੧੮. ਵਾਨੁ

‘‘ਛਟ੍ਠਿਯਨ੍ਤਸ੍ਸੇ’’ਤ੍ਯਨੇਨੇਵਾਵਿਸੇਸੇਨ ਵਾਨੁਬਨ੍ਧਕਾਰਿਯੇਪ੍ਯਨ੍ਤਸ੍ਸ ਸਿਦ੍ਧੇ ਕਿਮਤ੍ਥੋਯਮਾਰਮ੍ਭੋਤ੍ਯਾਸਙ੍ਕਿਯ ਟਾਨੁਬਨ੍ਧਾਤ੍ਯਾਦਿਨਾ ਵਚਨਫਲਮੁਪਦਸ੍ਸੇਨ੍ਤੋ ‘ਬਾਧਕਬਾਧਨਤ੍ਥੋ-ਯਮਾਰਮ੍ਭੋ’ਤਿ-ਵਦਤਿ, ਤਥਾਹਿ ‘‘ਛਟ੍ਠਿਯਨ੍ਤਸ੍ਸੇ’’ਤ੍ਯਸ੍ਸ ਬਾਧਕੋ ‘‘ਟਾਨੁਬਨ੍ਧਾਨੇਕਵਣ੍ਣਾ ਸਬ੍ਬਸ੍ਸੇ’’ਤਿ, ਤਸ੍ਸ ਚ ‘‘ਵਾਨੁਬਨ੍ਧੋ’’ਤ੍ਯਯਂ ਯੋਗੋ ਬਾਧਕੋਤਿ ਬਾਧਕਬਾਧਨਤ੍ਥੋ ਸਮ੍ਪਜ੍ਜਤੇ, ਅਪਇਚ੍ਚਯਮੁਪਸਗ੍ਗੋ ਵਜ੍ਜਨੇ ਨੀਵਾਰਣੇ, ਪਨਯਨੇ ਵਾ ਵਤ੍ਤਤੇਤਿ ਅਪੋਦ੍ਯਨ੍ਤੇ ਉਸ੍ਸਗ੍ਗਲਕ੍ਖਣਾਨਿ ਵਜ੍ਜੀਯਨ੍ਤੇ ਨੀਵਾਰੀਯਨ੍ਤੇ ਅਪਨੀਯਨ੍ਤੇ ਨੇਨੇਤ੍ਯਪਵਾਦੋ, ਸੁਤ੍ਤੇਕਦੇਸੇਨ ਸੁਤ੍ਤਮੇਵੋਪਲਕ੍ਖਿਤਨ੍ਤਿ ਅਨ੍ਤਸ੍ਸ‘ਛਟ੍ਠਿਯਨ੍ਤਸ੍ਸਾ’ਤਿ ਸੁਤ੍ਤਸ੍ਸ ਅਪਵਾਦੋ ਅਨ੍ਤਾਪਵਾਦੋ, ਉਸ੍ਸਜ੍ਜਤੇ ਨਿਵਤ੍ਤੀਯਤ੍ਯਪਵਾਦੇਨੇਤ੍ਯੁਸ੍ਸਗ੍ਗੋ, ਉਸ੍ਸਗ੍ਗਾਪਵਾਦਕ੍ਕਮੋ ਪਨੇਤ੍ਥ ਏਵਂ ਵੇਦਿਤਬ੍ਬੋ ‘‘ਛਟ੍ਠਿਯਨ੍ਤਸ੍ਸੇ’’ਤ੍ਯੁਸ੍ਸਗ੍ਗੋ, ਤਦਪਵਾਦਾ ‘‘ਟਾਨੁਬਨ੍ਧਾਨੇਕਵਣ੍ਣਾ ਸਬ੍ਬਸ੍ਸ’’ ‘‘ਉਕਾਨੁਬਨ੍ਧਾਦ੍ਯਨ੍ਤਾ’’ ‘‘ਮਾਨੁਬਨ੍ਧੋ ਸਰਾ ਨਮਨ੍ਤਾ ਪਰੋ’’ਤਿ, ‘‘ਟਾਨੁਬਨ੍ਧਾਨੇਕਵਣ੍ਣਾ ਸਬ੍ਬਸ੍ਸੇ’’ਤ੍ਯੁਸ੍ਸਗ੍ਗੋ, ਤਦ ਪਵਾਦਾ ‘‘ਵਾਨੁਬਨ੍ਧੋ’’ ‘‘ਮਾਨੁਬਨ੍ਧੋ ਸਰਾਨਮਨ੍ਤਾ ਪਰੋ’’ਤਿ.