૮. સહધમ્મિકવગ્ગો

૧૭૨. ભિક્ખૂહિ સહધમ્મિકં વુચ્ચમાનો – ‘‘ન તાવાહં, આવુસો, એતસ્મિં સિક્ખાપદે સિક્ખિસ્સામિ યાવ ન અઞ્ઞં ભિક્ખું બ્યત્તં વિનયધરં પરિપુચ્છિસ્સામી’’તિ ભણન્તો દ્વે આપત્તિયો આપજ્જતિ. ભણતિ, પયોગે દુક્કટં; ભણિતે આપત્તિ પાચિત્તિયસ્સ.

વિનયં વિવણ્ણેન્તો દ્વે આપત્તિયો આપજ્જતિ. વિવણ્ણેતિ, પયોગે દુક્કટં; વિવણ્ણિતે આપત્તિ પાચિત્તિયસ્સ.

મોહેન્તો દ્વે આપત્તિયો આપજ્જતિ. અનારોપિતે મોહે મોહેતિ, આપત્તિ દુક્કટસ્સ; આરોપિતે મોહે મોહેતિ, આપત્તિ પાચિત્તિયસ્સ.

ભિક્ખુસ્સ કુપિતો અનત્તમનો પહારં દેન્તો દ્વે આપત્તિયો આપજ્જતિ. પહરતિ, પયોગે દુક્કટં; પહતે આપત્તિ પાચિત્તિયસ્સ.

ભિક્ખુસ્સ કુપિતો અનત્તમનો તલસત્તિકં ઉગ્ગિરન્તો દ્વે આપત્તિયો આપજ્જતિ. ઉગ્ગિરતિ, પયોગે દુક્કટં; ઉગ્ગિરિતે આપત્તિ પાચિત્તિયસ્સ.

ભિક્ખું અમૂલકેન સઙ્ઘાદિસેસેન અનુદ્ધંસેન્તો દ્વે આપત્તિયો આપજ્જતિ. અનુદ્ધંસેતિ, પયોગે દુક્કટં; અનુદ્ધંસિતે આપત્તિ પાચિત્તિયસ્સ.

ભિક્ખુસ્સ સઞ્ચિચ્ચ કુક્કુચ્ચં ઉપદહન્તો દ્વે આપત્તિયો આપજ્જતિ. ઉપદહતિ, પયોગે દુક્કટં; ઉપદહિતે આપત્તિ પાચિત્તિયસ્સ.

ભિક્ખૂનં ભણ્ડનજાતાનં કલહજાતાનં વિવાદાપન્નાનં ઉપસ્સુતિં તિટ્ઠન્તો દ્વે આપત્તિયો આપજ્જતિ. ‘‘સોસ્સામી’’તિ ગચ્છતિ, આપત્તિ દુક્કટસ્સ; યત્થ ઠિતો સુણાતિ, આપત્તિ પાચિત્તિયસ્સ.

ધમ્મિકાનં કમ્માનં છન્દં દત્વા પચ્છા ખીયનધમ્મં આપજ્જન્તો દ્વે આપત્તિયો આપજ્જતિ. ખિય્યતિ, પયોગે દુક્કટં; ખિય્યિતે આપત્તિ પાચિત્તિયસ્સ.

સઙ્ઘે વિનિચ્છયકથાય વત્તમાનાય છન્દં અદત્વા ઉટ્ઠાયાસના પક્કમન્તો દ્વે આપત્તિયો આપજ્જતિ. પરિસાય હત્થપાસં વિજહન્તસ્સ આપત્તિ દુક્કટસ્સ; વિજહિતે આપત્તિ પાચિત્તિયસ્સ.

સમગ્ગેન સઙ્ઘેન ચીવરં દત્વા પચ્છા ખીયનધમ્મં આપજ્જન્તો દ્વે આપત્તિયો આપજ્જતિ. ખિય્યતિ, પયોગે દુક્કટં; ખિય્યિતે આપત્તિ પાચિત્તિયસ્સ.

જાનં સઙ્ઘિકં લાભં પરિણતં પુગ્ગલસ્સ પરિણામેન્તો દ્વે આપત્તિયો આપજ્જતિ. પરિણામેતિ, પયોગે દુક્કટં; પરિણામિતે આપત્તિ પાચિત્તિયસ્સ.

સહધમ્મિકવગ્ગો અટ્ઠમો.