਘੋ ਸਮਗ੍ਗੋ ਹੋਤਿ.

ਪੁਚ੍ਛਾ – ਸਮਗ੍ਗਂ ਆਵੁਸੋ ਸਙ੍ਘਂ ਭਿਨ੍ਦਿਤ੍ਵਾ ਕਿਂ ਸੋ ਪਸਵਤਿ.

ਵਿਸ੍ਸਜ੍ਜਨਾ – ਸਮਗ੍ਗਂ ਖੋ ਭਨ੍ਤੇ ਸਙ੍ਘਂ ਭਿਨ੍ਦਿਤ੍ਵਾ ਕਪ੍ਪਟ੍ਠਿਤਿਕਂ ਕਿਬ੍ਬਿਸਂ ਪਸਵਤਿ, ਕਪ੍ਪਂ ਨਿਰਯਮ੍ਹਿ ਪਚ੍ਚਤਿ.

ਪੁਚ੍ਛਾ – ਭਿਨ੍ਨਂ ਖੋ ਆਵੁਸੋ ਸਙ੍ਘਂ ਸਮਗ੍ਗਂ ਕਤ੍ਵਾ ਕਿਂ ਸੋ ਪਸਵਤਿ.

ਵਿਸ੍ਸਜ੍ਜਨਾ – ਭਿਨ੍ਨਂ ਖੋ ਭਨ੍ਤੇ ਸਙ੍ਘਂ ਸਮਗ੍ਗਂ ਕਤ੍ਵਾ ਬ੍ਰਹ੍ਮਂ ਪੁਞ੍ਞਂ ਪਸਵਤਿ, ਕਪ੍ਪਂ ਸਗ੍ਗਮ੍ਹਿ ਮੋਦਤਿ.

ਪੁਚ੍ਛਾ – ਸਙ੍ਘਭੇਦਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.

ਵਿਸ੍ਸਜ੍ਜਨਾ – ਸਙ੍ਘਭੇਦਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਦ੍ਵੇ ਆਪਤ੍ਤਿਯੋ.