੨੫. ਤਾਦ

ਪਯੋਜਨਪਰਿਯਾਯੇ ਅਤ੍ਥਸਦ੍ਦੇ ਸਤਿ ਇਦਨ੍ਤਿ ਪਯੋਜਨਂ ਪਰਾਮਟ੍ਠੁਂ ਸਕ੍ਕਾਤਿ ‘ਤਸ੍ਸੇਦ’ਨ੍ਤਿਆਦਿ ਵੁਤ੍ਤਂ, ਤਸਦ੍ਦੇਨੇਤ੍ਥ ਵਿਕਤਿਯਾਤਿਸਮ੍ਬਨ੍ਧੋ, ਅਤ੍ਥਸਦ੍ਦੇਨ ਤੁ ਪਕਤਿਯਾ, ਅਤ੍ਥ ਕਥਨਮੇਤਨ੍ਤਿ ਇਮਿਨਾ ਵਚਨਿਚ੍ਛਾਯ ਮੇਤਿਸ੍ਸਂ ਨਤ੍ਥਿ ਸਮਾਸੋਤਿ ਦੀਪੇਤਿ, ਵਿਗ੍ਗਹੇ ਵਾਸ੍ਮਿਮਿਮਸ੍ਮਾਯੇਵ ਨਿਪਾਤਨਾ ਸਮਾਸੋ ਦਟ੍ਠਬ੍ਬੋ,ਸੋ ਵਿਕਤਿਸਙ੍ਖਾਤੋ ਅਤ੍ਥੋ, ਪਕਤਿਤ੍ਵਞ੍ਞਪਦਤ੍ਥੇਨਾਕ੍ਖਿਪੀਯਤੇ, ਤਤੋ ਤਦਤ੍ਥਸਦ੍ਦਤੋ, ਕੋਯਂ ਤਦਤ੍ਥ ਭਾਵੋ ਚ੍ਚਾਹ-‘ਤਦਤ੍ਥਭਾਵੋ ਨਾਮਾ’ਤਿਆਦਿ, ਨਿਮਿਤ੍ਤਂ ਯੂਪਾਦਿਵਿਕਤਿ, ਨਿਮਿਤ੍ਤੀਦਾਰੁਆਦਿਪਕਤਿ ਤਸਦ੍ਦੇਨਾਤ੍ਥਸਦ੍ਦੇਨ ਚ ਗਹਿਤਾ, ਤੇਸਂ ਸਮ੍ਬਨ੍ਧੋ ਤਦਤ੍ਥਸਦ੍ਦਸ੍ਸ ਪਵਤ੍ਤਿਨਿਮਿਤ੍ਤਂ ਤਦਤ੍ਥਭਾਵੋ ਨਾਮਾਤਿ ਅਤ੍ਥੋ, ਹੇਤੁ ਹੇਤੁਮਨ੍ਤਭਾਵਲਕ੍ਖਣੋ ਸਮ੍ਬਨ੍ਧੋ ਨਾਮਾਤਿ ਵੁਤ੍ਤਂ ਹੋਤਿ, ਪਧਾਨਾਵਚ੍ਛੇਦਗੁਣਸ੍ਮਾਤਿ ਵਿਧੀਯਮਾਨਤ੍ਤੇਨ ਪਧਾਨਸ੍ਸ ਪੁਰਿਸਸ੍ਸ ਆਚ੍ਛੇਦਕਾ ਵਿਸੇਸਕਾ ਗੁਣਾ, ਯਞ੍ਹਿ ਵਿਧੀਯਤੇ ਞਾਪੀਯਤੇ ਤਮ੍ਪਧਾਨ, ਮਿਤਰਮਪ੍ਪਧਾਨਮਨੁਵਜ੍ਜਮਾਨਤ੍ਤਾ, ਯਦਾ ਉਪਾਦੀਯਤੇਤਿ ਵਤ੍ਵਾ ਉਪਾਦੀਯਮਾਨਪ੍ਪਕਾਰਂ ਦਿਟ੍ਠਨ੍ਤੇਨ ਫੁਟਯਿਤੁਮਾਹ-‘ਯਥਾ’ਇਚ੍ਚਾਦਿ, ਯੂਪੋ ਨਿਮਿਤ੍ਤਂ ਯਸ੍ਸ ਦਾਰੁਨੋ ਤਂ ਤਥਾ ਵੁਤ੍ਤਂ ਨਾਞ੍ਞਨਿਮਿਤ੍ਤਨ੍ਤਿ ਯਦਾ ਨਿਮਿਤ੍ਯਵਚ੍ਛੇਦਕਤ੍ਤੇਨੁਪਾਦੀਯਤੇ ਤਦਾ ਨਿਮਿਤ੍ਤਸਦ੍ਦਤੋਵ ਚਤੁਤ੍ਥੀ ਸਮ੍ਬਨ੍ਧੋ, ਤਤੋ ਅਞ੍ਞਨਿਮਿਤ੍ਤਤੋ, ਨਿਮਿਤ੍ਤਨਿਮਿਤ੍ਤੀਨਂ ਸਮ੍ਬਨ੍ਧਸ੍ਸ ਅਭਿਮੁਖਭਾਵੇਨ ਤਤ੍ਥੇਵ ਨਿਮਿਤ੍ਤੇ ਪਵਤ੍ਤੀਤਿ ਸਮ੍ਬਨ੍ਧੋ, ਨਿਮਿਤ੍ਤਸਦ੍ਦਤੋ ਹੇਤੁਤਤਿਯਾਪਿ ਨਾਸਙ੍ਕਨੀਯਾਤਿ ਸਮ੍ਬਨ੍ਧੋ, ਕਾਰਣਮਾਹ-‘ਨਿਮਿਤ੍ਤ’ [ਹੇਤੁ] ਇਚ੍ਚਾਦਿ. ਉਭਯਤ੍ਥਾਤਿ ਯੂਪਾਯ ਪਾਕਾਯਾਤਿ ਉਭਯਤ੍ਥ.

ਪਿਣਿਯਮਾਨਾ ਕਿਂ ਸਦ੍ਦਾਦਿਵਚਨੀਯਾ ਪਰੋ ਸਾਦੁਆਦਿਕੋ ਯੋ-ਤ੍ਥੋ ਸੋ ਅਞ੍ਞੋ ਕਤ੍ਤਾ ਯਸ੍ਸ ਸੋ ਅਞ੍ਞਕਤ੍ਤੁਕੋ-ਭਿਲਾਸੋ, ਅਭਿਲਾਸੋ ਰੁਚੀਤਿ ਇਮਿਨਾ ਦਿਤ੍ਯਾਦ੍ਯਨੇਕਤ੍ਥਨ੍ਤੋਪਿ ਰੁਚਿਸਦ੍ਦੋ-ਭਿਲਾਸੇ ਰੁਲ਼੍ਹੋਵ ਗਯ੍ਹਤੀਤਿ ਵਦਤਿ, ਸਾ ਰੁਚਿ ਅਤ੍ਥੋ-ਭਿਧੇਯ੍ਯੋ ਯੇਸਂ ਭੇ ਤਦਤ੍ਥਾ, ਤੇਸਂ ਸਮ੍ਬਨ੍ਧਿਨੋ ਪਿਣਿਯਮਾਨਸ੍ਸ, ਇਮਿਨਾ ਚ ਕਿਞ੍ਚਾਪਿ ਰੁਚਿਰਯਂ ਯਸ੍ਸੁਪ੍ਪਜ੍ਜਤੇਯੋ ਵਾ ਤਸ੍ਸਾ ਜਨਕੋ, ਤੇਸਮੁਭਿਨ੍ਨਮ੍ਪਿ ਅਤ੍ਥਿ, ਤਥਾਪਿ ਯਸ੍ਸੁਪ੍ਪਜ੍ਜਤੇ ਸੋਵ ਤਸ੍ਸਾਧਿਕਰਣਂ, ਅਜਨਕੋਪਿ ਸੋ ਤਾਯ ਸਂਸਤ੍ਤੋਤਿ ਤਸ੍ਸੇਵ ਪਿਣਿਯਮਾਨਸ੍ਸ ਸਮ੍ਪਦਾਨਸਞ੍ਞਾ, ਨਤੁਜਨਕਸ੍ਸ ਤਾਯਾਸਂਸਤ੍ਤਸ੍ਸਾਤਿ ਦੀਪੇਤਿ, ਇਧਾਤਿ ਇਮਿਨਾ ਸਕ੍ਕਤੇ ਉਦਾਹਰਣਾਨਮਸਮਾਨਰੂਪਕਂ ਦਸ੍ਸੇਤਿ, ਇਮਿਨਾ ਚ ਉਦਾਹਰਣਾਨਮਸਮਾਨ ਰੂਪਤ੍ਤਮੇਵ ਚਤੁਤ੍ਥੀਵਿਧਾਨੇ ਕਾਰਣਂ, ਅਞ੍ਞਥਾ ਛਟ੍ਠੀਯੇਵ ਤੇਹਿਪਿ ਵਿਧੀਯੇਯ੍ਯ ਕਾਰਣਾਸਮ੍ਭਵਾ [ਕਾਰਣਸਬ੍ਭਾਵਾ] ਹਿ ਦੀਪੇਤਿ, ਈਦਿਸਸ੍ਸ ਪਚ੍ਚੁਦਾਹਰਣ(ਸ੍ਸ) ਭਾਵੇ ਕਾਰਣਮਾਹ-‘ਅਨਞ੍ਞਕਤ੍ਤੁ ਕਤ੍ਤਾ-ਭਿਲਾਸਸ੍ਸਾ’ਤਿ, ਪਰੇਸਮਿਦਮ੍ਪਚ੍ਚੁਦਾਹਰਣਮ੍ਭਵਤੁ ਇਧ ਕਥਨ੍ਤਿ ਆਹ-‘ਇਹਤ੍ਵਿ’ਚ੍ਚਾਦਿ, ਤ੍ਵਨ੍ਤਿ ਅਤ੍ਤਮਤ੍ਤੇ ਪਠਮਾਯੇਵ, ਸਮ੍ਭਵੇ ਕਾਰਣਨ੍ਤਰਮਾਹ-‘ਅਥਵਾ’ਤਿਆਦਿ, ਨਤ੍ਥਿ ਅਞ੍ਞੋ ਕਤ੍ਤਾ ਯਸ੍ਸਾ ਸਾ ਅਨਞ੍ਞਕਤ੍ਤੁਕਾ ਰੁਚਿ, ਭਾਯ ਰੁਚਿਯਾ ਸਮ੍ਬਨ੍ਧਿਨੋ ਪਿਣਿਯਮਾਨਸ੍ਸ ਸਮ੍ਪਦਾਨਸਞ੍ਞਂ ਯੇ ਪਨ ਇਚ੍ਛਨ੍ਤੀਤਿ ਸਮ੍ਬਨ੍ਧੋ, ਯੇ ਪਨ ਆਹੁ ਚਾਤਿਸਮ੍ਬਨ੍ਧੋ, ਉਪ੍ਪਜ੍ਜਨਮੁਪ੍ਪਤ੍ਤਿ, ਕਸ੍ਸ ਉਪ੍ਪਤ੍ਤਿ, ਰੁਚਿਯਾ, ਉਪ੍ਪਤ੍ਤਿਯਾ ਆਧਾਰੋ ਉਪ੍ਪਤ੍ਯਾਧਾਰੋ‘ਦੇਵਦਤ੍ਤਾਯ ਰੋਚਤੇ’ਚ੍ਚਾਦੋ ਦੇਵਦਤ੍ਤਾਦਿਂ ਉਪਲਕ੍ਖੇਤੀਤਿ ਉਪ੍ਪਤ੍ਯਾਧਾਰੋਪਲਕ੍ਖਣਂ ਵਚਨਂ, ਏਤ੍ਥ ਰੁਚਿਯਾ ਉਪ੍ਪਤ੍ਯਾਧਾਰੋਪਲਕ੍ਖਣਮੇਵ ਵਚਨਨ੍ਤਿ ਸਾਵਧਾਰਣ ਮਤ੍ਥੋ ਦਟ੍ਠਬ੍ਬੋ… ਸਬ੍ਬੇਸਂ ਵਾਕ੍ਯਾਨਮਵਧਾਰਣਫਲਤ੍ਤਾ, ਤੇਨ ਪਿਣਿਯ ਮਾਨਵਚਨਮਭਿਲਾਸਸ੍ਸ ਅਞ੍ਞਕਤ੍ਤੁਕਤਾਸਨ੍ਦਸ੍ਸਨਪਰਂ ਨ ਹੋਤੀਤਿ ਬ੍ਯਵਚ੍ਛਿਨ੍ਨਮ੍ਭਵਤਿ, ਤੇਸਂ ਕਚ੍ਚਾਯਨਸ੍ਸ ਚੇਹਾਪਿ ਪਸਜ੍ਜਤੀਤਿ ਸਮ੍ਬਨ੍ਧੋ, ਇਹਾਪੀਤਿ ਤ੍ਵਮਿਤਿ ਏਤ੍ਥਾਪਿ, ਅਞ੍ਞਥਾਸਿਦ੍ਧਤ੍ਤਾਤਿ ਅਤ੍ਥਮਤ੍ਤੇ ਪਠਮਾਯ ਏਵ ਸਿਦ੍ਧਤ੍ਤਾ, ਵਚਨਸ੍ਸਾਤਿ ਉਭਿਨ੍ਨਮ੍ਪਿ ਚਤੁਤ੍ਥੀਵਿਧਾਨਵਚਨਸ੍ਸ, ਅਤਿਪ੍ਪਸਙ੍ਗੋਚਾਤਿ ‘‘ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’ਤਿਆਦੋ ਤਵਾਤਿ ਅਨਭਿਮਤਟ੍ਠਾਨਪ੍ਪਤ੍ਤਿਚ.

ਧਾਰਿਪ੍ਪਯੋਗੇਤਿ ਧਾਰਿਧਾਤੁਨੋ ਪਯੋਗੇ, ਉਤ੍ਤਮੀਣੋ ਅਧਮੀਣੋਤਿ ਧਨਿਕਗਹੇਤੂਨਂ ਰੁਲ਼੍ਹੀਤ੍ਯਾਹ-‘ਉਤ੍ਤਮੀਣੋ ਧਨਸਾਮੀ’ਤਿ, ਉਤ੍ਤਮੀਣਮਸ੍ਸਾਤਿ ਉਤ੍ਤਮੀਣੋ, ਧਾਰਯਤੀਤਿਮਸ੍ਸਤ੍ਥਮਾਹ-‘ਵਹਤੀ’ਤਿ, ਧਾਰਿਤੋਤਿ ਧਾਰਂਧਾਤੁਤੋ. ਸੁਤ੍ਤਨ੍ਤਰੇਨ (ਤਂ ਤਂ) ਨਿਯਮੇਨ ਨਿਯਮਿਤਾਨਂ ਤੇਸਂਤੇਸਂ ਸਮ੍ਪਦਾਨਸਞ੍ਞਂ ਵਿਧਾਯ ਚਤੁਤ੍ਥੀ ਵਿਹਿਤਾ ਪਰੇਹਿ, ਤਦਾਹ ‘ਸਿਲਾਘ ਹਨੁਟ੍ਠਾਸਪਾਨ’ਮਿਚ੍ਚਾਦਿ, ਸਬ੍ਬਤ੍ਥ ਯੋਗਸਮ੍ਬਨ੍ਧੇ ਛਟ੍ਠੀ, ਞਾਪੇਤੁਨ੍ਤਿ ਸਿਲਾਘਾਦਿਕੇ ਬੋਧੇਤੁਂ, ਇਚ੍ਛਿਤੋਤਿ ਅਤਿਮਤੋ. ਤਦਤ੍ਥਵਾਚੀਨਞ੍ਚ ਧਾਤੂਨਂ ਸਙ੍ਗਹਣਤ੍ਥਂ ‘ਕੁਧਦੁਹਿਸ੍ਸੋਸੂਯਤ੍ਥਾਨ’ਨ੍ਤਿ ਵੁਤ੍ਤਂ, ਯਮ੍ਪਤਿ ਕੋਪੋਤਿ ਇਮਿਨਾ ਕੋਪਸ੍ਸ ਵਿਸਯਮਾਹ, ਯਸ੍ਸਾਤਿ ਇਮਿਨਾ ਯਂਕਾਰਕਨ੍ਤਿ ਵੁਤ੍ਤਮੇਵ ਪਰਾਮਸਤਿ, ਯਸ੍ਸਾਤਿ ਰਾਜਾਦਿਨੋ, ਪੁਚ੍ਛਤੀਤਿ ਪੁਚ੍ਛਿਯਤੇ, ਤੇਨੇਵ ਵਕ੍ਖਤਿ-‘ਯਸ੍ਸ ਸਮ੍ਬਨ੍ਧਿਂ ਸੁਭਾਸੁਭਂ ਪੁਚ੍ਛਤਿ ਨੇਮਿਤ੍ਤਿਕੋ’ਤਿ, ਯੋਚਾਨੁਕੂਲਤ੍ਤਮ੍ਭ ਜਤੀਤਿ ਇਮਿਨਾ ਇਦਂ ਦਸ੍ਸੇਤਿ ‘‘ਪਤਿਪੁਬ੍ਬਕੋ ਆਪੁਬ੍ਬਕੋਚ ਸੁਣੋਤਿ ਅਬ੍ਭੁਪਗਮੇ ਪਟਿਜਾਨਨੇਚ ਵਤ੍ਤਤੇ, ਯਦਾਯਮਬ੍ਭੁਪਗਮੋ ਪਤ੍ਥਨਾ ਪੁਬ੍ਬਤੋ ਭਵਤਿ ਤਦਾ ਪਤ੍ਥਨਾਯ ਕਤ੍ਤੁ ਪਤ੍ਥਯਿਤੁਨੋ ਚਤੁਤ੍ਥੀ ਰੂਪਮ੍ਭਵਤਿ, ਯਦਾਤ੍ਵਪਤ੍ਥਤਮ੍ਪਿ ਕੇਵਲਮਾਨੁਕੂਲ੍ਯੇਨ ਵਤ੍ਤਮਾਨਂਦਿਸ੍ਵਾ ਦੇਯ੍ਯਮਬ੍ਭੁਪਗਚ੍ਛਨ੍ਤਿ ਇਦਮਿਦਂ ਵੋਦਸ੍ਸਾਮਾਤਿ [ਕੋਪਿਸ੍ਸਸਾਮਾਤਿ (ਪੋਤ੍ਥਕੇ)] ਤਦਾਨੁਕੂਲ੍ਯੇਨ ਪਵਤ੍ਤਨਸਙ੍ਖਾਤਾਯ ਕਿਰਿਯਾਯ ਕਤ੍ਤੁਨੋ ਚਤੁਤ੍ਥੀਰੂਪਮ੍ਭਵਤੀ’’ਤਿ, ਇਮਿਨਾ ਚ ਪਾਣਿਨਿਯਵੁਤ੍ਤਿਕਾਰਸ੍ਸ ਜਯਾਦਿਚ੍ਚਸ੍ਸਮਤੇ ਬ੍ਯਭਿਚਾਰਮਾਹ, ਸੋ ਹਿ ‘‘ਅਬ੍ਭੁਪਗਮੋ ਨਾਮ ਪਰੇਨ ਪਤ੍ਥਿਤਸ੍ਸ ਭਵਤਿ ਤਤ੍ਥ ਪਤ੍ਥਯਿਤੁਯੇਵ ਚਤੁਤ੍ਥੀਰੂਪਮ੍ਭਵਤੀ’’ਤਿ ਵਦਤਿ, ਪੁਬ੍ਬਸ੍ਸਾਕਿਰਿਯਾਯ ਯੋ ਕਤ੍ਤਾਤਿ ਵੇਦਵਾਕ੍ਯੇਨ ਵਿਹਿਤਥੁਤਿਕਕਰਣ ਸਙ੍ਖਾਤਾਯ ਉਸ੍ਸਾਹਾਨੁਜਾਨਨਤੋ ਪੁਬ੍ਬਭੂਤਾਯ ਕਿਰਿਯਾਯ ਯੋ ਕਤ੍ਤਾ ਹੋਤਾ ਪੋਤਾ ਚ, ਸਬ੍ਬਤ੍ਥਾਪਿ‘ਤਸ੍ਸਾ’ਤਿ ਇਦਂ ‘ਚਤੁਤ੍ਥੀਯਾਯਦਭਿਮਤਂ ਰੂਪ’ਨ੍ਤਿਇਮਿਨਾ ਸਮ੍ਬਨ੍ਧਿਤਬ੍ਬਂ, ਛਟ੍ਠਿਯਾ ਸਬ੍ਬਬ੍ਯਾਪਿਭਾਵਮਾਲਮ੍ਬ ਏਵਨ੍ਤਿ ਅਤਿਦੇਸੋਤਿ ਆਹ ‘ਏਵਨ੍ਤੀ’ਤਿਆਦਿ, ਰੂਪਸਾਮ੍ਯਤੋ ਪਨ ਤਾਦਤ੍ਥਿਯਤ੍ਥਸਬ੍ਭਾਵਾਚ ਯਥਾਯੋਗਂ ਤਾਦਤ੍ਥ੍ਹ ਚਤੁਤ੍ਥੀਪਿ ਨ ਵਿਰੁਜ੍ਝਤਿ, ਵਕ੍ਖਤਿ ਹਿ‘ਤਾਦਤ੍ਥ੍ਹ ਵਚਨਿਚ੍ਛਾਯਨ੍ਤੁ ‘ਇਚ੍ਚਾਦਿਨਾ, ਇਚ੍ਛਿਤੋ ਰਾਜਾ, ਕਮ੍ਮ ਵਚਨਿਚ੍ਛਾਤਿ ਇਮਿਨਾ ਵਚਨਿਚ੍ਛਾਯ ਪਧਾਨਤ੍ਤਮਾਹ… ਵਚਨਿਚ੍ਛਾਭਿਮੁਖਤ੍ਤਾ ਸਬ੍ਬੇਸਂ ਕਾਰਕਾਨਂ, ਅਪ੍ਪਚੁਰਪ੍ਪਯੋਗਤ੍ਤਾਤਿ ਅਬਹੁਪ੍ਪਯੋਗਤ੍ਤਾ, ਹਨੁਤੇ ਅਪਨਯਤਿ, ਉਪਤਿਟ੍ਠਤੇ ਉਪਟ੍ਠਾਨਂ ਉਪਗਮਨਂ ਕਰੋਤਿ, ਪਿਹਯਨ੍ਤਿ ਪਤ੍ਥੇਨ੍ਤਿ, ਕੁਜ੍ਝ ਅਮਰਿਸਂ ਕਰੋਤਿ, ਦੁਹਨਾਦਯੋ ਕੋਪਪ੍ਪਭਵਾ ਨਾਨਨ੍ਤਰੇਨ ਤੇ ਸਮ੍ਭਵਨ੍ਤੀਤਿ ਦੂਭਾਦਯੋਪ੍ਯੁਦਾਹਟਾ ‘‘ਬ੍ਯਞ੍ਜਨੇ ਦੀਘਰਸ੍ਸਾ’’ਤਿ (੧-੩੩) ਰਸ੍ਸੇ ਅਪਰਜ੍ਝਾਮਿ, ਇਸ੍ਸਯਨ੍ਤਿ ਨਸਹਨ੍ਤਿ, ਆਰਜ੍ਝਤਿ ਪੁਚ੍ਛਿਤੋ ਨੇਮਿਤ੍ਤਿਕੋ ਉਪਪਰਿਕ੍ਖਤਿ, ਭਾਦਤ੍ਥ੍ਹਂ ਵਿਭਾਵੇਤਿ ‘ਯਸ੍ਸੇ’ਚ੍ਚਾਦਿਨਾ, ਪਰਿਯਾ ਲੋਚੇਤਿ ਉਪਪਰਿਕ੍ਖਤਿ, ਕਿਂ ਲਕ੍ਖਣੋ-ਯਮਨਿਯਮੋਚ੍ਚਾਹ-‘ਨਾਵਸ੍ਸ’ਮਿਚ੍ਚਾਦਿ, ਯਾਚਿਤੁਸ੍ਮਾਯੇਵ [ਯਾਚਿਤੁਯੇਵ (ਪੋਤ੍ਥਕੇ)] ਛਟ੍ਠੀਤਿ ਨਾਵਸ੍ਸਮਯਨ੍ਨਿਯਮੋਤਿ ਅਤ੍ਥੋ, ਕੁਤੋਚ੍ਚਾਹ-‘ਸਮ੍ਬਨ੍ਧੇ’ਚ੍ਚਾਦਿ, ਅਞ੍ਞਸ੍ਮਾਪੀਤਿ ਅਯਾਚਿਤੁਤੋਅਪਿ, ਥੁਤਿਕਰਣਸ੍ਸ ਕਤ੍ਤੁਭੂਤਾ ਹੋਤਾਪੋਤਾਰੋ ਉਸ੍ਸਾਹਨਾਨੁਜਾਨਨਾਨਂ ਕਮ੍ਮਂ ਹੋਤੀਤਿ ਆਹ-‘ਪਚ੍ਚਨੁਪੁਬ੍ਬਸ੍ਸ ਗਿਣਾਤਿਸ੍ਸ ਕਮ੍ਮੇ’ਤਿ. ਹੋਤੁਪੋਤੁਸਦ੍ਦੇਹਿਚ੍ਚਾਦਿਨਾ ਪੋਤੁਸਦ੍ਦਸ੍ਸਪਿ ਛਟ੍ਠਿਰੂਪਂ ਦਸ੍ਸਿਤਂ, ਵੁਤ੍ਤਿਯਨ੍ਤੁ ‘ਹੋਤੁ ਪਤਿਗਿਣਾਤਿ’ਚ੍ਚੇਵ ਪਾਠੋ ਦਿਸ੍ਸਤਿ, ਹੋਤ੍ਵੇਵਮ੍ਪਿਤ੍ਯਮ੍ਹਾਕਮਤ੍ਰੋਪੇਕ੍ਖਾ, ਉਸ੍ਸਾਹਯਤੀਤ੍ਯਤ੍ਥੇ ਗਿਣਾਤਿ ਅਨ੍ਤੋਗਤਣ੍ਯਤ੍ਥੋ. ਅਨਾਵਾਦੋਤਿ ਨਾਵਾਅਨ੍ਨਾਦਿਵਜ੍ਜਿਤੇ. ਏਤ੍ਥ ਪਨ ਤਥਾ ਪਟਿਸੇਧਾਭਾਵੇਪਿ ਬਹੁਲਾਧਿਕਾਰਤੋ ‘ਨ ਤਂ ਨਾਵਮ੍ਮਞ੍ਞੇ ਨਤਂ ਅਨ੍ਨਮ੍ਮਞ੍ਞੇ’ਚ੍ਚਾਦਿ ਭਵਤਿ, ਅਤ੍ਥੇਵ ਹਿ ਬਹੁਲਾਧਿਕਾਰਤੋਵਾ ਤਿਪ੍ਪਸਙ੍ਗਾਭਾਵੋ, ਪਠਮਨ੍ਤਂ ਰੂਪਨ੍ਤਿ ਮਞ੍ਞਮਾਨੋਤਿ ਪਠਮਨ੍ਤਂ ਰੂਪਂ, ਏਤ੍ਥਚ ਯਦਾ ਤਿਣਾਦਿਤੋਪਿ ਖਿਕਂਸੀਯਤੇ ਤਦਾ ਨਿਨ੍ਦਾਵਗਮੋ, ਤਤ੍ਥ ਚ ਨਿਯੋਗਤੋਵ ਨਞ੍ਪਯੋਗੋ ਞਾਥਾਨੁਪ ਪਤ੍ਤਿਯਾਤਿ ਸਪ੍ਪਟਿਸੇਧਮੁਦਾਹਟਂ ‘ਨ ਮਞ੍ਞਮਾਨੋ’ਤਿ, ਅਵਧਿਮ੍ਹਿਯੇਵ ਪਞ੍ਚਮੀਤਿਣਾਤਿ, ਨਞ੍ਪਯੋਗੇਵ ਨਿਯੋਗਤੋ ਨਿਨ੍ਦਾਵਗਮਾ ਤਿਣਨ੍ਤਿ ਕਮ੍ਮੇਯੇਵ ਦੁਤਿਯਾ, ਅਥਵਾ ਸਤੀਪਿ ਨਿਨ੍ਦਾਵਗਮੇ ਵਚਨਿਚ੍ਛਾਤੋ ਸਵਿਸਯੇਯੇਵ ਦੁਤਿਯਾ, ਸਮ੍ਮੁਤਿਪ੍ਪਯੋਗੇਤਿ ਸਮ੍ਮੁਤਿਸਦ੍ਦਸ੍ਸ ਪਯੋਗੇ, ਚਤੁਤ੍ਥਿਂ ਇਚ੍ਛਨ੍ਤੀਤਿ ਮਤ੍ਤਾਯਾਤਿ ਏਤ੍ਥ ਚਤੁਤ੍ਥਿਂ ਇਚ੍ਛਨ੍ਤਿ, ਪੁਨ ਰੁਤ੍ਤਤ੍ਤੇ ਕਾਰਣਮਾਹ-‘ਅਥ ਸੋਤਿਵਿਜ੍ਜਮਾਨਤ੍ਤਾ’ਤਿ, ਚਣ੍ਡਸ੍ਸ ਕੁਕ੍ਕੁਰਸ੍ਸਾਤਿਆਦਿਸੁਤ੍ਤੇ ‘‘ਅਥ ਸੋ’’ਤਿ ਪਾਠਸ੍ਸ ਵਿਜ੍ਜਮਾਨਤ੍ਤਾ ‘ਭਿਯ੍ਯੋਸੋ ਮਤ੍ਤਾਯਾ’ਤਿ ਏਤ੍ਥ ਸੋਕਾਰੋ ਪੁਨਰੁਤ੍ਤੋਤਿ ਅਧਿਪ੍ਪਾਯੋ, ਚਗ੍ਗਹਣੇਨਾਤਿ ‘‘ਸਿਲਾਘਹਨੁ…ਪੇ… ਸਤ੍ਤਮ੍ਯਤ੍ਥੇਸੁਚਾ’’ਤਿ ਸੁਤ੍ਤੇ ਚਗ੍ਗਹਣੇਨ, ਚਤੁਤ੍ਥੀਭਿਮਤਾਤਿ ‘‘ਨਮੋ ਯੋਗਾਦਿਸ੍ਵਪਿਚਾ’’ਤਿ ਸੁਤ੍ਤੇਨ.