੫,੧੬. ਪਯੋਜਕਬ੍ਯਾਪਾਰੇ ਣਾਪਿ ਚ

ਕਤ੍ਤਾਰਂ ਯੋ ਪਯੋਜੇਤਿ, ਤਸ੍ਸ ਬ੍ਯਾਪਾਰੇ ਕ੍ਰਿਯਤ੍ਥਾ ਣਿ+ਣਾਪੀ ਹੋਨ੍ਤਿ ਬਹੁਲਂ.

ਣਿਪਚ੍ਚਯੋ ਉਵਣ੍ਣਨ੍ਤਾ, ਆਤੋ ਣਾਪੇਵ ਹੋਤਿ+ਹ;

ਦ੍ਵੇ ਦ੍ਵੇ+ਕੋ ਹੋਤਿ ਵਾ ਸੇਸੇ, ਬਹੁਲਂਤ੍ਯਨੁਵੁਤ੍ਤਿਯਾ.

ਅਕਮ੍ਮਕਾਪਿ ਹੋਨ੍ਤੇਵ, ਣਿ+ਣਾਪ੍ਯਨ੍ਤਾ ਸਕਮ੍ਮਕਾ;

ਸਕਮ੍ਮਕਾ ਦ੍ਵਿਕਮ੍ਮਾ+ਸ੍ਸੁ, ਦ੍ਵਿਕਮ੍ਮਾ ਚ ਤਿਕਮ੍ਮਕਾ.

ਤਸ੍ਮਾ ਕਤ੍ਤਰਿ ਕਮ੍ਮੇ ਚ, ਣਿ+ਣਾਪੀਨਂ ਤੁ ਸਮ੍ਭਵੋ;

ਨ ਭਾਵੇ ਸੁਦ੍ਧਕਤ੍ਤਾ ਤੁ, ਕਮ੍ਮਂ ਹੋਤਿ ਪਯੋਜਕੇ.

ਨਯਾਦੀਨਂ ਪਧਾਨਞ੍ਚ, ਅਪਧਾਨਂ ਦੁਹਾਦਿਨਂ;

ਸੁਦ੍ਧਕਤ੍ਤਾ ਣਿ+ਣਾਪੀਸੁ, ਕਮ੍ਮ+ਮਕ੍ਖ੍ਯਾਤ ਗੋਚਰਂ.

ਭਵਿਤੁਂ ਪਯੋਜਯਤੀਤਿ ਅਤ੍ਥੇ ਇਮਿਨਾ ਣਿਪ੍ਪਚ੍ਚਯੋ. ਣਕਾਰੋ ਣਾਨੁਬਨ੍ਧਕਾਰਿਯਤ੍ਥੋ. ‘‘ਯੁਵਣ੍ਣਾਨ+ਮੇ+ਓ ਪਚ੍ਚਯੇ’’ਤਿ ਓਕਾਰੇ ‘‘ਆਯਾ+ਵਾ ਣਾਨੁਬਨ੍ਧੇ’’ਤਿ ਣਾਨੁਬਨ੍ਧੇ ਆਵਾਦੇਸੋ. ਤ੍ਯਾਦਿਮ੍ਹਿ ‘‘ਣਿ+ਣਾਪ੍ਯਾ+ਪੀਹਿ ਵਾ’’ਤਿ ਲਵਿਕਰਣੇ ਏਕਾਰੇ ‘‘ਏਓਨ+ਮਯਵਾ ਸਰੇ’’ਤਿ ਅਯਾਦੇਸੋ. ਸੋ ਸਮਾਧਿਂ ਭਾਵਯਤਿ ਭਾਵੇਤਿ, ਭਾਵਯਨ੍ਤਿ ਭਾਵੇਨ੍ਤਿ+ਚ੍ਚਾਦਿ. ਕਮ੍ਮੇ-ਤੇਨ ਸਮਾਧਿ ਭਾਵੀਯਤਿ+ਚ੍ਚਾਦਿ. ਏਤ੍ਥ ‘‘ਦੀਘੋ ਸਰਸ੍ਸਾ’’ਤਿ ਕ੍ਯੇ ਇਕਾਰਸ੍ਸ ਦੀਘੋ. ਭਾਵਯਿਸ੍ਸਤਿ ਭਾਵੇਸ੍ਸਤਿ, ਭਾਵਯਿਸ੍ਸਨ੍ਤਿ ਭਾਵੇਸ੍ਸਨ੍ਤਿ+ਚ੍ਚਾਦਿ. ਅਜ੍ਜਤਨੇ ਈਸ੍ਸ ਸਿਮ੍ਹਿ ਅਭਾਵੇਸਿ ਭਾਵੇਸਿ, ਅਭਾਵਯਿ ਭਾਵਯਿ, ਅਭਾਵਯਿਂਸੁ ਭਾਵਯਿਂਸੁ. ਪਰਸ੍ਸਰਲੋਪੇ ਅਭਾਵੇਸੁਂ ਭਾਵੇਸੁਂ, ਅਭਾਵਯਂਸੁ ਭਾਵਯਂਸੁ, ਅਭਾਵਯੁਂ ਭਾਵਯੁਂ ਇਚ੍ਚਾਦਿ. ਕਮ੍ਮੇ-ਅਭਾਵੀਯਿ ਭਾਵੀਯਿ ਇਚ੍ਚਾਦਿ. ਅਭਾਵਿਸ੍ਸ ਅਭਾਵਯਿਸ੍ਸ, ਅਭਾਵਿਸ੍ਸਂਸੁ ਅਭਾਵਯਿਸ੍ਸਂਸੁ. ਕਮ੍ਮੇ-ਅਭਾਵਯਿਸ੍ਸਂ ਇਚ੍ਚਾਦਿ. ਭਾਵੇ ਭਾਵੇਯ੍ਯ ਇਚ੍ਚਾਦਿ. ਕਮ੍ਮੇ-ਭਾਵੀਯੇਯ੍ਯ ਇਚ੍ਚਾਦਿ. ਭਾਵਯਤੁ ਭਾਵੇਤੁ ਇਚ੍ਚਾਦਿ. ਕਮ੍ਮੇ-ਭਾਵੀਯਤੁ ਇਚ੍ਚਾਦਿ.

ਪਚਿਤੁਂ ਪਯੋਜੇਤੀਤਿ ਅਤ੍ਥੇ ਣਿ+ਣਾਪੀ ਹੋਨ੍ਤਿ. ਸੋ ਦੇਵਦਤ੍ਤੇਨ ਓਦਨਂ ਪਾਚਯਤਿ ਪਾਚੇਤਿ ਇਚ੍ਚਾਦਿ, ਤਥਾ ਪਾਚਾਪਯਤਿ ਪਾਚਾਪੇਤਿ+ਚ੍ਚਾਦਿ. ਕਮ੍ਮੇ-ਸੋ ਤੇਨ ਦੇਵਦਤ੍ਤੇਨ ਓਦਨੋ ਪਾਚੀਯਤਿ ਪਾਚਾਪੀਯਤਿ+ਚ੍ਚਾਦਿ, ਭਵਿਸ੍ਸਤ੍ਯਾਦੀਸੁਪਿ ਯੋਜੇਤਬ੍ਬਂ.

ਗਨ੍ਤੁਂ ਪਯੋਜੇਤੀਤਿ ਅਤ੍ਥੇ ਸੋ ਤਂ ਪੁਰਿਸਂ ਗਾਮਂ ਗਮਯਤਿ ਗਮੇਤਿ ਗਚ੍ਛਾਪਯਤਿ ਗਚ੍ਛਾਪੇਤਿ+ਚ੍ਚਾਦਿ. ਕਮ੍ਮੇ-ਤੇਨ ਸੋ ਗਾਮਂ ਗਮੀਯਤਿ ਗਚ੍ਛਾਪੀਯਤਿ+ਚ੍ਚਾਦਿ.

ਗੁਹ=ਸਂਵਰਣੇ, ਗੁਹਿਤੁਂ ਪਯੋਜੇਤੀਤਿ ਣਿਮ੍ਹਿ ‘‘ਗੁਹਿਸ੍ਸ ਸਰੇ’’ਤਿ ਦੀਘੋ. ਗੂਹਯਤਿ, ਗੂਹਯਨ੍ਤਿ ਇਚ੍ਚਾਦਿ.

ਦਿਸ+ਦੁਸ=ਅਪ੍ਪੀਤਿਯਂ, ਦੁਸਿਤੁਂ ਪਯੋਜੇਤੀਤਿ ਣਿਮ੍ਹਿ ‘‘ਣਿਮ੍ਹਿ ਦੀਘੋ ਦੁਸਸ੍ਸਾ’’ਤਿ ਦੀਘੇ ਦੂਸਯਤਿ+ਚ੍ਚਾਦਿ.

ਤਥਾ ਇਚ੍ਛਨ੍ਤਂ ਪਯੋਜਯਤਿ ਇਚ੍ਛਾਪਯਤਿ ਇਚ੍ਛਾਪੇਤਿ, ਏਸਯਤਿ ਏਸੇਤਿ. ਨਿਯਚ੍ਛਨ੍ਤਂ ਪਯੋਜਯਤਿ ਨਿਯਮਯਤਿ ਨਿਯਮੇਤਿ. ਤਥਾ ਆਸਯਤਿ ਆਸੇਤਿ, ਅਚ੍ਛਾਪਯਤਿ ਅਚ੍ਛਾਪੇਤਿ. ਲਾਭਯਤਿ ਲਾਭੇਤਿ, ਏਵਂ ਵਾਸਯਤਿ ਵਾਸੇਤਿ, ਵਾਸਾਪਯਤਿ ਵਾਸਾਪੇਤਿ. ਵਾਹਯਤਿ ਵਾਹੇਤਿ, ਵਾਹਾਪਯਤਿ ਵਾਹਾਪੇਤਿ+ਚ੍ਚਾਦਿ. ਏਵਂ ਜੀਰਯਤਿ, ਮਾਰਯਤਿ, ਦਸ੍ਸਯਤਿ ਇਚ੍ਚਾਦਿ. ਹੂ=ਸਤ੍ਤਾਯਂ, ਪਹੋਨ੍ਤਂ ਪਯੋਜਯਤਿ ਪਹਾਵਯਤਿ ਪਹਾਵੇਤਿ ਇਚ੍ਚਾਦਿ. ਸਾਯਯਤਿ ਸਾਯਾਪਯਤਿ ਸਾਯਾਪੇਤਿ. ਨਾਯਾਪਯਤਿ ਨਾਯਾਪੇਤਿ. ਪਤਿਟ੍ਠਾਪਯਤਿ ਪਤਿਟ੍ਠਾਪੇਤਿ. ਰਸ੍ਸੇ ਪਤਿਟ੍ਠਪੇਤਿ. ਹਨ੍ਤੁਂ ਪਯੋਜਯਤੀਤਿ ਣਿ+ਣਾਪੀ, ‘‘ਹਨਸ੍ਸ ਘਾਤੋ ਣਾਨੁਬਨ੍ਧੇ’’ਤਿ ਘਾਤਾਦੇਸੇ ਘਾਤਯਤਿ ਘਾਤੇਤਿ. ਤਥਾ ਜੁਹਾਵਯਤਿ ਜੁਹਾਵੇਤਿ, ਜਹਾਪਯਤਿ ਜਹਾਪੇਤਿ. ਹਾਪਯਤਿ ਹਾਪੇਤਿ. ਦਾਪਯਤਿ ਦਾਪੇਤਿ. ਵਿਧਾਪਯਤਿ ਵਿਧਾਪੇਤਿ, ਪਿਦਹਾਪਯਤਿ ਪਿਦਹਾਪੇਤਿ. (ਭੂਵਾਦਿਨਯੋ).

ਇਦਾਨਿ ਰੁਧਾਦਿਅਟ੍ਠਗਣਾ ਦਸ੍ਸੀਯਨ੍ਤੇ-ਰੋਧਯਤਿ ਰੋਧੇਤਿ. ਦੇਵਯਤਿ ਦੇਵੇਤਿ. ਤੋਦਯਤਿ ਤੋਦੇਤਿ. ਜਯਾਪਯਤਿ ਜਯਾਪੇਤਿ. ਵਿਕ੍ਕਯਤਿ ਵਿਕ੍ਕਯਾਪੇਤਿ. ਸਾਵਯਤਿ ਸਾਵੇਤਿ. ਵਿਤਾਨਯਤਿ ਵਿਤਾਨੇਤਿ. ਚੋਰਾਪਯਤਿ ਚੋਰਾਪੇਤਿ ਇਚ੍ਚਾਦਿ.

ਖਾਦੀਹਿ ਪਚ੍ਚਯਨ੍ਤੇਹਿ, ਅਪਿ ਹੋਨ੍ਤਿ ਣਿ+ਣਾਪਯੋ;

ਣਿ+ਣਾਪਿਨਾ+ਨਕਾਨਾਨਂ, ਦਸ੍ਸਨਞ੍ਚੇਤ੍ਥ ਸਾਧਨਂ.

ਤਿਤਿਕ੍ਖਨ੍ਤਂ ਪਯੋਜਯਤਿ ਤਿਤਿਕ੍ਖੇਤਿ ਤਿਤਿਕ੍ਖਾਪੇਤਿ, ਤਿਕਿਚ੍ਛਯਤਿ ਤਿਕਿਚ੍ਛੇਤਿ ਤਿਕਿਚ੍ਛਾਪਯਤਿ ਤਿਕਿਚ੍ਛਾਪੇਤਿ. ਏਵਂ ਬੁਭੁਕ੍ਖੇਤਿ ਬੁਭੁਕ੍ਖਾਪੇਤਿ. ਪਬ੍ਬਤਾਯਯਤਿ. ਪੁਤ੍ਤੀਯਯਤਿ ਇਚ੍ਚਾਦਿ. (ਖਾਦਿਪਚ੍ਚਯਨਯੋ).

ਇਤਿ ਪਯੋਗਸਿਦ੍ਧਿਯਂ ਤ੍ਯਾਦਿਕਣ੍ਡੋ ਛਟ੍ਠੋ.