੬੪. ਨ੍ਤੋ

ਯੋ ਸਾਧਯਿਤੁਮਾਰਦ੍ਧੋ ਨਚ ਨਿਟ੍ਠਮੁਪਗਤੋਤਿ ਯੋ ਕਟਾਦਿਸਾਧਯਿਤੁਂ ਨਿਬ੍ਬਤ੍ਤਯਿਤੁਂ ਆਰਦ੍ਧੋ ਨਿਟ੍ਠਂ ਪਰਿਸਮਤ੍ਤਿਂ ਨ ਚੋਪਗਤੋ ਨਪ੍ਪਤ੍ਤੋ. ਪਵਤ੍ਤੋ-ਨੁਪਰਤੋਵਾਤਿ ਯੋ ਪਬ੍ਬਤਾਦਿ ਨਿਚ੍ਚਪ੍ਪਵਤੋ-ਅਵਿਰਤੋ ਤੇਨੇਵ ਨਿਟ੍ਠਂ ਨੋਪਗਤੋਸੋਵਤ੍ਤਮਾਨੋਤਿ ਵੁਚ੍ਚਤੇਤਿ ਯੋਜਨਾ. ਤਬ੍ਬਿ ਸਯਕਿਰਿਯਾਦ੍ਵਾਰੇਨਾਤਿ ਯਥਾਵੁਤ੍ਤਕਟਾਦਿਵਿਸਯ ਕਿਰਿਯਾਮੁਖੇਨ, ਇਦਂ ਵੁਤ੍ਤਂ ਹੋਤਿ ‘‘ਯਥਾਵੁਤ੍ਤਕਟਾਦੀਨਂ ਵਤ੍ਤਮਾਨਤ੍ਤਾ ਤਬ੍ਬਿਸਯਾ ਕਿਰਿਯਾਪਿ ਵਤ੍ਤਮਾਨਾ ਏਵਾਤਿ ਤਂਦ੍ਵਾਰੇਨ ਕ੍ਰਿਯਤ੍ਥਵਿਸੇਸਨ’’ਨ੍ਤਿ.

ਭੁਞ੍ਜਤਿ ਦੇਵਦਤ੍ਤੋਤਿ ਏਤ੍ਥ ਯਜ੍ਜਪਿ ਭੁਞ੍ਜਮਾਨੋ ਹਸਤਿ ਖਜ੍ਜਤਿ [ਵਦਤਿ] ਪਾਨਿਯਂ ਪਿਵਤਿ, ਤਥਾਪਿ ਯੁਤ੍ਤਾ ਵਤ੍ਤਮਾਨਤਾ ਕਤ੍ਤੁਮਿਚ੍ਛਿਤਸ੍ਸਾਰਮ੍ਭੋ ਨ ਪਰਿਸਮਤ੍ਤੋਤਿ ਵੁਤ੍ਤਂ- ‘ਸਾਧਯਿਤੁਮਾਰਦ੍ਧੋ ਨ ਚ ਨਿਟ੍ਠਮੁਪਗਤੋ’ਤਿ. ਤਿਟ੍ਠਨ੍ਤਿ ਪਬ੍ਬਤਾਤਿਆਦੀਸੁ ਨਿਚ੍ਚੇਸੁ ਪਬ੍ਬਤਾਦੀਸੁ ਭੂਤਾਨਾਗਤਾਨਮਸਮ੍ਭਵਾ ਤਨ੍ਨਿਸੇਧਿਨੋ ਵਤ੍ਤਮਾਨਸ੍ਸਾਪ੍ਯਸਮ੍ਭਵਾ ਯਦੀਪਿ ਕਾਲਵਿਭਾਗੋ ਨ ਵਿਞ੍ਞਾਯਤੇ, ਤਥਾਪਿ ਆਰਦ੍ਧਸ੍ਸ ਠਾਨਸ੍ਸਾਪਰਿਸਮਤ੍ਤਿਯਾ ਵਤ੍ਤਮਾਨਾ ਏਵਾਤਿ ਵੁਤ੍ਤਂ- ‘ਪਵਤ੍ਤੋ-ਨੁਪਰਤੋ ਵਾ’ਤਿ. ਕਤ੍ਤੁਵਿਸੇਸਨੇ ਸਤਿ ਕੋ ਦੋਸੋਚ੍ਚਾਹ- ‘ਕਤ੍ਤੁ ਵਿਸੇਸਨੇ’ਚ੍ਚਾਦਿ. ਇਹਾਪਿ ਸਿਯਾ ਕਤ੍ਤੁਨੋ ਵਤ੍ਤਮਾਨਤ੍ਤਾ, ਵਤ੍ਤਮਾਨਤ੍ਤ ਮੇਵਾਸ੍ਸ ਪਕਾਸੇਤੁਮਯਨ੍ਤਿ ਵੁਤ੍ਤਂ. ‘‘ਅਪਠਮਾ ਸਮਾਨਾਧਿਕਰਣੇ’’ਤ੍ਯਾਦੀਹਿ (੩-੨-੧੨੪) ਅਨੇਕੇਹਿ ਸੁਤ੍ਤੇਹਿਨ੍ਤਪ੍ਪਚ੍ਚਯੋ ਪਾਣਿਨਿਯੇਹਿ ਵਿਹਿਤੋ.

ਇਧ ਪਨ ਸਾਮਞ੍ਞੇਨ ਵਿਹਿਤਤ੍ਤਾ ਆਹ- ‘ਸਾਮਞ੍ਞੇਨਾ’ਤਿਆਦਿ. ਸਨ੍ਤੋ ‘ਅਸ-ਭੁਵਿ’ਨ੍ਤਪ੍ਪਚ੍ਚਯੋ. ‘‘ਕਤ੍ਤਰਿ ਲੋ’’ (੫-੧੮) ‘‘ਨ੍ਤਮਾਨਾਨ੍ਤਿ ਯਿਯੁਂਸ੍ਵਾਦਿਲੋਪੋ’’ਤਿ (੫-੧੩੦) ਅਕਾਰਸ੍ਸ ਲੋਪੋ. ਤਪਨ੍ਤੋ ‘ਤਪ-ਸਨ੍ਤਾਪੇ’. ਜਪ੍ਪਨ੍ਤੋ ‘ਜਪ੍ਪ=ਵਚਨੇ’. ਪਠਨ੍ਤੋ ‘ਪਠ=ਉਚ੍ਚਾਰਣੇ’ ਪਚਨ੍ਤੋ ‘ਪਚ=ਪਾਕੇ’ਧਾਰਯਨ੍ਤੋ ‘ਧਰ=ਧਾਰਣੇ’. ਪਯੋਜਕਬ੍ਯਾਪਾਰੇ ਣਿ, ਧਰਿਤੁਂ ਪਯੁਞ੍ਜਮਾਨੋ ਧਾਰਯਨ੍ਤੋ. ਦਿਸ੍ਸਨ੍ਤੋ ਦਿਸ ਦੁਸ=ਅਪ੍ਪਿਤਿਯਂ’’ ਦਿਵਾਦੀਹਿ ਯਕ’’ (੫-੧੨) ਯਜਨ੍ਤੋ ‘ਯਜ-ਦੇਵਪੂਜਾਯਂ’. ਅਰਹਨ੍ਤੋ ‘ਅਰਹ-ਪੂਜਾਯਂ. ਯਥਾਚਾਤਿਆਦਿਨਾ ਅਪਠਮਾਸਮਾਨਾਧਿਕਰਣਾਦੀਸੁ ‘ਸਂਵਿਜ੍ਜਮਾਨੋ ਵਿਰੋਚਮਾਨਂ ਜਪ੍ਪਮਾਨੋ’ਚ੍ਚਾਦੀਸੁ ਮਾਨੋ ਨ੍ਤੋ ਵਿਯ ਦਟ੍ਠਬ੍ਬੋਤਿ ਵਦਤਿ.