ਪਯੋਗਸਿਦ੍ਧਿ ਨਿਗਮਨਂ

੧. ਯੇ ਨਨ੍ਤਤਨ੍ਤਰਤਨਾਕਰਮਨ੍ਥਨੇਨ,

ਮਨ੍ਥਾਚਲੋਲ੍ਲਸਿਤਞਾਣਵਰੇਨ ਲਦ੍ਧਾ;

ਸਾਰਾਮਤਾ+ਤਿਸੁਖਿਤਾ ਸੁਖਯਨ੍ਤਿ ਚ+ਞ੍ਞੇ,

ਤੇ ਮੇ ਜਯਨ੍ਤਿ ਗੁਰਵੋ ਗੁਰਵੋ ਗੁਣੇਹਿ.

੨. ਯਸ੍ਸ ਸਾਧੁਗੁਣੁਬ੍ਭੂਤ-ਕਿਤ੍ਤਿ ਸਬ੍ਬਤ੍ਤ ਪਤ੍ਥਟਾ;

ਮੋਗ੍ਗਲ੍ਲਾਨੋ ਮਹਾਪਞ੍ਞੋ, ਜਯਤੀ ਸੋ ਹ ਸਬ੍ਬਦਾ.

੩. ਪਰਮਪ੍ਪਿਚ੍ਛਤਾ+ਨੇਕ-ਸਨ੍ਤੋਸੂਪਸਮੇਸਿਨਂ;

ਸੁਚਿਸਲੇਖਵੁਤ੍ਤੀਨਂ, ਸਦਾ+ਰਞ੍ਞਨਿਵਾਸਿਨਂ.

੪. ਸਾਸਨੁਜੋਤਕਾਰੀਨ+ਮਾਚੇਰਤ੍ਤ+ਮੁਪਾਗਤਂ;

ਉਦੁਮ੍ਬਰਗਿਰੀਖ੍ਯਾਤਾ+ਯਤਨਂ ਯਤਿਪੁਙ੍ਗਵਂ.

੫. ਮੇਧਙ੍ਕਰੋਤਿ ਆਖ੍ਯਾਤ-ਨਾਮਧੇਯ੍ਯਂ ਤਪੋਧਨਂ;

ਥੇਰਂ ਥਿਰਦਯਾ ਮੇਧਾ-ਨਿਧਾਨਂ ਸਾਧੁ ਪੂਜਿਤਂ.

੬. ਸਿਸ੍ਸਂ ਸਹਾਯ+ਮਾਗਮ੍ਮ, ਕਲ੍ਯਾਣਮਿਤ੍ਤ+ਮਤ੍ਤਨੋ;

ਸੋਧੇਤੁਂ ਸਾਸਨਂ ਸਤ੍ਥੁ, ਪਰਕ੍ਕਮ+ਮਕਾਸਿ ਯੋ.

੭. ਸਙ੍ਘਰਕ੍ਖਿਤਨਾਮੇਨ, ਮਹਾਥੇਰੇਨ ਧੀਮਤਾ;

ਨਿਵਾਸਭੂਤੇਨਾ+ਨੇਕ-ਗੁਣਾਨ+ਪ੍ਪਿਚ੍ਛਤਾਦਿਨਂ.

੮. ਮੋਗ੍ਗਲ੍ਲਾਨਬ੍ਯਾਕਰਣ-ਪਯੋਗਕ੍ਕਮਸਾਧਕਾ;

ਏਤ੍ਤਾਵਤਾ ਕਤਾ ਏਸਾ, ਪਯੋਗਸਿਦ੍ਧਿ ਨਿਟ੍ਠਿਤਾ.

੯. ਤੇਨੇਵ ਰਚਿਤਾ ਸਾਧੁ, ਸਾਸਨੋਦਯਕਾਰਿਨਾ;

ਖੁਦ੍ਦਸਿਕ੍ਖਾਯ ਟੀਕਾ ਚ, ਤਥਾ ਸਮ੍ਬਨ੍ਧਚਿਨ੍ਤਨਾ.

੧੦. ਸੁਸਦ੍ਦਸਿਦ੍ਧਿਂ ਯੋ ਯੋਗ-ਨਿਚ੍ਛਯਂ ਸਬ੍ਭਿ ਵਣ੍ਣਿਤਂ;

ਅਕਾ ਸੁਬੋਧਾਲਙ੍ਕਾਰਂ, ਤਥਾ ਸਮ੍ਬਨ੍ਧਚਿਨ੍ਤਨਂ.

੧੧. ਸਤ੍ਥਸਞ੍ਚਿਤਪੁਞ੍ਞੇਨ, ਨਿਬ੍ਬਾਨਸਾਧਕਂ ਹਿਤਂ;

ਸਾਧੇਨ੍ਤੋ ਲੋਕਨਾਥਸ੍ਸ, ਸਦ੍ਧਮ੍ਮੋ ਤਿਟ੍ਠਤਂ ਚਿਰਨ੍ਤਿ.

ਇਤਿ ਸਙ੍ਘਰਕ੍ਖਿਤਮਹਾਸਾਮਿਥੇਰਪਾਦਵਿਰਚਿਤਾ

ਪਯੋਗਸਿਦ੍ਧਿ ਨਿਟ੍ਠਿਤਾ.

(ਵਿਸੇਸਲਕ੍ਖਣਂ). ਯਥਾਵੁਤ੍ਤਾਨਂ ਪਨ ਪਯੋਗਸਿਦ੍ਧਿਨਿਗਮਨ ਗਾਥਾਨਂ ਏਕਾਦਸਨ੍ਨਂ ਪੁਬ੍ਬੇਯੇਵ ਵਕ੍ਖਮਾਨਾ ਇਮਾ ਗਾਥਾਯੋ ਦਿਸ੍ਸਨ੍ਤਿ ਪੋਰਾਣੇ ਸੀਹਲ਼ਮੂਲਪਯੋਗਸਿਦ੍ਧਿਪਾਠੇ. ਤਾ ਚ ਗਾਥਾਯੋ ਪਚ੍ਛਾ ਸੀਹਲ਼ਮੂਲਪਯੋਗਸਿਦ੍ਧਿਸਂਸੋਧਕੇਨ ਮੇਧਙ੍ਕਰੋਤਿ ਗਰੂਹਿ ਗਹਿਤਨਾਮਧੇਯ੍ਯੇਨ ਥੇਰੇਨ ਪਕ੍ਖਿਤ੍ਤਾਤਿ ਵੇਦਿਤਬ੍ਬਾ, ਤਸ੍ਮਾ ਮਯਂ ਤਾ ਗਾਥਾਯੋ ਸਬ੍ਬਪਚ੍ਛਾਯੇਵ ਇਮਸ੍ਮਿਂ-ਠਾਨੇ ਠਪੇਮ. ਤਾ ਪਨ ਗਾਥਾਯੋ ਕਤਮਾਤਿ ਚੇ –

੧. ਚਾਗਵਿਕ੍ਕਮਸਦ੍ਧਾਨੁ-ਸਮ੍ਪਨ੍ਨਗੁਣਸਾਮਿਨੋ;

ਪਰਕ੍ਕਮਨਰਿਨ੍ਦਸ੍ਸ, ਸੀਹਲ਼ਿਨ੍ਦਸ੍ਸ ਧੀਮਤੋ.

੨. ਅਤ੍ਰਜੇਨਾ+ਨੁਜਾਤੇਨ, ਭੂਪਾਲਕੁਲਕੇਤੁਨਾ;

ਦਿਸਨ੍ਤਪਤ੍ਥਟੋਦਾਰ-ਵਿਕ੍ਕਮੇਨ ਯਸਸ੍ਸਿਨਾ.

੩. ਭੁਵਨੇਕਭੁਜਵ੍ਹੇਨ, ਮਹਾਰਾਜੇਨ ਧੀਮਤਾ;

ਚਤੁਪਚ੍ਚਯਦਾਨੇਨ, ਸਤਤਂ ਸਮੁਪਟ੍ਠਿਤੋ.

੪. ‘‘ਜਮ੍ਬੁਦੋਣੀ’’ਤਿ ਵਿਖ੍ਯਾਤਾ –

ਵਾਸੇ ਨਿਵਸਤੋ ਸਤੋ;

ਸੁਮਙ੍ਗਲਮਹਤ੍ਥੇਰ –

ਸਾਮਿਨੋ ਸੁਚਿਵੁਤ੍ਤਿਨੋ.

੫. ਵਂਸੇ ਵਿਸੁਦ੍ਧੇ ਸਂਜਾਤੋ,

ਪਨ੍ਥਸੇਨਾਸਨੇ ਰਤੋ;

ਪਰਿਯਤ੍ਤਿਮਹਾਸਿਨ੍ਧੁ –

ਨਿਯ੍ਯਾਮਕਧੁਰਨ੍ਧਰੋ.

੫. ਅਪ੍ਪਿਚ੍ਛਾਦਿਗੁਣੂਪੇਤੋ, ਜਿਨਸਾਸਨਮਾਮਕੋ;

ਵਨੇਰਤਮਹਤ੍ਥੇਰੋ, ਮੇਧਙ੍ਕਰਸਮਵ੍ਹਯੋ.

੬. ਪਾਟਵਤ੍ਥਾਯ ਭਿਕ੍ਖੂਨਂ, ਵਿਨਯੇ ਸੁਵਿਸਾਰਦੋ;

ਪਯੋਗਸਿਦ੍ਧਿਂ ਸੋਧਯਿ, ਸਦਾ ਸਪ੍ਪਞ੍ਞਗੋਚਰਂ.

੭. ਇਮਂ ਲਿਖਿਤਪੁਞ੍ਞੇਨ, ਮੇਤ੍ਤੇਕ੍ਯਂ ਉਪਸਂਕਮਿ;

ਪਤਿਟ੍ਠਹਿਤ੍ਵਾ ਸਰਣੇ, ਸੁਪ੍ਪਤਿਟ੍ਠਾਮਿ ਸਾਸਨੇਤਿ.

ਪਯੋਗਸਿਦ੍ਧਿਸਿਦ੍ਧਂ.