૭. સત્તમસિક્ખાપદં

૧૨૦૬. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભિક્ખુનિયો ભિક્ખુનિયા ઉમ્મદ્દાપેન્તિપિ પરિમદ્દાપેન્તિપિ. મનુસ્સા વિહારચારિકં આહિણ્ડન્તા પસ્સિત્વા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ભિક્ખુનિયા ઉમ્મદ્દાપેસ્સન્તિપિ પરિમદ્દાપેસ્સન્તિપિ સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ભિક્ખુનિયા ઉમ્મદ્દાપેસ્સન્તિપિ પરિમદ્દાપેસ્સન્તિપી’’તિ…પે… સચ્ચં કિર, ભિક્ખવે, ભિક્ખુનિયો ભિક્ખુનિયા ઉમ્મદ્દાપેન્તિપિ પરિમદ્દાપેન્તિપીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો ભિક્ખુનિયા ઉમ્મદ્દાપેસ્સન્તિપિ પરિમદ્દાપેસ્સન્તિપિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૨૦૭. ‘‘યા પન ભિક્ખુની ભિક્ખુનિયા ઉમ્મદ્દાપેય્ય વા પરિમદ્દાપેય્ય વા, પાચિત્તિય’’ન્તિ.

૧૨૦૮. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

ભિક્ખુનિયાતિ અઞ્ઞાય ભિક્ખુનિયા. ઉમ્મદ્દાપેય્ય વાતિ ઉમ્મદ્દાપેતિ [ઉબ્બટ્ટાપેતિ (સી.)], આપત્તિ પાચિત્તિયસ્સ. પરિમદ્દાપેય્ય વાતિ સમ્બાહાપેતિ, આપત્તિ પાચિત્તિયસ્સ.

૧૨૦૯. અનાપત્તિ ગિલાનાય, આપદાસુ, ઉમ્મત્તિકાય, આદિકમ્મિકાયાતિ.

સત્તમસિક્ખાપદં નિટ્ઠિતં.