૨. કતાપત્તિવારો

૧. પારાજિકકણ્ડં

૨૨૮. અવસ્સુતા ભિક્ખુની અવસ્સુતસ્સ પુરિસપુગ્ગલસ્સ કાયસંસગ્ગં સાદિયન્તી કતિ આપત્તિયો આપજ્જતિ? અવસ્સુતા ભિક્ખુની અવસ્સુતસ્સ પુરિસપુગ્ગલસ્સ કાયસંસગ્ગં સાદિયન્તી તિસ્સો આપત્તિયો આપજ્જતિ. અધક્ખકં ઉબ્ભજાણુમણ્ડલં ગહણં સાદિયતિ, આપત્તિ પારાજિકસ્સ; ઉબ્ભક્ખકં અધોજાણુમણ્ડલં ગહણં સાદિયતિ, આપત્તિ થુલ્લચ્ચયસ્સ; કાયપટિબદ્ધં ગહણં સાદિયતિ, આપત્તિ દુક્કટસ્સ – અવસ્સુતા ભિક્ખુની અવસ્સુતસ્સ પુરિસપુગ્ગલસ્સ કાયસંસગ્ગં સાદિયન્તી ઇમા તિસ્સો આપત્તિયો આપજ્જતિ.

વજ્જપ્પટિચ્છાદિકા ભિક્ખુની વજ્જં પટિચ્છાદેન્તી કતિ આપત્તિયો આપજ્જતિ? વજ્જપ્પટિચ્છાદિકા ભિક્ખુની વજ્જં પટિચ્છાદેન્તી તિસ્સો આપત્તિયો આપજ્જતિ. જાનં પારાજિકં ધમ્મં પટિચ્છાદેતિ, આપત્તિ પારાજિકસ્સ; વેમતિકા પટિચ્છાદેતિ, આપત્તિ થુલ્લચ્ચયસ્સ; આચારવિપત્તિં પટિચ્છાદેતિ, આપત્તિ દુક્કટસ્સ – વજ્જપ્પટિચ્છાદિકા ભિક્ખુની વજ્જં પટિચ્છાદેન્તી ઇમા તિસ્સો આપત્તિયો આપજ્જતિ.

ઉક્ખિત્તાનુવત્તિકા ભિક્ખુની યાવતતિયં સમનુભાસનાય ન પટિનિસ્સજ્જન્તી કતિ આપત્તિયો આપજ્જતિ? ઉક્ખિત્તાનુવત્તિકા ભિક્ખુની યાવતતિયં સમનુભાસનાય ન પટિનિસ્સજ્જન્તી તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ પારાજિકસ્સ – ઉક્ખિત્તાનુવત્તિકા ભિક્ખુની યાવતતિયં સમનુભાસનાય ન પટિનિસ્સજ્જન્તી ઇમા તિસ્સો આપત્તિયો આપજ્જતિ.

અટ્ઠમં વત્થું પરિપૂરેન્તી કતિ આપત્તિયો આપજ્જતિ? અટ્ઠમં વત્થું પરિપૂરેન્તી તિસ્સો આપત્તિયો આપજ્જતિ. પુરિસેન – ‘‘ઇત્થન્નામં ઓકાસં [ઇત્થન્નામં ગહનં (સી.), ઇત્થન્નામં ગબ્ભં (સ્યા.)] આગચ્છા’’તિ વુત્તા ગચ્છતિ, આપત્તિ દુક્કટસ્સ; પુરિસસ્સ હત્થપાસં ઓક્કન્તમત્તે આપત્તિ થુલ્લચ્ચયસ્સ; અટ્ઠમં વત્થું પરિપૂરેતિ, આપત્તિ પારાજિકસ્સ – અટ્ઠમં વત્થું પરિપૂરેન્તી ઇમા તિસ્સો આપત્તિયો આપજ્જતિ.

પારાજિકા નિટ્ઠિતા.

૨. સઙ્ઘાદિસેસકણ્ડં

૨૨૯. ઉસ્સયવાદિકા ભિક્ખુની અડ્ડં કરોન્તી તિસ્સો આપત્તિયો આપજ્જતિ. એકસ્સ આરોચેતિ, આપત્તિ દુક્કટસ્સ; દુતિયસ્સ આરોચેતિ, આપત્તિ થુલ્લચ્ચયસ્સ; અડ્ડપરિયોસાને આપત્તિ સઙ્ઘાદિસેસસ્સ.

ચોરિં વુટ્ઠાપેન્તી તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

એકા ગામન્તરં ગચ્છન્તી તિસ્સો આપત્તિયો આપજ્જતિ. ગચ્છતિ, આપત્તિ દુક્કટસ્સ; પઠમં પાદં પરિક્ખેપં અતિક્કામેતિ, આપત્તિ થુલ્લચ્ચયસ્સ; દુતિયં પાદં અતિક્કામેતિ, આપત્તિ સઙ્ઘાદિસેસસ્સ.

સમગ્ગેન સઙ્ઘેન ઉક્ખિત્તં ભિક્ખુનિં ધમ્મેન વિનયેન સત્થુસાસનેન અનપલોકેત્વા કારકસઙ્ઘં અનઞ્ઞાય ગણસ્સ છન્દં ઓસારેન્તી તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

અવસ્સુતા ભિક્ખુની અવસ્સુતસ્સ પુરિસપુગ્ગલસ્સ હત્થતો ખાદનીયં વા ભોજનીયં વા સહત્થા પટિગ્ગહેત્વા ભુઞ્જન્તી તિસ્સો આપત્તિયો આપજ્જતિ. ‘‘ખાદિસ્સામિ ભુઞ્જિસ્સામી’’તિ પટિગ્ગણ્હાતિ, આપત્તિ થુલ્લચ્ચયસ્સ; અજ્ઝોહારે અજ્ઝોહારે આપત્તિ સઙ્ઘાદિસેસસ્સ; ઉદકદન્તપોનં પટિગ્ગણ્હાતિ, આપત્તિ દુક્કટસ્સ.

‘‘કિં તે, અય્યે, એસો પુરિસપુગ્ગલો કરિસ્સતિ અવસ્સુતો વા અનવસ્સુતો વા, યતો ત્વં અનવસ્સુતા! ઇઙ્ઘ, અય્યે, યં તે એસો પુરિસપુગ્ગલો દેતિ ખાદનીયં વા ભોજનીયં વા, તં ત્વં સહત્થા પટિગ્ગહેત્વા ખાદ વા ભુઞ્જ વા’’તિ ઉય્યોજેન્તી તિસ્સો આપત્તિયો આપજ્જતિ. તસ્સા વચનેન ખાદિસ્સામિ ભુઞ્જિસ્સામીતિ પટિગ્ગણ્હાતિ, આપત્તિ દુક્કટસ્સ; અજ્ઝોહારે અજ્ઝોહારે આપત્તિ થુલ્લચ્ચયસ્સ; ભોજનપરિયોસાને આપત્તિ સઙ્ઘાદિસેસસ્સ.

કુપિતા ભિક્ખુની યાવતતિયં સમનુભાસનાય ન પટિનિસ્સજ્જન્તી તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

કિસ્મિઞ્ચિદેવ અધિકરણે પચ્ચાકતા ભિક્ખુની યાવતતિયં સમનુભાસનાય ન પટિનિસ્સજ્જન્તી તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

સંસટ્ઠા ભિક્ખુનિયો યાવતતિયં સમનુભાસનાય ન પટિનિસ્સજ્જન્તિયો તિસ્સો આપત્તિયો આપજ્જન્તિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

‘‘સંસટ્ઠાવ, અય્યે, તુમ્હે વિહરથ. મા તુમ્હે નાના વિહરિત્થા’’તિ ઉય્યોજેન્તી યાવતતિયં સમનુભાસનાય ન પટિનિસ્સજ્જન્તી તિસ્સો આપત્તિયો આપજ્જતિ. ઞત્તિયા દુક્કટં; દ્વીહિ કમ્મવાચાહિ થુલ્લચ્ચયા; કમ્મવાચાપરિયોસાને આપત્તિ સઙ્ઘાદિસેસસ્સ.

સઙ્ઘાદિસેસા નિટ્ઠિતા.

૩. નિસ્સગ્ગિયકણ્ડં

૨૩૦. પત્તસન્નિચયં કરોન્તી એકં આપત્તિં આપજ્જતિ. નિસ્સગ્ગિયં પાચિત્તિયં.

અકાલચીવરં ‘‘કાલચીવર’’ન્તિ અધિટ્ઠહિત્વા ભાજાપેન્તી દ્વે આપત્તિયો આપજ્જતિ. ભાજાપેતિ, પયોગે દુક્કટં; ભાજાપિતે નિસ્સગ્ગિયં પાચિત્તિયં.

ભિક્ખુનિયા સદ્ધિં ચીવરં પરિવત્તેત્વા અચ્છિન્દન્તી દ્વે આપત્તિયો આપજ્જતિ. અચ્છિન્દતિ, પયોગે દુક્કટં; અચ્છિન્ને નિસ્સગ્ગિયં પાચિત્તિયં.

અઞ્ઞં વિઞ્ઞાપેત્વા અઞ્ઞં વિઞ્ઞાપેન્તી દ્વે આપત્તિયો આપજ્જતિ. વિઞ્ઞાપેતિ, પયોગે દુક્કટં; વિઞ્ઞાપિતે નિસ્સગ્ગિયં પાચિત્તિયં.

અઞ્ઞં ચેતાપેત્વા અઞ્ઞં ચેતાપેન્તી દ્વે આપત્તિયો આપજ્જતિ. ચેતાપેતિ, પયોગે દુક્કટં; ચેતાપિતે નિસ્સગ્ગિયં પાચિત્તિયં.

અઞ્ઞદત્થિકેન પરિક્ખારેન અઞ્ઞુદ્દિસિકેન સઙ્ઘિકેન અઞ્ઞં ચેતાપેન્તી દ્વે આપત્તિયો આપજ્જતિ. ચેતાપેતિ, પયોગે દુક્કટં; ચેતાપિતે નિસ્સગ્ગિયં પાચિત્તિયં.

અઞ્ઞદત્થિકે પરિક્ખારેન અઞ્ઞુદ્દિસિકેન સઙ્ઘિકેન સંયાચિકેન અઞ્ઞં ચેતાપેન્તી દ્વે આપત્તિયો આપજ્જતિ. ચેતાપેતિ, પયોગે દુક્કટં; ચેતાપિતે નિસ્સગ્ગિયં પાચિત્તિયં.

અઞ્ઞદત્થિકેન પરિક્ખારેન અઞ્ઞુદ્દિસિકેન મહાજનિકેન અઞ્ઞં ચેતાપેન્તી દ્વે આપત્તિયો આપજ્જતિ. ચેતાપેતિ, પયોગે દુક્કટં; ચેતાપિતે નિસ્સગ્ગિયં પાચિત્તિયં.

અઞ્ઞદત્થિકેન પરિક્ખારેન અઞ્ઞુદ્દિસિકેન મહાજનિકેન સંયાચિકેન અઞ્ઞં ચેતાપેન્તી દ્વે આપત્તિયો આપજ્જતિ. ચેતાપેતિ, પયોગે દુક્કટં; ચેતાપિતે નિસ્સગ્ગિયં પાચિત્તિયં.

અઞ્ઞદત્થિકેન પરિક્ખારેન અઞ્ઞુદ્દિસિકે પુગ્ગલિકેન સંયાચિકેન અઞ્ઞં ચેતાપેન્તી દ્વે આપત્તિયો આપજ્જતિ. ચેતાપેતિ, પયોગે દુક્કટં; ચેતાપિતે નિસ્સગ્ગિયં પાચિત્તિયં.

અતિરેકચતુક્કંસપરમં ગરુપાવુરણં ચેતાપેન્તી દ્વે આપત્તિયો આપજ્જતિ. ચેતાપેતિ, પયોગે દુક્કટં; ચેતાપિતે નિસ્સગ્ગિયં પાચિત્તિયં.

અતિરેકઅડ્ઢતેય્યકંસપરમં લહુપાવુરણં ચેતાપેન્તી દ્વે આપત્તિયો આપજ્જતિ. ચેતાપેતિ, પયોગે દુક્કટં; ચેતાપિતે નિસ્સગ્ગિયં પાચિત્તિયં.

નિસ્સગ્ગિયા પાચિત્તિયા નિટ્ઠિતા.

૪. પાચિત્તિયકણ્ડં

૧. લસુણવગ્ગો

૨૩૧. લસુણં ખાદન્તી દ્વે આપત્તિયો આપજ્જતિ. ખાદિસ્સામીતિ પટિગ્ગણ્હાતિ, આપત્તિ દુક્કટસ્સ; અજ્ઝોહારે અજ્ઝોહારે આપત્તિ પાચિત્તિયસ્સ.

સમ્બાધે લોમં સંહરાપેન્તી દ્વે આપત્તિયો આપજ્જતિ. સંહરાપેતિ, પયોગે દુક્કટં; સંહરાપિતે આપત્તિ પાચિત્તિયસ્સ.

તલઘાતકં કરોન્તી દ્વે આપત્તિયો આપજ્જતિ. કરોતિ, પયોગે દુક્કટં; કતે આપત્તિ પાચિત્તિયસ્સ.

જતુમટ્ઠકં આદિયન્તી દ્વે આપત્તિયો આપજ્જતિ. આદિયતિ, પયોગે દુક્કટં, આદિન્ને આપત્તિ પાચિત્તિયસ્સ.

અતિરેકદ્વઙ્ગુલપબ્બપરમં ઉદકસુદ્ધિકં આદિયન્તી દ્વે આપત્તિયો આપજ્જતિ. આદિયતિ, પયોગે દુક્કટં; આદિન્ને આપત્તિ પાચિત્તિયસ્સ.

ભિક્ખુસ્સ ભુઞ્જન્તસ્સ પાનીયેન વા વિધૂપનેન વા ઉપતિટ્ઠન્તી દ્વે આપત્તિયો આપજ્જતિ. હત્થપાસે તિટ્ઠતિ, આપત્તિ પાચિત્તિયસ્સ; હત્થપાસં વિજહિત્વા તિટ્ઠતિ, આપત્તિ દુક્કટસ્સ.

આમકધઞ્ઞં વિઞ્ઞાપેત્વા ભુઞ્જન્તી દ્વે આપત્તિયો આપજ્જતિ. ભુઞ્જિસ્સામીતિ પટિગ્ગણ્હાતિ, આપત્તિ દુક્કટસ્સ; અજ્ઝોહારે અજ્ઝોહારે આપત્તિ પાચિત્તિયસ્સ.

ઉચ્ચારં વા પસ્સાવં વા સઙ્કારં વા વિઘાસં વા તિરોકુટ્ટે વા તિરોપાકારે વા છડ્ડેન્તી દ્વે આપત્તિયો આપજ્જતિ. છડ્ડેતિ, પયોગે દુક્કટં; છડ્ડિતે આપત્તિ પાચિત્તિયસ્સ.

ઉચ્ચારં વા પસ્સાવં વા સઙ્કારં વા વિઘાસં વા હરિતે છડ્ડેન્તી દ્વે આપત્તિયો આપજ્જતિ. છડ્ડેતિ, પયોગે દુક્કટં; છડ્ડિતે આપત્તિ પાચિત્તિયસ્સ.

નચ્ચં વા ગીતં વા વાદિતં વા દસ્સનાય ગચ્છન્તી દ્વે આપત્તિયો આપજ્જતિ. ગચ્છતિ, આપત્તિ દુક્કટસ્સ; યત્થ ઠિતા પસ્સતિ વા સુણાતિ વા, આપત્તિ પાચિત્તિયસ્સ.

લસુણવગ્ગો પઠમો.

૨. રત્તન્ધકારવગ્ગો

૨૩૨. રત્તન્ધકારે અપ્પદીપે પુરિસેન સદ્ધિં એકેનેકા સન્તિટ્ઠન્તી દ્વે આપત્તિયો આપજ્જતિ. હત્થપાસે તિટ્ઠતિ, આપત્તિ પાચિત્તિયસ્સ; હત્થપાસં વિજહિત્વા તિટ્ઠતિ, આપત્તિ દુક્કટસ્સ.

પટિચ્છન્ને ઓકાસે પુરિસેન સદ્ધિં એકેનેકા સન્તિટ્ઠન્તી દ્વે આપત્તિયો આપજ્જતિ. હત્થપાસે તિટ્ઠતિ, આપત્તિ પાચિત્તિયસ્સ; હત્થપાસં વિજહિત્વા તિટ્ઠતિ, આપત્તિ દુક્કટસ્સ.

અજ્ઝોકાસે પુરિસેન સદ્ધિં એકેનેકા સન્તિટ્ઠન્તી દ્વે આપત્તિયો આપજ્જતિ. હત્થપાસે તિટ્ઠતિ, આપત્તિ પાચિત્તિયસ્સ; હત્થપાસં વિજહિત્વા તિટ્ઠતિ, આપત્તિ દુક્કટસ્સ.

રથિકાય વા બ્યૂહે વા સિઙ્ઘાટકે વા પુરિસેન સદ્ધિં એકેનેકા સન્તિટ્ઠન્તી દ્વે આપત્તિયો આપજ્જતિ. હત્થપાસે તિટ્ઠતિ, આપત્તિ પાચિત્તિયસ્સ; હત્થપાસં વિજહિત્વા તિટ્ઠતિ, આપત્તિ દુક્કટસ્સ.

પુરેભત્તં કુલાનિ ઉપસઙ્કમિત્વા આસને નિસીદિત્વા સામિકે અનાપુચ્છા પક્કમન્તી દ્વે આપત્તિયો આપજ્જતિ. પઠમં પાદં અનોવસ્સકં અતિક્કામેતિ, આપત્તિ દુક્કટસ્સ; દુતિયં પાદં અતિક્કામેતિ, આપત્તિ પાચિત્તિયસ્સ.

પચ્છાભત્તં કુલાનિ ઉપસઙ્કમિત્વા સામિકે અનાપુચ્છા આસને નિસીદન્તી દ્વે આપત્તિયો આપજ્જતિ. નિસીદતિ, પયોગે દુક્કટં; નિસિન્ને આપત્તિ પાચિત્તિયસ્સ.

વિકાલે કુલાનિ ઉપસઙ્કમિત્વા સામિકે અનાપુચ્છા સેય્યં સન્થરિત્વા વા સન્થરાપેત્વા વા અભિનિસીદન્તી દ્વે આપત્તિયો આપજ્જતિ. અભિનિસીદતિ, પયોગે દુક્કટં; અભિનિસિન્ને આપત્તિ પાચિત્તિયસ્સ.

દુગ્ગહિતેન દૂપધારિતેન પરં ઉજ્ઝાપેન્તી દ્વે આપત્તિયો આપજ્જતિ. ઉજ્ઝાપેતિ, પયોગે દુક્કટં; ઉજ્ઝાપિતે આપત્તિ પાચિત્તિયસ્સ.

અત્તાનં વા પરં વા નિરયેન વા બ્રહ્મચરિયેન વા અભિસપન્તી દ્વે આપત્તિયો આપજ્જતિ. અભિસપતિ, પયોગે દુક્કટં; અભિસપિતે આપત્તિ પાચિત્તિયસ્સ.

અત્તાનં વધિત્વા વધિત્વા રોદન્તી દ્વે આપત્તિયો આપજ્જતિ. વધતિ રોદતિ, આપત્તિ પાચિત્તિયસ્સ; વધતિ ન રોદતિ, આપત્તિ દુક્કટસ્સ.

રત્તન્ધકારવગ્ગો દુતિયો.

૩. નહાનવગ્ગો

૨૩૩. નગ્ગા નહાયન્તી દ્વે આપત્તિયો આપજ્જતિ. નહાયતિ, પયોગે દુક્કટં; નહાનપરિયોસાને આપત્તિ પાચિત્તિયસ્સ.

પમાણાતિક્કન્તં ઉદકસાટિકં કારાપેન્તી દ્વે આપત્તિયો આપજ્જતિ. કારાપેતિ, પયોગે દુક્કટં; કારાપિતે, આપત્તિ પાચિત્તિયસ્સ.

ભિક્ખુનિયા ચીવરં વિસિબ્બેત્વા વા વિસિબ્બાપેત્વા વા નેવ સિબ્બેન્તી ન સિબ્બાપનાય ઉસ્સુક્કં કરોન્તી એકં આપત્તિં આપજ્જતિ. પાચિત્તિયં.

પઞ્ચાહિકં સઙ્ઘાટિચારં અતિક્કામેન્તી એકં આપત્તિં આપજ્જતિ. પાચિત્તિયં. ચીવરસઙ્કમનીયં ધારેન્તી દ્વે આપત્તિયો આપજ્જતિ. ધારેતિ, પયોગે દુક્કટં; ધારિતે, આપત્તિ પાચિત્તિયસ્સ.

ગણસ્સ ચીવરલાભં અન્તરાયં કરોન્તી દ્વે આપત્તિયો આપજ્જતિ. કરોતિ, પયોગે દુક્કટં; કતે, આપત્તિ પાચિત્તિયસ્સ.

ધમ્મિકં ચીવરવિભઙ્ગં પટિબાહન્તી દ્વે આપત્તિયો આપજ્જતિ. પટિબાહતિ, પયોગે દુક્કટં; પટિબાહિતે, આપત્તિ પાચિત્તિયસ્સ.

અગારિકસ્સ વા પરિબ્બાજકસ્સ વા પરિબ્બાજિકાય વા સમણચીવરં દેન્તી દ્વે આપત્તિયો આપજ્જતિ. દેતિ, પયોગે દુક્કટં; દિન્ને, આપત્તિ પાચિત્તિયસ્સ.

દુબ્બલચીવરપચ્ચાસા ચીવરકાલસમયં અતિક્કામેન્તી દ્વે આપત્તિયો આપજ્જતિ. અતિક્કામેતિ, પયોગે દુક્કટં; અતિક્કામિતે, આપત્તિ પાચિત્તિયસ્સ.

ધમ્મિકં કથિનુદ્ધારં પટિબાહન્તી દ્વે આપત્તિયો આપજ્જતિ. પટિબાહતિ, પયોગે દુક્કટં; પટિબાહિતે, આપત્તિ પાચિત્તિયસ્સ.

નહાનવગ્ગો તતિયો.

૪. તુવટ્ટવગ્ગો

૨૩૪. દ્વે ભિક્ખુનિયો એકમઞ્ચે તુવટ્ટેન્તિયો દ્વે આપત્તિયો આપજ્જન્તિ. નિપજ્જન્તિ, પયોગે દુક્કટં; નિપન્ને, આપત્તિ પાચિત્તિયસ્સ.

દ્વે ભિક્ખુનિયો એકત્થરણપાવુરણા તુવટ્ટેન્તિયો દ્વે આપત્તિયો આપજ્જન્તિ. નિપજ્જન્તિ, પયોગે દુક્કટં; નિપન્ને, આપત્તિ પાચિત્તિયસ્સ.

ભિક્ખુનિયા સઞ્ચિચ્ચ અફાસું કરોન્તી દ્વે આપત્તિયો આપજ્જતિ. કરોતિ, પયોગે દુક્કટં; કતે, આપત્તિ પાચિત્તિયસ્સ.

દુક્ખિતં સહજીવિનિં નેવ ઉપટ્ઠેન્તી ન ઉપટ્ઠાપનાય ઉસ્સુક્કં કરોન્તી એકં આપત્તિં આપજ્જતિ. પાચિત્તિયં.

ભિક્ખુનિયા ઉપસ્સયં દત્વા કુપિતા અનત્તમના નિક્કડ્ઢન્તી દ્વે આપત્તિયો આપજ્જતિ. નિક્કડ્ઢતિ, પયોગે દુક્કટં; નિક્કડ્ઢિતે, આપત્તિ પાચિત્તિયસ્સ.

સંસટ્ઠા ભિક્ખુની યાવતતિયં સમનુભાસનાય ન પટિનિસ્સજ્જન્તી દ્વે આપત્તિયો આપજ્જતિ. ઞત્તિયા દુક્કટં; કમ્મવાચાપરિયોસાને આપત્તિ પાચિત્તિયસ્સ.

અન્તોરટ્ઠે સાસઙ્કસમ્મતે સપ્પટિભયે અસત્થિકા ચારિકં ચરન્તી દ્વે આપત્તિયો આપજ્જતિ. પટિપજ્જતિ, પયોગે દુક્કટં; પટિપન્ને, આપત્તિ પાચિત્તિયસ્સ.

તિરોરટ્ઠે સાસઙ્કસમ્મતે સપ્પટિભયે અસત્થિકા ચારિકં ચરન્તી દ્વે આપત્તિયો આપજ્જતિ. પટિપજ્જતિ, પયોગે દુક્કટં; પટિપન્ને, આપત્તિ પાચિત્તિયસ્સ.

અન્તોવસ્સં ચારિકં ચરન્તી દ્વે આપત્તિયો આપજ્જતિ. પટિપજ્જતિ, પયોગે દુક્કટં; પટિપન્ને, આપત્તિ પાચિત્તિયસ્સ.

વસ્સંવુટ્ઠા ભિક્ખુની ચારિકં ન પક્કમન્તી એકં આપત્તિં આપજ્જતિ. પાચિત્તિયં.

તુવટ્ટવગ્ગો ચતુત્થો.

૫. ચિત્તાગારવગ્ગો

૨૩૫. રાજાગારં વા ચિત્તાગારં વા આરામં વા ઉય્યાનં વા પોક્ખરણિં વા દસ્સનાય ગચ્છન્તી દ્વે આપત્તિયો આપજ્જતિ. ગચ્છતિ, આપત્તિ દુક્કટસ્સ; યત્થ ઠિતા પસ્સતિ, આપત્તિ પાચિત્તિયસ્સ.

આસન્દિં વા પલ્લઙ્કં વા પરિભુઞ્જન્તી દ્વે આપત્તિયો આપજ્જતિ. પરિભુઞ્જતિ, પયોગે દુક્કટં; પરિભુત્તે, આપત્તિ પાચિત્તિયસ્સ.

સુત્તં કન્તન્તી દ્વે આપત્તિયો આપજ્જતિ. કન્તતિ, પયોગે દુક્કટં; ઉજ્જવુજ્જવે, આપત્તિ પાચિત્તિયસ્સ.

ગિહિવેય્યાવચ્ચં કરોન્તી દ્વે આપત્તિયો આપજ્જતિ. કરોતિ, પયોગે દુક્કટં; કતે, આપત્તિ પાચિત્તિયસ્સ.

ભિક્ખુનિયા – ‘‘એહાય્યે ઇમં અધિકરણં વૂપસમેહી’’તિ વુચ્ચમાના – ‘‘સાધૂ’’તિ પટિસ્સુણિત્વા નેવ વૂપસમેન્તી ન વૂપસમાય ઉસ્સુક્કં કરોન્તી એકં આપત્તિં આપજ્જતિ. પાચિત્તિયં.

અગારિકસ્સ વા પરિબ્બાજકસ્સ વા પરિબ્બાજિકાય વા સહત્થા ખાદનીયં વા ભોજનીયં વા દેન્તી દ્વે આપત્તિયો આપજ્જતિ. દેતિ, પયોગે દુક્કટં; દિન્ને, આપત્તિ પાચિત્તિયસ્સ.

આવસથચીવરં અનિસ્સજ્જિત્વા પરિભુઞ્જન્તી દ્વે આપત્તિયો આપજ્જતિ. પરિભુઞ્જતિ, પયોગે દુક્કટં; પરિભુત્તે, આપત્તિ પાચિત્તિયસ્સ.

આવસથં અનિસ્સજ્જિત્વા ચારિકં પક્કમન્તી દ્વે આપત્તિયો આપજ્જતિ. પઠમં પાદં પરિક્ખેપં અતિક્કામેતિ, આપત્તિ દુક્કટસ્સ; દુતિયં પાદં અતિક્કામેતિ, આપત્તિ પાચિત્તિયસ્સ.

તિરચ્છાનવિજ્જં પરિયાપુણન્તી દ્વે આપત્તિયો આપજ્જતિ. પરિયાપુણાતિ, પયોગે દુક્કટં; પદે પદે આપત્તિ પાચિત્તિયસ્સ.

તિરચ્છાનવિજ્જં વાચેન્તી દ્વે આપત્તિયો આપજ્જતિ. વાચેતિ, પયોગે દુક્કટં; પદે પદે આપત્તિ પાચિત્તિયસ્સ.

ચિત્તાગારવગ્ગો પઞ્ચમો.

૬. આરામવગ્ગો

૨૩૬. જાનં સભિક્ખુકં આરામં અનાપુચ્છા પવિસન્તી દ્વે આપત્તિયો આપજ્જતિ. પઠમં પાદં પરિક્ખેપં અતિક્કામેતિ, આપત્તિ દુક્કટસ્સ; દુતિયં પાદં અતિક્કામેતિ, આપત્તિ પાચિત્તિયસ્સ.

ભિક્ખું અક્કોસન્તી પરિભાસન્તી દ્વે આપત્તિયો આપજ્જતિ. અક્કોસતિ, પયોગે દુક્કટં; અક્કોસિતે, આપત્તિ પાચિત્તિયસ્સ.

ચણ્ડીકતા ગણં પરિભાસન્તી દ્વે આપત્તિયો આપજ્જતિ. પરિભાસતિ, પયોગે દુક્કટં; પરિભાસિતે, આપત્તિ પાચિત્તિયસ્સ.

નિમન્તિતા વા પવારિતા વા ખાદનીયં વા ભોજનીયં વા ભુઞ્જન્તી દ્વે આપત્તિયો આપજ્જતિ. ‘‘ખાદિસ્સામિ ભુઞ્જિસ્સામી’’તિ પટિગ્ગણ્હાતિ, આપત્તિ દુક્કટસ્સ; અજ્ઝોહારે અજ્ઝોહારે આપત્તિ પાચિત્તિયસ્સ.

કુલં મચ્છરાયન્તી દ્વે આપત્તિયો આપજ્જતિ. મચ્છરાયતિ, પયોગે દુક્કટં; મચ્છરિતે, આપત્તિ પાચિત્તિયસ્સ.

અભિક્ખુકે આવાસે વસ્સં વસન્તી દ્વે આપત્તિયો આપજ્જતિ. ‘‘વસ્સં વસિસ્સામી’’તિ સેનાસનં પઞ્ઞપેતિ પાનીયં પરિભોજનીયં ઉપટ્ઠપેતિ પરિવેણં સમ્મજ્જતિ, આપત્તિ દુક્કટસ્સ; સહ અરુણુગ્ગમના આપત્તિ પાચિત્તિયસ્સ.

વસ્સંવુટ્ઠા ભિક્ખુની ઉભતોસઙ્ઘે તીહિ ઠાનેહિ ન પવારેન્તી એકં આપત્તિં આપજ્જતિ. પાચિત્તિયં.

ઓવાદાય વા સંવાસાય વા ન ગચ્છન્તી એકં આપત્તિં આપજ્જતિ. પાચિત્તિયં.

ઉપોસથમ્પિ ન પુચ્છન્તી ઓવાદમ્પિ ન યાચન્તી એકં આપત્તિં આપજ્જતિ. પાચિત્તિયં.

પસાખે જાતં ગણ્ડં વા રુધિતં વા અનપલોકેત્વા સઙ્ઘં વા ગણં વા પુરિસેન સદ્ધિં એકેનેકા ભેદાપેન્તી દ્વે આપત્તિયો આપજ્જતિ. ભેદાપેતિ, પયોગે દુક્કટં; ભિન્ને, આપત્તિ પાચિત્તિયસ્સ.

આરામવગ્ગો છટ્ઠો.

૭. ગબ્ભિનીવગ્ગો

૨૩૭. ગબ્ભિનિં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

પાયન્તિં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

દ્વે વસ્સાનિ છસુ ધમ્મેસુ અસિક્ખિતસિક્ખં સિક્ખમાનં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

દ્વે વસ્સાનિ છસુ ધમ્મેસુ સિક્ખિતસિક્ખં સિક્ખમાનં સઙ્ઘેન અસમ્મતં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

ઊનદ્વાદસવસ્સં ગિહિગતં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

પરિપુણ્ણદ્વાદસવસ્સં ગિહિગતં દ્વે વસ્સાનિ છસુ ધમ્મેસુ અસિક્ખિતસિક્ખં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

પરિપુણ્ણદ્વાદસવસ્સં ગિહિગતં દ્વે વસ્સાનિ છસુ ધમ્મેસુ સિક્ખિતસિક્ખં સઙ્ઘેન અસમ્મતં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

સહજીવિનિં વુટ્ઠાપેત્વા દ્વે વસ્સાનિ નેવ અનુગ્ગણ્હન્તી નાનુગ્ગણ્હાપેન્તી એકં આપત્તિં આપજ્જતિ. પાચિત્તિયં.

વુટ્ઠાપિતં પવત્તિનિં દ્વે વસ્સાનિ નાનુબન્ધન્તી એકં આપત્તિં આપજ્જતિ. પાચિત્તિયં.

સહજીવિનિં વુટ્ઠાપેત્વા નેવ વૂપકાસેન્તી ન વૂપકાસાપેન્તી એકં આપત્તિં આપજ્જતિ. પાચિત્તિયં.

ગબ્ભિનીવગ્ગો સત્તમો.

૮. કુમારીભૂતવગ્ગો

૨૩૮. ઊનવીસતિવસ્સં કુમારિભૂતં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

પરિપુણ્ણવીસતિવસ્સં કુમારિભૂતં દ્વે વસ્સાનિ છસુ ધમ્મેસુ અસિક્ખિતસિક્ખં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

પરિપુણ્ણવીસતિવસ્સં કુમારિભૂતં દ્વે વસ્સાનિ છસુ ધમ્મેસુ સિક્ખિતસિક્ખં સઙ્ઘેન અસમ્મતં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

ઊનદ્વાદસવસ્સા વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

પરિપુણ્ણદ્વાદસવસ્સા સઙ્ઘેન અસમ્મતા વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

‘‘અલં તાવ તે, અય્યે, વુટ્ઠાપિતેના’’તિ વુચ્ચમાના ‘‘સાધૂ’’તિ પટિસ્સુણિત્વા પચ્છા ખીયનધમ્મં આપજ્જન્તી દ્વે આપત્તિયો આપજ્જતિ. ખિય્યતિ, પયોગે દુક્કટં; ખિય્યિતે, આપત્તિ પાચિત્તિયસ્સ.

સિક્ખમાનં – ‘‘સચે મે ત્વં, અય્યે, ચીવરં દસ્સસિ, એવાહં તં વુટ્ઠાપેસ્સામી’’તિ વત્વા નેવ વુટ્ઠાપેન્તી ન વુટ્ઠાપનાય ઉસ્સુક્કં કરોન્તી એકં આપત્તિં આપજ્જતિ. પાચિત્તિયં.

સિક્ખમાનં – ‘‘સચે મં ત્વં, અય્યે, દ્વે વસ્સાનિ અનુબન્ધિસ્સસિ, એવાહં તં વુટ્ઠાપેસ્સામી’’તિ વત્વા નેવ વુટ્ઠાપેન્તી ન વુટ્ઠાપનાય ઉસ્સુક્કં કરોન્તી એકં આપત્તિં આપજ્જતિ. પાચિત્તિયં.

પુરિસસંસટ્ઠં કુમારકસંસટ્ઠં ચણ્ડિં સોકાવાસં સિક્ખમાનં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

માતાપિતૂહિ વા સામિકેન વા અનનુઞ્ઞાતં સિક્ખમાનં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

પારિવાસિકછન્દદાને સિક્ખમાનં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

અનુવસ્સં વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

એકં વસ્સં દ્વે વુટ્ઠાપેન્તી દ્વે આપત્તિયો આપજ્જતિ. વુટ્ઠાપેતિ, પયોગે દુક્કટં; વુટ્ઠાપિતે, આપત્તિ પાચિત્તિયસ્સ.

કુમારીભૂતવગ્ગો અટ્ઠમો.

૯. છત્તુપાહનવગ્ગો

૨૩૯. છત્તુપાહનં ધારેન્તી દ્વે આપત્તિયો આપજ્જતિ. ધારેતિ, પયોગે દુક્કટં; ધારિતે, આપત્તિ પાચિત્તિયસ્સ.

યાનેન યાયન્તી દ્વે આપત્તિયો આપજ્જતિ. યાયતિ, પયોગે દુક્કટં; યાયિતે, આપત્તિ પાચિત્તિયસ્સ.

સઙ્ઘાણિં ધારેન્તી દ્વે આપત્તિયો આપજ્જતિ. ધારેતિ, પયોગે દુક્કટં; ધારિતે, આપત્તિ પાચિત્તિયસ્સ.

ઇત્થાલઙ્કારં ધારેન્તી દ્વે આપત્તિયો આપજ્જતિ. ધારેતિ, પયોગે દુક્કટં; ધારિતે, આપત્તિ પાચિત્તિયસ્સ.

ગન્ધવણ્ણકેન નહાયન્તી દ્વે આપત્તિયો આપજ્જતિ. નહાયતિ, પયોગે દુક્કટં; નહાનપરિયોસાને, આપત્તિ પાચિત્તિયસ્સ.

વાસિતકેન પિઞ્ઞાકેન નહાયન્તી દ્વે આપત્તિયો આપજ્જતિ. નહાયતિ, પયોગે દુક્કટં; નહાનપરિયોસાને, આપત્તિ પાચિત્તિયસ્સ.

ભિક્ખુનિયા ઉમ્મદ્દાપેન્તી પરિમદ્દાપેન્તી દ્વે આપત્તિયો આપજ્જતિ. ઉમ્મદ્દાપેતિ, પયોગે દુક્કટં; ઉમ્મદ્દિતે, આપત્તિ પાચિત્તિયસ્સ.

સિક્ખમાનાય ઉમ્મદ્દાપેન્તી પરિમદ્દાપેન્તી દ્વે આપત્તિયો આપજ્જતિ. ઉમ્મદ્દાપેતિ, પયોગે દુક્કટં; ઉમ્મદ્દિતે, આપત્તિ પાચિત્તિયસ્સ.

સામણેરિયા ઉમ્મદ્દાપેન્તી પરિમદ્દાપેન્તી દ્વે આપત્તિયો આપજ્જતિ. ઉમ્મદ્દાપેતિ, પયોગે દુક્કટં; ઉમ્મદ્દિતે, આપત્તિ પાચિત્તિયસ્સ.

ગિહિનિયા ઉમ્મદ્દાપેન્તી પરિમદ્દાપેન્તી દ્વે આપત્તિયો આપજ્જતિ. ઉમ્મદ્દાપેતિ, પયોગે દુક્કટં; ઉમ્મદ્દિતે, આપત્તિ પાચિત્તિયસ્સ.

ભિક્ખુસ્સ પુરતો અનાપુચ્છા આસને નિસીદન્તી દ્વે આપત્તિયો આપજ્જતિ. નિસીદતિ, પયોગે દુક્કટં; નિસિન્ને, આપત્તિ પાચિત્તિયસ્સ.

અનોકાસકતં ભિક્ખું પઞ્હં પુચ્છન્તી દ્વે આપત્તિયો આપજ્જતિ. પુચ્છતિ, પયોગે દુક્કટં; પુચ્છિતે, આપત્તિ પાચિત્તિયસ્સ.

અસઙ્કચ્ચિકા ગામં પવિસન્તી દ્વે આપત્તિયો આપજ્જતિ. પઠમં પાદં પરિક્ખેપં અતિક્કામેતિ, આપત્તિ દુક્કટસ્સ; દુતિયં પાદં અતિક્કામેતિ, આપત્તિ પાચિત્તિયસ્સ.

છત્તુપાહનવગ્ગો નવમો.

ખુદ્દકં નિટ્ઠિતં.

૫. પાટિદેસનીયકણ્ડં

૨૪૦. સપ્પિં વિઞ્ઞાપેત્વા ભુઞ્જન્તી દ્વે આપત્તિયો આપજ્જતિ. ભુઞ્જિસ્સામીતિ પટિગ્ગણ્હાતિ, આપત્તિ દુક્કટસ્સ; અજ્ઝોહારે અજ્ઝોહારે આપત્તિ પાટિદેસનીયસ્સ.