੫. ਚਮ੍ਮਕ੍ਖਨ੍ਧਕ

ਸੋਣਮਥੇਰ ਵਤ੍ਥੁ

ਪੁਚ੍ਛਾ – ਉਪਾਹਨਂ ਆਵੁਸੋ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਨ੍ਤਂ ਸੋਣਂ ਆਰਬ੍ਭ ਅਨੁਞ੍ਞਾਤਂ, ਆਯਸ੍ਮਤੋ ਭਨ੍ਤੇ ਸੋਣਸ੍ਸ ਅਚ੍ਚਾਰਦ੍ਧਵੀਰਿਯਸ੍ਸ ਚਙ੍ਕਮਤੋ ਪਾਦਾ ਭਿਜ੍ਜਿਂਸੁ, ਚਙ੍ਕਮੋ ਲੋਹਿਤੇਨ ਫੁਟੋ ਅਹੋਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਸਬ੍ਬਨੀਲਿਕਾ ਵਾ ਆਵੁਸੋ ਸਬ੍ਬਪੀਤਿਕਾ ਵਾ ਸਬ੍ਬਲੋਹਿਤਿਕਾ ਵਾ ਸਬ੍ਬਮਞ੍ਜਿਟ੍ਠਿਕਾ ਵਾ ਸਬ੍ਬਕਣ੍ਹਾ ਵਾ ਸਬ੍ਬਮਹਾਰਙ੍ਗਰਤ੍ਤਾ ਵਾ ਸਬ੍ਬਮਹਾਨਾਮਰਤ੍ਤਾ ਵਾ ਉਪਾਹਨਾਯੋ ਧਾਰੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਸਬ੍ਬਨੀਲਿਕਾਯੋ ਉਪਾਹਨਾਯੋ ਧਾਰੇਸੁਂ, ਸਬ੍ਬਪੀਤਿਕਾਯੋ ਸਬ੍ਬਲੋਹਿਤਿਕਾਯੋ ਸਬ੍ਬਮਞ੍ਜਿਟ੍ਠਿਕਾਯੋ ਸਬ੍ਬਕਣ੍ਹਾਯੋ ਸਬ੍ਬਮਹਾਰਙ੍ਗਰਤ੍ਤਾ ਸਬ੍ਬਮਹਾਨਾਮਰਤ੍ਤਾਯੋਪਿ ਉਪਾਹਨਾਯੋ ਧਾਰੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਖਲ੍ਲਕਬਨ੍ਧਾ ਵਾ ਆਵੁਸੋ ਪੁਟਬਨ੍ਧਾ ਵਾ ਪਾਲਿਗੁਣ੍ਠਿਮਾ ਵਾ ਤੂਲਪੁਣ੍ਣਿਕਾ ਵਾ ਤਿਤ੍ਤਿਰਪਤ੍ਤਿਕਾ ਵਾ ਮੇਣ੍ਡਵਿਸਾਣਵਦ੍ਧਿਕਾ ਵਾ ਅਜਵਿਸਾਣਵਦ੍ਧਿਕਾ ਵਾ ਵਿਚ੍ਛਿਕਾਲ਼ਿਕਾ ਵਾ ਮੋਰਪਿਞ੍ਛ ਪਰਿਸਿਬ੍ਬਿਕਾ ਵਾ ਚਿਤ੍ਰਾ ਵਾ ਉਪਾਹਨਾਯੋ ਧਾਰੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਖਲ੍ਲਕਬਨ੍ਧਾ ਉਪਾਹਨਾਯੋਪਿ ਧਾਰੇਸੁਂ, ਪੁਟਬਨ੍ਧਾ ਉਪਾਹਨਾਯੋਪਿ ਧਾਰੇਸੁਂ, ਪਾਲਿਗੁਣ੍ਠਿਮਾ ਉਪਾਹਨਾਯੋਪਿ ਧਾਰੇਸੁਂ, ਤੂਲਪੁਣ੍ਣਿਕਾ ਉਪਾਹਨਾਯੋਪਿ ਧਾਰੇਸੁਂ, ਤਿਤ੍ਤਿਰਪਤ੍ਤਿਕਾ ਉਪਾਹਨਾਯੋਪਿ ਧਾਰੇਸੁਂ, ਮੇਣ੍ਡਵਿਸਾਣਵਦ੍ਧਿਕਾ ਉਪਾਹਨਾਯੋਪਿ ਧਾਰੇਸੁਂ, ਅਜਵਿਸਾਣਵਦ੍ਧਿਕਾ ਉਪਾਹਨਾਯੋਪਿ ਧਾਰੇਸੁਂ, ਵਿਚ੍ਛਿਕਾਲ਼ਿਕਾ ਉਪਾਹਨਾਯੋਪਿ ਧਾਰੇਸੁਂ, ਮੋਰਪਿਞ੍ਛ ਪਰਿਸਿਬ੍ਬਿਤਾ ਉਪਾਹਨਾਯੋ ਧਾਰੇਸੁਂ, ਚਿਤ੍ਰਾ ਉਪਾਹਨਾਯੋਪਿ ਧਾਰੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਕਟ੍ਠਪਾਦੁਕਾਯੋ ਆਵੁਸੋ ਧਾਰੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਛਬ੍ਬਗ੍ਗੀਯੇਵ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਕਟ੍ਠਪਾਦੁਕਾਯੋ ਅਭਿਰੁਹਿਤ੍ਵਾ ਅਜ੍ਝੋਕਾਸੇ ਚਙ੍ਕਮਨ੍ਤਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਖਟਖਟਸਦ੍ਦਾ ਅਨੇਕਵਿਹਿਤਂ ਤਿਰਚ੍ਛਾਨਕਥਂ ਕਥੇਨ੍ਤਾ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਯਾਨੇਨ ਆਵੁਸੋ ਯਾਯਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਯਾਨੇਨ ਯਾਯਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਗਿਲਾਨਸ੍ਸ ਆਵੁਸੋ ਯਾਨਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਗਿਲਾਨਂ ਭਿਕ੍ਖੁਂ ਆਰਬ੍ਭ ਅਨੁਞ੍ਞਾਤਂ, ਅਞ੍ਞਤਰੋ ਭਨ੍ਤੇ ਭਿਕ੍ਖੁ ਕੋਸਲੇਸੁ ਜਨਪਦੇ ਸਾਵਤ੍ਥਿਂ ਗਚ੍ਛਨ੍ਤੋ ਭਗਵਨ੍ਤਂ ਦਸ੍ਸਨਾਯ ਅਨ੍ਤਰਾਮਗ੍ਗੇ ਗਿਲਾਨੋ ਕੁਕ੍ਕੁਚ੍ਚਾਯਨ੍ਤੋ ਯਾਨਂ ਨਾਭਿਰੁਹਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਉਚ੍ਚਾਸਯਨਮਹਾਸਯਨਾਨਿ ਆਵੁਸੋ ਧਾਰੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਉਚ੍ਚਾਸਯਨਮਹਾਸਯਨਾਨਿ ਧਾਰੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਗੋਚਮ੍ਮਾਨਿ ਆਵੁਸੋ ਧਾਰੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਪਾਪਭਿਕ੍ਖੁਂ ਆਰਬ੍ਭ ਪਞ੍ਞਤ੍ਤਂ, ਅਞ੍ਞਤਰੋ ਭਨ੍ਤੇ ਭਿਕ੍ਖੁ ਪਾਣਾਤਿਪਾਤੇ ਸਮਾਦਪੇਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਪਚ੍ਚਨ੍ਤਿਮੇਸੁ ਆਵੁਸੋ ਜਨਪਦੇਸੁ ਵਿਨਯਧਰਪਞ੍ਚਮੇਨ ਗਣੇਨ ਉਪਸਮ੍ਪਦਾ ਚ ਗੁਣਙ੍ਗੁਣੂਪਹਨਞ੍ਚ ਧੁਵਨਹਾਨਞ੍ਚ ਚਮ੍ਮਾਨਿ ਅਤ੍ਥਰਣਾਨਿ ਚ ਨਿਸ੍ਸੀਮਗਤਾਨਂ ਚੀਵਰਦਾਨਞ੍ਚਾਤਿ ਇਮਾਨਿ ਪਞ੍ਚ ਭਗਵਤਾ ਕਤ੍ਥ ਅਨੁਞ੍ਞਾਤਾਨਿ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਸੋਣਂ ਕੁਟਿਕਣ੍ਣਂ ਆਰਬ੍ਭ ਅਨੁਞ੍ਞਾਤਾ, ਆਯਸ੍ਮਾ ਭਨ੍ਤੇ ਸੋਣੋ ਕੁਟਿਕਣ੍ਣੋ ਏਤਾਨਿ ਪਞ੍ਚਵਤ੍ਥੂਨਿ ਆਯਸ੍ਮਤੋ ਮਹਾਕਚ੍ਚਾਨਸ੍ਸ ਵਚਨੇਨ ਭਗਵਨ੍ਤਂ ਯਾਚਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਾ.

ਪੁਚ੍ਛਾ – ਚਮ੍ਮਸਞ੍ਞੁਤ੍ਤਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.

ਵਿਸ੍ਸਜ੍ਜਨਾ – ਚਮ੍ਮਸਞ੍ਞੁਤ੍ਤਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਤਿਸ੍ਸੋ ਆਪਤ੍ਤਿਯੋ.