੨. ਨਾਮਕਣ੍ਡ
ਅਥ ਨਾਮਾਨਿ ਵੁਚ੍ਚਨ੍ਤੇ. ਤਂ ਅਤ੍ਥਾਭਿਮੁਖਂ ਨਮਨਤੋ, ਅਤ੍ਤਨਾ ਚ+ਤ੍ਥਸ੍ਸ ਨਾਮਨਤੋ ਨਾਮਂ, ਦਬ੍ਬਾਭਿਧਾਨਂ. ਤਂ ਦੁਵਿਧਂ ਸਲਿਙ੍ਗਾ+ਲਿਙ੍ਗਤੋ, ਅਨ੍ਵਤ੍ਥਰੁਲ਼੍ਹਿਤੋ ਚ, ਤਿਵਿਧਂ ਪੁਮਿ+ਤ੍ਥਿ+ਨਪੁਂਸਕਲਿਙ੍ਗਤੋ, ਰੁਕ੍ਖੋ, ਲਤਾ, ਵਨਨ੍ਤਿ. ਚਤੁਬ੍ਬਿਧਂ ਸਾਮਞ੍ਞ+ਗੁਣ+ਕ੍ਰਿਯਾ+ਯਦਿਚ੍ਛਾਨਾਮਤੋ, ਰੁਕ੍ਖੋ, ਨੀਲੋ, ਪਾਚਕੋ, ਸਿਰਿਵਡ੍ਢੋਤਿ. ਅਟ੍ਠਵਿਧਂ ਅਵਣ੍ਣਿ+ਵਣ੍ਣੁ+ਵਣ੍ਣੋ+ਕਾਰ+ਨਿਗ੍ਗਹੀਤਨ੍ਤਪਕਤਿਭੇਦਤੋ, ਏਤ੍ਥ ਕਿਂਸਦ੍ਦੋ ਨਿਗ੍ਗਹੀਤਨ੍ਤੋ. ਪਚ੍ਚਯਾ ਪਠਮਂ ਕਰੀਯਤੀਤਿ ਪਕਤਿ, ਸਦ੍ਦੋ, ਧਾਤੁ ਚ.
ਤਤ੍ਥ ਸਲਿਙ੍ਗੇਸੁ ਤਾਵ ਅਕਾਰਨ੍ਤਤੋ ਪੁਲ੍ਲਿਙ੍ਗਾ ਸੁਗਤਸਦ੍ਦਾ ਸਤ੍ਤ ਵਿਭਤ੍ਤਿਯੋ ਪਰਾ ਯੋਜੀਯਨ੍ਤੇ. ਸੁਗਤਇਤਿ ਠਿਤੇ –
੧. ਦ੍ਵੇ ਦ੍ਵੇ+ਕਾਨੇਕੇਸੁ ਨਾਮਸ੍ਮਾ ਸਿਯੋ ਅਂਯੋ ਨਾ ਹਿ ਸ ਨਂ ਸ੍ਮਾ ਹਿ ਸ ਨਂ ਸ੍ਮਿਂ ਸੁ
ਏਤੇਸਂ ਦ੍ਵੇ ਦ੍ਵੇ ਹੋਨ੍ਤਿ ਏਕਾਨੇਕਤ੍ਥੇਸੁ ਵਤ੍ਤਮਾਨਤੋ ਨਾਮਸ੍ਮਾ ਯਥਾਕ੍ਕਮਂ. ਯਤੋ ਇਮੇ ਸਤ੍ਤ ਦੁਕਾ ਹੋਨ੍ਤਿ, ‘‘ਅਤ੍ਥਵਨ੍ਤ+ਮਧਾਤੁਕ+ਮਪਚ੍ਚਯਂ ਪਾਟਿਪਦਿਕਂ ਕਿਤਕ+ਤਦ੍ਧਿਤ+ਸਮਾਸਾ ਚੇ’’ਤਿ ਵੁਤ੍ਤਤ੍ਤਾ ਤਂ ਨਾਮਂ ਪਾਟਿਪਦਿਕਂ ਨਾਮ. ਕੇਚਿ ਸਕਤ੍ਥ+ਦਬ੍ਬ+ਲਿਙ੍ਗ+ਸਙ੍ਖ੍ਯਾ+ਕਮ੍ਮਾਦਿਪਞ੍ਚਕਂ ਪਾਟਿਪਦਿਕਨ੍ਤਿ ਵਦਨ੍ਤਿ. ਤੇਨੇ+ਤਂ ਵੁਚ੍ਚਤਿ –
ਸਕਤ੍ਥ+ਦਬ੍ਬ+ਲਿਙ੍ਗਾਨਿ, ਸਦ੍ਦਤ੍ਥ+ਮਬ੍ਰਵੁਂ ਪਰੇ;
ਸਙ੍ਖ੍ਯਾ+ਕਮ੍ਮਾਦਿਕਾਨਨ੍ਤੁ, ਵਿਭਤ੍ਤਿ ਵਾਚਕਾ ਮਤਾ.
ਸਕਤ੍ਥ+ਦਬ੍ਬ+ਲਿਙ੍ਗਾਨਿ, ਸਙ੍ਖ੍ਯਾ+ਕਮ੍ਮਾਦਿਪਞ੍ਚਕਂ;
ਸਦ੍ਦਤ੍ਥ+ਮਬ੍ਰਵੁਂ ਕੇਚਿ, ਵਿਭਤ੍ਤਿ ਪਨ ਜੋਤਕਾਤਿ ਚ.
ਤਤੋ ਏਕਮ੍ਹਿ ਵਤ੍ਤਬ੍ਬੇ ਏਕਵਚਨਂ ਬਹੁਮ੍ਹਿ ਵਤ੍ਤਬ੍ਬੇ ਬਹੁਵਚਨਞ੍ਚਾਤਿ ਅਨਿਯਮੇਨ ਪਸਙ੍ਗੇ ‘‘ਨਾਮਸ੍ਮਾ’’ਤਿ ਅਧਿਕਾਰੋ.
੩੭. ਪਠਮਾ+ਤ੍ਥਮਤ੍ਤੇ
ਨਾਮਸ੍ਸਾ+ਭਿਧੇਯ੍ਯਮਤ੍ਤੇ ਪਠਮਾਵਿਭਤ੍ਤਿ ਹੋਤੀਤਿ ਵਤ੍ਤਿਚ੍ਛਾਵਸਾ ਪਠਮਾਯੇ+ਕਵਚਨਬਹੁਵਚਨਾਨਿ. ਸਿ ਯੋਇਤਿ ਪਠਮਾ. ਸਿਸ੍ਸਿ+ਕਾਰਸ੍ਸਾ+ਨੁਬਨ੍ਧਤ੍ਤਾ ਅਪ੍ਪਯੋਗੋ. ਪਯੋਜਨਂ ‘‘ਕਿ+ਮਂਸਿਸੂ’’ਤਿ ਸਂਕੇਤੋ, ਤਥਾ ਅਂਵਚਨਸ੍ਸਾ+ਕਾਰਸ੍ਸ. ਏਤ੍ਥ ਤਥਾਤਿ ਵੁਤ੍ਤਸ੍ਸਾਤਿਦੇਸੋ ਅਞ੍ਞਦੀਯਧਮ੍ਮਾਨ+ਮਞ੍ਞਤ੍ਥਪਾਪਨ+ਮਤਿਦੇਸੋ. ਏਕਮ੍ਹਿ ਵਤ੍ਤਬ੍ਬੇ ਪਠਮੇਕਵਚਨਂ ਸਿ.
ਅਤੋਤਿ ਵਤ੍ਤਤੇ, ਅਤੋਤਿ ਨਾਮਵਿਸੇਸਨਤ੍ਤਾ ‘‘ਵਿਧਿਬ੍ਬਿਸੇਸਨਨ੍ਤਸ੍ਸਾ’’ਤਿ ਪਰਿਭਾਸਤੋ ਅਕਾਰਨ੍ਤਤੋ ਨਾਮਸ੍ਮਾ ਵਿਧਿ.
੧੦੯. ਸਿਸ੍ਸੋ
ਅਕਾਰਨ੍ਤਤੋ ਨਾਮਸ੍ਮਾ ਸਿਸ੍ਸ ਓ ਹੋਤਿ. ਪੁਬ੍ਬਸਰਲੋਪੇ ਸੁਗਤੋ ਤਿਟ੍ਠਤਿ. ਬਹੁਮ੍ਹਿ ਵਤ੍ਤਬ੍ਬੇ ਬਹੁਵਚਨਂ ਯੋ. ਏਵਂ ਉਪਰਿਪਿ ਯੋਜੇਤਬ੍ਬਂ.
੪੧. ਅਤੋ ਯੋਨਂ ਟਾਟੇ
ਅਕਾਰਨ੍ਤਤੋ ਨਾਮਸ੍ਮਾ ਪਠਮਾਦੁਤਿਯਾਯੋਨਂ ਟਾਟੇ ਹੋਨ੍ਤਿ ਯਥਾਕ੍ਕਮਂ. ਟਕਾਰਾਨੁਬਨ੍ਧਤ੍ਤਾ ‘‘ਟਾਨੁਬਨ੍ਧਾ+ਨੇਕਵਣ੍ਣਾ ਸਬ੍ਬਸ੍ਸਾ’’ਤਿ ਸਬ੍ਬਾਦੇਸੋ. ਸੁਗਤਾ ਤਿਟ੍ਠਨ੍ਤਿ.
‘‘ਪਠਮਾ+ਤ੍ਥਮਤ੍ਤੇ’’ਤਿ ਵਤ੍ਤਤੇ.
੩੮. ਆਮਨ੍ਤਣੇ
ਆਮਨ੍ਤਣਾਧਿਕੇ ਅਤ੍ਥਮਤ੍ਤੇ ਪਠਮਾਵਿਭਤ੍ਤਿ ਹੋਤੀਤਿ ਏਕਸ੍ਮਿਂ ਏਕਵਚਨਂ ਸਿ.
੧੧੨. ਗੋ ਸ੍ਯਾ+ਲਪਨੇ
ਆਲਪਨੇ ਸਿ ਗਸਞ੍ਞੋ ਹੋਤਿ.
‘‘ਲੋਪੋ’’ਤਿ ਵਤ੍ਤਤੇ.
੧੧੭. ਗਸੀਨਂ
ਨਾਮਸ੍ਮਾ ਗ+ਸੀਨਂ ਲੋਪੋ ਹੋਤਿ. ਭੋ ਸੁਗਤ ਚਿਰਂ ਤਿਟ੍ਠ.
‘‘ਗੇ’’ਤਿ ਵਤ੍ਤਤੇ.
੫੯. ਅਯੁਨਂ ਵਾ ਦੀਘੋ
ਅਇਉਇਚ੍ਚੇਤੇਸਂ ਵਾ ਦੀਘੋ ਹੋਤਿ ਗੇ ਪਰੇ ਤਿਲਿਙ੍ਗੇ+ਤਿ ਦੀਘੇ ਭੋ ਸੁਗਤ ਸੁਗਤਾ ਚਿਰਂ ਤਿਟ੍ਠ. ਸਕ੍ਕਤੇ ਸੁਗਤਾਤਿ ਦੀਘਂ ਦੂਰਾਲਪਨੇਯੇਵਿ+ਚ੍ਛਨ੍ਤਿ, ਸਮੀਪਾਲਪਨੇਪਿ ਦਸ੍ਸਨਤੋ ਤਂ ਨ ਗਹੇਤਬ੍ਬਂ. ਬਹੁਵਚਨੇ ਯੋਸ੍ਸ ਟਾ, ਸੁਗਤਾ ਚਿਰਂ ਤਿਟ੍ਠਥ.
੨. ਕਮ੍ਮੇ ਦੁਤਿਯਾ
ਤਸ੍ਮਿਂ ਕਮ੍ਮਕਾਰਕੇ ਦੁਤਿਯਾਵਿਭਤ੍ਤਿ ਹੋਤਿ. ਅਂਯੋਇਤਿ ਦੁਤਿਯਾ. ਏਤ੍ਥ ਦੁਤਿਯਾਤਤਿਯਾਦਿਭਾਵੋ ਵਿਭਤ੍ਤਿਸੁਤ੍ਤੇ ਸਿਯੋ ਇਤਿ ਪਠਮਾਵਿਭਤ੍ਯਾਦੀਨਿ+ਮੁਪਾਦਾਯ ਵੁਚ੍ਚਤਿ, ਤਂ ਤਂ ਉਪਾਦਾਯ ਪਞ੍ਞਤ੍ਤਤ੍ਤਾ. ਦੁਤਿਯੇਕਵਚਨਂ ਅਂ, ਅਕਾਰਸ੍ਸਾ+ਪਯੋਗੋ. ਸੁਗਤਂ ਪਸ੍ਸ. ਦੁਤਿਯਾਬਹੁਵਚਨਂ ਯੋ, ਤਸ੍ਸ ਟੇ, ਸੁਗਤੇ ਪਸ੍ਸ.
੧੯. ਕਤ੍ਤੁਕਰਣੇਸੁ ਤਤਿਯਾ
ਤਸ੍ਮਿਂ ਕਤ੍ਤਰਿ ਕਰਣੇ ਚ ਕਾਰਕੇ ਤਤਿਯਾਵਿਭਤ੍ਤਿ ਹੋਤਿ. ਨਾ+ਹਿਇਤਿ ਤਤਿਯਾਵਿਭਤ੍ਤਿ. ਤਤਿਯਾਏਕਵਚਨਂ ਨਾ.
‘‘ਨਾਸ੍ਸਾ’’ਤਿ ਵਤ੍ਤਤੇ.
੧੦੮. ਅਤੇ+ਨ
ਅਕਾਰਨ੍ਤਤੋ ਨਾਮਸ੍ਮਾ ਪਰਸ੍ਸ ਨਾਵਚਨਸ੍ਸ ਏਨਾਦੇਸੋ ਹੋਤਿ ਨਿਚ੍ਚਂ. ਸੁਗਤੇਨ ਕਤਂ.
੯੮. ਸੁਹਿਸ੍ਵ+ਸ੍ਸੇ
ਅਕਾਰਨ੍ਤਸ੍ਸ ਸੁਹਿਸ੍ਵੇ+ਹੋਤਿ. ਸੁਗਤੇਹਿ.
‘‘ਵੇ’’ਤਿ ਵਤ੍ਤਤੇ.
੯੫. ਸ੍ਮਾਹਿਸ੍ਮਿਂਨਂ ਮ੍ਹਾਭਿਮ੍ਹਿ
ਨਾਮਸ੍ਮਾ ਪਰੇਸਂ ਸ੍ਮਾਹਿਸ੍ਮਿਂਨਂ ਮ੍ਹਾਭਿਮ੍ਹਿ ਹੋਨ੍ਤਿ ਯਥਾਕ੍ਕਮਂਤਿ ਹਿਸ੍ਸ ਭਿਆਦੇਸੇ ਸੁਗਤੇਭਿ. ਕਰਣੇ ਸੁਗਤੇਨ ਲੋਕੋ ਪੁਞ੍ਞਂ ਕਰੋਤਿ, ਸੁਗਤੇਹਿ ਸੁਗਤੇਹਿ ਵਾ.
੨੪. ਚਤੁਤ੍ਥੀ ਸਮ੍ਪਦਾਨੇ
ਤਸ੍ਮਿਂ ਸਮ੍ਪਦਾਨਕਾਰਕੇ ਚਤੁਤ੍ਥੀ ਸਿਯਾ. ਸ+ਨਂਇਤਿ ਚਤੁਤ੍ਥੀ. ਚਤੁਤ੍ਥੇ+ਕਵਚਨਂ ਸ. ਵਿਭਤ੍ਤਿਸੁਤ੍ਤੇ ਸ੍ਸ+ਨਂਤਿ ਦੀਘਪਾਠੇਨ ਸੁਗਤਸ੍ਸਾਤਿ ਸਿਦ੍ਧੇਪਿ ‘‘ਝਲਾ ਸਸ੍ਸ ਨੋ’’ ਤ੍ਯਾਦਿਕਾਰਿਯਸੁਤ੍ਤੇਸੁ ਸ੍ਸਸ੍ਸਾਤਿ ਅਕ੍ਖਰਗਾਰਵਤਾ ਹੋਤੀਤਿ ਲਾਘਵਤ੍ਥ+ਮਿਦ+ਮਾਰਦ੍ਧਂ –
੫੧. ਸੁਞ ਸਸ੍ਸ
ਨਾਮਸ੍ਮਾ ਪਰਸ੍ਸ ਸਸ੍ਸ ਸੁਞਾਗਮੋ ਹੋਤਿ. ਸ ਚ ‘‘ਛਟ੍ਠਿਯਾ’’ਤਿ ਵਤ੍ਤਮਾਨੇ –
੧,੨੦. ਞਾਕਾਨੁ ਬਨ੍ਧਾ+ਦ੍ਯਨ੍ਤਾ
ਛਟ੍ਠੀਨਿਦ੍ਦਿਟ੍ਠਸ੍ਸ ਞਾਨੁਬਨ੍ਧ+ਕਾਨੁਬਨ੍ਧਾ ਆਦ੍ਯਨ੍ਤਾਹੋਨ੍ਤੀਤਿ ਆਦ੍ਯਵਯਵੋ. ਉਕਾਰੋ ਉਚ੍ਚਾਰਣਤ੍ਥੋ, ਞ੍ਞਕਾਰੋ ਅਸ੍ਮਿਂ ਸੁਤ੍ਤੇ ਸਂਕੇਤਤ੍ਥੋ. ਸੁਗਤਸ੍ਸ ਦਾਨਂ ਦੇਤਿ.
੧,੫੮. ‘‘ਬਹੁਲਂ’’ਤ੍ਯ+ਧਿਕਾਰੋ
ਬਹੁਲਾਧਿਕਾਰਂ ਕਪ੍ਪਦੁਮਮਿਵ ਮਞ੍ਞਨ੍ਤਿ ਸਦ੍ਦਿਕਾ. ਤਞ੍ਚ –
ਕ੍ਵਚਿ ਪਵਤ੍ਤ੍ਯ+ਪਵਤ੍ਤਿ, ਕ੍ਵਚ+ਞ੍ਞਂ ਕ੍ਵਚਿ ਵਾ ਕ੍ਵਚਿ;
ਸਿਯਾ ਬਹੁਲਸਦ੍ਦੇਨ, ਵਿਧਿ ਸਬ੍ਬੋ ਯਥਾਗਮਂਤਿ –
ਚਤੁਬ੍ਬਿਧਂ ਬਹੁਲਂ ਸਮਿਕ੍ਖਨ੍ਤਿ.
‘‘ਅਤੋ ਵਾ’’ਤ੍ਵੇਵ,
੪੪. ਸਸ੍ਸਾਯ ਚਤੁਤ੍ਥਿਯਾ
ਅਕਾਰਨ੍ਤਤੋ ਪਰਸ੍ਸ ਚਤੁਤ੍ਥਿਯਾ ਸਸ੍ਸ ਆਯੋ ਹੋਤਿ ਵਾ ਬਹੁਲਂ. ਸੁਗਤਾਯ. ਯੇਭੁਯ੍ਯੇਨ ਤਾਦਤ੍ਥੇਯੇਵਾ+ਯ+ਮਾਯੋ ਦਿਸ੍ਸਤੀਤਿ ਇਤੋ ਪਰਂ ਨੋ+ਦਾਹਰੀਯਤੇ. ਚਤੁਤ੍ਥੀਬਹੁਵਚਨਂ ਨਂ,
‘‘ਦੀਘੋ’’ਤਿ ਵਤ੍ਤਤੇ.
੮੯. ਸੁਨਂਹਿਸੁ
ਨਾਮਸ੍ਸ ਦੀਘੋ ਹੋਤਿ ਸੁਨਂਹਿਸੁ. ਸੁਗਤਾਨਂ.
੨੯. ਪਞ੍ਚਮ੍ਯ+ਵਧਿਸ੍ਮਾ
ਏਤਸ੍ਮਾ ਅਵਧਿਕਾਰਕਾ ਪਞ੍ਚਮੀਵਿਭਤ੍ਤਿ ਹੋਤਿ. ਸ੍ਮਾ+ਹਿਇਤਿ ਪਞ੍ਚਮੀ. ਪਞ੍ਚਮ੍ਯੇਕਵਚਨਂ ਸ੍ਮਾ,
‘‘ਅਤੋ’’ ‘‘ਟਾਟੇ’’ ‘‘ਵੇ’’ਤਿ ਚ ਵਤ੍ਤਤੇ.
੪੩. ਸ੍ਮਾ+ਸ੍ਮਿਂਨਂ
ਅਕਾਰਨ੍ਤਤੋ ਨਾਮਸ੍ਮਾ ਪਰੇਸਂ ਸ੍ਮਾ+ਸ੍ਮਿਂਨਂ ਟਾ+ਟੇ ਹੋਨ੍ਤਿ ਵਾ ਯਥਾਕ੍ਕਮਂ. ਸੁਗਤਾ ਅਪੇਹਿ ਸੁਗਤਮ੍ਹਾ ਸੁਗਤਸ੍ਮਾ ਵਾ. ਪਞ੍ਚਮੀਬਹੁਵਚਨਞ੍ਹਿ, ਸੁਗਤੇਭਿ ਸੁਗਤੇਹਿ.
੩੯. ਛਟ੍ਠੀ ਸਮ੍ਬਨ੍ਧੇ
ਕਾਰਕੇਹਿ ਅਞ੍ਞੋ ਸਮ੍ਬਨ੍ਧੋ, ਤਤ੍ਰ ਛਟ੍ਠੀਵਿਭਤ੍ਤਿ ਹੋਤਿ. ਸ+ਨਂਇਤਿ ਛਟ੍ਠੀ, ਛਟ੍ਠੇਕਵਚਨਂ ਸ, ਸੁਗਤਸ੍ਸ ਵਿਹਾਰੋ, ਛਟ੍ਠੀਬਹੁਵਚਨਂ ਨਂ, ਸੁਗਤਾਨਂ.
੧੪. ਸਤ੍ਤਮ੍ਯਾ+ਧਾਰੇ
ਆਧਾਰਕਾਰਕੇ ਸਤ੍ਤਮੀਵਿਭਤ੍ਤਿ ਹੋਤਿ. ਸ੍ਮਿਂ+ਸੁਇਤਿ ਸਤ੍ਤਮੀ. ਸਤ੍ਤਮ੍ਯੇਕਵਚਨਂ ਸ੍ਮਿਂ, ਸੁਗਤੇ ਪਤਿਟ੍ਠਿਤਂ ਸੁਗਤਮ੍ਹਿ ਸੁਗਤਸ੍ਮਿਂ ਵਾ. ਸਤ੍ਤਮੀਬਹੁਵਚਨਂ ਸੁ, ‘‘ਸੁ+ਹਿਸ੍ਵ+ਸ੍ਸੇ’’ਤਿ ਏ, ਸੁਗਤੇਸੁ.
ਸੁਗਤੋ, ਸੁਗਤਾ. ਭੋ ਸੁਗਤ, ਭੋ ਸੁਗਤਾ, ਭਵਨ੍ਤੋ ਸੁਗਤਾ. ਸੁਗਤਂ, ਸੁਗਤੇ. ਸੁਗਤੇਨ, ਸੁਗਤੇਭਿ, ਸੁਗਤੇਹਿ. ਕਰਣੇ ਸੁਗਤੇਨ, ਸੁਗਤੇਭਿ, ਸੁਗਤੇਹਿ. ਸੁਗਤਸ੍ਸ, ਸੁਗਤਾਯ, ਸੁਗਤਾਨਂ. ਸੁਗਤਾ, ਸੁਗਤਮ੍ਹਾ, ਸੁਗਤਸ੍ਮਾ, ਸੁਗਤੇਭਿ, ਸੁਗਤੇਹਿ. ਸੁਗਤਸ੍ਸ, ਸੁਗਤਾਨਂ. ਸੁਗਤੇ, ਸੁਗਤਮ੍ਹਿ, ਸੁਗਤਸ੍ਮਿਂ, ਸੁਗਤੇਸੁ.
ਸੁਗਤੋ ਸੁਗਤੋ. ਸੁਗਤਂ ਨਮਤਿ. ਸੁਗਤੇਨ ਕਤੋ. ਸੁਗਤੇਨ ਜਿਤੋ. ਸੁਗਤਸ੍ਸ ਦਦੇ. ਸੁਗਤਾ ਵਿਗਤੋ. ਸੁਗਤਸ੍ਸ ਸੁਤੋ. ਸੁਗਤੇ ਰਮਤੇ. ਏਵਂ –
ਸੂਰਾ+ਸੁਰ+ਨਰੋ+ਰਗ+ਨਾਗ+ਯਕ੍ਖਾ,
ਗਨ੍ਧਬ੍ਬ+ਕਿਨ੍ਨਰ+ਮਨੁਸ੍ਸ+ਪਿਸਾਚ+ਪੇਤਾ;
ਮਾਤਙ੍ਗ+ਜਙ੍ਗਮ+ਤੁਰਙ੍ਗ+ਵਰਾਹ+ਸੀਹਾ,
ਬ੍ਯਗ੍ਘ+ਚ੍ਛ+ਕਚ੍ਛਪ+ਤਰਚ੍ਛ+ਮਿਗ+ਸ੍ਸ+ਸੋਣਾ.
ਆਲੋਕ+ਲੋਕ+ਨਿਲਯਾ+ਨਿਲ+ਚਾਗ+ਯੋਗਾ,
ਵਾਯਾਮ+ਗਾਮ+ਨਿਗਮਾ+ਗਮ+ਧਮ੍ਮ+ਕਾਮਾ;
ਸਙ੍ਘੋ+ਘ+ਘੋਸ+ਪਟਿਘਾ+ਸਵ+ਕੋਧ+ਲੋਭਾ,
ਸਾਰਮ੍ਭ+ਥਮ੍ਭ+ਮਦ+ਮਾਨ+ਪਮਾਦ+ਮਕ੍ਖਾ.
ਪੁਨ੍ਨਾਗ+ਪੂਗ+ਪਨਸਾ+ਸਨ+ਚਮ੍ਪਕ+ਮ੍ਬ-
ਹਿਨ੍ਤਾਲ+ਤਾਲ+ਵਕੁਲ+ਜ੍ਜੁਨ+ਕਿਂਸੁਕਾ ਚ;
ਮਨ੍ਦਾਰ+ਕੁਨ੍ਦ+ਪੁਚਿਮਨ੍ਦ+ਕਰਞ੍ਜ+ਰੁਕ੍ਖਾ,
ਞੇਯ੍ਯਾ ਮਯੂਰ+ਸਕੁਣ+ਣ੍ਡਜ+ਕੋਞ੍ਚ+ਹਂਸਾ.
ਸੁਗਤਸਦ੍ਦੋਵ, ਯਤੋ ਸਬ੍ਬੋ ਸਦ੍ਦੋ, ਨ ਸਦ੍ਦਤਾਲਿਤਤ੍ਥੋਵ, ਅਥ ਖੋ ਸਂਯੋਗਾਦਿਵਸੇਨਪਿ ਅਤ੍ਥਂ ਵਦਨ੍ਤਿ. ਤੇਨੇ+ਤਂ ਵੁਚ੍ਚਤਿ –
ਸਂਯੋਗਾ ਵਿਪ੍ਪਯੋਗਾ ਚ, ਸਾਹਚਰਿਯਾ+ਵਿਰੋਧਤੋ;
ਅਤ੍ਥਾ ਪਕਰਣਾ ਲਿਙ੍ਗਾ, ਸਦ੍ਦਨ੍ਤਰਸਮੀਪਤੋ.
ਸਾਮਤ੍ਥ੍ਯੋ+ਚਿਤ੍ਰ+ਦੇਸੇਹਿ, ਕਾਲ+ਬ੍ਯਤ੍ਤਾ+ਨੁਰੂਪਤੋ;
ਉਪਚਾਰ+ਕਾਕੁਭੇਦ, ਸਮ੍ਬਨ੍ਧੇਹੁ+ਪਲਕ੍ਖਣਾ.
ਵਚਨਾ ਚ ਤਦਙ੍ਗਤ੍ਤਾ, ਪਧਾਨਤ੍ਤਾਤਿਆਦਿਹਿ;
ਸਦ੍ਦ+ਤ੍ਥਾ ਪਵਿਭਜ੍ਜਨ੍ਤੇ, ਨ ਸਦ੍ਦਾਦੇਵ ਕੇਵਲਾਤਿ.
ਏਤ੍ਥ ਸਂਯੋਗਤੋ ਤਾਵ, ‘‘ਸਕਿਸੋਰਾ ਧੇਨੁ ਦੀਯਤੂ’’ਤਿ, ਕਿਸੋਰੋ ਅਸ੍ਸਪੋਤਕੋ, ਤਂਸਂਯੋਗਤੋ ਵਲ਼ਵਾ ਏਵ ਪਤੀਯਤੇ.
ਵਿਪ੍ਪਯੋਗਤੋ – ‘‘ਅਕਿਸੋਰਾ ਆਨੀਯਤੂ’’ਤਿ ਤਪ੍ਪਟਿਸੇਧਾ ਵਲ਼ਵਾ ਏਵ ਪਤੀਯਤੇ.
ਸਹਚਰਣਤੋ – ‘‘ਰਾਮ+ਲਕ੍ਖਣ’’ਇਤਿ ਉਭਿਨ੍ਨਂ ਸਹਚਰਣੇਨ ਰਾਮੋਤਿ ਦਾਸਰਥਿ ਏਵ ਰਾਮੋ, ਨ ਅਞ੍ਞਾਭਿਧਾਨੋ ਜਾਮਦਗਨ੍ਯਾਦਿ. ਲਕ੍ਖਣੋਪਿ ਸੋਮਿਤ੍ਤਿ ਏਵ, ਨ ਤੁ ਯੋ ਕੋਚਿ ਲਕ੍ਖਣੋ.
ਵਿਰੋਧਤੋ – ‘‘ਰਾਮ+ਜ੍ਜੁਨਾ’’ ਇਤਿ ਭਗ੍ਗਵੋ ਸਹਸ੍ਸਬਾਹੁ ਚ ਅਞ੍ਞਮਞ੍ਞਵਿਰੁਦ੍ਧਾਤਿ ਤੇ ਏਵ ਪਤੀਯਨ੍ਤੇ, ਨ ਦਾਸਰਥਿ ਸਬ੍ਯਸਾਚਿ ਚ.
ਅਤ੍ਥਤੋ – ‘‘ਸਿਨ੍ਧਵ+ਮਾਨਯ, ਪਵਿਸਾਮਿ ਰਣਙ੍ਗਣ’’ਮਿਤਿ ਰਣਙ੍ਗਣਪਵੇਸੋ ਵਾਹਨਵਿਸੇਸੇਨ ਹੋਤੀਤਿ ਅਤ੍ਥਤੋ ਤੁਰਙ੍ਗਪਤੀਤਿ, ਨ ਤੁ ਲਵਣਵਿਸੇਸਂ.
ਪਕਰਣਤੋ-ਭੋਜਨਵਿਧਿਮ੍ਹਿ ਉਪਸਙ੍ਖਰਿਯਮਾਨੇ ‘‘ਸਿਨ੍ਧਵ+ਮਾਨਯੇ’’ਤਿ, ਅਤ੍ਰ ਹਿ ਸਦ੍ਦਨ੍ਤਰਸ੍ਸਾ+ਭਾਵੇਪਿ ਭੋਜਨੋਪਕਰਣਸਮਵਾਯ+ਮਾਲੋਕਿਤਭਾਵਤੋ ਲਵਣੇ ਪਟਿਪਤ੍ਤਿ, ਤਾਦਿਸੋ ਹਿ ਪਤ੍ਥਾਵੋਤਿ.
ਲਿਙ੍ਗਤੋ – ‘‘ਦੇਵਦਤ੍ਤਂ ਪਠਮ+ਮੁਪਵੇਸਯ ਸਮਾਰਾਧਿਤਗੁਰੁਂ’’ਤਿ, ਅਤ੍ਰ ਸਮਾਰਾਧਿਤਗੁਰੁਤ੍ਤੇਨ ਲਿਙ੍ਗੇਨ ਤਸ੍ਸ ਬਾਹੁਸ੍ਸਚ੍ਚ+ਮਵਗਮ੍ਯਤੇ, ਨ ਤੁ ਯੋ ਕੋਚਿ ਦੇਵਗੁਣੋ.
ਸਨ੍ਨਿਧਾਨਤੋ – ‘‘ਅਜ੍ਜੁਨੋ ਕਤਵੀਰਿਯੋਤਿ’’ ਪਤੀਯਤੇ, ਨੋ ਅਕਤਵੀਰਿਯੋ ਅਜ੍ਜੁਨੋਤਿ.
ਸਾਮਤ੍ਥਿਯਤੋ – ‘‘ਅਨੁਦਰਾ ਕਞ੍ਞਾ’’ਤਿ ਉਦਰੇ ਅਸਤਿ ਕਞ੍ਞਾ ਏਵ ਨਤ੍ਥੀਤਿ ਤਸ੍ਸਾ ਕਿਸਾਙ੍ਗਿਯਾ ਮਜ੍ਝਪਦੇਸੋਤਿ ਪਤੀਯਤੇ.
ਓਚਿਤ੍ਰਤੋ – ‘‘ਰਾਮਸਦਿਸੋ+ਯਂ’’ ਇਤਿ, ਅਤ੍ਰ ਹਿ ਰਾਮੋ ਪਯੁਤ੍ਤਦਾਸਰਥਿਸ੍ਮਿਂ ਭਿਯ੍ਯੋ ਸਾਧਾਰਣੋ ਪਰਿਚਯੋਤਿ ਦਾਸਰਥਿ ਏਵ ਪਤੀਯਤੇ, ਨ ਭਗ੍ਗਵਰਾਮੋ.
ਦੇਸਤੋ – ‘‘ਪੋਟ੍ਠਪਾ’’ ਇਤਿ ਕਿਸ੍ਮਿਞ੍ਚਿ ਦੇਸੇ ਪਸਂਸਾਵਚਨਂ. ਕਿਸ੍ਮਿਞ੍ਚਿ ਅਕ੍ਕੋਸਵਚਨਂ.
ਕਾਲਤੋ – ‘‘ਪਚੇ’’ਤਿ ਦਕ੍ਖਿਣਾਪਥੇ ਕਤ੍ਥਚਿ ਪੁਬ੍ਬਣ੍ਹੇ ਯਾਗੁਪਾਕੇ, ਸਾਯਣ੍ਹੇ ਤੁ ਓਦਨਪਾਕੇ.
ਬ੍ਯਤ੍ਤਿਤੋ – ‘‘ਗਾਮਸ੍ਸ ਅਦ੍ਧ’’ ਮਿਤਿ ਸਮਭਾਗੇ, ਨਪੁਂਸਕਤ੍ਤਾ. ‘‘ਗਾਮਸ੍ਸ ਅਦ੍ਧੋ’’ਤਿ ਪੁਮਤ੍ਤੇਨ ਤੁ ਅਸਮਭਾਗੇ.
ਅਨੁਰੂਪਤੋ – ‘‘ਨਰਪਤਿ ਸਾਧੁ ਰਕ੍ਖਤਿ ਗੋਮਣ੍ਡਲ’’ਮਿਤਿ ਮਹੀਮਣ੍ਡਲਪਾਲਨਂ ਰਾਜਿਨੋ+ਨੁਰੂਪ+ਮਿਤਿ ਮਹੀਮਣ੍ਡਲਪਾਲਨੇਵ ਪਤੀਤਿ, ਨ ਤੁ ਗੋਯੂਥਰਕ੍ਖਨੇ.
ਉਪਚਾਰਤੋ – ਅਤਂਸਭਾਵੇ ਤਂਸਭਾਵਾਰੋਪਨ+ਮੁਪਚਾਰੋ, ਸ ਚ ਤਦਟ੍ਠੋ, ਤਦ੍ਧਮ੍ਮੋ, ਤਂਸਹਚਰਿਯੋ, ਤਂਸਮੀਪੋਤਿ ਚਤੁਬ੍ਬਿਧੋ, ਤਤ੍ਥ ਯਥਾਕ੍ਕਮਂ ਮਞ੍ਚਾ ਉਕ੍ਕੋਸਨ੍ਤਿ, ਅਗ੍ਗਿ ਮਾਣਵੋ, ਯਟ੍ਠਿਂ ਪਵੇਸਯ, ਗਙ੍ਗਾਯਂ ਵਜੋਤਿ.
ਕਾਕੁਤੋ-ਕਾਕੁਸਦ੍ਦੋ ਇਤ੍ਥਿਯਂ, ਸ ਚ ਵਿਕਾਰ+ਸੋਕ+ਭੀਤਿ+ਧਨਿਰੂਪੇਸੁ ਦਿਸ੍ਸਤਿ, ਵਤ੍ਤੁ ਕਾਯਵਿਕਾਰਾ ਕਥਞ੍ਚਿ ਤਂ ਅਕਤਵਾਅਪਿ ਕੇਨਚਿ ਅਞ੍ਞੇਨ ‘‘ਕਿਂ ਤ੍ਵਂ ਤਂ ਅਕਾਸਿ ‘‘ਇਤਿ ਪੁਟ੍ਠੋ ਕੋਪੇਨ ਭਮੁਭੇਦਾ ‘‘ਅਹਂ ਕਤਵਾ ਅਮ੍ਹੀ’’ਤਿ ਕਥੇਤਿ, ਤਸ੍ਸ ਭਮੁਭੇਦਕ੍ਰਿਯਾ ਅਕ੍ਰਿਯਾਪਟਿਞ੍ਞਂ ਸੂਚਯਤਿ.
ਸਮ੍ਬਨ੍ਧ ਤੋ – ‘‘ਮਾਤਰਿ ਸਮ੍ਮਾ ਵਤ੍ਤਿਤਬ੍ਬਂ, ਪਿਤਰਿ ਸੁਸ੍ਸੂਯਿਤਬ੍ਬਂ’’ ਇਤਿ, ਅਤ੍ਰ ਹਿ ਸਮਾਤਰਿ ਸਪਿਤਰੀਤਿ ਸਮ੍ਬਨ੍ਧਿਸਦ੍ਦਾਭਾਵੇਪਿ ਸਾ ਮਾਤਾ ਸੋ ਪਿਤਾ ਚ ਅਸ੍ਸ ਪੁਤ੍ਤਸ੍ਸਾਤਿ ਪਤੀਯਤੇ.
ਉਪਲਕ੍ਖਣਤੋ – ‘‘ਕਾਕੇਹਿ ਰਕ੍ਖਿਤਬ੍ਬਂ ਦਧੀ’’ਤਿ ਕਾਕਸਦ੍ਦੋ ਸਬ੍ਬੇਸ+ਮੁਪਘਾਤਕਾਨਂ ਸਾਮਞ੍ਞਂ ਉਪਲਕ੍ਖੇਤੀਤਿ ਸੁਨਖਾਦਿਸਬ੍ਬੇਹਿਪਿ ਨਿਵਾਰੀਯਤੇ.
ਵਚਨਤੋ – ‘‘ਦਾਰਾ’’ਇਤਿ ਦਾਰਸਦ੍ਦੋ ਕਲਤ੍ਤੇ ਬਹੁਵਚਨਨ੍ਤੋ, ਅਞ੍ਞਤ੍ਥ ਅਨਿਯਤਵਚਨੋ.
ਤਦਙ੍ਗਤ੍ਤਾ – ‘‘ਸਜ੍ਜਿਤਂ ਭੋਜਨ’’ਮਿਤਿ ਵੁਤ੍ਤੇ ਤਪ੍ਪਰਿਕ੍ਖਾਰਤ੍ਤਾ ਤਦੁਪਕਰਣ ਆਸਨ, ਪਾਤਿ, ਬ੍ਯਞ੍ਜਨਾਦੀਨਂ ਸਮ੍ਪਾਦਨਮ੍ਪਿ ਪਤੀਯਤੇ.
ਪਧਾਨਭਾਵਤੋ – ‘‘ਨਿਗ੍ਗਚ੍ਛਤਿ ਅਵਨਿਨਾਥੋ’’ਤਿ ਰਞ੍ਞੋ ਨਿਗ੍ਗਮਨੇਨ ਤਦੁਪਜੀਵੀਨਮ੍ਪਿ ਨਿਗ੍ਗਮਨਂ ਵਿਞ੍ਞਾਯਤਿ.
ਵੁਤ੍ਤਞ੍ਚ –
ਨੇਯ੍ਯਨੀਤਤ੍ਥਸੁਤ੍ਤੇਸੁ, ਞੇਯ੍ਯਂ ਸਦ੍ਦਤ੍ਥਮਤ੍ਤਕਂ;
ਨੇ+ਤ੍ਥ ਵਤ੍ਤਬ੍ਬਅਤ੍ਥੇਨ, ਸੁਤ੍ਤਂ ਨੀਤਤ੍ਥਕਂ ਭਵੇਤਿ.
ਏਵ+ਮਞ੍ਞੇਸਮ੍ਪਿ ਅਕਾਰਨ੍ਤਾਨਂ ਪੁਲ੍ਲਿਙ੍ਗਾਨਂ ਸਦ੍ਦਾਨਂ ਰੂਪਨਯੋ ਕ੍ਰਿਯਾ+ਭਿਸਮ੍ਬਨ੍ਧੋ ਚ. ਸੁਗਤਸਦ੍ਦਤੋ ਯਸ੍ਸ ਸਦ੍ਦਸ੍ਸ ਵਿਸੇਸੋ ਅਤ੍ਥਿ, ਤਂ ਵਕ੍ਖਾਮ. ਇਤੋ ਪਰਂ ਛਟ੍ਠਿਯਾ ਚਤੁਤ੍ਥੀਸਮਤ੍ਤਾ ਪਞ੍ਚਮੀਬਹੁਵਚਨਸ੍ਸ ਚ ਤਤਿਯਾਬਹੁਵਚਨੇਨ ਸਮਤ੍ਤਾ ਨ ਤਾ ਦਸ੍ਸਿਯਨ੍ਤੇ.
ਗੁਮ੍ਬ ਸਿ, ‘‘ਅਤੋ’’ ‘‘ਸਿਸ੍ਸਾ’’ਤਿ ਚ ਵਤ੍ਤਤੇ.
੧੧੦. ਕ੍ਵਚੇ+ਵਾ.
ਅਕਾਰਨ੍ਤਤੋ ਨਾਮਸ੍ਮਾ ਪਰਸ੍ਸ ਸਿਸ੍ਸ ਏ ਹੋਤਿ ਵਾ ਕ੍ਵਚਿ. ਗੁਮ੍ਬੇ ਗੁਮ੍ਬੋ, ਗੁਮ੍ਬਾ. ਭੋ ਗੁਮ੍ਬ ਗੁਮ੍ਬਾ, ਭਵਨ੍ਤੋ ਗੁਮ੍ਬਾ ਇਚ੍ਚਾਦਿ ਸੁਗਤਸਮਂ. ਏਵਂ ਫੁਸ੍ਸਿਤਗ੍ਗੇ ਫੁਸ੍ਸਿਤਗ੍ਗੋ, ਵਤ੍ਤਬ੍ਬੇ ਵਤ੍ਤਬ੍ਬੋ ਇਚ੍ਚਾਦਿ. ਸਿਸ੍ਸੋ+ਕਾਰਸ੍ਸ ਨਿਚ੍ਚਤ੍ਤਾ ਕਤ੍ਥਚਿ ਪਕ੍ਖੇ ਏਕਾਰਤ੍ਤ+ਮਿਦ+ਮਾਰਦ੍ਧਨ੍ਤਿ ਸਿਸ੍ਸੋ+ਕਾਰਪਕ੍ਖੇ ਏਵ ਭਵਤੀਤਿ ‘‘ਅਂ ਨਪੁਂਸਕੇ’’ਤਿ ਅ+ਮਾਦੇਸੇਨ ਏਕਾਰਸ੍ਸ ਨਪੁਂਸਕਵਿਸਯੇ ਬਾਧਿਤਤ੍ਤਾ ‘‘ਬਹੁਲਂ’’ ਵਿਧਾਨਾ ਨਪੁਂਸਕੇਪਿ ਸੁਖੇ ਦੁਕ੍ਖੇਤਿ ਕ੍ਵਚਿ ਹੋਤੇਵ.
‘‘ਯੋਸ੍ਸ’’ ‘‘ਟੇ’’ਤਿ ਚ ਵਤ੍ਤਤੇ.
੧੩੫. ਏਕਚ੍ਚਾਦੀਹ+ਤੋ
ਅਕਾਰਨ੍ਤੇਹਿ ਏਕਚ੍ਚਾਦੀਹਿ ਯੋਨਂ ਟੇ ਹੋਤਿ. ਏਕਚ੍ਚੋ, ਏਕਚ੍ਚੇ. ਭੋ ਏਕਚ੍ਚ ਏਕਚ੍ਚਾ, ਏਕਚ੍ਚੇ. ਏਕਚ੍ਚਂ, ਏਕਚ੍ਚੇ. ਏਵਂ ਏਸ+ਸ+ਪਠਮਸਦ੍ਦਾਨਂ.
ਕੋਧੋ, ਕੋਧਾ. ਭੋ ਕੋਧ ਕੋਧਾ, ਕੋਧਾ. ਕੋਧਂ, ਕੋਧੇ.
‘‘ਨਾਸ੍ਸ’’ ‘‘ਸਾ’’ਤਿ ਚ ਵਤ੍ਤਤੇ.
੧੦੭. ਕੋਧਾਦੀਹਿ
ਕੋਧਾਦੀਹਿ ਨਾਸ੍ਸ ਸਾ ਹੋਤਿ ਵਾ. ਕੋਧਸਾ ਕੋਧੇਨ. ਅਤ੍ਥਸਾ ਅਤ੍ਥੇਨ. ‘‘ਯੇ ਉਤ੍ਤਮਤ੍ਥਾਨਿ ਤਯਿ ਲਭਿਮ੍ਹਾ’’ਤਿ ਅਤ੍ਥਸਦ੍ਦੋ ਨਪੁਂਸਕਲਿਙ੍ਗੋਪਿ ਦਿਸ੍ਸਤਿ.
‘‘ਸ੍ਮਿਨੋ ਟੀ’’ਤਿ ਚ ਵਤ੍ਤਤੇ.
੧੭੫. ਦਿਵਾਦਿਤੋ
ਦਿਵਾਦੀਹਿ ਨਾਮੇਹਿ ਸ੍ਮਿਨੋ ਟਿ ਹੋਤਿ ਨਿਚ੍ਚਂ. ਦਿਵਿ, ਏਵਂ ਭੁਵਿ. ਏਤ੍ਥਟਿਮ੍ਹਿ ਨਿਚ੍ਚਂ ਵਕਾਰਾਗਮੋ ਰਸ੍ਸੋ ਚ. ਏਤ੍ਥ ਭੂਸਦ੍ਦੋ ਵਧੂਸਦ੍ਦਸਮਂ.
‘‘ਵੇ’’ਤਿ ਵਤ੍ਤਤੇ.
੧੪੪. ਮਨਾਦੀਹਿ ਸ੍ਮਿਂ+ਸਂ+ਨਾ+ਸ੍ਮਾਨਂ ਸਿ+ਸੋ+ਓ+ਸਾ+ਸਾ
ਮਨਾਦੀਹਿ ਸ੍ਮਿ+ਮਾਦੀਨਂ ਸਿ+ਸੋ+ਓ+ਸਾ+ਸਾ ਹੋਨ੍ਤਿ ਵਾ ਯਥਾਕ੍ਕਮਂ. ਮਨੋ, ਮਨਾ. ਭੋ ਮਨ ਮਨਾ, ਮਨਾ. ਮਨੋ, ਮਨਂ, ਮਨੇ. ਮਨਸਾ ਮਨੇਨ, ਮਨੇਹਿ ਮਨੇਭਿ. ਮਨਸੋ ਮਨਸ੍ਸ, ਮਨਾਨਂ. ਮਨਸਾ ਮਨਾ ਮਨਮ੍ਹਾ ਮਨਸ੍ਮਾ, ਮਨੇਹਿ ਮਨੇਭਿ. ਮਨਸਿ ਮਨਮ੍ਹਿ ਮਨਸ੍ਮਿਂ, ਮਨੇਸੁ.
ਏਵਂ ਵਚੋ ਪਯੋ ਤੇਜੋ,
ਤਪੋ ਚੇਤੋ ਤਮੋ ਯਸੋ.
ਅਯੋ ਵਯੋ ਸਿਰੋ ਸਰੋ,
ਉਰੋ+ਤ੍ਯੇ+ਤੇ ਮਨਾਦਯੋ.
ਰੂਪਸਿਦ੍ਧਿਯਂ ਅਹ+ਰਹਸਦ੍ਦਾ ਮਨਾਦੀਸੁ ਪਠਿਤਾ. ਅਹਸ੍ਸ ਆਪਾਦਿਤ੍ਤਾ ਰਹੋਤਿ ਨਿਪਾਤਤ੍ਤਾ ਰਹਸੀਤਿ ਵਿਭਤ੍ਯਨ੍ਤਪਟਿਰੂਪਕਨਿਪਾਤਤ੍ਤਾ ਇਧ ਨ ਗਹਿਤਾ.
ਗਚ੍ਛਨ੍ਤ ਸਿ, ‘‘ਸਿਸ੍ਸ’’ ‘‘ਵੇ’’ਤਿ ਚ ਵਤ੍ਤਤੇ. ਪਰਤੋ ਭਿਯ੍ਯੋ ਨਾਨੁਵਤ੍ਤਯਿਸ੍ਸਾਮ, ਵੁਤ੍ਤਿਯਾ ਏਵ ਅਨੁਵਤ੍ਤਸ੍ਸ ਗਮ੍ਯਮਾਨਤ੍ਤਾ.
੧੪੮. ਨ੍ਤਸ੍ਸਂ
ਸਿਮ੍ਹਿ ਨ੍ਤਪਚ੍ਚਯਸ੍ਸ ਅਂ ਹੋਤਿ ਵਾ. ‘‘ਸੁਤਾਨੁਮਿਤੇਸੁ ਸੁਤਸਮ੍ਬਨ੍ਧੋਵ ਬਲਵਾ’’ਤਿ ਞਾਯਾ ‘‘ਨ੍ਤਸ੍ਸਾ’’ਤਿ ਸੁਤਤ੍ਤਾ ਨ੍ਤਸ੍ਸੇਵ ਅਂ, ਨ ਤਦਨ੍ਤਸ੍ਸ ਅਨੁਮਿਤਸ੍ਸ ਸਦ੍ਦਸ੍ਸ. ਏਵ+ਮੁਪਰਿਪਿ ਨ੍ਤ+ਨ੍ਤੂਨਂ ਆਦੇਸਵਿਧਾਨਟ੍ਠਾਨੇਸੁ. ‘‘ਗਸਿਨਂ’’ਤਿ ਸਿਲੋਪੋ. ਗਚ੍ਛਂ ਗਚ੍ਛਨ੍ਤੋ.
੨੧੫. ਨ੍ਤ+ਨ੍ਤੂਨਂ ਨ੍ਤੋ ਯੋਮ੍ਹਿ ਪਠਮੇ
ਪਠਮੇ ਯੋਮ੍ਹਿ ਨ੍ਤ+ਨ੍ਤੂਨਂ ਸਵਿਭਤ੍ਤੀਨਂ ਨ੍ਤੋਇਚ੍ਚਾਦੇਸੋ ਹੋਤਿ ਵਾ. ਸ ਚ ਬਹੁਲਾਧਿਕਾਰਾ ਪੁਮੇਵ, ਗਚ੍ਛਨ੍ਤੋ ਗਚ੍ਛਨ੍ਤਾ.
੨੧੮. ਟ+ਟਾ+ਅਂ ਗੇ
ਗੇ ਪਰੇ ਨ੍ਤ+ਨ੍ਤੂਨਂ ਸਵਿਭਤ੍ਤੀਨਂ ਟ+ਟਾ+ਅਂਇਚ੍ਚਾਦੇਸਾ ਨਿਚ੍ਚਂ ਹੋਨ੍ਤਿ ਬਹੁਲਂ. ਭੋ ਗਚ੍ਛ ਗਚ੍ਛਾ ਗਚ੍ਛਂ, ਗਚ੍ਛਨ੍ਤੋ ਗਚ੍ਛਨ੍ਤਾ.
੯੨. ਨ੍ਤਸ੍ਸ ਚ ਟ ਵਂ+ਸੇ
ਅਂਸੇਸੁ ਨ੍ਤਪਚ੍ਚਯਸ੍ਸ ਟ ਹੋਤਿ ਵਾ ਨ੍ਤੁਸ੍ਸ ਚ. ਵਵਤ੍ਥਿਤਵਿਭਾਸਾ+ਯਂ. ਗਚ੍ਛਂ ਗਚ੍ਛਨ੍ਤਂ, ਗਚ੍ਛਨ੍ਤੇ.
੨੧੭. ਤੋ+ਤਾ+ਤਿ+ਤਾ ਸ+ਸ੍ਮਾ+ਸ੍ਮਿਂ ਨਾਸੁ
ਸ+ਸ੍ਮਾ+ਸ੍ਮਿਂ+ਨਾਸੁ ਨ੍ਤ+ਨ੍ਤੂਨਂ ਸਵਿਭਤ੍ਤੀਨਂ ਤੋ+ਤਾ+ਤਿ+ਤਾ ਹੋਨ੍ਤਿ ਵਾ ਯਥਾਕ੍ਕਮਂ. ਗਚ੍ਛਤਾ ਗਚ੍ਛਨ੍ਤੇਨ, ਗਚ੍ਛਨ੍ਤੇਹਿ ਗਚ੍ਛਨ੍ਤੇਭਿ. ਗਚ੍ਛਤੋ ਗਚ੍ਛਸ੍ਸ ਗਚ੍ਛਨ੍ਤਸ੍ਸ.
੨੧੬. ਤਂ ਨਂਮ੍ਹਿ
ਨਂਮ੍ਹਿ ਨ੍ਤ+ਨ੍ਤੂਨਂ ਸਵਿਭਤ੍ਤੀਨਂ ਤਂ ਵਾ ਹੋਤਿ. ਗਚ੍ਛਤਂ ਗਚ੍ਛਨ੍ਤਾਨਂ. ਗਚ੍ਛਤਾ ਗਚ੍ਛਨ੍ਤਾ ਗਚ੍ਛਨ੍ਤਮ੍ਹਾ ਗਚ੍ਛਨ੍ਤਸ੍ਮਾ. ਗਚ੍ਛਤਿ ਗਚ੍ਛਨ੍ਤੇ ਗਚ੍ਛਨ੍ਤਮ੍ਹਿ ਗਚ੍ਛਨ੍ਥਸ੍ਮਿਂ, ਚ੍ਛੇਨ੍ਤੇਸੁ.
ਏਵਂ ਮਹਂ ਚਰਂ ਤਿਟ੍ਠਂ, ਦਦਂ ਭੁਞ੍ਜਂ ਸੁਣਂ ਪਚਂ;
ਜਯਂ ਜੀਰਂ ਵਚਂ ਪੀਯਂ, ਸਰਂ ਕੁਬ੍ਬਂ ਜਪਂ ਵਜਂ.
ਇਚ੍ਚਾਦਯੋ.
ਭਵਨ੍ਤ ਸਿ,