૧. પારાજિકકણ્ડં

૨૪૯. કાયસંસગ્ગં સાદિયનપચ્ચયા કતિ આપત્તિયો આપજ્જતિ? કાયસંસગ્ગં સાદિયનપચ્ચયા પઞ્ચ આપત્તિયો આપજ્જતિ. અવસ્સુતા ભિક્ખુની અવસ્સુતસ્સ પુરિસપુગ્ગલસ્સ અધક્ખકં ઉબ્ભજાણુમણ્ડલં ગહણં સાદિયતિ, આપત્તિ પારાજિકસ્સ; ભિક્ખુ કાયેન કાયં આમસતિ, આપત્તિ સઙ્ઘાદિસેસસ્સ; કાયેન કાયપટિબદ્ધં આમસતિ, આપત્તિ થુલ્લચ્ચયસ્સ; કાયપટિબદ્ધેન કાયપટિબદ્ધં આમસતિ, આપત્તિ દુક્કટસ્સ; અઙ્ગુલિપતોદકે પાચિત્તિયં – કાયસંસગ્ગં સાદિયનપચ્ચયા ઇમા પઞ્ચ આપત્તિયો આપજ્જતિ.

વજ્જપ્પટિચ્છાદનપચ્ચયા કતિ આપત્તિયો આપજ્જતિ? વજ્જપ્પટિચ્છાદનપચ્ચયા ચતસ્સો આપત્તિયો આપજ્જતિ. ભિક્ખુની જાનં પારાજિકં ધમ્મં [ધમ્મં અજ્ઝાપન્નં (સ્યા.)] પટિચ્છાદેતિ, આપત્તિ પારાજિકસ્સ; વેમતિકા પટિચ્છાદેતિ, આપત્તિ થુલ્લચ્ચયસ્સ; ભિક્ખુ સઙ્ઘાદિસેસં પટિચ્છાદેતિ, આપત્તિ પાચિત્તિયસ્સ; આચારવિપત્તિં પટિચ્છાદેતિ, આપત્તિ દુક્કટસ્સ – વજ્જપ્પટિચ્છાદનપચ્ચયા ઇમા ચતસ્સો આપત્તિયો આપજ્જતિ.

યાવતતિયં સમનુભાસનાય ન પટિનિસ્સજ્જનપચ્ચયા કતિ આપત્તિયો આપજ્જતિ? યાવતતિયં સમનુભાસનાય ન પટિનિસ્સજ્જનપચ્ચયા પઞ્ચ આપત્તિયો આપજ્જતિ. ઉક્ખિત્તાનુવત્તિકા ભિક્ખુની યાવતતિયં સમનુભાસનાય ન પટિનિસ્સજ્જતિ, ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ પારાજિકસ્સ; ભેદકાનુવત્તિકા ભિક્ખુની યાવતતિયં સમનુભાસનાય ન પટિનિસ્સજ્જતિ, આપત્તિ સઙ્ઘાદિસેસસ્સ; પાપિકાય દિટ્ઠિયા યાવતતિયં સમનુભાસનાય ન પટિનિસ્સજ્જતિ, આપત્તિ પાચિત્તિયસ્સ – યાવતતિયં સમનુભાસનાય ન પટિનિસ્સજ્જનપચ્ચયા ઇમા પઞ્ચ આપત્તિયો આપજ્જતિ.

અટ્ઠમં વત્થું પરિપૂરણપચ્ચયા કતિ આપત્તિયો આપજ્જતિ? અટ્ઠમં વત્થું પરિપૂરણપચ્ચયા તિસ્સો આપત્તિયો આપજ્જતિ. પુરિસેન – ‘‘ઇત્થન્નામં ઓકાસં આગચ્છા’’તિ વુત્તા ગચ્છતિ, આપત્તિ દુક્કટસ્સ; પુરિસસ્સ હત્થપાસં ઓક્કન્તમત્તે આપત્તિ થુલ્લચ્ચયસ્સ; અટ્ઠમં વત્થું પરિપૂરેતિ, આપત્તિ પારાજિકસ્સ – અટ્ઠમં વત્થું પરિપૂરણપચ્ચયા ઇમા તિસ્સો આપત્તિયો આપજ્જતિ.

પારાજિકા નિટ્ઠિતા.