੧੧੦. ਧਾਸਂ

ਸਙ੍ਖ੍ਯਾਵਾਚਿਨੋ ਸਦ੍ਦਾ ਸਙ੍ਖ੍ਯਾਸਦ੍ਦੇਨ ਗਹਿਤਾਤਿ ਆਹ- ‘ਅਤ੍ਥੇ’ਚ੍ਚਾਦਿ. ਪਕਾਰੋ ਦਬ੍ਬਗੁਣਧਿਸਯੋਪਿ ਅਤ੍ਥਿ, ਤਤ੍ਥ ਯਦਿ ਸੋਪਿ ਗਯ੍ਹੇਯ੍ਯ ਦਬ੍ਬ ਗੁਣਾਨਂ ਲਿਙ੍ਗਸਙ੍ਖ੍ਯਾਹਿ ਯੋਗਾ ਧਾਪ੍ਪਚ੍ਚਯਨ੍ਤ(ਮ੍ਪਿ ਤਬ੍ਬਿਸਯੋਯੇਵੇਤਿ) [ਚੇਤ੍ਥ (ਪੋਤ੍ਥਕੇ] (ਪਕਾਰਵਾਚਕਲਿਙ੍ਗਸਙ੍ਖ੍ਯਾਹਿ ਯੋਗਾ) ਅਲਿਙ੍ਗਮਸਙ੍ਖ੍ਯਞ੍ਚ [ਧਾਪ੍ਪਚ੍ਚਯਨ੍ਤਮਲਿਙ੍ਗਮਸਙ੍ਖ੍ਯਞ੍ਚ-ਇਤਿ ਕਾਸਿਕਾਵੁਤ੍ਤਿਪਞ੍ਜਕਾਯਂ] ਨ ਸਿਯਾ, ਏਵਞ੍ਚ ਸਤ੍ਯਬ੍ਯਯਤ੍ਤਮਭਿਮਤਨ੍ਤਸ੍ਸ ਨ ਸਿਯਾ, ਤਞ੍ਚਿਟ੍ਠਂ, ਕਿਰਿਯਾਵਿਸਯੇ ਤੁ ਤਸ੍ਮਿਂ ਗਯ੍ਹਮਾਨੇ ਏਕਧਾਭੁਞ੍ਜਤਿ ਦ੍ਵਿਧਾਭੁਞ੍ਜਤਿ ਦ੍ਵਿਧਾਗਚ੍ਛਤਿਚ੍ਚਾਦੋ ਭੋਜਨ ਗਮਨਾਦਿਕਿਰਿਯਾਯ ਸਬ੍ਬਥਾ ਲਿਙ੍ਗਸਙ੍ਖ੍ਯਾਹਿ ਯੋਗਾਭਾਵਾ ਯਥਾਵੁਤ੍ਤ ਦੋਸੋ ਨ ਸਿਯਾਤਿ ਪਾਣਿਨੀਯਵੁਤ੍ਤਿਕਾਰੇਨ ਜਯਾਦਿਚ੍ਚੇਨ ਕਿਰਿਯਾ ਵਿਸਯੋਯੇਵੇਤ੍ਥ ਪਕਾਰੋ ਗਹਿਤੋ. ਤਮ੍ਪਤਿ ਆਹ- ‘ਦਬ੍ਬੇ’ਚ੍ਚਾਦਿ. ਕਸ੍ਮਾ ਪਨੇਵਮਾਹਾਤਿ ਆਹ- ‘ਨਵਧਾਦਬ੍ਬ’ਮਿਚ੍ਚਾਦਿ. ‘‘ਨਵਧਾ ਦਬ੍ਬਂ, ਬਹੁਧਾ ਗੁਣੋ’’ਤਿ ਵੇਸੇਸਿਕਾਨਂ ਸਙ੍ਕੇਤੋ.

ਤਤ੍ਥ ਪੁਥਬ੍ਯਾਪੋਤੇਜੋਵਾਯ੍ਵਾਕਾਸਕਾਲਦਿਸਾਤ੍ਤਮਨਾਨੀਤਿ ਨਵ ਦਬ੍ਬਾਨਿ. ਰੂਪ ਰਸ ਗਨ੍ਧ ਫਸ੍ਸ ਸਙ੍ਖ੍ਯਾਪਰਿਮਾਣ ਪੁਥੁਤ੍ਤਸਂਯੋਗਵਿਭਾਗ ਪਰਤ੍ਤਾਪਰਤ੍ਤਬੁਦ੍ਧਿਸੁਖਦੁਕ੍ਖੇਚ੍ਛਾਦੋਸਪਯਤਨਾ ਚ ਗੁਣਾ, ਚਸਦ੍ਦੇਨ ਗੁਰੁਤ੍ਤ ਦਵਤ੍ਤਸਿਨੇਹਸਙ੍ਖਾਰਧਮ੍ਮਾਧਮ੍ਮਸਦ੍ਦਾ ਚੇਤਿ ਚਤੁਬ੍ਬੀਸਤਿ ਬਹੁਧਾ ਗੁਣੋ. ਅਤ੍ਰਾਪਿ ਯਥਾਵੁਤ੍ਤਕਾਸਿਕਾਵੁਤ੍ਤਿਯਾ ਪਞ੍ਚਿਕਾਕਾਰੇਨ ਜਿਨਿਨ੍ਦਬੁਦ੍ਧਿਨਾ ਨਵਧਾ ਦਬ੍ਬਂ ਬਹੁਧਾ ਗੁਣੋਤ੍ਯਤ੍ਰਾਪਿ ‘‘ਕਿਰਿਯਾਜ੍ਝਾਹਰਿਤਬ੍ਬਾ ਨਵਧਾ ਦਬ੍ਬਂ ਬਹੁਧਾ ਗੁਣੋ ਉਪਦਿਸੀਯਤਿ ਵਿਞ੍ਞਾਯਤਿ ਬ੍ਯਾਖ੍ਯਾਯਤੇ ਵਿਜ੍ਜਤੇਵਾ’’ਤਿ ਕਿਰਿਯਾਵਿਸਯੋਯੇਵ ਪਕਾਰੋ ਪਟਿਪਾਦਿਤੋ, ਪਯੋਗਦਸ੍ਸਨਤੋ ਬ੍ਯਵਚ੍ਛੇਜ੍ਜਭਾਵਾ ਸਬ੍ਬਤ੍ਥ ਕਿਰਿਯੇਵੇਤਿ ਵਿਸੇਸਨੋਪਾਦਾਨਮਯੁਤ੍ਤਨ੍ਤਿ ਸਮ੍ਬਨ੍ਧੋ.

ਨਵਧਾ ਦਬ੍ਬਂ ਬਹੁਧਾ ਗੁਣੋਤਿ ਪਯੋਗਦਸ੍ਸਨਤੋ ਦਬ੍ਬਗੁਣਵਿਸਯਾਨਮ੍ਪਕਾਰਾਨਂ ਗਯ੍ਹੁਪਗਤ੍ਤਾ ਬ੍ਯਵਚ੍ਛੇਦਯਿਤਬ੍ਬਾਨਂ ਦਬ੍ਬਗੁਣਵਿਸਯਾਨਮ੍ਪਕਾਰਾਨਂ ਭਾਵਾ ਸਬ੍ਬਸ੍ਮਿਂ ਦਬ੍ਬਗੁਣਵਿਸਯੇ ਜਿਨਿਨ੍ਦਬੁਦ੍ਧਿਨਾ ਵੁਤ੍ਤਨਯੇਨ ਕਿਰਿਯਾ ਅਤ੍ਥੇਵਾਤਿ ਕਿਰਿਯਾਵਿਸਯੋਵ ਪਕਾਰੋ ਗਯ੍ਹਤੀਤਿ ਵੁਤ੍ਤਿਕਾਰ ਪਞ੍ਜਿਕਾਕਾਰਾਨਂ ਵਿਸੇਸਨੋਪਾਦਾਨਮਯੁਤ੍ਤਨ੍ਤਿ ਅਤ੍ਥੋ.

ਤਤੋਯੇਵਾਤਿ ਯਤੋ ਵਿਸੇਸਨੋਪਾਦਾਨਮਯੁਤ੍ਤਂ ਤਤੋਯੇਵ ਦ੍ਵੀਹਿਚ੍ਚਾਦਿਕਮਾਹੇਤਿ ਅਤ੍ਥੋ. ਅਯਮੇਤ੍ਥਾਧਿਪ੍ਪਾਯੋ ‘‘ਦ੍ਵਿਧਾ ਕਰੋਤੀਤਿ ਕਿਰਿਯਾਪਯੋਗੇਪਿ ਪਕਾਰੋ ਦਬ੍ਬਗੁਣਵਿਸਯੋ… ਦਬ੍ਬਵਿਸਯਸ੍ਸ ਗੁਣਵਿਸਯਸ੍ਸ ਵਾ ਦ੍ਵਿਧਾਭਾਵਸ੍ਸ ਕਰੀਯਮਾਨਤ੍ਤਾ, ਨਤੁ ਕਿਰਿਯਾਵਿਸਯੋ… ਦ੍ਵਿਧਾਭਾਵਸ੍ਸ ਕਰਣਕਿਰਿਯਾਵਿਸਯਸ੍ਸੇਤ੍ਥ ਵਤ੍ਤੁਮਨਿਚ੍ਛਿਤਤ੍ਤਾ. ਤਤੋਯੇਵ ਕਿਰਿਯਾਪਕਾਰੋਪਾਦਾਨੇ [ਪਕਾਰੋਤਿਸਯਨੇ (ਪੋਤ੍ਥਕੇ)] ਅਤ੍ਰ ਧਾਪ੍ਪਚ੍ਚਯਨ੍ਤਪ੍ਪਯੋਗੋ ਨ ਸਿਯਾਤਿ ਵਿਞ੍ਞਾਪੇਤੁਂ ‘ਦ੍ਵੀਹਿ’ਚ੍ਚਾਦਿਕਮਾਹੇ’’ਤਿ ਤੇਨਾਹ‘ਅਤ੍ਰੇ’ਚ੍ਚਾਦਿ.

ਦਬ੍ਬਗੁਣਵਿਸਯੇ ਪਕਾਰੇ ਗਯ੍ਹਮਾਨੇ ਯੋਯਂ ਦੋਸੋ ਸਮ੍ਭਾਵਿਤੋ ਪਰੇਹਿ, ਤਂ ਦਾਨਿ ਨਿਰਾਕਤ੍ਤੁਮਾਹ ‘ਸਤਿਪਿਚੇ’ਚ੍ਚਾਦਿ. ਸਭਾਵਤੋ ਅਲਿਙ੍ਗਮਸਙ੍ਖ੍ਯਞ੍ਚਾਤਿ ਸਮ੍ਬਨ੍ਧੋ, ਸਙ੍ਖ੍ਯਨ੍ਤਰਾਪਾਦਨੇ ਗਮ੍ਯਮਾਨੇ ਧਾਪ੍ਪਚ੍ਚਯੋ ਵਿਹਿਤੋ ਪਾਣਿਨਿਯੇਹਿ, ਤਦਾਹ- ‘ਦਬ੍ਬਸ੍ਸੇ’ਚ੍ਚਾਦਿ ਸਙ੍ਖ੍ਯਾਨ੍ਤਰਾਪਾਦਨੇਪੀਤਿ ਪੁਬ੍ਬਂ ਯਾ ਵਵਤ੍ਥਿਤਾ ਸਙ੍ਖ੍ਯਾ, ਤਤੋ- ਞ੍ਞਂ ਸਙ੍ਖ੍ਯਾਨ੍ਤਰਂ ਤਸ੍ਸਾਪਾਦਨਂ ਕਰਣਂ ਸਙ੍ਖ੍ਯਨ੍ਤਰਾਪਾਦਨਂ, ਤਸ੍ਮਿਮ੍ਪੀਤਿ ਅਤ੍ਥੋ.