੧੨੮. ਅਤ੍ਯਾ

ਵੁਤ੍ਤਿਯਂ ਏਤਸ੍ਮਿਂ ਵਿਸਯੇਤਿ ਏਤ੍ਥ ਏਤਸ੍ਮਿਨ੍ਤਿ ਤ੍ਯਾਦਿਨ੍ਤਵਜ੍ਜਿਤਪਚ੍ਚਯ ਵਿਸਯੇਤਿ ਅਤ੍ਥੋ. ਵਿਞ੍ਞਾਯਮਾਨਤ੍ਤਾ ਞਾਪਿਤੋ ਹੋਤੀਤਿ ਗਮ੍ਯਤੇ. ਨ ਞਾਪਕਤੋਤਿ ਇਮਿਨਾ ਇਦਂ ਦਸ੍ਸੇਤਿ ‘‘ਕਿਞ੍ਚਿ ਵਚਨਾਨੁਸਾਰਤੋ ਵਿਞ੍ਞਾਯਮਾਨਤਾਮਤ੍ਤੇਨ ਞਾਪੀਯਤੇ ਕਿਞ੍ਚਿ ਞਾਪਕੇਨ, ਅਸ੍ਮਿਮ੍ਪਕ੍ਖੇ ਵੁਤ੍ਤਾਨੁਸਾਰਤੋ ਕਤ੍ਥਚਿ ਕਸ੍ਸਚਿ ਧਾਤੁਨੋ ਅਪ੍ਪਯੋਗੋ ਵਿਞ੍ਞਾਪੀਯਤੀ’’ਤਿ. ਪਕ੍ਖਨ੍ਤਰਮਾਹ- ‘ਞਾਪਕਤ੍ਤਾਯੇਵ ਵਾ’ਤਿਆਦਿ. ਸਮਤ੍ਥੇਤਿ ਤਥਾਹਿਚ੍ਚਾਦਿਨਾ. ਅਸਸ੍ਸਾਪ੍ਪਯੋਗੋਤਿ ਅਸਧਾਤੁਸ੍ਸ ਕਿਸ੍ਮਿਞ੍ਚਿ ਤਬ੍ਬਾਦਿਕੇ ਪਚ੍ਚਯੇ ਪਰੇ ਭਵਿਤਬ੍ਬਨ੍ਤਿਆਦੀਨਮਪ੍ਪਯੋਗੋਤਿ ਅਤ੍ਥੋ.

ਵਿਨਾਪਿ ਸੁਤ੍ਤਨ੍ਤਿ ‘‘ਅਤ੍ਯਾਦੀ’’ਤਿਆਦਿਕਂ ਸੁਤ੍ਤਂ ਵਿਨਾਪਿ. ਏਵਂ ਮਞ੍ਞਤੇ ‘‘ਅਸਸ੍ਸ ਭੂਆਦੇਸੇਨ ਸਾਧੀਯਮਾਨਂ ਸਬ੍ਬਮਿਟ੍ਠਂ ਬਹੁਲਾਧਿਕਾਰਤੋ ਭੂਧਾਤੁਨਾਵ ਸਿਜ੍ਝਤਿ ਵਿਨਾਪਿ ਭੂਆਦੇਸਸੁਤ੍ਤਨ੍ਤਰਨ੍ਤਿ ਕਤ੍ਥਚਿ ਕਸ੍ਸਚਿ ਅਪ੍ਪਯੋਗਸ੍ਸ ਞਾਪਕਤ੍ਤਮ੍ਪਿਸ੍ਸ ਯੁਜ੍ਜਤਿ ਅਞ੍ਞਤ੍ਥ ਕਰੀਯਮਾਨਮਿਹਾਪਿ ਅਤ੍ਥਵਨ੍ਤਂ ਸਿਯਾ’’ਤਿ.

ਯੇਤਿ ਧਾਤੁਪ੍ਪਯੋਗਾ ਯਸ੍ਮਿਨ੍ਤਿ ਵਿਸਯੇ, ਪਾਤਿਸ੍ਸਾਤਿ ‘ਪਾ-ਰਕ੍ਖਣੇ’ਤੀਮਸ੍ਸ, ਨਪ੍ਪਯੋਗੋ ਪਾਯਯਤਿ ਪਾਯਯਿਤਬ੍ਬਨ੍ਤਿਆਦਿਪ੍ਪਯੋਗੋ ਨ ਹੋਤੀਤਿ. ਏਵਮੁਪਰਿਪਿ ਯਥਾਯੋਗਂ ਞੇਯ੍ਯਂ. ਬ੍ਰੂਸ੍ਸਾਤਿ ‘ਬ੍ਰੂ=ਵਚਨੇ’ਇਚ੍ਚਸ੍ਸ. ਅਦਿਸ੍ਸਾਤਿ ‘ਅਦ-ਭਕ੍ਖਣੇ’ਇਚ੍ਚਸ੍ਸ. ਈਆਦੀਤਿ ਭੂਤੇ ਈਆਦਿ. ਏਤਿਸ੍ਸ ਚ ਈਆਦੀਸੂਤਿ ਸਮ੍ਬਨ੍ਧੋ.

ਅਵਬੋਧੇ ਏਤਿਸ੍ਸ ਣਿਸੇਸੁ ਚ ਈਆਦੀਸੁ ਚ, ਅਜ੍ਝੇਨੇ ਏਤਿਸ੍ਸ ਪਰੋਕ੍ਖਾਸੁ ਚ ਣਿਸੇਸੁ ਚ ਈਆਦੀਸੁਚਾਤਿ ਯੋਜੇਤਬ੍ਬਂ. ਸਬ੍ਬਤ੍ਥ ਨਪ੍ਪਯੋਗੋਤਿ ਯੋਜੇਤ੍ਵਾ ਅਤ੍ਥੋ ਵੇਦਿਤਬ੍ਬੋ. ਬਹੁਲਂਵਿਧਾਨਤੋ ਞਾਤਬ੍ਬਾਤਿ ਯੋਜਨਾ. ਯਕ੍ਵਿਕਰਣੇਨ ਨਿਦ੍ਦੇਸਾ ‘ਅਸ-ਕ੍ਖੇਪਨੇਤੀ ਮਸ੍ਸਾ’ਤਿ ਵੁਤ੍ਤਂ, ਤਦਾਹ- ‘ਅਸਸ੍ਸਾ’ਤਿਆਦਿ.