੧. ਦ੍ਵੇਦ੍ਵੇ

ਅਵਯਵਸਮ੍ਬਨ੍ਧੇਤਿ ਸ੍ਯਾਦ੍ਯਵਯਵੀਸਮੁਦਾਯੇਨ ਦ੍ਵੇਦ੍ਵੇਤਿ ਵੁਤ੍ਤਾਨਮਵਯਵਾਨਂ ਸਮ੍ਬਨ੍ਧੇ, ਅਤੇਤ੍ਥ ਵੁਤ੍ਯਨੁਕੂਲਾਯ ਪਞ੍ਚਿਕਾਯ ਵਾ ਭਵਿਤਬ੍ਬਂ, ਪਞ੍ਚਿਕਾਨੁ ਕੂਲਾਯ ਵੁਤ੍ਤਿਯਾ ਵਾ, ਨ ਚੇਤ੍ਥ ਦ੍ਵਿਨ੍ਨਮਞ੍ਞੋਞ੍ਞਾਨੁਕੂਲਤਾ ਦਿਸ੍ਸਤਿ, ਤਥਾਹਿ ਵੁਤ੍ਤਿਯਂ-‘ਏਕਾਨੇਕਤ੍ਥੇਸੁ ਵਤ੍ਤਮਾਨਤੋ ਨਾਮਸ੍ਮਾ’ਤਿ ਏਤ੍ਤਕਮੇਵ ਪਕਤਿਵਿਸੇਸਨਵਸੇਨ ਵੁਤ੍ਤਂ, ਪਞ੍ਚਿਕਾਯਨ੍ਤੁ ਤਬ੍ਬਿਸੇਸਨ ਵਸੇਨ ਚ ਪਚ੍ਚਯਤ੍ਥਵਿਸੇਸਨਵਸੇਨ ਚ ਅਤ੍ਥੋ ਦਸ੍ਸਿਤੋ, ਤਦੇਵ ਮੁਭਿਨ੍ਨਨ੍ਨਾਞ੍ਞਮਞ੍ਞਾਨੁਕੂਲਤਾ ਦਿਸ੍ਸਤਿ, ਤਤੋ ਏਤ੍ਥ ਯਥਾ ਦ੍ਵਿਨ੍ਨਮਞ੍ਞੋਞ੍ਞਾਨੁਕੂਲਤਾ ਸਮ੍ਪਜ੍ਜਤਿ, ਤਥਾ ਬ੍ਯਾਚਿਕ੍ਖਿਸ੍ਸਾਮ ‘‘ਯਦਿ ਪਨੇਤ੍ਥ ਵੁਤ੍ਯਾਨੁਕੂਲਾ ਪਞ੍ਚਿਕਾ ਭਵੇਯ੍ਯ ਪਚ੍ਚਯਤ੍ਥਪਕ੍ਖੋ ਜਹਿਤਬ੍ਬੋ ਸਿਯਾਤਿ ‘ਤੇ…ਪੇ… ਏਕਾਨੇਕਤ੍ਥੇਸੁ’ਤਿ ਚ, ਤੇਨ…ਪੇ… ਯੋਜਨਿਯ’ਨ੍ਤਿ ਚ ਏਤੇਸਂ ਜਹਿਤਬ੍ਬਤਾਯ ਬਹੁਪਾਠਵਿਲੋਪੋ ਆਪਜ੍ਜਤਿ, ਯਦਿ ਪਨ ਪਞ੍ਚਿਕਾਨੁਕੂਲਾ ਵੁਤ੍ਤਿ ਭਵੇਯ੍ਯ ਵੁਤ੍ਤਿਯਂ ਕਿਞ੍ਚਿਮਤ੍ਤਂ ਪਕ੍ਖਿਪਿਤਬ੍ਬ ਮਤ੍ਤਮੇਵ ਸਿਯਾਤਿ ਬਹੁਵਿਲੋਪਾਪਤ੍ਤਿ (ਨ) ਹੋਤੀਤਿ ਏਤੇਸਂ ਦ੍ਵੇਦ੍ਵੇ ਹੋਨ੍ਤਿ ਏਕਾਨੇ ਕਤ੍ਥੇਸੁ ਵਤ੍ਤਮਾਨਤੋ ਨਾਮਸ੍ਮਾ’ਤਿ ਵੁਤ੍ਤਿਯਾ ਭਵਿਤਬ੍ਬ’’ਨ੍ਤਿ, ਏਵਞ੍ਹਿ ਸਤਿ ਸਤ੍ਥਨ੍ਤਰੇਨਾਪਿ ਸਹ ਘਟਤੇ, ਸੁਤ੍ਤੇ ‘ਦ੍ਵੇਦ੍ਵੇਕਾਨੇਕੇਸੁ ਨਾਮਸ੍ਮਾ’ਤਿ ਵੁਤ੍ਤਤ੍ਤਾ ‘ਏਕਾਨੇਕੇਸੂ’ਤਿ ਇਦਂ ਪਚ੍ਚਯਵਿਸੇਸਨਂ ਵਾ ਯੁਜ੍ਜਤਿ

ਪਕਤਿਵਿਸੇਸਨਵਸੇਨ ਵਾ ਯਦੇਤਂ ਪਚ੍ਚਯਵਿਸੇਸਨਂ, ਤਦਾ ਸਾਮਤ੍ਥਿਯਾ ਏਕਾਨੇਕੇਸੂਤਿ ਪਕਤਿਵਿਸੇਸਨਮ੍ਪਿ ਲਬ੍ਭਤਿ, ਤਤ੍ਥ ਸਾਮਤ੍ਥਿਯਮਤ੍ਥ ਬਲਂ, ਤਥਾਹ੍ਯੇਕਾਦੀਸੁ ਭਵਨ੍ਤਾ ਪਕਤਿਵਾਚ੍ਚਾਨਮੇਵੇਕਤ੍ਤਾਦਿਅਬ੍ਯਤਿ ਰਿਤ੍ਤਅਤ੍ਥਮਤ੍ਤਾਦੀਰੂਪਾਨਂ ਜੋਤਕਾ ਸ੍ਯਾਦਯੋ ਕਥਮੇਕਤ੍ਤਾਦੀਸੁ ਵਤ੍ਤਮਾਨਤੋ ਨਾਮਸ੍ਮਾ ਅਞ੍ਞਤੋ ਸਿਯੁਨ੍ਤਿ ਯਥਾਵੁਤ੍ਤਨਾਮਵਿਸੇਸਾਕ੍ਖੇਪੋ, ਤਥਾ ਇਤ੍ਥਿਣਾਦਿਪ੍ਪਚ੍ਚਯਾਦੀਨਮ੍ਪਿ ਪਨ ਪਕਤਿਵਿਸੇਸਾਨੁਪਾਦਾਨੇਪਿ ਯਤੋ ਧਾਤ੍ਵਾਦਿ ਵਾਚ੍ਚੋਤ੍ਥੋ ਨਤ੍ਥਿ, ਸਾਮਤ੍ਥਿਯਾ ਤਤੋ, ਧਾਤੁਤ੍ਯਾਦ੍ਯਨ੍ਤੇਹਿ [ਤ੍ਯਾਦ੍ਯਨ੍ਤ ਵਾਚ੍ਚੇਹਿ (ਪੋਤ੍ਥਕੇ)] ਨ ਹੋਨ੍ਤੇ ਵਿਤ੍ਤਿਪਚ੍ਚਯਾ, ਤਥਾ ਣਾਦਿਪਚ੍ਚਯਾਪਿ… ਵਿਭਤ੍ਯਨ੍ਤਾ ਵਿਧਾਨਤੋ, ਯਦੇਤਮ੍ਪਕਤਿਵਿਸੇਸਨਂ ਤਦਾਪਿ ਸਾਮਤ੍ਥਿਯੇਨੇਵ ਏਕਤ੍ਤਾਦੀਸੁ ਵਤ੍ਤਮਾਨਤੋ ਨਾਮਸ੍ਮਾ ਤਜ੍ਜੋਤਨਾਯ ਭਵਨ੍ਤਾ ਸ੍ਯਾਦਯੋ ਕਥਮਞ੍ਞਤ੍ਥ ਹੋਨ੍ਤਿ ਅਸਮ੍ਭਵਾਤਿ ਏਕਾਨੇਕੇਸੁ ਦ੍ਵੇਦ੍ਵੇਤਿ ਲਬ੍ਭਤਿ, ਅਥਵਾ ਸਰੂਪੇਨ ਅਵੁਤ੍ਤਮ੍ਪਿ ਸਾਮਤ੍ਥਿਯੇਨੇਕਾਨੇਕਤ੍ਥੇਸੂਤਿ ਗਮ੍ਮਮਾਨਂ ਵੁਤ੍ਤਮੇਵ ਹੋਤੀਤਿ ਕਤ੍ਵਾ‘ਤੇਚਾ’ਤਿਆਦਿਕਂ ਵੁਤ੍ਤਨ੍ਤਿ ਗਹੇਤਬ੍ਬਂ, ਏਕਾਨੇਕੇਸੁ ਵਤ੍ਤਮਾਨਤੋ ਨਾਮਸ੍ਮਾਤਿ ਕਿਮਤ੍ਥਂ ਅਸਤ੍ਵਭੂਤਾਯ ਕਿਰਿਯਾਯੇਕਤ੍ਤਾਦਿਸਮ੍ਬਨ੍ਧਾਭਾਵਾ ਕ੍ਰਿਯਤ੍ਥਾਚ ਤ੍ਯਾਦੀਹਿ ਯੇਵੇਕਤ੍ਤਾਦੀਨਂ ਵੁਤ੍ਤਤ੍ਤਾ ਤ੍ਯਾਦ੍ਯਨ੍ਤੇਹਿ ਚ ਨ ਭਵੇਯ੍ਯੁਨ੍ਤਿ ਪਯੋਜਨਨ੍ਤਰਮਾਹ-‘ਯਮ੍ਪਨਾ’ਤਿਆਦਿ, ਪਞ੍ਚਕਨਾਮਤ੍ਥਸ੍ਸਾਧਿਪ੍ਪੇਤਭਾਵੋ ਚੇਤ੍ਥ ਪਕ੍ਖਸ੍ਸੇਤਸ੍ਸੇਵ ਯੁਤ੍ਤਤ੍ਤਾ. ਤਥਾਹਿ ਸਙ੍ਖ੍ਯਾਕਮ੍ਮਾਦਯੋ ਨਾਮ ਵਾਚ੍ਚਸ੍ਸ ਦਬ੍ਬਸ੍ਸ ਧਮ੍ਮੋ ਸਕਤ੍ਥੋ-ਪਸਜ੍ਜਨੋ ਚ ਸਦ੍ਦੋ ਦਬ੍ਬੇਯੇਵ ਵਤ੍ਤਤੇ… ਦਬ੍ਬੇਯੇਵਾਨ੍ਯਨਯਾਦਿਵੋਹਾਰਾ, ਤਤ੍ਥ ਦਬ੍ਬਵਾਚਿਨਾ ਸਦ੍ਦੇਨ ਦਬ੍ਬਧਮ੍ਮਾਨਮਬ੍ਭਨ੍ਤਰੀਕਰਣਨ੍ਤਿ ਨਾਯੁਤ੍ਤਮੇਤਂ ਨਾਮੇਨ ਪਞ੍ਚਨ੍ਨਮਭਿਧਾਨਂ, ਵਿਭਤ੍ਤਿਯੋ ਪਨ ਜੋਤਿਕਾ, ਇਤ੍ਥਿਪਚ੍ਚਯਾ ਚ ਇਤ੍ਥਿਲਿਙ੍ਗਸ੍ਸ, ਤਥਾ ਚਾਮ੍ਹੇਹਿ ਵੁਤ੍ਤਂ ਸਮ੍ਬਨ੍ਧਚਿਨ੍ਤਾਯਂ–

ਸਦ੍ਦੋ ਸਕਤ੍ਥਂ ਵਤ੍ਵਾਨ, ਪਦਤ੍ਥਂ ਦਬ੍ਬਸਞ੍ਞਿਤਂ;

ਸਮਵੇਤਂ ਵਦੇ ਲਿਙ੍ਗਂ, ਸਙ੍ਖ੍ਯਂ ਕਮ੍ਮਾਦਿਕਮ੍ਮਿ ਚੇਤਿ.

ਏਕਾਨੇਕੇਸੁ ਸ੍ਯਾਦੀਨਂ ਯਥਾਕ੍ਕਮਂ ਦਸ੍ਸੇਤੁਂ ‘ਤੇਨਾ’ਤਿਆਦਿ ਵੁਤ੍ਤਂ, ਤੇਨਾਤਿ ਯੇਨ ਪਞ੍ਚਕੋ ਨਾਮਤ੍ਥੋ ਅਧਿਪ੍ਪੇਤੋ ਏਕਾਦੀਸੁ ਚ ਅਤ੍ਥੇਸੁ ਜੋ-ਤਨੀਯੇਸੁ ਸ੍ਯਾਦਯੋ ਵਿਧਿਯਿਸ੍ਸਨ੍ਤਿ ਤੇਨ, ਸਬ੍ਬਤ੍ਥਾਤਿ ‘ਅਂਯੋ’ਆਦੀਸੁ ਸਬ੍ਬਤ੍ਥ, ਸਭਾਵਤੋਤ੍ਯਾਦਿਕਸ੍ਸਾਯਮਧਿਪ੍ਪਾਯੋ ‘‘ਯਦ੍ਯਪਿ ਸ੍ਯਾਦਯੋ ਏਕਾਨੇਕੇਸੁ ਹੋਨ੍ਤਿ ਤਥਾਪਿ ਏਕਾਦਯੋ ਸਙ੍ਖ੍ਯਾਯ ਪਰਿਚ੍ਛਿਨ੍ਨੇ ਅਤ੍ਥੇ ਵਤ੍ਤਨ੍ਤਿ ਨ ਸਙ੍ਖ੍ਯਾਮਤ੍ਤੇ, ਸਙ੍ਖ੍ਯਾਯ ਸਮ੍ਭਵਾਭਾਵਾ ਸਙ੍ਖ੍ਯੇਯੇ ਭਵਤੀਤਿ ਨ ਸਙ੍ਖ੍ਯਾਪਿ ਸ੍ਯਾਦੀਨਮਤ੍ਥੋ’’ਤਿ (ਨ) ਕੇਵਲਂ ਸਕਤ੍ਥ ਦਬ੍ਬਾਦਿਯੇਵ ਸ੍ਯਾਦੀਨਮਤ੍ਥੋ ਨ ਭਵਤਿ, ਅਪਿ ਤੁ ਸਙ੍ਖ੍ਯਾਪੀਤ੍ਯਪਿਸਦ੍ਦਤ੍ਥੋ, ਅਨੇਨ ਸਙ੍ਖ੍ਯਾ ਵਿਭਤ੍ਯਤ੍ਥੋ ਚਤੁਕ੍ਕੋ ਨਾਮਤ੍ਥੋਤ੍ਯਯਮ੍ਪਕ੍ਖੋ ਨਿਰਾਕਤੋ ਪਞ੍ਚਕੋ ਨਾਮਤ੍ਥੋਤਿ ਦਸ੍ਸਨੇ ਸਙ੍ਖ੍ਯਾਕਮ੍ਮਾਦੀਨਂ ਵਿਭਤ੍ਤਿਯੋ ਜੋਤਿਕਾ ਹੋਨ੍ਤਿ, ਤਿਕੋ ਨਾਮਤ੍ਥੋਤਿ ਦਸ੍ਸਨੇ ਤੁ ਸਙ੍ਖ੍ਯਾਕਮ੍ਮਾਦਯੋ ਵਿਭਤ੍ਤਿਵਾਚ੍ਚਾ ਹੋਨ੍ਤਿ, ਇਦਾਨਿ ਅਧਿਪ੍ਪੇਤਪਞ੍ਚਕਨਾਮਤ੍ਥੇ ਸਕਤ੍ਥਾਦਿਕਂ ਸਰੂਪਤੋ ਦਸ੍ਸੇਤੁਂ ‘ਤਤ੍ਥਾ’ਤਿਆਦਿਮਾਹ, ਤਤ੍ਥ ਸਕਤ੍ਥੋ ਵਿਸੇਸਨਨ੍ਤਿ ਸਰੂਪਾਦਿ ਯਂ ਕਿਞ੍ਚਿ ਵਿਸੇਸਨਤ੍ਤੇਨ ਵਤ੍ਤੁਮਿਚ੍ਛਿਤਂ ਤਂ ਸਕਤ੍ਥੋ ਨਾਮਤਿ ਅਤ੍ਥੋ, ਤਂ ਦਸ੍ਸੇਤਿ ‘ਸਰੂਪਜਾਤਿਗੁਣਦਬ੍ਬਾਨਿ’ਤਿ.

ਬਲੇਨ ਯਸ੍ਸਾ ਭਿਨ੍ਨੇਸੁ, ਪਵਤ੍ਤਨ੍ਤੇ ਗਗਾਦੀਸੁ;

ਸਾ ਜਾਤ੍ਯਭਿਨ੍ਨਧੀਸਦ੍ਦਾ, ਸੁਤ੍ਤਂ ਪੁਪ੍ਫੇਸ੍ਵਿਵਾਨ੍ਵੀਤਂ.

ਦਬ੍ਬਾਧਾਰੋ ਤਤੋ ਭਿਨ੍ਨੋ, ਨਿਮਿਤ੍ਤਂ ਤਪ੍ਪਤੀਤਿਯਾ;

ਭਾਵਾਭਾਵਸਭਾਵੋ ਯੋ, ਸੋ ਗੁਣੋ ਨਿਗ੍ਗੁਣੋ ਮਤੋ.

ਸਰੂਪਂ ਸਦ੍ਦਰੂਪਂਵ, ਜਾਤਿਯਾ ਯਂ ਵਿਸੇਸਨਂ;

ਵਿਸੇਸੀਯਤਿ ਯਂਕਿਞ੍ਚਿ, ਦਬ੍ਬਂ ਤਂ ਸਮੁਦੀਰਿਤਂ.

ਇਦਾਨਿ ਸਰੂਪਾਦਿਨੋ ਵਿਸੇਸਨਸ੍ਸ ਸਕਤ੍ਥਭਾਵਂ ਜਾਤ੍ਯਾਦਿਵਿਸੇਸਸ੍ਸ ਦਬ੍ਬਭਾਵਞ੍ਚ ਦਸ੍ਸੇਤੁਂ ‘ਤਤ੍ਥਾ’ਤਿਆਦਿਮਾਹ, ਸਰੂਪੇ ਵਤ੍ਤਤੇ ਸਦ੍ਦੋਤਿ ਵਿਯਭੇਦੋਪਚਾਰੇਨਾਹ-‘ਸਦ੍ਦਸ੍ਸ ਸਰੂਪੇਨਾ’ਤਿ, ਏਤ੍ਥ ਪਨ ਗੋਤਿ ਜਾਤਿਮਤ੍ਤਵਾਚਿਨਿ ਗੋਸਦ੍ਦੇ ਪਯੁਤ੍ਤੇ ਗੋਸਦ੍ਦੋ ਜਾਤਿਮਤ੍ਤਮਾਹੇਤਿ ਸੋ ਜਾਤਿਂ ਵਿਸੇਸੇਤਿ ਨਾਮ. ਯਟ੍ਠਿਆਦਿਸਦ੍ਦੇਹਿ ਯਟ੍ਠਿਆਦਿਸਹਚਰਿਤਾ ਉਪਚਾਰਤੋ ਗਹਿਤਾਤਿ ਯਟ੍ਠਿਆਦਿਦਬ੍ਬੇਹਿ ਯਟ੍ਠਿਆਦਿਸਹਚਰਿਤਾ ਪੁਰਿਸਾ ਵਿਸੇਸੀਯਨ੍ਤੀਤਿ ਆਹ-‘ਦਬ੍ਬਮ੍ਪਿ ਦਬ੍ਬਨ੍ਤਰਸ੍ਸ ਵਿਸੇਸਨਭੂਤਮ੍ਭਵਤੀ’ਤਿ, ਯਟ੍ਠਿਯੋਪਵੇਸਯਾਤਿ ਯਟ੍ਠਿਸਦ੍ਦਵਚਨੀਯ ਯਟ੍ਠਿਦਬ੍ਬਵਿਸਿਟ੍ਠੇ ਪੁਰਿਸੇ ਪਵੇਸਯਾਤਿ ਅਤ੍ਥੋ, ਕੁਨ੍ਤੇਪਵੇਸਯਾਤਿ ਏਤ੍ਥਾਪਿ ਏਸੇਵਨਯੋ, ਯਥਾਵੁਤ੍ਤਚਤੁਬ੍ਬਿਧਸਕਤ੍ਥਤੋ ਪਰੋਪਿ ਅਤ੍ਥਿ ਸਕਤ੍ਥੋਤਿ ਆਹ-‘ਕਤ੍ਥਚੀ’ਤਿਆਦਿ, ਸਮ੍ਬਨ੍ਧਨਿਮਿਤ੍ਤੋਤਿ ਸਮ੍ਬਨ੍ਧੋ ਨਿਮਿਤ੍ਤਂ ਕਾਰਣਂ ਪਚ੍ਚਯਪ੍ਪਵਤ੍ਤਿਯਾ ਅਸ੍ਸ ਪਚ੍ਚਯਸ੍ਸ ਸੋਤਿ ਸਮਾਸੋ, ਏਤ੍ਥ ਹਿ ਦਣ੍ਡੋ ਅਸ੍ਸ ਅਤ੍ਥੀਤਿ ਅਸ੍ਸਾਤਿ ਸਾਮਿਨੋ ਪੁਰਿਸਸ੍ਸ ਸਂਸਙ੍ਖਾਤਦਣ੍ਡਾਦਿਦਬ੍ਬੇਨ ਸਹਯੋ ਸਸ੍ਸਾਮਿਸਮ੍ਬਨ੍ਧੋ, ਸੋਪਿ ਪਚ੍ਚਯਸ੍ਸ ਨਿਮਿਤ੍ਤਂ, ਤਥਾ ਚ ਵਕ੍ਖਤਿ-‘ਦਣ੍ਡਪੁਰਿਸਸਮ੍ਬਨ੍ਧਾ ਦਣ੍ਡੀਤਿ ਪਚ੍ਚਯੋ’ਤਿ, (ਕਿਰਿ)ਯਾ ਪਦਤ੍ਥਸ੍ਸਾਪਿ ਵਿਸੇਸਨਤ੍ਤੇਨ ਸਕਤ੍ਥਭਾਵੋ ਜਾਤਿਪਦਤ੍ਥਾਦੀਨਂ ਵੁਤ੍ਤ ਠਾਨੇਯੇਵ ਵਤ੍ਤਬ੍ਬੋਤਿ ਪਾਚਕੋਤਿ ਏਤ੍ਥ ਕਿਰਿਯਾਕਾਰਕਸਮ੍ਬਨ੍ਧਸਙ੍ਖਾਤਂ ਪਰਾਭਿਮਤਂ ਸਕਤ੍ਥਮ੍ਪਿ ਪਰੋਪਦੇਸੇਨੋਪਦਿਸਿਤੁਕਾਮੋ ਇਧ ਸਮ੍ਬਨ੍ਧਸਕਤ੍ਥਸ੍ਸ ਵੁਤ੍ਤਟ੍ਠਾਨੇਯੇਵ ਕਿਰਿਯਾਸਕਤ੍ਥਂ ਦਸ੍ਸੇਤੁਂ ‘ਕਤ੍ਥਚਿ ਕਿਰਿਯਾਪੀ’ਤਿਆਦਿਮਾਹ. ਨਾਮਸਭਾਵੇਨ ਵਿਞ੍ਞਾਯਮਾਨਂ ਪਞ੍ਚਮਂ ਨਾਮਸਙ੍ਖਾਤਮਤ੍ਥਂ ਦਬ੍ਬਪਦਤ੍ਥੇਨ ਸਙ੍ਗਹੇਤ੍ਵਾ ਜਾਤਿਗੁਣਕਿਰਿਯਾਦਬ੍ਬਾਨੀਤਿ ਹਿ ਚਤੁਬ੍ਬਿਧੋ ਨਾਮਤ੍ਥੋ, ਨਾਮਮ੍ਪਿ ਅਨ੍ਵਤ੍ਥਰੁਲ਼੍ਹਿਵਸੇਨ ਦੁਵਿਧਂ ਪੁਮਿਤ੍ਥਿਨਪੁਂਸਕ ਲਿਙ੍ਗਵਸੇਨ ਤਿਵਿਧਮ੍ਪਿ ਚਤੁਬ੍ਬਿਧਂ ਹੋਤਿ… ਯਥਾਵੁਤ੍ਤੇ ਚਤੁਬ੍ਬਿਧੇ ਅਤ੍ਥੇ ਨਮਤਿ, ਤੇ ਵਾ ਅਤ੍ਤਨਿ ਨਾਮੇਤੀਤਿ ਇਮਿਨਾ ਕਾਰਣੇਨ. ਸਾਮਞ੍ਞਗੁਣ ਕਿਰਿਯਾਯਦਿਚ੍ਛਾਵਸੇਨਾਞ੍ਞਥਾਪਿ ਚਤੁਬ੍ਬਿਧਤ੍ਤਂ ਨਾਮਸ੍ਸ ਵਦਨ੍ਤਿ, ਤਤ੍ਥਾਪਿ ਯਦਿਚ੍ਛਾਨਾਮਸ੍ਸ ਦਬ੍ਬਨਾਮੇਨੇਵ ਸਙ੍ਗਹੋ ਵੇਦਿਤਬ੍ਬੋ, ਇਤ੍ਥਤ੍ਤਂ ਏਸਾਤਿ ਪਸਿਦ੍ਧਿਮਾ ਅਤ੍ਥੋ, ਯਮ੍ਪਨਾਤਿਆਦਿਨਾ ਵੁਤ੍ਤਮੇਵਤ੍ਥਂ ਸਾਧੇਤਿ ‘ਤਤ੍ਥੇ’ਚ੍ਚਾਦਿਨਾ, ਅਭਿਧਾਯਕਤ੍ਤੇਨ ਜੋਤਕਤ੍ਤੇਨ, ਇਕਾਰਨ੍ਤਤੋਤਿ ਮੁਨਿਸਦ੍ਦਤੋ, ਅਞ੍ਞਥਾਤਿ ਇਕਾਰਨ੍ਤਤੋ ਨ ਭਵਤਿ ਚੇ, ਅਤੋਤਿ ਆਦੇਸ ਭਵਨਤੋ ਫਲਂ ਦਸ੍ਸਿਤਂ ਨ ਸਿਯਾਤਿ ਸਮ੍ਬਨ੍ਧੋ, ਵੁਤ੍ਤਿਯਂ ‘ਏਵਂ ਕੁਮਾਰੀ ਕੁਮਾਰਿਯੋ’ਤਿਆਦੀਸੁ ਏਵਨ੍ਤਿ ਯਥਾ ਪੁਲ੍ਲਿਙ੍ਗੇ ਇਕਾਰਨ੍ਤਤੋ ਸ੍ਯਾਦੀਨਮੁਦਾਹਰਣਮਨਾਦੇਸਤ੍ਥਂ ਵੁਤ੍ਤਂ ਏਵਮਿਤ੍ਥਿਯਮ੍ਪਿ ਅਨਾਕਾਰਨ੍ਤਤੋਤਿ ਦਸ੍ਸੇਤਿ, ਉਪਲਕ੍ਖਣਂ ਚੇਤਮਿਨੀ-ਨੀ-ਊ-ਤਿ-ਪਚ੍ਚਯਨ੍ਤਾਦੀਨਂ, ਅਸਤਿ…ਪੇ… ਵਚਨੇਤਿ ਇਮਿਨਾ ਪਾਣਿਨਿਯਾਨਂ ਵਿਭਤ੍ਤਿਸਞ੍ਞਾਵਿਧਾਯਕਸ੍ਸ ਸੁਤ੍ਤਨ੍ਤਰਸ੍ਸ ਅਤ੍ਥਿਭਾਵਂ ਦਸ੍ਸੇਤਿ, ‘‘ਵਿਭਤ੍ਤਿਚ’’ (੧-੪-੧੦੪) ਇਤਿ ਹਿ ਤੇਸਂ ਸੁਤ੍ਤਂ, ਤਸ੍ਸਤ੍ਥੋ ‘ਸ੍ਯਾਦੀਨਂ ਤ੍ਯਾਦੀਨਞ੍ਚ ਵਿਭਤ੍ਤਿਸਞ੍ਞਾ ਹੋਤੀ’ਤਿ, ਭਵਨ੍ਤੀਤਿ ਅਨ੍ਵਤ੍ਥਵਸੇਨ ਵਿਭਤ੍ਤਿਸਦ੍ਦਵਚਨੀਯਾਨਿ ਭਵਨ੍ਤਿ, ਸੋ (ਯੇਵਤ੍ਥੋ) ਵਿਭਤ੍ਤਿਚ੍ਚਨੇਨ ਵਿਭਜੀਯਤੀਤਿ ਵਿਭਤ੍ਤਿ, ਕਮ੍ਮੇ ਕ੍ਤਿਪ੍ਪਚ੍ਚਯਨ੍ਤੋਯਂ ਵਿਭਤ੍ਤਿ ਸਦ੍ਦੋਤਿ ਦਸ੍ਸੇਤਿ, ਕਥਮ੍ਪਨੇਤੇਸੁ ਸ੍ਯਾਦੀਸੁ ਵਿਭਜੀਯਤਿਚ੍ਚਸ੍ਸ ਵਾਕ੍ਯਤ੍ਥਾਸ੍ਸਾਨੁਗਮੋ ਯੇਨੇਵਂ ਵੁਚ੍ਚਤਿਚ੍ਚਾਸਙ੍ਕਿਯ ਯੇਨ ਯਥਾ ਚ ਵਿਭਜੀਯਤਿ ਤਮੁਪਦਸ੍ਸੇਨ੍ਤੋ ਆਹ-‘ਤਥਾ ਹਿ’ਚ੍ਚਾਦਿ.