੮. ਚੀਵਰਕ੍ਖਨ੍ਧਕ

ਜੀਵਕਵਤ੍ਥੁ

ਪੁਚ੍ਛਾ – ਗਹਪਤਿਚੀਵਰਂ ਆਵੁਸੋ ਸਾਦਿਯਿਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਜੀਵਕਂ ਕੋਮਾਰਭਚ੍ਚਂ ਆਰਬ੍ਭ ਅਨੁਞ੍ਞਾਤਂ, ਜੀਵਕੋ ਭਨ੍ਤੇ ਕੋਮਾਰਭਚ੍ਚੋ ਭਿਕ੍ਖੂਨਂ ਗਹਪਤਿਚੀਵਰਂ ਅਨੁਜਾਨਿਤੁਂ ਭਗਵਨ੍ਤਂ ਯਾਚਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਛ ਆਵੁਸੋ ਰਜਨਾਨਿ ਭਗਵਤਾ ਕਤ੍ਥ ਅਨੁਞ੍ਞਾਤਾਨਿ, ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਾਨਿ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਛਕਣੇਨਪਿ ਪਣ੍ਡੁਮਤ੍ਤਿਕਾਯਪਿ ਚੀਵਰਂ ਰਜਿਂਸੁ, ਚੀਵਰਂ ਦੁਬ੍ਬਣ੍ਣਂ ਹੋਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਾਨਿ.

ਪੁਚ੍ਛਾ – ਅਚ੍ਛਿਨ੍ਨਕਾਨਿ ਆਵੁਸੋ ਚੀਵਰਾਨਿ ਧਾਰੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਅਚ੍ਛਿਨ੍ਨਕਾਨਿ ਚੀਵਰਾਨਿ ਧਾਰੇਸੁਂ ਦਨ੍ਤਕਸਾਵਾਨਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਕਦਾ ਆਵੁਸੋ ਭਗਵਾ ਅਨੁਞ੍ਞਾਸਿ ਛਿਨ੍ਨਕਂ ਸਙ੍ਘਾਟਿਂ ਛਿਨ੍ਨਕਂ ਉਤ੍ਤਰਾਸਙ੍ਗਂ ਛਿਨ੍ਨਕਂ ਅਨ੍ਤਰਵਾਸਕਂ.

ਵਿਸ੍ਸਜ੍ਜਨਾ – ਦਕ੍ਖਿਣਾਗਿਰਿਤੋ ਭਨ੍ਤੇ ਪਚ੍ਛਾਗਤਕਾਲੇ ਭਗਵਾ ਅਨੁਞ੍ਞਾਸਿ ਛਿਨ੍ਨਕਂ ਸਙ੍ਘਾਟਿਂ ਛਿਨ੍ਨਕਂ ਉਤ੍ਤਰਾਸਙ੍ਗਂ ਛਿਨ੍ਨਕਂ ਅਨ੍ਤਰਵਾਸਕਂ.

ਪੁਚ੍ਛਾ – ਅਗ੍ਗਲ਼ਂ ਚ ਆਵੁਸੋ ਤੁਨ੍ਨਞ੍ਚ ਓਵਟ੍ਟਿਕਞ੍ਚ ਕਣ੍ਡੁਸਕਞ੍ਚ ਦਲ਼੍ਹੀਕਮ੍ਮਞ੍ਚ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਬਾਰਾਣਸਿਯਂ ਭਨ੍ਤੇ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਅਨੁਞ੍ਞਾਤਂ, ਅਞ੍ਞਤਰੋ ਭਨ੍ਤੇ ਭਿਕ੍ਖੁ ਅਗ੍ਗਲ਼ਂ ਅਚ੍ਛੁਪੇਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਵਸ੍ਸਿਕਸਾਟਿਕਾ ਚ ਆਵੁਸੋ ਆਗਨ੍ਤੁਕਭਤ੍ਤਞ੍ਚ ਗਮਿਕਭਤ੍ਤਞ੍ਚ ਗਿਲਾਨਭਤ੍ਤਞ੍ਚ ਗਿਲਾਨੁਪਟ੍ਠਾਕਭਤ੍ਤਞ੍ਚ ਗਿਲਾਨਭੇਸਜ੍ਜਞ੍ਚ ਧੁਵਯਾਗੁ ਚ ਭਿਕ੍ਖੁਨਿਸਙ੍ਘਸ੍ਸ ਉਦਕਸਾਟਿਕਾਚਾਤਿ ਇਮਾ ਅਟ੍ਠ ਭਗਵਤਾ ਕਤ੍ਥ ਅਨੁਞ੍ਞਾਤਾ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਾ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਵਿਸਾਖਂ ਮਿਗਾਰਮਾਤਰਂ ਆਰਬ੍ਭ ਅਨੁਞ੍ਞਾਤਾ, ਵਿਸਾਖਾ ਭਨ੍ਤੇ ਮਿਗਾਰਮਾਤਾ ਭਗਵਨ੍ਤਂ ਅਟ੍ਠਵਰਾਨਿ ਯਾਚਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਾ.

ਪੁਚ੍ਛਾ – ਭਗਵਤਾ ਆਵੁਸੋ ਮਾਤਾਪਿਤੂਨਂ ਦਾਨਂ ਅਨੁਜਾਨਿਤ੍ਵਾ ਸਦ੍ਧਾਦੇਯ੍ਯਂ ਵਿਨਿਪਾਤੇਨ੍ਤਸ੍ਸ ਦੁਕ੍ਕਟਂ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਪਞ੍ਞਤ੍ਤਂ, ਅਞ੍ਞਤਰਸ੍ਸ ਭਨ੍ਤੇ ਭਿਕ੍ਖੁਨੋ ਬਹੁਂ ਚੀਵਰਂ ਉਪ੍ਪਨ੍ਨਂ ਅਹੋਸਿ, ਸੋ ਚ ਤਂਚੀਵਰਂ ਮਾਤਾਪਿਤੂਨਂ ਦਾਤੁਕਾਮੋ ਅਹੋਸਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਮਾਤਾਪਿਤਰੋਤਿ ਖੋ ਭਿਕ੍ਖਵੇ ਦਦਮਾਨੇ ਕਿਂ ਵਦੇਯ੍ਯਾਮ, ਅਨੁਜਾਨਾਮਿ ਭਿਕ੍ਖਵੇ ਮਾਤਾਪਿਤੂਨਂ ਦਾਤੁਂ, ਨ ਚ ਭਿਕ੍ਖਵੇ ਸਦ੍ਧਾਦੇਯ੍ਯਂ ਵਿਨਿਪਾਤੇਤਬ੍ਬਂ, ਯੋ ਵਿਨਿਪਾਤੇਯ੍ਯ ਆਪਤ੍ਤਿ ਦੁਕ੍ਕਟਸ੍ਸ –

ਪੁਚ੍ਛਾ – ਅਞ੍ਞਤ੍ਰ ਵਸ੍ਸਂ ਵੁਟ੍ਠੇਨ ਆਵੁਸੋ ਅਞ੍ਞਤ੍ਰ ਚੀਵਰਭਾਗਂ ਸਾਦਿਯਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਆਰਬ੍ਭ ਪਞ੍ਞਤ੍ਤਂ, ਆਯਸ੍ਮਾ ਭਨ੍ਤੇ ਉਪਨਨ੍ਦੋ ਸਕ੍ਯਪੁਤ੍ਤੋ ਅਞ੍ਞਤ੍ਰ ਵਸ੍ਸਂ ਵੁਟ੍ਠੋ ਅਞ੍ਞਤ੍ਰ ਚੀਵਰਭਾਗਂ ਸਾਦਿਯਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਅਨਾਥਕਂ ਆਵੁਸੋ ਭਿਕ੍ਖੁਂ ਗਿਲਾਨਂ ਨ ਉਪਟ੍ਠਹਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਪਞ੍ਞਤ੍ਤਂ, ਭਗਵਤਿ ਭਨ੍ਤੇ ਸਾਵਤ੍ਥਿਯਂ ਵਿਹਰਤਿ ਅਞ੍ਞਤਰਸ੍ਸ ਭਿਕ੍ਖੁਨੋ ਕੁਚ੍ਛਿਵਿਕਾਰਾਬਾਧੋ ਅਹੋਸਿ, ਸੋ ਸਕੇ ਮੁਤ੍ਤਕਰੀਸੇ ਪਲਿਪਨ੍ਨੋ ਸਯਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਨਗ੍ਗਿਯਂ ਆਵੁਸੋ ਤਿਤ੍ਥਿਯਸਮਾਦਾਨਂ ਸਮਾਦਿਯਨ੍ਤਸ੍ਸ ਥੁਲ੍ਲਚ੍ਚਯਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਅਞ੍ਞਤਰਂ ਭਿਕ੍ਖੁਂ ਆਰਬ੍ਭ ਪਞ੍ਞਤ੍ਤਂ, ਅਞ੍ਞਤਰੋ ਭਨ੍ਤੇ ਭਿਕ੍ਖੁ ਨਗ੍ਗਿਯਂ ਤਿਤ੍ਥਿਯਸਮਾਦਾਨਂ ਸਮਾਦਿਯਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਸਬ੍ਬਨੀਲਕਾਨਿ ਵਾ ਆਵੁਸੋ ਚੀਵਰਾਨਿ ਸਬ੍ਬਪੀਤਕਾਨਿ ਵਾ ਸਬ੍ਬਲੋਹਿਤਕਾਨਿ ਵਾ ਸਬ੍ਬਮਞ੍ਜਿਟ੍ਠਕਾਨਿ ਵਾ ਸਬ੍ਬਕਣ੍ਹਾਨਿਵਾਤਿ ਏਵਰੂਪਾਨਿ ਚੀਵਰਾਨਿ ਧਾਰੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਸਬ੍ਬਨੀਲਕਾਦੀਨਿ ਚੀਵਰਾਨਿ ਧਾਰੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਕਞ੍ਚੁਕਂ ਵਾ ਆਵੁਸੋ ਵੇਠਨਂ ਵਾ ਧਾਰੇਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਛਬ੍ਬਗ੍ਗਿਯੇਵ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਕਞ੍ਚੁਕਮ੍ਪਿ ਧਾਰੇਸੁਂ ਵੇਠਨਮ੍ਪਿ ਧਾਰੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਚੀਵਰਸਞ੍ਞੁਤ੍ਤਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.

ਵਿਸ੍ਸਜ੍ਜਨਾ – ਚੀਵਰਸਞ੍ਞੁਤ੍ਤਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਤਿਸ੍ਸੋ ਆਪਤ੍ਤਿਯੋ.