੬੭. ਇਤ੍ਥਿਯਂ ਭਾਸਿਤਪੁਮਿ+ਤ੍ਥੀ ਪੁਮੇਵੇ+ਕਤ੍ਥੇਤਿ

ਭਾਸਿਤਪੁਮਾ ਇਤ੍ਥੀ ਪੁਮੇਵ ਹੋਤੀਤਿ ਪੁਮ੍ਭਾਵਾ ਇਤ੍ਥਿਪਚ੍ਚਯਾਨਂ ਨਿਵਤ੍ਤਿ ਹੋਤਿ. ਏਵਂ ਰਤ੍ਤਲਤਾ, ਦੁਤਿਯਭਿਕ੍ਖਾ. ਬ੍ਰਾਹ੍ਮਣੀ ਚ ਸਾ ਦਾਰਿਕਾ ਚਾਤਿ ਬ੍ਰਾਹ੍ਮਣਦਾਰਿਕਾ, ਨਾਗਮਾਣਵਿਕਾ. ਇਤ੍ਥਿਯਨ੍ਤਿ ਕਿਂ, ਕੁਮਾਰਿਰਤਨਂ, ਸਮਣਿਪਦੁਮਂ. ਭਾਸਿਤਪੁਮਾਤਿ ਕਿਂ, ਗਙ੍ਗਾਨਦੀ, ਤਣ੍ਹਾਨਦੀ, ਪਥਵੀਧਾਤੁ. ਪੁਰਤ੍ਥਿਮੋ ਚ ਸੋ ਕਾਯੋ ਚਾਤਿ ਪੁਰਤ੍ਥਿਮਕਾਯੋ. ਏਤ੍ਥ ਚ ਕਾਯੇਕਦੇਸੇ ਕਾਯਸਦ੍ਦੋ. ਏਵਂ ਪਚ੍ਛਿਮਕਾਯੋ, ਉਪਰਿਮਕਾਯੋ, ਹੇਟ੍ਠਿਮਕਾਯੋ, ਸਬ੍ਬਕਾਯੋ, ਨਵਾਵਾਸੋ, ਕਤਰਨਿਕਾਯੋ, ਹੇਤੁਪਚ੍ਚਯੋ. ਜੀਵਿਤਪ੍ਪਧਾਨਂ ਨਵਕਂ ਜੀਵਿਤਨਵਕ+ਮਿਚ੍ਚਾਦਿ.

ਵਿਸੇਸਨੁਤ੍ਤਰਪਦੇ ਥੇਰਾ+ਚਰਿਯ+ਪਣ੍ਡਿਤਾ ਵਿਸੇਸਨਂ ਪਰਞ੍ਚ ਭਵਤਿ. ਯਥਾ ਸਾਰਿਪੁਤ੍ਤੋ ਚ ਸੋ ਥੇਰੋ ਚਾਤਿ ਸਾਰਿਪੁਤ੍ਤਤ੍ਥੇਰੋ, ਏਵਂ ਮਹਾਮੋਗ੍ਗਲ੍ਲਾਨਤ੍ਥੇਰੋ, ਮਹਾਕਸ੍ਸਪਤ੍ਥੇਰੋ, ਬੁਦ੍ਧਘੋਸਾਚਰਿਯੋ, ਧਮ੍ਮਪਾਲਾਚਰਿਯੋ, ਆਚਰਿਯਗੁਤ੍ਤਿਲੋ ਵਾ. ਮਹੋਸਧੋ ਚ ਸੋ ਪਣ੍ਡਿਤੋ ਚਾਤਿ ਮਹੋਸਧਪਣ੍ਡਿਤੋ, ਏਵਂ ਵਿਧੁਰਪਣ੍ਡਿਤੋ.

ਵਿਸੇਸਨੋਭਯਪਦੇ ਯਥਾ-ਸੀਤਞ੍ਚ ਤਂ ਉਣ੍ਹਞ੍ਚਾਤਿ ਸੀਤੁਣ੍ਹਂ, ਸਿਨਿਦ੍ਧੋ ਚ ਸੋ ਉਣ੍ਹੋ ਚਾਤਿ ਸਿਨਿਦ੍ਧੁਣ੍ਹੋ ਮਾਸੋ. ਖਞ੍ਜੋ ਚ ਸੋ ਖੁਜ੍ਜੋ ਚਾਤਿ ਖਞ੍ਜਖੁਜ੍ਜੋ, ਏਵਂ ਅਨ੍ਧਬਧਿਰੋ, ਕਤਾਕਤਂ, ਛਿਦ੍ਦਾਵਛਿਦ੍ਦਂ, ਉਚ੍ਚਾਵਚਂ, ਛਿਨ੍ਨਭਿਨ੍ਨਂ, ਗਤਪਚ੍ਚਾਗਤਂ. ਕ੍ਵਚਿ ਪੁਬ੍ਬਕਾਲਸ੍ਸਾਪਿ ਪਰਨਿਪਾਤੋ, ਵਾਸਿਤੋ ਚ ਸੋ ਲਿਤ੍ਤੋ ਚਾਤਿ ਲਿਤ੍ਤਵਾਸਿਤੋ, ਏਵਂ ਨਗ੍ਗਮੂਸਿਤੋ, ਸਿਤ੍ਤਸਮ੍ਮਟ੍ਠੋ, ਭਟ੍ਠਲੁਞ੍ਜਿਤੋ.

ਉਪਮਨੁਤ੍ਤਰਪਦੇ ਉਪਮਾਨਭੂਤਂ ਵਿਸੇਸਨਂ ਪਰਂ ਭਵਤਿ, ਯਥਾ ਸੀਹੋਤਿ ਵੁਤ੍ਤੇ ਉਪਚਰਿਤਾ+ਨੁਪਚਰਿਤਸੀਹਾਨਂ ਸਾਮਞ੍ਞਪ੍ਪਤੀਤਿਯਂ ਮੁਨਿਸਦ੍ਦੋ ਵਿਸੇਸੇਤਿ. ਏਤ੍ਥ ਚ –

ਉਪਮਾਨੋ+ਪਮੇਯ੍ਯਾਨਂ, ਸਧਮ੍ਮਤ੍ਤਂ ਸਿਯੋ+ਪਮਾ.

ਸਾ ਚ ਵਤ੍ਥੁ+ਵਣ੍ਣ+ਆਕਾਰਾਨਂ ਸਾਮ੍ਯੇਨ ਹੋਤਿ. ਸੀਹੋਵ ਸੀਹੋ, ਮੁਨਿ ਚ ਸੋ ਸੀਹੋ ਚਾਤਿ ਮੁਨਿਸੀਹੋ, ਮੁਨਿਵਸਭੋ, ਮੁਨਿਪੁਙ੍ਗਵੋ, ਬੁਦ੍ਧਨਾਗੋ, ਬੁਦ੍ਧਾਦਿਚ੍ਚੋ. ਰਂਸੀ ਵਿਯ ਰਂਸੀ, ਸਦ੍ਧਮ੍ਮੋ ਚ ਸੋ ਰਂਸੀ ਚਾਤਿ ਸਦ੍ਧਮ੍ਮਰਂਸੀ, ਏਵਂ ਵਿਨਯਸਾਗਰੋ. ਪੁਣ੍ਡਰਿਕਮਿਵ ਪੁਣ੍ਡਰਿਕੋ, ਸਮਣੋ ਚ ਸੋ ਪੁਣ੍ਡਰਿਕੋ ਚਾਤਿ ਸਮਣਪੁਣ੍ਡਰਿਕੋ, ਸਮਣਪਦੁਮੋ. ਚਨ੍ਦੋ ਵਿਯ ਚਨ੍ਦੋ, ਮੁਖਞ੍ਚ ਤਂ ਚਨ੍ਦੋ ਚਾਤਿ ਮੁਖਚਨ੍ਦੋ, ਮੁਖਪਦੁਮਂ ਇਚ੍ਚਾਦਿ.

ਸਮ੍ਭਾਵਨਾਪੁਬ੍ਬਪਦੇ ਯਥਾ-ਧਮ੍ਮੋਤਿ ਬੁਦ੍ਧਿ ਧਮ੍ਮਬੁਦ੍ਧਿ, ਏਵਂ ਧਮ੍ਮਸਞ੍ਞਾ, ਧਮ੍ਮਸਙ੍ਖਾਤੋ, ਧਮ੍ਮਸਮ੍ਮਤੋ, ਪਾਣਸਞ੍ਞਿਤਾ, ਅਸੁਭਸਞ੍ਞਾ, ਅਨਿਚ੍ਚਸਞ੍ਞਾ, ਧਾਤੁਸਞ੍ਞਾ, ਅਤ੍ਤਸਞ੍ਞਾ, ਅਤ੍ਤਦਿਟ੍ਠਿ ਇਚ੍ਚਾਦਿ.

ਅਵਧਾਰਣਪੁਬ੍ਬਪਦੇ ਯਥਾ-ਗੁਣੋ ਏਵ ਧਨਂ ਗੁਣਧਨਂ, ਏਵਂ ਸਦ੍ਧਾਧਨਂ, ਸੀਲਧਨਂ, ਪਞ੍ਞਾਰਤਨਂ, ਚਕ੍ਖੁ ਏਵ ਇਨ੍ਦ੍ਰਿਯਂ ਚਕ੍ਖੁਨ੍ਦ੍ਰਿਯਂ, ਏਵਂ ਚਕ੍ਖਾਯਤਨਂ, ਚਕ੍ਖੁਧਾਤੁ, ਚਕ੍ਖੁਦ੍ਵਾਰਂ, ਰੂਪਾਰਮ੍ਮਣ+ਮਿਚ੍ਚਾਦਿ.

ਵਿਸੇਸਨ+ਵਿਸੇਸ੍ਸੇਹਿ, ਕ੍ਰਿਯਾਯ ਚ ਸਹੇ+ਰਿਤੋ;

ਤੇਸਂ ਭਾਵਂ ਵਿਵੇਚੇਤਾ, ਨਿਪਾਤੋ ਬ੍ਯਵਚ੍ਛਿਨ੍ਦਤਿ.

ਅਯੋਗ+ਮਞ੍ਞਯੋਗਞ੍ਚ, ਅਚ੍ਚਨ੍ਤਾਯੋਗ+ਮੇਵਿ+ਤਿ;

ਵਿਵਕ੍ਖਾਤੋ ਪਯੁਤ੍ਤੋਪਿ, ਏਵਤ੍ਥੋ ਞਾਯਤੇ ਯਤੋ.

ਬ੍ਯਵਚ੍ਛੇਦਫਲਂ ਵਾਕ੍ਯਂ, ਤਤੋ ਚਿਤ੍ਤੋ ਧਨੁਦ੍ਧਰੋ;

ਪਾਤ੍ਥੋ ਧਨੁਦ੍ਧਰੋ ਨੀਲੁ+ਪ੍ਪਲ+ਮਤ੍ਥੀਤਿ ਤਂ ਯਥਾ.

ਏਤ੍ਥ ਨਿਪਾਤੋਤਿ ਏਵ-ਇਤਿਨਿਪਾਤੋ, ਅਪ੍ਪਯੁਤ੍ਤੋਪਿ ਏਵਸਦ੍ਦੋ ਏਵਂ ਯੋਜੇਤਬ੍ਬੋ – ‘‘ਚਿਤ੍ਤੋ ਧਨੁਦ੍ਧਰੋ ਏਵਾ’’ਤਿ ਵਿਸੇਸਨੇਨ ਯੁਤ੍ਤੋ ਅਯੋਗਵਿਵਚ੍ਛੇਦਕੋ, ਧਨੁਨਾ ਯੋਗੇ ਪਤਿਟ੍ਠਾਪਨਤੋ ‘‘ਪਾਤ੍ਥੋ ਏਵ ਧਨੁਦ੍ਧਰੋ’’ਤਿ ਵਿਸੇਸ੍ਸੇਨ ਯੁਤ੍ਤੋ ਅਞ੍ਞਯੋਗਵਿਵਚ੍ਛੇਦਕੋ, ਧਨੁਦ੍ਧਰਤ੍ਤਸ੍ਸ ਪਾਤ੍ਥਸਂਖਾਤਅਜ੍ਜੁਨੇ ਏਵ ਪਤਿਟ੍ਠਾਪਨਤੋ. ‘‘ਨੀਲੁਪ੍ਪਲ+ਮਤ੍ਥੇਵਾ’’ਤਿ ਕ੍ਰਿਯਾਯ ਯੁਤ੍ਤੋ ਅਚ੍ਚਨ੍ਤਾਯੋਗਵਿਵਚ੍ਛੇਦਕੋ, ਨੀਲੁਪ੍ਪਲਸ੍ਸ ਸਬ੍ਭਾਵੇਯੇਵ ਪਤਿਟ੍ਠਾਪਨਤੋ.