૨. દુતિયસિક્ખાપદં

૧૧૮૪. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન છબ્બગ્ગિયા ભિક્ખુનિયો યાનેન યાયન્તિ. મનુસ્સા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો યાનેન યાયિસ્સન્તિ, સેય્યથાપિ ગિહિનિયો કામભોગિનિયો’’તિ! અસ્સોસું ખો ભિક્ખુનિયો તેસં મનુસ્સાનં ઉજ્ઝાયન્તાનં ખિય્યન્તાનં વિપાચેન્તાનં. યા તા ભિક્ખુનિયો અપ્પિચ્છા…પે. … તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ છબ્બગ્ગિયા ભિક્ખુનિયો યાનેન યાયિસ્સન્તી’’તિ…પે… સચ્ચં કિર, ભિક્ખવે, છબ્બગ્ગિયા ભિક્ખુનિયો યાનેન યાયન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે… કથઞ્હિ નામ, ભિક્ખવે, છબ્બગ્ગિયા ભિક્ખુનિયો યાનેન યાયિસ્સન્તિ! નેતં, ભિક્ખવે, અપ્પસન્નાનં વા પસાદાય…પે… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

‘‘યા પન ભિક્ખુની યાનેન યાયેય્ય, પાચિત્તિય’’ન્તિ.

એવઞ્ચિદં ભગવતા ભિક્ખુનીનં સિક્ખાપદં પઞ્ઞત્તં હોતિ.

૧૧૮૫. તેન ખો પન સમયેન અઞ્ઞતરા ભિક્ખુની ગિલાના હોતિ, ન સક્કોતિ પદસા ગન્તું…પે… ભગવતો એતમત્થં આરોચેસું…પે… અનુજાનામિ, ભિક્ખવે, ગિલાનાય ભિક્ખુનિયા યાનં. એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –

૧૧૮૬. ‘‘યા પન ભિક્ખુની અગિલાના યાનેન યાયેય્ય, પાચિત્તિય’’ન્તિ.

૧૧૮૭. યા પનાતિ યા યાદિસા…પે… ભિક્ખુનીતિ…પે… અયં ઇમસ્મિં અત્થે અધિપ્પેતા ભિક્ખુનીતિ.

અગિલાના નામ સક્કોતિ પદસા ગન્તું.

ગિલાના નામ ન સક્કોતિ પદસા ગન્તું.

યાનં નામ વય્હં રથો સકટં સન્દમાનિકા સિવિકા પાટઙ્કી.

યાયેય્યાતિ સકિમ્પિ યાનેન યાયતિ, આપત્તિ પાચિત્તિયસ્સ.

૧૧૮૮. અગિલાના અગિલાનસઞ્ઞા યાનેન યાયતિ, આપત્તિ પાચિત્તિયસ્સ. અગિલાના વેમતિકા યાનેન યાયતિ, આપત્તિ પાચિત્તિયસ્સ. અગિલાના ગિલાનસઞ્ઞા યાનેન યાયતિ, આપત્તિ પાચિત્તિયસ્સ.

ગિલાના અગિલાનસઞ્ઞા, આપત્તિ દુક્કટસ્સ. ગિલાના વેમતિકા, આપત્તિ દુક્કટસ્સ. ગિલાના ગિલાનસઞ્ઞા, અનાપત્તિ.

૧૧૮૯. અનાપત્તિ ગિલાનાય, આપદાસુ, ઉમ્મત્તિકાય, આદિકમ્મિકાયાતિ.

દુતિયસિક્ખાપદં નિટ્ઠિતં.