੨. ਵਚ੍ਛਾ

ਵਚ੍ਛਕਚ੍ਚਾਦਿਨਾ ਕਚ੍ਚਾਦਿਗਣਂ ਦਸ੍ਸੇਤ੍ਵਾ ਤਸ੍ਸ ਵਿਭਾਗੇਨ ਨਿਪ੍ਫਤ੍ਤਿਂ ਦਸ੍ਸੇਤੁਂ ‘ਵਚ੍ਛਾਦੀਹੀ’ਤਿਆਦਿਮਾਹ. ‘‘ਕਣ੍ਹੋ ਬ੍ਰਾਹ੍ਮਣੇ’’ਤਿ ਗਣਸੁਤ੍ਤਂ. ਤਤ੍ਥ ਕਣ੍ਹਸਦ੍ਦੋ ਬ੍ਰਾਹ੍ਮਣੇ ਵਤ੍ਤਮਾਨੋ ਣਾਨਣਾਯ ਨਪ੍ਪਚ੍ਚਯੇ ਉਪ੍ਪਾਦਯਤੀਤਿ ਅਤ੍ਥੋ. ਏਵਮਾਦੀਹਿਚ੍ਚਾਦਿਨਾ ਆਕਤਿਗਣਤ੍ਤਮਸ੍ਸ ਦਸ੍ਸੇਤਿ. ‘‘ਕਤਾਣਿਯੋਵੇ’’ਤਿ ਗਣਸੁਤ੍ਤਂ, ਦਿਚ੍ਚਾਦੀਸੂਤਿ ਯਤੋਣ੍ਯੋ ਦਿਸ੍ਸਤਿ ‘‘ਣ੍ਯ ਦਿਚ੍ਚਾਦੀਹੀ’’ਤਿ (੪-੪), ਤੇ ਦਿਚ੍ਚਾਦਯੋ, ਤੇਸੁ ਪਾਠਾਤਿ ਤਂਸੁਤ੍ਤਪ੍ਪਦੇਸੇ ‘‘ਕਤਾ ਣਿਯੋਵੇ’’ਤਿ ਪਾਠਾਭਾਵੇਪਿ ਦਿਚ੍ਚਾ ਦੀਨਮਾਕਤਿਗਣਤ੍ਤਾ ਪਠਿਤਮੇਵ ਨਾਮ ਤਨ੍ਤਿ ਵੁਤ੍ਤਂ.

ਣ੍ਯੇਤਿ ਣ੍ਯਪ੍ਪਚ੍ਚਯੇ ਕਤੇ. ਗੋਤ੍ਤਾਦਿਸਦ੍ਦਾਤਿ ਗੋਤ੍ਤੇ ਵਂਸੇ ਆਦਿਭੂਤਾ ਸਦ੍ਦਾ. ਵਂਸੋਤਿ ਅਨ੍ਵਯੋ. ਸੋਯੇਵ ਗਾਵਂ ਸਜਾਤਿ ਸਾਧਾਰਣਂ ਵਿਜਾਤਿਵਿਨਿਵਤ੍ਤਨਂ ਸਕਟਾਦਿਵਚਨਂ ਤਾਯਤੀਤਿ ਗੋਤ੍ਤਨ੍ਤਿ ਵੁਤ੍ਤਂ, ਤੇਨਾਹ-‘ਗੋਤ੍ਤਂ ਵਂਸੋ’ਤਿ. ਤਸ੍ਸਾਤਿ ਗੋਤ੍ਤਸ੍ਸ, ਤਸ੍ਸਾਦਯੋ ਗੋਤ੍ਤਾਦਯੋਤਿ ਸੇਸੋ. ਕੇਤੇ ਗੋਤ੍ਤਾਦਯੋਚ੍ਚਾਹ- ‘ਸਞ੍ਞਾਕਾਰਿਨੋ’ਚ੍ਚਾਦਿ. ਵਚ੍ਛਾਦਯੋ ਨਤ੍ਤਾਦਿਨੋ ਅਪਚ੍ਚਸ੍ਸ ਅਪਚ੍ਚਂ ਤਦਪਚ੍ਚਾਦਿ ਚਾਤਿ ਦਸ੍ਸੇਤੁਮਾਹ-‘ਨਤ੍ਤਾਦਿਨੋ’ਚ੍ਚਾਦਿ.