੧੫. ਸਾਮਿ

ਕਿਨ੍ਤਂ ਸਾਮਿਤ੍ਤਮਿਚ੍ਚਾਹ-‘ਸਸ੍ਸਾਮਿਸਮ੍ਬਨ੍ਧੋ’ਤਿ, ਕਾਯ ਕਿਰਿਯਾਯ ਜਨਿਤੋਤਿ ਆਹ-‘ਪਰਿਪਾਲਨਾਦਿਕਿਰਿਯਾਯ ਜਨਿਤੋ’ਤਿ, ਤਞ੍ਚਾਤਿ ਸਾਮਿਤ੍ਤਾਪੇਕ੍ਖੋ ਨਪੁਂਸਕਨਿਦ੍ਦੇਸੋ, ਸਮ੍ਬਨ੍ਧਸ੍ਸਾਨੇਕਵਿਧਤ੍ਤਾ ਆਹ‘ਸਬ੍ਬਤ੍ਥ ਸਮ੍ਬਨ੍ਧੇ’ਤਿ, ਆਖ੍ਯਾਯਤੇਤੀਮਸ੍ਸ ਅਤ੍ਥੋ ਵਿਧੀਯਤੇ ਞਾਪੀਯਤੇਤਿ, ਦਿਟ੍ਠਨ੍ਤੋ-ਪਨੀਤੋਤ੍ਥੋ ਸੁਖੇਨ ਪਟਿਪਤ੍ਤੁਂ ਸਕ੍ਕਾਤਿ ਪਸਿਦ੍ਧਮਨੁਵਦਿਯਮਾਨਮਪ੍ਪਸਿਦ੍ਧਞ੍ਚ ਵਿਧੀਯਮਾਨਂ ਦਿਟ੍ਠਨ੍ਤਮਾਹ-‘ਯਥਾ ਯੋ ਕੁਣ੍ਡਲੀ ਸੋ ਦੇਵਦਤ੍ਤੋ’ਤਿ, ਕੁਣ੍ਡਲਿਤ੍ਤਮ੍ਪਸਿਦ੍ਧਂ, ਦੇਵਦਤ੍ਤਤ੍ਤਮਪ੍ਪਸਿਦ੍ਧਮਿਚ੍ਚਾਹ-‘ਕੁਣ੍ਡਲਿਤ੍ਤਾਨੁਵਾਦੇਨੇ’ਚ੍ਚਾਦਿ. ਯਥੇਵੋਭਯਾਧਿਟ੍ਠਾਨਤ੍ਤੇਪ੍ਯੁਪਸਜ੍ਜਨਤੋਵ ਛਟ੍ਠੀ ‘ਰਞ੍ਞੋ ਪੁਰਿਸੋ’ਤਿ, ਨ ਵਿਸੇਸ੍ਸਤੋ ‘ਪੁਰਿਸਸ੍ਸ ਰਾਜਾ’ਤਿ, ਤਥਾ ਸਮ੍ਬਨ੍ਧਾਭਿਬ੍ਯਞ੍ਜਨਕੇਨਾਧਿਨਾ ਯੋਗੇਪਿ ਵਿਸੇਸਨਤੋਵ ਭਵਤਿ, ਨਾਞ੍ਞਤੋਤਿ ਆਹ-‘ਤਤ੍ਥਾ’ਤਿਆਦਿ. ਬ੍ਯਤਿਰੇਕਮਾਪਾਦੀਯਤੀਤਿ ਕਾਰਕਛਕ੍ਕਤੋ ਬ੍ਯਤਿਰਿਤ੍ਤਤ੍ਤਾ ਸਮ੍ਬਨ੍ਧੋ ਬ੍ਯਤਿਰੇਕੋ ਤਂ ਆਪਾਦੀਯਤਿ ਪਾਪੀਯਤੀਤਿ ਅਤ੍ਥੋ, ਉਭਯਤੋਤਿ ਸਂਤੋ ਸਾਮਿਤੋ ਚ, ਅਧਿਬ੍ਰਹ੍ਮਦਤ੍ਤੇ ਪਞ੍ਚਾਲਾਤਿ ਬ੍ਰਹ੍ਮਦਤ੍ਤਸ੍ਸ ਪਞ੍ਚਾਲਾ ਸਨ੍ਤਕਾ [ਸਾਮਿਨੋ (ਪੋਤ੍ਥਕੇ)] ਤਿ ਅਤ੍ਥੋ, ਸਨ੍ਤਕਾ [ਸਾਮਿਨੋ (ਪੋਤ੍ਥਕੇ)] ਹਿ ਪਞ੍ਚਾਲਾ, ਨ ਸਾਮਿ [ਨਸਂ (ਪੋਤ੍ਥਕੇ)], ਅਧਿਪਞ੍ਚਾਲੇਸੁ ਬ੍ਰਹ੍ਮਦਤ੍ਤੋਤਿ ਪਞ੍ਚਾਲਾਨਂ ਬ੍ਰਹ੍ਮਦਤ੍ਤੋ ਸਾਮੀਤ੍ਯਤ੍ਥੋ.