੧੭. ਸਹ

ਯਥਾਕ੍ਕਮਮਾਗਮਨਕਿਰਿਯਾਯ ਥੂਲਤ੍ਤਗੁਣੇਨ ਗੋਮਨ੍ਤਦਬ੍ਬੇਨ ਚ ਸਮ੍ਬਨ੍ਧਂ ਦਸ੍ਸੇਤੁਂ ‘ਤਂ ਯਥੇ’ਚ੍ਚਾਦਿਮਾਹ, ਉਦਾਹਰਣਮਤ੍ਤਂ ਦਸ੍ਸੇਨ੍ਤੋਪਿ ਇਮਿਨਾ ਅਧਿਪ੍ਪਾਯੇਨਾਪਿ ਦਸ੍ਸੇਤੀਤਿ ਵੁਤ੍ਤਂ ‘ਸਬ੍ਬਤ੍ਥੇਵ ਵਾ’ਤਿਆਦਿ, ਪੁਤ੍ਤੇਨ ਸਹਾਗਤੋਤਿਆਦੀਸੁ ਆਗਮਨਾਦਿਕਿਰਿਯਮ੍ਪਟਿਚ੍ਚ ਦ੍ਵੇ ਕਤ੍ਤਾਰੋ ਪਧਾਨਾਪ੍ਪਧਾਨਵਸੇਨ, ਤੇਸੁ ਪਧਾਨੇ ਕਾਰਿਯਸਮ੍ਪਚ੍ਚਯਞਾਯੇਨ ਵਾ ਬਹੁਲਂਵਚਨੇਨ ਵਾ ਪਧਾਨੇ ਕਤ੍ਤਰਿ ਪਚ੍ਚਯੋ, ਇਤਰੇ’ਕਤ੍ਤਰਿ ਤਤਿਯਾ’ਤ੍ਯੇਵ ਤਤਿਯਾ ਸਿਦ੍ਧਾ, ਤਤੋ-ਯਂ ਵਚਨਾਰਮ੍ਭੋ-ਨਤ੍ਥਕੋਤਿ ਮਞ੍ਞਮਾਨੋਚੋ ਦੇਤਿ ‘ਨਨ੍ਵਿ’ਚ੍ਚਾਦਿਨਾ, ਤ੍ਤੇਨਾਭਿਧੀਯਤੇ ਪਿਤੇਤਿ ਪਧਾਨਕਤ੍ਤਾ, ਤੁਲ੍ਯੋਪਿ ਕਿਰਿਯਾਸਮ੍ਬਨ੍ਧੇ ਪਿਤਾਪੁਤ੍ਤਾਨਂ ਪਿਤਾਤ੍ਰ ਪਧਾਨਂ ਸਦ੍ਦਚੋਦਿਤਤ੍ਤਾ, ਪੁਤ੍ਤੋ-ਪ੍ਪਧਾਨਮਸਦ੍ਦਚੋਦਿਤਤ੍ਤਾ, ਸਦ੍ਦਬ੍ਯਾਪਾਰਾਪੇਕ੍ਖਾਯ ਹਿ ਪਧਾਨਾਪ੍ਪਧਾਨਾਯ ਵਵਤ੍ਥਾਨਂ, ਪਿਤੁਰੇਵਾਤ੍ਰਾਗਤਾਦਿਸਦ੍ਦਸਾਮਾਨਾਧਿਕਰਣ੍ਯਾ ਆਗਮਨਕਿਰਿਯਾ ਸਮ੍ਬਨ੍ਧੋ ਸਦ੍ਦੇਨੋਚ੍ਚਤੇ, ਨੇਤਰਸ੍ਸ ਸਦ੍ਦਸਤ੍ਤਿਸਭਾਵਤੋ, ਤਥਾ ਵਿਧਾ ਹਿ ਸਦ੍ਦਸ੍ਸ ਸਤ੍ਤਿ ਯਤੋ ਪਿਤੁਰੇਵਾਤ੍ਰ ਕਿਰਿਯਾ ਸਮ੍ਬਨ੍ਧਂ ਸਕ੍ਕੋਤਿ ਪਟਿਪਾਦੇਤੁਂ, ਨ ਪੁਤ੍ਤਸ੍ਸ, ਏਵਞ੍ਚਾਗਤੋਚ੍ਚਾਦੋ ਏਕਵਚਨਮੁਪਜ੍ਜਤੇ, ਅਞ੍ਞਥਾ ਹਿ ਬਹੁਵਚਨਂ ਸਿਯਾ, ‘ਪਿਤਾ ਪੁਤ੍ਤਾ ਆਗਤਾ’ਤਿ. (ਯਦਿ) ਵੁਤ੍ਤਨਯੇਨ ਤਤਿਯਾ ਸਿਦ੍ਧਾ ‘ਸਿਦ੍ਧੇ ਸਤ੍ਯਾਰਮ੍ਭੋ ਨਿਯਮਾਯ ਵਾ ਵਿਕਪ੍ਪਾਯ ਵਾ’ ਨ ਚੇਤ੍ਥ ਨਿਯਮੋ, ਨਾਪਿ ਵਿਕਪ੍ਪੋ, ਤਤੋ ਕਿਮਨੇਨ ਯੋਗੇਨਾ ਤ੍ਯਾਸਯੇਨਾਹ-‘ਅਪ੍ਪਧਾਨੇਯੇਵ’ਚ੍ਚਾਦਿ. ਨਯਿਦਮੇਵਮਿਚ੍ਚਾਦਿ ਪਰਿਹਾਰੋ. ਸਹਭਾਵਮਤ੍ਤਂ ਵਤ੍ਤੁਮਿਟ੍ਠਂ ਵਾਤਿ ਯੋਜਨਾ, ਸਾਮਤ੍ਥਿਯਾਤਿ ਭੇਦਾਧਿਟ੍ਠਾਨਤ੍ਤਾ ਸਹਤ੍ਥਯੋਗਸ੍ਸ ਪੁਤ੍ਤਸ੍ਸਾਪਿ ਕਿਰਿਯਾਭਿਸਮ੍ਬਨ੍ਧੋ ਵਿਞ੍ਞਾਯਤਿ ਕਥਮਞ੍ਞਥਾ ਸਹਤ੍ਥਯੋਗੋ ਸਿਯਾਤਿ ਇਮਿਨਾ ਅਤ੍ਥ ਬਲੇਨ. ਅਤ੍ਥਗ੍ਗਹਣਨ੍ਤਿ ਸੁਤ੍ਤੇ ‘‘ਸਹਤ੍ਥੇਨੇ’’ਤਿ ਅਤ੍ਥਗ੍ਗਹਣਂ. ਪਰਿਯਾਯਤ੍ਥਨ੍ਤਿ ਪਰਿਤੋ ਅਯਨ੍ਤਿ ਅਵਗਚ੍ਛਨ੍ਤਿ ਅਤ੍ਥਮਨੇਨੇਤਿ ਪਰਿਯਾਯੋ ਅਤ੍ਥੋ ਪਯੋਜਨਂ ਯਸ੍ਸਾਤਿ ਵਿਗ੍ਗਹੋ, ਏਤ੍ਥ ਚ ਪਰਿਯਾਯਤ੍ਥਮੇਵਾਤਿ ਨਾਵਧਾਰਣਂ, ਅਤੋਯੇਵ ਵਿਨਾਪਿ ਸਹਸਦ੍ਦਪ੍ਪਯੋਗਂ ਤਪ੍ਪਰਿਯਾਯਪ੍ਪਯੋਗਂ ਵਾ ਸਹਤ੍ਥੇਨ ਯੋਗੇ ਵਿਧਾਨਤੋ ਅਸਤ੍ਯਪਿ ਸਹਾਦਿਸਦ੍ਦਪ੍ਪਯੋਗੇ ਯਤ੍ਥ ਤਦਤ੍ਥੋ ਗਮ੍ਯਤੇ ਤਤ੍ਥਾਪਿ ਭਵਤ੍ਯੇਵ ਤਤਿਯਾ… ਗਮ੍ਯਮਾਨੇਨ ਸਹਤ੍ਥੇਨ ਯੋਗਾ, ਯਥਾ‘‘ਸ੍ਯਾਦਿ ਸ੍ਯਾਨੇ’’ਤਿ. (੩-੧) ਸਹ ਪਰਿਯਾਯੇਨਾਤਿ ਸਹਸਦ੍ਦਸ੍ਸ ਪਰਿਯਾਯਤੋ. ਵਿਸੇਸਾਨੁਪਾਦਾਨਤੋਤਿ ‘‘ਸਹਯੁਤ੍ਤੇ-ਪ੍ਪਧਾਨੇ’’ਤਿ (੨-੩-੧੯) ਪਾਣਿਨੀਯ ਸੁਤ੍ਤੇ ਵਿਯ ਅਪ੍ਪਧਾਨੇਤਿ ਵਿਸੇਸਸ੍ਸਾਨੁਪਾਦਾਨਤੋ.