੧੦. ਕੋਸਮ੍ਬਕਕ੍ਖਨ੍ਧਕ

ਪੁਚ੍ਛਾ – ਭੇਦਗਰੁਕੇਹਿ ਭਿਕ੍ਖਵੇ ਭਿਕ੍ਖੂਹਿ ਨ ਸੋ ਭਿਕ੍ਖੁ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਤਬ੍ਬੋਤਿ ਚ, ਭੇਦਗਰੁਕੇਨ ਭਿਕ੍ਖਵੇ ਭਿਕ੍ਖੁਨਾ ਪਰੇਸਮ੍ਪਿ ਸਦ੍ਧਾਯ ਆਪਤ੍ਤਿਦੇਸੇਤਬ੍ਬਾਤਿ ਚ ਆਵੁਸੋ ਅਯਂ ਸਾਮਗ੍ਗਿਰਸਓਵਾਦੋ ਭਗਵਤਾ ਕਤ੍ਥ ਦਿਨ੍ਨੋ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਦਿਨ੍ਨੋ.

ਵਿਸ੍ਸਜ੍ਜਨਾ – ਕੋਸਮ੍ਬਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਦਿਨ੍ਨੋ, ਭਗਵਤਿ ਭਨ੍ਤੇ ਕੋਸਮ੍ਬਿਯਂ ਵਿਹਰਤਿ ਅਞ੍ਞਤਰੋ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਅਹੋਸਿ, ਸੋ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿ ਦਿਟ੍ਠਿ ਅਹੋਸਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿ ਦਿਟ੍ਠਿਨੋ ਅਹੇਸੁਂ. ਸੋ ਅਪਰੇਨ ਸਮਯੇਨ ਤਸ੍ਸਾ ਆਪਤ੍ਤਿਯਾ ਅਨਾਪਤ੍ਤਿਦਿਟ੍ਠਿ ਅਹੋਸਿ, ਅਞ੍ਞੇ ਭਿਕ੍ਖੂ ਤਸ੍ਸਾ ਆਪਤ੍ਤਿਯਾ ਆਪਤ੍ਤਿਦਿਟ੍ਠਿਨੋ ਅਹੇਸੁਂ. ਅਥ ਖੋ ਤੇ ਭਨ੍ਤੇ ਭਿਕ੍ਖੂ ਸਾਮਗ੍ਗਿਂ ਲਭਿਤ੍ਵਾ ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਦਿਨ੍ਨੋ.

ਪੁਚ੍ਛਾ – ਸਙ੍ਘਭੇਦਸ੍ਸ ਆਵੁਸੋ ਮੂਲਭੂਤੇ ਭਿਕ੍ਖੁਮ੍ਹਿ ਉਕ੍ਖਿਤ੍ਤਕੇ ਓਸਾਰਿਤੇ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਞ੍ਚ ਕਾਤੁਂ ਸਾਮਗ੍ਗੀ ਉਪੋਸਥਞ੍ਚ ਕਾਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਤੇਯੇਵ ਉਕ੍ਖਿਤ੍ਤਕਾਨੁਵਤ੍ਤਕੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਤੇ ਭਨ੍ਤੇ ਉਕ੍ਖਿਤ੍ਤਕਾਨੁਵਤ੍ਤਕਾ ਭਿਕ੍ਖੂ ਤਂ ਉਕ੍ਖਿਤ੍ਤਕਂ ਭਿਕ੍ਖੁਂ ਓਸਾਰੇਤ੍ਵਾ ਯੇਨ ਉਕ੍ਖੇਪਕਾ ਭਿਕ੍ਖੂ ਤੇਨੁਪਸਙ੍ਕਮਿਂਸੁ ਉਪਸਙ੍ਕਮਿਤ੍ਵਾ ਤੇ ਉਕ੍ਖੇਪਕੇ ਭਿਕ੍ਖੂ ਏਕਦਵੋਚੁਂ ‘‘ਯਸ੍ਮਿਂ ਆਵੁਸੋ ਵਤ੍ਥੁਸ੍ਮਿਂ ਅਹੋਸਿ ਸਙ੍ਘਸ੍ਸ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਸਙ੍ਘਭੇਦੋ ਸਙ੍ਘਰਾਜਿ ਸਙ੍ਘਵਵਤ੍ਥਾਨਂ ਸਙ੍ਘਨਾਨਾਕਰਣਂ, ਸੋ ਏਸੋ ਭਿਕ੍ਖੁਂ ਆਪਨ੍ਨੋ ਚ ਉਕ੍ਖਿਤ੍ਤੋ ਚ ਪਸ੍ਸਿ ਚ ਓਸਾਰਿਤੋ ਚ, ਹਨ੍ਦ ਮਯਂ ਆਵੁਸੋ ਤਸ੍ਸ ਵਤ੍ਥੁਸ੍ਸ ਵੂਪਸਮਾਯ ਸਙ੍ਘਸਾਮਗ੍ਗਿਂ ਕਰੋਮਾ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਕੋਸਮ੍ਬਕਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.

ਵਿਸ੍ਸਜ੍ਜਨਾ – ਕੋਸਮ੍ਬਕਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਏਕਾ ਆਪਤ੍ਤਿ.