੬੪. ਤਰ

ਯਜ੍ਜਪਿ ਸੀਧਾਤੁਸ੍ਸ ਕੇਵਲਸ੍ਸ ਸੁਪਨੇ ਪਵਤ੍ਤਿ, ਤਥਾਪ੍ਯਤਿਪੁਬ੍ਬਸ੍ਸ ਉਕ੍ਕਂਸੇ ਪਵਤ੍ਤੀਤਿ ਆਹ- ‘ਅਤਿਸਯੋ ਉਕ੍ਕਂਸੋ’ਤਿ. ਸੋ ਚ ਅਤਿਸਯੋ ਕਸ੍ਸ ਸਮ੍ਭਵਤਿਚ੍ਚਾਹ- ‘ਸੋ ਚ ਕਿਰਿਯਾਗੁਣਾਨ’ਨ੍ਤਿ. ਕਥਂ ਤੇਸਮਤਿਸਯੋਚ੍ਚਾਹ- ‘ਆਧਾਰਭੂਤਦਬ੍ਬਵਸਾ’ਤਿ. ਕੁਤੋਚ੍ਚਾਹ- ‘ਅਨਪੇਕ੍ਖਿਤੇ’ਚ੍ਚਾਦਿ. ਅਨਪੇਕ੍ਖਿਤੋ ਕਿਰਿਯਾਗੁਣਾਨਂ ਨਿਸ੍ਸਯੋ ਦਬ੍ਬਸਙ੍ਖਾਤੋ ਯੇਸਨ੍ਤਿ ਵਿਗ੍ਗਹੋ, ਦਬ੍ਬਸ੍ਸ ਨਿਸ੍ਸਯਭੂਤਸ੍ਸਾ-ਤਿਸਯਤ੍ਤਂ ਹੋਨ੍ਤਮ੍ਪਿ ਨਿਸ੍ਸਿਤਾਨਂ ਕਿਰਿਯਾ ਗੁਣਾਨਂ ਵਸੇਨੇਵ ਸਿਯਾ ਨਾਞ੍ਞਥਾਤਿ ਵਤ੍ਤੁਮਾਹ-‘ਪਚ੍ਚਧਿਕਰਣ’ਨ੍ਤਿਆਦਿ.

ਨਨੁ ਚ ਯਦਿ ਕਿਰਿਯਾਗੁਣਾਨਮੇਵਾਤਿਸਯੋ, ਤਦਾ ਨ ਸਿਜ੍ਝਤਿ ‘ਗੋਤਰੋ’ਤਿ ਨੇਸ ਦੋਸੋ, ਨੋ ਚੇਤ੍ਥ ਜਾਤਿਯਾਤਿਸਯੋ, ਕਸ੍ਸ ਚਰਹਿ ਗੁਣਸ੍ਸ ਗੋ ਅਯਂ ਯੋ ਸਕਟਂ ਵਹਤਿ, ਗੋਤਰੋ-ਯਂ ਯੋ ਸਕਟਂ ਵਹਤਿ ਸਿਰਞ੍ਚਾਤਿ, ਜਾਤਿਯਾ ਹਿ ਨਿਚ੍ਚਾਯੇਕਰੂਪਾਯ ਨੋਕ੍ਕਂਸਾਪਕਂਸਯੋਗੋ ਸਮ੍ਭਵਤੀਤਿ ਦਬ੍ਬਸ੍ਸਾਪਿ ਨਾਤਿਸਯਸਮ੍ਭਵੋ. ਤਥਾਹਿ ਤੁਲ੍ਯਪ੍ਪਮਾਣਸ੍ਸ ਗੁਣਕਤੋਵ ਮੂਲਤੋ ਉਕ੍ਕਂਸੋ ਦਿਸ੍ਸਤਿ ਸਮਾਨੇਪਿ ਹਿ ਆਯਾਮੇ ਵਿਤ੍ਥਾਰੇ ਚ ਪਟਸ੍ਸ ਕਾਸਿਕਸ੍ਸਾਞ੍ਞੋਵਾਗ੍ਘੋ ਭਵਤਿ ਮਾਥੁਰਸ੍ਸਾਞ੍ਞੋ ਵਾਤਿ. ਦਬ੍ਬਸ੍ਸਾਪਿ ਸਾਤਿਸਯੇਹਿ ਯੁਤ੍ਤਤਾਮਤ੍ਤੇਨ ਸਾਤਿਸਯਤ੍ਤਸ੍ਸੁਪਟ੍ਠਾਪਿਤਤ੍ਤਾ ਵੁਤ੍ਤਂ- ‘ਤੇਨੇਵਾਹਾ’ਤਿਆਦਿ. ਯਦਗ੍ਗੇਨ ਕਿਰਿਯਾਗੁਣਾਨਂ ਨਿਸ੍ਸਿਤਾਨਮਤਿਸਯਵਸੇਨ ਨਿਸ੍ਸਯਭੂਤਮ੍ਪਿ ਦਬ੍ਬਂ ਕਥਞ੍ਚਿਦਪ੍ਯਤਿਸਯੇ ਵਤ੍ਤਤਿ ਨਾਮ, ਤਦਗ੍ਗੇ ਤਬ੍ਬਾਚਿਕਾਪਿ ਪਕਤਿ ਅਤ੍ਤਨੋ ਵਚਨੀਯਤ੍ਥਵਸੇਨ ਤਤ੍ਥ ਵਤ੍ਤਤਿਯੇਵ ਨਾਮਾਤਿ ‘ਅਤਿਯਯੇ ਵਤ੍ਤਮਾਨਤੋ’ਤਿ ਪਕਤਿਵਿਸੇਸਨਵਸੇਨ ਵੁਤ੍ਤਂ, ਤੇਨੇਵਾਹ- ‘ਇਮਿਨਾ ਪਕਤਿ ਵਿਸੇਸਨਤ੍ਤਞ੍ਚਾਹਾ’ਤਿ. ਸਕਤ੍ਥਿਕਾਨਂ ਪਕਤਿਅਤ੍ਥੋ ਜੋਤਨੀਯੋ ਹੋਤੀਤਿ ਸਮ੍ਬਨ੍ਧੋ.

ਸਕਤ੍ਥਿਕਾਨਨ੍ਤਿ ਕਤ੍ਤਰਿ ਛਟ੍ਠੀ ਸਮ੍ਬਨ੍ਧਵਚਨਿਚ੍ਛਾਯ, ਸਕਤ੍ਥਿਕੇਹੀਤਿ ਅਤ੍ਥੋ. ਹੇਤੁਮਾਹ- ‘ਪਕਤਿਵਿਸੇਸਨਨ੍ਤੀ’ਤਿ. ਇਤਿਸਦ੍ਦੋ ਹੇਤੁਮ੍ਹਿ, ਯਸ੍ਮਾ ‘ਅਤਿਸਯੇ ਵਤ੍ਤਮਾਨਤੋ’ਤਿ, ਪਕਤਿਵਿਸੇਸਨਂ, ਤਤੋ ਪਕਤ੍ਯਤ੍ਥਭੂਤੇ-ਤਿਸਯੇ ਜਾਤਤ੍ਤਾ ਸਕਤ੍ਥਿਕੇਹਿ ਯਥਾਵੁਤ੍ਤਨਯੇਨ ਪਕਤ੍ਯਤ੍ਥਭੂਤੇਤਿਸਯੋ ਜੋਤਨੀਯੋ ਹੋਤੀਤਿ ਅਤ੍ਥੋ. ਤਤ੍ਥ ਨਾਭਿਧੇਯ੍ਯੋਤਿ ਬ੍ਯਤਿਰੇਕਮਾਹ, ਤਥਾ ਚ ਵਕ੍ਖਤਿ- ‘ਅਤਿਸਯਜੋਤਕਾਤਰਾਦਯੋ’ਤਿ.

ਅਥ ਪਕਤਿਵਿਸੇਸਨਤ੍ਤੇ ਕਸ੍ਮਾ ਨਾਭਿਧੇਯ੍ਯੋ ਜੋਤਨੀਯੋਚ੍ਚਾਹ ‘ਪਕਤਿਯਾਯੇਵ’ਚ੍ਚਾਦਿ. ਉਕ੍ਕਂਸੋ ਸਮਾਨਗੁਣਵਿਸਯੇਯੇਵ ਲੋਕੇ ਦਿਟ੍ਠੋ [ਪਵਿਟ੍ਠੋ (ਪੋਤ੍ਥਕੇ)] ਤੇਨ ਸਾਮਞ੍ਞਵਚਨੇਪਿ ਤਾਦਿਥਵਿਸਯੇਯੇਵ [ਸੋਯੇਵ] ਕਾਰਣ ਵਸੇਨ ਹੋਤੀਤਿ ਦਸ੍ਸੇਤੁਮਾਹ- ‘ਅਤਿਸਯੇਨੇ’ਚ੍ਚਾਦਿ. ਦ੍ਵਿਨ੍ਨਮੇਕਸ੍ਸਾ-ਤਿਸਯੇਚ੍ਚਾਦਿਨਾ ‘ਦ੍ਵਿਬਹੂਸੁਕ੍ਕਂਸੇ ਤਰਤਮਾ’’ਤਿ (ਚਂ ੪-੩-੪੫) ਸਕ੍ਕਤਸੁਤ੍ਤਤ੍ਥਸ੍ਸਾਧਿਪ੍ਪਾਯਂ ਵਿਵਰਤਿ. ਤਰਇਯਾਤਿ ਸਕਵੋਹਾਰੇਨ ਵੁਤ੍ਤਂ, ਤੇਸਨ੍ਤੁ ਈਯਪ੍ਪਚ੍ਚਯੋ. ਏਵਮਿਹਾਵਿਧਾਨਂ ਸੁਖਸਾਨੇਤ੍ਤਨ੍ਤਿ ਸਮ੍ਬਨ੍ਧੋ.

ਅਯਮੇਤ੍ਥਾਧਿਪ੍ਪਾਯੋ ‘ਯਥਾਵੁਤ੍ਤਸੁਤ੍ਤਤ੍ਥਵਸੇਨ ਦ੍ਵਿਨ੍ਨਮੇਕਸ੍ਸ ਉਕ੍ਕਂਸਾਭਾਵਾ ‘ਮਾਥੁਰਾ ਪਾਟਲਿਪੁਤ੍ਤਕੇਹਿ ਸੁਕੁਮਾਰਤਰਾ’ਚ੍ਚਾਦੋ ਤਰਪ੍ਪਚ੍ਚਯੋ ਨ ਹੋਤੀਤਿ ਏਕੋ ਮਾਥੁਰੋ ਦੁਤਿਯੋ ਪਾਟਲਿਪੁਤ੍ਤਕੋ ਇਮੇਸਂ ਸੁਕੁਮਾਰਾਨਂ ਦ੍ਵਿਨ੍ਨਮੇਕੋ ਮਾਥੁਰੋ-ਤਿਸਯੇਨ ਸੁਕੁਮਾਰੋ ਸੁਕੁਮਾਰਤਰੋ, ਏਕਮਞ੍ਞੇਸਂ ਦ੍ਵਿਨ੍ਨਮੁਕ੍ਕਂਸੇਤਥਾਞ੍ਞੇਸਂ ਦ੍ਵਿਨ੍ਨਮੇਕਸ੍ਸਾਤਿ ਏਵਂ ਦ੍ਵਿਨ੍ਨਂਦ੍ਵਿਨ੍ਨਮੇਕੇਕਸ੍ਸ ਉਕ੍ਕਂਸੇ ਤਰਪ੍ਪਚ੍ਚਯੋ ਭਵਤਿ, ਉਭਯਤ੍ਰ ਤ੍ਵਵਯਵਾਪੇਕ੍ਖਮ੍ਬਹੁਵਚਨਂ, ਤਥਾਹਿ ਸੁਕੁਮਾਰਤ੍ਤੇਨੁਕ੍ਕਂਸਿਯਮਾਨਾਨਂ ਸਮੁਦਾਯਾਨਮਵਯਵਾ ਮਾਥੁਰਾ ਬਹਵੋ ਪਾਟਲਿਪੁਤ੍ਤਕਾਪਿ ਨਿਕ੍ਕਂਸਿਯਮਾਨਾ ਤਥੇਵਾਵਯਵਾ ਬਹਵੋ ਹੋਨ੍ਤਿ, ਏਵਂ ਮਾਥੁਰਾ ਪਾਟਲਿ ਪੁਤ੍ਤਕੇਹਿ ਸੁਕੁਮਾਰਤਰਾ’ਤਿ ਤਰਪ੍ਪਚ੍ਚਯੇਨ ਸਿਜ੍ਝਤਿ. ਇਮਸ੍ਮਿਂ ਗਾਮੇ ਅਡ੍ਢਤਰਾ ਵਾਣਿਜ੍ਜਾਚ੍ਚਾਦੋਪਿ ਕਥਿਤੇਨ ਞਾਯੇਨ ਦ੍ਵਿਨ੍ਨਂਦ੍ਵਿਨ੍ਨਮੇਕੇਕਸ੍ਸ ਉਕ੍ਕਂਸੇ ਤਰਪ੍ਪਚ੍ਚਯੋ ਭਵਤਿ, ਬਹੁਵਚਨਨ੍ਤੁ ਕਤ੍ਥਚਿ ਅਵਯਵਾਪੇਕ੍ਖਨ੍ਤਿ ਸਬ੍ਬਂ ਸਕ੍ਕਤੇ ਕਿਚ੍ਛੇਨ ਸਾਧੇਨ੍ਤਿ. ਇਹ ਤੁ ਤਥਾਵਿਧਸ੍ਸ ਸੁਤ੍ਤਸ੍ਸਾ ਵਿਧਾਨਾ ‘‘ਤਰਤਮਿਸ੍ਸਿਕਿਯਿਟ੍ਠਾਤਿਸਯੇ’’ਤਿ ਤਰਾਦੀਨਮਤਿਸਯੇ ਸਾਮਞ੍ਞੇਨ ਵਿਧਾਨਾ ਸਬ੍ਬਤ੍ਥ ਤਰਪ੍ਪਚ੍ਚਯੇਨ ਸੁਖਸਾਧਨਂ ਹੋਤੀ’’ਤਿ.

ਅਵਤ੍ਥਾਭੇਦੇਨਾਤਿ ਪਟੁਤਰਾਵਤ੍ਥਾਵਤੋ ਪਟੁਅਵਤ੍ਥਾਯ ਭਿਨ੍ਨਤ੍ਤਾ ਵੁਤ੍ਤਂ, ਤਥਾਹਿ ਤਮੇਵਾਵਤ੍ਥਨ੍ਤਰਯੁਤ੍ਤਂ ਵਤ੍ਤਾਰੋ ਭਵਨ੍ਤਿ ਅਞ੍ਞੇ ‘ਭਵਂਸੂਅਵਤ੍ਥੋ’ਤਿ. ਪਕਾਰਨ੍ਤਰੇਨਪਿ ਸਾਧਨੇ ਹੇਤੁਮਾਹ- ‘ਅਤਿਸਯਮਤ੍ਤੇ ਵਾ ਵਿਧਾਨਤੋ’ਤਿ. ਅਨਵਟ੍ਠਿਤਤ੍ਤਮਾਹ- (‘ਅਤਿਸਯਵਾਪਿ’ਚ੍ਚਾਦਿ). ਪਞ੍ਚਸ੍ਵੇਤੇਸੂਤਿ ਏਤੇਸਂ ਯਥਾਵੁਤ੍ਤਾਨਂ ਤਰਾਦੀਨਂ ਪਞ੍ਚਨ੍ਨਂ ਮਜ੍ਝੇ, ਰੂਪਾਨਿ ਗੁਣਵਚਨਸ੍ਸ ਵੁਤ੍ਤਿਯਮੁਦਾਹਰਿਤਾਨਿ. ਕਿਰਿਯਾਵਚਨਸ੍ਸ ਤੁ ‘ਅਤਿਸਯੇਨ ਪਾਚਕਤਰੋ ਪਾਚਕਤਮੋ’ਤਿ. ਇਸ੍ਸਿਕ ਇਯਇਟ੍ਠਾ ਸਰਾਦੀ ਤਤੋ (ਅਞ੍ਞਤੋ) ਨ ਹੋਨ੍ਤਿ ਬਹੁਲਾਧਿਕਾਰਾ.