૬. છટ્ઠસિક્ખાપદં

૧૨૦૨. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન છબ્બગ્ગિયા ભિક્ખુનિયો વાસિતકેન પિઞ્ઞાકેન નહાયન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો વાસિતકેન પિઞ્ઞાકેન નહાયિસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખુનિયો વાસિતકેન પિઞ્ઞાકેન નહાયિસ્સન્તી’’તિ…પે… સચ્ચં કિર, ભિક્ખવે, છબ્બગ્ગિયા ભિક્ખુનિયો વાસિતકેન પિઞ્ઞાકેન નહાયન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, છબ્બગ્ગિયા ભિક્ખુનિયો વાસિતકેન પિઞ્ઞાકેન નહાયિસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૨૦૩. ‘‘યા પન ભિક્ખુની વાસિતકેન પિઞ્ઞાકેન નહાયેય્ય, પાચિત્તિય’’ન્તિ.

૧૨૦૪. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

વાસિતકં નામ યં કિઞ્ચિ ગન્ધવાસિતકં. પિઞ્ઞાકં નામ તિલપિટ્ઠં વુચ્ચતિ. નહાયેય્યાતિ નહાયતિ. પયોગે દુક્કટં, નહાનપરિયોસાને આપત્તિ પાચિત્તિયસ્સ.

૧૨૦૫. અનાપત્તિ આબાધપ્પચ્ચયા, પકતિપિઞ્ઞાકેન નહાયતિ, ઉમ્મત્તિકાય, આદિકમ્મિકાયાતિ.

છટ્ઠસિક્ખાપદં નિટ્ઠિતં.