੧੯. ਚਤ੍ਥੇ

ਸਮੁਚ੍ਚੀਤਿ ਪਿਣ੍ਡੀਕਰਣਂ, ਕੋ ਸੋਤਿ ਆਹ- ‘ਸਾਧਨਮੇਕ’ਮਿਚ੍ਚਾਦਿ. ਏਕਂ ਸਾਧਨਂ ਏਕਂ ਕਿਰਿਯਂ ਵਾ ਪਟਿਚ੍ਚ ਚੀਯਮਾਨਤਾਤਿ ਸਮ੍ਬਨ੍ਧੋ, ਕੇਸਨ੍ਤਿ ਆਹ- ‘ਕਿਰਿਯਾਸਾਧਨਾਨ’ਨ੍ਤਿ, ਕੇਨਾਤਿ ਆਹ- ‘ਅਤ੍ਤਰੂਪਭੇਦੇਨਾ’’ਤਿ. ਤਤ੍ਥ ਦੇਵਦਤ੍ਤੋ ਭੁਞ੍ਜਤਿ ਤਿਟ੍ਠਤਿ ਪਚਤਿਚਾਤਿ ਸਾਧਨਮ੍ਪਟਿਚ੍ਚ ਕਿਰਿਯਾਨਂ ਅਤ੍ਤਰੂਪਭੇਦੇਨ ਚੀਯਮਾਨਤਾ ਵੇਦਿਤਬ੍ਬਾ, ਧਵੇ ਚ ਖਦਿਰੇ ਚ ਪਲਾਸੇ ਚ ਛਿਨ੍ਦਾਤਿ ਕਿਰਿਯਮ੍ਪਟਿਚ੍ਚ ਅਤ੍ਤਰੂਪਭੇਦੇਨ ਸਾਧਨਾਨਂ ਚੀਯਮਾਨਤਾ ਵੇਦਿਤਬ੍ਬਾ.

ਸੋਤਿ ਸਮੁਚ੍ਚਯੋ ਭਵਤੀਤਿ ਸੇਸੋ, ਕੇਸਨ੍ਤਿ ਆਹ- ‘ਤੁਲ੍ਯ ਬਲਾਨ’ਮਿਚ੍ਚਾਦਿ.

ਤੁਲ੍ਯਬਲਾਨਨ੍ਤਿ ਇਮਿਨਾ ਵਿਸੁਂ ਪਧਾਨਭਾਵੇਨ ਕਿਰਿਯਾਭਿਸਮ੍ਬਨ੍ਧਾ ਅਞ੍ਞਮਞ੍ਞਾਨਪੇਕ੍ਖਤ੍ਤਮਾਹ.

ਅਨਿਯਤਕ੍ਕਮਯੋਗਪਜ੍ਜਾਨਨ੍ਤਿ ਕਮੋ ਚ ਯੋਗਪਜ੍ਜਞ੍ਚ, ਅਨਿਯਤਂ ਕਮਯੋਗਪਜ੍ਜਂ ਯੇਸਂ ਸਦ੍ਦਾਨਂ ਤੇਸਂ, ਯਥੇਤ੍ਯਾਦਿਨਾ ਤਤ੍ਥੋਦਾਹਰਣਂ ਦਸ੍ਸੇਤਿ, ਏਤ੍ਥਾਯਮਧਿਪ੍ਪਾਯੋ ‘‘ਏਤ੍ਥ ਗਵਾਦੀਨਂ ਵਿਸੁਂ ਪਧਾਨਭਾਵੇਨਾਨਯਨਕਿਰਿਯਾਭਿਸਮ੍ਬਨ੍ਧਾ ਤੁਲ੍ਯਬਲਤਾ ਗਵਾਦੀਨਂ ਵੁਤ੍ਤਕ੍ਕਮੇਨੇਵ ਨਯਨਾਭਾਵਾ ਅਨਿਯਤਕ੍ਕਮਤਾ ਗਵਾਦੀਨਂ ਯੁਗਪਦਿ ਨਯਨਾਭਾਵਾ ਅਨਿਯਤ ਯੋਗਪਜ੍ਜਤਾ ਚ ਹੋਤਿ, ਤਥਾ ਅਞ੍ਞਂ ਤਾਦਿਸਮ੍ਪੀ’’ਤਿ. ਅਨੁ ਪਚ੍ਛਾ ਪਧਾਨਾਨੁਰੋਧੇਨ (ਚਯਨਂ) ਅਨ੍ਵਾਚਯੋ, ਤਂ ਬ੍ਯਞ੍ਜਯਤਿ ‘ਯਤ੍ਥੇ’ਚ੍ਚਾਦਿ, ਤਦਨੁਰੋਧੇਨਾਤਿ ਤਦਨੁਗੁਣੇਨ, ਉਦਾਹਰਤਿ ‘ਯਥੇ’ਚ੍ਚਾਦਿ, ਭਿਕ੍ਖਾਗਮਨਮੇਤ੍ਥ ਪਧਾਨਮਨ੍ਤਰਙ੍ਗਤ੍ਤਾ, ਨੇਤਰਂ ਬਹਿਰਙ੍ਗਤ੍ਤਾ, ਤਂ ਕਰਣੇ ਯਦਿ ਗਾਵੋਪਿ ਪਸ੍ਸਤਿ ਤਾਪ੍ਯਾਨਯਤਿ, ਏਤ੍ਥ ਤੁ ਗੋਸ੍ਸਾਨਯਨਂ ਭਿਕ੍ਖਾਟਨਮਪੇਕ੍ਖਤੇ, ਨੇਤਰਮਿਤਰਸ੍ਸ… ਵਿਨਾਪਿ ਤੇਨ ਤਦਨੁਟ੍ਠਾਨਤੋ. ਇਤਰਸ੍ਸ ਇਤਰੇਨ ਯੋ ਗੋ ਇਤਰੇਤਰਯੋਗੋ, ਸੋ ਚ ਏਤਾਦਿਸੋਤਿ ਆਹ- ‘ਅਞ੍ਞਮਞ੍ਞੇ’ਚ੍ਚਾਦਿ.

ਅਵਯਵਪ੍ਪਧਾਨੋ ਚਾਤਿ ਸਾਭਾਵਿਕਾਭਿਧਾਨਸਾਮਤ੍ਥਿਯੇਨਾਪੁਥੁਭੂਤੋ ਚ, ਵੁਤ੍ਤਿਵਯੇਨ ਸਾਰਿਪੁਤ੍ਤਸਦ੍ਦੋ ਮੋਗ੍ਗਲ੍ਲਾਨਤ੍ਥੋ ਹੋਤਿ ਮੋਗ੍ਗਲ੍ਲਾਨਸਦ੍ਦੋ ਸਾਰਿਪੁਤ੍ਤਤ੍ਥੋਪੀਤਿ ਅਞ੍ਞਮਞ੍ਞਤ੍ਥੇ ਪਧਾਨਤੋ ਯੁਗਪਦ੍ਯਧਿਕਰਣਵਚਨੇ ਸਤਿ ਚਤ੍ਥ ਸਮਾਸੋਤਿ ਸੋ-ਯਮਧਿਕਰਣ ਸਮੁਦਾਯੋ ਉਭਯਪਦਾਨੁਗਤਉਭਯਤ੍ਥਵਸੇਨ ਚਤੁਬ੍ਬਿਧੋਪਿ ਯੁਗਪਦਿ ਬੁਦ੍ਧਿਯਾ ਗਯ੍ਹਮਾਨੋ ਕਦਾਚਿ ਉਬ੍ਭੂਤਾਵਯਵਭੇਦੋ ਤੇਨੇਵ ਸਾਭਾਵਿਕਾਭਿਧਾਨਸਾਮਤ੍ਥਿਯੇਨੇਚ੍ਚੇਵਮਵਯਵਪ੍ਪਧਾਨੋ ਚ, ਨਨੁ ਚ ਜਨਨਮਰਣਾਨੀਤਿ ਵਿਰੁਦ੍ਧਾਨਂ ਕਥਮੇਕੇਨਾਭਿਧਾਨਨ੍ਤਿ ਵੁਚ੍ਚਤੇ- ਸਬ੍ਬੋਪਿ ਸਦ੍ਦੋ ਪਯੁਜ੍ਜਮਾਨੋ (ਇਤਰੀ) ਤਰੇਨਾਵਧਾਰਣਂ ਵਤ੍ਤਤੇ, ਤੇਨ ਏਕੇਕੋ ਸਦ੍ਦੋ ਏਕੇਕਸ੍ਸਤ੍ਥਸ੍ਸ ਵਾਚਕੋ, ਤਥਾਪਿ ਯਥਾ ਸਾਰਿਪੁਤ੍ਤਮੋਗ੍ਗਲ੍ਲਾਨਾਤਿ ਏਤ੍ਥ ਬਹੁਵਚਨਸ੍ਸਞ੍ਞਥਾਨੁਪਪਤ੍ਤਿਯਾ ਯੁਗਪਦ੍ਯਧਿਕਰਣਵਚਨਤਾ ਹੋਤੀ, ਤਥਾਤ੍ਰਾਪਿ ਬਹੁਵਚਨਸ੍ਸਞ੍ਞਥਾਨੁਪਪਤ੍ਤਿਲਕ੍ਖਣੇਨ ਸਾਮਤ੍ਥਿਯੇਨ ਏਕੇਨਾਪ੍ਯਭਿਧਾਨਂ ਹੋਤਿ. ਇਤਿ ਹੇਤੁਮ੍ਹਿ, ਯਤੋ ਏਵਮਵਯਵਪ੍ਪਧਾਨੋ ਤਤੋਤਿ ਅਤ੍ਥੋ.

ਬਹੁਤ੍ਤਾਤਿ ਕਿਞ੍ਚਾਪਿ ਵਾਕ੍ਯੇ ਨੇਸਂ [ਵਾਕ੍ਯੇਨੇਵੇਸਂ (ਪੋਤ੍ਥਕੇ)] ਵਿਸੁਂ ਬਹ੍ਵਤ੍ਥਤਾ, ਨ ਹਿ ਸਾਰਿਪੁਤ੍ਤਮਾਨਯਾਤਿ ਵੁਤ੍ਤੇ ਮੋਗ੍ਗਲ੍ਲਾਨਸ੍ਸਾਪਿ ਸਮ੍ਪਚ੍ਚਯੋ ਭਵਤਿ, ਤਥਾਪਿ ਯਤੋ ਵੁਤ੍ਤਿਵਿਸਯੇ ਸਹਭੂਤਾਨਮੇਵੇਸਂ ਵਿਸੁਂ ਬਹ੍ਵਤ੍ਥਤਾ, ਤਤੋ ਤਤ੍ਥ ਵਚਨੀਯਸ੍ਸ ਅਤ੍ਥਸ੍ਸ ਸਙ੍ਖ੍ਯਾਤੇਦੇਨ ਬਹੁਤ੍ਤਂ. ਸਮਾਹਰਣਂ ਪਿਣ੍ਡੀਕਰਣਵਸੇਨ ਸਂਹਰਣਂ ਸਮਾਹਾਰੋ, ਸੋ ਚੇਵਂ ਵੇਦਿਤਬ੍ਬੋਤਿ ਦਸ੍ਸੇਤੁਮਾਹ ‘ਅਞ੍ਞਮਞ੍ਞੇ’ਚ੍ਚਾਦਿ.

ਏਤ੍ਥ ਚ ਕਿਞ੍ਚਾਪਿ ਇਤਰੀਤਰਯੋਗਸ੍ਸ ਸਮਾਹਾਰਸ੍ਸ ਚ ਭਾਵਰੂਪਤ੍ਤਾ ਅਦਬ੍ਬਰੂਪਤਾ, ਤਥਾਪੀਤਰੀਤਰਯੋਗੇ ਤੁ ਯਥਾ ਗੁਣਵਚ ਨਾਨਂ ਸੁਕ੍ਕਂ ਵਤ੍ਥਂ ਸੁਕ੍ਕੋ ਕਮ੍ਬਲੋ ਸੁਕ੍ਕਾ ਗਾਵੀਤਿ ਨਿਸ੍ਸਯਭੇਦਤੋ ਲਿਙ੍ਗਵਚਨਸਿਦ੍ਧਿ, ਤਥਾ ਤਦ੍ਧਮ੍ਮਾਨਮਭਿਧਾਨਤੋ ਨਿਸ੍ਸਯਤੋ ਲਿਙ੍ਗਵਚਨ ਸਿਦ੍ਧਿ ਵੇਦਿਤਬ੍ਬਾ, ਸਂਹਤਿਪ੍ਪਧਾਨਤ੍ਤਾਚੇਕਵਚਨਨ੍ਤਿ ਯਦਾ ਬਹੁਨ੍ਨਂ ਸਮੁਦਾਯੋ ਤਿਰੋਹਿਤਾਵਯਵਭੇਦੋ ਸਂਘਾਤੋ ਪਕ੍ਕਮੀਯਤੇ, ਤਦਾ ਸਮਾਹਾਰੋਚ੍ਚੇਵ ਸਂਹਤਿਪ੍ਪਧਾਨਤ੍ਤਾ ਏਕਵਚਨਂ ਹੋਤੀਤਿ ਅਤ੍ਥੋ. ਤਦਨੁਟ੍ਠਾਨਤੋਤਿ ਤਸ੍ਸ ਕਰਣਤੋ. ਬ੍ਯਤਿਕਰੋ ਮਿਸ੍ਸਤਾ, ਬ੍ਯਤਿਕਰਂ ਦਸ੍ਸੇਤਿ ਪਾਣਿਚ੍ਚਾਦਿਨਾ, ਪਚ੍ਚੇਕਂ ਪਰਿਸਮਤ੍ਤਿਯਂ ਵਾਕ੍ਯਬਹੁਤ੍ਤਂ ਦਸ੍ਸੇਤਿ ‘ਤਤ੍ਥ ਹਿਚ੍ਚਾਦਿ.

ਚਕ੍ਖੁਞ੍ਚ ਸੋਤਞ੍ਚ, ਮੁਖਞ੍ਚ ਨਾਸਿਕਾ ਚ, ਹਨੁ ਚ ਗੀਵਾ ਚ, ਛਵਿ ਚ ਮਂਸਞ੍ਚ ਲੋਹਿਤਞ੍ਚ, ਨਾਮਞ੍ਚ ਰੂਪਞ੍ਚ, ਜਰਾ ਚ ਮਰਣਞ੍ਚਾਤਿ ਵਿਗ੍ਗਯ੍ਹ ਸਮਾਸੋ, ‘‘ਸਮਾਹਾਰੇ ਨਪੁਂਸਕ’’ਨ੍ਤਿ (੩-੨੦) ਸਬ੍ਬਤ੍ਥ ਨਪੁਂਸਕਲਿਙ੍ਗਂ, ਸ੍ਯਾਦਿਮ੍ਹਿ ਮੁਖ ਨਾਸਿਕਨ੍ਤਿਆਦੀਸੁ ‘‘ਸ੍ਯਾਦੀਸੁ ਰਸ੍ਸੋ’’ਤਿ (੩-੨੩) ਰਸ੍ਸੋ. ਅਲਭਤਾ ਗੋਮੁਖਂ ਡਿਣ੍ਡਿਮੋ ਭੇਰਿਵਿਸੇਸਾ, ਆਲ਼ਮ੍ਬਰਂ ਪਣਵੋ, ਮੁਰਜੋ ਮੁਦਙ੍ਗੋ, ਮਦ੍ਦਵੋ ਮੁਦਙ੍ਗੋ. ਮਦ੍ਦਵਵਾਦਨਂ ਪਣਵਵਾਦਨਞ੍ਚ ਸਿਪ੍ਪਮਸ੍ਸ ਮਦ੍ਦਵਿਕੋ ਪਾਣਵਿਕੋ, ਸਮ੍ਮਂ ਕਂਸਤਾਲ਼ਂ, ਤਾਲ਼ਂ ਹਤ੍ਥਤਾਲ਼ਂ, ਅਲਸਤਾ ਚ ਆਲ਼ਮ੍ਬਰੋ ਚ, ਮੁਰਜੋ ਚ, ਗੋਮੁਖੋ ਚ, ਸਙ੍ਖੋ ਚ ਡਿਣ੍ਡਿਮੋ ਚ, ਮਦ੍ਦਵਿਕੋ ਚ, ਪਾਣਵਿਕੋ ਚ, ਗੀਤਞ੍ਚ ਵਾਦਿਤਞ੍ਚ, ਸਮ੍ਮਞ੍ਚ ਤਾਲ਼ਞ੍ਚਾਤਿ ਵਿਗ੍ਗਹੋ. ਯੁਗਸ੍ਸ ਹਿਤਾ ਯੋਗ੍ਗਾ ਗੋਣਾ, ਤੇਸਮਿਦਂ ਯੋਗ੍ਗਂ ਕਸਿਕਮ੍ਮਂ, ਤਸ੍ਸ ਅਙ੍ਗਂ. ਤੇਨਾਹ- ‘ਕਸਿਭਣ੍ਡਾਨ’ਨ੍ਤਿ, ਫਾਲੋਕਸਕੋ, ਪਾਚਨਂ ਪਤੋਦੋ, ਯੁਗੋ ਚ ਨਙ੍ਗਲਞ੍ਚਾਤਿ ਵਿਗ੍ਗਹੋ. ਪਿਣ੍ਡਮਾਯੁਧਵਿਸੇਸੋ, ਅਸਿ ਚ ਸਤ੍ਤਿ ਚ ਤੋਮਰਞ੍ਚ ਪਿਣ੍ਡਞ੍ਚਾਤਿ ਵਿਗ੍ਗਹੋ. ਚਮ੍ਮਂ ਸਰਵਾਰਣਫਲਕਂ, ਕਲਾਪੋ ਤੂਣੀਰਂ, ਪਹਰਣਞ੍ਚ ਆਵਰਣਞ੍ਚਾਤਿ ਵਿਗ੍ਗਹੋ. ਅਹਿ ਚ ਨਕੁਲੋ ਚ, ਬੀਲ਼ਾਰੋ ਚ ਮੂਸਿਕੋ ਚ, ਕਾਕੋ ਚ ਉਲੂਕੋ ਚ, ਨਾਗੋ ਚ ਸੁਪਣ੍ਣੋਚਾਤਿ ਵਿਗ੍ਗਹੋ. ਸਙ੍ਖ੍ਯਾ ਚ ਪਰਿਮਾਣਞ੍ਚ ਸਙ੍ਖ੍ਯਾਪਰਿਮਾਣਂ, ਤਤ੍ਥ ਪਰਿਮਾਣਸਞ੍ਞਾਨਂ ਯਥਾਦੀਘੋ ਚ ਮਜ੍ਝਿਮੋ ਚ ਦੀਘਮਜ੍ਝਿਮਂ. ਏਕਕਞ੍ਚ ਦੁਕਞ੍ਚਾਤਿ ਵਿਗ੍ਗਹੋ, ਦੁਕਤਿਕਾਦੀਸੁਪਿ ਏਸੇਵਨਯੋ.

ਖੁਦ੍ਦਜਨ੍ਤੁ ਸਿਯਾ- ਨਟ੍ਠਿ, ਅਥਵਾ ਖੁਦ੍ਦਕੋਵ ਯੋ;

ਸਤਂ ਵਾ ਪਸਤੇ ਯੇਸਂ, ਕੇਚਿ ਆਨਕੁਲਾ ਅਪਿ.

ਕੀਟੋ ਚ ਪਤਙ੍ਗੋ ਚ, ਕੁਨ੍ਥੋ ਚ ਕਿਪਿਲ੍ਲਿਕੋ ਚ, ਡਂਸੋ ਚ ਮਕਸੋ ਚ, ਮਕ੍ਖਿਕਾ ਚ ਕਿਪਿਲ੍ਲਿਕਾਚਾਤਿ ਵਿਗ੍ਗਹੋ. ਪਚਨਚਣ੍ਡਾਲਾਤਿ ਓ ਰਬ੍ਭਿਕਾਦੀਨਂ ਰੁਲ਼੍ਹੀਸਞ੍ਞਾ. ਉਰਬ੍ਭੇ ਹਨ੍ਤ੍ਵਾ ਜੀਵਤੀਤਿ ਓਰਬ੍ਭਿਕੋ, ਏਵਂ ਸੇਸੇਸੁ. ਸਾਨਂ ਸੁਨਖਂ ਪਚਤੀਤਿ ਸਪਾਕੋ, ਵੇਨਾ ਤਚ੍ਛਕਾ, ਰਥਕਾਰਾ ਚਮ੍ਮਕਾਰਾ. ਸਾਧਾਰਣਾ ਸਮਾਨਾ, ਚਰਣਸਦ੍ਦੋ- ਯਂ ਇਧ ਗਯ੍ਹਤੀਤਿ ਸਮ੍ਬਨ੍ਧੋ, ਯਥਾ ਸਕਮਜ੍ਝਯਨਾਯ ਚਰੀਯਨ੍ਤਿ ਵਤਾਨ੍ਯੇਤੇਸੂਤਿ ਚਰਣਾਨਿ, ਕਠਾਦਿਵਾਝਾਨ੍ਯਜ੍ਝਯਨਾਨਿ ਸਾਖਾਸਞ੍ਞਕਾਨਿ. ਯਸ੍ਮਾ ਏਤੇਹਿ ਚਰਤਿ ਅਰਿਯਸਾਵਕੋ ਗਚ੍ਛਤਿ ਅਮਤਂ ਦਿਸਂ, ਤਸ੍ਮਾ ਚਰਣਾਨਿ ਸੀਲਾਦਯੋ ਪਣ੍ਣਰਸ ਧਮ੍ਮਾ. ਤੇਨਾਹ- ‘ਕਠਾਦੀਹੀ’ਤਿਆਦਿ, ਕਠਾਦੀਹੀਤਿ ਪਸਿਦ੍ਧਿਵਸੇਨ ਕਮਾਤਿਕ੍ਕਮੇਨਾਪਿ ਵੁਤ੍ਤਂ, ਤਤੋ ਆਦਿਸਦ੍ਦੇਨ ਅਤਿਸਾਦਯੋ ਗਯ੍ਹਨ੍ਤਿ. ਅਤਿਸੇਨ ਭਾਰਦ੍ਵਾਜੇਨ ਕਠੇਨ ਵੁਤ੍ਤਂ ਵਿਦਨ੍ਤ੍ਯਧੀਯਨ੍ਤਿ ਵਾਤਿ ‘‘ਅਞ੍ਞਸ੍ਮਿ’’ਤਿ (੪-੧੨੧) ਣੋ, ‘‘ਲੋਪੋ’’ਤਿ (੪-੧੨੩) ਲੋਪੋ ਅਤਿਸਾ ਭਾਰਦ੍ਵਾਜਾ ਕਠਾ. ਕਲਾਪਿਨਾ ਵੁਤ੍ਤਂ ਵਿਦਨ੍ਤ੍ਯਧੀਯਨ੍ਤਿ ਵਾਤਿ, ਤੇਨੇਵ ਣੋ, ਕਲਾਪਾ, ਕਠਾ ਆਦਿ ਯੇਸਂ ਤੇ ਕਠਾਦਯੋ, ਤੇਹਿ ਅਜ੍ਝੇਨਵਿਸੇਸੇ ਚ ਪੁਰਿਸੇ ਚ ਉਪਚਾਰਾਤਿ ਸਮ੍ਬਨ੍ਧੋ.

ਸੀਲਾਦਯੋਤਿਆਦਿਸਦ੍ਦੇਨ ਇਨ੍ਦ੍ਰਿਯਸਂਵਰਾਦਯੋ ਗਯ੍ਹਨ੍ਤਿ. ਸੀਲਞ੍ਚ ਪਞ੍ਞਾਣਞ੍ਚ, ਸਮਥੋ ਚ ਵਿਪਸ੍ਸਨਾ ਚ ਵਿਜ੍ਜਾ ਚ ਚਰਣਞ੍ਚਾਤਿ ਵਿਗ੍ਗਹੋ. ਏਕਤੋ ਅਜ੍ਝਯਨਮੇਤੇਸੂਤਿ ਏਕਜ੍ਝਯਨਾਨਿ, ਪਕਠਾਨਿ ਵਚਨਾਨਿ ਪਾਵਚਨਾਨਿ ਸਦ੍ਧਮ੍ਮੋ, ਏਕਜ੍ਝਯਨਾਨਿ ਚ ਤਾਨਿ ਪਾਵਚਨਾਨਿ ਚ ਤੇਸਂ, ਦੀਘੋ ਚ ਦੀਘਾਗਮੋ ਚ ਮਜ੍ਝਿਮੋ ਚ ਮਜ੍ਝਿਮਾਗਮੋ ਚ, ਏਕੁਤ੍ਤਰੋ ਚ ਅਙ੍ਗੁਤ੍ਤਰਾਗਮੋ ਚ ਸਂਯੁਤ੍ਤਾਗਮੋ ਚ, ਖਨ੍ਧਕੋ ਚ ਵਿਭਙ੍ਗੋਚਾਤਿ ਵਿਗ੍ਗਹੋ.

ਤੇਸਨ੍ਤਿ ਇਮਿਨਾ ਲਿਙ੍ਗਵਿਸੇਸਾਨਨ੍ਤਿ ਛਟ੍ਠਿਯਨ੍ਤਤਂ ਦੀਪੇਤਿ, ਇਤ੍ਥੀ ਚ ਪੁਮਾ ਚ, ਦਾਸੀ ਚ ਦਾਸੋ ਚ, ਚੀਵਰਞ੍ਚ ਪਿਣ੍ਡਪਾਤੋ ਚ ਸੇਨਾਸਨਞ੍ਚ ਗਿਲਾਨਪਚ੍ਚਯੋ ਭੇਸਜ੍ਜਪਰਿਕ੍ਖਾਰੋ ਚ, ਤਿਣਞ੍ਚ ਕਟ੍ਠੋ ਚ ਸਾਖਾ ਚ ਪਲਾਸੋ ਚਾਤਿ ਵਿਗ੍ਗਹੋ. ਛੇਕੋ ਦਕ੍ਖੋ, ਪੁਬ੍ਬਾ ਚ ਪਰਾਚਾਤਿਆਦਿਨਾ ਵਿਗ੍ਗਹੋ.

ਪੁਬ੍ਬਦਕ੍ਖਿਣਨ੍ਤਿਆਦੀਸੁ ‘‘ਬ੍ਯਞ੍ਜਨੇ ਦੀਘਰਸ੍ਸਾ’’ਤਿ (੧-੩੩) ਰਸ੍ਸੋ. ਕਾਸੋ ਚ ਕੁਸੋ ਚ ਉਸਿਰੋ ਚ ਬੀਰਣਞ੍ਚ, ਮੁਞ੍ਜਞ੍ਚ ਬਬ੍ਬਜਞ੍ਚਾਤਿ ਵਿਗ੍ਗਹੋ. ਖਦਿਰੋ ਚ ਪਲਾਸੋਚਾਤਿਆਦਿਨਾ ਚ, ਗਜੋ ਚ ਗਵਜੋ ਚਾਤਿਆਦਿਨਾ ਚ, ਹਤ੍ਥੀ ਚ ਗੋਚ ਅਸ੍ਸੋ ਚ ਵਲ਼ਵਾਚਾਤਿ ਚ, ਹਂਸੋ ਚ ਬਲਾਵਾ ਚਾਤਿਆਦਿਨਾ ਚ, ਬਕੋ ਚ ਬਲਾਕਾਚਾਤਿ ਚ. ਹਿਰਞ੍ਞਞ੍ਚ ਸੁਵਣ੍ਣੋ ਚ, ਮਣਿ ਚ ਸਙ੍ਖੋ ਚ ਮੁਤ੍ਤਾ ਚ ਵੇਲ਼ੁਰਿਯੋ ਚ ਜਾਤਰੂਪਞ੍ਚ ਰਜਤਞ੍ਚਾਤਿ ਚ, ਸਾਲਿ ਚ ਯਵਕੋਚਾਤਿਆਦਿਨਾ ਚ, ਸਾਕਞ੍ਚ ਸੁਵਞ੍ਚਾਤਿਆਦਿਨਾਚ, ਕਾਸਿਯੋ ਚ ਕੋਸਲਾਚਾਤਿਆਦਿਨਾ ਚ ਵਿਗ੍ਗਹੋ, ਜਨਪਦਵਾਚਿਨਾ ਚ ਬਹੁਵਚਨਨ੍ਤਾ.

ਏਕਵੀਸਤਿਚ੍ਚਾਦਿਨੋ ਏਕਞ੍ਚ ਤਂ ਵੀਸਤਿਚਾਤਿ ਵਿਸੇਸਨਸਮਾਸੋ ਵਾ ਸਿਯਾ, ਏਕਞ੍ਚ ਵੀਸਤਿ ਚ ਏਕਵੀਸਤੀਤਿ ਚਤ੍ਥਸਮਾਸੋ ਵਾ, ਸਮਾਹਾਰੇ ਨਪੁਂਸਕਤ੍ਤਨ੍ਤੁ ਨ ਪਪ੍ਪੋਤਿ, ‘‘ਨਾਨੁਸਾਸਨੀਯਂ ਲਿਙ੍ਗਂ ਸੋਕਨਿਸ੍ਸਯਤ੍ਤਾ ਲਿਙ੍ਗਸ੍ਸੇ’’ਤਿ ਲੋਕੇ ਨਪੁਂਸਕਲਿਙ੍ਗਸ੍ਸੇਹਾਨਭਿਧਾਨਤੋ ਨਪੁਂਸਕਲਿਙ੍ਗਂ ਨ ਭਵਿਸ੍ਸਤੀਤ੍ਯਧਿਪ੍ਪਾਯੋ, ਸਭਾਪਰਿਸਾਯਾਤਿ ਞਾਪਕਤੋ ਵਾ ਸਮਾਹਾਰੇ ਨਪੁਂਸਕਲਿਙ੍ਗਮਤ੍ਰ ਬ੍ਯਭਿਚਰਤੀਤਿ ਦਟ੍ਠਬ੍ਬਂ.

ਪੁਬ੍ਬਪ੍ਪਯੋਗੋ-ਭਿਮਤੋਤਿ ਉਪਸਜ੍ਜਨਸਞ੍ਞਕਸ੍ਸ ਸ੍ਯਾਦੀਤਿ ਪਠਮਾਯ ਨਿਦ੍ਦਿਟ੍ਠਸ੍ਸ ਸਮਾਸੇ ਪੁਬ੍ਬਨਿਪਾਤੋ ‘‘ਉਪਸਜ੍ਜਨਂ ਪੁਬ੍ਬ’’ਮਿਚ੍ਚਨੇਨ (੨-੨-੩੧) ਇਟ੍ਠੋ ਕਮਸ੍ਸ ਪਧਾਨਭਾਵੇਨ ਵਤ੍ਤੁਮਿਟ੍ਠਤ੍ਤਾਤਿ ‘‘ਸ੍ਯਾਦਿਸ੍ਯਾਦਿਨੇਕਤ੍ਥ’’ਨ੍ਤਿ (੩-੧) ਏਤ੍ਥ ਸ੍ਯਾਦੀਤਿ ਪਠਮਾਨਿਦ੍ਦਿਟ੍ਠਸ੍ਸਾਸਙ੍ਖ੍ਯਾਦਿਨੋ ਪੁਬ੍ਬਮਵਟ੍ਠਾਨਤੋ ਸ੍ਯਾਦਿਨੇਤਿ ਤਤਿਯਾਨਿਦ੍ਦਿਟ੍ਠਸ੍ਸ ਪਚ੍ਛਾਵਟ੍ਠਾਨਤੋ ‘‘ਸ੍ਯਾਦਿਸ੍ਯਾਦਿਨਾ’’ਤਿ ਸੁਤ੍ਤੇ ਪਟਿਪਾਟਿਯਾ ਪਧਾਨਭਾਵੇਨ ਵਤ੍ਤੁਮਿਟ੍ਠਤ੍ਤਾ.

ਪਰਪ੍ਪਯੋਗੋ-ਭਿਮਤੋਤਿ ਹੇਟ੍ਠਾ ਵੁਤ੍ਤਸੁਤ੍ਤੇਨ ਪੁਬ੍ਬਨਿਪਾਤੇ ਪਤ੍ਤੇ ‘‘ਰਾਜਦਨ੍ਤਾਦੀਸੁ ਪਰ’’ਨ੍ਤੀਮਿਨਾ (੨-੨-੩੦) ਪਰਨਿਪਾਤੋ-ਭਿਮਤੋ, ਵਚਨੇਨਾਤਿ- ‘‘ਬਹੁਲ’’ਨ੍ਤਿ ਵਚਨੇਨ, ਪੁਬ੍ਬਕਾ ਲਯੁਤ੍ਤਸ੍ਸ ਪਰਪ੍ਪਯੋਗੋ-ਭਿਮਤੋਤਿ ਰਾਜਦਨ੍ਤਾਦਿਪਾਠਤੋ ਏਵਾ-ਭਿਮਤੋ.

ਕਮਮ੍ਪਚ੍ਚਨਾਦਰਾਤਿ ਇਮਿਨਾ ਪਧਾਨਭਾਵੇਨਾ-ਕ੍ਕਮਸ੍ਸ ਵਤ੍ਤੁਮਿਟ੍ਠਤ੍ਤਮਾਹ. ਸਰੋ ਆਦਿ ਯਸ੍ਸ ਤਂ ਸਰਾਦਿ, ਸਙ੍ਖੋ ਚ ਦੁਨ੍ਦੁਭਿ ਚ ਵੀਣਾ ਚ, ਉਦੁਕ੍ਖਲਞ੍ਚ ਮੁਸਲੋ ਚ, ਧਨਪਤਿ ਚ ਰਾਮੋ ਚ ਕੇਸਵੋਚਾਤਿ ਵਿਗ੍ਗਹੋ. ਜਂਦਂਸਦ੍ਦਾ ਜਾਯਾਸਦ੍ਦਸਮਾਨਤ੍ਥਾ ਅਸਙ੍ਖ੍ਯਾ-ਜਞ੍ਚ ਪਤਿ ਚ, ਦਞ੍ਚ ਪਤਿਚਾਤਿ ਵਿਗ੍ਗਹੋ, ਅਵਨ੍ਤਯੋ ਚ ਅਸ੍ਸਕਾਚ, ਅਗ੍ਗਿ ਚ ਇਨ੍ਦੋਚਾਤਿ ਵਿਗ੍ਗਹੋ, ਤਂਨਿਵਾਸਿਮ੍ਹਿ ਗਹਿਤੇ ਅਵਨ੍ਤਿ ਚ ਅਸ੍ਸਕੋਚਾਤਿ ਏਕਤ੍ਤੇਨਪਿ ਵਿਗ੍ਗਹੋ ਵਤ੍ਤਤਿ. ਦ੍ਵਨ੍ਦਸਮਾਸੋ- ਯਂ ਦ੍ਵਨ੍ਦਸਦਿਸਤ੍ਤਾ ਦ੍ਵਨ੍ਦੋ, ਦ੍ਵੇ ਚ ਦ੍ਵੇ ਚ ਪਦਾਨਿ ਦ੍ਵਨ੍ਦਾਨੀਤਿ ਹਿ ਉਭਯਤ੍ਥਪ੍ਪਧਾਨੋ- ਯਂ ਦ੍ਵਨ੍ਦਸਦ੍ਦੋ.