੭. ਏਯ੍ਯਾ

ਏਯ੍ਯਾਦੋਤੀਮਿਨਾ ਏਯ੍ਯਾਦ੍ਯਤ੍ਥੋ ਗਹਿਤੋਤਿ ਬੋਧੇਤੁਂ ਯੇਨੇਚ੍ਚਾਦਿਕਂ ਵੁਤ੍ਤਂ. ਨਿਮਿਤ੍ਤਸਦ੍ਦਾਪੇਕ੍ਖਾਯ ਤਨ੍ਤਿ ਵਤ੍ਤਬ੍ਬੇ ਵਿਸਯਸਦ੍ਦਾਪੇਕ੍ਖਾਯਸੋਤਿ ਵੁਤ੍ਤਂ. ਤੇਸਨ੍ਤਿ ਏਯ੍ਯਾਦੀਨਂ. ਵਿਸਯਂ ਦਸ੍ਸੇਤਿ ‘ਹੇਤੁਫਲੇਸ੍ਵਿਚ੍ਚਾਦਿਕੋ’ਤਿ. ਆਦਿਸਦ੍ਦੇਨ ਪਞ੍ਹਪਤ੍ਥਨਾਦਯੋ ਗਹਿਤਾ. ਅਥਾਤ੍ਰ ਕ੍ਰਿਯਗ੍ਗਹਣਾਭਾਵੇ ਕ੍ਰਿਯਾਤਿਪਤ੍ਤਿਯਨ੍ਤਿ ਕਥਂ ਲਬ੍ਭਤਿਚ੍ਚਾਹ- ‘ਕ੍ਰਿਯਾਤਿ ਪਤ੍ਤਿਯ’ਨ੍ਤਿ ਆਦਿ. ਕ੍ਰਿਯਾਤਿਪਤ੍ਤਿਯਨ੍ਤਿ ਵਿਵਰਣਂ ਕਤਨ੍ਤਿ ਸਮ੍ਬਨ੍ਧੋ.

ਅਭਿਧੇਯ੍ਯਦ੍ਵਾਰੇਨਾਤਿ ਕਿਰਿਯਾਸਙ੍ਖਾਤਅਤ੍ਥਮੁਖੇਨ, ਪਕਤਕ੍ਰਿਯਤ੍ਥ ਵਿਸੇਸਨਤ੍ਤਾਤਿ ਕ੍ਰਿਯਤ੍ਥਾਧਿਕਾਰਤੋ ਅਧਿਕਤਸ੍ਸ ਧਾਤੁਸ੍ਸ ਵਿਸੇਸਨਤ੍ਤਾ. ਇਦਂ ਵੁਤ੍ਤਂ ਹੋਤਿ ‘‘ਅਤਿਪਤ੍ਤਿਯਨ੍ਤਿ ਅਧਿਕਤਕ੍ਰਿਯਤ੍ਥਵਿਸੇਸਨਂ, ਵਿਸੇਸਨਞ੍ਚ ਹੋਨ੍ਤਂ ਨੋਜੁਕਂ ਭਵਿਤੁਮਰਹਤਿ ਕਿਞ੍ਚਰਹਿ ਅਭਿਧੇਯ੍ਯਦ੍ਵਾਰੇਨ, ਤਥਾਹਿ ਅਤਿਪਤਨਂ ਨਾਮ ਕ੍ਰਿਯਾਯ ਹੋਤਿ, ਨ ਕ੍ਰਿਯਤ੍ਥਸ੍ਸ ਅਯੁਜ੍ਜਨਤੋ, ਤਸ੍ਮਾ ਅਤਿਪਤ੍ਤਿਯਨ੍ਤਿਵੁਤ੍ਤੇਕ੍ਰਿਯਾਤਿਪਤ੍ਤਿ ਯਨ੍ਤਿ ਇਦਂ ਕ੍ਰਿਯਤ੍ਥਵਿਸੇਸਨਂ ਹੋਨ੍ਤਂ ਅਭਿਧੇਯ੍ਯਦ੍ਵਾਰੇਨ ਹੋਤੀਤਿ ਕ੍ਰਿਯਾਤਿਪਤ੍ਤਿਯਨ੍ਤਿ ਵਿਵਰਣਂ ਕਤ’’ਨ੍ਤਿ. ਵਿਧੁਰਪ੍ਪਚ੍ਚਯੋਪਨਿਪਾਤਤੋਤਿ ਵਿਰੁਦ੍ਧਪ੍ਪਚ੍ਚਯਸਮਵਾਯਾਤਿ ਅਤ੍ਥੋ.

ਕਾਰਣਵੇਕਲ੍ਲਤੋਵਾਤਿ ਹੇਤੁਮਤੋ ਫਲਸ੍ਸ ਯੋ ਹੇਤੁ ਤਸ੍ਸ ਵਿਕਲਤ੍ਤੇਨ. ਤਤ੍ਰੇਤੀਮਸ੍ਸ ਅਤ੍ਥੋ ਵਤ੍ਤਮਾਨਵਿਸਯੇਤਿ. ਕ੍ਰਿਯਾਤਿਪਤ੍ਤਿਯਨ੍ਤਿ ਭੂਤਾਦਿ ਕ੍ਰਿਯਾਤਿਪਤ੍ਤਿਯਂ. ਲਿਙ੍ਗਤੋਤਿ ਨਿਮਿਤ੍ਤੇਨ. ਗਮਕੇਨ ਲਿਙ੍ਗੇਨ ਗਮ੍ਮਾਯਾਤਿਪਤ੍ਤਿਯਾ ਬੁਜ੍ਝਨਕਾਲਂ ਵਤ੍ਤਮਾਨੋ ਕਾਲੋ ਨ ਤਿਟ੍ਠਤਿ ਅਤਿਕ੍ਕਮਤੀਤਿ ਆਹ- ‘ਵਤ੍ਤਮਾਨਤਾਯ ਬ੍ਯਤਿਕ੍ਕਮਾ’ਤਿ. ਤਦੇਵ ਫੁਟਯਤਿ ‘ਸਮਕਾਲ’ਨ੍ਤਿਆਦਿਨਾ. ਸਮਕਾਲਨ੍ਤਿ ਏਕਕ੍ਖਣੇ. ਵਤ੍ਤਮਾਨਸ੍ਸ ਕ੍ਰਿਯਾਤਿਪਤ੍ਯਸਮ੍ਭਵਾ ਤਦਵਸਿਟ੍ਠਾਤੀਤਾਨਾਗਤੇਸ੍ਵੇਯ੍ਯਾਦੀਨਮ੍ਭਾਵੋ (ਅਞ੍ਞਥਾ) ਨੁਪਪਤ੍ਤਿਯਾਤਿ ਵੁਤ੍ਤਂ ਵੁਤ੍ਤਿਯਂ ‘ਸਾਮਤ੍ਥਿਯਾਤਿਆਦਿ.

ਲਿਙ੍ਗੇਨਾਤਿ ਏਤ੍ਥ ਪੁਬ੍ਬੇ ਦਕ੍ਖਿਣੇਨ ਗਮਨੇ ਸਤਿ ਸਕਟਿਸ੍ਸਾਪਰਿਯਾ ਭਵਨਦਸ੍ਸਨਂ ਦਕ੍ਖਿਣੇਨ ਗਮਨਸ੍ਸ ਸਕਟਾਪਰਿਯਾਭਵਨਹੇਤੁਤ੍ਤੇ ਲਿਙ੍ਗਂ, ਦਕ੍ਖਿਣੇਨ ਗਮਨਸ੍ਸਾਤਿਪਤ੍ਤਿਯਾ ਅਞ੍ਞਤੋ ਗਮਨਾਦਿ ਲਿਙ੍ਗਂ. ਸਕਟਾ ਕਿਰਿਯਾਭਵਨਾਤਿਪਤ੍ਤਿਯਾ ਸਕਟੇ ਗਰੁਭਾਰਾਰੋਪਨਾਦਿ ਲਿਙ੍ਗਂ. ਪਠਮਵਯੇ ਅਰਹਤ੍ਤਭਵਨਂ ਤਂਹੇਤੁਭੂਤਞ੍ਚ ਪਬ੍ਬਜ੍ਜਂ ਪਰੇਸਂ ਪਠਮਵਯੇ ਪਬ੍ਬਜ੍ਜਾਨਿਮਿਤ੍ਤਾਰਹਤ੍ਤਪ੍ਪਤ੍ਤਿਲਿਙ੍ਗੇਨ ਵਿਞ੍ਞਾਯ ਪਬ੍ਬਜ੍ਜਾਯਾਤਿਪਤ੍ਤਿ ਘਰਕਮ੍ਮਬ੍ਯਾਵਟਤਾਦਿਲਿਙ੍ਗੇਨ, ਅਰਹਤ੍ਤਸ੍ਸਾਤਿਪਤ੍ਤਿ ਚ ਪਬ੍ਬਜ੍ਜਾਨਿਮਿਤ੍ਤਾਭਾਵੇਨ [ਭਾਵਵਿਰਹੇਨ (ਪੋਤ੍ਥਕੇ)] ਲਿਙ੍ਗੇਨਾਵਸੀਯਤੇਤਿ ਲਿਙ੍ਗੇਨ ਭੂਤ ਕ੍ਰਿਯਾਤਿਪਤ੍ਤਿ ਪਨ ਵੇਦਿਤਬ੍ਬਾ, ਯਦਿ ਪਨੇਵਮਭਿਞ੍ਞਾਲਾਭੀ ਪਯੁਞ੍ਜਤਿ ਤਦਾ ਪਚ੍ਚਕ੍ਖਞਾਣੇਨੇਵ ਸਬ੍ਬਂ ਵਿਞ੍ਞਾਯ ਪਯੁਞ੍ਜਤੀਤਿ ਵੇਦਿਤਬ੍ਬਂ. ਲਿਙ੍ਗਤੋਵਸੀਯਮਾਨਾਯਨ੍ਤਿ ਪਨ ਬਾਹੁਲ੍ਲੇਨ ਵੁਤ੍ਤਂ.