ਸਙ੍ਖ੍ਯਾਕਣ੍ਡ
ਅਥ ਸਙ੍ਖ੍ਯਾਸਦ੍ਦਾ ਵੁਚ੍ਚਨ੍ਤੇ. ਏਕਾਦਯੋ ਅਟ੍ਠਾਰਸਨ੍ਤਾ ਸਙ੍ਖ੍ਯੇਯ੍ਯਵਚਨਾ. ਵੀਸਤਿਆਦਯੋ ‘‘ਭਿਕ੍ਖੂਨਂ ਵੀਸਤੀ’’ਤਿਆਦੀਸੁ ਸਙ੍ਖ੍ਯਾਵਚਨਾ, ‘‘ਵੀਸਤਿ ਭਿਕ੍ਖਵੋ’’ਤਿਆਦੀਸੁ ਸਙ੍ਖ੍ਯੇਯ੍ਯਵਚਨਾ. ਏਕਸਦ੍ਦੋ ਸਬ੍ਬਾਦੀਸੁ ਵੁਤ੍ਤੋਵ. ਦ੍ਵਾਦਯੋ ਅਟ੍ਠਾਰਸਨ੍ਤਾ ਬਹੁਵਚਨਨ੍ਥਾਵ.
੨੧੯. ਯੋਮ੍ਹਿ ਦ੍ਵਿਨ੍ਨਂ ਦੁਵੇ+ਦ੍ਵੇ
ਯੋਮ੍ਹਿ ਦ੍ਵਿਸ੍ਸ ਸਵਿਭਤ੍ਤਿਸ੍ਸ ਦੁਵੇ+ਦ੍ਵੇ ਹੋਨ੍ਤਿ ਪਚ੍ਚੇਕਂ. ਦੁਵੇ ਦ੍ਵੇ, ਦੁਵੇ ਦ੍ਵੇ, ਦ੍ਵੀਹਿ ਦ੍ਵੀਭਿ.
੨੨੦. ਦੁਵਿਨ੍ਨਂ ਨਂਮ੍ਹਿ ਵਾ
ਨਂਮ੍ਹਿ ਦ੍ਵਿਸ੍ਸ ਸਵਿਭਤ੍ਤਿਸ੍ਸ ਦੁਵਿਨ੍ਨਂ ਹੋਤਿ ਵਾ. ਦੁਵਿਨ੍ਨਂ, ਅਞ੍ਞਤ੍ਰ –
੪੭. ਨਂਮ੍ਹਿ ਨੁਕ ਦ੍ਵਾਦੀਨਂ ਸਤ੍ਤਰਸਨ੍ਨਂ
ਦ੍ਵਾਦੀਨਂ ਸਤ੍ਤਰਸਨ੍ਨਂ ਸਙ੍ਖ੍ਯਾਨਂ ਨੁਕ ਹੋਤਿ ਨਂਮ੍ਹਿ ਵਿਭਤ੍ਤਿਮ੍ਹਿ. ਉਕਾਰੋ ਉਚ੍ਚਾਰਣਤ੍ਥੋ, ਕਕਾਰੋ ਅਨ੍ਤਾਵਯਵਤ੍ਥੋ. ਏਤ੍ਥ ਨਾਗਮੋ ਵਿਭਤ੍ਤਿਸ੍ਸ ਆਦ੍ਯਾਵਯਵੋ ਚੇ, ‘‘ਆਗਮਾ ਤਗ੍ਗੁਣੀਭੂਤਾ ਤਗ੍ਗਹਣੇਨ ਗਯ੍ਹਨ੍ਤੇ’’ਤਿ ਞਾਯਾ ਨਾਗਮੋਪਿ ਤਂਗਹਣੇਨ ਗਯ੍ਹਤੀਤਿ ‘‘ਸੁਨਂਹਿਸੂ’’ਤਿ ਦੀਘਪ੍ਪਸਙ੍ਗੇ ਪਕਤਿਯਾ ਅਨ੍ਤਾਵਯਵਭੂਤੇ ਸਰਨ੍ਤਤਾ ਨਤ੍ਥੀਤਿ ਨ ਦੀਘੋ. ਦ੍ਵਿਨ੍ਨਂ, ਦ੍ਵੀਸੁ.
੨੦੭. ਪੁਮੇ ਤਯੋ+ਚਤ੍ਤਾਰੋ
ਯੋਮ੍ਹਿ ਸਵਿਭਤ੍ਤੀਨਂ ਤਿ+ਚਤੁਨ੍ਨਂ ਤਯੋ+ਚਤ੍ਤਾਰੋ ਹੋਨ੍ਤਿ ਯਥਾਕ੍ਕਮਂ ਪੁਲ੍ਲਿਙ੍ਗੇ. ਤਯੋ, ਤਯੋ, ਤੀਹਿ ਤੀਭਿ.
੪੯. ਣ੍ਣਂ+ਣ੍ਣਨ੍ਨਂ ਤਿਤੋ ਝਾ
ਝਸਞ੍ਞਿਤੋ ਤਿਤੋ ਨਂਵਚਨਸ੍ਸ ਣ੍ਣਂ+ਣ੍ਣਨ੍ਨਂ ਹੋਨ੍ਤਿ. ਤਿਣ੍ਣਂ ਤਿਣ੍ਣਨ੍ਨਂ, ਤੀਸੁ.
ਇਤ੍ਥਿਯਂ –
੨੦੫. ਤਿਸ੍ਸੋ ਚਤਸ੍ਸੋ ਯੋਮ੍ਹਿ ਸਵਿਭਤ੍ਤੀਨਂ
ਵਿਭਤ੍ਤਿਸਹਿਤਾਨਂ ਤਿਚਤੁਨ੍ਨਂ ਯੋਮ੍ਹਿ ਤਿਸ੍ਸੋ+ਚਤਸ੍ਸੋ ਹੋਨ੍ਤਿ ਇਤ੍ਥਿਯਂ ਯਥਾਕ੍ਕਮਂ. ਤਿਸ੍ਸੋ, ਤਿਸ੍ਸੋ, ਤੀਹਿ ਤੀਭਿ.
੨੦੪. ਨਂਮ੍ਹਿ ਤਿਚਤੁਨ੍ਨ+ਮਿਤ੍ਥਿਯਂ ਤਿਸ੍ਸ+ਚਤਸ੍ਸਾ
ਨਂਮ੍ਹਿ ਤਿਚਤੁਨ੍ਨਂ ਤਿਸ੍ਸ+ਚਤਸ੍ਸਾ ਹੋਨ੍ਤਿ+ਤ੍ਥਿਯਂ ਯਥਾਕ੍ਕਮਂ. ਨਂਮ੍ਹੀਤਿ ਚਤੁਤ੍ਥੀਛਟ੍ਠੀਨਂ ਸਾਮਞ੍ਞਵਚਨਂ, ਨੋ ਚੇ ਨਂਸੂਤਿ ਵਦਤਿ, ਯਥਾਕ੍ਕਮਂਤਿ ਸਦ੍ਦਦ੍ਵਯਾਪੇਕ੍ਖਂ. ਏਵ+ਮੀਦਿਸ+ਮਞ੍ਞਮ੍ਪਿ. ਤਿਸ੍ਸਨ੍ਨਂ ਤੀਸੁ.
੨੦੬. ਤੀਣਿ+ਚਤ੍ਤਾਰਿ ਨਪੁਂਸਕੇ
ਯੋਮ੍ਹਿ ਸਵਿਭਤ੍ਤੀਨਂ ਤਿਚਤੁਨ੍ਨਂ ਯਥਾਕ੍ਕਮਂ ਤੀਣਿ+ਚਤ੍ਤਾਰਿ ਹੋਨ੍ਤਿ ਨਪੁਂਸਕੇ. ਤੀਣਿ, ਤੀਣਿ, ਤੀਹਿ ਇਚ੍ਚਾਦਿ ਪੁਲ੍ਲਿਙ੍ਗੇਵ.
ਚਤੁ ਯੋ,
੨੦੮. ਚਤੁਰੋ ਵਾ ਚਤੁਸ੍ਸ
ਚਤੁਸ੍ਸ ਸਵਿਭਤ੍ਤਿਸ੍ਸ ਯੋਮ੍ਹਿ ਚਤੁਰੋ ਹੋਤਿ ਵਾ ਪੁਲ੍ਲਿਙ੍ਗੇ. ਚਤੁਰੋ ਚਤ੍ਤਾਰੋ. ਕਥਂ ‘‘ਚਤੁਰੋ ਨਿਮਿਤ੍ਤੇ ਨਾਦ੍ਦਸਾਸਿ’’ਨ੍ਤਿ, ਲਿਙ੍ਗਵਿਪਲ੍ਲਾਸੇਨ ਸਿਦ੍ਧਂ, ਚਤ੍ਤਾਰਿ ਨਿਮਿਤ੍ਤਾਨੀਤਿ ਅਤ੍ਥੋ. ਵਿਪਲ੍ਲਾਸੋ ਤਿਵਿਧੋ ਲਿਙ੍ਗਵਿਪਲ੍ਲਾਸੋ ਵਚਨਵਿਪਲ੍ਲਾਸੋ ਵਿਭਤ੍ਤਿਵਿਪਲ੍ਲਾਸੋਤਿ. ਚਤੂਹਿ ਚਤੂਭਿ. ਚਤੁਨ੍ਨਂ, ਚਤੂਸੁ.
ਇਤ੍ਥਿਯਂ ਚਤਸ੍ਸੋ. ਚਤਸ੍ਸੋ. ਚਤੂਹਿ ਚਤੂਭਿ. ਚਤਸ੍ਸਨ੍ਨਂ. ਚਤਸ੍ਸਨ੍ਨਂ. ਚਤੂਸੁ.
ਨਪੁਂਸਕੇ ਚਤ੍ਤਾਰਿ. ਚਤ੍ਤਾਰਿ. ਚਤੂਹਿ ਚਤੂਭਿ. ਇਚ੍ਚਾਦਿ ਪੁਮੇਵ.
੧੬੯. ਟ ਪਞ੍ਚਾਦੀਹਿ ਚੁਦ੍ਦਸਹਿ
‘‘ਸੁਤ੍ਤੇ ਲਿਙ੍ਗਵਚਨਮਤ੍ਤ’’ਨ੍ਤਿ ਞਾਯਾ ਟ-ਇਤਿ ਵੁਤ੍ਤਂ. ਪਞ੍ਚਾਦੀਹਿ ਚੁਦ੍ਦਸਹਿ ਸਙ੍ਖ੍ਯਾਹਿ ਯੋਨਂ ਟ ਹੋਤਿ. ਪਞ੍ਚ. ਪਞ੍ਚ. ਯੋਨਂ ਟਾ+ਟੇਨਿਵਤ੍ਥਨਤ੍ਥਂ ਟ-ਵਿਧਾਨਂ.
੯੦. ਪਞ੍ਚਾਦੀਨਂ ਚੁਦ੍ਦਸਨ੍ਨ+ਮ
ਪਞ੍ਚਾਦੀਨਂ ਚੁਦ੍ਦਸਨ੍ਨਂ ਸੁਨਂਹਿਸ੍ਵ ਹੋਤਿ. ਏਤ੍ਤ+ਦੀਘਾਪਵਾਦੋ+ਯਂ. ਅਪਵਾਦਤਿ ਬਾਧੇਤੀਤਿ ਅਪਵਾਦੋ. ਤਸ੍ਮਾ ‘‘ਪਕਪ੍ਯਾਪਵਾਦਵਿਸਯਮੁਸ੍ਸਗ੍ਗਾ ਅਭਿਨਿਵਿਸਨ੍ਤੇ’’ਤਿ ਞਾਯਾ ‘‘ਸੁਹਿਸ੍ਵ+ਸ੍ਸੇ’’ ‘‘ਸੁਨਂਹਿਸੁ’’ਤਿ ਚ ਉਸ੍ਸਗ੍ਗਾ ‘‘ਪਞ੍ਚਾਦੀਨਂ ਚੁਦ੍ਦਸਨ੍ਨ+ਮ’’ ਇਤਿ ਅਪਵਾਦਵਿਸਯਂ ਨ ਪਵਿਸਨ੍ਤਿ, ਸਾਮਞ੍ਞਤ੍ਤਾ. ਏਵ+ਮੁਪਰਿਪਿ ‘‘ਪਞ੍ਚਮਿਯਂ ਪਰਸ੍ਸ’’ ‘‘ਆਦਿਸ੍ਸਾ’’ਤਿ. ਪਞ੍ਚਹਿ ਪਞ੍ਚਭਿ ਪਞ੍ਚਨ੍ਨਂ. ਪਞ੍ਚਨ੍ਨਂ. ਪਞ੍ਚਸੁ. ਏਵਂ ਛਾਦਯੋ ਅਟ੍ਠਾਰਸਨ੍ਤਾ.
‘‘ਚਤ੍ਥੇ’’ਤਿ ਏਕੋ ਚ ਦਸ ਚਾਤਿ ਚਤ੍ਤਸਮਾਸੇ ‘‘ਅਮਾਦੀ’’ਤਿ ਏਕੇਨ ਅਧਿਕਾ ਦਸਾਤਿ ਤਤਿਯਾਸਮਾਸੇ ਵਾ ਕਤੇ ‘‘ਏਕਤ੍ਥਤਾਯ’’ਨ੍ਤਿ ਵਿਭਤ੍ਤਿਲੋਪੋ. ਏਵ+ਮੁਪਰਿ ਚ.
੩,੧੦੨. ਏਕਟ੍ਠਾਨ+ਮਾ
ਏਕਅਟ੍ਠਾਨਂ ਆ ਹੋਤਿ ਦਸੇ ਪਰੇ.
੩,੧੦੩. ਰ ਸਂਖ੍ਯਾਤੋ ਵਾ
ਸਂਖ੍ਯਾਤੋ ਪਰਸ੍ਸ ਦਸਸ੍ਸ ਰ ਹੋਤਿ ਵਿਭਾਸਾ. ਸ ਚ ‘‘ਪਞ੍ਚਮਿਯਂ ਪਰਸ੍ਸਾ’’ਤਿ ਵਤ੍ਤਮਾਨੇ ‘‘ਆਦਿਸ੍ਸਾ’’ਤਿ ਦਕਾਰਸ੍ਸੇਵ ਹੋਤਿ. ਏਕਾਰਸ ਏਕਾਦਸ. ਏਕਾਰਸਹਿ ਏਕਾਦਸਹਿ. ਏਕਾਰਸਨ੍ਨਂ ਏਕਾਦਸਨ੍ਨਂ. ਏਕਾਰਸਸੁ ਏਕਾਦਸਸੁ. ਏਵ+ਮੇਕਾਦਸਇਚ੍ਚਾਦਿਪਿ.
੩,੯੪. ਆ ਸਂਖ੍ਯਾਯਾ ਸਤਾਦੋ ਨਾਞ੍ਞਤ੍ਥੇ
ਸਂਖ੍ਯਾਯ+ਮੁਤ੍ਤਰਪਦੇ ਦ੍ਵਿਸ੍ਸਾ ਹੋਤਿ ਅਸਤਾਦੋ ਨਾਞ੍ਞਤ੍ਥੇ.
ਆਵਿਟ੍ਠਲਿਙ੍ਗਤ੍ਤਾ ਸਂਖ੍ਯਾਯਂ ਉਤ੍ਤਰਪਦੇ ਸਲਿਙ੍ਗੇਨੇਵ ਵਿਸੇਸਨਂ ਭਵਤਿ.
ਸੁਦ੍ਧਂ ਮਿਸ੍ਸਞ੍ਚ ਸਂਕਿਣ੍ਣਂ, ਉਪਸਜ੍ਜਨਮੇਵ ਚ;
ਆਵਿਟ੍ਠ+ਮਥ ਵਾ+ਬ੍ਯਤ੍ਤਂ, ਛਧਾ ਲਿਙ੍ਗਂ ਵਿਵਂਯਤੇ.
ਏਤ੍ਥ ਯਥਾਕ੍ਕਮਂ ਰੁਕ੍ਖੋ ਲਤਾ ਪਣ੍ਣਂਤਿ ਸੁਦ੍ਧਂ. ਘਟੋ ਘਟੀ, ਵਜਿਰੋ ਵਜਿਰਂ, ਵੇਦਨਾ ਵੇਦਨਂਤਿ ਮਿਸ੍ਸਂ. ਤਟੋ ਤਟੀ ਤਟਂਤਿ ਸਂਕਿਣ੍ਣਂ. ਸੁਕ੍ਕੋ ਪਟੋ, ਸੁਕ੍ਕਾ ਪਟਿ, ਸੁਕ੍ਕਂ ਵਤ੍ਥਂਤਿ ਉਪਸਜ੍ਜਨਂ. ਰਾਜਾ ਸਰਣਂ, ਗੁਣੋ ਪਮਾਣਂਤਿ ਆਵਿਟ੍ਠਂ. ਤੁਵਂ ਅਹਂ ਕਤਿ ਪਞ੍ਚਾਤਿ ਅਬ੍ਯਤ੍ਤਂ. ਇਤਿ ਲਿਙ੍ਗਂ ਵੇਦਿਤਬ੍ਬਂ. ਦ੍ਵਾਦਸ.
੩,੯੮. ਬਾ ਚਤ੍ਤਾਲੀਸਾ ਦੋ
ਦ੍ਵਿਸ੍ਸ ਬਾ ਵਾ ਹੋਤਿ ਚਤ੍ਤਾਲੀਸਾ ਦੋ ਨਾਞ੍ਞਤ੍ਥੇ. ਰਾਦੇ ਸੇ ਬਾਰਸ.
੩,੯੫. ਤਿਸ੍ਸੇ
ਸਂਖ੍ਯਾਯ+ਮੁਤ੍ਤਰਪਦੇ ਤਿਸ੍ਸ ਏ ਹੋਤ+ਸਤਾਦੋ ਨਾ+ਞ੍ਞਤ੍ਥੇ.
੩,੧੦੪. ਛਤੀਹਿ ਲ਼ੋ ਚ
ਛਤੀਹਿ ਪਰਸ੍ਸ ਦਸਸ੍ਸ ਲ਼ੋ ਹੋਤਿ ਰੋ ਚ. ਤੇਲ਼ਸ ਤੇਰਸ.
੩,੧੦੦. ਚਤੁਸ੍ਸ ਚੁਚੋ ਦਸੇ
ਚਤੁਸ੍ਸ ਚੁ+ਚੋ ਹੋਨ੍ਤਿ ਵਾ ਦਸੇ ਪਰੇ. ਦ੍ਵਿਤ੍ਤੇ ਚੁਦ੍ਦਸ ਚੋਦ੍ਦਸ ਚਤੁਦ੍ਦਸ.
੩,੯੯. ਵੀਸਤਿਦਸੇਸੁ ਪਞ੍ਚਸ੍ਸ ਪਣ੍ਣ+ਪਨ੍ਨਾ
ਵੀਸਤਿ ਸੇਸੁ ਪਰੇਸੁ ਪਞ੍ਚਸ੍ਸ ਪਣ੍ਣ+ਪਨ੍ਨਾ ਹੋਨ੍ਤਿ ਯਥਾਕ੍ਕਮਂ. ਪਨ੍ਨਰਸ ਪਞ੍ਚਦਸ.
੩,੧੦੧. ਛਸ੍ਸ ਸੋ
ਛਸ੍ਸ ਸੋ-ਇਚ੍ਚ+ਯ+ਮਾਦੇਸੋ ਹੋਤਿ ਸੇ ਪਰੇ. ਸੋਲ਼ਸ ਸੋਰਸ. ਸਤ੍ਤਰਸ ਸਤ੍ਤਦਸ. ‘‘ਏਕਟ੍ਠਾਨ+ਮਾ’’ਤਿ ਆ, ਅਟ੍ਠਾਰਸ ਅਟ੍ਠਾਦਸ.
ਊਨਾ ਚ ਸਾ ਵੀਸਤਿ ਚਾਤਿ ‘‘ਵਿਸੇਸਨ+ਮੇਕਤ੍ਥੇਨੇ’’ਤਿ ਵਿਸੇਸਨਸਮਾਸੇ ‘‘ਇਤ੍ਥਿਯਂ ਭਾਸਿਤਪੁਮਿ+ਤ੍ਥੀ ਪੁਮੇ+ਵੇਕਤ੍ਥੇ’’ਤਿ ਪੁਮਤ੍ਤੇ ਚ ਕਤੇ ਏਕੇਨ ਊਨਾ ਵੀਸਤੀਤਿ ਤਤਿਯਾਸਮਾਸੇ ਏਕੂਨਵੀਸਤਿ.
ਵੀਸਤਿਆਦਯੋ ਆਨਵੁਤਿਯਾ ਇਤ੍ਥਿਲਿਙ੍ਗੇ+ਕਵਚਨਾ. ਭੋ ਏਕੂਨਵੀਸਤਿ. ਏਕੂਨਵੀਸਤਿਂ. ਏਕੂਨਵੀਸਤ੍ਯਾ ਏਕੂਨਵੀਸਤਿਯਾ. ਏਕੂਨਵੀਸਤ੍ਯਂ ਏਕੂਨਵੀਸਤਿਯਂ ਏਕੂਨਵੀਸਤ੍ਯਾ ਏਕੂਨਵੀਸਤਿਯਾ. ਮਤਿਸਮਂ.
ਏਵਂ ਵੀਸਤਿ, ਏਕਵੀਸਤਿ, ਦ੍ਵਾਵੀਸਤਿ ਬਾਵੀਸਤਿ, ਤੇਵੀਸਤਿ ਚਤੁਵੀਸਤਿਪ੍ਪਭੁਤਯੋ. ਪਣ੍ਣਆਦੇਸੇ ਪਣ੍ਣਵੀਸਤਿ ਪਞ੍ਚਵੀਸਤਿ. ਏਵਂ ਛਬ੍ਬੀਸਤਿ, ਸਤ੍ਤਵੀਸਤਿ, ਅਟ੍ਠਵੀਸਤਿ.
ਏਕੇਨ ਊਨਾ ਤਿਂਸਤਿ ਤਿਂਸਾ ਵਾਤਿ ਏਕੂਨਤਿਂਸਤਿ ਏਕੂਨਤਿਂਸਾ ਵਾ. ਕਰਣੇ ਏਕੂਨਤਿਂਸਾਯ. ਏਕੂਨਤਿਂਸਾਯ, ਏਕੂਨਤਿਂਸਾਯ, ਏਕੂਨਤਿਂਸਾਯ, ਏਕੂਨਤਿਂਸਾਯਂ. ਏਵਂ ਤਿਂਸਤਿਣਿਂਸਾਵਭੁਤਯੋ. ਤਿਂਸਾਸਦ੍ਦਸ੍ਸ ਪਨ ਸਿਲੋਪੇ ‘‘ਦੀਘਸ੍ਸੋ’’ਤਿ ਯੋਗਵਿਭਾਗਾ ਰਸ੍ਸੋ, ਤਿਂਸ. ਨਿਗ੍ਗਹੀਤਾਗਮੋ, ਤਿਂਸਂ. ਭੋਤਿਂਸੇ+ਚ੍ਚਾਦਿ ਪੁਮੇਵ.
ਚਤ੍ਤਾਲੀਸਾਦੀਸੁਪਿ ਯਥਾਸਮ੍ਭਵਂ ਏਵਮੇਵ. ਦ੍ਵਿਤ੍ਤੇ ਏਕਤ੍ਤਿਂਸਤਿ ਏਕਤ੍ਤਿਂਸਾ. ਰਸ੍ਸਦ੍ਵਿਤ੍ਤੇ ਦ੍ਵਤ੍ਤਿਂਸਤਿ ਦ੍ਵਤ੍ਤਿਂਸ. ਏਵਂ ਤੇਤ੍ਤਿਂਸਤਿ ਤੇਤ੍ਤਿਂਸਾਦਯੋ ਯਾਵ ਏਕੂਨਚਤ੍ਤਾਲੀਸਤਿ ਏਕੂਨਚਤ੍ਤਾਲੀਸਾ. ਚਤ੍ਤਾਲੀਸਾਯ ਸਿਮ੍ਹਿ ਚਤ੍ਤਾਰੀਸਾ ਚਤ੍ਤਾਲੀਸਾ ਚਤ੍ਤਾਲੀਸਂ, ਭੋ ਚਤ੍ਤਾਲੀਸੇ+ਚ੍ਚਾਦਿ ਹੋਤਿ. ਏਵਂ ਏਕਚਤ੍ਤਾਰੀਸਾ.
੩,੯੭. ਦ੍ਵੀਸ੍ਸਾ ਚ
ਅਸਤਾਦੋ ਨਾਞ੍ਞਤ੍ਥੇ ਚਤ੍ਤਾਲੀਸਾਦੋ ਦ੍ਵਿਸ੍ਸ ਏ ਵਾ ਹੋਤਿ ਆ ਚ. ਦ੍ਵੇਚਤ੍ਤਾਲੀਸਾ ਦ੍ਵੇਚਤ੍ਤਾਲੀਸ ਦ੍ਵੇਚਤ੍ਤਾਲੀਸਂ, ਏਵਂ ਦ੍ਵਾਚਤ੍ਤਾਲੀਸ-ਇਚ੍ਚਾਦਿ. ਦ੍ਵੇਚਤ੍ਤਾਰੀਸਾ ਦ੍ਵੇਚਤ੍ਤਾਰੀਸ ਦ੍ਵੇਚਤ੍ਤਾਰੀਸਂ, ਏਵਂ ਦ੍ਵਾਚਤ੍ਤਾਰੀਸਾ ਦ੍ਵਾਚਤ੍ਤਾਰੀਸ ਇਚ੍ਚਾਦਿ. ਚਤ੍ਤਾਲੀਸਤਿ ਏਕਚਤ੍ਤਾਲੀਸਤਿ ਦ੍ਵੇਚਤ੍ਤਾਲੀਸਤਿ ਦ੍ਵਾਚਤ੍ਤਾਲੀਸਤਿ ਇਚ੍ਚਾਦਿ ਏਕੂਨਵੀਸਤਿਸਮਂ.
੩,੯੮. ਚਤ੍ਤਾਲੀਸਾਦੋ ਵਾ
ਅਸਤਾਦੋ ਨਾਞ੍ਞਤ੍ਥੇ ਚਤ੍ਤਾਲੀਸਾਦੋ ਤਿਸ੍ਸੇ ਹੋਤਿ ਵਾ. ਤੇਚਤ੍ਤਾਲੀਸਾ ਤੇਚਤ੍ਤਾਲੀਸ ਤੇਚਤ੍ਤਾਲੀਸਂ. ਭੋ ਤੇਚਤ੍ਤਾਲੀਸੇ ਇਚ੍ਚਾਦਿ ਹੋਤਿ. ਏਵਂ ਤਿਚਤ੍ਤਾਲੀਸਾ ਤੇਚਤ੍ਤਾਰੀਸਾ ਤਿਚਤ੍ਤਾਰੀਸਾ ਇਚ੍ਚਾਦਿ, ਤੇਚਤ੍ਤਾਲੀਸਤਿ ਤਿਚਤ੍ਤਾਲੀਸਤਿ ਇਚ੍ਚਾਦਿ ਪੁਬ੍ਬੇਵ.
ਏਵਂ ਚਤੁਚਤ੍ਤਾਲੀਸਾ ਪਞ੍ਚਚਤ੍ਤਾਲੀਸਾ ਚਤੁਚਤ੍ਤਾਲੀਸਤਿ ਪਞ੍ਚਚਤ੍ਤਾਲੀਸਤਿ ਇਚ੍ਚਾਦਿ ਯਾਵ ਏਕੂਨਪਞ੍ਞਾਸਾ.
ਪਞ੍ਞਾਸਾ ਪਞ੍ਞਾਸ ਪਞ੍ਞਾਸਂ ਇਚ੍ਚਾਦਿ ਹੋਤਿ. ਏਵਂ ਦ੍ਵੇਪਞ੍ਞਾਸਾ ਦ੍ਵਾਪਞ੍ਞਾਸਾ ਦ੍ਵਿਪਞ੍ਞਾਸਾ ਦ੍ਵੇਪਣ੍ਣਾਸਾ ਦ੍ਵਾਪਣ੍ਣਾਸਾ ਦ੍ਵਿਪਣ੍ਣਾਸਾ. ਤੇਪਞ੍ਞਾਸਾ ਤਿਪਞ੍ਞਾਸਾ ਤਿਪਞ੍ਞਾਸਂ ਤੇਪਣ੍ਣਾਸਾ ਤਿਪਣ੍ਣਾਸਾ. ਚਤੁਪਣ੍ਣਾਸਾ ਪਞ੍ਚਪਣ੍ਣਾਸਾ ਇਚ੍ਚਾਦਿ ਯਾਵ ਏਕੂਨਸਟ੍ਠਿ.
ਏਵਂ ਸਟ੍ਠਿ, ਏਕਸਟ੍ਠਿ, ਦ੍ਵੇਸਟ੍ਠਿ ਦ੍ਵਾਸਟ੍ਠਿ ਦ੍ਵਿਸਟ੍ਠਿ, ਤੇਸਟ੍ਠਿ ਤਿਸਟ੍ਠਿ, ਚਤੁਸਟ੍ਠਿ ਪਞ੍ਚਸਟ੍ਠਿ ਇਚ੍ਚਾਦਿ ਯਾਵ ਏਕੂਨਸਤ੍ਤਤਿ.
ਸਤ੍ਤਤਿ, ਏਕਸਤ੍ਤਤਿ, ਦ੍ਵੇਸਤ੍ਤਤਿ ਦ੍ਵਾਸਤ੍ਤਤਿ ਦ੍ਵਿਸਤ੍ਤਤਿ, ਤੇਸਤ੍ਤਤਿ ਤਿਸਤ੍ਤਤਿ. ਦ੍ਵੇਸਤ੍ਤਰਿ ਦ੍ਵਾਸਤ੍ਤਰਿ ਦ੍ਵਿਸਤ੍ਤਰਿ, ਚਤੁਸਤ੍ਤਤਿ, ਪਞ੍ਚਸਤ੍ਤਤਿ, ਚਤੁਸਤ੍ਤਰਿ, ਪਞ੍ਚਸਤ੍ਤਰੀਤਿ ਯਾਵ ਏਕੂਨਾਸੀਤਿ.
ਅਸੀਤਿ, ਏਕਾਸੀਤਿ, ਦ੍ਵਾਸੀਤਿ, ਯਾਗਮੇ ਦ੍ਵਿਯਾਸੀਤਿ, ਤੇਅਸੀਤਿ ਤਿਯਾਸੀਤਿ, ਚਤੁਰਾਸੀਤਿ, ਪਞ੍ਚਾਸੀਤਿ ਇਚ੍ਚਾਦਿ ਯਾਵ ਏਕੂਨਨਵੁਤਿ.
ਨਵੁਤਿ, ਏਕਨਵੁਤਿ, ਦ੍ਵੇਨਵੁਤਿ ਦ੍ਵਾਨਵੁਤਿ ਦ੍ਵਿਨਵੁਤਿ, ਤੇਨਵੁਤਿ ਤਿਨਵੁਤਿ, ਚਤੁਨਵੁਤਿ, ਪਞ੍ਚਨਵੁਤਿ ਇਚ੍ਚਾਦਿ ਯਾਵ ਏਕੂਨਸਤਂ, ਏਤਂ ਨਪੁਂਸਕਲਿਙ੍ਗ+ਮੇਕਵਚਨਨ੍ਤਂ.
ਸਤਂ, ਭੋ ਸਤ ਸਤਾ, ਸਤਂ, ਸਤਂ. ਸਤੇਨ, ਕਰਣੇ ਸਤੇਨ. ਸਤਸ੍ਸ, ਸਤਾ ਸਤਮ੍ਹਾ ਸਤਸ੍ਮਾ, ਸਤਸ੍ਸ, ਸਤੇ ਸਤਮ੍ਹਿ ਸਤਸ੍ਮਿਂ. ਏਵਂ ਏਕਸਤਤੋ ਪਭੁਤਿ ਯਾਵ ਸਹਸ੍ਸਂ.
ਕੋਟਿ ਪਕੋਟਿ ਕੋਟਿਪ੍ਪਕੋਟਿ ਅਕ੍ਖੋਭਿਣਿਯੋ ਇਤ੍ਥਿਲਿਙ੍ਗੇ+ਕਵਚਨਨ੍ਤਾ. ਵਗ੍ਗਭੇਦੇ ਤੁ ਸਬ੍ਬਾਸਮ੍ਪਿ ਸਂਖ੍ਯਾਨਂ ਬਹੁਵਚਨੋਪਿ ਹੋਤੇਵ ‘‘ਦ੍ਵੇਵੀਸਤਿਯੋ ਜਿਨਦਨ੍ਤਾ’’ ‘‘ਤਿਸ੍ਸੋ ਵੀਸਤਿਯੋ ਦਿਨਘਟਿਕਾ’’ ਇਚ੍ਚਾਦਿ.
ਦਸਦਸਕਂ ਸਤਂ ਨਾਮ, ਦਸਸਤਂ ਸਹਸ੍ਸਂ ਨਾਮ, ਦਸਸਹਸ੍ਸਂ ਨਹੁਤਂ, ਦਸਨਹੁਤਂ ਲਕ੍ਖਂ, ਸਤਸਹਸ੍ਸਨ੍ਤਿਪਿ ਵੁਚ੍ਚਤਿ.
ਲਕ੍ਖਸਤਂ ਕੋਟਿ, ਕੋਟਿਲਕ੍ਖਸਤਂ ਪਕੋਟਿ, ਪਕੋਟਿਲਕ੍ਖਸਤਂ ਕੋਟਿਪ੍ਪਕੋਟਿ, ਏਵਂ ਨਹੁਤਂ, ਨਿਨ੍ਨਹੁਤਂ, ਅਕ੍ਖੋਭਿਣੀ, ਬਿਨ੍ਦੁ, ਅਬ੍ਬੁਦਂ, ਨਿਰਬ੍ਬੁਦਂ, ਅਹਹਂ, ਅਬਬਂ, ਅਟਟਂ, ਸੋਗਣ੍ਡਿਕਂ, ਉਪ੍ਪਲਂ, ਕੁਮੁਦਂ, ਪੁਣ੍ਡਰੀਕਂ, ਪਦੁਮਂ, ਕਥਾਨਂ, ਮਹਾਕਥਾਨਂ, ਅਸਙ੍ਖ੍ਯੇਯ੍ਯਨ੍ਤਿ ਯਥਾਕ੍ਕਮਂ ਸਤਲਕ੍ਖਗੁਣਂ ਵੇਦਿਤਬ੍ਬਂ.
ਇਚ੍ਚੇਵਂ ਠਾਨਤੋ ਠਾਨਂ, ਸਤਲਕ੍ਖਗੁਣਂ ਮਤਂ;
ਕੋਟਿਪ੍ਪਭੁਤੀਨਂ ਵੀਸ-ਸਙ੍ਖ੍ਯਾਨਞ੍ਚ ਯਥਾਕ੍ਕਮਨ੍ਤਿ.
ਅਥਾ+ਸਂਖ੍ਯਾ ਵੁਚ੍ਚਤੇ, ਅਬ੍ਯਯਨ੍ਤਿ ਚ ਵੁਚ੍ਚਤੇ. ਤਂ ਪਾਦਿ ਚਾਦਿ, ਉਪਸਗ੍ਗਨਿਪਾਤਾਤਿ ਚ ਦੁਵਿਧਂ.
ਪ ਪਰਾ ਅਪ ਸਂ ਅਨੁ ਅਵ ਓ ਨਿ ਦੁ ਵਿ ਅਧਿ ਅਪਿ ਅਤਿ ਸੁ ਉ ਅਭਿ ਪਤਿ ਪਰਿ ਉਪ ਆ ਇਮੇ ਵੀਸਤਿ ਪਾਦਯੋ. ਪਾਦਯੋ ਹਿ ਜੋਤਕਾ, ਨ ਵਾਚਕਾ.
ਤਤ੍ਥ ਪ-ਸਦ੍ਦੋ ਪਕਾਰਾ+ਦਿਕਮ੍ਮ, ਪਧਾਨ+ਨ੍ਤੋਭਾਵ, ਵਿਯੋਗ, ਤਪ੍ਪਰ, ਭੁਸਤ੍ਥ, ਸਮ੍ਭਵ, ਤਿਤ੍ਤਿ, ਅਨਾਵਿਲ, ਪਤ੍ਥਨਾਦੀਸੁ. ਯਥਾ ਪਕਾਰੇ-ਪਞ੍ਞਾ. ਆਦਿਕਮ੍ਮੇ-ਵਿਪ੍ਪਕਤਂ, ਪਧਾਨੇ-ਪਣੀਤਂ, ਅਨ੍ਤੋਭਾਵੇ-ਪਕ੍ਖਿਤ੍ਤਂ, ਖਿਤ੍ਤਨ੍ਤਿ ਪੇਰਣਂ, ਪਕ੍ਖਿਤ੍ਤਨ੍ਤਿ ਅਨ੍ਤੋਕਰਣਂ, ਧਾਤ੍ਵਤ੍ਥਸ੍ਸ ਬਾਧਿਤਤ੍ਤਾ. ਵੁਤ੍ਥਞ੍ਹਿ –
ਧਾਤ੍ਵਤ੍ਥਂ ਬਾਧਤੇ ਕੋਚਿ, ਕੋਚਿ ਤਂ ਅਨੁਵਤ੍ਤਤੇ;
ਤਮੇਵ+ਞ੍ਞੋ ਵਿਸੇਸੇਤਿ, ਉਪਸਗ੍ਗਗਤੀ ਤਿਧਾਤਿ.
ਏਤ੍ਥ ਚ ‘‘ਅਨੁਰੁਦ੍ਧਕਾ ਮੇ ਸਙ੍ਗਾਮਯੁਦ੍ਧੇ’’ਤਿ ਚ ਇਮੇ ਉਪਸਗ੍ਗਾ ਧਾਤ੍ਵਤ੍ਥਂ ਵਿਸੇਸੇਨ੍ਤਿ ਨਾਮ. ਵਿਯੋਗੇ-ਪਵਾਸੀ, ਤਪ੍ਪਰੇ-ਪਾਚਰਿਯੋ, ਭੁਸਤ੍ਥੇ-ਪਵੁਦ੍ਧਕਾਯੋ, ਸਮ੍ਭਵੇ-ਹਿਮਵਨ੍ਤਾ ਗਙ੍ਗਾ ਪਭਵਤਿ, ਤਿਤ੍ਤਿਯਂ-ਪਹੂਤ+ਮਨ੍ਨਂ, ਅਨਾਵਿਲੇ-ਪਸਨ੍ਨ+ਮੁਦਕਂ, ਪਤ੍ਥਨੇ-ਪਣਿਹਿਤਂ.
ਪਰਾਇਤਿ ਪਰਿਹਾਨਿ, ਪਰਾਜਯ, ਗਤਿ, ਵਿਕ੍ਕਮਾ+ਮਸਨਾਦੀਸੁ. ਯਥਾ ਪਰਿਹਾਨਿਯਂ-ਪਰਾਭਵੋ. ਪਰਾਜਯੇ-ਪਰਾਜਿਤੋ, ਗਤਿਯਂ-ਪਰਾਯਨਂ, ਵਿਕ੍ਕਮੇ-ਪਰਕ੍ਕਮਤਿ, ਆਮਸਨੇ-ਅਙ੍ਗਸ੍ਸ ਪਰਾਮਸਨਂ.
ਅਪਇਤਿ ਅਪਗਤ, ਗਰਹ, ਵਜ੍ਜਨ, ਪੂਜਾ, ਪਦੁਸ੍ਸਨਾਦੀਸੁ. ਯਥਾ ਅਪਗਤੇ-ਅਪਮਾਨੋ ਅਪੇਤੋ, ਗਰਹੇ-ਅਪਗਬ੍ਭੋ, ਵਜ੍ਜਨੇ-ਅਪਸਾਲਾਯ ਆਯਨ੍ਤਿ ਵਾਣਿਜਾ, ਪੂਜਾਯਂ-ਵੁਦ੍ਧਾਪਚਾਯੀ, ਪਦੁਸ੍ਸਨੇ-ਅਪਰਜ੍ਝਨ੍ਤਿ.
ਸਂਇਤਿ ਸਮੋਧਾਨ, ਸਮ੍ਮਾਸਮ, ਸਮਨ੍ਤਭਾਵ, ਸਂਗਤ, ਸਂਖੇਪ, ਭੁਸਤ੍ਥ, ਸਹ+ਪ੍ਪਤ੍ਥ, ਪਭਵਾ+ਭਿਮੁਖਭਾਵ, ਵਿਧਾਨ, ਪੁਨਪ੍ਪੁਨ, ਕਰਣ, ਸਮਿਦ੍ਧਾਦੀਸੁ. ਯਥਾ ਸਮੋਧਾਨੇ-ਸਨ੍ਧਿ, ਸਮ੍ਮਾਸਮੇ-ਸਮਾਧਿ, ਸਮ੍ਪਯੁਤ੍ਤੋ, ਸਮਨ੍ਤਭਾਵੇ-ਸਂਕਿਣ੍ਣਂ, ਸਮੁਲ੍ਲਪਨਾ, ਸਂਗਤੇ-ਸਙ੍ਗਮੋ, ਸਂਖੇਪੇ-ਸਮਾਸੋ, ਭੁਸਤ੍ਥੇ-ਸਾਰਤ੍ਥੋ, ਸਹਤ੍ਥੇ-ਸਂਵਾਸੋ, ਅਪ੍ਪਤ੍ਥੇ-ਸਮਗ੍ਘੋ, ਪਭਵੇ-ਸਮ੍ਭਵੋ, ਅਭਿਮੁਖਭਾਵੇ-ਸਮ੍ਮੁਖਂ. ਸਂਗਤੇ-ਸਂਗਣ੍ਹਾਤਿ, ਵਿਧਾਨੇ-ਸਂਵੁਤਂ, ਪੁਨਪ੍ਪੁਨਕਰਣੇ-ਸਨ੍ਧਾਵਤਿ, ਸਮਿਦ੍ਧਿਯਂ-ਸਮ੍ਪਨ੍ਨੋ.
ਅਨੁਇਤਿ ਅਨੁਗਤਾ+ਨੁਪਚ੍ਛਿਨ੍ਨ, ਪਚ੍ਛਾਤ੍ਥ, ਭੁਸਤ੍ਥ, ਸਾਦਿਸ੍ਸ, ਹੀਨ, ਤਤਿਯਤ੍ਥ, ਲਕ੍ਖਣਿ+ਤ੍ਥਮ੍ਭੂਤਕ੍ਖਾਨ, ਭਾਗ, ਵਿਚ੍ਛਾਦੀਸੁ. ਅਨੁਗਤੇ-ਅਨ੍ਵੇਤਿ, ਅਨੁਪਚ੍ਛਿਨ੍ਨੇ-ਅਨੁਸਯੋ, ਪਚ੍ਛਾਤ੍ਥੇ-ਅਨੁਰਥਂ, ਭੁਸਤ੍ਥੇ-ਅਨੁਰਤ੍ਤੋ, ਸਾਦਿਸ੍ਸੇ-ਅਨੁਰੂਪਂ, ਹੀਨੇ-ਅਨੁਸਾਰਿਪੁਤ੍ਤਂ ਪਞ੍ਞਵਨ੍ਤੋ, ਤਤਿਯਤ੍ਥੇ-ਨਦਿ+ਮਨ੍ਵਵਸਿਤਾ ਸੇਨਾ, ਲਕ੍ਖਣੇਰੁਕ੍ਖ+ਮਨੁਵਿਜ੍ਜੋਤਤੇ ਵਿਜ੍ਜੁ, ਇਤ੍ਥਮ੍ਭੂਤਖ੍ਯਾਨੇ-ਸਾਧੁ ਦੇਵਦਤ੍ਤੋ ਮਾਤਰ+ਮਨੁ, ਭਾਗੇ-ਯ+ਦੇਤ੍ਥ ਮਂ ਅਨੁ ਸਿਯਾ, ਤਂ ਦੀਯਤੁ, ਵਿਚ੍ਛਾਯਂ-ਰੁਕ੍ਖਂ ਰੁਕ੍ਖਂ ਅਨੁ ਵਿਜ੍ਜੋਤਤੇ ਚਨ੍ਦੋ.
ਅਵਇਤਿ ਅਧੋਭਾਗ, ਵਿਯੋਗ, ਪਰਿਭਵ, ਜਾਨਨ, [ਸੁਦ੍ਧਿ] ਨਿਚ੍ਛਯ, ਦੇਸ, ਥੇਯ੍ਯਾਦੀਸੁ. ਅਧੋਭਾਗੇ-ਅਵਕ੍ਖਿਤ੍ਤਚਕ੍ਖੁ, ਵਿਯੋਗੇ-ਅਵਕੋਕਿਲਂ ਵਨਂ, ਪਰਿਭਵੇ-ਅਵਜਾਨਨਂ, ਅਵਮਞ੍ਞਤਿ, ਜਾਨਨੇ-ਅਵਗਚ੍ਛਤਿ. [ਸੁਦ੍ਧਿਯਂ–ਵੋਦਾਨਂ (ਰੂਪਸਿਦ੍ਧਿ)], ਨਿਚ੍ਛਯੇ-ਅਵਧਾਰਣਂ, ਦੇਸੇ-ਅਵਕਾਸੋ, ਥੇਯ੍ਯੇ-ਅਵਹਾਰੋ.
ਓਇਤਿ ਓਰੋਹਰਣ, ਨੀਹਰਣ, ਸੁਦ੍ਧਿਆਦੀਸੁ ਦਿਸ੍ਸਤਿ. ਓਰੋਹਣੇ-ਪਾਸਾਦਾ ਓਰੋਹਤਿ, ਨੀਹਰਣੇ-ਓਮੁਕ੍ਕੁਪਾਹਨੋ, ਸੁਦ੍ਧਿਯਂ-ਓਦਾਤਂ.
ਨਿਇਤਿ, ਨਿਸ੍ਸੇਸ, ਨਿਗ੍ਗਤ, ਨੀਹਰਣ,+ਨ੍ਤੋਪਵੇਸਨਾ+ਭਾਵ, ਨਿਸੇਧਨ, ਨਿਕ੍ਖਨ੍ਤ, ਪਾਤੁਭਾਵਾ+ਵਧਾਰਣ, ਵਿਭਜਨ, ਉਪਮੁ+ਪਧਾਰਣਾ+ਵਸਾਨ, ਛੇਕ, ਨੀਹਰਣਾ+ਵਰਣਾਦੀਸੁ. ਨਿਸ੍ਸੇਸੇ-ਨਿਰੁਤ੍ਤਿ, ਨਿਗ੍ਗਤੇ-ਨਿਕ੍ਕਿਲੇਸੋ, ਨਿਯ੍ਯਾਤਿ, ਨੀਹਰਣੇ-ਨਿਦ੍ਧਾਰਣਂ, ਅਨ੍ਤੋਪਵੇਸਨੇ-ਨਿਖਾਤੋ, ਅਭਾਵੇ-ਨਿਮ੍ਮਕ੍ਖਿਕਂ, ਨਿਸੇਧੇ-ਨਿਵਾਰੇਤਿ, ਨਿਕ੍ਖਨ੍ਤੇ-ਨਿਬ੍ਬਾਨਂ, ਪਾਤੁਭਾਵੇ-ਨਿਮ੍ਮਿਤਂ, ਅਵਧਾਰਣੇ-ਨਿਚ੍ਛਯੋ, ਵਿਭਜਨੇ-ਨਿਦ੍ਦੇਸੋ. ਉਪਮਾਯਂ-ਨਿਦਸ੍ਸਨਂ, ਉਪਧਾਰਣੇ-ਨਿਸਾਮਨਂ, ਅਵਸਾਨੇ-ਨਿਟ੍ਠਿਤਂ, ਛੇਕੇ-ਨਿਪੁਣੋ, ਨੀਹਰਣੇ-ਨੀਹਰਤਿ, ਇਸ੍ਸ ਦੀਘੋ. ਆਵਰਣੇ-ਨੀਵਰਣਂ.
ਦੁਇਤਿ ਅਸੋਭਣਾ+ਭਾਵ, ਕੁਚ੍ਛਿਤਾ+ਸਮਿਦ੍ਧਿ, ਕਿਚ੍ਛ, ਵਿਰੂਪਤਾਦੀਸੁ. ਅਸੋਭਣੇ-ਦੁਗ੍ਗਨ੍ਧੋ, ਅਭਾਵੇ-ਦੁਬ੍ਭਿਕ੍ਖਂ, ਕੁਚ੍ਛਿਤੇ – ਦੁਕ੍ਕਟਂ. ਅਸਮਿਦ੍ਧਿਯਂ-ਦੁਸ੍ਸਸ੍ਸਂ, ਕਿਚ੍ਛੇ-ਦੁਕ੍ਕਰਂ, ਵਿਰੂਪਤਾਯਂ-ਦੁਬ੍ਬਣ੍ਣੋ ਦੁਮ੍ਮੁਖੋ.
ਵਿਇਤਿ ਵਿਸੇਸ, ਵਿਵਿਧ, ਵਿਰੁਦ੍ਧ, ਵਿਗਤ, ਵਿਯੋਗ, ਵਿਰੂਪਤਾਦੀਸੁ. ਵਿਸੇਸੇ-ਵਿਮੁਤ੍ਤਿ, ਵਿਸਿਟ੍ਠੋ, ਵਿਵਿਧੇ-ਵਿਮਤਿ, ਵਿਰੁਦ੍ਧੇ-ਵਿਵਾਦੋ, ਵਿਗਤੇ-ਵਿਮਲਂ, ਵਿਯੋਗੇ-ਵਿਪ੍ਪਯੁਤ੍ਤੋ, ਵਿਰੂਪਤਾਯਂ-ਵਿਰੂਪੋ.
ਅਧਿਇਤਿ ਅਧਿਕਿ+ਸ੍ਸਰੂ+ਪਰਿਭਾਵਾ+ਧਿਭਵਨ+ਜ੍ਝਾਯਾ+ਧਿਟ੍ਠਾਨ, ਨਿਚ੍ਛਯ, ਪਾਪੁਣਨਾਦੀਸੁ. ਅਧਿਕੇ-ਅਧਿਸੀਲਂ, ਇਸ੍ਸਰੇ-ਅਧਿਪਤਿ, ਅਧਿ ਬ੍ਰਹ੍ਮਦਤ੍ਤੇ ਪਞ੍ਚਾਲਾ, ਉਪਰਿਭਾਵੇ-ਅਧਿਰੋਹਤਿ, ਪਥਵਿਂ ਅਧਿਸੇਸ੍ਸਤਿ, ਅਧਿਭਵਨੇ-ਅਧਿਭਵਤਿ, ਅਜ੍ਝਾਯਨੇ-ਬ੍ਯਾਕਰਣ+ਮਧੀਤੇ, ਅਧਿਟ੍ਠਾਨੇ-ਭੂਮਿਕਮ੍ਪਾਦਿਂ ਅਧਿਟ੍ਠਾਤਿ, ਨਿਚ੍ਛਯੇ-ਅਧਿਮੋਕ੍ਖੋ, ਪਾਪੁਣਨੇ-ਭੋਗਕ੍ਖਨ੍ਧਂ ਅਧਿਗਚ੍ਛਤਿ.
ਅਪਿਇਤਿ ਸਮ੍ਭਾਵਨਾ+ਪੇਕ੍ਖਾ, ਸਮੁਚ੍ਚਯ, ਗਰਹ, ਪਞ੍ਹਾਦੀਸੁ. ਸਮ੍ਭਾਵਨਾਯਂ-ਅਪਿ ਦਿਬ੍ਬੇਸੁ ਕਾਮੇਸੁ, ਮੇਰੁਮ੍ਪਿ ਵਿਨਿਵਿਜ੍ਝਿਤ੍ਵਾ ਗਚ੍ਛੇਯ੍ਯ, ਅਪੇਕ੍ਖਾਯਂ-ਅਯਮ੍ਪਿ ਧਮ੍ਮੋ ਅਨਿਯਤੋ, ਸਮੁਚ੍ਚਯੇ-ਇਤਿਪਿ ਅਰਹਂ, ਅਨ੍ਤਮ੍ਪਿ ਅਨ੍ਤਗੁਣਮ੍ਪਿ ਆਦਾਯ, ਗਰਹੇ-ਅਪਿ ਅਮ੍ਹਾਕਂ ਪਣ੍ਡਿਤਕ, ਪਞ੍ਹੇ-ਅਪਿ ਭਨ੍ਤੇ ਭਿਕ੍ਖਂ ਲਭਿਤ੍ਥ.
ਅਤਿਇਤਿ ਅਤਿਕ੍ਕਮਨਾ+ਤਿਕ੍ਕਨ੍ਤਾ+ਤਿਸਯ, ਭੁਸਤ੍ਥਾਦੀਸੁ. ਅਤਿਕ੍ਕਮੇ-ਅਤਿਰੋਚਤਿ ਅਮ੍ਹੇਹਿ, ਅਤੀਤੋ, ਅਤਿਕ੍ਕਨ੍ਤੇ-ਅਚ੍ਚਨ੍ਤਂ, ਅਤਿਸਯੇ-ਅਤਿਕੁਸਲੋ, ਭੁਸਤ੍ਥੇ-ਅਤਿਕੋਧੋ, ਅਤਿਵੁਦ੍ਧਿ.
ਸੁਇਤਿ ਸੋਭਣ, ਸੁਟ੍ਠੁ, ਸਮ੍ਮਾ, ਸਮਿਦ੍ਧਿ, ਸੁਖਤ੍ਥਾਦੀਸੁ. ਸੋਭਣੇ-ਸੁਗਨ੍ਧੋ, ਸੁਟ੍ਠੁ+ਸਮ੍ਮਾਦਤ੍ਥੇਸੁ-ਸੁਟ੍ਠੁ ਗਤੋ ਸੁਗਤੋ, ਸਮ੍ਮਾ ਗਤੋਤਿਪਿ ਸੁਗਤੋ, ਸਮਿਦ੍ਧਿਯਂ-ਸੁਭਿਕ੍ਖਂ, ਸੁਖਤ੍ਥੇ-ਸੁਕਰੋ.
ਉਇਤਿ ਉਗ੍ਗਤੁ+ਦ੍ਧਕਮ੍ਮ, ਪਧਾਨ, ਵਿਯੋਗ, ਸਮ੍ਭਵ, ਅਤ੍ਤਲਾਭ, ਸਤ੍ਤਿ, ਸਰੂਪਕਥਨਾਦੀਸੁ. ਉਗ੍ਗਤੇ-ਉਗ੍ਗਚ੍ਛਤਿ, ਉਦ੍ਧਕਮ੍ਮੇ-ਆਸਨਾ ਉਟ੍ਠਿਤੋ, ਉਕ੍ਖੇਪੋ, ਪਧਾਨੇ-ਉਤ੍ਤਮੋ, ਲੋਕੁਤ੍ਤਰੋ, ਵਿਯੋਗੇ-ਉਬ੍ਭਾਸਿਤੋ, ਸਮ੍ਭਵੇ-ਉਬ੍ਭੁਤੋ, ਅਤ੍ਤਲਾਭੇ-ਉਪ੍ਪਨ੍ਨਂ ਞਾਣਂ, ਸਤ੍ਤਿਯਂ-ਉਸ੍ਸਹਤਿ ਗਨ੍ਤੁਂ, ਸਰੂਪਕਥਨੇ-ਉਦ੍ਦਿਸਤਿ ਸੁਤ੍ਤਂ.
ਅਭਿਇਤਿ ਅਭਿਮੁਖਭਾਵ, ਵਿਸਿਟ੍ਠਾ+ਧਿਕੁ+ਦ੍ਧਕਮ੍ਮ, ਕੁਲ, ਸਾਰੁਪ੍ਪ, ਵਨ੍ਦਨ, ਲਕ੍ਖਣਿ+ਤ੍ਥਮ੍ਭੂਤਕ੍ਖਾਨ, ਵਿਚ੍ਛਾਦੀਸੁ. ਅਭਿਮੁਖਭਾਵੇ-ਅਭਿਮੁਖੋ, ਅਭਿਕ੍ਕਮਤਿ, ਵਿਸਿਟ੍ਠੇ-ਅਭਿਧਮ੍ਮੋ, ਅਧਿਕੇ-ਅਭਿਵਸਤਿ, ਉਦ੍ਧਕਮ੍ਮੇ-ਅਭਿਰੁਹਤਿ. ਕੁਲੇ-ਅਭਿਜਾਤੋ, ਸਾਰੁਪ੍ਪੇ-ਅਭਿਰੂਪੋ, ਵਨ੍ਦਨੇ-ਅਭਿਵਾਦੇਤਿ, ਲਕ੍ਖਣਾਦੀਸੁ ਪੁਰਿਮਸਮਂ.
ਪਤਿਇਤਿ ਪਟਿਗਤ, ਪਟਿਲੋਮ, ਪਟਿਨਿਧਿ, ਪਟਿਦਾਨ, ਨਿਸੇਧ, ਨਿਵਤ੍ਤਨ, ਸਾਦਿਸ੍ਸ, ਪਟਿਕਰਣਾ+ਦਾਨ, ਪਟਿਬੋਧ, ਪਟਿਚ੍ਚ, ਲਕ੍ਖਣਿਤ੍ਥਮ੍ਭੂਤਕ੍ਖਾਨ, ਭਾਗ, ਵਿਚ੍ਛਾਦੀਸੁ. ਪਟਿਗਤੇ-ਪਚ੍ਚਕ੍ਖਂ, ਪਟਿਲੋਮੇ-ਪਟਿਸੋਤਂ, ਪਟਿਨਿਧਿਮ੍ਹਿ-ਆਚਰਿਯਤੋ ਪਤਿ ਸਿਸ੍ਸੋ, ਪਟਿਦਾਨੇ-ਤੇਲਤ੍ਥਿਕਸ੍ਸ ਘਤਂ ਪਟਿਦਦਾਤਿ, ਨਿਸੇਧੇ-ਪਟਿਸੇਧੇਤਿ, ਨਿਵਤ੍ਤਨੇ-ਪਟਿਕ੍ਕਮਤਿ, ਸਾਦਿਸ੍ਸੇ-ਪਟਿਰੂਪਕਂ, ਪਟਿਕਰਣੇ-ਪਟਿਕਾਰੋ, ਆਦਾਨੇ-ਪਟਿਗ੍ਗਣ੍ਹਾਤਿ, ਪਟਿਬੋਧੇ-ਪਟਿਵੇਧੋ, ਪਟਿਚ੍ਚੇ-ਪਚ੍ਚਯੋ, ਲਕ੍ਖਣਾਦੀਸੁ ਪੁਰਿਮਸਮਂ.
ਪਰਿਇਤਿ ਸਮਨ੍ਤਤੋਭਾਵ, ਪਰਿਚ੍ਛੇਦ, ਵਜ੍ਜਨਾ+ਲਿਙ੍ਗਨ, ਨਿਵਸਨ, ਪੂਜਾ, ਭੋਜਨਾ+ਵਜਾਨਨ, ਦੋਸਕ੍ਖਾਨ, ਲਕ੍ਖਣਾਦੀਸੁ. ਸਮਨ੍ਥ- ਤੋਭਾਵੇ-ਪਰਿਵੁਤੋ, ਪਰਿਚ੍ਛੇਦੇ-ਪਰਿਞ੍ਞੇਯ੍ਯਂ, ਵਜ੍ਜਨੇ-ਪਰਿਹਰਤਿ, ਆਲਿਙ੍ਗਨੇ-ਪਰਿਸ੍ਸਜਤਿ, ਨਿਵਸਨੇ-ਯੋ ਵਤ੍ਥਂ ਪਰਿਦਹੇਸ੍ਸਤਿ, ਪੂਜਾਯਂ-ਪਰਿਚਰਿਯਾ, ਭੋਜਨੇ-ਭਿਕ੍ਖੁਂ ਪਰਿਵਿਸਤਿ, ਅਵਜਾਨਨੇ-ਪਰਿਭਵਤਿ. ਦੋਸਕ੍ਖਾਨੇ-ਪਰਿਭਾਸਤਿ, ਲਕ੍ਖਣਾਦੀਸੁ-ਰੁਕ੍ਖਂ ਪਰਿ ਵਿਜ੍ਜੋਤਤੇ ਵਿਜ੍ਜੁ ਇਚ੍ਚਾਦਿ.
ਉਪਇਤਿ ਉਪਗਮਨ, ਸਮੀਪੂ+ਪਪਤ੍ਤਿ, ਸਾਦਿਸ੍ਸਾ+ਧਿਕੁ+ਪਰਿਭਾਵਾ+ਨਸਨ, ਦੋਸਕ੍ਖਾਨ, ਸਞ੍ਞਾ, ਪੁਬ੍ਬਕਮ੍ਮ, ਪੂਜਾ, ਗਯ੍ਹਾਕਾਰ, ਭੁਸਤ੍ਥਾਦੀਸੁ. ਉਪਗਮਨੇ-ਨਿਸਿਨ੍ਨਂ ਵਾ ਉਪਨਿਸੀਦੇਯ੍ਯ, ਸਮੀਪੇ-ਉਪਨਗਰਂ, ਉਪਪਤ੍ਤਿਯਂ-ਸਗ੍ਗਂ ਲੋਕਂ ਉਪਪਜ੍ਜਤਿ, ਅਥ ਵਾ ਉਪਪਤ੍ਤਿ=ਯੁਤ੍ਤਿ, ਯਥਾ ਉਪਪਤ੍ਤਿਤੋ ਇਕ੍ਖਤੀਤਿ ਉਪੇਕ੍ਖਾ, ਸਾਦਿਸ੍ਸੇ-ਉਪਮਾਨਂ, ਉਪਮਾ, ਅਧਿਕੇ-ਉਪਖਾਰਿਯਂ ਦੋਣੋ, ਉਪਰਿਭਾਵੇ-ਉਪਸਮ੍ਪਨ੍ਨੋ, ਅਨਸਨੇ-ਉਪਵਾਸੋ, ਦੋਸਕ੍ਖਾਨੇ-ਪਰਂ ਉਪਵਦਤਿ, ਸਞ੍ਞਾਯਂ-ਉਪਧਾ, ਉਪਸਗ੍ਗੋ, ਪੁਬ੍ਬਕਮ੍ਮੇ-ਉਪਕ੍ਕਮੋ, ਉਪਕਾਰੋ, ਪੂਜਾਯਂ-ਬੁਦ੍ਧੁਪਟ੍ਠਾਕੋ, ਮਾਤੁਪਟ੍ਠਾਨਂ, ਗਯ੍ਹਾਕਾਰੇ-ਸੋਚੇਯ੍ਯਪਚ੍ਚੁਪਟ੍ਠਾਨਂ, ਭੁਸਤ੍ਥੇ-ਉਪਾਦਾਨਂ, ਉਪਾਯਾਸੋ, ਉਪਨਿਸ੍ਸਯੋਤਿ.
ਆਇਤਿ ਅਭਿਮੁਖਭਾਵੁ+ਦ੍ਧਕਮ੍ਮ+ਮਰਿਯਾਦਾ+ਭਿਵਿਧਿ, ਪਤ੍ਤਿ+ਚ੍ਛਾ, ਪਰਿਸ੍ਸਜਨ, ਆਦਿਕਮ੍ਮ, ਗਹਣ, ਨਿਵਾਸਨ, ਸਮੀਪ, ਆਵ੍ਹਾਨਾਦੀਸੁ. ਅਭਿਮੁਖਭਾਵੇ-ਆਗਚ੍ਛਨ੍ਤਿ, ਉਦ੍ਧਕਮ੍ਮੇ-ਆਰੋਹਤਿ, ਮਰਿਯਾਦਾਯਂ-ਆਪਬ੍ਬਤਾ ਖੇਤ੍ਤਂ, ਅਭਿਵਿਧਿਮ੍ਹਿ-ਆਕੁਮਾਰਂ ਯਸੋ ਕਚ੍ਚਾਯਨਸ੍ਸ, ਪਤ੍ਤਿਯਂ-ਆਪਤ੍ਤਿਂ ਆਪਨ੍ਨੋ, ਇਚ੍ਛਾਯਂ-ਆਕਙ੍ਖਾ, ਪਰਿਸ੍ਸਜਨੇ-ਆਲਿਙ੍ਗਨਂ, ਆਦਿਕਮ੍ਮੇ-ਆਰਮ੍ਭੋ, ਗਹਣੇ-ਆਦੀਯਤਿ, ਆਲਿਙ੍ਗਤਿ, (ਆਲਿਮ੍ਪਤਿ, ਰੂ), ਨਿਵਾਸੇ-ਆਵਸਥੋ, ਆਵਾਸੋ, ਸਮੀਪੇ-ਆਸਨ੍ਨਂ, ਆਵ੍ਹਾਨੇ-ਆਮਨ੍ਤੇਤਿ.
ਪ ਪਰਾ+ਪ ਸ+ਮਨ੍ਵ+ਵ, ਓ ਨਿ ਦੁ ਰਭਿ ਬ੍ਯਾ+ਧਿਸੁ;
ਅਤਿ ਨਿ ਪ੍ਪਤਿ ਪਰਿ ਅਪਯੋ, ਉਪ ਆ ਇਤਿ ਵੀਸਤਿ;
ਏਸ ਹਿ ਭੋ ਉਪਸਗ੍ਗ-ਵਿਧਿ+ਕ੍ਕਮਤੋ ਕਥਿਤੋ.
ਏਤ੍ਥ ਚ –
ਉਪਸਗ੍ਗ+ਨਿਪਾਤਾ ਚ, ਪਚ੍ਚਯਾ ਚ ਇਮੇ ਤਯੋ;
ਨੇਕੇ+ਨੇਕਤ੍ਥਵਾਚਕਾ, ਇਤਿ ਨੇਰੁਤ੍ਤਿਕਾ+ਬ੍ਰਵੁਂ.
੧੧੮. ਅਸਂਖ੍ਯੇਹਿ ਸਬ੍ਬਾਸਂ
ਅਵਿਜ੍ਜਮਾਨਸਂਖ੍ਯੇਹਿ ਪਰਾਸਂ ਸਬ੍ਬਾਸਂ ਵਿਭਤ੍ਤੀਨਂ ਲੋਪੋ ਹੋਤਿ. ਨ ਸਨ੍ਤਿ ਏਕਵਚਨਾਦਿਸਂਖ੍ਯਾ ਏਤੇਸਨ੍ਤਿ ਅਸਂਖ੍ਯਾ, ਤੇਸਂ ਅਸਂਖ੍ਯਾਨਂ ਵਿਭਤ੍ਤੀਨਂ ਭੇਦੇ ਅਸਤਿਪਿ ਸ੍ਯਾਦਿਵਿਧਾਨਂ ‘‘ਮਾ ਨੋ ਅਜ੍ਜ ਵਿਕਨ੍ਤਿਂਸੂ’’ਤਿਆਦੋ ਵਿਭਤ੍ਯਨ੍ਤਤ੍ਤਾ ਪਦਤ੍ਤਸਿਦ੍ਧੀਤਿ ਵੋ+ਨੋਆਦੀਨਂ ਸਿਦ੍ਧਿਯਾ ਚ ਤੇਸਂ ਪਠਮਾਦਿਅਤ੍ਥੇ ਦਸ੍ਸਨਤੋ ਚ ਹੋਤਿ. ਪਹਾਰੋ ਪਰਾਭਵੋ ਅਪਹਾਰੋ ਸਂਹਾਰੋ ਅਵਹਾਰੋ ਓਹਾਰੋ ਇਚ੍ਚਾਦਿ ਹੋਤਿ.
ਉਪੇਚ੍ਚ+ਤ੍ਥਂ ਸਜਨ੍ਤੀਤਿ, ਉਪਸਗ੍ਗਾ ਹਿ ਪਾਦਯੋ;
ਚਾਦੀ ਪਦਾਦਿਮਜ੍ਝਨ੍ਤੇ, ਨਿਪਾਤਾ ਨਿਪਤਨ੍ਤੀਤਿ.
ਓਪਸਗ੍ਗਿਕਪਦਂ.
ਸਮੁਚ੍ਚਯ+ਵਿਕਪ੍ਪਨ+ਪਟਿਸੇਧ+ਪੂਰਣਾਦਿਅਤ੍ਥਂ ਅਸਤ੍ਤਵਾਚਿਕਂ ਨੇਪਾਤਿਕਂ.
ਚ-ਇਤਿ ਸਮੁਚ੍ਚਯਾ+ਨ੍ਵਾਚਯ+ਇਤਰੇਤਰਯੋਗ+ਸਮਾਹਾਰਾ+ਵਧਾਰਣਾਦੀਸੁ. ਵਾ-ਇਤਿ ਵਿਕਪ੍ਪਨੁ+ਪਮਾਨ+ਸਮੁਚ੍ਚਯ+ਵਵਤ੍ਥਿਤਵਿਭਾਸਾਦੀਸੁ. ਨ, ਨੋ, ਮਾ, ਅ, ਅਲਂ, ਹਲਂ ਇਚ੍ਚੇਤੇ ਪਟਿਸੇਧੇ. ‘‘ਦ੍ਵੇ ਪਟਿਸੇਧਾ ਪਕਤਿਅਤ੍ਥਂ ਗਮਯਨ੍ਤੀ’’ਤਿ ਞਾਯਾ ‘‘ਨ ਤੇਸਂ ਪਨ ਰੂਪਾਨਂ ਪਚ੍ਚਯਾ ਨ ਚ ਹੋਨ੍ਤੀ’’ਤਿ ਏਤ੍ਥ ਨ ਚ ਨ ਹੋਨ੍ਤਿ-ਹੋਨ੍ਤੇਵਾਤਿ ਪਕਤਿਅਤ੍ਥਂ ਗਮਯਤਿ. ਅਲਂ ਪਰਿਯਤ੍ਤਿ+ਭੂਸਨੇਸੁ ਚ.
ਪੂਰਣਤ੍ਥਂ ਦੁਵਿਧਂ ਅਤ੍ਤਪੂਰਣਂ ਪਦਪੂਰਣਞ੍ਚ, ਤਤ੍ਥ ਅਥ, ਖਲੁ, ਵਤ, ਅਥੋ, ਅਸ੍ਸੁ, ਯਗ੍ਘੇ, ਹਿ, ਚਰਹਿ, ਨਂ, ਤਂ, ਚ, ਤੁ, ਵਾ, ਵੋ, ਪਨ, ਹਵੇ, ਕੀਵ, ਹ, ਤਤੋ, ਯਥਾ, ਸੁਦਂ, ਖੋ, ਵੇ, ਹਂ, ਏਨਂ, (ਏਵਂ, ਰੂ) ਸੇਯ੍ਯਥਿਦਂ ਇਚ੍ਚੇਵਮਾਦਿ ਪਦਪੂਰਣੇ. ਤਤ੍ਥ ਅਥ-ਇਤਿ ਪਞ੍ਹਾ+ਨਨ੍ਤਰਿਯਾ+ਧਿਕਾਰਾਦੀਸੁ ਚ. ਖਲੁ-ਇਤਿ ਪਟਿਸੇਧਾ+ਵਧਾਰਣ, ਪਸਿਦ੍ਧੀਸੁ ਚ. ਵਤ+ਇਤਿ ਏਕਂਸ, ਖੇਦਾ+ਨੁਕਮ੍ਪ, ਸਂਕਪ੍ਪੇਸੁ ਚ. ਅਥੋ-ਇਤਿ ਅਨ੍ਵਾਦੇਸੇ ਚ. ਹਿ-ਇਤਿ ਹੇਤੁ, ਅਵਧਾਰਣੇਸੁ ਚ. ਤੁ-ਇਤਿ ਵਿਸੇਸ, ਹੇਤੁ, ਨਿਵਤ੍ਤਨਾਦੀਸੁ ਚ. ਪਨ-ਇਤਿ ਵਿਸੇਸੇਪਿ. ਹਵੇ+ਵੇ ਇਚ੍ਚੇਤੇ ਏਕਂਸਤ੍ਥੇਪਿ. ਹਂ-ਵਿਸਾਦ, ਵਿਮ੍ਹੇਸੁਪਿ. (ਵਿਸਾਦ, ਸਮ੍ਭਵੇਸੁ, ਰੂ). ਸੇਯ੍ਯਥਿਦਂਤਿ ਤਂ ਕਤਮਂਤਿ ਅਤ੍ਥੇਪਿ.
ਅਤ੍ਥਪੂਰਣਂ ਦੁਵਿਧਂ ਵਿਭਤ੍ਤਿਯੁਤ੍ਤਂ ਅਵਿਭਤ੍ਤਿਯੁਤ੍ਤਞ੍ਚ. ਅਤ੍ਥਿ, ਸਕ੍ਕਾ, ਲਬ੍ਭਾ ਇਚ੍ਚੇਤੇ ਪਠਮਾਯਂ. ਆਵੁਸੋ ਅਮ੍ਭੋ ਹਮ੍ਭੋ ਅਰੇ ਹਰੇ ਰੇ ਜੇ ਇਚ੍ਚੇਤੇ ਆਮਨ੍ਤਣੇ. ਦਿਵਾ ਭਿਯ੍ਯੋ (ਨਮੋ, ਰੂ) ਇਚ੍ਚੇਤੇ ਪਠਮਾਦੁਤਿਯਾਸੁ. ਸਯਂ ਸਾਮਂ ਸਂ ਸਮ੍ਮਾ ਕਿਨ੍ਤਿ ਇਚ੍ਚੇਤੇ ਤਤਿਯਤ੍ਥੇ. ਸੋ+ਤੋ+ਧਾਪਚ੍ਚਯਨ੍ਤਾ ਚ ਸੁਤ੍ਤਸੋ ਪਦਸੋ ਅਨਿਚ੍ਚਤੋ ਦੁਕ੍ਖਤੋ ਏਕਧਾ ਦ੍ਵਿਧਾ ਇਚ੍ਚਾਦਿ. ਤਵੇ+ਤੁਂ ਪਚ੍ਚਯਨ੍ਤਾ ਚਤੁਤ੍ਥਿਯਾਵ, ਕਾਤਵੇ ਦਾਤਵੇ, ਕਾਤੁਂ ਕਾਰੇਤੁਂ, (ਦਾਤੁਂ, ਰੂ) ਦਾਪੇਤੁਂ ਇਚ੍ਚਾਦਿ. ਸੋ+ਤੋਪਚ੍ਚਯਨ੍ਤਾ ਪਞ੍ਚਮਿਯਤ੍ਥੇ, ਦੀਘਸੋ ਓਰਸੋ ਰਾਜਤੋ ਵਾ ਚੋਰਤੋ ਵਾ ਇਚ੍ਚਾਦਿ. ਤੋ ਸਤ੍ਤ- ਮ੍ਯਤ੍ਥੇਪਿ ਤ੍ਰ+ਤ੍ਥਾਦਿਪਚ੍ਚਯਨ੍ਤਾ ਚ, ਏਕਤੋ ਪੁਰਤੋ ਪਚ੍ਛਤੋ ਪਸ੍ਸਤੋ ਪਿਟ੍ਠਿਤੋ ਪਾਦਤੋ ਸੀਸਤੋ ਅਗ੍ਗਤੋ ਮੂਲਤੋ, ਯਤ੍ਰ ਯਤ੍ਥ ਯਹਿਂ ਤਤ੍ਰ ਤਤ੍ਥ ਤਹਿਂ ਇਚ੍ਚਾਦਿ. ਸਮਨ੍ਤਾ ਸਾਮਨ੍ਤਾ ਪਰਿਤੋ ਅਭਿਤੋ ਸਮਨ੍ਤਤੋ ਏਕਜ੍ਝਂ ਏਕਮਨ੍ਤਂ ਹੇਟ੍ਠਾ ਉਪਰਿ ਉਦ੍ਧਂ ਅਧੋ ਤਿਰਿਯਂ ਸਮ੍ਮੁਖਾ ਪਰਮੁਖਾ ਆਵਿ ਰਹੋ ਤਿਰੋ ਉਚ੍ਚਂ ਨੀਚਂ ਅਨ੍ਤੋ ਅਨ੍ਤਰਾ ਅਨ੍ਤਰਂ ਅਜ੍ਝਤ੍ਤਂ ਬਹਿਦ੍ਧਾ ਬਾਹਿਰਾ ਬਾਹਿਰਂ ਬਹਿ ਓਰਂ ਪਾਰਂ ਆਰਾ ਆਰਕਾ ਪਚ੍ਛਾ ਪੁਰੇ ਹੁਰਂ ਪੇਚ੍ਚ ਇਚ੍ਚੇਤੇ ਸਤ੍ਤਮਿਯਾ. ਸਮ੍ਪਤਿ ਆਯਤਿ ਅਜ੍ਜ ਅਪਰਜ੍ਝ ਸੁਵੇ ਸ੍ਵੇ ਉਤ੍ਤਰਸੁਵੇ (ਕਿਸੁ, ਰੂ) ਹਿਯ੍ਯੋ ਪਰੇ (ਪਰਸੁਵੇ, ਰੂ) ਸਜ੍ਜੁ ਸਾਯਂ ਪਾਤੋ ਕਾਲਂ ਕਲ੍ਲਂ ਦਿਵਾ ਰਤ੍ਤਂ ਨਿਚ੍ਚਂ ਸਤਤਂ ਅਭਿਣ੍ਹਂ ਅਭਿਕ੍ਖਣਂ ਮੁਹੁਂ ਮੁਹੁਤ੍ਤਂ ਭੂਤਪੁਬ੍ਬਂ ਪੁਰਾ ਯਦਾ ਤਦਾ (ਕਦਾ, ਰੂ) ਇਚ੍ਚਾਦਯੋ ਕਾਲਸਤ੍ਤਮਿਯਂ. ਇਤਿ ਵਿਭਤ੍ਤਿਯੁਤ੍ਤਾਨਿ.
ਅਵਿਭਤ੍ਤਿਯੁਤ੍ਤੇਸੁ ਅਪ੍ਪੇਵ ਅਪ੍ਪੇਵਨਾਮ ਨੁ ਇਚ੍ਚੇਤੇ ਸਂਸਯਤ੍ਥੇ. ਅਦ੍ਧਾ ਅਞ੍ਞਦਤ੍ਥੁ ਤਗ੍ਘ ਜਾਤੁ ਕਾਮਂ ਸਸਕ੍ਕਂ ਇਚ੍ਚੇਤੇ ਏਕਂਸਤ੍ਥੇ. ਏਵਂ ਇਤਿ ਅਵਧਾਰਣੇ. ਕਚ੍ਚਿ ਨੁ ਨਨੁ ਕਥਂ (ਕਿਂਸੁ, ਰੂ) ਕਿਂ ਇਚ੍ਚੇਤੇ ਪੁਚ੍ਛਨਤ੍ਥੇ. ਏਵਂ ਇਤਿ ਇਤ੍ਥਂ ਇਚ੍ਚੇਤੇ ਨਿਦਸ੍ਸਨਤ੍ਥੇ. ਇਤਿ ਹੇਤੁ+ਵਾਕ੍ਯਪਰਿਸਮਤ੍ਤੀਸੁ ਚ. ਯਾਵ ਤਾਵ ਯਾਵਤਾ ਤਾਵਤਾ ਕਿਤ੍ਤਾਵਤਾ ਏਤ੍ਤਾਵਤਾ ਕੀਵ ਇਚ੍ਚੇਤੇ ਪਰਿਚ੍ਛੇਦਨਤ੍ਥੇ. ਏਵਂ ਸਾਹੁ ਲਹੁ ਓਪਾਯਿਕਂ ਪਟਿਰੂਪਂ ਆਮ ਸਾਧੁ ਇਚ੍ਚੇਤੇ ਸਮ੍ਪਟਿਚ੍ਛਨਤ੍ਥੇ. ਤਥਾ ਯਥਾ ਯਥੇਵ ਤਥੇਵ ਏਵਂ ਏਵਮੇਵ ਏਵਮ੍ਪਿ ਯਥਾਪਿ ਸੇਯ੍ਯਥਾਪਿ ਸੇਯ੍ਯਥਾਪਿਨਾਮ ਵਿਯ ਇਵ ਯਥਰਿਵ ਤਥਰਿਵ ਯਥਾਨਾਮ ਤਥਾਨਾਮ ਯਥਾਹਿ ਤਥਾਹਿ ਯਥਾਚ ਤਥਾਚ ਇਚ੍ਚੇਤੇ ਪਟਿਭਾਗਤ੍ਥੇ. ਯਥਾਇਤਿ ਯੋਗ੍ਗਤਾ+ਵਿਚ੍ਛਾ+ਪਦਤ੍ਥਾਨਤਿਵਤ੍ਤਿ+ਨਿਦਸ੍ਸਨੇਸੁ ਚ. ਏਵਂਇਤਿ ਉਪਦੇਸ+ਪਞ੍ਹਾਦੀਸੁ ਚ. ਕਿਞ੍ਚਾਪਿਇਤਿ ਅਨੁਗ੍ਗਹਤ੍ਥੇ. ਧਿਇਤਿ ਗਰਹੇ. ਅਹੋਇਤਿ ਗਰਹ+ਪਸਂਸਨ+ਪਤ੍ਥਨੇਸੁ. ਨਾਮਇਤਿ ਗਰਹ+ਪਸਂਸਨ+ਸਞ੍ਞਾ+ਪਞ੍ਹੇਸੁ. ਸਾਧੂਤਿ ਪਸਂਸਨ+ਯਾਚਨੇਸੁ. ਇਙ੍ਘ ਹਨ੍ਦ ਇਚ੍ਚੇਤੇ ਚੋਦਨਤ੍ਥੇ. ਸਾਧੁ ਸੁਟ੍ਠੁ ਏਵਮੇਤਂਤਿ ਅਨੁਮੋਦਨੇ. ਕਿਰਇਤਿ ਅਨੁਸ੍ਸਵਨ+ਅਸਦ੍ਧੇਯ੍ਯੇਸੁ. ਨੁਨਇਤਿ ਅਨੁਮਾਨਾ+ਨੁਸ੍ਸਰਣ+ਪਰਿਵਿਤਕ੍ਕੇਸੁ. ਕਸ੍ਮਾਤਿ ਕਾਰਣਪੁਚ੍ਛਨੇ. ਯਸ੍ਮਾ ਤਸ੍ਮਾ ਤਥਾ ਹਿ ਤੇਨ ਇਚ੍ਚੇਤੇ ਕਾਰਣਚ੍ਛੇਦਨਤ੍ਥੇ. ਸਹ ਸਦ੍ਧਿਂ ਅਮਾ (ਸਮਂ, ਰੂ) ਇਤਿ ਸਮਕ੍ਰਿਯਾਯਂ. ਵਿਨਾ ਰਿਤੇ ਵਿਪ੍ਪਯੋਗੇ. ਨਾਨਾ ਪੁਥੁ ਬਹੁਪਕਾਰੇ. ਪੁਥੁ ਵਿਸੁਂ ਅਸਙ੍ਘਾਤੇ ਚ. ਦੁਟ੍ਠੁ ਕੁ ਕੁਚ੍ਛਾਯਂ (ਜਿਗੁਚ੍ਛਾਯਂ, ਰੂ). ਪੁਨ ਅਪ੍ਪਠਮੇ. ਕਥਂ ਚਿਕਿਚ੍ਛਤ੍ਥੇ. ਧਾ ਕ੍ਖਤ੍ਤੁਂ ਸੋ ਕਿਞ੍ਚਇਤਿ ਸਂਖ੍ਯਾਵਿਭਾਗੇ. ਈਸਕਂ ਅਪ੍ਪਮਾਨੇਸੁ (ਅਪ੍ਪਮਤ੍ਤੇ, ਰੂ). ਸਣਿਕਂ ਮਨ੍ਦਤ੍ਥੇ. ਖਿਪ੍ਪਂ ਅਰਂ ਲਹੁਂ ਆਸੁ ਤੁਣ੍ਹਂ ਅਚਿਰਂ ਸੀਘਤ੍ਥੇ. ਚਿਰਂ ਚਿਰਸ੍ਸਂ ਦੀਘਕਾਲੇ. ਚੇ ਯਦਿ ਸਂਕਾ+ਵਟ੍ਠਾਨੇ. ਧੁਰਂ ਥਿਰਾ+ਵਧਾਰਣੇਸੁ (ਧੁਵਂ ਥਿਰਾ+ਵਧਾਰਣੇਸੁ, ਰੂ). ਹਾ ਵਿਸਾਦੇ. ਤੁਣ੍ਹੀ ਅਭਾਸਨੇ. ਸਚ੍ਛਿ ਪਚ੍ਚਕ੍ਖੇ. ਮੁਸਾ ਮਿਚ੍ਛਾਅਲਿਕਂ ਅਸਚ੍ਚੇ. ਸੁਵਤ੍ਥਿ ਆਸਿਟ੍ਠੇ ਇਚ੍ਚਾਦਿ.
ਤੁਨ+ਕ੍ਤ੍ਵਾਨ+ਕ੍ਤ੍ਵਾਪਚ੍ਚਯਨ੍ਤਾ ਉਸ੍ਸੁਕ੍ਕਨਤ੍ਥੇ ਭਵਨ੍ਤਿ. ਯਥਾ ਪਸ੍ਸਿਤੁਨ ਪਸ੍ਸਿਯ ਪਸ੍ਸਿਤ੍ਵਾਨ ਪਸ੍ਸਿਤ੍ਵਾ, ਦਿਸ੍ਵਾ ਦਿਸ੍ਵਾਨ ਦਸ੍ਸੇਤ੍ਵਾ ਦਾਤੁਨ ਦਤ੍ਵਾਨ ਦਤ੍ਵਾ ਉਪਾਦਾਯ ਦਾਪੇਤ੍ਵਾ ਵਿਞ੍ਞਾਯ ਵਿਚੇਯ੍ਯ ਵਿਨੇਯ੍ਯ ਸਮੇਚ੍ਚ ਨਿਹਚ੍ਚ ਉਪੇਚ੍ਚ ਆਰਬ੍ਭ ਆਗਮ੍ਮ ਇਚ੍ਚਾਦਿ.
ਵਿਭਤ੍ਤਿਯਾ ਕਤੋ ਭੇਦੋ, ਸਲਿਙ੍ਗਾਨਂ ਭਵੇ ਤਥਾ;
ਤੁਮ੍ਹਾਦੀਨਂ ਤ੍ਵ+ਲਿਙ੍ਗੇਸੁ, ਨੇਵ+ਤ੍ਥਿ ਪਾਦਿ+ਚਾਦਿਨਂ.
ਏਵਂ ਨਾਮਾਖ੍ਯਾਤੋਪਸਗ੍ਗੇਹਿ ਵਿਨਿਮੁਤ੍ਤਂ ਏਤਂ ਨਿਪਾਤਪਦਂ ਵੇਦਿਤਬ੍ਬਂ.
ਨੇਪਾਤਿਕਪਦਂ.
ਪੁਲ੍ਲਿਙ੍ਗਂ ਇਤ੍ਥਿਲਿਙ੍ਗਞ੍ਚ, ਨਪੁਂਸਕ+ਮਥਾ+ਪਰਂ;
ਤਿਲਿਙ੍ਗਞ੍ਚ ਅਲਿਙ੍ਗਞ੍ਚ, ਨਾਮਿਕਂ ਪਞ੍ਚਧਾ ਠਿਤਂ.
ਇਤਿ ਪਯੋਗਸਿਦ੍ਧਿਯਂ ਨਾਮਕਣ੍ਡੋ ਦੁਤਿਯੋ.