૭. સપ્પાણકવગ્ગો

૧૭૧. સઞ્ચિચ્ચ પાણં જીવિતા વોરોપેન્તો કતિ આપત્તિયો આપજ્જતિ? સઞ્ચિચ્ચ પાણં જીવિતા વોરોપેન્તો ચતસ્સો આપત્તિયો આપજ્જતિ. અનોદિસ્સ ઓપાતં ખણતિ – ‘‘યો કોચિ પપતિત્વા મરિસ્સતી’’તિ, આપત્તિ દુક્કટસ્સ; મનુસ્સો તસ્મિં પપતિત્વા મરતિ, આપત્તિ પારાજિકસ્સ; યક્ખો વા પેતો વા તિરચ્છાનગતમનુસ્સવિગ્ગહો વા તસ્મિં પપતિત્વા મરતિ, આપત્તિ થુલ્લચ્ચયસ્સ; તિરચ્છાનગતો તસ્મિં પપતિત્વા મરતિ, આપત્તિ પાચિત્તિયસ્સ – સઞ્ચિચ્ચ પાણં જીવિતા વોરોપેન્તો ઇમા ચતસ્સો આપત્તિયો આપજ્જતિ.

જાનં સપ્પાણકં ઉદકં પરિભુઞ્જન્તો દ્વે આપત્તિયો આપજ્જતિ. પરિભુઞ્જતિ, પયોગે દુક્કટં; પરિભુત્તે આપત્તિ પાચિત્તિયસ્સ.

જાનં યથાધમ્મં નિહતાધિકરણં પુનકમ્માય ઉક્કોટેન્તો દ્વે આપત્તિયો આપજ્જતિ. ઉક્કોટેતિ, પયોગે દુક્કટં; ઉક્કોટિતે આપત્તિ પાચિત્તિયસ્સ.

ભિક્ખુસ્સ જાનં દુટ્ઠુલ્લં આપત્તિં પટિચ્છાદેન્તો એકં આપત્તિં આપજ્જતિ. પાચિત્તિયં.

જાનં ઊનવીસતિવસ્સં પુગ્ગલં ઉપસમ્પાદેન્તો દ્વે આપત્તિયો આપજ્જતિ. ઉપસમ્પાદેતિ, પયોગે દુક્કટં; ઉપસમ્પાદિતે આપત્તિ પાચિત્તિયસ્સ.

જાનં થેય્યસત્થેન સદ્ધિં સંવિધાય એકદ્ધાનમગ્ગં પટિપજ્જન્તો દ્વે આપત્તિયો આપજ્જતિ. પટિપજ્જતિ, પયોગે દુક્કટં; પટિપન્ને આપત્તિ પાચિત્તિયસ્સ.

માતુગામેન સદ્ધિં સંવિધાય એકદ્ધાનમગ્ગં પટિપજ્જન્તો દ્વે આપત્તિયો આપજ્જતિ. પટિપજ્જતિ, પયોગે દુક્કટં; પટિપન્ને આપત્તિ પાચિત્તિયસ્સ.

પાપિકાય દિટ્ઠિયા યાવતતિયં સમનુભાસનાય ન પટિનિસ્સજ્જન્તો દ્વે આપત્તિયો આપજ્જતિ. ઞત્તિયા દુક્કટં; કમ્મવાચાપરિયોસાને આપત્તિ પાચિત્તિયસ્સ.

જાનં તથાવાદિના ભિક્ખુના અકટાનુધમ્મેન તં દિટ્ઠિં અપ્પટિનિસ્સટ્ઠેન સદ્ધિં સમ્ભુઞ્જન્તો દ્વે આપત્તિયો આપજ્જતિ. સમ્ભુઞ્જતિ, પયોગે દુક્કટં; સમ્ભુત્તે આપત્તિ પાચિત્તિયસ્સ.

જાનં તથાનાસિતં સમણુદ્દેસં ઉપલાપેન્તો દ્વે આપત્તિયો આપજ્જતિ. ઉપલાપેતિ, પયોગે દુક્કટં; ઉપલાપિતે આપત્તિ પાચિત્તિયસ્સ.

સપ્પાણકવગ્ગો સત્તમો.