੧. ਕਮ੍ਬਕ੍ਖਨ੍ਧਕ

ਪੁਚ੍ਛਾ – ਭਣ੍ਡਨਾਦਿਕਾਰਕਸ੍ਸ ਆਵੁਸੋ ਭਿਕ੍ਖੁਨੋ ਤਜ੍ਜਨੀਯਕਮ੍ਮਂ ਕਾਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਪਣ੍ਡੁਕਲੋਹਿਤਕੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਪਣ੍ਡੁਕਲੋਹਿਤਕਾ ਭਨ੍ਤੇ ਭਿਕ੍ਖੂ ਅਤ੍ਤਨਾ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ, ਯੇਪਿ ਚਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤੇ ਉਪਸਙ੍ਕਮਿਤ੍ਵਾ ਏਵਮਾਹਂਸੁ ‘‘ਮਾ ਖੋ ਤੁਮ੍ਹੇ ਆਯਸ੍ਮਨ੍ਤੋ ਏਸੋ ਅਜੇਸਿ, ਬਲਵਾਬਲਵਂ ਪਟਿਮਨ੍ਤੇਥ, ਤੁਮ੍ਹੇ ਤੇਨ ਪਣ੍ਡਿਤਤਰਾ ਚ ਬ੍ਯਤ੍ਤਤਰਾ ਚ ਬਹੁਸ੍ਸੁਤਤਰਾ ਚ ਅਲਮਤ੍ਤਤਰਾ ਚ, ਮਾ ਚਸ੍ਸ ਭਾਯਿਤ੍ਥ, ਮਯਮ੍ਪਿ ਤੁਮ੍ਹਾਕਂ ਪਕ੍ਖਾ ਭਵਿਸ੍ਸਾਮਾ’’ਤਿ, ਤੇਨ ਅਨੁਪ੍ਪਨ੍ਨਾਨਿ ਚੇਵ ਭਣ੍ਡਨਾਨਿ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾਨਿ ਚ ਭਣ੍ਡਨਾਨਿ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਸਂਵਤ੍ਤਨ੍ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਤਜ੍ਜਨੀਯਕਮ੍ਮਕਤਸ੍ਸ ਆਵੁਸੋ ਭਿਕ੍ਖੁਨੋ ਕਤਿਸੁ ਵਤ੍ਤੇਸੁ ਸਮ੍ਮਾ ਵਤ੍ਤਨ੍ਤਸ੍ਸ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਅਟ੍ਠਾਰਸਸੁ ਭਨ੍ਤੇ ਵਤ੍ਤੇਸੁ ਸਮ੍ਮਾ ਵਤ੍ਤਨ੍ਤਸ੍ਸ ਤਜ੍ਜਨੀਯਕਮ੍ਮਕਤਸ੍ਸ ਭਿਕ੍ਖੁਨੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁਂ ਭਗਵਤਾ ਸਾਵਤ੍ਥਿਯਂ ਅਨੁਞ੍ਞਾਤਂ, ਤੇਯੇਵ ਪਣ੍ਡੁਕਲੋਹਿਤਕਾ ਭਿਕ੍ਖੂ ਸਙ੍ਘੇਨ ਤਜ੍ਜਨੀਯਕਮ੍ਮਕਤਾ ਸਮ੍ਮਾ ਵਤ੍ਤਿਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ ਯਾਚਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਬਾਲਸ੍ਸ ਆਵੁਸੋ ਅਬ੍ਯਤ੍ਤਸ੍ਸ ਆਪਤ੍ਤਿਬਹੁਲਸ੍ਸ ਅਨਪਦਾਨਸ੍ਸ ਗਿਹਿਸਂਸਟ੍ਠਸ੍ਸ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ ਨਿਯਸ੍ਸਕਮ੍ਮਂ ਕਾਤੁਂ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਸੇਯ੍ਯਸਕਂ ਆਰਬ੍ਭ ਪਞ੍ਞਤ੍ਤਂ, ਆਯਸ੍ਮਾ ਭਨ੍ਤੇ ਸੇਯ੍ਯਸਕੋ ਬਾਲੋ ਅਹੋਸਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ ਗਿਹਿਸਂਸਟ੍ਠੋ ਵਿਹਾਸਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਨਿਯਸ੍ਸਕਮ੍ਮਕਤਸ੍ਸ ਆਵੁਸੋ ਭਿਕ੍ਖੁਨੋ ਕਤਿਸੁ ਵਤ੍ਤੇਸੁ ਸਮ੍ਮਾ ਵਤ੍ਤਨ੍ਤਸ੍ਸ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁਂ ਭਗਵਤਾ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਅਟ੍ਠਾਰਸਸੁ ਭਨ੍ਤੇ ਵਤ੍ਤੇਸੁ ਸਮ੍ਮਾ ਵਤ੍ਤਨ੍ਤਸ੍ਸ ਨਿਯਸ੍ਸ ਕਮ੍ਮਕਤਸ੍ਸ ਭਿਕ੍ਖੁਨੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁਂ ਭਗਵਤਾ ਅਨੁਞ੍ਞਾਤਂ, ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ, ਨ ਭਿਕ੍ਖੁਨੋਵਾਦਕਸਮ੍ਮੁਤਿ ਸਾਦਿਤਬ੍ਬਾ, ਸਮ੍ਮਤੇਨਪਿ ਭਿਕ੍ਖੁਨਿਯੋ ਨ ਓਵਦਿਤਬ੍ਬਾ, ਏਵਮਾਦੀਸੁ ਭਨ੍ਤੇ ਅਟ੍ਠਾਰਸਸੁ ਵਤ੍ਤੇਸੁ ਸਮ੍ਮਾ ਵਤ੍ਤਨ੍ਤਸ੍ਸ ਨਿਯਸ੍ਸਕਮ੍ਮਕਤਸ੍ਸ ਭਿਕ੍ਖੁਨੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁਂ ਭਗਵਤਾ ਅਨੁਞ੍ਞਾਤਂ.

ਪੁਚ੍ਛਾ – ਕੁਲਦੂਸਕਸ੍ਸ ਆਵੁਸੋ ਪਾਪਸਮਾਚਾਰਸ੍ਸ ਭਿਕ੍ਖੁਨੋ ਪਬ੍ਬਾਜਨੀਯਕਮ੍ਮਂ ਕਾਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਸ੍ਸਜਿਪੁਨਬ੍ਬਸੁਕੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਅਸ੍ਸਜਿਪੁਨਬ੍ਬਸੁਕਾ ਭਨ੍ਤੇ ਭਿਕ੍ਖੂ ਕੀਟਾਗਿਰਿਸ੍ਮਿਂ ਕੁਲਦੂਸਕਾ ਅਹੇਸੁਂ ਪਾਪਸਮਾਚਾਰਾ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਪਟਿਸਾਰਣੀਯਕਮ੍ਮਂ ਆਵੁਸੋ ਪੁਚ੍ਛਾਮਿ, ਸਦ੍ਧਂ ਆਵੁਸੋ ਪਸਨ੍ਨਂ ਗਹਪਤਿਂ ਦਾਯਕਂ ਕਾਰਕਂ ਸਙ੍ਘੁਪਟ੍ਠਾਕਂ ਹੀਨੇਨ ਖੁਂਸੇਨ੍ਤਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਕਾਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਸੁਧਮ੍ਮਂ ਆਰਬ੍ਭ ਅਨੁਞ੍ਞਾਤਂ, ਭਗਵਤਿ ਭਨ੍ਤੇ ਸਾਵਤ੍ਥਿਯਂ ਵਿਹਰਤਿ ਆਯਸ੍ਮਾ ਸੁਧਮ੍ਮੋ ਮਚ੍ਛਿਕਾਸਣ੍ਡੇ ਚਿਤ੍ਤਂ ਗਹਪਤਿਂ ਸਦ੍ਧਂ ਪਸਨ੍ਨਂ ਦਾਯਕਂ ਕਾਰਕਂ ਸਙ੍ਘੁਪਟ੍ਠਾਕਂ ਹੀਨੇਨ ਖੁਂਸੇਸਿ ਹੀਨੇਨ ਵਮ੍ਭੇਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਤੇਨਹਿ ਭਿਕ੍ਖਵੇ ਸਙ੍ਘੋ ਸੁਧਮ੍ਮਸ੍ਸ ਭਿਕ੍ਖੁਨੋ ਪਟਿਸਾਰਣੀਯਕਮ੍ਮਂ ਕਰੋਤੁ ‘‘ਚਿਤ੍ਤੋ ਤੇ ਗਹਪਤਿ ਖਮਾਪੇਤਬ੍ਬੋ’’ਤਿ –

ਪੁਚ੍ਛਾ – ਪਟਿਸਾਰਣੀਯਕਮ੍ਮਕਤਸ੍ਸ ਆਵੁਸੋ ਭਿਕ੍ਖੁਨੋ ਅਨੁਦੂਤਂ ਦਾਤੁਞ੍ਚ ਤੇਨ ਅਨੁਦੂਤੇਨ ਸਦ੍ਧਿਂ ਗਨ੍ਤ੍ਵਾ ਯਥਾਖੁਂਸਿਤਂ ਗਹਪਤਿਂ ਖਮਾਪੇਤੁਂ ਚ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂਯੇਵ ਸੁਧਮ੍ਮਂ ਆਰਬ੍ਭ ਅਨੁਞ੍ਞਾਤਂ, ਆਯਸ੍ਮਾ ਭਨ੍ਤੇ ਸੁਧਮ੍ਮੋ ਮਚ੍ਛਿਕਾਸਣ੍ਡਂ ਗਨ੍ਤ੍ਵਾ ਮਙ੍ਕੁਭੂਤੋ ਨਾਸਕ੍ਖਿ ਚਿਤ੍ਤਂ ਗਹਪਤਿਂ ਖਮਾਪੇਤੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਪਟਿਸਾਰਣੀਯਕਮ੍ਮਕਤਸ੍ਸ ਆਵੁਸੋ ਭਿਕ੍ਖੁਨੋ ਕਤਿਸੁ ਵਤ੍ਤੇਸੁ ਸਮ੍ਮਾ ਵਤ੍ਤਨ੍ਤਸ੍ਸ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁਂ ਭਗਵਤਾ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਅਟ੍ਠਾਰਸਸੁ ਭਨ੍ਤੇ ਵਤ੍ਤੇਸੁ ਸਮ੍ਮਾ ਵਤ੍ਤਨ੍ਤਸ੍ਸ ਪਟਿਸਾਰਣੀਯ ਕਮ੍ਮਕਤਸ੍ਸ ਭਿਕ੍ਖੁਨੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁਂ ਭਗਵਤਾ ਅਨੁਞ੍ਞਾਤਂ.

ਪੁਚ੍ਛਾ – ਆਪਤ੍ਤਿਂ ਆਵੁਸੋ ਆਪਜ੍ਜਿਤ੍ਵਾ ਤਂ ਆਪਤ੍ਤਿਂ ਪਸ੍ਸਿਤੁਂ ਵਾ ਪਟਿਕਾਤੁਂ ਵਾ ਨ ਇਚ੍ਛਨ੍ਤਸ੍ਸ ਭਿਕ੍ਖੁਨੋ ਆਪਤ੍ਤਿਯਾ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਉਕ੍ਖੇਪਨੀਯਕਮ੍ਮਂ ਕਾਤੁਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਕੋਸਮ੍ਬਿਯਂ ਭਨ੍ਤੇ ਆਯਸ੍ਮਨ੍ਤਂ ਛਨ੍ਨਤ੍ਥੇਰਂ ਆਰਬ੍ਭ ਪਞ੍ਞਤ੍ਤਂ, ਆਯਸ੍ਮਾ ਭਨ੍ਤੇ ਛਨ੍ਨੋ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਿ ਤਂ ਆਪਤ੍ਤਿਂ ਪਸ੍ਸਿਤੁਂ ਵਾ ਪਟਿਕਾਤੁਂ ਵਾ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਆਪਤ੍ਤਿਯਾ ਆਵੁਸੋ ਅਦਸ੍ਸਨੇਨ ਵਾ ਅਪ੍ਪਟਿਕਮ੍ਮੇ ਵਾ ਉਕ੍ਖੇਪਨੀਯ ਕਮ੍ਮਕਤੇਨ ਭਿਕ੍ਖੁਨਾ ਕਤਿਸੁ ਵਤ੍ਤੇਸੁ ਸਮ੍ਮਾ ਵਤ੍ਤਿਤਬ੍ਬਂ.

ਵਿਸ੍ਸਜ੍ਜਨਾ – ਤੇਚਤ੍ਤਾਲੀਸਾਯ ਭਨ੍ਤੇ ਵਤ੍ਤੇਸੁ ਸਮ੍ਮਾ ਵਤ੍ਤਿਤਬ੍ਬਂ.

ਪੁਚ੍ਛਾ – ਉਕ੍ਖੇਪਨੀਯਕਮ੍ਮਕਤਸ੍ਸ ਆਵੁਸੋ ਭਿਕ੍ਖੁਨੋ ਸਮ੍ਮਾ ਵਤ੍ਤਨ੍ਤਸ੍ਸ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਕੋਸਮ੍ਬਿਯਂ ਭਨ੍ਤੇ ਆਯਸ੍ਮਨ੍ਤਂਯੇਵ ਛਨ੍ਨਂ ਆਰਬ੍ਭ ਅਨੁਞ੍ਞਾਤਂ, ਆਯਸ੍ਮਾ ਭਨ੍ਤੇ ਛਨ੍ਨੋ ਸਙ੍ਘੇਨ ਆਪਤ੍ਤਿਯਾ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਉਕ੍ਖੇਪਨੀਯਕਮ੍ਮਕਤੋ ਸਮ੍ਮਾ ਵਤ੍ਤੇਸਿ ਲੋਮਂਪਾਤੇਸਿ ਨੇਤ੍ਥਾਰਂ ਵਤ੍ਤੇਸਿ ਸਙ੍ਘਂ ਉਪਸਙ੍ਕਮਿਤ੍ਵਾ ਤਸ੍ਸ ਕਮ੍ਮਸ੍ਸ ਪਟਿਪ੍ਪਸ੍ਸਦ੍ਧਿਯਾ ਯਾਚਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਪਾਪਿਕਂ ਆਵੁਸੋ ਦਿਟ੍ਠਿਂ ਗਹੇਤ੍ਵਾ ਤਂ ਦਿਟ੍ਠਿਂ ਨ ਪਟਿਨਿਸ੍ਸਜ੍ਜਨ੍ਤਸ੍ਸ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਕਾਤੁਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਰਿਟ੍ਠਂ ਭਿਕ੍ਖੁਂ ਗਦ੍ਧਬਾਧਿਪੁਬ੍ਬਂ ਆਰਬ੍ਭ ਪਞ੍ਞਤ੍ਤਂ, ਭਗਵਤਿ ਭਨ੍ਤੇ ਸਾਵਤ੍ਥਿਯਂ ਵਿਹਰਤਿ ਅਰਿਟ੍ਠਸ੍ਸ ਨਾਮ ਭਿਕ੍ਖੁਨੋ ਗਦ੍ਧਬਾਧਿਪੁਬ੍ਬਸ੍ਸ ਏਵਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ਅਹੋਸਿ ‘‘ਤਥਾਹਂ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮਿ, ਯਥਾਯੇਮੇ ਅਨ੍ਤਰਾਯਿਕਾ ਧਮ੍ਮਾ ਵੁਤ੍ਤਾ ਭਗਵਤਾ, ਤੇ ਪਟਿਸੇਵਤੋ ਨਾਲਂ ਅਨ੍ਤਰਾਯਾਯਾ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਪਾਪਿਕਾਯ ਆਵੁਸੋ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਕਤੇਨ ਭਿਕ੍ਖੁਨਾ ਕਤਿਸੁ ਵਤ੍ਤੇਸੁ ਸਮ੍ਮਾ ਵਤ੍ਤਿਤਬ੍ਬਂ.

ਵਿਸ੍ਸਜ੍ਜਨਾ – ਤੇਚਤ੍ਤਾਲੀਸਾਯ ਭਨ੍ਤੇ ਵਤ੍ਤੇਸੁ ਸਮ੍ਮਾ ਵਤ੍ਤਿਤਬ੍ਬਂ.

ਪੁਚ੍ਛਾ – ਕਮ੍ਮਕ੍ਖਨ੍ਧਕਂ ਪੁਚ੍ਛਿਸ੍ਸਂ, ਸਨਿਦਾਨਿ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.

ਵਿਸ੍ਸਜ੍ਜਨਾ – ਕਮ੍ਮਕ੍ਖਨ੍ਧਕਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਏਕਾ ਆਪਤ੍ਤਿ.