੪. ਪਵਾਰਣਾਕ੍ਖਨ੍ਧਕ

ਪੁਚ੍ਛਾ – ਵਸ੍ਸਂ ਵੁਟ੍ਠਾਨਂ ਆਵੁਸੋ ਭਿਕ੍ਖੂਨਂ ਤੀਹਿ ਠਾਨੇਹਿ ਪਵਾਰਿਤੁਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਸਨ੍ਦਿਟ੍ਠਾ ਸਮ੍ਭਤ੍ਤਾ ਅਨ੍ਤੋਵਸ੍ਸਂ ਨੇਵ ਆਲਪਿਂਸੁ ਨ ਸਲ੍ਲਪਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਅਨੁਜਾਨਾਮਿ ਭਿਕ੍ਖਵੇ ਵਸ੍ਸਂ ਵੁਟ੍ਠਾਨਂ ਭਿਕ੍ਖੂਨਂ ਤੀਹਿ ਠਾਨੇਹਿ ਪਵਾਰੇਤੁਂ, ਦਿਟ੍ਠੇਵ ਵਾ ਸੁਤੇਨ ਵਾ ਪਰਿਸਙ੍ਕਾਯ ਵਾ.

ਪੁਚ੍ਛਾ – ਕਤਿ ਆਵੁਸੋ ਪਵਾਰਣਾ ਦਿਵਸਵਸੇਨ ਚ ਪੁਗ੍ਗਲਵਸੇਨ ਚ ਕਾਤਬ੍ਬਾਕਾਰਵਸੇਨ ਚ.

ਵਿਸ੍ਸਜ੍ਜਨਾ – ਦਿਵਸਵਸੇਨ ਭਨ੍ਤੇ ਤਿਸ੍ਸੋ ਪਵਾਰਣਾ, ਤਥਾ ਪੁਗ੍ਗਲਵਸੇਨ ਕਾਤਬ੍ਬਾਕਾਰਵਸੇਨਚ.

ਪੁਚ੍ਛਾ – ਕਤੀਨਂ ਆਵੁਸੋ ਸਙ੍ਘੇ ਪਵਾਰੇਤੁਂ ਭਗਵਤਾ ਅਨੁਞ੍ਞਾਤਂ, ਕਤੀਨਂ ਪਨਾਵੁਸੋ ਅਞ੍ਞਮਞ੍ਞਂ ਪਵਾਰੇਤੁਂ ਭਗਵਤਾ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਪਞ੍ਚਨ੍ਨਂ ਭਨ੍ਤੇ ਭਿਕ੍ਖੂਨਂ ਸਙ੍ਘੇ ਪਵਾਰੇਤੁਂ ਭਗਵਤਾ ਅਨੁਞ੍ਞਾਤਂ, ਚਤੁਨ੍ਨਂ ਵਾ ਭਨ੍ਤੇ ਤਿਣ੍ਣਂ ਵਾ ਦ੍ਵਿਨ੍ਨਂ ਵਾ ਅਞ੍ਞਮਞ੍ਞਂ ਪਵਾਰੇਤੁਂ ਅਨੁਞ੍ਞਾਤਂ.

ਪੁਚ੍ਛਾ – ਏਕੇਨ ਪਨਾਵੁਸੋ ਵਸ੍ਸਂਵੁਟ੍ਠੇਨ ਭਿਕ੍ਖੁਨਾ ਕਥਂ ਪਟਿਪਜ੍ਜਿਤਬ੍ਬਨ੍ਤਿ ਭਗਵਤਾ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਏਕੇਨ ਪਨ ਭਨ੍ਤੇ ਭਿਕ੍ਖੁਨਾ ‘‘ਅਜ੍ਜ ਮੇ ਪਵਾਰਣਾ’’ਤਿ ਅਧਿਟ੍ਠਾਤਬ੍ਬਨ੍ਤਿ ਭਗਵਤਾ ਅਨੁਞ੍ਞਾਤਂ.

ਪੁਚ੍ਛਾ – ਪਵਾਰਣਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.

ਵਿਸ੍ਸਜ੍ਜਨਾ – ਪਵਾਰਣਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਤਿਸ੍ਸੋ ਆਪਤ੍ਤਿਯੋ.