੪੪. ਕਿਮ੍ਹਾ

ਨਨੁ ਸੁਤ੍ਤੇ ਸਙ੍ਖ੍ਯਾਯਨ੍ਤਿ ਨ ਵੁਤ੍ਤਂ ਕਤ੍ਯਾਦਯੋ ਚ ਪਯੋਗਾ ਸਙ੍ਖ੍ਯਾ ਪਰਿਮਾਣੇਯੇਵ ਦਿਸ੍ਸਨ੍ਤਿ ਕਥਂ ਨਾਮੇਤ੍ਥਾਯਂ ਵਿਧੀਤਿ ਆਹ- ‘ਬਹੁਲੇ’ਚ੍ਚਾਦਿ. ਸਙ੍ਖ੍ਯਾਪਰਿਮਾਣੇਯੇਵਾਯਂ ਵਿਧੀਤਿ ਕਿਂ ਸਦ੍ਦੇ ਸਙ੍ਖ੍ਯਾਪਰਿਮਾਣ ਵਿਸਯੇਯੇਵ ਵਤ੍ਤਮਾਨੇ ਅਯਂ ਰਤ੍ਯਾਦਿਕੋ ਵਿਧੀਤਿ ਅਤ੍ਥੋ, ਨਨੁ ਚੇਤ੍ਥ ਕਿਂ ਸਦ੍ਦੋ ਪਞ੍ਹੇ ਵਤ੍ਤਮਾਨੋ ਕਥਂ ਸਙ੍ਖ੍ਯਾਪਰਿਮਾਣੇ ਵਤ੍ਤਤੇਤਿ ਵੁਚ੍ਚਤੇ, ਯਜ੍ਜਪਿ ਸਙ੍ਖ੍ਯਾਪਰਿਮਾਣੇ ਨ ਵਤ੍ਤਤੇ, ਤਥਾਪਿ ਸਙ੍ਖ੍ਯਾਪਰਿਮਾਣਸ੍ਸ ਪੁਚ੍ਛਿਯਮਾਨਤ੍ਤਾ ਸਙ੍ਖ੍ਯਾਪਰਿਮਾਣਵਿਸਯੇ ਵਤ੍ਤਤੇ ਵਾਤਿ. ਬਹੁਲਾਧਿਕਾਰ ਪਯੋਗਸਾਮਤ੍ਥਿਯਹੇਤੁਨਿਦਸ੍ਸਨੇ ਫਲਮਾਹ- ‘ਯਤ੍ਰਤ੍ਵਿ’ਚ੍ਚਾਦਿ, ਪਰਿਚ੍ਛੇਦਕਤ੍ਤੇਨ ਪਰਿਮਾਣਕਤ੍ਤੇਨ. ਅਯਮੇਤ੍ਥਾਧਿਪ੍ਪਾਯੋ ‘‘ਯਦਾਕਿਮਿਦਂ ਸਙ੍ਖ੍ਯਾ ਪਰਿਮਾਣਮੇਸਂ ਦਸਨ੍ਨਂ ਨ ਕਿਞ੍ਚਿ ਅਪ੍ਪਕਮੇਵੇਤਨ੍ਤਿ ਸਙ੍ਖ੍ਯਾਪਰਿਮਾਣਮੇਵ ਕਿਂ ਸਦ੍ਦੇਨ ਨਿਨ੍ਦੀਯਤੇ, ਤਦਾਪਿ ਸਙ੍ਖ੍ਯਾ ਪਰਿਮਾਣਸ੍ਸ ਨਿਨ੍ਦੀਯਮਾਨਤ੍ਤਾ ਸਙ੍ਖ੍ਯਾਪਰਿਮਾਣਵਿਸਯਤ੍ਤਮੇਵੇਤਿ ਖੇਪੇ ਵਤ੍ਤਮਾਨਾਪਿ ਕਿਂ ਸਦ੍ਦਾ ਰਤਿਚ੍ਚਾਦਿ ਸਿਯਾ, ਬਹੁਲਾਧਿਕਾਰਾਦਿਤੋਵ ਪਨੇਤ੍ਥ ਨ ਸਿਯਾ’’ਤਿ. ਰਕਾਰਾਨੁਬਨ੍ਧਾ ਇਸਦ੍ਦਲੋਪਤ੍ਥਾਤਿ ਯੋਜਨਾ.