੨੧. ਸਙ੍ਖ੍ਯਾ

ਅਥ ‘‘ਸਮਾਹਾਰੇ ਨਪੁਂਸਕ’’ਨ੍ਤਿ (੩-੨੦) ਵਿਜ੍ਜਮਾਨੇ ਕਿਂ ‘‘ਸਙ੍ਖ੍ਯਾਦੀ’’ ਤਿ ਇਮਿਨਾ ਸਤ੍ਥਗਾਰਵਕਰੇਨਾਤਿ ਆਸਙ੍ਕਿਯ ਚੋਦੇਤਿ ‘ਨਨੁਚੇ’ਚ੍ਚਾਦਿ. ਤਥਾਹਿਚ੍ਚਾਦਿਨਾ ‘‘ਸਮਾਹਾਰੇ ਨਪੁਂਸਕ’’ਨ੍ਤੇਵ ਸਿਜ੍ਝਨਂ ਸਮਤ੍ਥੇਤਿ. ਯਥਾਵੁਤ੍ਤਚੋਦਨਾਚਾਲਨੇ ਪਰਾਧਿਪ੍ਪਾਯਂ ਪਰਿਕਪ੍ਪੇਨ੍ਤੋ’ਚਤ੍ਥੇ’ਤਿਆਦਿਮਾਹ.

ਨੇਤਿ ਇਮਿਨਾ ਚਤ੍ਥੇਤਿਆਦਿਨਾ ਕਤਪਰਿਕਪ੍ਪਨਾ ਨ ਸਿਜ੍ਝਤੀਤਿ ਦਸ੍ਸੇਤਿ, ਤਤ੍ਥ ਹੇਤੁਮਾਹ- ‘ਸਮ੍ਬਨ੍ਧਸ੍ਸ ਪੁਰਿਸਾਧੀਨਤ੍ਤਾ’ਤਿ, ਸਤਿਚੇਚ੍ਚਾਦਿਨਾ ‘ਸਮਾਹਾਰੇ ਨਪੁਂਸਕ’ਨ੍ਤੇਤ੍ਥ ਵਿਸੇਸਨਗ੍ਗਹਣੇ ਪਯੋਜਨਂ ਵਤ੍ਵਾ ‘ਸਙ੍ਖ੍ਯਾਦੀ’ਤਿ ਇਮਸ੍ਸ ਨਿਰਤ੍ਥਕਤ੍ਤਮੇਵ ਥਿਰੀਕਰੋਤਿ.

ਪਯੋਜਨੇਤਿ ਲਾਘਵਪ੍ਪਯੋਜਨੇ;

ਸਮ੍ਬਨ੍ਧੀਯਤੀਤਿ ਵਿਸੇਸਨਗ੍ਗਹਣਂ ਸਮ੍ਬਨ੍ਧੀਯਤਿ;

ਏਤ੍ਥਾਤਿ ਏਤਸ੍ਮਿਂ ‘ਸਙ੍ਖ੍ਯਾਦੀ’ਸੁਤ੍ਤੇ;

ਤਨ੍ਨੇਤਿ ਇਮਿਨਾ ਯਥਾਵੁਤ੍ਤਂ ਚੋਦਨਂ ਨਿਵਤ੍ਤੇਤਿ.

‘ਸਙ੍ਖ੍ਯਾਦੀ’ਤਿ ਸੁਤ੍ਤਸ੍ਸ ਸਾਤ੍ਥਕਤ੍ਤਮਾਹ- ‘ਚਤ੍ਥਸਮਾਸਾਨਨ੍ਤਰ’ਮਿਚ੍ਚਾਦਿਨਾ. ਏਕਤ੍ਤਬ੍ਯਪਦੇਸੋ ਕਾਤਬ੍ਬੋਤਿ ‘‘ਸਙ੍ਖ੍ਯਾਪੁਬ੍ਬੋ ਦਿਗੂ’’ਤਿ (੨-੧-੫੨) ਸਙ੍ਖ੍ਯਾਪੁਬ੍ਬਸ੍ਸ ਸਮਾਸਸ੍ਸ ਦਿਗੁਸਞ੍ਞਂ ਵਿਧਾਯ ਤਦਤ੍ਥਸ੍ਸ ‘‘ਦਿਗੁਰੇਕਵਚਨ’’ਨ੍ਤੀਮਿਨਾ (੨-੪-੧) ਏਕਤ੍ਤਬ੍ਯਪਦੇਸੋ ਪਰੇਹਿ ਵਿਯ ਕਾਤਬ੍ਬੋ.

ਸਮਾਹਰਣਂ ਸਮਾਹਾਰੋਤਿ ਇਮਿਨਾ ਭਾਵਸਾਧਨੋ-ਯਂ ਸਮਾਹਾਰਸਦ੍ਦੋ. ਯਦਿ ਸਮਾਹਰੀਯਤੀਤਿ ਸਮਾਹਾਰੋਤਿ ਕਮ੍ਮਸਾਧਨੋ ਸਿਯਾ, ਤਦਾ ਪਞ੍ਚ ਕੁਮਾਰਿਯੋ ਸਮਾਹਟਾਤਿ ਵਾਕ੍ਯਸ੍ਸਾਤ੍ਥੇ ਵੁਤ੍ਤਿ ਸਿਯਾ ਪਞ੍ਚਕੁਮਾਰੀਤ੍ਯੇਤ੍ਥ ਸਕਪਦਤ੍ਥਪ੍ਪਧਾਨਤ੍ਤਾ ਬਹੁਵਚਨਂ ਸਿਯਾ ‘‘ਘਾਪਸ੍ਸਾਨ੍ਤਸ੍ਸਾਪ੍ਪਧਾਨਸ੍ਸਾ’’ਤਿ (੩-੨੪) ਅਪ੍ਪਧਾਨਰਸ੍ਸਤ੍ਤਞ੍ਚ ਨ ਸਿਯਾ… ਸਮਾਹਟਾਨਮੇਵ ਕੁਮਾਰੀਨਂ ਪਧਾਨਤ੍ਤਾ, ਤਸ੍ਮਾ ਪਞ੍ਚ ਗਾਵੋ ਸ ਮਾਹਟਾਤ੍ਯੇਤਸ੍ਮਿਂ ਵਾਕ੍ਯੇ ਸਮਾਸੋਵ ਨਤ੍ਥਿ ਕਮ੍ਮਸਾਧਨਸ੍ਸਾਨੁਪਗਮਤੋ. ਪਞ੍ਚਨ੍ਨਂ ਗੁਨ੍ਨਂ ਸਮਾਹਾਰੋ, ਚਤੁਨ੍ਨਂ ਪਥਾਨਂ ਸਮਾਹਾਰੋਤਿ ਵਾਕ੍ਯੇ ਪਨ ਅਤ੍ਥਿ, ਸਮਾਹਾਰਸ੍ਸੇਕਤ੍ਤਾ ਤੁ ਸਤਂ ਯੂਥਂ ਵਨਨ੍ਤਿ ਏਤ੍ਥ ਵਿਯ ਸਾਭਾਵਿਕਮੇਕਵਚਨਂ ਸਿਦ੍ਧਮੇਵੇਤਿ ਵਿਞ੍ਞਾਪੇਤਿ.