੬. ਭੇਸਜ੍ਜਕ੍ਖਨ੍ਧਕ

ਪੁਚ੍ਛਾ – ਪਞ੍ਚ ਆਵੁਸੋ ਭੇਸਜ੍ਜਾਨਿ ਪਟਿਗ੍ਗਹੇਤ੍ਵਾ ਕਾਲੇਪਿ ਵਿਕਾਲੇਪਿ ਪਰਿਭੁਞ੍ਜਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾਨਂ ਭਨ੍ਤੇ ਭਿਕ੍ਖੂਨਂ ਸਾਰਦਿਕੇਨ ਆਬਾਧੇਨ ਪੁਟ੍ਠਾਨਂ ਯਾਗੁਪਿ ਨ ਸਮ੍ਮਾ ਪਰਿਣਾਮਂ ਗਚ੍ਛਿ, ਭਤ੍ਤਮ੍ਪਿ ਭੁਤ੍ਤਂ ਨ ਸਮ੍ਮਾ ਪਰਿਣਾਮਂ ਗਚ੍ਛਿ, ਤੇ ਤੇਨ ਕਿਸਾ ਅਹੇਸੁਂ ਲੂਖਾ ਦੁਬ੍ਬਣ੍ਣਾ ਉਪ੍ਪਣ੍ਡੁਪ੍ਪਣ੍ਡੁਕਜਾਤਾ ਧਮਨਿਸਨ੍ਥਤਗਤ੍ਤਾ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਮੂਲਾਦਿਭੇਸਜ੍ਜਾਨਿ ਆਵੁਸੋ ਭਗਵਤਾ ਕਤ੍ਥ ਅਨੁਞ੍ਞਾਤਾਨਿ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਗਿਲਾਨੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਾਨਿ, ਸਮ੍ਬਹੁਲਾਨਂ ਗਿਲਾਨਾਨਂ ਭਿਕ੍ਖੂਨਂ ਮੂਲੇਹਿ ਭੇਸਜ੍ਜੇਹਿ ਅਤ੍ਥੋ ਅਹੋਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.

ਪੁਚ੍ਛਾ – ਅਨ੍ਤੋਵੁਟ੍ਠਂਵਾ ਆਵੁਸੋ ਅਨ੍ਤੋਪਕ੍ਕਂ ਵਾ ਸਾਮਂਪਕ੍ਕਂ ਵਾ ਪਰਿਭੁਞ੍ਜਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਨ੍ਤਂ ਆਨਨ੍ਦਂ ਆਰਬ੍ਭ ਪਞ੍ਞਤ੍ਤਂ, ਆਯਸ੍ਮਾ ਭਨ੍ਤੇ ਆਨਨ੍ਦੋ ਸਾਮਂ ਤਿਲਮ੍ਪਿ ਤਣ੍ਡੁਲਮ੍ਪਿ ਮੁਗ੍ਗਮ੍ਪਿ ਵਿਞ੍ਞਾਪੇਤ੍ਵਾ ਅਨ੍ਤੋ ਵਾਸੇਤ੍ਵਾ ਅਨ੍ਤੋ ਸਾਮਂ ਪਚਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਸੁਪ੍ਪਿਯਾ ਵਤ੍ਥੁ

ਪੁਚ੍ਛਾ – ਮਨੁਸ੍ਸਮਂਸਂ ਆਵੁਸੋ ਪਰਿਭੁਞ੍ਜਨ੍ਤਸ੍ਸ ਥੁਲ੍ਲਚ੍ਚਯਞ੍ਚ ਅਪ੍ਪਟਿਵੇਕ੍ਖਿਤ੍ਵਾ ਮਂਸਂ ਪਰਿਭੁਞ੍ਜਨ੍ਤਸ੍ਸ ਦੁਕ੍ਕਟਞ੍ਚ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਬਾਰਾਣਸਿਯਂ ਭਨ੍ਤੇ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਪਞ੍ਞਤ੍ਤਂ, ਅਞ੍ਞਤਰੋ ਭਨ੍ਤੇ ਭਿਕ੍ਖੁ ਅਪ੍ਪਟਿਵੇਕ੍ਖਿਤ੍ਵਾ ਮਨੁਸ੍ਸਮਂਸਂ ਭੁਞ੍ਜਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਨ ਭਿਕ੍ਖਵੇ ਮਨੁਸ੍ਸਮਂਸਂ ਪਰਿਭੁਞ੍ਜਿਤਬ੍ਬਂ, ਯੋ ਪਰਿਭੁਞ੍ਜੇਯ੍ਯ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ, ਨ ਚ ਭਿਕ੍ਖਵੇ ਅਪ੍ਪਟਿਵੇਕ੍ਖਿਤ੍ਵਾ ਮਂਸਂ ਪਰਿਭੁਞ੍ਜਿਤਬ੍ਬਂ, ਯੋ ਪਰਿਭੁਞ੍ਜੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸ.

ਪੁਚ੍ਛਾ – ਹਤ੍ਥਿਮਂਸਂ ਵਾ ਆਵੁਸੋ ਅਸ੍ਸਮਂਸਂ ਵਾ ਪਰਿਭੁਞ੍ਜਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਬਾਰਾਣਸਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਹਤ੍ਥਿਮਂਸਮ੍ਪਿ ਅਸ੍ਸਮਂਸਮ੍ਪਿ ਪਰਿਭੁਞ੍ਜਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਸੁਨਕ੍ਖਮਂਸਂ ਵਾ ਆਵੁਸੋ ਅਹਿਮਂਸਂ ਵਾ ਭੁਞ੍ਜਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਬਾਰਾਣਸਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਸੁਨਕ੍ਖਮਂਸਮ੍ਪਿ ਅਹਿਮਂਸਮ੍ਪਿ ਪਰਿਭੁਞ੍ਜਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਸੀਹਮਂਸਂ ਵਾ ਆਵੁਸੋ ਬ੍ਯਗ੍ਘਮਂਸਂ ਵਾ ਦੀਪਿਮਂਸਂ ਵਾ ਅਚ੍ਛਮਂਸਂ ਵਾ ਤਰਚ੍ਛਮਂਸਂ ਵਾ ਭੁਞ੍ਜਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਬਾਰਾਣਸਿਯਂਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਸੀਹਮਂਸਮ੍ਪਿ ਬ੍ਯਗ੍ਘਮਂਸਮ੍ਪਿ ਦੀਪਿਮਂਸਮ੍ਪਿ ਅਚ੍ਛਮਂਸਮ੍ਪਿ ਤਰਚ੍ਛਮਂਸਮ੍ਪਿ ਪਰਿਭੁਞ੍ਜਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਗਿਲਾਨਸ੍ਸ ਆਵੁਸੋ ਗੁਲ਼ਂ ਵਾ ਅਗਿਲਾਨਸ੍ਸ ਗੁਲ਼ੋਦਕਂ ਵਾ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਗਿਲਾਨਸ੍ਸੇਵ ਭਗਵਤਾ ਗੁਲ਼ੋ ਅਨੁਞ੍ਞਾਤੋ ਨੋ ਅਗਿਲਾਨਸ੍ਸਾਤਿ ਕੁਕ੍ਕੁਚ੍ਚਾਯਨ੍ਤਾ ਗੁਲ਼ਂ ਨ ਭੁਞ੍ਜਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਜਾਨਂ ਆਵੁਸੋ ਉਦ੍ਦਿਸ੍ਸ ਕਤਂ ਮਂਸਂ ਪਰਿਭੁਞ੍ਜਨ੍ਤਸ੍ਸ ਦੁਕ੍ਕਟਂ ਪਞ੍ਞਪੇਤ੍ਵਾ ਤਿਕੋਟਿਪਰਿਸੁਦ੍ਧਂ ਮਂਸਂ ਭਗਵਤਾ ਕਤ੍ਥ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਵੇਸਾਲਿਯਂ ਭਨ੍ਤੇ ਸੀਹਸ੍ਸ ਸੇਟਾਪਤਿਨੋ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਮੇਣ੍ਡਕ ਵਤ੍ਥੁ

ਪੁਚ੍ਛਾ – ਪਾਥੇਯ੍ਯਂ ਆਵੁਸੋ ਪਰਿਯੇਸਿਤੁਞ੍ਚ ਕਪ੍ਪਿਯਕਾਰਕਾਨਂ ਹਤ੍ਥੇ ਉਪਨਿਕ੍ਖਿਤ੍ਤਹਿਰਞ੍ਞਤੋ ਨਿਬ੍ਬਤ੍ਤਂ ਕਪ੍ਪਿਯਪਚ੍ਚਯਂ ਸਾਦਿਤੁਞ੍ਚ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਅਨ੍ਤਰਾ ਚ ਭਨ੍ਤੇ ਭਦ੍ਦਿਯਂ ਅਨ੍ਤਰਾ ਚ ਅਙ੍ਗੁਤ੍ਤਰਾਪਂ ਮੇਣ੍ਡਕਂ ਗਹਪਤਿਂ ਆਰਬ੍ਭ ਅਨੁਞ੍ਞਾਤਂ, ਮੇਣ੍ਡਕੋ ਭਨ੍ਤੇ ਗਹਪਤਿ ਭਗਵਨ੍ਤਂ ਯਾਚਿ ‘‘ਸਨ੍ਤਿ ਭਨ੍ਤੇ ਮਗ੍ਗਾ ਕਨ੍ਤਾਰਾ ਅਪ੍ਪੋਦਕਾ ਅਪ੍ਪਭਕ੍ਖਾ ਨ ਸੁਕਰਾ ਅਪਾਥੇਯ੍ਯੇਨ ਗਨ੍ਤੁਂ, ਸਾਧੁ ਭਨ੍ਤੇ ਭਗਵਾ ਭਿਕ੍ਖੂਨਂ ਪਾਥੇਯ੍ਯਂ ਅਨੁਜਾਨਾਤੂ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਕੇਣਿਯ ਵਤ੍ਥੁ

ਪੁਚ੍ਛਾ – ਅਟ੍ਠ ਆਵੁਸੋ ਪਾਨਾਨਿ ਭਗਵਤਾ ਕਤ੍ਥ ਅਨੁਞ੍ਞਾਤਾਨਿ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.

ਵਿਸ੍ਸਜ੍ਜਨਾ – ਆਪਣੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਾਨਿ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਪਾਨਾਨਿ ਨ ਪਟਿਗ੍ਗਣ੍ਹਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.

ਰੋਜਮਲ੍ਲਾ ਵਤ੍ਥੁ

ਪੁਚ੍ਛਾ – ਸਬ੍ਬਞ੍ਚ ਆਵੁਸੋ ਡਾਕਂ ਸਬ੍ਬਞ੍ਚ ਪਿਟ੍ਠਖਾਦਨੀਯਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਕੁਸਿਨਾਰਾਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਡਾਕਞ੍ਚ ਪਿਟ੍ਠਖਾਦਨੀਯਞ੍ਚ ਨ ਪਟਿਗ੍ਗਹੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਅਕਪ੍ਪਿਯਂ ਆਵੁਸੋ ਸਮਾਦਪੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਆਤੁਮਾਯਂ ਭਨ੍ਤੇ ਅਞ੍ਞਤਰਂ ਵੁਡ੍ਢਪਬ੍ਬਜਿਤਂ ਆਰਬ੍ਭ ਪਞ੍ਞਤ੍ਤਂ, ਅਞ੍ਞਤਰੋ ਭਨ੍ਤੇ ਵੁਡ੍ਢਪਬ੍ਬਜਿਤੋ ਅਕਪ੍ਪਿਯੇ ਸਮਾਦਪੇਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਸਙ੍ਘਿਕਾਨਿ ਵਾ ਆਵੁਸੋ ਪੁਗ੍ਗਲਿਕਾਨਿ ਵਾ ਬੀਜਾਨਿ ਪੁਗ੍ਗਲਿਕਾਯ ਵਾ ਸਙ੍ਘਿਕਾਯ ਵਾ ਭੂਮਿਯਾ ਰੋਪਿਤਾਨਿ ਭਾਗਂ ਦਤ੍ਵਾ ਪਰਿਭੁਞ੍ਜਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਨੁਞ੍ਞਾਤਂ, ਸਾਵਤ੍ਥਿਯਂ ਭਨ੍ਤੇ ਭਗਵਤਿ ਵਿਹਰਤਿ ਸਙ੍ਘਿਕਾਨਿਪਿ ਬੀਜਾਨਿ ਪੁਗ੍ਗਲਿਕਾਯ ਭੂਮਿਯਾ ਰੋਪਿਯਿਂਸੁ, ਪੁਗ੍ਗਲਿਕਾਨਿਪਿ ਬੀਜਾਨਿ ਸਙ੍ਘਿਕਾਯ ਭੂਮਿਯਾ ਰੋਪਿਯਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਵਿਨਯਮਹਾਪਦੇਸਸਙ੍ਖਾਤਾਨਿ ਆਵੁਸੋ ਚਤ੍ਤਾਰਿ ਕਪ੍ਪਿਯਾਕਪ੍ਪਿਯਅਨੁਲੋਮਾਨਿ ਭਗਵਤਾ ਕਤ੍ਥ ਪਞ੍ਞਤ੍ਤਾਨਿ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਾਨਿ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਾਨਿ, ਸਮ੍ਬਹੁਲਾਨਂ ਭਨ੍ਤੇ ਭਿਕ੍ਖੂਨਂ ਕਿਸ੍ਮਿਞ੍ਚਿ ਕਿਸ੍ਮਿਞ੍ਚਿਠਾਨੇ ਕੁਕ੍ਕੁਚ੍ਚਂ ਉਪ੍ਪਜ੍ਜਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਾਨਿ.

ਪੁਚ੍ਛਾ – ਯਾਵਕਾਲਿਕਾਦੀਹਿ ਸਂਸਟ੍ਠਾਨਂ ਆਵੁਸੋ ਯਾਮਕਾਲਿਕਾਦੀਨਂ ਪਰਿਭੋਗਕਾਲਮਰਿਯਾਦਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾਨਂ ਭਨ੍ਤੇ ਭਿਕ੍ਖੂਨਂ ਏਤਦਹੋਸਿ ‘‘ਕਪ੍ਪਤਿ ਨੁਖੋ ਯਾਵਕਾਲਿਕੇਨ ਯਾਮਕਾਲਿਕਂ ਸਤ੍ਤਾਹਕਾਲਿਕਂ ਯਾਵਜੀਵਿਕਂ, ਨ ਨੁਖੋ ਕਪ੍ਪਤਿ. ਕਪ੍ਪਤਿਨੁਖੋ ਯਾਮਕਾਲਿਕੇਨ ਸਤ੍ਤਾਹਕਾਲਿਕਂ ਯਾਵਜੀਵਿਕਂ, ਨ ਨੁਖੋ ਕਪ੍ਪਤਿ. ਕਪ੍ਪਤਿ ਨੁਖੋ ਸਤ੍ਤਾਹਕਾਲਿਕੇਨ ਯਾਵਜੀਵਿਕਂ, ਨ ਨੁਖੋ ਕਪ੍ਪਤੀ’’ਤਿ. ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਭੇਸਜ੍ਜਕਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.

ਵਿਸ੍ਸਜ੍ਜਨਾ – ਭੇਸਜ੍ਜਕਂ ਵਿਸ੍ਸਜ੍ਜਿਸ੍ਸਂ ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਤਿਸ੍ਸੋ ਆਪਤ੍ਤਿਯੋ.