૨. સઙ્ઘાદિસેસકણ્ડાદિ

૨૫૦. ઉસ્સયવાદિકા ભિક્ખુની અડ્ડં કરણપચ્ચયા તિસ્સો આપત્તિયો આપજ્જતિ. એકસ્સ આરોચેતિ, આપત્તિ દુક્કટસ્સ; દુતિયસ્સ આરોચેતિ, આપત્તિ થુલ્લચ્ચયસ્સ; અડ્ડપરિયોસાને આપત્તિ સઙ્ઘાદિસેસસ્સ.

ચોરિં વુટ્ઠાપનપચ્ચયા તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

એકા ગામન્તરં ગમનપચ્ચયા તિસ્સો આપત્તિયો આપજ્જતિ. ગચ્છતિ, આપત્તિ દુક્કટસ્સ; પઠમં પાદં પરિક્ખેપં અતિક્કામેતિ, આપત્તિ થુલ્લચ્ચયસ્સ; દુતિયં પાદં અતિક્કામેતિ, આપત્તિ સઙ્ઘાદિસેસસ્સ.

સમગ્ગેન સઙ્ઘેન ઉક્ખિત્તં ભિક્ખુનિં ધમ્મેન વિનયેન સત્થુસાસનેન અનપલોકેત્વા કારકસઙ્ઘં અનઞ્ઞાય ગણસ્સ છન્દં ઓસારણપચ્ચયા તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

અવસ્સુતા ભિક્ખુની અવસ્સુતસ્સ પુરિસપુગ્ગલસ્સ હત્થતો ખાદનીયં વા ભોજનીયં વા સહત્થા પટિગ્ગહેત્વા ભુઞ્જનપચ્ચયા તિસ્સો આપત્તિયો આપજ્જતિ. ‘‘ખાદિસ્સામિ ભુઞ્જિસ્સામી’’તિ પટિગ્ગણ્હાતિ, આપત્તિ થુલ્લચ્ચયસ્સ; અજ્ઝોહારે અજ્ઝોહારે આપત્તિ સઙ્ઘાદિસેસસ્સ; ઉદકદન્તપોનં પટિગ્ગણ્હાતિ, આપત્તિ દુક્કટસ્સ.

‘‘કિં તે, અય્યે, એસો પુરિસપુગ્ગલો કરિસ્સતિ અવસ્સુતો વા અનવસ્સુતો વા, યતો ત્વં અનવસ્સુતા! ઇઙ્ઘ, અય્યે, યં તે એસો પુરિસપુગ્ગલો દેતિ ખાદનીયં વા ભોજનીયં વા તં ત્વં સહત્થા પટિગ્ગહેત્વા ખાદ વા ભુઞ્જ વા’’તિ, ઉય્યોજનપચ્ચયા તિસ્સો આપત્તિયો આપજ્જતિ. તસ્સા વચનેન ખાદિસ્સામિ ભુઞ્જિસ્સામીતિ પટિગ્ગણ્હાતિ, આપત્તિ દુક્કટસ્સ; અજ્ઝોહારે અજ્ઝોહારે આપત્તિ થુલ્લચ્ચયસ્સ; ભોજનપરિયોસાને આપત્તિ સઙ્ઘાદિસેસસ્સ.

કુપિતા ભિક્ખુની યાવતતિયં સમનુભાસનાય ન પટિનિસ્સજ્જનપચ્ચયા તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

કિસ્મિઞ્ચિદેવ અધિકરણે પચ્ચાકતા ભિક્ખુની યાવતતિયં સમનુભાસનાય ન પટિનિસ્સજ્જનપચ્ચયા તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

સંસટ્ઠા ભિક્ખુની યાવતતિયં સમનુભાસનાય ન પટિનિસ્સજ્જનપચ્ચયા તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

‘‘સંસટ્ઠાવ, અય્યે, તુમ્હે વિહરથ, મા તુમ્હે નાના વિહરિત્થા’’તિ ઉય્યોજેન્તી યાવતતિયં સમનુભાસનાય ન પટિનિસ્સજ્જનપચ્ચયા તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

દસ સઙ્ઘાદિસેસા નિટ્ઠિતા…પે….

(યથા હેટ્ઠા તથા વિત્થારેતબ્બા પચ્ચયમેવ નાનાકરણં)

દધિં વિઞ્ઞાપેત્વા ભુઞ્જનપચ્ચયા કતિ આપત્તિયો આપજ્જતિ? દધિં વિઞ્ઞાપેત્વા ભુઞ્જનપચ્ચયા દ્વે આપત્તિયો આપજ્જતિ. ભુઞ્જિસ્સામીતિ પટિગ્ગણ્હાતિ, આપત્તિ દુક્કટસ્સ; અજ્ઝોહારે અજ્ઝોહારે આપત્તિ પાટિદેસનીયસ્સ – દધિં વિઞ્ઞાપેત્વા ભુઞ્જનપચ્ચયા ઇમા દ્વે આપત્તિયો આપજ્જતિ.

કતાપત્તિવારો નિટ્ઠિતો દુતિયો.