੩. ਕਾਰਕਕਣ੍ਡ
ਅਥ ਵਿਭਤ੍ਤੀਨ+ਮਤ੍ਥਭੇਦਾ ਵੁਚ੍ਚਨ੍ਤੇ.
ਤਤ੍ਥ ਏਕਮ੍ਪਿ ਅਤ੍ਥਂ ਕਮ੍ਮਾਦਿਵਸੇਨ ਏਕਤ੍ਤਾਦਿਵਸੇਨ ਚ ਵਿਭਜਨ੍ਤੀਤਿ ਵਿਭਤ੍ਤਿਯੋ, ਸ੍ਯਾਦਯੋ. ਤਾ ਪਨ ਪਠਮਾਦਿਭੇਦੇਨ ਸਤ੍ਤਵਿਧਾ. ਤਾ ਯਥਾ ‘‘ਪਠਮਾ+ਤ੍ਥਮਤ੍ਤੇ’’ਤਿ ਪਠਮਾਵਿਭਤ੍ਤਿ ਹੋਤਿ. ਸਿਸ੍ਸ ਓਕਾਰ+ਲੋਪ+ਅ-ਮਾਦੇਸੇਸੁ ਨਰੋ ਇਤ੍ਥੀ ਨਪੁਂਸਕਂ.
ਸਕਤ੍ਥ+ਦਬ੍ਬ+ਲਿਙ੍ਗਾਨਿ, ਸਂਖ੍ਯਾ+ਕਮ੍ਮਾਦਿਪਞ੍ਚਕਂ;
ਨਾਮਤ੍ਥੋ ਤਸ੍ਸ ਸਾਮਞ੍ਞ-ਮਤ੍ਥਮਤ੍ਥਂ ਪਵੁਚ੍ਚਤੇ.
ਸੋ ਨਾਮਤ੍ਥੋ ਚ –
ਜਾਤਿ ਕ੍ਰਿਯਾ ਗੁਣੋ ਦਬ੍ਬਂ, ਤਥਾ ਨਾਮਨ੍ਤਿ ਪਞ੍ਚਧਾ;
ਸਦ੍ਦਸ੍ਸ+ਤ੍ਥੋ ਸ ਸਦ੍ਦੋਪਿ, ਪਞ੍ਚਧਾਵ+ਤ੍ਰ ਭਿਜ੍ਜਤੇ.
ਕਥਂ ਜਾਤਿਸਦ੍ਦੋ ਗੁਣਸਦ੍ਦੋਤ੍ਯਾਦਿਨਾ.
ਭਿਨ੍ਨੇਸ੍ਵ+ਭਿਨ੍ਨਧੀ+ਸਦ੍ਦਾ, ਸਬਲਾਦੀਸੁ ਯਬ੍ਬਲਾ;
ਵਤ੍ਤਨ੍ਤੇ ਜਾਤਿ ਏਸਾ+ਸ੍ਸ, ਮਾਲਾ ਸੁਤ੍ਤ+ਮਿਵਾ+ਨ੍ਵਿਤਾ.
ਅਦਬ੍ਬਭੂਤਂ ਕਤ੍ਤਾਦਿ-ਕਾਰਕਗ੍ਗਾਮਸਾਧਿਯਂ;
ਪਦਤ੍ਥਂ ਕਤ੍ਤੁਕਮ੍ਮਟ੍ਠਂ, ਕ੍ਰਿਯ+ਮਿਚ੍ਛਨ੍ਤਿ ਤਬ੍ਬਿਦੂ.
ਦਬ੍ਬਸ੍ਸਿਤੋ ਤਤੋ ਭਿਨ੍ਨੋ, ਨਿਮਿਤ੍ਤੋ ਤਪ੍ਪਤੀਤਿਯਾ;
ਵਿਨਸ੍ਸਨਸਭਾਵੋ ਚ, ਨਿਗ੍ਗੁਣੋਵ ਗੁਣੋ+ਚ੍ਚਤੇ.
ਏਤ੍ਥ ਪਟੋ ਸੁਕ੍ਕੋਤਿ ਵਿਨਸ੍ਸਨਸਭਾਵੋ ਚ ਚਸਦ੍ਦੇਨ ਵਿਪੁਲੋ ਆਕਾਸੋਤਿ ਅਵਿਨਸ੍ਸਨਸਭਾਵੋ ਚ ਅਤ੍ਤਨਿ ਵਿਸੁਂ ਗੁਣਰਹਿਤੋ ਗੁਣੋ+ਚ੍ਚਤੇ ਤ੍ਯਤ੍ਥੋ.
ਯਂ ਯਂ ਵਿਸੇਸ੍ਸਤੇ ਕਿਞ੍ਚਿ, ਤਂ ਤਂ ਦਬ੍ਬ+ਮਿਹੋ+ਚ੍ਚਤੇ;
ਜਾਤ੍ਯਾਦਿਨੋਪ੍ਯ+ਤੋ ਤਾਦਿ, ਦਬ੍ਬਤ੍ਤਂ ਪਰਿਕਪ੍ਪਤੇ.
ਏਤ੍ਥ ਗੋਜਾਤਿ ਅਸ੍ਸਜਾਤੀਤਿ ਵੁਤ੍ਤੇ ਜਾਤਿ ਦਬ੍ਬਂ. ਨੀਲੋ ਗੁਣੋਤਿ ਚ ਗੁਣੋ ਦਬ੍ਬਂ. ਪਚਨਕ੍ਰਿਯਾਤਿ ਚ ਗਮਨਾਦਿਕ੍ਰਿਯਾਤੋ ਵਿਸੇਸਿਯਤੀਤਿ ਕ੍ਰਿਯਾਵ ਦਬ੍ਬਂ.
ਨਾਮਰੂਪੇਨ ਸਦਬ੍ਬੇ, ਕ੍ਵਚਿ ਸਞ੍ਞੀ ਕਥੀਯਤੇ;
ਨਾਮਨ੍ਤਿ ਤਂ ਯਥਾ ਚਿਤ੍ਤੋ, ਸਞ੍ਞਾ ਸਦ੍ਦੋ ਤੁ ਤਦ੍ਧਨੀ.
ਨਾਮਸ੍ਸ ਦਬ੍ਬਤ੍ਤੇਪਿ ਚਿਤ੍ਤੋਤ੍ਯਾਦਿ ਨਾਮੇਨੇਵ ਪਸਿਜ੍ਝਤਿ, ਨੋ ਘਟ+ਪਟਾਦਯੋਵ ਦਬ੍ਬਤ੍ਤੇਨ, ਤਸ੍ਮਾ ਨਾਮ+ਮਿਤਿ ਸਞ੍ਞੀ ਕਥੀਯਤੇ, ਤਂਵਾਚਕਤ੍ਤਾ ਤਬ੍ਬਤੀ ਚਿਤ੍ਤਾਦਿ ਸਞ੍ਞਾਸਦ੍ਦੋਤਿ ਨਿਚ੍ਛਿਯਤੇਯ੍ਯ+ਧਿਪ੍ਪਾਯੋ.
ਅਯਂ ਪਞ੍ਚਵਿਧੋਪਿ ਅਤ੍ਥੋ ਸਦ੍ਦਤ੍ਥੋ ਚੇਵ ਸਾਮਤ੍ਥਿਯਾ ਗਮ੍ਯਮਾਨਤ੍ਥੋ ਚਾਤਿ ਦੁਬ੍ਬਿਧੋ. ਤਥਾ ਹਿ ‘‘ਪੀਨੋ ਦਿਵਾ ਨ ਭੁਞ੍ਜੇਯ੍ਯ’’ਮਿਤਿ ਭੁਤ੍ਤਿਨਿਰਾਕਤਿ ਸਦ੍ਦਤ੍ਥੋ. ਰਤ੍ਤਿਭੁਤ੍ਤਿ ਤੁ ਸਾਮਤ੍ਥਿਯਾ+ਵਗਮ੍ਯਤੇ. ਤੇਨੇ+ਤਂ ਵੁਚ੍ਚਤਿ –
ਅਤ੍ਥਪ੍ਪਤੀਤਿਯਂ ਸਦ੍ਦ-ਬ੍ਯਾਪਾਰੋ ਤਿਵਿਧੋ ਭਵੇ;
ਮੁਖ੍ਯੋ ਲਕ੍ਖਣ+ਬ੍ਯਞ੍ਜਨ-ਸਭਾਵੋ ਚਾਤਿ ਏਤ੍ਥ ਤੁ.
ਮੁਖ੍ਯੋ ਤੁ ਨਿਰਨ੍ਤਰਤ੍ਥੇ, ਲਕ੍ਖਣੋ ਤੁ ਤਿਰੋਹਿਤੇ;
ਅਤ੍ਥੇ+ਤਰੋ ਤੁ ਵਾਕ੍ਯਸ੍ਸ, ਅਤ੍ਥੇਯੇਵ ਪਵਤ੍ਤਤਿ.
‘‘ਮਞ੍ਚੇ’’ਤਿ ਨਿਰਨ੍ਤਰਤ੍ਥੇ ਵਤ੍ਤਮਾਨੋ ਮੁਖ੍ਯੋ, ‘‘ਮਞ੍ਚਾ ਉਗ੍ਘੋਸਨ੍ਤੀ’’ਤਿ ਤਿਰੋਹਿਤਤ੍ਥੇ ਵਤ੍ਤਮਾਨੋ ਲਕ੍ਖਣੋ, ਗਾਥਾਦਿਸਕਲਵਾਕ੍ਯਸ੍ਸ+ਤ੍ਥੇ ਵਤ੍ਤਮਾਨੋ ਬ੍ਯਞ੍ਜਨਸਭਾਵੋ.
ਬ੍ਯਾਪਾਰਸ੍ਸ ਪਭੇਦੇਨ, ਤਿਧਾ ਸਦ੍ਦੋਪਿ ਵਾਚਕੋ;
ਲਕ੍ਖਣਿਕੋ ਬ੍ਯਞ੍ਜਕੋਤਿ, ਤਦਤ੍ਥੋਪਿ ਤਿਧਾ ਮਤੋ.
ਵਚ੍ਚੋ ਲਕ੍ਖਣਿਕੋ ਬ੍ਯਙ੍ਗ੍ਯੋ, ਚੇਵਂ ਸਦ੍ਦੋ ਸੁਵਾਚਕੋ;
ਵੁਤ੍ਤਕਮੇਨ ਜਾਤ੍ਯਾਦਿ-ਭੇਦੇਨ ਪਞ੍ਚਧਾ ਭਵੇਤਿ.
੩੮. ਆਮਨ੍ਤਣੇ –
ਤਿ ਆਮਨ੍ਤਣਾਧਿਕੇ ਅਤ੍ਥਮਤ੍ਤੇ ਪਠਮਾਵਿਭਤ੍ਤਿ ਹੋਤਿ. ਭੋ ਨਰ, ਭੋ ਇਤ੍ਥਿ, ਭੋ ਨਪੁਂਸਕ.
ਸਦ੍ਦੇਨਾ+ਭਿਮੁਖੀਕਾਰੋ, ਵਿਜ੍ਜਮਾਨਸ੍ਸ ਵਤ੍ਥੁਨੋ;
ਆਮਨ੍ਤਣਂ ਵਿਧਾਤਬ੍ਬੇ, ਨਤ੍ਥਿ ‘‘ਰਾਜਾ ਭਵੇ’’ਤਿ+ਦਂ.
ਕ੍ਰਿਯਾ ਨਿਮਿਤ੍ਤਂ ਕਾਰਕਨ੍ਤੁ ਕਮ੍ਮ, ਕਤ੍ਤੁ, ਕਰਣ, ਸਮ੍ਪਦਾਨ, ਅਵਧਿ, ਆਧਾਰਭੇਦੇਨ ਛਬ੍ਬਿਧਂ, ਤਂ ਯਥਾ –
੨,੨. ਕਮ੍ਮੇ ਦੁਤਿਯਾ
ਕਰੀਯਤਿ ਕਤ੍ਤੁਕਿਰਿਯਾਯ ਸਮ੍ਬਨ੍ਧੀਯਤੀਤਿ ਕਮ੍ਮਂ, ਤਸ੍ਮਿਂ ਕਮ੍ਮਕਾਰਕੇ ਦੁਤਿਯਾਵਿਭਤ੍ਤਿ ਹੋਤਿ. ਤਂ ਤਿਵਿਧਂ ਨਿਬ੍ਬਤ੍ਤਿ, ਵਿਕਤਿ, ਪਤ੍ਤਿ ਭੇਦੇਨ, ਤਤ੍ਥ ਨਿਬ੍ਬਤ੍ਤਿਕਮ੍ਮੇ ਮਾਤਾ ਪੁਤ੍ਤਂ ਵਿਜਾਯਤਿ, ਆਹਾਰੋ ਸੁਖਂ ਜਨਯਤਿ, ਕਟਂ ਕਰੋਤਿ ਦਤ੍ਤੋ. ਵਿਕਤਿਯਂ ਕਟ੍ਠ+ਮਙ੍ਗਾਰਂ ਕਰੋਤਿ, ਸੁਵਣ੍ਣਂ ਕਟਕਂ ਕਰੋਤਿ, ਵੀਹਯੋ ਲੁਨਾਤਿ. ਪਤ੍ਤਿਯਂ ਦਤ੍ਤੋ ਘਰਂ ਪਵਿਸਤਿ, ਆਦਿਚ੍ਚਂ ਪਸ੍ਸਤਿ, ਧਮ੍ਮਂ ਸੁਣਾਤਿ, ਪਣ੍ਡਿਤੇ ਪਯਿਰੁਪਾਸਤਿ.
ਵੁਤ੍ਤਞ੍ਚ –
ਨਿਬ੍ਬਤ੍ਤਿ+ਵਿਕਤਿ+ਪਤ੍ਤਿ-ਭੇਦਾ ਕਮ੍ਮਂ ਤਿਧਾ ਮਤਂ;
ਕਤ੍ਤੁਕ੍ਰਿਯਾਭਿਗਮ੍ਮਨ੍ਤਂ, ਸੁਖ+ਮਙ੍ਗਾਰਂ+ਘਰਂ ਯਥਾਤਿ.
ਕਟਂ ਕਰੋਤਿ ਵਿਪੁਲਂ ਦਸ੍ਸਨੀਯਨ੍ਤਿ ਅਤ੍ਥੇਵ ਗੁਣਯੁਤ੍ਤਸ੍ਸ ਕਮ੍ਮਤਾ, ਵਿਪੁਲਂ ਕਰੋਤਿ, ਦਸ੍ਸਨੀਯਂ ਕਰੋਤੀਤਿ ਕ੍ਰਿਯਾਯ ਸਮ੍ਬਨ੍ਧਿਯਮਾਨਤ੍ਤਾ. ਓਦਨੋ ਪਚ੍ਚਤੇਤਿ ਓਦਨਸਦ੍ਦਤੋ ਕਮ੍ਮਤਾ ਨਪ੍ਪਤੀਯਤੇ, ਕਿਞ੍ਚਰਹਿ ਆਖ੍ਯਾਤਤੋ.
ਇਚ੍ਛਿਤਕਮ੍ਮਂ ਯਥਾ-ਗਾਵੁਂ ਪਯੋ ਦੋਹਤਿ, ਗੋਮਨ੍ਤਂ ਗਾਵਂ ਯਾਚਤਿ, ਗਾਵ+ਮਵ ਰੁਨ੍ਧਤਿ ਵਜਂ, ਮਾਣਵਕਂ ਮਗ੍ਗਂ ਪੁਚ੍ਛਤਿ, ਗੋਮਨ੍ਤਂ ਗਾਵਂ ਭਿਕ੍ਖਤੇ, ਰੁਕ੍ਖ+ਮਵਚਿਨਾਤਿ ਫਲਾਨਿ, ਰੁਕ੍ਖਾਤ੍ਯਤ੍ਥੋ. ਸਿਸ੍ਸਂ ਧਮ੍ਮਂ ਬ੍ਰੂਤੇ. ਏਤ੍ਥ ਪਯੋ, ਗਾਵਂ ਇਚ੍ਚਾਦਿ ਇਚ੍ਛਿਤਂ, ਗਾਵੁਂ, ਗੋਮਨ੍ਤ+ਮਿਚ੍ਚਾਦਿ ਅਨਿਚ੍ਛਿਤਂ. ਏਵ+ਮਨਿਚ੍ਛਿਤੇਪਿ ਕਣ੍ਟਕਂ ਮਦ੍ਦਤਿ, ਵਿਸਂ ਗਿਲਤਿ. ਯਂ ਨੇਵਿ+ਚ੍ਛਿਤਂ, ਨਾਪਿ ਅਨਿਚ੍ਛਿਤਂ, ਤਤ੍ਰਾਪਿ ਗਾਮਂ ਗਚ੍ਛਨ੍ਤੋ ਰੁਕ੍ਖਮੂਲ+ਮੁਪਸਪ੍ਪਤਿ.
ਆਧਾਰੇ ਅਧਿਸਿ+ਠਾ+ਸਾਨਂ ਪਯੋਗੇ ਚ, ਪਥਵਿਂ ਅਧਿਸੇਸ੍ਸਤਿ, ਗਾਮ+ਮਧਿਤਿਟ੍ਠਤਿ, ਰੁਕ੍ਖ+ਮਜ੍ਝਾਸਤੇਤਿ. ਏਤ੍ਥ ਪਥਵਿਨ੍ਤਿ ਪਥਵਿਯਨ੍ਤਿ ਅਤ੍ਥੋ. ਏਵ+ਮਭਿ, ਨਿਪੁਬ੍ਬਵਿਸਸ੍ਸਾਪਿ, ਧਮ੍ਮ+ਮਭਿਨਿਵਿਸਤੇ, ਧਮ੍ਮੇ ਵਾ. ਤਥਾ ਉਪ, ਨ੍ਵ+ਜ੍ਝਾ+ਪੁਬ੍ਬਵਸਤਿਸ੍ਸ, ਗਾਮ+ਮੁਪਵਸਤਿ, ਗਾਮ+ਮਨੁਵਸਤਿ, ਵਿਹਾਰ+ਮਧਿਵਸਤਿ, ਗਾਮ+ਮਾਵਸਤਿ, ਅਗਾਰਂ ਅਜ੍ਝਵਸਤਿ, ਏਤ੍ਥ ਗਾਮਨ੍ਤਿ ਗਾਮੇਤ੍ਯਤ੍ਥੋ. ਤਥਾ ਤਪ੍ਪਾਨਾ+ਚਾਰੇਪਿ, ਨਦਿਂ ਪਿਬਤਿ, ਗਾਮਂ ਚਰਤਿ, ਨਦਿਯਂਤ੍ਯਤ੍ਥੋ. ਸਚੇ ਮਂ ਨਾਲਪਿਸ੍ਸਤੀਤਿ ਮਯਾ ਸਦ੍ਧਿਂਤ੍ਯਤ੍ਥੋ. ਵਿਹਿਤਾਵ ਪਟਿ-ਯੋਗੇਪਿ ਦੁਤਿਯਾ, ਪਟਿਭਨ੍ਤੁ ਤਂ ਚੁਨ੍ਦ ਬੋਜ੍ਝਙ੍ਗਾ, ਤਮ੍ਪਟਿ ਬੋਜ੍ਝਙ੍ਗਾ ਭਾਸਨ੍ਤੂਤਿ ਅਤ੍ਥੋ. ਉਪਮਾ ਮਂ ਪਤਿਭਾਤਿ, ਉਪਮਾ ਮਂ ਉਪਟ੍ਠਾਤਿਤ੍ਯਤ੍ਥੋ. ਧਾਤੁਨਾਯੁਤ੍ਤੇ ‘‘ਤਸ੍ਸ ਨਪ੍ਪਟਿਭਾਤੀ’’ਤਿ ਛਟ੍ਠੀ.
੩. ਕਾਲਦ੍ਧਾਨ+ਮਚ੍ਚਨ੍ਤਸਂਯੋਗੇ
ਕਾਲਦ੍ਧਾਨਂ ਦਬ੍ਬ+ਗੁਣ+ਕ੍ਰਿਯਾਹਿ ਅਚ੍ਚਨ੍ਤਸਂਯੋਗੇ ਤੇਹਿ ਕਾਲਦ੍ਧਾਨਵਾਚੀਹਿ ਦੁਤਿਯਾ ਹੋਤਿ. ਕਾਲੇ-ਸਤ੍ਤਾਹਂ ਗਵਪਾਨਂ, ਮਾਸਂ ਮਂਸੋਦਨਂ, ਸਰਦਂ ਰਮਣੀਯਾ ਨਦੀ, ਸਬ੍ਬਕਾਲਂ ਰਮਣੀਯਂ ਨਨ੍ਦਨਂ, ਤਯੋ ਮਾਸੇ ਅਭਿਧਮ੍ਮਂ ਦੇਸੇਤਿ. ਅਦ੍ਧਨਿ-ਯੋਜਨਂ ਵਨਰਾਜਿ, ਯੋਜਨਂ ਦੀਘੋ ਪਬ੍ਬਤੋ, ਕੋਸਂ ਸਜ੍ਝਾਯਤਿ.
ਪੁਬ੍ਬਨ੍ਹਸਮਯਂ ਨਿਵਾਸੇਤ੍ਵਾ, ਏਕਂ ਸਮਯਂ ਭਗਵਾ, ਇਮਂ ਰਤ੍ਤਿਂ ਚਤ੍ਤਾਰੋ ਮਹਾਰਾਜਾਨੋਤਿ ਏਵਮਾਦੀਸੁ ਕਾਲਵਾਚੀਹਿ ਅਚ੍ਚਨ੍ਤਸਂਯੋਗੇ ਦੁਤਿਯਾ, ਬਹੁਲਂਵਿਧਾਨਾ ਵਿਭਤ੍ਤਿਵਿਪਲ੍ਲਾਸੋ ਵਾ. ਮਾਸੇਨਾ+ਨੁਵਾਕੋ+ਧੀਤੋ, ਕੋਸੇਨਾ+ਨੁਵਾਕੋ+ਧੀਤੋਤਿ ਕਰਣਤ੍ਥੇ ਤਤਿਯਾ.
੪. ਗਤਿਬੋਧਾਹਾਰਸਦ੍ਦਤ੍ਥਾਕਮ੍ਮਕਭਜ੍ਜਾਦੀਨਂ ਪਯੋਜ੍ਜੇ
ਗਤ੍ਯਤ੍ਥਾਨਂ ਬੋਧਤ੍ਥਾਨਂ ਆਹਾਰਤ੍ਥਾਨਂ ਸਦ੍ਦਤ੍ਥਾਨ+ਮਕਮ੍ਮਕਾਨਂ ਭਜ੍ਜਾਦੀਨਞ੍ਚ ਪਯੋਜ੍ਜੇ ਕਤ੍ਤਰਿ ਦੁਤਿਯਾ ਹੋਤਿ. ਦਤ੍ਤੋ ਗਮਯਤਿ ਮਾਣਵਕਂ ਗਾਮਂ, ਯਾਪਯਤਿ ਵਾ. ਗੁਰੁ ਬੋਧਯਤਿ ਮਾਣਵਕਂ ਧਮ੍ਮਂ, ਵੇਦਯਤਿ ਵਾ. ਮਾਤਾ ਭੋਜਯਤਿ ਪੁਤ੍ਤ+ਮੋਦਨਂ, ਆਸਯਤਿ ਵਾ. ਗੁਰੁ ਅਜ੍ਝਾਪਯਤਿ ਸਿਸ੍ਸਂ ਵੇਦਂ, ਪਾਠਯਤਿ ਵਾ. ਪਯੋਜ੍ਜਤੋ+ਞ੍ਞਤ੍ਰ ਕਮ੍ਮੇ ਦੁਤਿਯਾ. ਪੋਸੋ ਆਸਯਤਿ ਦਤ੍ਤਂ, ਸਾਯਯਤਿ ਵਾ. ਪੋਸੋ ਅਞ੍ਞਂ ਭਜ੍ਜਾਪੇਤਿ, ਅਞ੍ਞਂ ਕੋਟ੍ਟਾਪੇਤਿ, ਅਞ੍ਞਂ ਸਨ੍ਥਰਾਪੇਤਿ.
੫. ਹਰਾਦੀਨਂ ਵਾ
ਹਰਾਦੀਨਂ ਪਯੋਜ੍ਜੇ ਕਤ੍ਤਰਿ ਦੁਤਿਯਾ ਹੋਤਿ ਵਾ. ਪੋਸੋ ਹਾਰੇਤਿ ਭਾਰਂ ਦਤ੍ਤਂ, ਦਤ੍ਤੇਨੇਤਿ ਵਾ. ਦਸ੍ਸਯਤੇ ਜਨਂ ਰਾਜਾ, ਜਨੇਨੇਤਿ ਵਾ. ਅਭਿਵਾਦਯਤੇ ਗੁਰੁਂ ਦਤ੍ਤਂ, ਦਤ੍ਤੇਨੇਤਿ ਵਾ. ਅਜ੍ਝੋਹਾਰੇਤਿ ਸਤ੍ਤੁਂ ਦਤ੍ਤਂ, ਦਤ੍ਤੇਨੇਤਿ ਵਾ. ਕਾਰੇਤਿ ਦਤ੍ਤੋ ਦਤ੍ਤਂ, ਦਤ੍ਤੇਨੇਤਿ ਵਾ. ਪਕ੍ਖੇ ਸਬ੍ਬਤ੍ਰ ਕਤ੍ਤਰਿ ਤਤਿਯਾ.
੬. ਨ ਖਾਦਾਦੀਨਂ
ਖਾਦਾਦੀਨਂ ਪਯੋਜ੍ਜੇ ਕਤ੍ਤਰਿ ਦੁਤਿਯਾ ਨ ਹੋਤਿ. ਗਤ੍ਯਤ੍ਥਾਦੀਸੁ ਕ੍ਵਚਿ ਪਟਿਸੇਧਤ੍ਥ+ਮਿਦਂ. ਖਾਦਯਤਿ ਦਤ੍ਤੋ ਦਤ੍ਤੇਨ, ਆਦਯਤਿ ਦਤ੍ਤੇਨ, ਅਵ੍ਹਾਪਯਤਿ ਦਤ੍ਥੇਨ, ਸਦ੍ਦਾਯਯਤਿ ਦਤ੍ਤੇਨ, ਨਾਯਯਤਿ ਦਤ੍ਤੇਨ, ਕਨ੍ਦਯਤਿ ਦਤ੍ਤੇਨ.
੭. ਝਾਦੀਹਿ ਯੁਤ੍ਤਾ
ਧਿਆਦੀਹਿ ਯੁਤ੍ਤਤੋ ਦੁਤਿਯਾ ਹੋਤਿ. ਧਿ+ਰਤ੍ਥੁ+ਮਂ ਪੁਤਿਕਾਯਂ, ਅਨ੍ਤਰਾ ਚ ਰਾਜਗਹਂ ਅਨ੍ਤਰਾ ਚ ਨਾਲਨ੍ਦਂ, ਰਾਜਗਹਸ੍ਸ ਚ ਨਾਲਨ੍ਦਸ੍ਸ ਚ ਵਿਵਰਭੂਤੇ ਮਜ੍ਝੇਤਿ ਅਤ੍ਥੋ. ਸਮਾਧਾਨ+ਮਨ੍ਤਰੇਨ, ਮੁਚਲਿਨ੍ਦ+ਮਭਿਤੋ ਸਰਂ. ਛਟ੍ਠ੍ਯਤ੍ਥੇ+ਯਂ ਦੁਤਿਯਾ.
੮. ਲਕ੍ਖਣਿਤ੍ਥਮ੍ਭੂਤਵਿਚ੍ਛਾਸ੍ਵ+ਭਿਨਾ
ਲਕ੍ਖਣਾਦੀਸ੍ਵ+ਤ੍ਥੇਸੁ ਅਭਿਨਾ ਯੁਤ੍ਤਮ੍ਹਾ ਦੁਤਿਯਾ ਹੋਤਿ. ਰੁਕ੍ਖ+ਮਭਿਵਿਜ੍ਜੋਤਤੇ ਚਨ੍ਦੋ, ਏਤ੍ਥ ਰੁਕ੍ਖੋ ਲਕ੍ਖਣਂ, ਚਨ੍ਦੋ ਲਕ੍ਖਿਤਬ੍ਬੋ, ਤਤ੍ਰ ਅਭਿਨਾ ਰੁਕ੍ਖਸ੍ਸ ਲਕ੍ਖਣਵੁਤ੍ਤਿਤਾ ਪਕਾਸੀਯਤੀਤਿ ਰੁਕ੍ਖੋ ਅਭਿਨਾ ਯੁਤ੍ਤੋ ਨਾਮ. ਸਾਧੁ ਦੇਵਦਤ੍ਤੋ ਮਾਤਰ+ਮਭਿ, ਮਾਤਰਿ ਸਾਧੁਤ੍ਤਂ ਪਤ੍ਤੋਤ੍ਯਤ੍ਥੋ. ਰੁਕ੍ਖਂ ਰੁਕ੍ਖਂਅਭਿ ਵਿਜ੍ਜੋਤਤੇ ਚਨ੍ਦੋ, ਰੁਕ੍ਖੇ ਰੁਕ੍ਖੇਤ੍ਯਤ੍ਥੋ.
੯. ਪਤਿਪਰੀਹਿ ਭਾਗੇ ਚ
ਪਤਿਪਰੀਹਿ ਯੁਤ੍ਤਤੋ ਲਕ੍ਖਣਾਦੀਸੁ ਭਾਗੇ ਚ+ਤ੍ਥੇ ਦੁਤਿਯਾ ਹੋਤਿ. ਰੁਕ੍ਖਂਪਤਿ ਵਿਜ੍ਜੋਤਤੇ, ਸਾਧੁ ਦੇਵਦਤ੍ਤੋ ਮਾਤਰਂਪਤਿ, ਰੁਕ੍ਖਂ ਰੁਕ੍ਖਂਪਤਿ ਤਿਟ੍ਠਤਿ, ਯ+ਦੇਤ੍ਥ ਮਂ ਪਤਿ ਸਿਯਾ, ਯੋ ਮਮ ਭਾਗੋ, ਸੋ ਦੀਯਤੁਤ੍ਯਤ੍ਥੋ. ਏਵਂ ਰੁਕ੍ਖਂਪਰਿਤ੍ਯਾਦਿਪਿ.
੧੦. ਅਨੁਨਾਤਿ
ਲਕ੍ਖਣਾਦੀਸੁ ਦੁਤਿਯਾ. ਰੁਕ੍ਖਮਨੁ ਵਿਜ੍ਜੋਤਤੇ, ਸਚ੍ਚਕਿਰਿਯ+ਮਨੁ ਵਸ੍ਸਿ, ਹੇਤੁ ਚ ਲਕ੍ਖਣਂ ਭਵਤਿ, ਸਾਧੁ ਦੇਵਦਤ੍ਤੋ ਮਾਤਰ+ਮਨੁ, ਰੁਕ੍ਖਂ ਰੁਕ੍ਖ+ਮਨੁ ਵਿਜ੍ਜੋਤਤੇ, ਯਦੇਤ੍ਥ ਮਂਅਨੁ ਸਿਯਾ.
੧੧. ਸਹਤ੍ਥੇ
ਸਹਤ੍ਥੇ ਅਨੁਨਾ ਯੁਤ੍ਤਮ੍ਹਾ ਦੁਤਿਯਾ. ਪਬ੍ਬਤ+ਮਨੁ ਤਿਟ੍ਠਤਿ, ਪਬ੍ਬਤੇਨ ਸਹ ਤ੍ਯਤ੍ਥੋ.
੧੨. ਹੀਨੇ
ਹੀਨਤ੍ਥੇ ਅਨੁਨਾ ਯੁਤ੍ਤਮ੍ਹਾ ਦੁਤਿਯਾ. ਅਨੁਸਾਰਿਪੁਤ੍ਤਂ ਪਞ੍ਞਵਨ੍ਤੋ ਭਿਕ੍ਖੂ, ਸਾਰਿਪੁਤ੍ਤਤੋ ਪਞ੍ਞਾਯ ਹੀਨਾਤ੍ਯਤ੍ਥੋ.
੧੩. ਉਪੇਨ
ਹੀਨਤ੍ਥੇ ਉਪੇਨ ਯੁਤ੍ਤਮ੍ਹਾ ਦੁਤਿਯਾ. ਉਪਸਾਰਿਪੁਤ੍ਤਂ ਪਞ੍ਞਵਨ੍ਤੋ.
੧੬. ਕਤ੍ਤੁਕਰਣੇਸੁ ਤਤਿਯਾ
ਕਤ੍ਤਰਿ ਕਰਣੇ ਚ ਕਾਰਕੇ ਤਤਿਯਾ ਹੋਤਿ. ਜਿਨੇਨ ਦੇਸਿਤੋ ਧਮ੍ਮੋ, ਬੁਦ੍ਧੇਨ ਜਿਤੋ ਮਾਰੋ, ਅਹਿਨਾ ਦਟ੍ਠੋ ਨਰੋ. ਯਤ੍ਥ ਕਾਰਣਕਾਰਣਮ੍ਪਿ ਕਾਰਣਵਸੇਨ ਵੁਚ੍ਚਤਿ, ਤਤ੍ਥਾਪਿ ਤਤਿਯਾ, ਚੋਰੇਹਿ ਗਾਮੋ ਦਡ੍ਢੋ, ਤਿਣੇਹਿ ਭਤ੍ਤਂ ਸਿਦ੍ਧਂ, ਸਦ੍ਧੇਹਿ ਕਾਰਿਤਾ ਵਿਹਾਰਾ.
ਅਤ੍ਤਪਧਾਨੋ ਕਿਰਿਯਂ, ਯੋ ਨਿਬ੍ਬਤ੍ਤੇਤਿ ਕਾਰਕੋ;
ਅਪਯੁਤ੍ਤੋ ਪਯੁਤ੍ਤੋ ਵਾ, ਸ ਕਤ੍ਤਾਤਿ ਪਵੁਚ੍ਚਤਿ.
ਕਰਣੇ-ਤਂ ਪਨ ਦੁਵਿਧਂ ਅਜ੍ਝਤ੍ਤਿਕਬਾਹਿਰਵਸੇਨ, ਯਥਾ ਹਤ੍ਥੇਨ ਕਮ੍ਮਂ ਕਰੋਤਿ, ਚਕ੍ਖੁਨਾ ਰੂਪਂ ਪਸ੍ਸਤਿ, ਮਨਸਾ ਧਮ੍ਮਂ ਵਿਞ੍ਞਾਯਤਿ. ਦਤ੍ਤੇਨ ਵਿਹਯੋ ਲੁਨਾਤਿ, ਅਗ੍ਗਿਨਾ ਕੁਟਿਂ ਝਾਪੇਤਿ.
ਬਾਹਿਰਞ੍ਚ ਤਥਾ+ਜ੍ਝਤ੍ਤਂ, ਕਰਣਂ ਦੁਵਿਧਂ ਯਥਾ;
ਵੀਹਿਂ ਲੁਨਾਤਿ ਦਤ੍ਤੇਨ, ਨੇਤ੍ਤੇਨ ਚਨ੍ਦ+ਮਿਕ੍ਖਤੇ.
ਪਕਤਿਯਾ ਅਭਿਰੂਪੋ, ਗੋਤ੍ਤੇਨ ਗੋਤਮੋ ਇਚ੍ਚਾਦਿ ਭੂਧਾਤੁਸ੍ਸ ਸਮ੍ਭਵਾ ਕਰਣੇ ਤਤਿਯਾ. ਤਥਾ ਸਾਰਿਪੁਤ੍ਤੋਤਿ ਨਾਮੇਨ ਵਿਸ੍ਸੁਤੋ, ਜਾਤਿਯਾ ਖਤ੍ਤਿਯੋ ਬੁਦ੍ਧੋ, ਜਾਤਿਯਾ ਸਤ੍ਤਵਸ੍ਸਿਕੋ, ਸਿਪ੍ਪੇਨ ਨਲ਼ਕਾਰੋ ਸੋ, ਏਕੂਨਤਿਂਸੋ ਵਯਸਾ, ਏਵਂ ਸਮੇਨ ਧਾਵਤਿ, ਵਿਸਮੇਨ ਧਾਵਤਿ, ਦ੍ਵਿਦੋਣੇਨ ਧਞ੍ਞਂ ਕਿਣਾਤਿ.
੧੭. ਸਹਤ੍ਥੇਨ
ਸਹਤ੍ਥੇਨ ਯੋਗੇ ਤਤਿਯਾ ਸਿਯਾ. ਤਤਿਯਾਪਿ ਛਟ੍ਠੀਵ ਅਪ੍ਪਧਾਨੇ ਏਵ ਭਵਤਿ. ਪੁਤ੍ਤੇਨ ਸਹਾ+ਗਤੋ, ਪੁਤ੍ਤੇਨ ਸਦ੍ਧਿਂ ਆਗਤੋ, ਵਿਤਕ੍ਕੇਨ ਸਹ ਵਤ੍ਤਤਿ, ਪੁਤ੍ਤੇਨ ਸਹ ਥੂਲੋ, ਨਿਸੀਦਿ ਭਗਵਾ ਸਦ੍ਧਿਂ ਭਿਕ੍ਖੁਸਙ੍ਘੇਨ, ਸਹਸ੍ਸੇਨ ਸਮਂ ਮਿਤਾ, ਸਬ੍ਬੇਹਿ ਮੇ ਪਿਯੇਹਿ ਮਨਾਪੇਹਿ ਨਾਨਾਭਾਵੋ.
੧੮. ਲਕ੍ਖਣੇ
ਲਕ੍ਖਣੇ ਵਤ੍ਤਮਾਨਤੋ ਤਤਿਯਾ. ਭਿਨ੍ਨੇਨ ਸੀਸੇਨ ਪਗ੍ਘਰਨ੍ਤੇਨ ਲੋਹਿਤੇਨ ਪਟੀਵਿਸ੍ਸਕੇ ਉਜ੍ਝਾਪੇਸਿ, ਊਨਪਞ੍ਚਬਨ੍ਧਨੇਨ ਪਤ੍ਤੇਨ ਅਞ੍ਞਂ ਨਵਂ ਪਤ੍ਤਂ ਚੇਤਾਪੇਯ੍ਯ, ਤਿਦਣ੍ਡਕੇਨ ਪਰਿਬ੍ਬਾਜਕ+ਮਦ੍ਦਕ੍ਖਿ, ਅਕ੍ਖਿਨਾ ਕਾਣੋ, ਹਤ੍ਥੇਨ ਕੁਣੀ, ਪਾਦੇਨ ਖਞ੍ਜੋ, ਪਿਟ੍ਠਿਯਾ ਖੁਜ੍ਜੋ. ਤੇਨ ਹਿ ਵਿਕਲਙ੍ਗੇਨ ਵਿਕਲਙ੍ਗਿਨੋ ਵਿਕਾਰੋ ਲਕ੍ਖਿਯਤੇ.
੧੯. ਹੇਤੁਮ੍ਹਿ
ਵਾਸਾਦਿਲਕ੍ਖਣਕ੍ਰਿਯਾਯ ਹੇਤੁਤੋ ਤਤਿਯਾ. ਅਨ੍ਨੇਨ ਵਸਤਿ, ਵਿਜ੍ਜਾਯ ਵਸਤਿ, ਨ ਜਚ੍ਚਾ ਵਸਲੋ ਹੋਤਿ, ਕਮ੍ਮੁਨਾ ਵਸਲੋ ਹੋਤਿ, ਦਾਨੇਨ ਭੋਗਵਾ, ਆਚਾਰੇਨ ਕੁਲਂ, ਤੇਨ ਪਾਣਿ ਕਾਮਦਦੋ.
੨੦. ਪਞ੍ਚਮੀ+ਣੇ ਵਾ
ਇਣੇ ਹੇਤੁਮ੍ਹਿ ਪਞ੍ਚਮੀ ਵਾ. ਸਤਸ੍ਮਾ ਬਦ੍ਧੋ, ਸਤੇਨ ਵਾ.
੨੧. ਗੁਣੇ
ਪਰਙ੍ਗਭੂਤੇ ਹੇਤੁਮ੍ਹਿ ਪਞ੍ਚਮੀ ਹੋਤਿ ਵਾ. ਜਲ਼ਤ੍ਤਾ ਬਦ੍ਧੋ, ਜਲ਼ਤ੍ਤੇਨਵਾ, ਪਞ੍ਞਾਯ ਮੁਤ੍ਤੋ, ਹੁਤ੍ਵਾ ਅਭਾਵਤੋ ਅਨਿਚ੍ਚਾ, ਸਙ੍ਖਾਰਨਿਰੋਧਾ ਵਿਞ੍ਞਾਣਨਿਰੋਧੋ. ਬਹੁਲਂਵਿਧਾਨਾ ਸਤ੍ਤਮ੍ਯਤ੍ਥੇਹਿਪਿ, ਤੇਨ ਸਮਯੇਨ, ਕਾਲੇਨ ਧਮ੍ਮਸਾਕਚ੍ਛਾ, ਪੁਰਤ੍ਥਿਮੇਨ ਧਤਰਟ੍ਠੋ, ਦਕ੍ਖਿਣੇਨ ਵਿਰੂਲ਼੍ਹਕੋ, ਉਤ੍ਤਰੇਨ ਕਪਿਲਵਤ੍ਥੁ, ਯੇਨ ਭਗਵਾ, ਤੇਨੁਪਸਙ੍ਕਮਿ, ਸੋ ਵੋ ਮਮ+ਚ੍ਚਯੇਨ ਸਤ੍ਥਾਤਿ. ਮਾਸੇਨ ਭੁਞ੍ਜਤਿ, ਏਕਾਹੇਨੇਵ ਬਾਰਾਣਸਿਂ ਪਾਵਿਸਿ, ਨਵਹਿ ਮਾਸੇਹਿ ਵਿਹਾਰਂ ਕਾਰਾਪੇਸਿ, ਕਹਾਪਣੇਨ ਊਨੋ, ਧਨੇਨ ਵਿਕਲੋ, ਅਸਿਨਾ ਕਲਹੋ, ਆਚਾਰੇਨ ਨਿਪੁਣੋ, ਗੁਲ਼ੇਨ ਮਿਸ੍ਸਕਂ, ਵਾਚਾਯ ਸਖਿਲੋ, ਮਣਿਨਾ ਅਤ੍ਥੋ, ਧਨੇਨ ਅਤ੍ਥੋ, ਯੋਜਨੇਨ ਗਚ੍ਛਤਿ ਇਚ੍ਚਾਦਿ ਹੇਤੁਮ੍ਹਿ ਕਰਣੇ ਵਾ ਤਤਿਯਾ. ਅਤ੍ਤਨਾਵ ਅਤ੍ਤਾਨਂ ਸਮ੍ਮਨ੍ਨਤੀਤਿ ਪਚ੍ਚਤ੍ਤੇ ਬਹੁਲਂਵਿਧਾਨਾ ਕਤ੍ਤਰਿ ਤਤਿਯਾ. ਏਵਂ ਤਿਲੇਹਿ ਖੇਤ੍ਤੇ ਵਪਤੀਤਿ ਕਮ੍ਮਤ੍ਥੇ, ਸੁਮੁਤ੍ਤਾ ਮਯਂ ਤੇਨ ਮਹਾਸਮਣੇਨਾਤਿ ਪਞ੍ਚਮ੍ਯਤ੍ਥੇ ਚ.
੨੪. ਚਤੁਤ੍ਥੀ ਸਮ੍ਪਦਾਨੇ
ਅਚੇਤਨਂ ਸਚੇਤਨਂ ਵਾ ਪਟਿਗ੍ਗਾਹਕਭਾਵੇਨਾ+ਪੇਕ੍ਖਿਤਂ, ਤਂ ਸਮ੍ਪਦਾਨਂ, ਤਞ੍ਚ ਦਾ-ਦਾਨੇਤਿ ਧਾਤੁਤੋ ਬ੍ਯਪ੍ਪੇਨ ਯੁਤ੍ਤਮੇਵ, ਤਤ੍ਥ ਚਤੁਤ੍ਥੀ ਹੋਤਿ. ਤਞ੍ਚ ਦੀਯਮਾਨਸ੍ਸ ਵਤ੍ਥੁਨੋ ਅਨਿਵਾਰਣ+ਜ੍ਝੇਸਨਾ+ਨੁਮਤਿਤੋ ਤਿਵਿਧੋ, ਯਥਾ ਬੁਦ੍ਧਸ੍ਸ ਪੁਪ੍ਫਂ ਦੇਤਿ, ਬੋਧਿਰੁਕ੍ਖਸ੍ਸ ਜਲਂ ਦੇਤਿ, ਯਾਚਕਸ੍ਸ ਧਨਂ ਦੇਤਿ, ਭਿਕ੍ਖੂਨਂ ਦਾਨਂ ਦੇਤਿ.
ਅਨਿਰਾਕਰਣਾ+ਰਾਧ-ਨ+ਬ੍ਭਨੁਞ੍ਞਵਸੇਨ ਹਿ;
ਸਮ੍ਪਦਾਨਂ ਤਿਧਾ ਵੁਤ੍ਤਂ, ਰੁਕ੍ਖ+ਯਾਚਕ+ਭਿਕ੍ਖਵੋ.
ਆਧਾਰਵਿਵਕ੍ਖਾਯਂ ਸਤ੍ਤਮੀਪਿ, ਸਙ੍ਘੇ ਗੋਤਮਿ ਦੇਹਿ, ਸਙ੍ਘੇ ਦਿਨ੍ਨੇ ਅਹਞ੍ਚੇਵ ਪੂਜਿਤੋ ਭਵਿਸ੍ਸਾਮਿ, ਯਾ ਪਲਾਲਮਯਂ ਮਾਲਂ, ਨਾਰੀ ਦਤ੍ਵਾਨ ਚੇਤਿਯੇਤਿ.
੨੫. ਤਾਦਤ੍ਥ੍ਯੇ
ਤਾਦਤ੍ਥ੍ਯੇ ਚਤੁਤ੍ਥੀ ਸਿਯਾ. ਤਦਤ੍ਥਸ੍ਸ ਭਾਵੇ, ਤਾਦਤ੍ਥ੍ਯਂ, ਤਸ੍ਮਿਂ ਤਦਤ੍ਥਭਾਵੇ ਜੋਤਨੀਯੇਵ ਚਤੁਤ੍ਥੀ ਸਿਯਾ. ਤਦਤ੍ਥਸ੍ਸ ਭਾਵੋਤਿ ਨਿਮਿਤ੍ਤਨਿਮਿਤ੍ਤੀਸਮ੍ਬਨ੍ਧੇ ਛਟ੍ਠੀ, ਤਸ੍ਮਾ ਛਟ੍ਠਾਪਵਾਦੋ+ਯਂ. ਸਮੇਪਿ ਨਿਮਿਤ੍ਤਨਿਮਿਤ੍ਤੀਨਂ ਸਮ੍ਬਨ੍ਧੇ ਨਿਮਿਤ੍ਤਭੂਤਯੂਪਤੋਵ ਚਤੁਤ੍ਥੀ, ਨੋ ਨਿਮਿਤ੍ਤੀਭੂਤਦਾਰੁਤੋ. ਯੂਪਾਯ ਦਾਰੁ, ਪਾਕਾਯ ਵਜਤਿ, ਬੁਦ੍ਧਸ੍ਸਤ੍ਥਾਯ ਜੀਵਿਤਂ ਪਰਿਚ੍ਚਜਾਮਿ, ਨੇਵ ਦਵਾਯ, ਨ ਮਦਾਯ, ਊਨਸ੍ਸ ਪਾਰਿਪੂਰਿਯਾ, ਅਤ੍ਥਾਯ ਹਿਤਾਯ ਸੁਖਾਯ ਸਂਵਤ੍ਤਤਿ, ਲੋਕਾਨੁਕਮ੍ਪਾਯ, ਫਾਸੁ ਵਿਹਾਰਾਯ.
ਇਚ੍ਚਾਯਂ ਕਚ੍ਚਾਯਨੇ ਉਪਰਿ ਵਕ੍ਖਮਾਨਸ੍ਸ ਚਤੁਤ੍ਥੀਤਿ ਸਾਧਿਤਤ੍ਤਾ ਇਧ ਛਟ੍ਠੀਤਿ ਦੀਪਨਤ੍ਥਂ ਵੁਚ੍ਚਤੇ –
ਕਸ੍ਸ ਸਾਦੁ ਨਰੁਚ੍ਚਤਿ, ਮਾ ਅਯਸ੍ਮਨ੍ਤਾਨਮ੍ਪਿ ਸਙ੍ਘਭੇਦੋ ਰੁਚ੍ਚਿਤ੍ਥ, ਖਮਤਿ ਸਙ੍ਘਸ੍ਸ, ਭਤ੍ਤ+ਮਸ੍ਸ ਨਚ੍ਛਾਦੇਤੀਤਿ ਛਟ੍ਠੀ ਸਮ੍ਬਨ੍ਧਵਚਨਿਚ੍ਛਾਯਂ, ਨ ਚੇ+ਵਂ ਵਿਰੋਧੋ ਸਿਯਾ, ਸਦਿਸਰੂਪਤ੍ਤਾ, ਏਵਂਵਿਧੇਸੁ ਚ ਸਮ੍ਬਨ੍ਧਸ੍ਸ ਸਦ੍ਦਿਕਾਨੁਮਤਤ੍ਤਾ. ਤਥਾ ਹਿ ਭਾਗਵੁਤ੍ਤਿਯਾ ‘‘ਉਪਪਦਵਿਭਤ੍ਤਿ ਛਟ੍ਠਿਯਾ+ਪਵਾਦਾ’’ਤਿ ਵੁਤ੍ਤਂ, ਸਦ੍ਦਨ੍ਤਰੇ ਵਿਹਿਤਾ ਵਿਭਤ੍ਤਿ ਉਪਪਦਵਿਭਤ੍ਤਿ.
ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀਤਿ ਅਤ੍ਥਮਤ੍ਤੇ ਪਠਮਾ, ਕਸ੍ਸ ਵਾ ਤੁਯ੍ਹਨ੍ਤਿ ਅਵਤ੍ਵਾ ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀਤਿ ਅਤ੍ਥਮਤ੍ਤੇ ਪਠਮਾਵਸੇਨ ਬ੍ਯਭਿਚਾਰਦਸ੍ਸਨਾ. ਏਵ+ਮਞ੍ਞਾਪਿ ਵਿਞ੍ਞੇਯ੍ਯਾ, ਪਰਤੋਪਿ ਯਥਾਗਮਂ.
ਰਞ੍ਞੋ ਸਤਂ ਧਾਰੇਤਿ ਰਞ੍ਞੋ ਛਤ੍ਤਂ ਧਾਰੇਤੀਤਿ ਸਮ੍ਬਨ੍ਧੇ ਛਟ੍ਠੀਵ. ਸਿਲਾਘ=ਕਥਨੇ, ਏਵਂ ਰਞ੍ਞੋ ਸਿਲਾਘਤੇ ਇਚ੍ਚਾਦਿ, ਥੁਤਿਂ ਕਰੋਤੀਤ੍ਯਤ੍ਥੋ. ਹਨੁ=ਅਪਨਯਨੇ, ਰਞ੍ਞੋ ਹਨੁਤੇ, ਵਞ੍ਚੇਤੀਤ੍ਯਤ੍ਥੋ. ਉਪਤਿਟ੍ਠੇਯ੍ਯ ਸਕ੍ਯਪੁਤ੍ਤਾਨਂ ਵਡ੍ਢਕੀ, ਉਪਗਚ੍ਛੇਯ੍ਯਾਤ੍ਯਤ੍ਥੋ. ਸਪ=ਅਕ੍ਕੋਸੇ, ਮਯ੍ਹਂ ਸਪਤੇ, ਸਚ੍ਚਂ ਕੁਰੁਤੇਤ੍ਯਤ੍ਥੋ. ਧਰ=ਧਾਰਣੇ, ਸੁਵਣ੍ਣਂ ਤੇ ਧਾਰਯਤੇ, ਇਣਂ ਤੇ ਧਾਰਯਤਿ, ਅਸ੍ਸ ਰਞ੍ਞੋ ਨਾਗਂ ਧਾਰਯਾਮ. ਪਿਹ=ਇਚ੍ਛਾਯਂ, ਦੇਵਾਪਿ ਤਸ੍ਸ ਪਿਹਯਨ੍ਤਿ ਤਾਦਿਨੋ, ਤੇਸਂ ਪਿਹਯਨ੍ਤਿ ਸਮ੍ਬੁਦ੍ਧਾਨਂ ਸਤੀਮਤਂ, ਪਿਹਯਨ੍ਤਿ=ਪਤ੍ਥੇਨ੍ਤਿ. ਤਸ੍ਸ ਕੁਜ੍ਝ ਮਹਾਵੀਰ, ਯਦਿ+ਹਂ ਤਸ੍ਸ ਪਕੁਪ੍ਪੇਯ੍ਯਂ, ਦੁਭਯਤਿ ਦਿਸਾਨਂ ਮੇਘੋ, ਯੋ ਮਿਤ੍ਤਾਨਂ ਨ ਦੂਭਤਿ, ਯੋ ਅਪ੍ਪਦੁਟ੍ਠਸ੍ਸ ਨਰਸ੍ਸ ਦੁਸ੍ਸਤਿ. ਇਸ੍ਸ=ਇਸ੍ਸਾਯਂ, ਤਿਤ੍ਥਿਯਾ ਇਸ੍ਸਯਨ੍ਤਿ ਸਮਣਾਨਂ. ਉਸੂਯ=ਦੋਸਾਵਿਕਰਣੇ, ਦੁਜ੍ਜਨਾ ਗੁਣਵਨ੍ਤਾਨਂ ਉਸ੍ਸੂਯਨ੍ਤਿ, ਕਾ ਉਸੁਯਾ ਵਿਜਾਨਤਂ. ਇਧ+ਸਿਧ+ਰਾਧ+ਸਾਧ=ਸਂਸਿਦ੍ਧਿਯਂ, ਆਰਾਧੋ ਮੇ ਰਞ੍ਞੋ, ਰਞ੍ਞੋ ਭਾਗ੍ਯ+ਮਾਰਜ੍ਝਤਿ, ਕ੍ਯਾ+ਹਂ ਅਯ੍ਯਾਨਂ ਅਪਰਜ੍ਝਾਮਿ, ਆਯਸ੍ਮਤੋ ਉਪਾਲਿਤ੍ਥੇਰਸ੍ਸ ਉਪਸਮ੍ਪਦਾਪੇਕ੍ਖੋ ਉਪਤਿਸ੍ਸੋ. ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ, ਆਸੁਣਨ੍ਤਿ ਬੁਦ੍ਧਸ੍ਸ ਭਿਕ੍ਖੂ, ਤਸ੍ਸ ਭਿਕ੍ਖੁਨੋ ਜਨੋਅਨੁਗਿਣਾਤਿ, ਪਤਿਗਿਣਾਤਿ, ਸਾਧੁਕਾਰਦਾਨਾਦਿਨਾ ਤਂ ਉਸ੍ਸਹਤੀਤ੍ਯਤ੍ਥੋ. ਆਰੋਚਯਾਮਿ ਵੋ ਭਿਕ੍ਖਵੇ, ਪਟਿਵੇਦਯਾਮਿ ਵੋ, ਆਮਨ੍ਤਯਾਮਿ ਤੇ ਮਹਾਰਾਜ, ਧਮ੍ਮਂ ਤੇ ਦੇਸਿਸ੍ਸਾਮਿ, ਦੇਸੇਤੁ ਭਨ੍ਤੇ ਭਗਵਾ ਧਮ੍ਮਂ ਭਿਕ੍ਖੂਨਂ, ਯਥਾ ਨੋ ਭਗਵਾ ਬ੍ਯਾਕਰੇਯ੍ਯ, ਨਿਰੁਤ੍ਤਿਂ ਤੇ ਪਵਕ੍ਖਾਮਿ, ਅਲਂ ਮੇ ਰਜ੍ਜਂ, ਅਲਂ ਭਿਕ੍ਖੁ ਪਤ੍ਤਸ੍ਸ, ਅਲਂ ਮਲ੍ਲੋ ਮਲ੍ਲਸ੍ਸ, ਅਰਹਤਿ ਮਲ੍ਲੋ ਮਲ੍ਲਸ੍ਸ, ਅਲਂ ਤੇ ਇਧ ਵਾਸੇਨ, ਕਿਂ ਮੇ ਏਕੇਨ ਤਿਣ੍ਣੇਨਾਤਿ ਸਬ੍ਬਤ੍ਥ ਸਮ੍ਬਨ੍ਧੇ ਛਟ੍ਠੀ.
ਏਵਂ ਆਯੁ ਭੋਤੋ ਹੋਤੁ, ਚਿਰਂ ਜੀਵਿਤਂ, ਭਦ੍ਦਂ, ਕਲ੍ਯਾਣਂ, ਅਤ੍ਥਂ, ਪਯੋਜਨਂ, ਕੁਸਲਂ, ਅਨਾਮਯਂ, ਹਿਤਂ, ਪਤ੍ਥਂ, ਸੁਖਂ, ਸਾਤਂ, ਭੋਤੋ ਹੋਤੁ, ਸਾਧੁ ਸਮ੍ਮੁਤਿ ਮੇ ਤਸ੍ਸ, ਪੁਤ੍ਤਸ੍ਸਾ+ਵਿਕਰੇਯ੍ਯ ਗੁਯ੍ਹ+ਮਤ੍ਥਂ, ਤਸ੍ਸ ਮੇ ਸਕ੍ਕੋ ਪਾਤੁਰਹੋਸਿ, ਤਸ੍ਸ ਪਹਿਣੇਯ੍ਯ, ਭਿਕ੍ਖੂਨਂ ਦੂਤਂ ਪਾਹੇਸਿ, ਕਪ੍ਪਤਿ ਸਮਣਾਨਂ ਆਯੋਗੋ, ਏਕਸ੍ਸ ਦ੍ਵਿਨ੍ਨਂ ਤਿਣ੍ਣਂ ਵਾ ਪਹੋਤਿ, ਉਪਮਂ ਤੇ ਕਰਿਸ੍ਸਾਮਿ, ਅਞ੍ਜਲਿਂਤੇ ਪਗ੍ਗਣ੍ਹਾਮਿ, ਤਸ੍ਸ ਫਾਸੁ, ਲੋਕਸ੍ਸ+ਤ੍ਥੋ, ਨਮੋ ਤੇ ਪੁਰਿਸਾਜਞ੍ਞ, ਸੋਤ੍ਥਿ ਤਸ੍ਸ, ਸਮਤ੍ਥੋ ਮਲ੍ਲੋ ਮਲ੍ਲਸ੍ਸ, ਤਸ੍ਸ ਹਿਤਂ, ਤਸ੍ਸ ਸੁਖਂ, ਸ੍ਵਾਗਤਂ ਤੇ ਮਹਾਰਾਜਾਤਿ ਸਬ੍ਬਤ੍ਥ ਸਮ੍ਬਨ੍ਧੇ ਛਟ੍ਠੀ.
੨੬. ਪਞ੍ਚਮ੍ਯ+ਵਧਿਸ੍ਮਾ
ਪਦਤ੍ਥਾਵਧਿਸ੍ਮਾ ਪਞ੍ਚਮੀਵਿਭਤ੍ਤਿ ਹੋਤਿ.
ਸਮੇਪ੍ਯ+ਪਗਮੇ ਦ੍ਵਿਨ੍ਨਂ, ਪੁਬ੍ਬਰੂਪਾ ਯ+ਦਚ੍ਚੁਤਂ;
ਵੁਚ੍ਚਤੇ ਤ+ਦਪਾਦਾਨਂ, ਤਂ ਚਲਾਚਲਤੋ ਦ੍ਵਿਧਾ;
ਯਥਾ+ਸ੍ਸਾ ਧਾਵਤਾ ਪੋਸੋ, ਪਤੋ, ਰੁਕ੍ਖਾਫਲਨ੍ਤਿ ਚ.
ਤਤ੍ਥ ਚਲਾਵਧਿ ਧਾਵਤਾ ਅਸ੍ਸਾ ਪੁਰਿਸੋ ਪਤਤਿ, ਅਚਲਾਵਧਿ ਪਬ੍ਬਤਾ ਓਤਰਨ੍ਤਿ ਵਨਚਾਰਕਾਤਿ.
ਤਞ੍ਚ ਅਵਧਿ ਵਿਸਯਕ੍ਰਿਯਾਵਿਸੇਸਸ੍ਸ ਨਿਦ੍ਦਿਟ੍ਠਤ੍ਤਾ ਨਿਦ੍ਦਿਟ੍ਠਵਿਸਯਂ, ਯਤ੍ਥ ਅਪ ਅਪਗਮਨਕ੍ਰਿਯਂ ਉਪਾਤ੍ਤਂ=ਅਜ੍ਝਾਹਟਂ ਵਿਸਯਂ ਕਤ੍ਵਾ ਪਵਤ੍ਤਤਿ, ਤਂ ਉਪਾਤ੍ਤਂ. ਯਂ ਕੇਨਚਿ ਗੁਣੇਨ ਉਕ੍ਕਂਸਿਯਤਿ, ਤਂ ਅਨੁਮੇਯ੍ਯਂ. ਯਥਾ ਗਾਮਾ ਅਪੇਨ੍ਤਿ ਮੁਨਯੋ, ਨਗਰਾ ਨਿਗ੍ਗਤੋ ਰਾਜਾ, ਪਾਪਾ ਚਿਤ੍ਤਂ ਨਿਵਾਰੇਨ੍ਤਿ. ਵਲਾਹਕਾ ਵਿਜ੍ਜੋਤਤੇ, ਕੁਸੁਲਤੋ ਪਚਤੀਤਿ. ਏਤ੍ਥ ਚ ਵਲ਼ਾਹਕਾ ਨਿਕ੍ਖਮ੍ਮ, ਕੁਸੁਲਤੋ ਅਪਨੇਤ੍ਵਾਤਿ ਚ ਪੁਬ੍ਬਕ੍ਰਿਯਾ ਅਜ੍ਝਾਹਰੀਯਤਿ. ਮਥੁਰਾ ਪਾਟਲਿਪੁਤ੍ਤਕੇਹਿ ਅਭਿਰੂਪਾਤਿ ਅਨੁਮੀਯਤਿ. ਵੁਤ੍ਤਞ੍ਹਿ –
ਨਿਦ੍ਦਿਟ੍ਠਵਿਸਯਂ ਕਿਞ੍ਚਿ, ਉਪਾਤ੍ਤਵਿਸਯਂ ਤਥਾ;
ਅਨੁਮੇਯ੍ਯਵਿਸਯਞ੍ਚੇਤਿ, ਤਿਧਾ+ਹੁ ਅਵਧਿਂ ਬੁਧਾਤਿ.
ਭਯਹੇਤੁਮ੍ਹਿ-ਚੋਰਾ ਭਯਂ ਜਾਯਤਿ, ਤਣ੍ਹਾਯ ਜਾਯਤਿ ਭਯਂ, ਪਾਪਤੋ ਉਤ੍ਤਸਤਿ, ਨਤ੍ਥਿ ਸੋਕੋ ਕੁਤੋ ਭਯਂ. ਅਕ੍ਖਾਤਰਿ-ਉਪਜ੍ਝਾਯਾ ਸਿਕ੍ਖਂ ਗਣ੍ਹਾਤਿ, ਆਚਰਿਯਮ੍ਹਾ ਅਧੀਤੋ ਸੁਣਾਤਿ ਵਾ. ਬੁਦ੍ਧਸ੍ਮਾ ਪਰਾਜੇਨ੍ਤਿ ਅਞ੍ਞਤਿਤ੍ਥਿਯਾ, ਪਰਾਜਿਤਾ ਭਵਨ੍ਤੀਤ੍ਯਤ੍ਥੋ. ਹਿਮਵਤਾ ਪਭਵਤਿ ਗਙ੍ਗਾ, ਅਚਿਰਵਤਿਯਾ ਪਭਵਨ੍ਤਿ ਕੁਨ੍ਨਦਿਯੋ. ਉਰਸ੍ਮਾ ਜਾਤੋ ਪੁਤ੍ਤੋ, ਕਮ੍ਮਤੋ ਜਾਤਂ ਇਨ੍ਦ੍ਰਿਯਂ, ਉਪਜ੍ਝਾਯਾ ਅਨ੍ਤਰਧਾਯਤਿ ਸਿਸ੍ਸੋ, ਮਾਤਾਪਿਤੂਹਿ ਅਨ੍ਤਰਧਾਰਯਤਿ ਪੁਤ੍ਤੋ, ਨਿਲੀਯਤੀਤ੍ਯਤ੍ਥੋ. ਦੂਰਤ੍ਥਯੋਗੇਕੀਵਦੂਰੋ ਇਤੋ ਨਲ਼ਕਾਰਗਾਮੋ, ਤਤੋ ਹਵੇ ਦੂਰਤਰਂ ਵਦਨ੍ਤਿ, ਗਾਮਤੋ ਨਾਤਿਦੂਰੇ, ਆਰਕਾ ਤੇ ਮੋਘਪੁਰਿਸਾ ਇਮਸ੍ਮਾ ਧਮ੍ਮਵਿਨਯਾ, ਆਰਕਾ ਤੇਹਿ ਭਗਵਾ ਦੂਰਤੋਵ ਨਮਸ੍ਸਨ੍ਤਿ, ਅਦ੍ਦਸ ਦੂਰਤੋਵ ਆਗਚ੍ਛਨ੍ਤਂ. ਅਨ੍ਤਿਕਤ੍ਥਯੋਗੇ-ਅਨ੍ਤਿਕਂ ਗਾਮਾ, ਆਸਨ੍ਨਂ ਗਾਮਾ, ਸਮੀਪਂ ਗਾਮਾ. ਪਰਿਮਾਣੇ-ਇਤੋ ਮਥੁਰਾਯ ਚਤੂਸੁ ਯੋਜਨੇਸੁ ਸਂਕਸ੍ਸਂ, ਰਾਜਗਹਤੋ ਪਞ੍ਚਚਤ੍ਤਾਲੀਸਯੋਜਨਮਤ੍ਥਕੇ ਸਾਵਤ੍ਥਿ. ਕਾਲਪਰਿਮਾਣੇ-ਇਤੋ ਏਕਨਵੁਤਿਕਪ੍ਪਮਤ੍ਥਕੇ, ਇਤੋ ਵਸ੍ਸਸਤਸਹਸ੍ਸਸ੍ਸ ਅਚ੍ਚਯੇਨ ਬੁਦ੍ਧੋ ਲੋਕੇ ਉਪ੍ਪਜ੍ਜਿਸ੍ਸਤਿ. ਪਾਸਾਦਾ ਸਂਕਮੇਯ੍ਯ, ਪਾਸਾਦਂ ਅਭਿਰੁਹਿਤ੍ਵਾ ਸਂਕਮੇਯ੍ਯਾਤਿ ਅਤ੍ਥੋ, ਤਥਾ ਹਤ੍ਥਿਕ੍ਖਨ੍ਧਾ ਸਂਕਮੇਯ੍ਯ, ਅਭਿਧਮ੍ਮਾ ਪੁਚ੍ਛਨ੍ਤਿ, ਅਭਿਧਮ੍ਮਂ ਸੁਤ੍ਵਾਤਿ ਅਤ੍ਥੋ, ਆਸਨਾ ਵੁਟ੍ਠਹੇਯ੍ਯ. ਦਿਸਤ੍ਥਵਾਚੀਹਿ ਯੋਗੇ-ਇਤੋ ਸਾ ਪੁਰਿਮਾ ਦਿਸਾ, ਇਤੋ ਸਾ ਦਕ੍ਖਿਣਾ ਦਿਸਾ, ਅਵੀਚਿਤੋ ਯਾਵ ਭਵਗ੍ਗਂ, ਉਦ੍ਧਂ ਪਾਦਤਲਾ, ਅਧੋ ਕੇਸਮਤ੍ਥਕਾ. ਵਿਭਜਨੇ-ਯਤੋ ਪਣੀਤਤਰੋ ਵਾ ਵਿਸਿਟ੍ਠਤਰੋ ਵਾ ਨਤ੍ਥਿ, ਅਤ੍ਤਦਨ੍ਤੋ ਤਤੋ ਵਰਂ, ਕਿਞ੍ਚਾਪਿ ਦਾਨਤੋ ਸੀਲਂ ਵਰਂ, ਤਤੋ ਮਯਾ ਬਹੁਤਰਂ ਸੁਤਂ, ਸੀਲਮੇਵ ਸੁਤਾ ਸੇਯ੍ਯੋ. ਆਰਤਿਪ੍ਪਯੋਗੇ-ਆਰਤਿ ਵਿਰਤਿ ਪਾਪਾ, ਪਾਣਾਤਿਪਾਤਾ ਵੇਰਮਣਿ, ਅਦਿਨ੍ਨਾਦਾਨਾ ਪਟਿਵਿਰਤੋ, ਅਪ੍ਪਟਿਵਿਰਤਾ ਮੁਸਾਵਾਦਾ. ਸੁਦ੍ਧਤ੍ਥਯੋਗੇ-ਲੋਭਨੀਯੇਹਿ ਧਮ੍ਮੇਹਿ ਸੁਦ੍ਧੋ, ਮਾਤੁਤੋ ਚ ਪਿਤੁਤੋ ਚ ਸੁਦ੍ਧੋ ਅਨੁਪਕ੍ਕੁਟ੍ਠੋ. ਪਮੋਚਨਤ੍ਥਯੋਗੇ-ਪਰਿਮੁਤ੍ਤੋ ਦੁਕ੍ਖਸ੍ਮਾਤਿ ਵਦਾਮਿ, ਮੁਤ੍ਤੋ+ਸ੍ਮਿ ਮਾਰਬਨ੍ਧਨਾ, ਨ ਤੇ ਮੁਚ੍ਚਨ੍ਤਿ ਮਚ੍ਚੁਨਾ, ਮੁਤ੍ਤੋ+ਹਂ+ਸਬ੍ਬਪਾਸੇਹਿ. ਵਿਵੇਚਨੇ-ਵਿਵਿਚ੍ਚੇਵ ਕਾਮੇਹਿ, ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ. ਪਮਾਣਤ੍ਥੇ-ਆਯਾਮਤੋ ਚ ਵਿਤ੍ਥਾਰਤੋ ਚ ਯੋਜਨਂ, ਗਮ੍ਭੀਰਤੋ ਚ ਪੁਥੁਲਤੋ ਚ ਯੋਜਨਂ ਚਨ੍ਦਭਾਗਾਯ ਪਰਿਮਾਣਂ, ਪਰਿਕ੍ਖੇਪਤੋ ਨਵਯੋਜਨਸਤਪਰਿਮਾਣੋ ਮਜ੍ਝਿਮਦੇਸੋ. ਪੁਬ੍ਬਾਦਿਯੋਗੇ-ਪੁਬ੍ਬੇਵ ਮੇ ਭਿਕ੍ਖਵੇ ਸਮ੍ਬੋਧਾ, ਇਤੋ ਪੁਬ੍ਬੇ ਨਾਹੋਸਿ, ਤਤੋ ਪਰਂ ਪਚ੍ਚਨ੍ਤਿਮਾ ਜਨਪਦਾ, ਤਤੋ ਅਪਰੇਨ ਸਮਯੇਨ. ਪਞ੍ਹੇ-ਕੁਤੋ+ਸਿ ਤ੍ਵਂ, ਕੁਤੋ ਭਵਂ, ਪਾਟਲਿਪੁਤ੍ਤਤੋ. ਕਿਚ੍ਛਾ ਲਦ੍ਧਨ੍ਤਿ ਗੁਣੇ ਪਞ੍ਚਮੀ, ਕਿਚ੍ਛੇਨ ਮੇ ਅਧਿਗਤਨ੍ਤਿ ਹੇਤੁਮ੍ਹਿ ਕਰਣੇ ਵਾ ਤਤਿਯਾ, ਏਵਂ ਥੋਕਾ ਮੁਤ੍ਤੋ, ਥੋਕੇਨ ਮੁਤ੍ਤੋਤਿ.
ਕਥਂ ‘‘ਥੋਕਂ ਚਲਤੀ’’ਤਿ, ਕ੍ਰਿਯਾਵਿਸੇਸਨੇ ਕਮ੍ਮਨਿ ਦੁਤਿਯਾ, ਥੋਕਂ ਚਲਨਂ ਕਰੋਤੀਤ੍ਯਤ੍ਥੋ, ਥੋਕਨ੍ਤਿ ਚਲਨਕ੍ਰਿਯਾਯ ਵਿਸੇਸਨਤ੍ਤਾ ਕ੍ਰਿਯਾਵਿਸੇਸਨਂ.
ਕ੍ਰਿਯਾਵਿਸੇਸਨਂ ਨਾਮ, ਕਮ੍ਮਤ੍ਤੇ+ਕਤ੍ਤਸਣ੍ਠਿਤਾ;
ਨ੍ਯਾਯਸਿਦ੍ਧਂ ਯਤੋ ਤਸ੍ਮਾ, ਤਦਤ੍ਥਂ ਨ ਵਿਸੁਂ ਵਿਧਿ.
ਨ੍ਯਾਯਸਿਦ੍ਧਂਵ=ਚਲਨਨ੍ਤਿ ਯਸ੍ਮਾ ਭਾਵੇ ਅਨੋ, ਤਸ੍ਮਾ ਭਾਵਸ੍ਸੇ+ਕਤ੍ਤਾ ਏਕਵਚਨਨ੍ਤਿ ਞਾਯਾ ਏਕਤ੍ਤਞ੍ਚ, ਭਾਵੇ ਅਨਤ੍ਤਾ ਨਪੁਂਸਕਤ੍ਤਞ੍ਚ, ਕਰੋਤਿਕ੍ਰਿਯਾਯ ਸਮ੍ਬਨ੍ਧੇਨ ਕਮ੍ਮਤ੍ਤਞ੍ਚ ਸਿਜ੍ਝਤੀਤਿ. ਕਰ+ਭੂਧਾਤਵੋ ਚ –
ਕਾਰਿਯਰੂਪਾਭਿਧਾਤ੍ਵਤ੍ਥਾ, ਸਬ੍ਬੇ ਸਤ੍ਤਾਯ ਯੁਜ੍ਜਰੇ;
ਤਤੋ ਕ੍ਰਿਯਾ ਚ ਭਾਵੋ ਚ, ਸਾਮਞ੍ਞਂ ਤੇਸੁ ਗਮ੍ਯਤੇ –
ਤਿ ਵੁਤ੍ਤਤ੍ਤਾ ਯੁਜ੍ਜਨ੍ਤਿ.
ਥੋਕਤ੍ਥੇ-ਥੋਕਾ ਮੁਚ੍ਚਤਿ. ਸਬ੍ਬਤ੍ਥ ਸਵਿਸਯੇ ਪਞ੍ਚਮੀ. ਏਤ੍ਥ ‘‘ਵਿਵਕ੍ਖਾ ਲੋਕਿਕਾ ਸਾ ਚ, ਨ ਸਕ੍ਕਾ ਅਨਿਵਤ੍ਤਿਤੁਂ’’ਤਿ ਵੁਤ੍ਤਤ੍ਤਾ ਅਨਿਟ੍ਠਪ੍ਪਸਙ੍ਗੋ ਨ ਸਿਯਾ. ਮਰਿਯਾਦਾਯਂ-ਆਪਬ੍ਬਤਾ ਖੇਤ੍ਤਂ. ਅਭਿਵਿਧਿਮ੍ਹਿ-ਆਬ੍ਰਹ੍ਮਲੋਕਾ ਸਦ੍ਦੋ ਅਬ੍ਭੁਗ੍ਗਚ੍ਛਤਿ, ਪਬ੍ਬਤਂ ਵਜ੍ਜੇਤ੍ਵਾ, ਬ੍ਰਹ੍ਮਲੋਕਮ੍ਹਿ ਬ੍ਯਾਪੇਤ੍ਵਾਤਿ ਚ ਅਤ੍ਥੋ. ਏਤ੍ਥ ਵਜ੍ਜਮਾਨਸੀਮਾ ਮਰਿਯਾਦਾ, ਗਯ੍ਹਮਾਨਸੀਮਾ ਅਭਿਵਿਧਿ.
੨੭. ਅਪਪਰੀਹਿ ਵਜ੍ਜਨੇ
ਵਜ੍ਜਨੇ ਵਤ੍ਤਮਾਨੇਹੀ ਅਪਪਰੀਹਿ ਯੋਗੇ ਪਞ੍ਚਮੀ ਹੋਤਿ. ਅਪਸਾਲਾਯ ਆਯਨ੍ਤਿ ਵਾਣਿਜਾ, ਪਰਿਸਾਲਾਯ ਆਯਨ੍ਤਿ ਵਾਣਿਜਾ, ਸਾਲਂ ਵਜ੍ਜੇਤ੍ਵਾਤਿ ਅਤ੍ਥੋ.
੨੮. ਪਟਿਨਿਧਿਪਤਿਦਾਨੇਸੁ ਪਤਿਨਾ
ਪਟਿਨਿਧਿਮ੍ਹਿ ਪਤਿਦਾਨੇ ਚ ਵਤ੍ਤਮਾਨੇਨ ਪਤਿਨਾ ਯੋਗੇ ਨਾਮਸ੍ਮਾ ਪਞ੍ਚਮੀ ਹੋਤਿ. ਬੁਦ੍ਧਸ੍ਮਾ ਪਤਿ ਸਾਰਿਪੁਤ੍ਤੋ, ਘਤ+ਮਸ੍ਸ ਤੇਲਸ੍ਮਾ ਪਤਿ ਦਦਾਤਿ.
੨੯. ਰਿਤੇ ਦੁਤਿਯਾ ਚ
ਰਿਤੇਸਦ੍ਦਯੋਗੇ ਨਾਮਸ੍ਮਾ ਦੁਤਿਯਾ ਹੋਤਿ ਪਞ੍ਚਮੀ ਚ. ਰਿਤੇ ਸਦ੍ਧਮ੍ਮਾ, ਰਿਤੇ ਸਦ੍ਧਮ੍ਮਂ.
੩੦. ਵਿਨਾ+ਞ੍ਞਤ੍ਰ ਤਤਿਯਾ ਚ
ਵਿਨਾ+ਞ੍ਞਤ੍ਰਯੋਗੇ ਨਾਮਸ੍ਮਾ ਤਤਿਯਾ ਦੁਤਿਯਾ ਪਞ੍ਚਮੀ ਚ. ਵਿਨਾ ਵਾਤੇਨ, ਵਿਨਾ ਵਾਤਂ, ਵਿਨਾ ਵਾਤਸ੍ਮਾ. ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨ, ਅਞ੍ਞਤ੍ਰ ਧਮ੍ਮਂ, ਅਞ੍ਞਤ੍ਰ ਧਮ੍ਮਾ.
੩੧. ਪੁਥਨਾਨਾਹਿ
ਏਤੇਹਿ ਯੋਗੇ ਤਤਿਯਾ ਹੋਤਿ ਪਞ੍ਚਮੀ ਚ. ਭਿਨ੍ਨਯੋਗਕਰਣਂ ਦੁਤਿਯਾਨਿਵਤ੍ਤਨਤ੍ਥਂ. ਪੁਥਗੇਵ ਜਨੇਨ, ਪੁਥਗੇਵ ਜਨਸ੍ਮਾ, ਜਨੇਨ ਨਾਨਾ, ਜਨਸ੍ਮਾ ਨਾਨਾ.
੩੯. ਛਟ੍ਠੀ ਸਮ੍ਬਨ੍ਧੇ
ਸਮ੍ਬਨ੍ਧੇ ਛਟ੍ਠੀ ਹੋਤਿ. ਰਞ੍ਞੋ ਪੁਰਿਸੋਤਿ ਵੁਤ੍ਤੇ ਯਸ੍ਮਾ ਰਾਜਾ ਦਦਾਤਿ, ਪੁਰਿਸੋ ਗਣ੍ਹਾਤਿ, ਤਸ੍ਮਾ ਰਾਜਪੁਰਿਸੋਤਿ ਵਿਞ੍ਞਾਯਤਿ. ਏਵਮੇਵ ਯੋ ਯਸ੍ਸ ਆਯਤ੍ਤੋ ਸੇਵਕਾਦਿਭਾਵੇਨ ਭਣ੍ਡਭਾਵੇਨ ਵਾ ਸਮੀਪ+ਸਮੂਹਾ+ਵਯਵ+ਵਿਕਾਰ+ਕਾਰਿਯ+ਅਵਤ੍ਥਾ+ਜਾਤਿ+ਗੁਣ+ਕ੍ਰਿਯਾਦਿਵਸੇਨ ਵਾ, ਠਾਨੀਵਸੇਨ ਵਾ, ਆਗਮੀਵਸੇਨ ਵਾ, ਸੋ ਤਿਵਿਧੋਪਿ ਅਤ੍ਥੋ ਸਮ੍ਬਨ੍ਧੋ ਨਾਮ. ਵੁਤ੍ਤਞ੍ਹਿ –
ਕ੍ਰਿਯਾਕਾਰਕਸਞ੍ਜਾਤੋ, ਅਸ੍ਸੇ+ਦਂਭਾਵਹੇਤੁਕੋ;
ਸਮ੍ਬਨ੍ਧੋ ਨਾਮ ਸੋ ਅਤ੍ਥੋ, ਤਤ੍ਥ ਛਟ੍ਠੀ ਵਿਧੀਯਤੇ.
ਪਾਰਤਨ੍ਤ੍ਯਞ੍ਹਿ ਸਮ੍ਬਨ੍ਧੋ, ਤਤ੍ਥ ਛਟ੍ਠੀ ਭਵੇ ਤਿਤੋ;
ਉਪਾਧਿ+ਠਾਨ੍ਯਾ+ਗਮਿਤੋ, ਨ ਵਿਸੇਸ੍ਸਾਦਿਤੋ ਤਿਤੋਤਿ.
ਉਪਾਧਿਸਙ੍ਖਾਤਵਿਸੇਸਨਤੋ ਤਾਵ-ਰਞ੍ਞੋ ਪੁਰਿਸੋ. ਏਤ੍ਥ ਚ ਬ੍ਰਾਹ੍ਮਣਾਦਿਸਾਮਿਤੋ ਨਿਵਤ੍ਤੇਤੀਤਿ ਰਾਜਾ ਵਿਸੇਸਨਂ, ਪੁਰਿਸੋ ਤੇਨ ਵਿਸੇਸਿਯਤੀਤਿ ਵਿਸੇਸ੍ਸੋ. ਭਣ੍ਡਸਮ੍ਬਨ੍ਧਤੋ-ਪਹੁਤਂ ਮੇ ਧਨਂ ਸਕ੍ਕ, ਏਕਸ੍ਸ ਪਟਿਵੀਸੋ, ਭਿਕ੍ਖੁਸ੍ਸ ਪਤ੍ਤਚੀਵਰਂ. ਸਮੀਪਤੋ-ਅਮ੍ਬਵਨਸ੍ਸ ਅਵਿਦੂਰੇ, ਨਿਬ੍ਬਾਨਸ੍ਸੇਵ ਸਨ੍ਤਿਕੇ. ਸਮੂਹੇ-ਸੁਵਣ੍ਣਸ੍ਸ ਰਾਸਿ, ਭਿਕ੍ਖੂਨਂ ਸਮੂਹੋ. ਅਵਯਵੇ-ਮਨੁਸ੍ਸਸ੍ਸੇਵ ਤੇ ਸੀਸਂ, ਰੁਕ੍ਖਸ੍ਸ ਸਾਖਾ. ਵਿਕਾਰੇ-ਸੁਵਣ੍ਣਸ੍ਸ ਵਿਕਤਿ, ਭਟ੍ਠਧਞ੍ਞਾਨਂ ਸਤ੍ਤੁ. ਕਾਰਿਯੇ-ਯਵਸ੍ਸ ਅਙ੍ਕੁਰੋ, ਮੇਘਸ੍ਸ ਸਦ੍ਦੋ, ਪੁਤ੍ਤਾਪਿ ਤਸ੍ਸ ਬਹਵੋ, ਕਮ੍ਮਾਨਂ ਫਲਂ ਵਿਪਾਕੋ. ਅਵਤ੍ਥਾਯਂ-ਖਨ੍ਧਾਨਂ ਪਾਤੁਭਾਵੋ, ਜਰਾ, ਭੇਦੋ ਵਾ. ਜਾਤਿਯਂ-ਮਨੁਸ੍ਸਸ੍ਸ ਭਾਵੋ, ਮਨੁਸ੍ਸਾਨਂ ਜਾਤਿ. ਗੁਣੇ-ਸੁਵਣ੍ਣਸ੍ਸ ਵਣ੍ਣੋ, ਵਣ੍ਣੋ ਨ ਖੀਯੇਥ ਤਥਾਗਤਸ੍ਸ ਬੁਦ੍ਧਸ੍ਸ ਗੁਣਘੋਸੋ, ਪੁਪ੍ਫਾਨਂ ਗਨ੍ਧੋ, ਫਲਾਨਂ ਰਸੋ, ਚਿਤ੍ਤਸ੍ਸ ਫੁਸਨਾ, ਸਿਪ੍ਪਿਕਾਨਂ ਸਤਂ ਨਤ੍ਥਿ, ਤਿਲਾਨਂ ਮੁਟ੍ਠਿ, ਤੇਸਂ ਸਮਾਯੋਗੋ, ਸਨ੍ਧਿਨੋ ਵਿਮੋਕ੍ਖੋ, ਤਥਾਗਤਸ੍ਸ ਪਞ੍ਞਾਪਾਰਮਿਂ ਆਰਬ੍ਭ, ਸੁਖਂ ਤੇ, ਦੁਕ੍ਖਂ ਤੇ, ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ, ਪਞ੍ਞਾਯ ਪਟੁਭਾਵੋ, ਰੂਪਸ੍ਸ ਲਹੁਤਾ, ਮੁਦੁਤਾ ਵਾ, ਉਪਚਯੋ ਵਾ. ਕ੍ਰਿਯਾਸਮ੍ਬਨ੍ਧੇ-ਪਾਦਸ੍ਸ ਉਕ੍ਖੇਪਨਂ, ਅਵਕ੍ਖੇਪਨਂ ਵਾ, ਹਤ੍ਥਸ੍ਸ ਸਮਿਞ੍ਜਨਂ, ਦਾਨਂ, ਪਸਾਰਣਂ, ਧਾਤੂਨਂ ਗਮਨਂ, ਠਾਨਂ, ਨਿਸਜ੍ਜਾ, ਸਯਨਂ ਵਾ, ਤਥਾਗਤਸ੍ਸ ਨਾਮਗੋਤ੍ਤਾਦਿ, ਤਸ੍ਸ ਕਾਰਣਂ, ਤਸ੍ਸ ਮਾਤਾਪਿਤਰੋ, ਤਸ੍ਸ ਪੁਰਤੋ ਪਾਤੁਰਹੋਸਿ, ਨਗਰਸ੍ਸ ਦਕ੍ਖਿਣਤੋ, ਵਸ੍ਸਾਨਂ ਤਤਿਯੇ ਮਾਸੇ, ਨ ਤਸ੍ਸ ਉਪਮਾ, ਕੁਵੇਰਸ੍ਸ ਬਲਿ ਇਚ੍ਚਾਦਿ. ਅਪਿ ਚ –
ਗਾਵਸ੍ਸ ਜਾਤਿ, ਧਵਲੋ, ਗਤਿ, ਸਿਙ੍ਗਂ, ਨਾਮਨ੍ਤਿ+ਧ;
ਦਬ੍ਬਸ੍ਸਾਪਿ ਚ ਜਾਤ੍ਯਾਦਿ, ਵਿਸੇਸ੍ਸਾ ਹੋਨ੍ਤਿ ਕਾਮਤੋ.
ਗੋਤ੍ਤਞ੍ਚ ਸਬਲੋਦਿਸ੍ਸ, ਪਾਕ+ਮਨ੍ਨਸ੍ਸ ਸੁਕ੍ਕਤਾ;
ਪਟਸ੍ਸ, ਸਿਙ੍ਗਂਮੇਣ੍ਡਸ੍ਸ, ਨਾ+ਞ੍ਞੇਸਂਤਿ ਵਿਸੇਸ੍ਸਤੇ.
ਠਾਨਿਤੋ-ਯੁਵਣ੍ਣਾਨ+ਮੇਓ ਲੁਤ੍ਤਾ. ਆਗਮਿਤੋ-ਸੁਞ ਸਸ੍ਸ. ਸਾਮਿਯੋਗੇ-ਦੇਵਾਨ+ਮਿਨ੍ਦੋ, ਮਿਗਾਨਂ ਰਾਜਾ. ਰੁਜਾਦਿਯੋਗੇ-ਦੇਵਦਤ੍ਤਸ੍ਸ ਰੁਜਤਿ, ਤਸ੍ਸ ਰੋਗੋ ਉਪ੍ਪਜ੍ਜਿ, ਮਹਾਸੇਨਾਪਤੀਨਂ ਉਜ੍ਝਾਪੇਤਬ੍ਬਂ, ਰਜਕਸ੍ਸ ਵਤ੍ਥਂ ਦਦਾਤਿ, ਮੁਸਾਵਾਦਸ੍ਸ ਓਤ੍ਤਪ੍ਪਂ ਇਚ੍ਚਾਦਿ. ਯਜਸ੍ਸ ਯੋਗੇ-ਪੁਪ੍ਫਸ੍ਸ ਬੁਦ੍ਧਸ੍ਸ ਯਜਤਿ, ਪੁਪ੍ਫੇਨਾਤ੍ਯਤ੍ਥੋ. ਏਵਂ ਘਤਸ੍ਸ ਅਗ੍ਗਿਂ ਜੁਹਤਿ. ਸੁਹਿਤਤ੍ਥੇ-ਪਤ੍ਤਂ ਓਦਨਸ੍ਸ ਪੂਰੇਤ੍ਵਾ, ਪੂਰਂ ਨਾਨਾਪਕਾਰਸ੍ਸ ਅਸੁਚਿਨੋ, ਪੂਰਂ ਹਿਰਞ੍ਞਸੁਵਣ੍ਣਸ੍ਸ, ਪੂਰਤਿ ਬਾਲੋ ਪਾਪਸ੍ਸ. ਕਿਤਕਪ੍ਪਯੋਗੇ-ਬਹੁਲਂਵਿਧਾਨਾ ਛਟ੍ਠੀ, ਰਞ੍ਞੋ ਸਮ੍ਮਤੋ, ਪੂਜਿਤੋ, ਸਕ੍ਕਤੋ, ਅਪਚਿਤੋ, ਮਾਨਿਤੋ ਵਾ, ਅਮਤਂ ਤੇਸਂ ਭਿਕ੍ਖਵੇ ਅਪਰਿਭੁਤ੍ਤਂ, ਯੇਸਂ ਕਾਯਗਤਾ ਸਤਿ ਅਪਰਿਭੁਤ੍ਤਾ, ਸਾਧੁਸਮ੍ਮਤੋ ਬਹੁਜਨਸ੍ਸ, ਸੁਪ੍ਪਟਿਵਿਦ੍ਧਾ ਬੁਦ੍ਧਾਨਂ ਧਮ੍ਮਧਾਤੁ, ਧਮ੍ਮਸ੍ਸ ਗੁਤ੍ਤੋ ਮੇਧਾਵੀ. ਕਮ੍ਮਤ੍ਥੇ-ਤਸ੍ਸ ਭਵਨ੍ਤਿ ਵਤ੍ਤਾਰੋ, ਸਹਸਾ ਕਮ੍ਮਸ੍ਸ ਕਤ੍ਤਾਰੋ, ਅਮਤਸ੍ਸ ਦਾਤਾ, ਭਿਨ੍ਨਾਨਂ ਸਨ੍ਧਾਤਾ, ਸਹਿਤਾਨਂ ਅਨੁਪ੍ਪਦਾਤਾ, ਬੋਧੇਤਾ ਪਜਾਯ, ਕਮ੍ਮਸ੍ਸ ਕਾਰਕੋ ਨਤ੍ਥਿ, ਵਿਪਾਕਸ੍ਸ ਚ ਵੇਦਕੋ, ਅਵਿਸਂਵਾਦਕੋ ਲੋਕਸ੍ਸ, ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ. ਸਰਤਿ+ਚ੍ਛਾਯੋਗੇ-ਮਾਤੁ ਸਰਤਿ, ਨ ਤੇਸਂ ਕੋਚਿ ਸਰਤਿ, ਸਤ੍ਤਾਨਂ ਕਮ੍ਮਪਚ੍ਚਯਾ, ਪੁਤ੍ਤਸ੍ਸ ਇਚ੍ਛਤਿ. ਕਰੋਤਿਸ੍ਸ (ਯੋਗੇ) – ਉਦਕਸ੍ਸ ਪਤਿਕੁਰੁਤੇ, ਕਣ੍ਡਸ੍ਸ ਪਤਿਕੁਰੁਤੇ, ਅਭਿਸਙ੍ਖਰੋਤੀਤ੍ਯਤ੍ਥੋ. ਪਞ੍ਚਮਿਯਤ੍ਥੇ ਪਰਿਹਾਨਿਭਯਤ੍ਥਯੋਗੇਪਿ ਛਟ੍ਠੀ, ਅਸ੍ਸਵਨਤਾਯ ਧਮ੍ਮਸ੍ਸ ਪਰਿਯਾਯਨ੍ਤਿ, ਕਿਨ੍ਨੁ ਖੋ ਅਹਂ ਤਸ੍ਸ ਸੁਖਸ੍ਸ ਭਾਯਾਮਿ, ਸਬ੍ਬੇ ਤਸਨ੍ਤਿ ਦਣ੍ਡਸ੍ਸ, ਸਬ੍ਬੇ ਭਾਯਨ੍ਤਿ ਮਚ੍ਚੁਨੋ, ਭੀਤੋ ਚਤੁਨ੍ਨਂ ਆਸੀਵਿਸਾਨਂ ਘੋਰਵਿਸਾਨਂ ਇਚ੍ਚਾਦਿ.
੪੦. ਤੁਲ੍ਯਤ੍ਥੇਨ ਵਾ ਤਤਿਯਾ
ਤੁਲ੍ਯਤ੍ਥੇਨ ਯੋਗੇ ਵਾ ਛਟ੍ਠੀ ਹੋਤਿ ਤਤਿਯਾ ਚ. ਪਿਤੁ ਤੁਲ੍ਯੋ, ਪਿਤਰਾ ਵਾ, ਮਾਤੁ ਤੁਲ੍ਯੋ, ਮਾਤਰਾ ਵਾ.
੩੨. ਸਤ੍ਤਮ੍ਯਾ+ਧਾਰੇ
ਕਤ੍ਤੁਕਮ੍ਮਟ੍ਠਾਨਂ ਨਿਸਜ੍ਜ+ਪਚਨਾਦਿਕ੍ਰਿਯਾਨਂ ਯੋ ਆਧਾਰੋ, ਤਂ ਆਧਾਰਕਾਰਕਂ ਨਾਮ. ਕਥਂ ਕਟੇ ਨਿਸੀਦਤਿ ਦੇਵਦਤ੍ਤੋ, ਥਾਲਿਯਂ ਓਦਨਂ ਪਚਤਿ, ਦੇਵਦਤ੍ਤ+ਤਣ੍ਡੁਲਾਨਂ ਕਤ੍ਤੁ+ਕਮ੍ਮਾਨਂ ਧਾਰਣਤੋ ਤਦਟ੍ਠਆਸਨ+ਪਚਨਕ੍ਰਿਯਂ ਕਟ+ਥਾਲਿਯੋ ਧਾਰੇਨ੍ਤਿ ਨਾਮ, ਤਸ੍ਮਿਂ ਸਤ੍ਤਮੀਵਿਭਤ੍ਤਿ ਹੋਤਿ.
ਸੋ ਬ੍ਯਾਪਿਕੋ, ਓਪਸਿਲੇਸਿਕੋ, ਵੇਸਯਿਕੋ, ਸਾਮੀਪਿਕੋਤਿ ਚਤੁਬ੍ਬਿਧੋ. ਤਤ੍ਥ ਯੋ ਆਧੇਯ੍ਯਸ੍ਸ ਨਿਸ੍ਸੇਸਾਧਾਰਭੂਤੋ, ਸੋ ਬ੍ਯਾਪਿਕੋ, ਯਥਾ ਤਿਲੇਸੁ ਤੇਲਂ ਅਤ੍ਥਿ, ਖੀਰੇਸੁ ਜਲਂ, ਦਧਿਮ੍ਹਿ ਸਪ੍ਪਿ. ਪਚ੍ਚੇਕਸਿਦ੍ਧਾਨਂ ਭਾਵਾਨਂ ਯਂ ਆਧੇਯ੍ਯਭਾਵੇਨ ਉਪਸਿਲੇਸਨਂ ਅਲ੍ਲੀਯਨਂ ਅਤ੍ਥਿ, ਸੋ ਓਪਸਿਲੇਸਿਕੋ. ਯਥਾ ਆਸਨੇ ਨਿਸਿਨ੍ਨੋ ਸਙ੍ਘੋ, ਥਾਲਿਯਂ ਓਦਨਂ ਪਚਤਿ, ਘਟੇ ਉਦਕ+ਮਤ੍ਥਿ, ਦੂਰੇ ਠਿਤੋ, ਸਮੀਪੇ ਠਿਤੋ. ਯਤ੍ਥ ਸਮੀਪੇ ਸਮੀਪੀਵੋਹਾਰਂ ਕਤ੍ਵਾ ਤਦਾਯਤ੍ਤਤਾਦੀਪਨਤ੍ਥਂ ਆਧਾਰਭਾਵੋ ਉਪਚਰੀਯਤਿ, ਤਂ ਸਾਮੀਪਿਕਂ, ਯਥਾ ਗਙ੍ਗਾਯਂ ਘੋਸੋ, ਗਙ੍ਗਾਯ ਸਮੀਪੇ ਵਜੋਤ੍ਯਤ੍ਥੋ. ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਯਤ੍ਥ ਅਞ੍ਞਥਾਭਾਵਵਸੇਨ ਦੇਸਨ੍ਤਰਾਵਚ੍ਛੇਦਵਸੇਨ ਵਾ ਆਧਾਰਪਰਿਕਪ੍ਪੋ, ਸੋ ਵੇਸਯਿਤੋ. ਯਥਾ ਆਕਾਸੇ ਸਕੁਣਾ ਚਰਨ੍ਤਿ, ਭੂਮਿਯਂ ਮਨੁਸ੍ਸਾ, ਜਲੇ ਮਚ੍ਛਾ, ਪਾਸਾਦੇਸੁ ਪਤਿਤੋ, ਪਾਪਸ੍ਮਿਂ ਰਮਤੀ ਮਨੋ, ਪਸਨ੍ਨੋ ਬੁਦ੍ਧਸਾਸਨੇ, ਪਞ੍ਞਾਯ ਸਾਧੁ, ਵਿਨਯੇ ਨਿਪੁਣੋ, ਮਾਤਰਿ ਸਾਧੁ, ਪਿਤਰਿ ਨਿਪੁਣੋ.
ਕਿਰਿਯਾ ਕਤ੍ਤੁ+ਕਮ੍ਮਟ੍ਠਾ, ਆਧਾਰੀਯਤਿ ਯੇਨ ਸੋ;
ਆਧਾਰੋ ਚਤੁਧਾ ਵੁਤ੍ਤੋ, ਬ੍ਯਾਪਕਾਦਿਪ੍ਪਭੇਦਤੋ.
ਬ੍ਯਾਪਕੋ ਤਿਲਖੀਰਾਦਿ, ਕਟੋ ਓਪਸਿਲੇਸਿਕੋ;
ਸਾਮੀਪਿਕੋ ਤੁ ਗਙ੍ਗਾਦਿ, ਆਕਾਸੋ ਵਿਸਯੋ ਮਤੋ.
੩੩. ਨਿਮਿਤ੍ਤੇ
ਨਿਮਿਤ੍ਤਤ੍ਥੇ ਸਤ੍ਤਮੀ ਹੋਤਿ. ਅਜਿਨਮ੍ਹਿ ਹਞ੍ਞਤੇ ਦੀਪਿ, ਕੁਞ੍ਜਰੋ ਦਨ੍ਤੇਸੁ ਹਞ੍ਞਤੇ, ਅਣੁਮਤ੍ਤੇਸੁ ਵਜ੍ਜੇਸੁ ਭਯਦਸ੍ਸਾਵੀ, ਸਮ੍ਪਜਾਨਮੁਸਾਵਾਦੇ ਪਾਚਿਤ੍ਤਿਯਂ. ਸਬ੍ਬਤ੍ਥ ਨਿਮਿਤ੍ਯਤ੍ਥੋ.