੩. ਵਸ੍ਸੁਪਨਾਯਿਕਕ੍ਖਨ੍ਧਕ
ਪੁਚ੍ਛਾ – ਵਸ੍ਸੂਪਨਾਯਿਕਂ ਆਵੁਸੋ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲਾ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਹੇਮਨ੍ਤਮ੍ਪਿ ਗਿਮ੍ਹਮ੍ਪਿ ਵਸ੍ਸਮ੍ਪਿ ਚਾਰਿਕਂ ਚਰਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਕਤਿਪਨਾਵੁਸੋ ਵਸ੍ਸੂਪਨਾਯਿਕਾ ਭਗਵਤਾ ਅਨੁਞ੍ਞਾਤਾ.
ਵਿਸ੍ਸਜ੍ਜਨਾ – ਦ੍ਵੇਮਾ ਭਨ੍ਤੇ ਵਸ੍ਸੂਪਨਾਯਿਕਾ ਭਗਵਤਾ ਅਨੁਞ੍ਞਾਤਾ ਪੁਰਿਮਿਕਾ ਪਚ੍ਛਿਮਿਕਾ, ਅਪਰਜ੍ਜੁਗਤਾਯ ਭਨ੍ਤੇ ਆਸਲ਼੍ਹਿਯਾ ਪੁਰਿਮਿਕਾ ਉਪਗਨ੍ਤਬ੍ਬਾ, ਮਾਸਗਤਾਯ ਭਨ੍ਤੇ ਆਸਲ਼੍ਹਿਯਾ ਪਚ੍ਛਿਮਿਕਾ ਉਪਗਨ੍ਤਬ੍ਬਾ, ਇਮਾ ਖੋ ਭਨ੍ਤੇ ਦ੍ਵੇ ਵਸ੍ਸੂਪਨਾਯਿਕਾ ਭਗਵਤਾ ਅਨੁਞ੍ਞਾਤਾ.
ਪੁਚ੍ਛਾ – ਵਸ੍ਸਂ ਆਵੁਸੋ ਉਪਗਨ੍ਤ੍ਵਾ ਪੁਰਿਮਂ ਵਾ ਤੇਮਾਸਂ ਪਚ੍ਛਿਮਂ ਵਾ ਤੇਮਾਸਂ ਅਵਸਿਤ੍ਵਾ ਚਾਰਿਕਂ ਪਕ੍ਕਮਨ੍ਤਸ੍ਸ ਦੁਕ੍ਕਟਂ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਵਸ੍ਸਂ ਉਪਗਨ੍ਤ੍ਵਾ ਅਨ੍ਤਰਾ ਵਸ੍ਸਂ ਚਾਰਿਕਂ ਪਕ੍ਕਮਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਸਤ੍ਤਾਹ ਕਰਣੀਯੇਨ ਆਵੁਸੋ ਪਹਿਤੇ ਗਨ੍ਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਉਦੇਨੇਨ ਉਪਾਸਕੇਨ ਪਹਿਤੇ ਨ ਗਚ੍ਛਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਪੁਚ੍ਛਾ – ਸਤ੍ਤਾਹਕਰਣੀਯੇਨ ਆਵੁਸੋ ਸਤ੍ਤਨ੍ਨਂ ਅਪਹਿਤੇਪਿ ਗਨ੍ਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਸ੍ਸ ਭਿਕ੍ਖੁਨੋ ਮਾਤੁਗਿਲਾਨ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਅਨੁਜਾਨਾਮਿ ਭਿਕ੍ਖਵੇ ਸਤ੍ਤਨ੍ਨਂ ਸਤ੍ਤਾਹਕਰਣੀਯੇਨ ਅਪਹਿਤੇਪਿ ਗਨ੍ਤੁਂ, ਪਗੇਵ ਪਹਿਤੇ.
ਪੁਚ੍ਛਾ – ਕਿਸ੍ਮਿਂਚਿ ਆਵੁਸੋ ਅਨ੍ਤਰਾਯੇ ਸਤਿ ਅਨ੍ਤੋਵਸ੍ਸਂ ਪਕ੍ਕਮਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਕੋਸਲੇਸੁ ਜਨਪਦੇਸੁ ਵਸ੍ਸਂ ਉਪਗਚ੍ਛਿਂਸੁ, ਤੇ ਵਸ੍ਸੂਪਗਤਾ ਵਾਲ਼ੇਹਿ ਉਬ੍ਬਾਲ਼੍ਹਾ ਅਹੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਪੁਚ੍ਛਾ – ਰੁਕ੍ਖ ਸੁਸਿਰੇ ਵਾ ਆਵੁਸੋ ਰੁਕ੍ਖਵਿਟਭਿਯਾ ਵਾ ਅਜ੍ਝੋਕਾਸੇ ਵਾ ਵਸ੍ਸਂ ਉਪਗਚ੍ਛਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਰੁਕ੍ਖਸੁਸਿਰੇਪਿ ਰੁਕ੍ਖਵਿਟਭਿਯਾਪਿ ਅਜ੍ਝੋਕਾਸੇਪਿ ਵਸ੍ਸਂ ਉਪਗਚ੍ਛਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਅਸੇਨਾਸਨਿਕੇਨ ਆਵੁਸੋ ਵਸ੍ਸਂ ਉਪਗਚ੍ਛਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਤਸ੍ਮਿਂਯੇਵ ਭਨ੍ਤੇ ਸਾਵਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਅਸੇਨਾਸਨਿਕਾ ਵਸ੍ਸਂ ਉਪਗਚ੍ਛਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਛਵਕੁਟਿਕਾਯ ਵਾ ਆਵੁਸੋ ਛਤ੍ਤੇ ਵਾ ਚਾਟਿਯਾ ਵਾ ਵਸ੍ਸਂ ਉਪਗਚ੍ਛਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਛਵਕੁਟਿਕਾਯਪਿ ਛਤ੍ਤੇਪਿ ਚਾਟਿਯਾਪਿ ਵਸ੍ਸਂ ਉਪਗਚ੍ਛਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਪਟਿਸ੍ਸਵਂ ਆਵੁਸੋ ਵਿਸਂ ਵਾਦੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਆਰਬ੍ਭ ਪਞ੍ਞਤ੍ਤਂ, ਆਯਸ੍ਮਾ ਭਨ੍ਤੇ ਉਪਨਨ੍ਦੋ ਸਕ੍ਯਪੁਤ੍ਤੋ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਵਸ੍ਸਂ ਵਾਸਂ ਪਟਿਸ੍ਸੁਣਿਤ੍ਵਾ ਵਿਸਂਵਾਦੇਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਵਸ੍ਸੂਪਨਾਯਿਕਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.
ਵਿਸ੍ਸਜ੍ਜਨਾ – ਵਸ੍ਸੂਪਨਾਯਿਕਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਏਕਾ ਆਪਤ੍ਤਿ.