੬੯. ਜਨਾ

‘‘ਤਦਸ੍ਸਟ੍ਠਾਨਮੀਯੋ ਚਾ’’ਤਿ (੨-੮-੧੩) ਕਚ੍ਚਾਯਨਸੁਤ੍ਤਸ੍ਸਾਯ ਮਤ੍ਥੋ ‘‘ਤਦਸ੍ਸਟ੍ਠਾਨਮਿਚ੍ਚੇਤਸ੍ਮਿਂ ਅਤ੍ਥੇ ਛਟ੍ਠਿਯਨ੍ਤਤੋ ਈਯਪ੍ਪਚ੍ਚਯੋ ਹੋਤੀ’ਤਿ. ਤੇਨ ਮਦਨਸ੍ਸ ਠਾਨਂ ਮਦਨੀਯਂ ਬਨ੍ਧਨਸ੍ਸ ਠਾਨਂ ਬਨ੍ਧਨੀਯਂਤ੍ਯਾਦਿਕਂ ਸਾਧੇਨ੍ਤਿ. ਇਧ ਪਨ ਤਥਾਵਿਧਸ੍ਸਾਭਾਵਾ ਕਥਂ ਤਂ ਸਿਜ੍ਝਤੀਤ੍ਯਾਸਙ੍ਕਿਯ ‘ਮਦਨੀਯ’ਨ੍ਤਿਆਦਿਕਂ ਵੁਤ੍ਤਂ, ਤਂ ਦਸ੍ਸੇਤੁਮਾਹ- ‘ਮਦਨੀਯਾਦਿਪ੍ਪਸਿਦ੍ਧਿਯਾ’ਚ੍ਚਾਦਿ. ਸਾਧਨਕ੍ਕਮਂ ਦਸ੍ਸੇਤੁਮਾਹ- ‘ਏਵਮਞ੍ਞਤੇ’ਚ੍ਚਾਦਿ.

ਠਾਨਨ੍ਤਿ ਕਾਰਣਂ. ‘‘ਉਪਮਤ੍ਥਾਯਿਤਤ੍ਤ’’ਨ੍ਤਿ (੨-੮-੧੪) ਕਚ੍ਚਾਯਨਸੁਤ੍ਤਸ੍ਸਾਯਮਤ੍ਥੋ ‘‘ਉਪਮਤ੍ਥੇ ਆਯਿਤਤ੍ਤਪ੍ਪਚ੍ਚਯੋ ਹੋਤੀ’’ਤਿ ਤੇਨ ਧੂਮੋ ਵਿਯ ਦਿਸ੍ਸਤੀਤਿ ਧੂਮਾਯਿਤਤ੍ਤਂ ਤਿਮਿਰਮਿਵ ਦਿਸ੍ਸਤੀਤਿ ਤਿਮਿਰਾਯਿਤਤ੍ਤਂਤ੍ਯਾਦਿਕਂ ਸਾਧੇਨ੍ਤੀਤਿ ਵੁਤ੍ਤਨਯਮੇਵ. ਤਮ੍ਪਿਹਚ੍ਚਾਦਿਕਂ ਦ੍ਵੀਸੁ ਸਾਧਨਕ੍ਕਮਦਸ੍ਸਨਂ, ਧੂਮੋ ਵਿਯ ਦਿਸ੍ਸਤੀਤਿ ਦਸ੍ਸਿਤੋ ਯੋ ਕਮ੍ਮਤ੍ਥੋ ਸੋਪਿ ਧੂਮਾਯੀਤਿ ਕਤ੍ਤੁਵਸੇਨ ਸਕ੍ਕਾ ਪਰਿਕਪ੍ਪੇਤੁਨ੍ਤਿ ਕਤ੍ਤੁਸਾਧਨਤੋ ਧੂਮਾਯਿਤਸਦ੍ਦਾ ਸਕਤ੍ਥੇਤ੍ਤਪ੍ਪਚ੍ਚਯੇਪਿ ਧੂਮੋ ਵਿਯ ਦਿਸ੍ਸਤੀਤਿ ਅਤ੍ਥੇ ਆਯਿਤਤ੍ਥਪ੍ਪਚ੍ਚਯੇਪਿ ਨਾਤ੍ਥਭੇਦੋ-ਞ੍ਞਤ੍ਰਵਚਨਿਚ੍ਛਾਭੇਦਾਤਿ ਦਟ੍ਠਬ੍ਬਂ, ਭਾਵਤ੍ਥੋ ਪਨ ਤੇਸਂ ਭਾਵਪ੍ਪਧਾਨਵਸੇਨ ਲਬ੍ਭਤਿ, ਧੂਮਸ੍ਸੇਵ ਦਸ੍ਸਨਨ੍ਤਿ ਵਿਗ੍ਗਹੇ ਆਯਿਤਤ੍ਤੇਨ ਵਾ.