ਮਹਾਵਗ੍ਗਪਾਲ਼ਿ
ਸਂਗਾਯਨਸ੍ਸ ਪੁਚ੍ਛਾ ਵਿਸ੍ਸਜ੍ਜਨਾ
ਪੁਚ੍ਛਾ – ਉਭਤੋ ਵਿਭਙ੍ਗਾਨਨ੍ਤਰਂ ਆਵੁਸੋ ਪੋਰਾਣਕੇਹਿ ਸਂਗੀਤਿਕਾਰਮਹਾਥੇਰੇਹਿ ਕਂ ਨਾਮ ਪਾਵਚਨਂ ਸਂਗੀਤਂ.
ਵਿਸ੍ਸਜ੍ਜਨਾ – ਉਭਤੋ ਵਿਭਙ੍ਗਾਨਨ੍ਤਰਂ ਭਨ੍ਤੇ ਪੋਰਾਣਕੇਹਿ ਸਂਗੀਤਿਕਾਰਮਹਾਥੇਰੇਹਿ ਖਨ੍ਧਕਾ ਸਂਗੀਤਾ.
ਪੁਚ੍ਛਾ – ਤੇ ਪਨ ਆਵੁਸੋ ਖਨ੍ਧਕਾ ਵਗ੍ਗਭੇਦੇਨ ਕਤਿਵਿਧਾ.
ਵਿਸ੍ਸਜ੍ਜਨਾ – ਤੇ ਪਨ ਭਨ੍ਤੇ ਖਨ੍ਧਕਾ ਦੁਵਿਧਾ ਵਗ੍ਗਭੇਦੇਨ ਮਹਾਵਗ੍ਗੋ ਚੂਲ਼ਵਗ੍ਗੋਤਿ.
ਪੁਚ੍ਛਾ – ਮਹਾਵਗ੍ਗੇ ਆਵੁਸੋ ਕਤਿ ਖਨ੍ਧਕਾ ਪਰਿਯਾਪਨ੍ਨਾ.
ਵਿਸ੍ਸਜ੍ਜਨਾ – ਮਹਾਵਗ੍ਗੇ ਭਨ੍ਤੇ ਦਸਖਨ੍ਧਕਾ ਪਰਿਯਾਪਨ੍ਨਾ, ਸੇਯ੍ਯਥਿਦਂ, ਮਹਾਖਨ੍ਧਕੋ ਉਪੋਸਥਕ੍ਖਨ੍ਧਕੋ ਵਸ੍ਸੂਪਨਾਯਿਕਕ੍ਖਨ੍ਧਕੋ ਪਵਾਰਣਾਕ੍ਖਨ੍ਧਕੋ ਚਮ੍ਮਕ੍ਖਨ੍ਧਕੋ ਭੇਸਜ੍ਜਕ੍ਖਨ੍ਧਕੋ ਕਥਿਨਕ੍ਖਨ੍ਧਕੋ ਚੀਵਰਕ੍ਖਨ੍ਧਕੋ ਚਮ੍ਪੇਯ੍ਯਕ੍ਖਨ੍ਧਕੋ ਕੋਸਮ੍ਬਕਕ੍ਖਨ੍ਧਕੋਤਿ.
ਪੁਚ੍ਛਾ – ਮਹਾਖਨ੍ਧਕੇ ਆਵੁਸੋ ਬਹੂ ਕਥਾਯੋ, ਕਤਮਾ ਤਾਸਂ ਆਦਿਕਥਾ.
ਵਿਸ੍ਸਜ੍ਜਨਾ – ਮਹਾਖਨ੍ਧਕੇ ਭਨ੍ਤੇ ਬੋਧਿਕਥਾ ਆਦਿ.
ਮਹਾਖਨ੍ਧਕ
ਮਹਾਬੋਧਿਪੁਚ੍ਛਾ
ਪੁਚ੍ਛਾ – ਤਸ੍ਮਾਤਿਹ ਆਵੁਸੋ ਤਤੋ ਪਟ੍ਠਾਯ ਤਂ ਪੁਚ੍ਛਿਸ੍ਸਾਮਿ, ਭਗਵਾ ਆਵੁਸੋ ਪਠਮਾਭਿਸਮ੍ਬੁਦ੍ਧਕਾਲੇ ਕਤ੍ਥ ਕੀਵਚੀਰਂ ਕੇਨਾਕਾਰੇਨ ਵਿਹਾਸਿ.
ਵਿਸ੍ਸਜ੍ਜਨਾ – ਭਗਵਾ ਭਨ੍ਤੇ ਪਠਮਾਭਿਸਮ੍ਬੁਦ੍ਧੋ ਬੋਧਿਰੁਕ੍ਖਮੂਲੇ ਸਤ੍ਤਾਹਂ ਏਕਪਲ੍ਲਙ੍ਕੇਨ ਵਿਹਾਸਿ ਵਿਮੁਤ੍ਤਿਸੁਖਂ ਪਟਿਸਂਵੇਦੀ.
ਪੁਚ੍ਛਾ – ਤਦਾ ਆਵੁਸੋ ਭਗਵਾ ਕੀਦਿਸਂ ਧਮ੍ਮਂ ਮਨਸਿਕਤ੍ਵਾ ਕੀਦਿਸਂ ਉਦਾਨਂ ਉਦਾਨੇਸਿ.
ਵਿਸ੍ਸਜ੍ਜਨਾ – ਤਦਾ ਭਨ੍ਤੇ ਭਗਵਾ ਰਤ੍ਤਿਯਾ ਪਠਮਂ ਯਾਮਂ ਰਤ੍ਤਿਯਾ ਮਜ੍ਝਿਮਂ ਯਾਮਂ ਰਤ੍ਤਿਯਾ ਪਚ੍ਛਿਮਂ ਯਾਮਂ ਪਟਿਚ੍ਚਸਮੁਪ੍ਪਾਦਂ ਅਨੁਲੋਮਂ ਪਟਿਲੋਮਂ ਮਨਸਿਕਤ੍ਵਾ ਤੀਣਿ ਉਦਾਨਾਨਿ ਉਦਾਨੇਸਿ.
ਅਜਪਾਲ
ਪੁਚ੍ਛਾ – ਤਸ੍ਸ ਆਵੁਸੋ ਸਤ੍ਤਾਹਸ੍ਸ ਅਚ੍ਚਯੇਨ ਭਗਵਾ ਕਤ੍ਥ ਵਿਹਾਸਿ.
ਵਿਸ੍ਸਜ੍ਜਨਾ – ਤਸ੍ਸ ਭਨ੍ਤੇ ਸਤ੍ਤਾਹਸ੍ਸ ਅਚ੍ਚਯੇਨ ਭਗਵਾ ਅਜਪਾਲ ਨਿਗ੍ਰੋਧਮੂਲੇ ਵਿਹਾਸਿ, ਸਤ੍ਤਾਹਂ ਏਕਪਲ੍ਲਙ੍ਕੇਨ ਵਿਹਾਸਿ ਵਿਮੁਤ੍ਤਿਸੁਖਂ ਪਟਿਸਂਵੇਦੀ.
ਮੁਚਲਿਨ੍ਦਾ
ਪੁਚ੍ਛਾ – ਤਸ੍ਸਪਿ ਆਵੁਸੋ ਸਤ੍ਤਾਹਸ੍ਸ ਅਚ੍ਚਯੇਨ ਭਗਵਾ ਕਤ੍ਥ ਵਿਹਾਸਿ.
ਵਿਸ੍ਸਜ੍ਜਨਾ – ਤਸ੍ਸ ਭਨ੍ਤੇ ਸਤ੍ਤਾਹਸ੍ਸ ਅਚ੍ਚਯੇਨ ਭਗਵਾ ਮੁਚਲਿਨ੍ਦਮੂਲੇ ਸਤ੍ਤਾਹਂ ਏਕਪਲ੍ਲਙ੍ਕੇਨ ਨਿਸੀਦਿ.
ਪੁਚ੍ਛਾ – ਤਸ੍ਸਪਿ ਆਵੁਸੋ ਸਤ੍ਤਾਹਸ੍ਸ ਅਚ੍ਚਯੇਨ ਭਗਵਾ ਕਤ੍ਥ ਵਿਹਾਸਿ.
ਵਿਸ੍ਸਜ੍ਜਨਾ – ਤਸ੍ਸਪਿ ਭਨ੍ਤੇ ਸਤ੍ਤਾਹਸ੍ਸ ਅਚ੍ਚਯੇਨ ਭਗਵਾ ਰਾਜਾਯਤਨਮੂਲੇ ਸਤ੍ਤਾਹਂ ਏਕਪਲ੍ਲਙ੍ਕੇਨ ਨਿਸੀਦਿ ਵਿਮੁਤ੍ਤਿਸੁਖਂ ਪਟਿਸਂਵੇਦੀ.
ਪੁਚ੍ਛਾ – ਤਸ੍ਸਪਿ ਆਵੁਸੋ ਸਤ੍ਤਾਹਸ੍ਸ ਅਚ੍ਚਯੇਨ ਭਗਵਾ ਕਤ੍ਥ ਵਿਹਾਸਿ.
ਵਿਸ੍ਸਜ੍ਜਨਾ – ਤਸ੍ਸ ਭਨ੍ਤੇ ਸਤ੍ਤਾਹਸ੍ਸ ਅਚ੍ਚਯੇਨ ਭਗਵਾ ਪੁਨਦੇਵ ਅਜਪਾਲਨਿਗ੍ਰੋਧਮੂਲੇ ਵਿਹਾਸਿ.
ਪੁਚ੍ਛਾ – ਤਸ੍ਮਿਂ ਪਨ ਆਵੁਸੋ ਅਜਪਾਲਨਿਗ੍ਰੋਧੇ ਵਿਹਰਨ੍ਤਸ੍ਸ ਭਗਵਤੋ ਕਥਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ.
ਵਿਸ੍ਸਜ੍ਜਨਾ – ਤਸ੍ਮਿਂ ਪਨ ਭਨ੍ਤੇ ਅਜਪਾਲਨਿਗ੍ਰੋਧੇ ਵਿਹਰਨ੍ਤਸ੍ਸ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਧਮ੍ਮਗਮ੍ਭੀਰਤਾਪਟਿਸਂਯੁਤ੍ਤੋ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ.
ਅਧਿਗਤੋ ਖੋ ਮ੍ਯਾਯਂ ਧਮ੍ਮੋ ਗਮ੍ਭੀਰੋ ਦੁਦ੍ਦਸੋ ਅਰਨੁਬੋਧੋ ਸਨ੍ਤੋ ਪਣੀਤੋ ਅਤਕ੍ਕਾਵਚਰਾ ਨਿਪੁਣੋ ਪਣ੍ਡਿਤਵੇਦਨੀਯੋ.
ਆਲਯਰਾਮਾਖੋ ਪਨਾਯਂ ਪਜਾ ਆਲਯਰਤਾ ਆਲਯਸਮ੍ਮੁਦਿਤਾ,
ਸਹਮ੍ਪਤਿ ਬ੍ਰਹ੍ਮਾ
ਪੁਚ੍ਛਾ – ਕਥਂ ਆਵੁਸੋ ਤਦਾ ਧਮ੍ਮਦੇਸਨਾਯ ਬ੍ਰਹ੍ਮਯਾਚਨਾ ਚ ਭਗਵਤੋ ਪਟਿਞ੍ਞਾਚ ਅਹੋਸਿ.
ਵਿਸ੍ਸਜ੍ਜਨਾ – ਦੇਸੇਤੁ ਭਨ੍ਤੇ ਭਗਵਾ ਧਮ੍ਮਂ, ਦੇਸੇਤੁ ਸੁਗਤੋ ਧਮ੍ਮਂ, ਸਨ੍ਤਿ ਸਤ੍ਤਾ ਅਪ੍ਪਰਜਕ੍ਖਜਾਤਿਕਾ ਅਸ੍ਸਵਨਤਾ ਧਮ੍ਮਸ੍ਸ ਪਰਿਹਾਯਨ੍ਤਿ, ਭਵਿਸ੍ਸਨ੍ਤਿ ਧਮ੍ਮਸ੍ਸ ਅਞ੍ਞਾਤਾਰੋਤਿ ਇਤਿ ਭਨ੍ਤੇ ਬ੍ਰਹ੍ਮੁਨੋ ਧਮ੍ਮਦੇਸਨਾਯ ਯਾਚਨਾ ਅਹੋਸਿ,
‘‘ਅਪਾਰੁਤਾ ਤੇਸਂ ਅਮਤਸ੍ਸ ਦ੍ਵਾਰਾ,
ਯੇ ਸੋਤਵਨ੍ਤੋ ਪਮੁਞ੍ਚਨ੍ਤੁ ਸਦ੍ਧਂ;
ਵਿਹਿਂਸਸਞ੍ਞੀ ਪਗੁਣਂ ਨਭਾਸਿਂ,
ਧਮ੍ਮਂ ਪਣੀਤਂ ਮਨੁਜੇਸੁ ਬ੍ਰਹ੍ਮੇ’’ਤਿ.
ਏਵਂ ਖੋ ਭਨ੍ਤੇ ਭਗਵਤੋ ਧਮ੍ਮਦੇਸਨਾਯ ਪਟਿਞ੍ਞਾ ਚ ਅਹੋਸਿ.
ਨਸ੍ਸਤਿ ਵਤ ਲੋਕੋ…
ਦੇਸੇਤੁ ਭਨ੍ਤੇ ਭਗਵਾ ਧਮ੍ਮਂ…
ਅਪਾਰੁਤਾ ਤੇਸਂ ਅਮਤਸ੍ਸ ਦ੍ਵਾਰਾ,
ਯੇ ਸੋਤਵਨ੍ਤੋ ਪਮੁਞ੍ਚਨ੍ਤੁ ਸਦ੍ਧਂ.
ਪੁਚ੍ਛਾ – ਏਵਂ ਖੋ ਆਵੁਸੋ ਭਗਵਾ ਧਮ੍ਮਦੇਸਨਾਯ ਪਟਿਞ੍ਞਂ ਕਤ੍ਵਾ ਪਠਮਂ ਧਮ੍ਮਂ ਦੇਸੇਨ੍ਤੋ ਕਤ੍ਥ ਕੀਦਿਸਂ ਧਮ੍ਮਂ ਕਸ੍ਸ ਦੇਸੇਸਿ.
ਵਿਸ੍ਸਜ੍ਜਨਾ – ਬਾਰਾਣਸਿਯਂ ਭਨ੍ਤੇ ਇਸਿਪਤਨੇ ਮਿਗਦਾਯੇ ਪਞ੍ਚਵਗ੍ਗਿਯ ਭਿਕ੍ਖੁਪਮੁਖਾਨਂ ਬ੍ਰਹ੍ਮਗਣਾਨਂ ਧਮ੍ਮਚਕ੍ਕਪਵਤ੍ਤਨਸੁਤ੍ਤਂ ਦੇਸੇਸਿ.
ਪੁਚ੍ਛਾ – ਤਸ੍ਮਿਂ ਖੋ ਪਨ ਆਵੁਸੋ ਧਮ੍ਮਚਕ੍ਕਪਵਤ੍ਤਨਸੁਤ੍ਤੇ ਦੇਸਿਯਮਾਨੇ ਮਨੁਸ੍ਸਲੋਕੇ ਕਸ੍ਸ ਧਮ੍ਮਾਭਿਸਮਯੋ ਅਹੋਸਿ.
ਵਿਸ੍ਸਜ੍ਜਨਾ – ਆਯਸ੍ਮਤੋ ਭਨ੍ਤੇ ਕੋਣ੍ਡਞ੍ਞਸ੍ਸ ਧਮ੍ਮਾਭਿਸਮਯੋ ਅਹੋਸਿ.
ਪੁਚ੍ਛਾ – ਕਥਂ ਨੁ ਖੋ ਆਵੁਸੋ ਇਮਸ੍ਮਿਂ ਬੁਦ੍ਧਸਾਸਨੇ ਪਠਮਂ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਅਹੋਸਿ.
ਵਿਸ੍ਸਜ੍ਜਨਾ – ਇਮਸ੍ਮਿਂ ਭਨ੍ਤੇ ਬੁਦ੍ਧਸਾਸਨੇ ਪਠਮਂ ਏਹਿਭਿਕ੍ਖੁਪਸਮ੍ਪਦਾ ਅਹੋਸਿ.
ਲਭੇਯ੍ਯਾਹਂ ਭਨ੍ਤੇ ਭਗਵਤੋ ਸਨ੍ਤਿਕੇ ਪਬ੍ਬਜਂ, ਲਭੇਯ੍ਯਂ ਉਪਸਮ੍ਪਦਂ.
ਏਹਿ ਭਿਕ੍ਖੁ ਸ੍ਵਾਖਾਤੋ ਧਮ੍ਮੋ, ਚਰ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯ.
ਪੁਚ੍ਛਾ – ਇਤਰੇਸਂ ਪਨ ਆਵੁਸੋ ਚਤੁਨ੍ਨਂ ਪਞ੍ਚਵਗ੍ਗਿਯਾਨਂ ਕਦਾ ਧਮ੍ਮਾਭਿਸਮਯੋ ਅਹੋਸਿ.
ਵਿਸ੍ਸਜ੍ਜਨਾ – ਪਾਟਿਪਦੇ ਭਨ੍ਤੇ ਦਿਵਸੇ ਆਯਸ੍ਮਤੋ ਵਪ੍ਪਸ੍ਸ, ਦੁਤਿਯੇ ਭਨ੍ਤੇ ਦਿਵਸੇ ਆਯਸ੍ਮਤੋ ਭਦ੍ਦਿਯਸ੍ਸ, ਤਤਿਯੇ ਭਨ੍ਤੇ ਦਿਵਸੇ ਆਯਸ੍ਮਤੋ ਮਹਾਨਾਮਸ੍ਸ, ਚਤੁਤ੍ਥੇ ਭਨ੍ਤੇ ਦਿਵਸੇ ਆਯਸ੍ਮਤੋ ਅਸ੍ਸਜਿਸ੍ਸ ਧਮ੍ਮਾਭਿਸਮਯੋ ਅਹੋਸਿ.
ਪੁਚ੍ਛਾ – ਸਬ੍ਬੇਸਮ੍ਪਿ ਆਵੁਸੋ ਤੇਸਂ ਪਞ੍ਚਵਗ੍ਗਿਯਾਨਂ ਭਿਕ੍ਖੂਨਂ ਕਦਾ ਅਰਹਤ੍ਤਪਤ੍ਤਿ ਹੋਤਿ.
ਵਿਸ੍ਸਜ੍ਜਨਾ – ਸਬ੍ਬੇਸਮ੍ਪਿ ਭਨ੍ਤੇ ਤੇਸਂ ਪਞ੍ਚਵਗ੍ਗਿਯਾਨਂ ਭਿਕ੍ਖੂਨਂ ਪਕ੍ਖਸ੍ਸ ਪਞ੍ਚਮਿਯਂ ਅਨਤ੍ਤਲਕ੍ਖਣਸੁਤ੍ਤੇ ਦੇਸਿਯਮਾਨੇ ਅਰਹਤ੍ਤਪਤ੍ਤਿ ਹੋਤਿ.
ਪੁਚ੍ਛਾ – ਕਦਾ ਆਵੁਸੋ ਭਗਵਤਾ ਭਿਕ੍ਖੂ ਤਤ੍ਥ ਤਤ੍ਥ ਚਾਰਿਕਂ ਚਰਿਤ੍ਵਾ ਧਮ੍ਮਦੇਸਨਤ੍ਥਾਯ ਪੇਸਿਤਾ.
ਵਿਸ੍ਸਜ੍ਜਨਾ – ਯਸਪ੍ਪਮੁਖਾਨਂ ਭਨ੍ਤੇ ਚਤੁਪਞ੍ਞਾਸ ਸਹਾਯਕਾਨਂ ਪਬ੍ਬਜਿਤਕਾਲੇ ਭਗਵਤਾ ਭਿਕ੍ਖੂ ਤਤ੍ਥ ਤਤ੍ਥ ਚਾਰਿਕਂ ਚਰਿਤ੍ਵਾ ਧਮ੍ਮਦੇਸਨਤ੍ਥਾਯ ਪੇਸਿਤਾ.
ਸਰਣਗਮਨ
ਪੁਚ੍ਛਾ – ਕਦਾ ਆਵੁਸੋ ਭਗਵਤਾ ਤੀਹਿ ਸਰਣਗਮਨੇਹਿ ਪਬ੍ਬਜ੍ਜੂਪ ਸਮ੍ਪਦਾ ਅਨੁਞ੍ਞਾਤੋ ਅਹੋਸਿ.
ਵਿਸ੍ਸਜ੍ਜਨਾ – ਯਸਪ੍ਪਮੁਖਾਨਂ ਭਨ੍ਤੇ ਚਤੁਪਞ੍ਞਾਸਾਯ ਗਿਹਿ ਸਹਾਯਕਾਨਂ ਪਬ੍ਬਜਿਤ੍ਵਾ ਤਤ੍ਥ ਤਤ੍ਥ ਚਾਰਿਕਂ ਚਰਿਤ੍ਵਾ ਧਮ੍ਮਦੇਸਨਤ੍ਥਾਯ ਪੇਸਿਤਕਾਲੇ ਭਗਵਤਾ ਤੀਹਿ ਸਰਣਗਮਨੇਹਿ ਪਬ੍ਬਜ੍ਜਾ ਚ ਉਪਸਮ੍ਪਦਾ ਚ ਅਨੁਞ੍ਞਾਤਾ.
ਅਨੁਜਾਨਾਮਿ ਭਿਕ੍ਖਵੇ ਤੁਮ੍ਹੇਵ ਦਾਨਿ ਤਾਸੁ ਤਾਸੁ ਦਿਸਾਸੁ ਤੇਸੁ ਤੇਸੁ ਜਨਪਦੇਸੁ ਪਬ੍ਬਾਜੇਥ ਉਪਸਮ੍ਪਾਦੇਥ.
ਪੁਚ੍ਛਾ – ਭਗਵਤਾ ਆਵੁਸੋ ਭਿਕ੍ਖੂਨਂ ਆਰਾਮੋ ਪਟਿਗ੍ਗਣ੍ਹਿਤੁਂ ਕਤ੍ਥ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤੋ.
ਵਿਸ੍ਸਜ੍ਜਨਾ – ਭਗਵਤਾ ਭਨ੍ਤੇ ਭਿਕ੍ਖੂਨਂ ਆਰਾਮਂ ਪਟਿਗ੍ਗਣ੍ਹਿਤੁਂ ਰਾਜਗਹੇ ਅਨੁਞ੍ਞਾਤੋ, ਰਾਜਾ ਭਨ੍ਤੇ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਵੇਲ਼ੁਵਨਂ ਉਯ੍ਯਾਨਂ ਅਦਾਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤੋ.
ਏਤਾਹਂ ਭਨ੍ਤੇ ਵੇਲ਼ੁਵਨਂ ਉਯ੍ਯਾਨਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਮ੍ਮਿ –
ਅਨੁਜਾਨਾਮਿ ਭਿਕ੍ਖਵੇ ਆਰਾਮਂ.
ਪੁਚ੍ਛਾ – ਕਥਞ੍ਚ ਆਵੁਸੋ ਦ੍ਵਿਨ੍ਨਂ ਅਗ੍ਗਸਾਵਕਾਨਂ ਪਬ੍ਬਜ੍ਜੂਪਸਮ੍ਪਦਾ ਅਹੋਸਿ.
ਵਿਸ੍ਸਜ੍ਜਨਾ – ਦ੍ਵਿਨ੍ਨਂ ਭਨ੍ਤੇ ਅਗ੍ਗਸਾਵਕਾਨਂ ਏਹਿ ਭਿਕ੍ਖੁਪਸਮ੍ਪਦਾ ਅਹੋਸਿ.
ਵਿਪ੍ਪਸਨ੍ਨਾਨਿ ਖੋ ਤੇ ਆਵੁਸੋ ਇਨ੍ਦ੍ਰਿਯਾਨਿ.
ਕਂਸਿ ਤ੍ਵਂ ਆਵੁਸੋ ਉਦ੍ਦਿਸ੍ਸ ਪਬ੍ਬਜਿਤੋ.
ਕੋ ਵਾ ਤੇ ਸਤ੍ਥਾ.
ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸਿ.
ਅਤ੍ਥਾਵੁਸੋ ਮਹਾਸਮਣੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ.
ਕਿਂ ਵਾਦੀ ਪਨਾਯਸ੍ਮਤੋ ਸਤ੍ਥਾ ਕਿਮਕ੍ਖਾਯੀ.
ਯੇ ਧਮ੍ਮਾ ਹੇਤੁਪ੍ਪਭਵਾ, ਤੇਸਂ ਹੇਤੁਂ ਤਥਾਗਤੋ;
ਆਹ ਤੇਸਞ੍ਚ ਯੋ ਨਿਰੋਧੋ, ਏਵਂ ਵਾਦੀ ਮਹਾਸਮਣੋ.
ਅਲਂ ਆਵੁਸੋ ਮਾ ਅਗਮਿਤ੍ਥ.
ਏਤੇ ਭਿਕ੍ਖਵੇ ਦ੍ਵੇ ਸਹਾਯਕਾ ਆਗਚ੍ਛਨ੍ਤਿ ਕੋਲਿਤੋ ਉਪਤਿਸ੍ਸੋ ਚ ਏਤਂ ਮੇ ਸਾਵਕਯੁਗਂ ਭਵਿਸ੍ਸਤਿ ਅਗ੍ਗਂ ਭਦ੍ਦਯੁਗਂ.
ਲਭੇਯ੍ਯਾਮ ਮਯਂ ਭਨ੍ਤੇ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ ਲਭੇਯ੍ਯਾਮ ਉਪਸਮ੍ਪਦਂ.
ਏਥ ਭਿਕ੍ਖਵੋ ਸ੍ਵਾਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯ.
ਪੁਚ੍ਛਾ – ਉਪਜ੍ਝਾਯੋ ਆਵੁਸੋ ਗਣ੍ਹਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤੋ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤੋ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤੋ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਅਨੁਪਜ੍ਝਾਯਕਾ ਅਨਾਚਰਿਯਕਾ ਅਨੋਵਦਿਯਮਾਨਾ ਅਨਨੁਸਾਸਿਯਮਾਨਾ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨੋਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤੋ.
ਪੁਚ੍ਛਾ – ਉਪਜ੍ਝਾਯਮ੍ਹਿ ਆਵੁਸੋ ਨ ਸਮ੍ਮਾਵਤ੍ਤਨ੍ਤਸ੍ਸ ਦੁਕ੍ਕਟਂ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਸਦ੍ਧਿਵਿਹਾਰਿਕੇ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਸਦ੍ਧਿਵਿਹਾਰਿਕਾ ਉਪਜ੍ਝਾਯਮ੍ਹਿ ਨ ਸਮ੍ਮਾਵਤ੍ਤਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਕਦਾ ਆਵੁਸੋ ਭਗਵਤਾ ਤੀਹਿ ਸਰਣਗਮਨੇਹਿ ਉਪਸਮ੍ਪਦਂ ਪਟਿਕ੍ਖਿਪਿਤ੍ਵਾ ਞਾਤਿਚਤੁਤ੍ਥੇਨ ਕਮ੍ਮੇਨ ਉਪਸਮ੍ਪਦਾ ਅਨੁਞ੍ਞਾਤਾ.
ਵਿਸ੍ਸਜ੍ਜਨਾ – ਰਾਧਬ੍ਰਾਹ੍ਮਣਸ੍ਸ ਭਨ੍ਤੇ ਪਬ੍ਬਜਿਤਕਾਲੇ ਭਗਵਤਾ ਤੀਹਿ ਸਰਣਗਮਨੇਹਿ ਉਪਸਮ੍ਪਦਂ ਪਟਿਕ੍ਖਿਪਿਤ੍ਵਾ ਞਾਤ੍ਤਿਚਤੁਤ੍ਥੇਨ ਕਮ੍ਮੇਨ ਉਪਸਮ੍ਪਦਾ ਅਨੁਞ੍ਞਾਤਾ.
ਕੋਨੁ ਖੋ ਭਿਕ੍ਖਵੇ ਤਸ੍ਸ ਬ੍ਰਾਹ੍ਮਣਸ੍ਸ ਅਧਿਕਾਰਂ ਸਰਤਿ.
ਅਹਂ ਖੋ ਭਨ੍ਤੇ ਤਸ੍ਸ ਬ੍ਰਾਹ੍ਮਣਸ੍ਸ ਅਧਿਕਾਰਂ ਸਰਾਮਿ.
ਸਾਧੁ ਸਾਧੁ ਸਾਰਿਪੁਤ੍ਤ, ਕਤਞ੍ਞੁਨੋ ਹਿ ਸਾਰਿਪੁਤ੍ਤ ਸਪ੍ਪੁਰਿਸਾ ਕਤਵੇਦਿਨੋ.
ਕਥਾਹਂ ਭਨ੍ਤੇ ਤਂ ਬ੍ਰਾਹ੍ਮਣਂ ਉਪਸਮ੍ਪਾਦੇਮਿ.
ਯਾਸਾ ਭਿਕ੍ਖਵੇ ਮਯਾ ਤੀਹਿ ਸਰਣਗਮਨੇਹਿ ਉਪਸਮ੍ਪਦਾਅਨੁਞ੍ਞਾਤਾ, ਤਂ ਅਜ੍ਜਤਗ੍ਗੇ ਪਟਿਕ੍ਖਿਪਾਮਿ.
ਅਨੁਜਾਨਾਮਿ ਭਿਕ੍ਖਵੇ ਞਾਤ੍ਤਿਚਤੁਤ੍ਥੇਨ ਕਮ੍ਮੇਨ ਉਪਸਮ੍ਪਾਦੇਤੁਂ.
ਪੁਚ੍ਛਾ – ਅਯਾਚਿਤਕਂ ਆਵੁਸੋ ਉਪਸਮ੍ਪਦਾਪੇਕ੍ਖਂ ਉਪਸਮ੍ਪਾਦੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਪਞ੍ਞਤ੍ਤਂ, ਅਞ੍ਞਤਰੋ ਭਨ੍ਤੇ ਭਿਕ੍ਖੁ ਉਪਸਮ੍ਪਨ੍ਨਸਮਨਨ੍ਤਰਂ ਅਨਾਚਾਰਂ ਅਚਰਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਚਤੁਨ੍ਨਂ ਆਵੁਸੋ ਨਿਸ੍ਸਯਾਨਂ ਆਚਿਕ੍ਖਣਾ ਭਗਵਤਾ ਕਤ੍ਥ ਅਨੁਞ੍ਞਾਤਾ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਾ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਅਨੁਞ੍ਞਾਤਾ, ਅਞ੍ਞਤਰੋ ਭਨ੍ਤੇ ਭਿਕ੍ਖੁ ਉਦਰਸ੍ਸ ਕਾਰਣਾ ਪਬ੍ਬਜਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਾ.
ਏਹਿ ਦਾਨਿ ਆਵੁਸੋ ਪਿਣ੍ਡਾਯ ਚਰਿਸ੍ਸਾਮ.
ਕਥਞ੍ਹਿ ਨਾਮ ਭਿਕ੍ਖੁ ਏਵਂ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਉਦਰਸ੍ਸ ਕਾਰਣਾ ਪਬ੍ਬਜਿਸ੍ਸਤਿ.
ਪੁਚ੍ਛਾ – ਊਨਦਸਵਸ੍ਸੇਨ ਆਵੁਸੋ ਉਪਸਮ੍ਪਾਦੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਆਯਸ੍ਮਨ੍ਤਂ ਉਪਸੇਨਂ ਵਙ੍ਗਨ੍ਤਪੁਤ੍ਤਂ ਆਰਬ੍ਭ ਪਞ੍ਞਤ੍ਤਂ, ਆਯਸ੍ਮਾ ਭਨ੍ਤੇ ਉਪਸੇਨੋ ਵਙ੍ਗਨ੍ਤਪੁਤ੍ਤੋ ਏਕਵਸ੍ਸੋ ਸਦ੍ਧਿਵਿਹਾਰਿਕਂ ਉਪਸਮ੍ਪਾਦੇਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਬਾਲੇਨ ਆਵੁਸੋ ਅਬ੍ਯਤ੍ਤੇਨ ਉਪਸਮ੍ਪਾਦੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ‘‘ਦਸਵਸ੍ਸਮ੍ਹਾ ਦਸਵਸ੍ਸਮ੍ਹਾ’’ਤਿ ਬਾਲਾ ਅਬ੍ਯਤ੍ਤਾ ਉਪਸਮ੍ਪਾਦੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਆਚਰਿਯੋ ਆਵੁਸੋ ਗਣ੍ਹਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤੋ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤੋ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤੋ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਉਪਜ੍ਝਾਯੇਸੁ ਪਕ੍ਕਨ੍ਤੇਸੁਪਿ ਵਿਬ੍ਭਨ੍ਤੇਸੁਪਿ ਕਾਲਙ੍ਕਤੇਸੁਪਿ ਪਕ੍ਖਸਙ੍ਕਨ੍ਤੇਸੁਪਿ ਅਨਾਚਰਿਯਕਾ ਅਨੋਵਦਿਯਮਾਨਾ ਅਨਨੁਸਾਸਿਯਮਾਨਾ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤੋ.
ਪੁਚ੍ਛਾ – ਪਞ੍ਚਹਿ ਆਵੁਸੋ ਆਬਾਧੇਹਿ ਫੁਟ੍ਠਂ ਪਬ੍ਬਾਜੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਪਞ੍ਚਹਿ ਆਬਾਧੇਹਿ ਫੁਟ੍ਠਂ ਪਬ੍ਬਾਜੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਸਾਧੁ ਭਨ੍ਤੇ ਅਯ੍ਯਾ ਪਞ੍ਚਹਿ ਆਬਾਧੇਹਿ ਫੁਟ੍ਠਂ ਨ ਪਬ੍ਬਾਜੇਯ੍ਯੁਂ…
ਪੁਚ੍ਛਾ – ਰਾਜਭਟਂ ਆਵੁਸੋ ਪਬ੍ਬਾਜੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਰਾਜਭਟੇ ਪਬ੍ਬਾਜੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਧਜਬਨ੍ਧਂ ਆਵੁਸੋ ਚੋਰਂ ਪਬ੍ਬਾਜੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇਯੇਵ ਭਨ੍ਤੇ ਅਙ੍ਗੁਲਿਮਾਲਂ ਚੋਰਂ ਆਰਬ੍ਭ ਪਞ੍ਞਤ੍ਤਂ, ਅਙ੍ਗੁਲਿਮਾਲੋ ਭਨ੍ਤੇ ਚੋਰੋ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਕਾਰਭੇਦਕਂ ਆਵੁਸੋ ਚੋਰਂ ਪਬ੍ਬਾਜੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਕਾਰਭੇਦਕਚੋਰਂ ਪਬ੍ਬਾਜੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਇਣਾਯਿਕਂ ਆਵੁਸੋ ਪਬ੍ਬਾਜੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਇਣਾਯਿਕਂ ਪਬ੍ਬਾਜੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਦਾਸਂ ਆਵੁਸੋ ਪਬ੍ਬਜੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਰਾਜਗਹੇਯੇਵ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਦਾਸਂ ਪਬ੍ਬਾਜੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਭਣ੍ਡੁਕਮ੍ਮਾਯ ਆਵੁਸੋ ਅਪਲੋਕਨਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਰਾਜਗਹੇਯੇਵ ਭਨ੍ਤੇ ਅਞ੍ਞਤਰਂ ਕਮ੍ਮਾਰਭਣ੍ਡੁਪੁਤ੍ਤਂ ਆਰਬ੍ਭ ਅਨੁਞ੍ਞਾਤਂ ਅਞ੍ਞਤਰੋ ਭਨ੍ਤੇ ਕਮ੍ਮਾਰਭਣ੍ਡੁਪੁਤ੍ਤੋ ਮਾਤਾਪਿਤੂਹਿ ਸਦ੍ਧਿਂ ਭਣ੍ਡਿਤ੍ਵਾ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਪੁਚ੍ਛਾ – ਊਨਵੀਸਤਿਵਸ੍ਸਸ੍ਸ ਆਵੁਸੋ ਪੁਗ੍ਗਲਸ੍ਸ ਉਪਸਮ੍ਪਦਾ ਭਗਵਤਾ ਕਤ੍ਥ ਪਟਿਕ੍ਖਿਤ੍ਤਾ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਟਿਕ੍ਖਿਤ੍ਤਾ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਟਿਕ੍ਖਿਤ੍ਤਾ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਊਨਵੀਸਤਿਵਸ੍ਸਂ ਪੁਗ੍ਗਲਂ ਉਪਸਮ੍ਪਾਦੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਟਿਕ੍ਖਿਤ੍ਤਾ.
ਨ ਭਿਕ੍ਖਵੇ ਜਾਨਂ ਊਨਵੀਸਤਿਵਸ੍ਸੋ ਪੁਗ੍ਗਲੋ ਉਪਸਮ੍ਪਾਦੇਤਬ੍ਬੋ, ਯੋਉਪਸਮ੍ਪਾਦੇਯ੍ਯ, ਯਥਾਧਮ੍ਮੋ ਕਾਰੇਤਬ੍ਬੋ.
ਪੁਚ੍ਛਾ – ਮਾਤਾਪਿਤੂਹਿ ਆਵੁਸੋ ਅਨਨੁਞ੍ਞਾਤਂ ਪੁਤ੍ਤਂ ਪਬ੍ਬਾਜੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਸਕ੍ਕੇਸੁ ਭਨ੍ਤੇ ਪਞ੍ਞਤ੍ਤਂ, ਰਾਜਾ ਭਨ੍ਤੇ ਸੁਦ੍ਧੋਦਨੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਰਂ ਯਾਚਿ, ਸਾਧੁ ਭਨ੍ਤੇ ਅਯ੍ਯਾਅਨਨੁਞ੍ਞਾਤਂ ਮਾਤਾਪਿਤੂਹਿ ਪੁਤ੍ਤਂ ਪਬ੍ਬਾਜੇਯ੍ਯੁਨ੍ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਨ ਭਿਕ੍ਖਵੇ ਅਨਨੁਞ੍ਞਾਤੋ ਮਾਤਾਪਿਤੂਹਿ ਪੁਤ੍ਤੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿਦੁਕ੍ਕਟਸ੍ਸ.
ਪੁਚ੍ਛਾ – ਥੇਯ੍ਯਸਂਵਾਸਕਸ੍ਸ ਆਵੁਸੋ ਉਪਸਮ੍ਪਦਾ ਭਗਵਤਾ ਕਤ੍ਥ ਪਟਿਕ੍ਖਿਤ੍ਤਾ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਟਿਕ੍ਖਿਤ੍ਤਾ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਪੁਰਾਣਕੁਲਪੁਤ੍ਤਂ ਆਰਬ੍ਭ ਪਟਿਕ੍ਖਿਤ੍ਤਾ, ਅਞ੍ਞਤਰੋ ਭਨ੍ਤੇ ਪੁਰਾਣਕੁਲਪੁਤ੍ਤੋ ਖੀਣ ਕੋਲਞ੍ਞੋ ਸਾਮਂ ਪਤ੍ਤਚੀਵਰਂ ਪਟਿਯਾਦੇਤ੍ਵਾ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂਹਿ ਸਦ੍ਧਿਂ ਸਂਵਸਿ, ਭਨ੍ਤੇ ਵਤ੍ਥੁਸ੍ਮਿਂ ਪਟਿਕ੍ਖਿਤ੍ਤਾ.
ਪੁਚ੍ਛਾ – ਤਿਰਚ੍ਛਾਨਗਤਸ੍ਸ ਆਵੁਸੋ ਉਪਸਮ੍ਪਦਾ ਭਗਵਤਾ ਕਤ੍ਥ ਪਟਿਕ੍ਖਿਤ੍ਤਾ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਟਿਕ੍ਖਿਤ੍ਤਾ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਨਾਗਂ ਆਰਬ੍ਭ ਪਟਿਕ੍ਖਿਤ੍ਤਾ, ਅਞ੍ਞਤਰੋ ਭਨ੍ਤੇ ਨਾਗੋ ਮਾਣਵਕਵਣ੍ਣੇਨ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ, ਤਂ ਭਿਕ੍ਖੂ ਪਬ੍ਬਾਜੇਸੁਂ ਉਪਸਮ੍ਪਾਦੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਟਿਕ੍ਖਿਤ੍ਤਾ.
ਪੁਚ੍ਛਾ – ਮਾਤੁਘਾਤਕਸ੍ਸ ਚ ਆਵੁਸੋ ਪਿਤੁਘਾਤਕਸ੍ਸ ਚ ਉਪਸਮ੍ਪਦਾ ਭਗਵਤਾ ਕਤ੍ਥ ਪਟਿਕ੍ਖਿਤ੍ਤਾ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਟਿਕ੍ਖਿਤ੍ਤਾ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂਯੇਵ ਭਨ੍ਤੇ ਅਞ੍ਞਤਰਂ ਮਾਣਵਕਂ ਆਰਬ੍ਭ ਪਟਿਕ੍ਖਿਤ੍ਤਾ, ਅਞ੍ਞਤਰੋ ਚ ਭਨ੍ਤੇ ਮਾਣਵਕੋ ਅਞ੍ਞਤਰੋ ਚ ਮਾਣਵਕੋ ਮਾਤਰਂ ਜੀਵਿਤਾ ਵੋਰੋਪੇਸਿ ਪਿਤਰਂ ਜੀਵਿਤਾ ਵੋਰੋਪੇਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਟਿਕ੍ਖਿਤ੍ਤਾ.
ਮਾਤੁਘਾਤਕੋ ਭਿਕ੍ਖਵੇ ਅਨੁਪਸਮ੍ਪਨ੍ਨੋ ਨਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ, ਪਿਤੁਘਾਤਕੋ ਭਿਕ੍ਖਵੇ ਅਨੁਪਸਮ੍ਪਨ੍ਨੋ ਨਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ.
ਪੁਚ੍ਛਾ – ਅਪਤ੍ਤਚੀਵਰਕਂ ਵਾ ਆਵੁਸੋ ਯਾਚਿਤਪਤ੍ਤਚੀਵਰਕਂ ਵਾ ਉਪਸਮ੍ਪਾਦੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਅਪਤ੍ਤਚੀਵਰਕਂ ਉਪਸਮ੍ਪਾਦੇਸੁਂ, ਯਾਚਿਤਕੇਨ ਪਤ੍ਤਚੀਵਰੇਨ ਉਪਸਮ੍ਪਾਦੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.
ਪੁਚ੍ਛਾ – ਉਪਸਮ੍ਪਦਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਉਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.
ਵਿਸ੍ਸਜ੍ਜਨਾ – ਉਪਸਮ੍ਪਦਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਦ੍ਵੇ ਆਪਤ੍ਤਿਯੋ.
੨. ਉਪੋਸਥਕ੍ਖਨ੍ਧਕ
ਪੁਚ੍ਛਾ – ਚਾਤੁਦ੍ਦਸੇ ਚ ਆਵੁਸੋ ਪਨ੍ਨਰਸੇ ਚ ਪਕ੍ਖਸ੍ਸ ਚ ਅਟ੍ਠਮਿਯਾ ਸਨ੍ਨਿਪਤਿਤ੍ਵਾ ਧਮ੍ਮਂ ਭਾਸਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਾ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਚਾਤੁਦ੍ਦੇਸ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤਿਤ੍ਵਾ ਤੁਣ੍ਹੀ ਨਿਸੀਦਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਾ.
ਅਨੁਜਾਨਾਮਿ ਭਿਕ੍ਖਵੇ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਸਨ੍ਨਿਪਤਿਤੁਂ.
ਨਨੁ ਨਾਮ ਸਨ੍ਨਿਪਤਿਤੇਹਿ ਧਮ੍ਮੋ ਭਾਸਿਤਬ੍ਬੋ.
ਪੁਚ੍ਛਾ – ਕਦਾ ਆਵੁਸੋ ਭਿਕ੍ਖੂਨਂ ਪਾਤਿਮੋਕ੍ਖੁਦ੍ਦੇਸੋ ਭਗਵਤਾ ਅਨੁਞ੍ਞਾਤੋ.
ਵਿਸ੍ਸਜ੍ਜਨਾ – ਯਦਾ ਭਨ੍ਤੇ ਭਗਵਤੋ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ ‘‘ਯਂਨੂਨਾਹਂ ਯਾਨਿ ਮਯਾ ਭਿਕ੍ਖੂਨਂ ਪਞ੍ਞਤ੍ਤਾਨਿ ਸਿਕ੍ਖਾਪਦਾਨਿ, ਤਾਨਿ ਨੇਸਂ ਪਾਤਿਮੋਕ੍ਖੁਦ੍ਦੇਸਂ ਅਨੁਜਾਨੇਯ੍ਯਂ, ਸੋ ਨੇਸਂ ਭਵਿਸ੍ਸਤਿ ਉਪੋਸਥਕਮ੍ਮ’’ਨ੍ਤਿ ਤਦਾ ਭਨ੍ਤੇ ਭਗਵਤਾ ਭਿਕ੍ਖੂਨਂ ਪਾਤਿਮੋਕ੍ਖੁਦ੍ਦੇਸੋ ਅਨੁਞ੍ਞਾਤੋ.
ਪੁਚ੍ਛਾ – ਸੀਮਂ ਆਵੁਸੋ ਸਮ੍ਮਨਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਿਸ੍ਮਿਞ੍ਚ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਅਨੁਞ੍ਞਾਤਂ, ਰਾਜਗਹੇ ਭਨ੍ਤੇ ਭਗਵਤਿ ਵਿਹਰਤਿ ਭਿਕ੍ਖੂਨਂ ਏਤਦਹੋਸਿ ‘‘ਭਗਵਤਾ ਪਞ੍ਞਤ੍ਤਂ ਏਤ੍ਤਾਵਤਾ ਸਾਮਗ੍ਗੀ, ਯਾਵਤਾ ਏਕਾਵਾਸੋਤਿ ਕਿਤ੍ਤਾਵਤਾਨੁਖੋ ਏਕਾਵਾਸੋ ਹੋਤੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.
ਪੁਚ੍ਛਾ – ਕਤਿ ਆਵੁਸੋ ਉਪੋਸਥਾ ਦਿਵਸਵਸੇਨ ਚ ਕਾਰਕਪੁਗ੍ਗਲਵਸੇਨ ਚ ਕਾਤਬ੍ਬਾਕਾਰਵਸੇਨ ਚ.
ਵਿਸ੍ਸਜ੍ਜਨਾ – ਦਿਵਸਵਸੇਨ ਭਨ੍ਤੇ ਤਯੋ ਉਪੋਸਥਾ, ਪੁਗ੍ਗਲਵਸੇਨ ਚ ਭਨ੍ਤੇ ਤਯੋ ਉਪੋਸਥਾ, ਕਾਤਬ੍ਬਾਕਾਰਵਸੇਨ ਚ ਭਨ੍ਤੇ ਤਯੋ ਉਪੋਸਥਾ.
ਪੁਚ੍ਛਾ – ਕਤਿ ਆਵੁਸੋ ਉਪੋਸਥਕਮ੍ਮਾਨਿ ਤੇਸੁ ਚ ਕੀਦਿਸਂ ਉਪੋਸਥਕਮ੍ਮਂ ਭਗਵਤਾ ਅਨੁਞ੍ਞਾਤਂ, ਕੀਦਿਸਂ ਅਨਨੁਞ੍ਞਾਤਂ.
ਵਿਸ੍ਸਜ੍ਜਨਾ – ਚਤ੍ਤਾਰਿਮਾਨਿ ਭਨ੍ਤੇ ਉਪੋਸਥਕਮ੍ਮਾਨਿ, ਅਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ, ਅਧਮ੍ਮੇਨ ਸਮਗ੍ਗਂ ਉਪੋਸਥਕਮ੍ਮਂ, ਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ, ਧਮ੍ਮੇਨ ਸਮਗ੍ਗਂ ਉਪੋਸਥਕਮ੍ਮਂ. ਤਤ੍ਰ ਭਨ੍ਤੇ ਯਦਿਦਂ ਅਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ, ਅਧਮ੍ਮੇਨ ਸਮਗ੍ਗਂ ਉਪੋਸਥਕਮ੍ਮਂ ਧਮ੍ਮੇਨ ਵਗ੍ਗਂ ਉਪੋਸਥਕਮ੍ਮਂ, ਏਵਰੂਪਂ ਭਨ੍ਤੇ ਉਪੋਸਥਕਮ੍ਮਂ ਅਨਨੁਞ੍ਞਾਤਂ, ਤਤ੍ਰ ਭਨ੍ਤੇ ਯਦਿਦਂ ਧਮ੍ਮੇਨ ਸਮਗ੍ਗਂ ਉਪੋਸਥਕਮ੍ਮਂ, ਏਵਰੂਪਂ ਭਨ੍ਤੇ ਉਪੋਸਥਕਮ੍ਮਂ ਅਨੁਞ੍ਞਾਤਂ.
ਪੁਚ੍ਛਾ – ਉਪੋਸਥਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.
ਵਿਸ੍ਸਜ੍ਜਨਾ – ਉਪੋਸਥਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਤਿਸ੍ਸੋ ਆਪਤ੍ਤਿਯੋ.