૯. છત્તુપાહનવગ્ગો

૧. પઠમસિક્ખાપદં

૧૧૭૮. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન છબ્બગ્ગિયા ભિક્ખુનિયો છત્તુપાહનં ધારેન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો છત્તુપાહનં ધારેસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખુનિયો છત્તુપાહનં ધારેસ્સન્તી’’તિ…પે… સચ્ચં કિર, ભિક્ખવે, છબ્બગ્ગિયા ભિક્ખુનિયો છત્તુપાહનં ધારેન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, છબ્બગ્ગિયા ભિક્ખુનિયો છત્તુપાહનં ધારેસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

‘‘યા પન ભિક્ખુની છત્તુપાહનં ધારેય્ય, પાચિત્તિય’’ન્તિ.

એવઞ્ચિદં ભગવતા ભિક્ખુનીનં સિક્ખાપદં પઞ્ઞત્તં હોતિ.

૧૧૭૯. તેન ખો પન સમયેન અઞ્ઞતરા ભિક્ખુની ગિલાના હોતિ. તસ્સા વિના છત્તુપાહનં ન ફાસુ હોતિ…પે… ભગવતો એતમત્થં આરોચેસું…પે… અનુજાનામિ, ભિક્ખવે, ગિલાનાય ભિક્ખુનિયા છત્તુપાહનં. એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૧૮૦. ‘‘યા પન ભિક્ખુની અગિલાના છત્તુપાહનં ધારેય્ય, પાચિત્તિય’’ન્તિ.

૧૧૮૧. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અગિલાના નામ યસ્સા વિના છત્તુપાહનં ફાસુ હોતિ.

ગિલાના નામ યસ્સા વિના છત્તુપાહનં ન ફાસુ હોતિ.

છત્તં નામ તીણિ છત્તાનિ – સેતચ્છત્તં, કિલઞ્જચ્છત્તં, પણ્ણચ્છત્તં મણ્ડલબદ્ધં સલાકબદ્ધં. ધારેય્યાતિ સકિમ્પિ ધારેતિ, આપત્તિ પાચિત્તિયસ્સ.

૧૧૮૨. અગિલાના અગિલાનસઞ્ઞા છત્તુપાહનં ધારેતિ, આપત્તિ પાચિત્તિયસ્સ. અગિલાના વેમતિકા છત્તુપાહનં ધારેતિ, આપત્તિ પાચિત્તિયસ્સ. અગિલાના ગિલાનસઞ્ઞા છત્તુપાહનં ધારેતિ, આપત્તિ પાચિત્તિયસ્સ.

છત્તં ધારેતિ ન ઉપાહનં, આપત્તિ દુક્કટસ્સ. ઉપાહનં ધારેતિ ન છત્તં, આપત્તિ દુક્કટસ્સ. ગિલાના અગિલાનસઞ્ઞા, આપત્તિ દુક્કટસ્સ. ગિલાના વેમતિકા, આપત્તિ દુક્કટસ્સ. ગિલાના ગિલાનસઞ્ઞા, અનાપત્તિ.

૧૧૮૩. અનાપત્તિ ગિલાનાય, આરામે આરામૂપચારે ધારેતિ, આપદાસુ, ઉમ્મત્તિકાય, આદિકમ્મિકાયાતિ.

પઠમસિક્ખાપદં નિટ્ઠિતં.

૨. દુતિયસિક્ખાપદં

૧૧૮૪. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન છબ્બગ્ગિયા ભિક્ખુનિયો યાનેન યાયન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો યાનેન યાયિસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે. … તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખુનિયો યાનેન યાયિસ્સન્તી’’તિ…પે… સચ્ચં કિર, ભિક્ખવે, છબ્બગ્ગિયા ભિક્ખુનિયો યાનેન યાયન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, છબ્બગ્ગિયા ભિક્ખુનિયો યાનેન યાયિસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

‘‘યા પન ભિક્ખુની યાનેન યાયેય્ય, પાચિત્તિય’’ન્તિ.

એવઞ્ચિદં ભગવતા ભિક્ખુનીનં સિક્ખાપદં પઞ્ઞત્તં હોતિ.

૧૧૮૫. તેન ખો પન સમયેન અઞ્ઞતરા ભિક્ખુની ગિલાના હોતિ, ન સક્કોતિ પદસા ગન્તું…પે… ભગવતો એતમત્થં આરોચેસું…પે… અનુજાનામિ, ભિક્ખવે, ગિલાનાય ભિક્ખુનિયા યાનં. એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૧૮૬. ‘‘યા પન ભિક્ખુની અગિલાના યાનેન યાયેય્ય, પાચિત્તિય’’ન્તિ.

૧૧૮૭. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અગિલાના નામ સક્કોતિ પદસા ગન્તું.

ગિલાના નામ ન સક્કોતિ પદસા ગન્તું.

યાનં નામ વય્હં રથો સકટં સન્દમાનિકા સિવિકા પાટઙ્કી.

યાયેય્યાતિ સકિમ્પિ યાનેન યાયતિ, આપત્તિ પાચિત્તિયસ્સ.

૧૧૮૮. અગિલાના અગિલાનસઞ્ઞા યાનેન યાયતિ, આપત્તિ પાચિત્તિયસ્સ. અગિલાના વેમતિકા યાનેન યાયતિ, આપત્તિ પાચિત્તિયસ્સ. અગિલાના ગિલાનસઞ્ઞા યાનેન યાયતિ, આપત્તિ પાચિત્તિયસ્સ.

ગિલાના અગિલાનસઞ્ઞા, આપત્તિ દુક્કટસ્સ. ગિલાના વેમતિકા, આપત્તિ દુક્કટસ્સ. ગિલાના ગિલાનસઞ્ઞા, અનાપત્તિ.

૧૧૮૯. અનાપત્તિ ગિલાનાય, આપદાસુ, ઉમ્મત્તિકાય, આદિકમ્મિકાયાતિ.

દુતિયસિક્ખાપદં નિટ્ઠિતં.

૩. તતિયસિક્ખાપદં

૧૧૯૦. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન અઞ્ઞતરા ભિક્ખુની અઞ્ઞતરિસ્સા ઇત્થિયા કુલૂપિકા હોતિ. અથ ખો સા ઇત્થી તં ભિક્ખુનિં એતદવોચ – ‘‘હન્દાય્યે, ઇમં સઙ્ઘાણિં અમુકાય નામ ઇત્થિયા દેહી’’તિ. અથ ખો સા ભિક્ખુની – ‘‘સચાહં પત્તેન આદાય ગચ્છામિ વિસ્સરો મે ભવિસ્સતી’’તિ પટિમુઞ્ચિત્વા અગમાસિ. તસ્સા રથિકાય સુત્તકે છિન્ને વિપ્પકિરિયિંસુ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો સઙ્ઘાણિં ધારેસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે. … તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુની સઙ્ઘાણિં ધારેસ્સતી’’તિ…પે… સચ્ચં કિર, ભિક્ખવે, ભિક્ખુની સઙ્ઘાણિં ધારેતી’’તિ [ધારેસીતિ (ક.)]? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુની સઙ્ઘાણિં ધારેસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૧૯૧. ‘‘યા પન ભિક્ખુની સઙ્ઘાણિં ધારેય્ય, પાચિત્તિય’’ન્તિ.

૧૧૯૨. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

સઙ્ઘાણિ નામ યા કાચિ કટૂપગા.

ધારેય્યાતિ સકિમ્પિ ધારેતિ, આપત્તિ પાચિત્તિયસ્સ.

૧૧૯૩. અનાપત્તિ આબાધપ્પચ્ચયા, કટિસુત્તકં ધારેતિ, ઉમ્મત્તિકાય, આદિકમ્મિકાયાતિ.

તતિયસિક્ખાપદં નિટ્ઠિતં.

૪. ચતુત્થસિક્ખાપદં

૧૧૯૪. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન છબ્બગ્ગિયા ભિક્ખુનિયો ઇત્થાલઙ્કારં ધારેન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ઇત્થાલઙ્કારં ધારેસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખુનિયો ઇત્થાલઙ્કારં ધારેસ્સન્તી’’તિ …પે… સચ્ચં કિર, ભિક્ખવે, છબ્બગ્ગિયા ભિક્ખુનિયો ઇત્થાલઙ્કારં ધારેન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, છબ્બગ્ગિયા ભિક્ખુનિયો ઇત્થાલઙ્કારં ધારેસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૧૯૫. ‘‘યા પન ભિક્ખુની ઇત્થાલઙ્કારં ધારેય્ય, પાચિત્તિય’’ન્તિ.

૧૧૯૬. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

ઇત્થાલઙ્કારો નામ સીસૂપગો ગીવૂપગો હત્થૂપગો પાદૂપગો કટૂપગો. ધારેય્યાતિ સકિમ્પિ ધારેતિ, આપત્તિ પાચિત્તિયસ્સ.

૧૧૯૭. અનાપત્તિ આબાધપચ્ચયા, ઉમ્મત્તિકાય, આદિકમ્મિકાયાતિ.

ચતુત્થસિક્ખાપદં નિટ્ઠિતં.

૫. પઞ્ચમસિક્ખાપદં

૧૧૯૮. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન છબ્બગ્ગિયા ભિક્ખુનિયો ગન્ધવણ્ણકેન નહાયન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ગન્ધવણ્ણકેન નહાયિસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખુનિયો ગન્ધવણ્ણકેન નહાયિસ્સન્તી’’તિ…પે… સચ્ચં કિર, ભિક્ખવે, છબ્બગ્ગિયા ભિક્ખુનિયો ગન્ધવણ્ણકેન નહાયન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, છબ્બગ્ગિયા ભિક્ખુનિયો ગન્ધવણ્ણકેન નહાયિસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૧૯૯. ‘‘યા પન ભિક્ખુની ગન્ધવણ્ણકેન નહાયેય્ય, પાચિત્તિય’’ન્તિ.

૧૨૦૦. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

ગન્ધો નામ યો કોચિ ગન્ધો. વણ્ણકં નામ યં કિઞ્ચિ વણ્ણકં. નહાયેય્યાતિ નહાયતિ. પયોગે દુક્કટં, નહાનપરિયોસાને આપત્તિ પાચિત્તિયસ્સ.

૧૨૦૧. અનાપત્તિ આબાધપ્પચ્ચયા, ઉમ્મત્તિકાય, આદિકમ્મિકાયાતિ.

પઞ્ચમસિક્ખાપદં નિટ્ઠિતં.

૬. છટ્ઠસિક્ખાપદં

૧૨૦૨. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન છબ્બગ્ગિયા ભિક્ખુનિયો વાસિતકેન પિઞ્ઞાકેન નહાયન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો વાસિતકેન પિઞ્ઞાકેન નહાયિસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખુનિયો વાસિતકેન પિઞ્ઞાકેન નહાયિસ્સન્તી’’તિ…પે… સચ્ચં કિર, ભિક્ખવે, છબ્બગ્ગિયા ભિક્ખુનિયો વાસિતકેન પિઞ્ઞાકેન નહાયન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, છબ્બગ્ગિયા ભિક્ખુનિયો વાસિતકેન પિઞ્ઞાકેન નહાયિસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૨૦૩. ‘‘યા પન ભિક્ખુની વાસિતકેન પિઞ્ઞાકેન નહાયેય્ય, પાચિત્તિય’’ન્તિ.

૧૨૦૪. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

વાસિતકં નામ યં કિઞ્ચિ ગન્ધવાસિતકં. પિઞ્ઞાકં નામ તિલપિટ્ઠં વુચ્ચતિ. નહાયેય્યાતિ નહાયતિ. પયોગે દુક્કટં, નહાનપરિયોસાને આપત્તિ પાચિત્તિયસ્સ.

૧૨૦૫. અનાપત્તિ આબાધપ્પચ્ચયા, પકતિપિઞ્ઞાકેન નહાયતિ, ઉમ્મત્તિકાય, આદિકમ્મિકાયાતિ.

છટ્ઠસિક્ખાપદં નિટ્ઠિતં.

૭. સત્તમસિક્ખાપદં

૧૨૦૬. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભિક્ખુનિયો ભિક્ખુનિયા ઉમ્મદ્દાપેન્તિપિ પરિમદ્દાપેન્તિપિ. મનુસ્સા વિહારચારિકં આહિણ્ડન્તા પસ્સિત્વા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ભિક્ખુનિયા ઉમ્મદ્દાપેસ્સન્તિપિ પરિમદ્દાપેસ્સન્તિપિ સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ભિક્ખુનિયા ઉમ્મદ્દાપેસ્સન્તિપિ પરિમદ્દાપેસ્સન્તિપી’’તિ…પે… સચ્ચં કિર, ભિક્ખવે, ભિક્ખુનિયો ભિક્ખુનિયા ઉમ્મદ્દાપેન્તિપિ પરિમદ્દાપેન્તિપીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો ભિક્ખુનિયા ઉમ્મદ્દાપેસ્સન્તિપિ પરિમદ્દાપેસ્સન્તિપિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૨૦૭. ‘‘યા પન ભિક્ખુની ભિક્ખુનિયા ઉમ્મદ્દાપેય્ય વા પરિમદ્દાપેય્ય વા, પાચિત્તિય’’ન્તિ.

૧૨૦૮. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

ભિક્ખુનિયાતિ અઞ્ઞાય ભિક્ખુનિયા. ઉમ્મદ્દાપેય્ય વાતિ ઉમ્મદ્દાપેતિ [ઉબ્બટ્ટાપેતિ (સી.)], આપત્તિ પાચિત્તિયસ્સ. પરિમદ્દાપેય્ય વાતિ સમ્બાહાપેતિ, આપત્તિ પાચિત્તિયસ્સ.

૧૨૦૯. અનાપત્તિ ગિલાનાય, આપદાસુ, ઉમ્મત્તિકાય, આદિકમ્મિકાયાતિ.

સત્તમસિક્ખાપદં નિટ્ઠિતં.

૮-૯-૧૦. અટ્ઠમ-નવમ-દસમસિક્ખાપદં

૧૨૧૦. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભિક્ખુનિયો સિક્ખમાનાય ઉમ્મદ્દાપેન્તિપિ પરિમદ્દાપેન્તિપિ…પે… સામણેરિયા ઉમ્મદ્દાપેન્તિપિ પરિમદ્દાપેન્તિપિ…પે… ગિહિનિયા ઉમ્મદ્દાપેન્તિપિ પરિમદ્દાપેન્તિપિ. મનુસ્સા વિહારચારિકં આહિણ્ડન્તા પસ્સિત્વા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ગિહિનિયા ઉમ્મદ્દાપેસ્સન્તિપિ પરિમદ્દાપેસ્સન્તિપિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – કથઞ્હિ નામ ભિક્ખુનિયો ગિહિનિયા ઉમ્મદ્દાપેસ્સન્તિપિ પરિમદ્દાપેસ્સન્તિપીતિ…પે… સચ્ચં કિર, ભિક્ખવે, ભિક્ખુનિયો ગિહિનિયા ઉમ્મદ્દાપેન્તિપિ પરિમદ્દાપેન્તિપીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો ગિહિનિયા ઉમ્મદ્દાપેસ્સન્તિપિ પરિમદ્દાપેસ્સન્તિપિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૨૧૧. ‘‘યા પન ભિક્ખુની (સિક્ખમાનાય…પે… સામણેરિયા…પે…) ગિહિનિયા ઉમ્મદ્દાપેય્ય વા પરિમદ્દાપેય્ય વા, પાચિત્તિય’’ન્તિ.

૧૨૧૨. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

સિક્ખમાના નામ દ્વે વસ્સાનિ છસુ ધમ્મેસુ સિક્ખિતસિક્ખા.

સામણેરી નામ દસસિક્ખાપદિકા.

ગિહિની નામ અગારિની વુચ્ચતિ.

ઉમ્મદ્દાપેય્ય વાતિ ઉમ્મદ્દાપેતિ, આપત્તિ પાચિત્તિયસ્સ.

પરિમદ્દાપેય્ય વાતિ સમ્બાહાપેતિ, આપત્તિ પાચિત્તિયસ્સ.

૧૨૧૩. અનાપત્તિ ગિલાનાય [આબાધપ્પચ્ચયા (ક.)], આપદાસુ, ઉમ્મત્તિકાય, આદિકમ્મિકાયાતિ.

અટ્ઠમ નવમ દસમસિક્ખાપદાનિ નિટ્ઠિતાનિ.

૧૧. એકાદસમસિક્ખાપદં

૧૨૧૪. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભિક્ખુનિયો ભિક્ખુસ્સ પુરતો અનાપુચ્છા આસને નિસીદન્તિ. ભિક્ખૂ ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ભિક્ખુસ્સ પુરતો અનાપુચ્છા આસને નિસીદિસ્સન્તી’’તિ…પે… સચ્ચં કિર, ભિક્ખવે, ભિક્ખુનિયો ભિક્ખુસ્સ પુરતો અનાપુચ્છા આસને નિસીદન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો ભિક્ખુસ્સ પુરતો અનાપુચ્છા આસને નિસીદિસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૨૧૫. ‘‘યા પન ભિક્ખુની ભિક્ખુસ્સ પુરતો અનાપુચ્છા આસને નિસીદેય્ય, પાચિત્તિય’’ન્તિ.

૧૨૧૬. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

ભિક્ખુસ્સ પુરતોતિ ઉપસમ્પન્નસ્સ પુરતો. અનાપુચ્છાતિ અનપલોકેત્વા. આસને નિસીદેય્યાતિ અન્તમસો છમાયપિ નિસીદતિ, આપત્તિ પાચિત્તિયસ્સ.

૧૨૧૭. અનાપુચ્છિતે અનાપુચ્છિતસઞ્ઞા આસને નિસીદતિ, આપત્તિ પાચિત્તિયસ્સ. અનાપુચ્છિતે વેમતિકા આસને નિસીદતિ, આપત્તિ પાચિત્તિયસ્સ. અનાપુચ્છિતે આપુચ્છિતસઞ્ઞા આસને નિસીદતિ, આપત્તિ પાચિત્તિયસ્સ.

આપુચ્છિતે અનાપુચ્છિતસઞ્ઞા, આપત્તિ દુક્કટસ્સ. આપુચ્છિતે વેમતિકા, આપત્તિ દુક્કટસ્સ. આપુચ્છિતે આપુચ્છિતસઞ્ઞા, અનાપત્તિ.

૧૨૧૮. અનાપત્તિ આપુચ્છા આસને નિસીદતિ, ગિલાનાય, આપદાસુ, ઉમ્મત્તિકાય, આદિકમ્મિકાયાતિ.

એકાદસમસિક્ખાપદં નિટ્ઠિતં.

૧૨. દ્વાદસમસિક્ખાપદં

૧૨૧૯. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન ભિક્ખુનિયો અનોકાસકતં ભિક્ખું પઞ્હં પુચ્છન્તિ. ભિક્ખૂ ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો અનોકાસકતં ભિક્ખું પઞ્હં પુચ્છિસ્સન્તી’’તિ…પે… સચ્ચં કિર, ભિક્ખવે, ભિક્ખુનિયો અનોકાસકતં ભિક્ખું પઞ્હં પુચ્છન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુનિયો અનોકાસકતં ભિક્ખું પઞ્હં પુચ્છિસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૨૨૦. ‘‘યા પન ભિક્ખુની અનોકાસકતં ભિક્ખું પઞ્હં પુચ્છેય્ય, પાચિત્તિય’’ન્તિ.

૧૨૨૧. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અનોકાસકતન્તિ અનાપુચ્છા. ભિક્ખુન્તિ ઉપસમ્પન્નં. પઞ્હં પુચ્છેય્યાતિ સુત્તન્તે ઓકાસં કારાપેત્વા વિનયં વા અભિધમ્મં વા પુચ્છતિ, આપત્તિ પાચિત્તિયસ્સ. વિનયે ઓકાસં કારાપેત્વા સુત્તન્તં વા અભિધમ્મં વા પુચ્છતિ, આપત્તિ પાચિત્તિયસ્સ. અભિધમ્મે ઓકાસં કારાપેત્વા સુત્તન્તં વા વિનયં વા પુચ્છતિ, આપત્તિ પાચિત્તિયસ્સ.

૧૨૨૨. અનાપુચ્છિતે અનાપુચ્છિતસઞ્ઞા પઞ્હં પુચ્છતિ, આપત્તિ પાચિત્તિયસ્સ. અનાપુચ્છિતે વેમતિકા પઞ્હં પુચ્છતિ, આપત્તિ પાચિત્તિયસ્સ. અનાપુચ્છિતે આપુચ્છિતસઞ્ઞા પઞ્હં પુચ્છતિ, આપત્તિ પાચિત્તિયસ્સ.

આપુચ્છિતે અનાપુચ્છિતસઞ્ઞા, આપત્તિ દુક્કટસ્સ. આપુચ્છિતે વેમતિકા, આપત્તિ દુક્કટસ્સ. આપુચ્છિતે આપુચ્છિતસઞ્ઞા, અનાપત્તિ.

૧૨૨૩. અનાપત્તિ ઓકાસં કારાપેત્વા પુચ્છતિ, અનોદિસ્સ ઓકાસં કારાપેત્વા યત્થ કત્થચિ પુચ્છતિ, ઉમ્મત્તિકાય, આદિકમ્મિકાયાતિ.

દ્વાદસમસિક્ખાપદં નિટ્ઠિતં.

૧૩. તેરસમસિક્ખાપદં

૧૨૨૪. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન અઞ્ઞતરા ભિક્ખુની અસઙ્કચ્ચિકા [અસઙ્કચ્છિકા (સ્યા.)] ગામં પિણ્ડાય પાવિસિ. તસ્સા રથિકાય વાતમણ્ડલિકા સઙ્ઘાટિયો ઉક્ખિપિંસુ. મનુસ્સા ઉક્કુટ્ઠિં અકંસુ – ‘‘સુન્દરા અય્યાય થનુદરા’’તિ. સા ભિક્ખુની તેહિ મનુસ્સેહિ ઉપ્પણ્ડિયમાના મઙ્કુ અહોસિ. અથ ખો સા ભિક્ખુની ઉપસ્સયં ગન્ત્વા ભિક્ખુનીનં એતમત્થં આરોચેસિ. યા તા ભિક્ખુનિયો અપ્પિચ્છા…પે… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુની અસઙ્કચ્ચિકા ગામં પવિસિસ્સતી’’તિ…પે… સચ્ચં કિર, ભિક્ખવે, ભિક્ખુની અસઙ્કચ્ચિકા ગામં પાવિસીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, ભિક્ખુની અસઙ્કચ્ચિકા ગામં પવિસિસ્સતિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૨૨૫. ‘‘યા પન ભિક્ખુની અસઙ્કચ્ચિકા [અસઙ્કચ્છિકા (સ્યા.)] ગામં પવિસેય્ય, પાચિત્તિય’’ન્તિ.

૧૨૨૬. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અસઙ્કચ્ચિકાતિ વિના સઙ્કચ્ચિકં.

સઙ્કચ્ચિકં નામ અધક્ખકં ઉબ્ભનાભિ, તસ્સ પટિચ્છાદનત્થાય.

ગામં પવિસેય્યાતિ પરિક્ખિત્તસ્સ ગામસ્સ પરિક્ખેપં અતિક્કામેન્તિયા આપત્તિ પાચિત્તિયસ્સ. અપરિક્ખિત્તસ્સ ગામસ્સ ઉપચારં ઓક્કમન્તિયા આપત્તિ પાચિત્તિયસ્સ.

૧૨૨૭. અનાપત્તિ અચ્છિન્નચીવરિકાય, નટ્ઠચીવરિકાય, ગિલાનાય, અસ્સતિયા, અજાનન્તિયા, આપદાસુ, ઉમ્મત્તિકાય, આદિકમ્મિકાયાતિ.

તેરસમસિક્ખાપદં નિટ્ઠિતં.

છત્તુપાહનવગ્ગો નવમો.

ઉદ્દિટ્ઠા ખો, અય્યાયો, છસટ્ઠિસતા પાચિત્તિયા ધમ્મા. તત્થાય્યાયો પુચ્છામિ – ‘‘કચ્ચિત્થ પરિસુદ્ધા’’? દુતિયમ્પિ પુચ્છામિ – ‘‘કચ્ચિત્થ પરિસુદ્ધા’’? તતિયમ્પિ પુચ્છામિ – ‘‘કચ્ચિત્થ પરિસુદ્ધા’’? પરિસુદ્ધેત્થાય્યાયો, તસ્મા તુણ્હી, એવમેતં ધારયામીતિ.

ખુદ્દકં સમત્તં.

ભિક્ખુનિવિભઙ્ગે પાચિત્તિયકણ્ડં નિટ્ઠિતં.