੧੮. ਲਕ੍ਖਣੇ

ਲਕ੍ਖੀਯਤ੍ਯਨੇਨਾਤਿ ਲਕ੍ਖਣਂ ਸਙ੍ਕੇਤੋ, ਕਿਨ੍ਤਂ ਕਮਣ੍ਡਲੁਪ੍ਪਭੁਤਿ, ਅਤ੍ਥੇ ਕਾਰਿਯਸ੍ਸਾਸਮ੍ਭਵਾ ਤਂਵਾਚੀਹਿ ਵਿਭਤ੍ਤੀਤਿ ਮਞ੍ਞਮਾਨੇਨ ਯਂਵਿਵਰਣਂ ਕਤਂ ‘ਲਕ੍ਖਣੇ ਵਤ੍ਤਮਾਨਤੋ’ਤਿ, ਤਮੁਲ੍ਲਙ੍ਗਿਯਾਤ੍ਥਂ ਵਦਤਿ ‘ਯੋ ਅਤ੍ਥੋ’ਇਚ੍ਚਾਦਿ, ਵਤ੍ਤਮਾਨਤੋਤਿ ਵਿਞ੍ਞਾਯਤਿ… ਨਾਮਸ੍ਮਾ ਪਚ੍ਚਯਵਿਧਾਨਪ੍ਪ ਸਙ੍ਗਤੋ, ਉਪਾਤ੍ਤੋਤਿ ਗਹਿਤੋ. ਕਞ੍ਚਿਪ੍ਪਣਰਮਾਪਨ੍ਨਸ੍ਸ ਲਕ੍ਖਣੇ ਤਤਿਯਾ ਯਥਾ ਸਿਯਾ ‘ਰੁਕ੍ਖਮ੍ਪਤਿ ਵਿਜ੍ਜੋਤਨ’ਮਿਚ੍ਚਤ੍ਰ ਲਕ੍ਖਣਮਤ੍ਤੇ ਮਾ ਭਵੀਤਿ ਪਾਣਿਨੀਯੇਹਿ ‘‘ਇਤ੍ਥਮ੍ਭੂਤਲਕ੍ਖਣੇ’’ਤਿ (੨-੩-੨੧) ਇਤ੍ਥਮ੍ਭੂਤਗ੍ਗਹਣਂ ਕਤਂ, ਤਮ੍ਮਨਸਿ ਨਿਧਾਯ ਚੋਦਯਮਾਹ–‘ਨਨ੍ਵਿ’ਚ੍ਚਾਦਿ, ਇਤ੍ਥਮ੍ਭੂਤਸ੍ਸ ਲਕ੍ਖਣਨ੍ਤਿ ਛਟ੍ਠੀਸਮਾਸੋ, ਆਪਨ੍ਨਸ੍ਸਾਤਿ ਭੂਤਸ੍ਸ, ਸਾਮਞ੍ਞਸ੍ਸ ਭੇਦਕੋ ਵਿਸੇਸੋ ਪਕਾਰੋ ਵੁਚ੍ਚਤੇ, ਤਥਾਹਿ ‘ਤਿਦਣ੍ਡਕੇਨ ਪਰਿਬ੍ਬਾਜਕਮਦ੍ਦਕ੍ਖੀ’ਤਿ ਮਨੁਸ੍ਸਤ੍ਤਸਾਮਞ੍ਞਸ੍ਸ ਪਰਿਬ੍ਬਾਜਕਤ੍ਤਮ੍ਪਕਾਰੋ, ਤਮ੍ਪਰਿਬ੍ਬਾਜਕੋ ਪਤ੍ਤੋ, ਤਸ੍ਸ ਤਿਦਣ੍ਡਕਂ ਲਕ੍ਖਣਂ. ਉਪਲਕ੍ਖਣਤ੍ਤੇਤਿ ਇਮਿਨਾ ਇਤ੍ਥਮ੍ਭੂਤਸ੍ਸ ਲਕ੍ਖਣਤ੍ਤਾਭਾਵਮਾਹ, ਉਪਲਕ੍ਖਣਨ੍ਤਿ ਸਙ੍ਕੇਤੋ. ਨਯਿਦਮਤ੍ਥਿਚ੍ਚਾਦਿ ਪਰਿਹਾਰੋ, ਰੁਕ੍ਖਮ੍ਪਤਿ ਵਿਜ੍ਜੋਤਨਨ੍ਤਿ ਏਤ੍ਥ ਕਸ੍ਸਚਿ ਇਤ੍ਥਮ੍ਭੂਤਸ੍ਸਾਭਾਵਾ ਇਤ੍ਥਮ੍ਭੂਤਗ੍ਗਹਣੇ ਪਯੋਜਨਂ ਨ ਦਿਸ੍ਸਤਿ ਤਨ੍ਨਿਵਤ੍ਤਨਤੋ, ਰੁਕ੍ਖਮ੍ਪਤਿ ਵਿਜ੍ਜੋਤਤੇਤਿ ਏਤ੍ਥਤੁ ਇਤ੍ਥਮ੍ਭੂਤਸ੍ਸ ਵਿਜ੍ਜੁਸਙ੍ਖਾਤਸ੍ਸ ਅਤ੍ਥਸ੍ਸ ਸਬ੍ਭਾਵਾ ਤਤਿਯਾਪ੍ਪਤ੍ਤਿਯਂ ਤਂਨਿਵਤ੍ਤਿਯਾ ਯਥਾਵੁਤ੍ਤਂ ਞਾਯਮਨ੍ਤਰੇਨ ਨਾਞ੍ਞਂ ਕਿਞ੍ਚਿ ਪਟਿਸਰਣਮਤ੍ਥੀਤਿ ਸਞ੍ਞਾਪਯਮਾਹ-‘ਅਵਸ੍ਸ’ਮਿਚ੍ਚਾਦਿ, ਅਞ੍ਞਥਾਤਿ ਏਵਮਨਬ੍ਭੁਪਗਮ੍ਮ ‘ਇਤ੍ਥਮ੍ਭੂਤਲਕ੍ਖਣੇ’ਤਿ ਵਚਨੇ ਕਰੀਯਮਾਨੇ ਸਤਿ, ਇਤ੍ਥਮ੍ਭੂਤਵਾਦਿਨੋ ਉਤ੍ਤਰਮਾਸਙ੍ਕਿਯਾਹ-‘ਨਚਾ’ਤਿਆਦਿ, ਵਤ੍ਤੁਨ੍ਤਿ ਵਚਨਸੇਸੋ, ਚੋ-ਵਧਾਰਣੇ, ਨੇਵ ਸਕ੍ਕਾਤਿ ਵੁਤ੍ਤਂ ਹੋਤਿ, ਦੁਤਿਯਾਵਿਧਾਨਸਾਮਤ੍ਥਿਯਾਤਿ ‘‘ਪਤਿਪਰੀਹਿ ਭਾਗੇ ਚਾ’’ਤਿ (੨-੯) ਕਸ੍ਮਾ ਨ ਸਕ੍ਕਾਤਿ ਆਹ-‘ਅਤ੍ਥਿ’ਚ੍ਚਾਦਿ, ਅਸਤਿ ਹਿ ਪਯੋਜਨੇ ਸਾਮਤ੍ਥਿਯਨ੍ਤਿ ਭਾਵੋ. ਅਥ ਕਮਣ੍ਡਲੁ ਪਾਣਿਮ੍ਹਿ ਅਸ੍ਸਾਤਿ ਆਦੋ ਤਤਿਯਾ ਕਸ੍ਮਾ ਨ ਸਿਯਾ ਤ੍ਯਾਹ-‘ਕਮਣ੍ਡਲੁ’ਇਚ੍ਚਾਦਿ, ਕਮਣ੍ਡਲੁਸ੍ਸ ਸੇਤਸ੍ਸ ਚ ਉਪਲਕ੍ਖਣ ਭਾਵੇਨਾਨੁਪਾਦਾਨਤੋਤਿ ਸਮ੍ਬਨ੍ਧੋ, ਇਮਿਨਾ ਉਪਾਦਾਤੁਨੋ ਸਵਚਸਿ ਸਤਨ੍ਤਤਮਾਹ, ਵਿਸਿਟ੍ਠਾਵਯਵਾਧੇਯ੍ਯੇਨਾਤਿ ਪਾਣਿ ਕਮਣ੍ਡਲੁਨਾ ਵਿਸਿਟ੍ਠੋਵਯਵੋ, ਤਸ੍ਸਾਧੇਯ੍ਯੋ ਕਮਣ੍ਡਲੁ ਤੇਨਾਤਿ ਅਤ੍ਥੋ. ਯੇਨਾਙ੍ਗੇਨ ਵਿਕਤੇਨ ਅਙ੍ਗਿਨੋ ਵਿਕਾਰੋ ਲਕ੍ਖੀਯਤੇ ਤਤੋ ਤਤਿਯਾ ਯਥਾਸਿਯਾਤਿ ਪਰੇਹਿ ‘‘ਯੇਨਾਙ੍ਗਵਿਕਾਰੋ’’ਤਿ (੨-੩-੨੦) ਆਰਦ੍ਧਂ, ਤਦਾਹ-‘ਯੇਨੇ’ਚ੍ਚਾਦਿ, ਤਤ੍ਥ ਯਸਦ੍ਦੇਨ ਵਿਕਤਾਵਯਵੋ ਹੇਤੁਤ੍ਤੇਨ ਨਿਦ੍ਦਿਟ੍ਠੋ ਅਙ੍ਗਸਦ੍ਦੋ ਚ ਸਮੁਦਾਯਵਚਨੋ ਉਪਾਤ੍ਤੋ ਤੇਨਾਹ-‘ਯੇਨੇਚ੍ਚਾਦਿ, ਨਨੁਚ ਕਾਣਾਦੀਨਂ ਨਿਯਤਗੁਣੀਨਮਭਿਧਾਯਿਤ੍ਤਾ ਅਕ੍ਖਿਸਦ੍ਦਸ੍ਸ ਪਯੋਗੋ ਨ ਯੁਤ੍ਤੋ ਬ੍ਯਾਵਤ੍ਤਿਯਾਭਾਵਾਤਿ, ਨੇਸ ਦੋਸੋ, ਲੋਕਿਯੋ-ਯਂ ਸਦ੍ਦਸ੍ਸ ਵੋਹਾਰੋ, ਲੋਕਸ੍ਸ ਚ ਸਦ੍ਦਪ੍ਪਯੋਗੇ ਗੁਰੁਲਘੁਮ੍ਪਤ੍ਯਦਯੋ ਨਤ੍ਥਿ, ਤਥਾਹਿ ਲੋਕੇਨ ‘ਸੀਸਪਾਤਿ’ਪਿ ਵੁਚ੍ਚਤੇ, ਰੁਕ੍ਖੋ ਸੀਸਪਾਤਿਪਿ, ਯਸ੍ਸ ਤੁ ਤਤ੍ਥਾਦਰੋ, ਸੋ-ਕ੍ਖਿਸਦ੍ਦਂ ਪਯੁਜ੍ਜਤੇਵ, ਅਥਵਾ ਸਾਮਞ੍ਞੁਪਕ੍ਕਮੇ ਵਿਸੇਸੋ ਪਯੋਗਮਰਹਤਿ, ਅਕ੍ਖਿ(ਨਾਤਿ) ਹਿ ਵੁਤ੍ਤੇ ਸਨ੍ਦੇਹੋ ਸਿਯਾ ‘ਕਿਮਸ੍ਸ ਵਤ੍ਤੁਮਿਚ੍ਛਿਤ’ਨ੍ਤਿ ਤਤੋ ਕਾਣੋਤਿ ਵੁਚ੍ਚਤੇ, ਨਾਕ੍ਖਿਨਾ ਨਿਰੂਪਯਤਿ ਸੋਭਨੋਤਿ, ਕਿਞ੍ਚਰਹਿ ਕਾਣੋਤਿ, ਅਕ੍ਖਿਕਾਣਮਸ੍ਸੇਤ੍ਯਾਦੋ ਕਸ੍ਮਾ ਨ ਸਿਯਾਤਿ ਆਸਙ੍ਕਿਯ‘ਕਮਣ੍ਡਲੁ ਪਾਣਿਮ੍ਹਿ ਅਸ੍ਸਾ’ਤ੍ਯਤ੍ਰ ਯੋ ਵੁਤ੍ਤੋ ਪਰਿਹਾਰੋ, ਤ ਮੇਤ੍ਥੋਪਦਿਸਨ੍ਤੋ ਆਹ-‘ਹੇਟ੍ਠਾ ਵਿਯ ਅਪ੍ਪਸਙ੍ਗੋ’ਤਿ.