੯. ਪਞ੍ਹੇ

ਪਚ੍ਛਿਮਂ ਪਚ੍ਛਿਮਂ ਪਦਨ੍ਤਿਆਦੀਸੁ ਪਞ੍ਹੋਤਿ ਪੁਰਿਮਂ ਪਦਂ, ਸਮ੍ਪੁਚ੍ਛਨਾਤਿ ਪਚ੍ਛਿਮਂ ਪਦਨ੍ਤਿਆਦਿਨਾ ਦਟ੍ਠਬ੍ਬਂ. ਸਮੇਚ੍ਚ ਅਞ੍ਞਮਞ੍ਞਂ ਪੁਚ੍ਛਨਾ ਸਮ੍ਪੁਚ੍ਛਨਾ, ਯਾਚਨਂ ਦੇਹੀ ਤ੍ਯਾਦਿਨਾ ਯਾਚਨਮਤ੍ਥਂ, ਇਟ੍ਠਸ੍ਸਾਸਮ੍ਪਤ੍ਤਸ੍ਸਾਤ੍ਥਨਮਿਟ੍ਠਾਸਿਂਸਨਂ. ਪਤ੍ਤਕਾਲਵਸੇਨ ਚ ਵਿਸਯਭੇਦੇਨ ਭਿਨ੍ਨਾਯ ਪੀਤਿ ਯੋਜੇਤ੍ਵਾ ਅਤ੍ਥੋ ਦਟ੍ਠਬ੍ਬੋ. ਪਤ੍ਤਕਾਲਂ ਦਸ੍ਸੇਤਿ ਨਿਮਿਤ੍ਤਭੂਤਸ੍ਸਾਤਿਆਦਿਨਾ. ਨਿਮਿਤ੍ਤਭੂਤਸ੍ਸਾਤਿ ਤਂਤਂਕਿਚ੍ਚਸਮ੍ਪਜ੍ਜਨੇ ਕਾਰਣਭੂਤਸ੍ਸ. ਵਿਧਿ ਨਾਮ ਦਿਟ੍ਠਧਮ੍ਮਿਕਸਮ੍ਪਰਾਯਿਕ ਨਿਮਨ੍ਤਣਾਮਨ੍ਤਣਾਜ੍ਝੇਸਨਪੇਸਨਾਨਿ. ਏਤ੍ਥ ਚ ਅਨੁਞ੍ਞਾਪਤ੍ਤਕਾਲੇਸੁ ਚ ਪਞ੍ਚਮੀ ਵਿਹਿਤਾ ਪਰੇਹਿ, ਦਿਟ੍ਠਧਮ੍ਮਿਕਾਦੀਸੁ ਪਞ੍ਚਸੁ ਸਤ੍ਤਮੀ. ਇਧ ਪਨ ਤੇ ਦ੍ਵੇਪਿ ਵਿਧਿਵਿਸੇਸਾਯੇਵਾਤਿ ਵਿਧਿਮ੍ਹਿ ਅਨ੍ਤੋਕਰਿਤ੍ਵਾ ਏਯ੍ਯਾਦਿਂ ਵਿਧਾਤੁਂ ਯਂ ਵੁਤ੍ਤਂ ਵੁਤ੍ਤਿਕਾਰੇਨ, ਤਦਿਦਾਨਿ ਵਤ੍ਤੁਕਾਮੋ ਆਹ- ‘ਅਨੁਞ੍ਞਾਪਤ੍ਤਕਾਲੇਸੁਪਿ’ਚ੍ਚਾਦਿ. ਵਿਧਿਪ੍ਪਤੀਤਿਮੇਵ ਪਕਾਸੇਤਿ ‘ਏਵਂ ਕਰੇਯ੍ਯਾਸੀ’’ਤਿਚ੍ਚਾਦਿਨਾ. ਅਨੁਜਾਨਨ੍ਤੋਪਿ ਦੀਪੇਨ੍ਤੋਪਿ ਕਿਰਿਯਾਸੁ ਬ੍ਯਾਪਾਰੇਤਿਯੇਵਾਤਿ ਬ੍ਯਾਪਾਰਣਮ੍ਪਤੀਤਿਤੋਤਿ ਯੋਜੇਤ੍ਵਾ ਅਤ੍ਥੋ ਵੇਦਿਤਬ੍ਬੋ.

ਪੇਸਨੇਪਿ ਕੇਸਞ੍ਚਿ ਬ੍ਯਾਕਰਣਞ੍ਞੂਨਂ ਸਤ੍ਤਮੀਵਿਧਿਚ੍ਛਿਤੋਤਿਵੁਤ੍ਤਿਕਾਰੇਨ ਯਂ ਵੁਤ੍ਤਂ, ਤਂ ਦਾਨਿ ਵਤ੍ਤੁਮਾਹ- ‘ਪੇਸਨੇ ਪਿ’ਚ੍ਚਾਦਿ. ਸਮੂਲਤਨ੍ਤਿ ਕੇਸਞ੍ਚਿ ਸਦ੍ਦਿਕਾਨਂ ਸਤ੍ਤਮੀਵਿਧਿਵਿਧਾਨਮੂਲੇਨ ਸਮੂਲਤਂ. ‘‘ਅਨੁਮਤਿਪਰਿਕਪ੍ਪਤ੍ਥੇਸੁ ਸਤ੍ਤਮੀ’’ਤਿ (੩-੧-੧੧) ਕਚ੍ਚਾਨਸੁਤ੍ਤਂ. ਕਤ੍ਤੁਮਿਚ੍ਛਤੋ ਪਰਸ੍ਸ ਅਨੁਜਾਨਨਂ ਅਨੁਮਤਿ, ਪਰਿਕਪ੍ਪਨਂ ਸਲ੍ਲਕ੍ਖਣਂ ਨਿਰੂਪਨਂ ਪਰਿਕਪ੍ਪੋ ਹੇਤੁਫਲਕਿਰਿਯਾ ਸਮ੍ਭਵੋ ਚ, ਤਸ੍ਮਿਂ ਅਨੁਮਤ੍ਯਤ੍ਥੇ ਚ ਪਰਿਕਪ੍ਪਤ੍ਥੇ ਚ ਸਤ੍ਤਮੀਵਿਭਤ੍ਤਿ ਹੋਤੀਤਿ ਅਤ੍ਥੋ. ਅਤ੍ਥਗ੍ਗਹਣੇਨ ਵਿਧਿਨਿਮਨ੍ਤਣਾਮਨ੍ਤਣਾਜ੍ਝੇਸਨ ਪਤ੍ਥਨਾਪਤ੍ਤਕਾਲੇਸੁ ਚ.