૯. રાજવગ્ગો

૧૭૩. પુબ્બે અપ્પટિસંવિદિતો રઞ્ઞો અન્તેપુરં પવિસન્તો દ્વે આપત્તિયો આપજ્જતિ. પઠમં પાદં ઉમ્મારં અતિક્કામેતિ, આપત્તિ દુક્કટસ્સ; દુતિયં પાદં અતિક્કામેતિ, આપત્તિ પાચિત્તિયસ્સ.

રતનં ઉગ્ગણ્હન્તો દ્વે આપત્તિયો આપજ્જતિ. ગણ્હાતિ, પયોગે દુક્કટં; ગહિતે આપત્તિ પાચિત્તિયસ્સ.

સન્તં ભિક્ખું અનાપુચ્છા વિકાલે ગામં પવિસન્તો દ્વે આપત્તિયો આપજ્જતિ. પઠમં પાદં પરિક્ખેપં અતિક્કામેતિ, આપત્તિ દુક્કટસ્સ; દુતિયં પાદં અતિક્કામેતિ, આપત્તિ પાચિત્તિયસ્સ.

અટ્ઠિમયં વા દન્તમયં વા વિસાણમયં વા સૂચિઘરં કારાપેન્તો દ્વે આપત્તિયો આપજ્જતિ. કારાપેતિ, પયોગે દુક્કટં; કારાપિતે આપત્તિ પાચિત્તિયસ્સ.

પમાણાતિક્કન્તં મઞ્ચં વા પીઠં વા કારાપેન્તો દ્વે આપત્તિયો આપજ્જતિ. કારાપેતિ, પયોગે દુક્કટં; કારાપિતે આપત્તિ પાચિત્તિયસ્સ.

મઞ્ચં વા પીઠં વા તૂલોનદ્ધં કારાપેન્તો દ્વે આપત્તિયો આપજ્જતિ. કારાપેતિ, પયોગે દુક્કટં; કારાપિતે આપત્તિ પાચિત્તિયસ્સ.

પમાણાતિક્કન્તં નિસીદનં કારાપેન્તો દ્વે આપત્તિયો આપજ્જતિ. કારાપેતિ, પયોગે દુક્કટં; કારાપિતે આપત્તિ પાચિત્તિયસ્સ.

પમાણાતિક્કન્તં કણ્ડુપ્પટિચ્છાદિં કારાપેન્તો દ્વે આપત્તિયો આપજ્જતિ. કારાપેતિ, પયોગે દુક્કટં; કારાપિતે આપત્તિ પાચિત્તિયસ્સ.

પમાણાતિક્કન્તં વસ્સિકસાટિકં કારાપેન્તો દ્વે આપત્તિયો આપજ્જતિ. કારાપેતિ, પયોગે દુક્કટં; કારાપિતે આપત્તિ પાચિત્તિયસ્સ.

ચીવરં કારાપેન્તો કતિ આપત્તિયો આપજ્જતિ? સુગતચીવરપ્પમાણં ચીવરં કારાપેન્તો દ્વે આપત્તિયો આપજ્જતિ. કારાપેતિ, પયોગે દુક્કટં; કારાપિતે આપત્તિ પાચિત્તિયસ્સ – સુગતચીવરપ્પમાણં ચીવરં કારાપેન્તો ઇમા દ્વે આપત્તિયો આપજ્જતિ.

રાજવગ્ગો નવમો. ખુદ્દકા નિટ્ઠિતા.